Read Southern Kisi Pītɛ̍ Di̍i̍ŋ Ndɔ̄ɔ̍ 3 Bible Online

Pītɛ̍ Di̍i̍ŋ Ndɔ̄ɔ̍ 3 - Southern Kisi bible

Pītɛ̍ Di̍i̍ŋ Ndɔ̄ɔ̍ 3

¹Chāāŋāā nīāā ka̍a̍lāa̍, yāu̍ di̍i̍ŋ ndɔ̄ɔ̍ ya̍ I̍ cho̍ ni᷅ŋ ho̍ō nya̍ pōōnyīāllo̍ ni̍. O̍ yāu̍la̍ ti̍ɔ̍ɔ̍ŋndā ya̍ I̍ po̍o̍nyi̍a̍a̍ la᷅ŋ nda̍ŋ ni᷄ŋ, mi̍ I̍ yi̍yāla᷄ŋ nya̍ a̍ sɔ̄ɔ̍ŋ nya̍ sīnā ni᷅ŋ ndo̍ŋ o̍kɔ̄ɔ̄. I̍ to̍sa̍ he̍ī le̍ nya̍ kɔ̄lta̍ŋ kpēēŋīa̍a̍ ni᷄ŋ, le̍ mī lā hīōū lāchī a̍ yīya᷄ŋnda̍ sa̍kpōla̍ŋ nɔ̄ɔ̍.

²I̍ hɛ̍na̍ŋ nya̍ mī lā lōōnu̍ŋ a̍ sɔ̄ɔ̍ŋ wānāa̍ su̍a̍ā le̍ Mɛ̄lɛ̄ka̍ wa̍ ā dīmu̍l pāāndū wāŋnda̍ wo̍ŋ. Ndu̍yɛ̍ vɛ̍lɛ̄, Māsānɔ̄ɔ̍ o̍ cho̍ wānā na̍a̍ pīŋīa̍a̍ wo̍, nyɛ̄ o̍ di̍mi̍ māā wāŋnda̍ ā tōsa̍, ndu̍yɛ̍ mi̍ wānāā o̍ ve᷅m hɔ̄ltē ndɔ̄ wa̍ ā dīmūl nya̍ ndu̍ wo̍, I̍ hɛ̍na̍ŋ mī lā lōōnu̍ŋ a̍ ndu̍.

³Lā ya᷄ŋ ni᷅la̍ŋ nyɛ̄ kɛ̄ndɛ̍ī o̍ nyɛ̄ ya̍ I̍ cho̍ ho̍ō nya̍ dīmūllo̍ wo̍. I̍ hɛ̍na̍ŋ nya̍ mī lā sīna̍ pɛ̄ŋgu̍ māā, tē pālɛ̍i̍ mɛ̍ɛ̍lɛ̄i̍ le̍ chi̍e̍ēŋndo̍ ho̍ō ī wa̍ fūūlūūwo̍ pɛ̍, wāŋnda̍ wā ni̍ŋ nyɛ̄ sɔ̄ɔ̍ŋ yēēma̍ŋ wɔ̍ɔ̍ŋ cho̍ nda̍ o̍ lākɔ̄l lo̍ŋ ŋ̄ dīmūl nda̍ wo̍ŋ, mu̍ŋ nda̍ tōsā ni̍ŋ ni̍. Ndu̍yɛ̍, wāŋnda̍ ha̍ā ā mām ni̍ŋ nya̍.

⁴Mā lo̍ o̍ ko̍ŋ mā nyūna̍ nya̍ āā, “Ō dīmi̍ nu̍a̍ā māā ō chō hūnɔ̄ɔ̄ le̍? Kɛ̍ ɔ̍ɔ̄ ni̍ko̍ ndu̍? Chɔ̍ŋ ni᷅ŋ a̍ bōōndi̍i̍ ke̍ŋ, fi̍nyāā nāa̍ kpo̍u̍ ā vī ni᷅ŋ, nyɛ̄ o̍ nyɛ̄ yɔ̄nu̍ŋ ndɔ̍ le̍. Mɛ̄ɛ̍ nyɛ̄ o̍ nyɛ̄ wa̍ chɔ̍ŋ a̍ kāndɔ᷄ŋ chi̍e̍ēŋndo̍ yɛ̍, le̍nde̍ ko̍ni̍ ŋ̍ cho̍ wɔ̄ pɛ̄ŋgo̍o̍ ho̍ō bɛ̍ɛ̍ ni̍.”

⁵Kīɔ̍ɔ̍ ko̍ni̍ wāŋnda̍ ha̍ā kɛ̄ɛ̍ le̍ tōnya̍a̍ chɛ̄lɔ̄ɔ̍ ni̍, māā bōōndi̍i̍ Mɛ̄lɛ̄ka̍ wa̍ sīndɛ̄ ha̍la̍a̍ chōo̍ cho̍o̍, a̍ chi̍e̍ēŋndo̍ tōōsīa̍a̍ ve̍, māā a̍ mɛ̄ŋnda̍ŋ Mɛ̄lɛ̄ka̍ tōōsi̍a̍a̍ chi̍e̍ēŋndo̍ ni̍, māā o̍ mɛ̄ŋnda̍ŋ ni᷄ŋ chi̍e̍ēŋndo̍ fūla̍ ni̍.

⁶Ndu̍yɛ̍ mā kɛ̄ɛ̍ tōnya̍a̍ chɛ̄lɔ̄ɔ̍ māā a̍ mɛ̄ŋnda̍ŋ vɛ̄lɛ̄ ko̍ni̍ Mɛ̄lɛ̄ka̍ ndu̍ o̍o̍ tɛ̍ɛ̍mbu̍u̍ sīndɛ̄ chi̍e̍ēŋndo̍ ni̍, ndu̍ yɔ̍nūŋ ni̍ māā a̍ mɛ̄ŋmā hūna᷄ŋ.

⁷Kɛ̍ ndu̍yɛ̍ ō fūla̍ wɔ̍ bɛ̍ɛ̍ o̍ ko̍ŋ kɔ̍ɔ̍lī, mi̍ Mɛ̄lɛ̄ka̍ dīmī vɛ̄lɛ̄ māā ō chō ha̍la̍a̍ chōo̍ cho̍o̍ māndāa̍ a̍ chi̍e̍e̍ŋ cho̍ pɛ̄ŋgo̍o̍ ho̍ō wo̍, ha̍a̍a̍ mbō lo̍ o̍ ko̍ŋ mī pāa̍le̍ o̍ lu̍ām ni̍ŋ mu̍ŋ nde̍ŋ lē fūūlu̍u̍. Mɛ̄lɛ̄ka̍ chō mu̍ŋ māndāa̍ ha̍a̍a̍ mbō lo̍ o̍ ko̍ŋ mī pāa̍le̍ le̍ŋ lē fūūlu̍u̍, pāa̍le̍ Mɛ̄lɛ̄ka̍ kɔ̄ɔ̄sā ni̍ŋ a̍ wāŋnda̍ kpo̍u̍, ndu̍yɛ̍ mbō tɛ̄ɛ̄mbu̍u̍ wānāa̍ kɛ̍ɛ̍ ndu̍ wa̍ le̍ŋ.

⁸Kɛ̍ ndu̍yɛ̍, lā pu̍ɛ̍ɛ̍nu᷄ŋ a̍ he̍ī le̍ chāāŋāā nīāā ka̍a̍lāa̍, māā ō cho̍ mɛ̄ɛ̍ na̍a̍ ŋ̄ tūū te̍le̍ŋnda̍ŋ yɛ̍ le̍ Māsānɔ̄ɔ̍ Mɛ̄lɛ̄ka̍ ndu̍ tu̍ū la̍ŋ te̍. Kāni̍ fo̍ndōle̍, ndu̍ chu̍a̍ pāa̍le̍ŋ lē pīlɛ̍, a̍ wɔ̄sīlā wāa̍la̍ŋ māā nyɛ̄ pīlɛ̍. Ndu̍ ndu̍ chu̍a̍ te̍le̍ŋnda̍ ti̍ɔ̍ɔ̍ŋndā lāŋ māā nyɛ̄ pīlɛ̍ kpe̍ la̍ cho̍ ni̍.

⁹Wāŋnda̍ ā pūm ā yīya̍ŋ māā, Māsānɔ̄ɔ̍ Mɛ̄lɛ̄ka̍ chō pīndīe̍i̍ le̍ nyɛ̄ o̍ chu̍a̍ būŋgɛ̄i̍ yo̍ tōsāa̍. Kɛ̍ ndu̍yɛ̍ ī cho̍ le̍nde̍ le̍. Ō chō māchūāā nya̍ bīūwɔ᷄ŋndo̍. Kāni̍ fu̍u̍le̍, ō hɛ̄na̍ŋ mī wānā o̍ wānā o̍ hu̍ŋ wa᷅ ō tɛ̄ɛ̄mbāā le̍. Ō hɛ̄na̍ŋ mī wānā o̍ wānā o̍ ma̍l yɔ̄ŋndā ndɔ̄la̍ wɔ̍ɔ̍ŋnda̍ŋ.

¹⁰Hūnɔ̄ɔ̍ Māsānɔ̄ɔ̍ Mɛ̄lɛ̄ka̍a̍ ō wōōlū ni̍ŋ ko̍ wa᷅ŋnda̍ mɛ̄ɛ̍ vīīnɔ̄ɔ̍ hūŋ nu̍a̍ā wānā ve᷅ ndu̍ kɔ̄l te̍ yɛ̍. O̍ pāa̍le̍ le̍ŋ chōo̍, ha̍la̍a̍ chōo̍ cho̍o̍ o̍ fāŋāŋ ni̍ŋ o̍ lēpīlɛ̍ ni᷄ŋ kpe̍, a̍ bɔ̄ɔ̄lūūwo̍ kpu̍ū bɛ̄ndū bɛ̍ndū. Ndu̍yɛ̍, lōo̍ŋ chōo̍ cho̍o̍ a̍ chi̍e̍ēŋndo̍ a̍ nyɛ̄ o̍ nyɛ̍ cho̍ lēchōo̍ ŋ̄ chō ŋɔ̄ mī ŋ̄ tāmbu̍.

¹¹Mɛ̄ɛ̍ nya̍ sīnā nu̍a̍ā māā nyɛ̄ o̍ nyɛ̄ fe̍e̍ cho̍ hūnɔ̄ɔ̄ wā ō tɛ̄ɛ̄mbāā le̍nde̍ yɛ̍, ndu̍yɛ̍ mi̍ lā wā chūmndo̍ bōōnde̍i̍ he̍ī le̍ pāa̍le̍ Mɛ̄lɛ̄ka̍ kɔ̄ɔ̄sā ni̍ŋ a̍ chi̍e̍ēŋndo̍ le̍ŋ yɛ̍, mɛ̄ɛ̍ ka̍ālā nyāla̍ŋ lā wa̍ ni̍ko̍ māā wānāa̍ cho̍ a̍ yɔ̄ŋga᷄ŋ o̍ Mɛ̄lɛ̄ka̍ lo̍ kpo̍u̍. Ndu̍yɛ̍ lā kīndi̍ mī pāa̍le̍ le̍ŋ lē kēle̍ŋa̍ fūūlūū. Pāa̍le̍ le̍ŋ yīŋnde̍ŋ lē chō ha̍la̍a̍ chōo̍ cho̍o̍ lōmɔ̄ɔ̄ ni̍ mbō tāmbu̍. Ndu̍yɛ̍ hāŋgu̍l bɛ̄ndōo̍ ō tēēŋgīāā ni̍ŋ lo̍o̍ŋ chōo̍ cho̍o̍.

¹³Kɛ̍ ndu̍yɛ̍, Mɛ̄lɛ̄ka̍ chūe̍l na̍a̍ būŋgɛ̄i̍ le̍ na̍a̍ ha̍la̍ sɛ̄nɛ̄īyo̍ kīo̍o̍ a̍ chi̍e̍ēŋ sɛ̄nɛ̄īyo̍. Lo̍ŋ ndu̍ ndu̍, nyɛ̄ o̍ nyɛ̄ fe̍e̍ kɔ̄la̍ŋ o̍ nɛ̄ī sa̍kpō. Būŋgɛ̄ī na̍a̍ ŋ̄ chō Mɛ̄lɛ̄ka̍ chūmndo̍ le̍ tōsāa̍ ve̍, ndi̍ cho̍ he̍ī ni̍.

¹⁴Chāāŋāā nīāā ka̍a̍lāa̍, mɛ̄ɛ̍ nya̍ chō nu̍a̍ā chūmndo̍ le̍ pāa̍le̍ sɔ̄ɔ̍ŋ mu᷅ŋ ŋ̄ chō yɔ̄nɔ᷄ŋ nde̍ŋ yɛ̍, lā kīndi̍ o̍ nɛ̄ī o̍ nɛ̄ī ni̍ŋ, te̍ lā hu᷄ŋ si᷅m ndu̍ o̍ hɔ̄l pɛ̍ ō hīni̍ kɔ̄l a̍ nya̍, lā nɔ᷅ yɔ̄ŋ o̍ yɔ̄ŋ wɔ̄ɔ̍ŋ te̍, ndu̍yɛ̍ lā nɔ᷅ sɔ̍ŋ te̍.

¹⁵Ndu̍yɛ̍, lā yīya̍ŋ a̍ bīūwɔ᷄ŋ Māsānɔ̄ɔ̍ Mɛ̄lɛ̄ka̍ nāa̍ ō chō wo̍, māā fo̍ndāa̍ o̍ cho̍ nya̍ ko̍ŋ ki̍o̍o̍ le̍ mī lā pēŋ ni̍. Nyɛ̄ pīlɛ̍ kōŋ kpe̍ chāa̍ŋ nāā ka̍a̍lāa̍ Pɔ̍ɔ̄, o̍ po̍o̍nyi̍a̍a̍ a̍ kɔ̄l kālu̍ Mɛ̄lɛ̄ka̍ ke̍ ndu̍ wo̍ ni̍ mbo̍ dīmūl nya̍.

¹⁶Yāu̍ o̍ yāu̍ o̍ po̍o̍nyi̍a̍a̍ a̍ sūɛ̍i̍ pi᷅lɛ̍i̍ he̍ī o̍kɔ̄ɔ̄ kpe̍ o̍ so̍ō ni̍. Ndu̍yɛ̍, būŋga᷄ŋ ŋ̄ pūm o̍ yāu̍la̍ ndɔ̄la̍ o̍ po̍o̍nyi̍a̍a̍ la̍ŋ ni᷄ŋ, kālo̍o̍ pi̍la̍ ŋ̍ ke̍ndū pɛ̄ŋgu̍ si̍nā ni̍. Wānāa̍ nɔ̍ kɔ̍l kālu̍ bɔ̍ɔ̍ le̍ wa̍, a̍ wānāa̍ nɔ̍ la̍a̍la᷄ŋ bɔ̍ɔ̍ le̍ wa̍, nda̍ nɔ̍ nyɛ̄ kpe̍e̍kpe̍i̍ būŋgāŋ mu᷅ŋ ŋ̄ chō dīmīo̍o̍ wo̍ sīŋgāfīlāa̍ ni̍, mɛ̄ɛ̍ nda̍ sīŋgāfīlā bu̍ŋgāŋ yɛ̍ yɔ̍ŋ o̍ Yāu̍ Mɛ̄lɛ̄ka̍a̍ ni᷄ŋ yɛ̍. Ā tōsa̍ yɛ̄ le̍nde̍ pɛ̍, mɛ̄ɛ̍ nda̍ pi̍la̍ tōsa̍ mi̍ Mɛ̄lɛ̄ka̍ wā nda̍ hūnɔ̄ɔ̄ tɛ̄ɛ̄mbūū.

¹⁷Kɛ̍, nya̍ nya̍ sīnā ni᷅ŋ sɔ̄ɔ̍ŋ mu᷅ŋ, chāāŋāā nīāā ka̍a̍lāa̍. Le̍la̍ŋ, lā mānda̍ŋ, yɔ̄ŋi̍ wānāa̍ tu̍i̍ī ka̍ŋ Mɛ̍lɛ̄ka̍ dīōm te̍ wa̍, ā fāŋa̍ nya̍ o̍ nɛ̄ī sa̍kpōo̍ chōo̍ a̍ pɛ̄ɛ̄kūlā ndāla̍ lāchōōwāla̍ŋ, o̍ ko̍ŋ, mī lā fāŋa̍ŋ o̍ tīīnda᷄ŋ ka̍lā ka̍lā nya̍ nɔ̄ wo̍ chōo̍.

¹⁸Kɛ̍ nya̍ nya̍, lā hīo̍u̍ la̍chi̍ a̍ Māsānɔ̍ nāa̍ Chi̍i̍sū Ki̍li̍ti̍ tōlɔ̄ɔ̍ kɔ̄ɔ̄lī, o̍ cho̍ wānā na̍a̍ pīŋīa̍a̍ wo̍, le̍ mbō hīōū lāchī a̍ nya̍ kɛ̄ndɛ̄i̍ ndūɛ̍i̍ tōsāllo̍. Ndu̍yɛ̍ lā hīo̍u̍ la̍chi̍ a̍ ndu̍ chɔ̄ɔ̄lū sīnāa̍ wāna̍ o̍ cho̍ kpe̍e̍kpe̍i̍ yo̍. Lā ŋ̄ sāŋga̍la᷅ŋ ndu̍, pɛ̄ŋgo̍o̍ ho̍ō ni̍ a̍ fɛ̍ɛ̍ŋ a̍ fɛ̍ɛ̍ŋ. Āmi̍i̍nā.