Read Southern Kisi Pītɛ̍ Di̍i̍ŋ Ndɔ̄ɔ̍ 2 Bible Online

Pītɛ̍ Di̍i̍ŋ Ndɔ̄ɔ̍ 2 - Southern Kisi bible

Pītɛ̍ Di̍i̍ŋ Ndɔ̄ɔ̍ 2

¹Kɛ̍ ndu̍yɛ̍, mi̍ wānāā pɛ̄ɛ̄kū lāchōōwāa̍ a̍ di̍mi̍ māā, wānāa̍ su̍a̍ā le̍ Mɛ̄lɛ̄ka̍ wa̍ nda̍ chō ni̍ wa̍, ā lūɛ̄ī sīndɛ̄ wāŋnda̍ I̍sɔ̄lūɛ̄ī tɛ̍ɛ̄ŋ. Wānāā pɛ̄ɛ̄kū lāchōōwāa̍ ā lūɛ̄ī ni̍ŋ nya̍ tɛ̄ɛ̄ŋ, mā pɛ̄ɛ̄ku̍ wāŋnda̍ sɔ̄ɔ̍ŋ wɔ̍ɔ̍ŋndo̍ŋ, mā tɛ̄ɛ̄mbu̍u̍ tīīnda᷄ŋ nda̍ nɔ̄ o̍ Ki̍li̍ti̍ ni̍ŋ ndo̍. Wāŋnda̍ ha̍ā ā kɛ̄ɛ̄ ni̍ŋ Ma̍sānɔ̄ nda̍a̍ Ki̍li̍tī o̍ ba̍ŋa̍ nda̍ wo̍. Le̍ he̍ī, ā tōsā ni̍ŋ mī Mɛ̄lɛ̄ka̍ kēle̍ŋa̍ nda̍ nyɛ̄ pālāā bɛ̄ndōo̍ tūsī chōo̍.

²Wānāā lāāla᷄ŋnda̍ ta̍u̍ ā lō ni̍ŋ o̍ ko̍ŋ, mā wōu̍ bāla̍ŋ o̍ sɔ̄ɔ̍ŋ nɔ̍ɔ̍lɛ̍i̍ wānāā lāchōōwāā kāŋ ā pɛ̄ɛ̄kū wo̍ŋ ni᷄ŋ. O̍ ko̍ŋ kɔ̍ɔ̍lī, le̍ ka̍ālā ndāla̍ŋ mī wāŋnda̍ sōō dīōmndā wɔ̄ɔ̍ŋnda̍ŋ a̍ nɛ̄i̍ tōnya̍a̍ ho̍ō o̍kɔ̄ɔ̄.

³Wānāā hɔ̄ltē nyɛ̄ sɔ̄lāa̍ wānāā lāchōōwāā kāŋ ā chō ni̍. Ā wā ni̍ŋ nyɛ᷅m nyāa̍ŋ dīo̍o̍ a̍ pɛ̄ɛ̄kūlā lāchōōwālā nda̍ pɛ̄ɛ̄kū nya̍ la̍ŋ. Mɛ̄lɛ̄ka̍ chīi̍ nda̍ ni᷅ŋ yāmɛ̍ī kīlūl sīndɛ̄ pa̍. Ndu̍yɛ̍ ō chō ō bɛ̄ɛ̄ndīa̍ŋ le̍ nda̍ nyɛ̄ pālāa̍ tūsīo̍o̍ chōo̍. Ō chō nda̍ tɛ̄ɛ̄mbūū mɛ̄ɛ̍ o̍ di̍mi̍ yɛ̍.

⁴Nya̍ pi̍la̍ lā lōōnūŋ māā, ki̍i̍la̍a̍ Mɛ̄lɛ̄ka̍ā nda̍ a̍a̍ to̍sa̍ sīndɛ̄ yɔ̄ŋ wɔ̄ɔ̍ŋndo̍ wa̍ bɛ̍ɛ̍, Mɛ̄lɛ̄ka̍ me᷄l nda̍ le̍. Bīyɔ̄ɔ̍ nda̍ mbo̍ dūāū nda̍ o̍ fo̍ndāŋ nyɛ̄ pālāa̍. Lo̍ŋ nda̍ chō o̍ yɔ̄lɔ᷄ŋ o̍ nyūmnda̍ŋ ni᷄ŋ ni̍. Ndu̍yɛ̍ lo̍ŋ nda̍ chō lō ni̍ ha̍a̍a̍, mī pāa̍le̍ Mɛ̄lɛ̄ka̍ kɔ̄ɔ̄sā ni̍ŋ a̍ wāŋnda̍ le̍ŋ lē fūūlu̍u̍.

⁵Ndu̍yɛ̍, lā lōōnūŋ māā wānāa̍ nda̍ a̍a̍ kɛ̍ɛ̍ sīndɛ̄ Mɛ̄lɛ̄ka̍ wa̍ bɛ̍ɛ̍, Mɛ̄lɛ̄ka̍ me᷄l nda̍ le̍. Mbo̍ tūsī pīɔ̍ɔ̍, mi̍ mɛ̄ŋnda̍ŋ mā hu᷄ŋ di̍ū nda̍ kpo̍u̍. Nu̍u̍wā o̍ di̍mu̍l wāŋnda̍ dīo̍m Mɛ̄lɛ̄ka̍a̍ a̍ mɛ̄ɛ̍ wānā wa᷅ o̍ nɛ̄ī sa̍kpōo̍ chōo̍ yɛ̍ wo̍, a̍ wānāā ŋɔ᷄mmɛ̍ūwāā chēle̍ŋ, nda̍ Mɛ̄lɛ̄ka̍ pīŋi̍ ni̍.

⁶Lā sīnā māā mi̍ Mɛ̄lɛ̄ka̍ kīlūl wāŋnda̍ So̍dɔ̄m chi̍e̍e̍, a̍ Kōmo̍o̍lūā yāmɛ̍i̍, mbo̍ dīū nda̍ pa̍ku̍ a̍ yīŋnde̍ŋ. O̍ he̍ī ni᷄ŋ, Mɛ̄lɛ̄ka̍ chɔ᷄m tāāmāsi̍o̍o̍ ni̍ māā, le̍nde̍ i̍ cho̍ hūnɔ̄ɔ̄ yɔ̄nɔ᷄ŋ a̍ wānāa̍ kɛ̍ɛ̍ Mɛ̄lɛ̄ka̍ wa̍ ni̍.

⁷Lā lōōnūŋ māā a̍ bōōndi̍i̍ ke̍ŋ, mi̍ Mɛ̄lɛ̄ka̍ chīīndīāā Lɔ̍tū. Lɔ̍tū wa̍ wānā sa̍kpō Mɛ̄lɛ̄ka̍ o̍ hɔ̄l, ndu̍yɛ̍ mī ndu̍ o̍o̍ ta̍mbu̍ kɔ̄l ta̍u̍ a̍ nīīlūlā nɔ̄ɔ̄lɛ̍i̍la̍ wāŋnda̍ ha̍ā ā wa̍ ni᷄ŋ nda̍ŋ.

⁸Wānāā wɔ̄ɔ̍ŋnda̍ ha̍ā tɛ̄ɛ̄ŋ wānā sa̍kpōo̍ ho̍ō wa̍ ni̍. Ō wa̍ sɔ̄ɔ̍ŋ kɔ̄l vēsɛ̍i̍ nda̍ wa̍ mu̍ŋ to̍sāa̍ wo̍ŋ chɔ̄ɔ̍, ō wa̍ mu̍ŋ tūēīyɔ̄ɔ̍. Mi̍ sɔ̄ɔ̍ŋ mu᷅ŋ ŋ̄ tɛ̄ɛ̄mbūū ndu̍ kɔ̄l ta̍u̍ ta̍u̍.

⁹Sɔ̄ɔ̍ŋ mu᷅ŋ ki̍nɛ̍i̍, ŋ̄ chō māchūāā chɔ̄mndo̍ māā, Māsānɔ̄ɔ̍ Mɛ̄lɛ̄ka̍ ndu̍ si̍nā mɛ̄ɛ̍ o̍ pi̍ŋī wa̍nāā ndūa̍a̍ o̍ dɛ̍nɛ̍la̍ pa̍lāāla̍ŋ ni᷄ŋ yɛ̍. Ndu̍yɛ̍, ō sīnā mɛ̄ɛ̍ o̍ cho̍ wānāā wɔ̄ɔ̍ŋnda̍ nyɛ̄ pālāa̍ tūsī chōo̍, ndu̍yɛ̍ mbō tōsa̍ mā lo̍ o̍ bīyɔ̄ɔ̍ ni᷄ŋ mbō lo̍ o̍ ko̍ŋ ha̍a̍a̍, mī pāa̍le̍ o̍ kɔ̍ɔ̍sā ni̍ŋ a̍ wāŋnda̍ le̍ŋ lē fūūlu̍u̍ yɛ̍.

¹⁰Wānāa̍ to̍sā sɔ̍ɔ̍ŋ yēēma̍ŋ nda̍ŋ ŋ̄wāna̍ chi̍e̍e̍ya̍ŋ wɔ̄ɔ̍ŋ bɛ̄ndo᷄ŋ ŋ̄ dīmūl nda̍ wo̍ŋ nda̍, a̍ wānāa̍ chɛ᷅l le̍ lūɛ̄īyɔ̄ɔ̍ o̍ lēmāsā o̍ lēmāsā ba̍ bɛ̄ŋgu̍ le̍ wa̍, nda̍ kpe̍e̍kpe̍i̍ bɛ̍ɛ̍ Mɛ̄lɛ̄ka̍ chō nyɛ̄ pālāa̍ tūsī chōo̍ ni̍. Wānāā pɛ̄ɛ̄kū lāchōōwāa̍ ha̍ā ā nɔ̍ i̍si̍o̍o̍ŋ a̍ sɔ̄ɔ̍ŋ nda̍ tōsā mu̍ŋ ndo̍ŋ te̍. Ndu̍yɛ̍ yōŋgāa̍ pi̍la̍ nda̍ nɔ̄ ni̍. Īsīōōŋ bɛ̍ɛ̍ ā nɔ̍ le̍ Mɛ̄lɛ̄ka̍ ki̍i̍la̍a̍ ndūāā kɛ̍ndīa̍a̍ le̍, yīōūlā kɛ̍sɛ̍ kɛ̍sɛ̍la̍ŋ nda̍ yīōū nda̍ ni̍.

¹¹Ā yɔ᷄ŋ bɛ̍ɛ̍ āā ki̍i̍la̍a̍ Mɛ̄lɛ̄ka̍a̍ a̍ hi̍o̍ū wānāā pɛ̄ɛ̄kū lāchōōwāa̍ ha̍ā kpāāyā po̍lo̍ŋ nda̍ ni̍, tē ā hīŋ sūɛ̍i̍ wānāā pɛ̄ɛ̄kū lāchōōwāa̍ ha̍ā dɔ̄wɔ̄ɔ̄ Māsānɔ̄ɔ̍ Mɛ̄lɛ̄ka̍ lāchī pɛ̍, ā yi̍o̍ū nda̍ le̍.

¹²Wānāā pɛ̄ɛ̄kū lāchōōwāa̍ ha̍ā chō ko̍ mɛ̄ɛ̍ vīsīa̍a̍ chō yɛ̍. Ā tōsā ma̍to̍sāā sɔ̄ɔ̍ŋ māā lāvīsī. Ndu̍yɛ̍ mɛ̄ɛ̍ vīsīa̍a̍ chō nu̍a̍ā ma̍ vīālu᷄ŋ le̍ mī wāŋnda̍ hu᷄ŋ bi̍ī nda̍ mā dīī nda̍ yɛ̍, le̍nde̍ nda̍ chō ni̍. Sɔ̄ɔ̍ŋ nda̍ si̍nā le̍ wo̍ŋ mu̍ŋ nda̍ tɛ̄ɛ̄mbūū la̍bɛ̍ɛ̍ ni̍. Ā chō nda̍ hūnɔ̄ɔ̄ dīū mɛ̄ɛ̍ nda̍ dīū nu̍a̍ā vīsīa̍a̍ yɛ̍.

¹³Ndu̍yɛ̍, nyɛ̄ pālāā nda̍ wa̍ chāāŋnda̍ tūsīo̍o̍ chōo̍ wo̍, ā chō hūnɔ̄ɔ̄ pāāwā kōŋ chūā. Nda̍ bɛ̍ɛ̍ ā chō nda̍ nyɛ̄ pālāa̍ tūsī chōo̍ mɛ̄ɛ̍ nda̍ tōsa̍ a̍ chāāŋnda̍ yɛ̍. Yēēma̍ŋ wɔ̍ɔ̍ŋ ŋ̍ hɛ̍nāŋ nda̍ le̍ tōsāa̍ wo̍ŋ, tōsāa̍ mu̍ŋ īpāla̍ de᷅ŋ. Ndu̍yɛ̍ ko̍ŋ nɛ̍ŋī nda̍ kɔ̄lta̍ŋ ni̍. Kɛ̍ ndu̍yɛ̍ ka̍ālā ndāla̍ nda̍ tōsā la̍ŋ, sɔ̄ɔ̍ŋ lāsi̍ɔ̍mbo̍ŋ a̍ sɔ̄ɔ̍ŋ bɛ̄ɛ̄ ta̍mbɛ̍i̍yo̍ŋ kpo̍so̍ŋ. Ā bīī pɛ̍ ā sɔ̄ɔ̄ŋgu̍u̍ nya̍ chōo̍ o̍ chūūŋgi̍āŋndā nya̍ chūūŋgi̍āŋ le̍ nyɛ̄m dīa̍ŋ dīo̍o̍ la̍ŋ. Kɛ̍ ndu̍yɛ̍, hūīyo̍ ko̍ni̍ nda̍ wā nya̍ ni̍. Ndu̍yɛ̍, nyɛ̄ nda̍ tōsā ko̍ŋ ndo̍ hɛ̄na᷄ŋndo̍ pi̍la̍ nyɔ̄ɔ̍ hɛ̄nāŋ nda̍ ni̍.

¹⁴Wānā la̍nɔ̍ o̍ wānā la̍nɔ̍ nda̍ chɔ̍ ā hɛ̄nāŋ mā wa̍ a̍ ndu̍. Yēēmɛ̍i̍ cho̍ nda̍ ni᷄ŋ le̍ yɔ̄ŋ wɔ̄ɔ̍ŋndo̍ ve̍, ō cho̍ ye̍e̍mɛ̍i̍ chu̍ū le̍. Ā bīī pɛ̍, wānāa̍ nɔ̍ nu̍a̍ā lāāla᷄ŋ bɔ̍ɔ̍ le̍ wa̍, ā wōu̍ nda̍ o̍ yālāle̍ŋ ni᷄ŋ le̍ bāa̍ wōūwo̍ o̍ yɔ̄ŋ wɔ̄ɔ̍ŋndo̍ ni᷄ŋ. Ndu̍yɛ̍, wānāā hɔ̄ltē bɛ̄ndū nda̍ chō ni̍. Kɛ̍ ndu̍yɛ̍, nda̍ bɛ̍ɛ̍ Mɛ̄lɛ̄ka̍ tūsī ni̍ŋ nda̍ nyɛ̄ pālāa̍ chōo̍ fa̍ŋgā.

¹⁵Wāŋnda̍ ha̍ā bīī ma̍ fāŋa᷄ŋ ba̍ū o̍ nɛ̄ī sa̍kpōo̍ chōo̍, ma̍ lāāsīa̍ŋ. Mɛ̄ɛ̍ wāna̍ su̍a̍ā le̍ Mɛ̄lɛ̄ka̍ wo̍, Be̍la᷅m, po̍ Bi̍yɔ̄ɔ̄ wo̍, ō tōsa̍ yɛ̍, le̍nde̍ wāŋnda̍ ha̍ā ā tōsa̍ ni̍. Kāni̍ fo̍ndōle̍, Be̍la᷅m mbo̍ chɛ̄l mbo̍ tōsā yɔ̄ŋ wɔ̄ɔ̍ŋndo̍ le̍ nyɛ̄ sɔ̄lāa̍.

¹⁶Kɛ̍ ndu̍yɛ̍, lāŋu̍nɔ̄ɔ̍ ho̍ō mi̍ sōfɛ̍lɛ̍ ndɔ̄ɔ̍ kūūnā ndu̍ le̍ hīōūwɔ̄ɔ̍ lāchī a̍ dīɔ̄mīī fo̍ndūe̍i̍ kēŋ tōsāa̍. Mi̍ chɔ̄lōo̍ ho̍ō sūāā nāa̍ Be̍la᷅m chu̍a̍ māā wāna̍ chi̍e̍e̍. Mbo̍ bīī Be̍la᷅m tɛ̄ɛ̄ le̍ yɔ̄ŋ wɔ̄ɔ̍ŋ o̍ to̍sa̍ wo̍.

¹⁷Mɛ̄ɛ̍ so̍o̍ŋ māmɛ̄ŋndo̍ vēlā nu̍a̍ā sɛ̍ɛ̍ŋ, māmɛ̄ŋ bɛ̍ɛ̍ mā ve᷅ le̍ni̍ŋ te̍ yɛ̍, le̍nde̍ wānāā lāchōōwāa̍ ha̍ā chō ni̍. Ā chō māchūāā mɛ̄ɛ̍ pīɔ̍ɔ̍ hēl nu̍a̍ā, kɛ̍ mī hūēīyīī bɛ̄ndūe̍i̍ sūŋgū hɔ̄ŋndo̍, o̍ ko̍ŋ kɔ̍ɔ̍lī mbō fōōfi̍, ō se᷅ le̍ yɛ̍. Mɛ̄lɛ̄ka̍ bɛ̄ɛ̄ndi̍a̍a̍ fo̍ndāa̍ le̍ nda̍ o̍ so̍o̍ŋ nyūmmā kpīŋgbi̍ bɛ̍ndōo̍ ni᷄ŋ.

¹⁸Wāŋnda̍ ha̍ā bīī pɛ̍, ā tōl dīɔ̄mūŋ fo̍ndo᷄ŋ sūɛ̍i̍ mā dīmī āā nda̍ ki̍a̍lū yo̍ŋgāa̍ ni̍. Yēēma̍ŋ wɔ̍ɔ̍ŋndo̍ŋ, a̍ yēēma̍ŋ su̍u̍ndɛ̍i̍yo̍ŋ, ŋ̍ cha᷅ŋ o̍ wāna̍ chi̍e̍e̍yɛ̍ī ndɛ̄i̍ ni᷄ŋ ndo̍ŋ, a̍ mu̍ŋ nda̍ yēŋ wa̍nāā sɛ̄nɛ̄īya̍ yāŋɔ̄ɔ̄la̍ŋ ni̍. Nda̍ yɔ̍nūŋ ni̍ māā, wānāa̍ sɛ̄nɛ̄īya̍ a̍ hi̍a̍lūŋ nu̍a̍ā sɛ̄nɛ̄ī, mā fāŋa̍ŋ wa̍nāa̍ ku̍ē o̍ nɛ̄i̍ Mɛ̄lɛ̄ka̍a̍ chōo̍ le̍ wa̍ kɔ̄ɔ̄lī wa̍.

¹⁹Wānāā lāchōōwāa̍ ha̍ā ā chɛ᷄ŋ pɛ̍ ā chūe̍l wāŋnda̍ būŋgɛ̄i̍ māā, ā chō bāŋa᷄ŋndo̍ sɔ̄lā. Kɛ̍ ndu̍yɛ̍, nda̍ pi̍la̍ kālāa̍ bɛ̍ɛ̍, nda̍ chō o̍ chɛ̄le̍ŋ ni᷄ŋ yɔ᷅ŋ wɔ̄ɔ̍ŋndo̍ o̍ bā bɛ̄ŋgu̍. Kāni̍ fo̍ndōle̍, nyɛ̄ o̍ nyɛ̍ nɔ̍ kpāāyāa̍ wāŋndo̍ chōo̍ pɛ̍, mɛ̄ɛ̍ wānā ko̍ŋ chō māchūāā chīɔ̍ɔ̍ nyɛ̄ kōŋ o̍ bā bɛ̄ŋgu̍.

²⁰Chi̍i̍sū Ki̍li̍tī o̍ cho̍ Māsānɔ̍ nāa̍, ndu̍yɛ̍ mbo̍ wā wānā na̍a̍ pīŋīa̍a̍ wo̍, tē wāŋndo̍ sīna̍ wāna̍ o̍ cho̍ kpe̍e̍kpe̍i̍ yo̍ pɛ̍, o̍ ko̍ŋ mbō hɛ̄lu᷄ŋ sɔ̍ɔ̍ŋ wɔ̍ɔ̍ŋ chi̍e̍ēŋndo̍ŋ mu᷅ŋ, ŋ̍ tɛ̍ɛ̍mbūū mu᷅ŋ wāŋnda̍ wo̍ŋ pɛ̍, mɛ̄ɛ̍ ī wā su̍ɛ̍i̍ kɛ̍ndɛ̄. Kɛ̍ tē wānā ko̍ŋ ō mīīŋgu̍ŋ vɛ̍lɛ̄ kɔ̄ɔ̄lī pɛ̍, mī sɔ̄ɔ̍ŋ wɔ̍ɔ̍ŋ mu᷅ŋ o̍ chi̍e̍ēŋndo̍ ni᷄ŋ ŋ̍ yi̍u̍ yi̍u̍ ndu̍, ndu̍yɛ̍ mī ŋ̄ nɔ̄ ndu̍ kpāāyāa̍ chōo̍ pɛ̍, wānā ko̍ŋ mɛ̄ɛ̄lu̍la̍ ndɔ̄la̍ŋ la̍ hi̍a̍ū ni᷅ŋ lēwɔ̄ū a̍ mɛ̄ɛ̍ o̍ wa̍ o̍ tāse̍la̍ ndɔ̄ɔ̍ yɛ̍.

²¹Ndu̍ o̍o̍ wa᷅ bɛ̍ɛ̍ le̍tu̍u̍ mī nda̍ a̍a̍ wa̍nu̍ŋ le̍nde̍, nda̍ a̍a̍ ke̍ndū wɔ̍ fɛ̍ɛ̍ŋ kɔ᷅la̍ŋ o̍ nɛ̄ī sa̍kpōo̍ ho̍ō chōo̍ le̍. Ko̍ŋ ndu̍ o̍o̍ hi̍a̍ū nāŋɔ̄ɔ̄ a̍ kāndɔ̄ɔ̄ nda̍ kāndu̍ o̍ ko̍ŋ kɔ̍ɔ̍lī ma̍ māl lo̍, ndu̍ yɔ̍nūŋ ni̍ māā sɔ̄ɔ̍ŋ Mɛ̄lɛ̄ka̍ dīmi̍ māā wāŋnda̍ kɔ̍ le̍cho̍o̍ ma̍ dīmūl nda̍ mu̍ŋ ndo̍ŋ.

²²Nyɛ̍ yɔ̍nu̍ŋ a̍ nda̍ wo̍, ō chɔ᷄m māā tāle̍la̍ so̍o̍nu᷄ŋ la᷅ŋ nda̍ŋ lā chō tōnya̍ āā, “Tūŋndo̍ mīīŋgu̍ vɛ̄lɛ̄ kūsī ndɔ̄ɔ̍ dīo̍o̍.” Mi̍ tālo̍o̍ dīmī vɛ̄lɛ̄ āā, “Pēū nda̍ chīi̍ pūlɔ̄ɔ̄ wo̍ mīīŋgu̍ŋ vɛ̍lɛ̄ līnda᷄ŋndo̍ o̍ lōōlīo̍o̍ ni᷄ŋ.”