Read Southern Kisi Pītɛ̍ Tāso̍o̍ 5 Bible Online

Pītɛ̍ Tāso̍o̍ 5 - Southern Kisi bible

Pītɛ̍ Tāso̍o̍ 5

¹Ya̍ Pītɛ̍, I̍ cho̍ nya̍ dīōmnda̍ŋ nda᷅ŋ dīmūllo̍ māā lāŋu̍nɔ̄ ka̍lāa̍ ō pīlɛ̍, le̍ ku̍ndā wānāā lāāla᷄ŋnda̍. Ndu̍yɛ̍ bōōndi̍i̍ nda̍ wa̍ Ki̍li̍ti̍ nyɛ̄ pālāa̍ tūsīo̍o̍ chōo̍ ve̍, ya̍ bɛ̍ɛ̍ I̍ wa̍ o̍ hɔ̄lndɔ̄. Ndu̍yɛ̍ bōōndi̍i̍ Ki̍li̍tī hu᷅ŋ ni̍ŋ mī wāŋnda̍ chē nāŋɔ̄ɔ̄ ndɔ̄ɔ̍ ve̍, ya̍ bɛ̍ɛ̍ I̍ cho̍ nāŋɔ̄ɔ̄ ndɔ̄ɔ̍ sɔ̄lā na̍a̍ nya̍ā. I̍ cho̍ nya̍ lāŋgba̍ā kālla̍ nyɔ̄ɔ̄lōo̍ a̍ yāndi̍i̍,

²lā mānda̍ ku̍ndā wānāā lāāla᷄ŋnda̍, ō Mɛ̄lɛ̄ka̍ hāndu̍ nya̍ lāchī le̍ māndāa̍ wo̍, mɛ̄ɛ̍ wānā ma̍ndāā lāsāa̍ ō māndā nu̍a̍ā sāa̍ ndūa̍a̍ yɛ̍. Ndu̍yɛ̍ lā tōsa̍ ndi̍ a̍ kɔ̄l chɛ̄lāa̍, mɛ̄ɛ̍ Mɛ̄lɛ̄ka̍ hɛ̄na̍ŋ yɛ̍, ō wa᷅ mɛ̄ɛ̍ nda̍ bāŋ wa̍nā i̍sɔ̍ɔ̍ le̍. Lā mānda̍ ku̍ndā wānāā lāāla᷄ŋnda̍ a̍ kɔ̄llo̍ kpo̍u̍, ndu̍yɛ̍ ō wa᷅ le̍ nyɛ̄ sɔ̄lāa̍ su̍e̍e̍ le̍.

³Wānāā Mɛ̄lɛ̄ka̍ ke̍ nya̍ le̍ mī lā wa̍ nda̍ māndāa̍ wa̍, lā hi̍ū nda̍ kīndīlā le̍. Kɛ̍ o̍ ko̍ŋ kɔ̍ɔ̍lī, lā wa̍ māā tāāmāsi̍ le̍ nda̍, o̍ nyɛ̄ o̍ nyɛ̄ ni᷄ŋ nya̍ tōsa̍.

⁴Tē lā tōsa̍ he̍ī pɛ̍ mbō lo̍ o̍ ko̍ŋ mī Ki̍li̍tī o̍ cho̍ māsāa̍ le̍ wānāā māndāā lāsāa̍ kpo̍u̍ wo̍, ō mīīŋgu̍ na̍nu᷄ŋ pɛ̍, ō chō nya̍ fāndā a̍ nyɛ̄ kɛ̄ndɛ̄ kɛ̍ndɛ̄ bɛ̄ndū, o̍ wa᷅ le̍ fɛ̍ɛ̍ŋ a̍ fɛ̍ɛ̍ŋ ndo̍.

⁵Ndu̍yɛ̍ nya̍ wānāā lāāla᷄ŋnda̍ ā tūa̍a̍, nya̍ bɛ̍ɛ̍ lā tūe̍i̍ la᷅ŋgba̍ā kālla̍ dīōm. O̍ ko̍ŋ kɔ̍ɔ̍lī, wānā o̍ wānā lā wa̍ wa̍nāā tūsīa̍ŋ nya̍ pi̍la̍ tɛ̄ɛ̄ŋ vēllāa̍ vēllē. Kāni̍ fu̍u̍le̍, ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ āā, “Mɛ̄lɛ̄ka̍ sīmu̍l wāna̍ yōŋgāa̍. Kɛ̍ ndu̍yɛ̍ wānā tu̍sīa̍ŋndo̍ ndu̍ ndu̍, kɛ̄ndɛ̄i̍ o̍ to̍sāl ndu̍ ni̍.”

⁶Le̍la̍ŋ, lā tūsi̍ŋ nya̍ pi̍la̍ Mɛ̄lɛ̄ka̍ o̍ bā bɛ̄ŋgu̍, o̍ nɔ̍ ho̍ō kpāāyāa̍ le̍ nya̍ māndāa̍ o̍ nyɛ̄ o̍ nyɛ̄ fe̍e̍ ni̍ŋ ndo̍. O̍ ko̍ŋ, ō nɔ̄lā mbō hēēlu̍ nya̍ te̍mā a̍ bōōndi̍i̍ bɛ̍nda̍ ndu̍ pi̍la̍ o̍ hɔ̄l le̍.

⁷Būūla᷄ŋ o̍ būūla᷄ŋ nya̍ nɔ̄ kpo̍u̍, lā nyīndu̍ o̍ Mɛ̄lɛ̄ka̍ lo̍. Kāni̍ fu̍u̍le̍ ndu̍ ma̍ndā nya̍ ni̍.

⁸Lā mānda̍ nya̍ pi̍la̍ a̍ mɛ̄ɛ̍ ka̍ālā nyāla̍ŋ lā nɔ̄ mī lā wa̍ yɛ̍, ndu̍yɛ̍ mī lā wa̍ nyɛ̄ kɛ̄ndɛ̄ ye̍ke̍ŋ. Kāni̍ fu̍u̍le̍, Māsa̍ Nyi̍nāā Wɔ̄ɔ̍ŋnda̍, o̍ cho̍ ya̍a̍mɔ̍ɔ̍nɔ̍ nya̍a̍ wo̍, ō chō bālɔ̄ɔ̍ mbo̍ wā nūūvīa̍a̍ le̍ wāna̍ o̍ cha᷅ mbō tɛ̄ɛ̄mbu̍u̍ wo̍, mɛ̄ɛ̍ kpɔ̍kūŋ bɛ̄ndōo̍ bālū vi̍sīa̍a̍ kɔ̄ɔ̄lī le̍ nda̍ bīyɔ̄ɔ̍ yɛ̍.

⁹Lā hīo̍u̍ la̍chi̍ a̍ tīīnda᷄ŋndo̍ dɔ̄wɔ̄ɔ̍ o̍ Mɛ̄lɛ̄ka̍ ni᷄ŋ, ndu̍yɛ̍ mī lā sīmu̍l Māsa̍ Nyi̍nāā Wɔ̄ɔ̍ŋnda̍. Nya̍ pi̍la̍ bɛ̍ɛ̍, lā sīnā māā dɛ̍nɛ̍ pa̍lāā nya̍ chō ho̍ō kēēkōo̍ lēni᷄ŋ ndo̍, māā ō cho̍ ko̍ni̍ nya̍ le̍ ī wāā le̍nde̍ i̍ yɔ̍nu̍ŋ te̍. Chāāŋāā nyāā wa̍nāā lāāla᷄ŋnda̍ bā o̍ bā fe̍e̍ o̍ chi̍e̍ēŋndo̍ chōo̍, nyɛ̄ pālāā pīlɔ̍ɔ̍ ko̍ni̍ cho̍ nda̍ kēēkōo̍ chōo̍ ni̍.

¹⁰Kɛ̍ ndu̍yɛ̍, Mɛ̄lɛ̄ka̍ o̍ to̍sāl nya̍ ho̍ō kɛ̄ndɛ̄i̍ lɔ̍ɔ̍ lɔ̍ɔ̍ wo̍, ō vēēlu̍ nya̍. Ō vēēlu̍ nya̍ le̍ nya̍ bɛ̍ɛ̍ mī lā sɔ̄la̍ nāŋɔ̄ɔ̄ ndɔ̄ɔ̍ le̍ fɛ̍ɛ̍ŋ a̍ fɛ̍ɛ̍ŋ, le̍ mɛ̄ɛ̍ nya̍ chō dīōm pīlɛ̍ nya̍ Ki̍li̍tī wa̍ā yɛ̍. Tē nyɛ̄ pālāa̍ kēēku̍ nya̍ chōo̍ le̍ te̍le̍ŋ bi̍ŋgī pɛ̍, he̍ī yɔ̄nu̍ŋ. Le̍la̍ŋ, nyɛ̄ o̍ nyɛ̍ cho̍ a̍ nya̍ o̍kɔ̄ɔ̄, Mɛ̄lɛ̄ka̍ pi̍la̍ cho̍ bɛ̄ɛ̄ndīāā. Ndu̍yɛ̍ ō chō tōsā mī lā si᷄m a̍ dīāllūŋ kālā yi̍, ndu̍yɛ̍ mī lā hīōū lāchī a̍ tīīnda᷄ŋndo̍ nɔ̄ɔ̍.

¹¹Mɛ̄lɛ̄ka̍ wa̍ ma̍sā le̍ fɛ̍ɛ̍ŋ a̍ fɛ̍ɛ̍ŋ. Āmi̍i̍nā.

¹²Sa̍i̍lāa̍ ma̍la̍ ya̍ yāu̍ bi̍ŋgīo̍o̍ ho̍ō pōōnyīa̍a̍ nāa̍ nya̍ chūā ni̍. I̍ chu̍a̍ ndu̍ kpe̍e̍kpe̍i̍ māā wānā la̍a̍la᷄ŋndo̍ ō wānā nɔ̍lā mā ti̍i̍nda̍ŋ ndo̍ o̍ cho̍ ni̍. Lā si᷄m nyɛ̍ kɛ̄ndɛ̄ yi̍ o̍ tīīnda᷄ŋ nya̍ nɔ̄ o̍ Mɛ̄lɛ̄ka̍ ni᷄ŋ ndo̍ chōo̍. Ndu̍yɛ̍ lā sīna̍ pɛ̍ŋgu̍ māā dīōmndā ya̍ I̍ cho̍ la᷅ŋ nya̍ dīmūllo̍ la̍ŋ, a̍ Mɛ̄lɛ̄ka̍ kɛ̄ndɛ̄i̍ ndūɛ̍i̍ kpe̍e̍kpe̍i̍ o̍kɔ̄ɔ̄ la̍ cho̍ ni̍. Lā wa̍ o̍ kɛ̄ndɛ̄ī ke̍ŋ bɛ̄ŋgu̍ pɛ̍ŋgu̍ o̍ pɛ̄ŋgu̍.

¹³Ku̍ndā wānāā lāāla᷄ŋnda̍ Ba̍bi̍lɔ̄ŋ chi̍e̍e̍, ā Mɛ̄lɛ̄ka̍ hɛ̄li̍ ha̍ā wa̍, nda̍ bɛ̍ɛ̍ ā yi᷄l nya̍ lāpi̍. Po̍ chu̍a̍ pīāāndōo̍ Ma̍kī o̍ cho̍ ho̍ō māā po̍ nī vi̍a̍lāā wo̍, ndu̍ bɛ̍ɛ̍ ō yi᷄l nya̍.

¹⁴Lā wa̍ yi᷅la᷅ŋndo̍ o̍ kāālāa̍ ni᷄ŋ māā wānāā lāāla᷄ŋ o̍ Chi̍i̍sū ni̍ŋ. Nya̍ cho̍ wānāa̍ Ki̍li̍tīa̍a̍ wa̍ ki̍nɛ̍i̍, mbɔ̄ Mɛ̄lɛ̄ka̍ ō ke̍ nya̍ kɔ̄l nyūlōo̍ fɔ̍.