Read Southern Kisi Chɔ᷄ŋ Tāso̍o̍ 2 Bible Online

Chɔ᷄ŋ Tāso̍o̍ 2 - Southern Kisi bible

Chɔ᷄ŋ Tāso̍o̍ 2

¹Chūāūwāā nīāā ka̍a̍lāā, I̍ cho̍ nya̍ dīōmnda̍ŋ nda᷅ŋ pōōnyīāllo̍ le̍ nya̍ mālāa̍ yɔ̄ŋi̍ nya̍ tōsa̍ yɔ᷅ŋ wɔ̄ɔ̍ŋndo̍. Kɛ̍ ndu̍yɛ̍ wānā o̍ wāna̍ to̍sa̍ yɔ̄ŋ wɔ̄ɔ̍ŋndo̍ pɛ̍, wānā cho̍ o̍ su̍a̍ā le̍ na̍a̍ nāa̍ Mɛ̄lɛ̄ka̍ Fi̍nyā nāa̍ chūā wo̍, ndu̍ yɔ̍nūŋ ni̍ māā Chi̍i̍sū Ki̍li̍tī o̍ cho̍ sa̍kpō Mɛ̄lɛ̄ka̍ o̍ hɔ̄l lo̍.

²Ndu̍ cho̍ sa̍lāa̍ o̍ fa̍ŋa̍ yɔ̄ŋndā nāāla̍ wɔ̍ɔ̍ŋnda̍ŋ ndo̍ ni̍. Kɛ̍ ō cho̍ ko̍ yɔ᷅ŋndā nāāla̍ wɔ̍ɔ̍ŋnda̍ŋ te̍ o̍ fa̍ŋa̍ le̍, a̍ yɔ̄ŋndā wɔ̄ɔ̍ŋndā wāŋnda̍ kpo̍u̍ o̍ chi̍e̍ēŋndo̍ chōo̍ o̍ fa̍ŋa̍ ni̍.

³Tē ŋ̄ tōsa̍ nyɛ̄ Mɛ̄lɛ̄ka̍ dīmūl na̍a̍ wo̍ pɛ̍, mɛ̄ɛ̍ le̍nde̍ na̍a̍ ŋ̄ lōōkū si̍nā ni̍ māā ŋ̄ sīnā wa᷅na̍ Mɛ̄lɛ̄ka̍ chō kɛ̍sɛ̍ kɛ̍sɛ̍ wo̍.

⁴Tē wāŋndo̍ dīmi̍ pɛ̍ māā, ō sīnā wa᷅na̍ Mɛ̄lɛ̄ka̍ chō kɛ̍sɛ̍ kɛ̍sɛ̍ wo̍, kɛ̍ ō to̍sā nyɛ᷅ Mɛ̄lɛ̄ka̍ dīmūl ndu̍ wo̍ le̍, mɛ̄ɛ̍ wāna̍ lāchōōwāa̍ o̍ cho̍ ni̍, ndu̍yɛ̍ mɛ̄ɛ̍ tōnya̍ Mɛ̄lɛ̄ka̍a̍ cho̍ ndu̍ o̍ kɔ̄l te̍.

⁵Kɛ̍ wānā o̍ wāna̍ to̍sa̍ nyɛ̄ dīōm ndɔ̄ɔ̍ dīmī wo̍ pɛ̍, mɛ̄ɛ̍ wānā ko̍ŋ kāālā Mɛ̄lɛ̄ka̍ dɔ̄ū ndu̍ o̍ kɔ̄l lo̍ ō fūūlu̍u̍ mɛ̍ɛ̄. Nyɛ̍ to̍sā mī ŋ̄ sīna̍ kpe̍e̍kpe̍i̍ māā ŋ̄ chō dīōm pīlɛ̍ na̍a̍ Mɛ̄lɛ̄ka̍ wa̍ā wo̍ cho̍ ho̍ō ni̍,

⁶wānā o̍ wāna̍ di̍mi̍ pɛ̍ māā ō chō dīōm pīlɛ̍ nda̍ Mɛ̄lɛ̄ka̍, mɛ̄ɛ̍ mbō nɔ̄ ka̍a̍ mɛ̄ɛ̍ Chi̍i̍sū ndu̍ o̍o̍ nɔ̍ ka̍a̍ yɛ̍.

⁷Chāāŋāā nīāā ka̍a̍lāa̍, ō cho̍ sa̍wā sɛ̍nɛ̄ī le̍ ya̍ I̍ cho̍ nya̍ ho̍ō pōōnyīāl te̍. Sāwā dɔ̍u̍nu᷄ŋ ni᷅ŋ pāāndū wo̍ o̍ cho̍ ni̍, chɔ̍ŋ bɛ̍ɛ̍ a̍ bōōndi̍i̍ nya̍ sīmnu᷄ŋ wa̍nāā lāāla᷄ŋ o̍ Chi̍i̍sū ni̍ŋ nde̍. Sāwā pa̍a̍ndū kōŋ ndu̍ yɔ̍nūŋ ni̍ māā yōōŋgū nya̍ tūēī yo̍.

⁸Kɛ̍ ndu̍yɛ̍ o̍ nɛ̄īyo̍ ō pīlɔ̍ɔ̍ ni᷄ŋ, sāwā sɛ̍nɛ̄īyo̍ ya̍ I̍ cho̍ nya̍ pōōnyīāllo̍ ni̍. Ndu̍yɛ̍, ka̍a̍ Chi̍i̍sōo̍ a̍ ka̍ā nyāa̍, ō chɔ᷄m māā sāwāa̍ ho̍ō chō tōnya̍. Kāni̍ fo̍ndōle̍, nyūmnda̍ŋ mā chō ni᷅ŋ fāŋa᷄ŋndo̍ mi̍ nyɛ̄ wa̍wo̍ŋ kpe̍e̍kpe̍i̍yo̍ wā ni᷅ŋ dīōndɔ̄ɔ̍.

⁹Wānā o̍ wāna̍ di̍mi̍ pɛ̍ māā ō chō o̍ nyɛ̄ wa̍wo̍ŋndo̍ ni᷄ŋ, o̍ ko̍ŋ kɔ̍ɔ̍lī mbō tu᷄l chāa̍ŋ ndɔ̄ wa̍nā la̍a̍la᷄ŋndo̍ lēyɛ̄ pɛ̍, mɛ̄ɛ̍ ō chō wɔ̄ o̍ nyūmnda̍ŋ ni᷄ŋ.

¹⁰Wānā o̍ wāna̍ ka̍a̍la̍ chāa̍ŋ ndɔ̄ wa̍nā la̍a̍la᷄ŋndo̍ pɛ̍, mɛ̄ɛ̍ ō chō o̍ nyɛ̄ wa̍wo̍ŋndo̍ ni᷄ŋ. Ndu̍yɛ̍, nyɛ̄ o̍ nyɛ̄ bɛ̍ɛ̍ cho̍ o̍ nyɛ̄ wa̍wo̍ŋndo̍ ni᷄ŋ mbō kōōnda᷅ŋ ndu̍ mbō de᷄l te̍.

¹¹Kɛ̍ wānā o̍ wāna̍ tu̍l chāa̍ŋ ndɔ̄ wa̍nā la̍a̍la᷄ŋndo̍ lēyɛ̄ pɛ̍, mɛ̄ɛ̍ ō chō wɔ̄ o̍ nyūmnda̍ŋ ni᷄ŋ. Mɛ̄ɛ̍ wānā wa̍ā le̍nde̍ ō chō wɔ̄ sɔ̄ɔ̍ŋ mānyūmndo̍ŋ tōsāa̍. Ō si̍nā na̍a̍ o̍ cho̍ kɔ̄la̍ŋ nda̍ le̍, kāni̍ fo̍ndōle̍ nyūmnda̍ŋ mā sūūmi̍a̍a̍ ndu̍.

¹²Chūāūwāā nīāā ka̍a̍lāa̍, I̍ cho̍ nya̍ dīōmnda̍ŋ nda᷅ŋ pōōnyīāllo̍, kāni̍ fo̍ndōle̍, Mɛ̄lɛ̄ka̍ ma᷄l nya̍ le̍ yɔ̄ŋndā nyāla̍ wɔ̍ɔ̍ŋnda̍ŋ le̍ sa̍bu̍ Chi̍i̍sōo̍.

¹³Nya̍ lāŋgba̍ā kālla̍, I̍ cho̍ nya̍ dīōmnda̍ŋ nda᷅ŋ pōōnyīāllo̍, kāni̍ fo̍ndōle̍, le̍ mɛ̄ɛ̍ nya̍ sīna̍ wāŋndo̍ ho̍ō o̍ wa̍ ni᷅ŋ kāni̍ ma̍si̍ndɛ̄ chɔ̍ŋ ha̍a̍a̍, a̍ nyɛ̄ o̍ nyɛ̄ kāndɔ᷄ŋndo̍ wo̍ yɛ̍. Nya̍ chūāā pīāāndūa̍a̍, I̍ cho̍ nya̍ dīōmnda̍ŋ nda᷅ŋ pōōnyīāllo̍, kāni̍ fo̍ndōle̍, le̍ mɛ̄ɛ̍ nya̍ yēm Māsa̍ Nyi̍nāā Wɔ̄ɔ̍ŋnda̍ yɛ̍. Nya̍ chūāūwāā nīāā ka̍a̍lāa̍, I̍ cho̍ nya̍ dīōmnda̍ŋ nda᷅ŋ po̍o̍nyīāllo̍, kāni̍ fo̍ndōle̍, le̍ mɛ̄ɛ̍ nya̍ sīna̍ Mɛ̄lɛ̄ka̍ Fi̍nyā nāa̍ yɛ̍.

¹⁴Nya̍ lāŋgba̍ā kālla̍, I̍ cho̍ nya̍ dīōmnda̍ŋ nda᷅ŋ pōōnyīāllo̍, kāni̍ fo̍ndōle̍, le̍ mɛ̄ɛ̍ nya̍ sīna̍ wāŋndo̍ ho̍ō o̍ wa̍ kāni̍ ma̍si̍ndɛ̄, chɔ̍ŋ ha̍a̍a̍ a̍ nyɛ̄ o̍ nyɛ̄ kāndɔ᷄ŋndo̍ wo̍ yɛ̍. Nya̍ chūāā pīāāndūa̍a̍, I̍ cho̍ nya̍ dīōmnda̍ŋ nda᷅ŋ pōōnyīāllo̍, kāni̍ fo̍ndōle̍, lē mɛ̄ɛ̍ nya̍ nɔ̄ kɔ̄ltā sīmūlāāla̍ŋ mi̍ dīo̍m Mɛ̄lɛ̄ka̍a̍ wā o̍ kɔ̄ltā nyāla̍ŋ ni᷄ŋ, ndu̍yɛ̍ mi̍ lā yām Māsa̍ Nyi̍nāā Wɔ̄ɔ̍ŋnda̍ yɛ̍.

¹⁵Yēēmɛ̍i̍ le̍ chi̍e̍ēŋndo̍ ho̍ō a̍ nyɛ᷄m cho̍ lēni᷄ŋ ndo̍ŋ, ī hi̍a̍ū nya̍ o̍ kɔ̄l kɔ̄ɔ̄lī le̍. Wānā o̍ wāna̍ ka̍a̍la̍ chi̍e̍ēŋndo̍ pɛ̍, mɛ̄ɛ̍ ō nɔ̍ ka̍ālā Mɛ̄lɛ̄ka̍a̍ o̍ kɔ̄l te̍.

¹⁶Kāni̍ fo̍ndōle̍, nyɛ̄ o̍ nyɛ̍ wɔ̄ɔ̍ŋ cho̍ o̍ chi̍e̍ēŋndo̍ ho̍ō ni᷄ŋ, kɔ̍ bi̍ī a̍ yēēma̍ŋ cho̍ o̍ wāna̍ chi̍e̍e̍yɛ̍ī wɔ̄ɔ̍ŋnde̍ he̍ī ni᷄ŋ ndo̍ŋ, a̍ nyɛ̄m wāŋnda̍ chā mā lūɛ̄ī lēhɔ̄l o̍ mu̍ŋ ndo̍ŋ, a̍ nyɛ̄ o̍ nyɛ̄ wāŋnda̍ kīālū yo̍ŋgāa̍ a̍ mu̍ŋ, ō cho̍ Mɛ̍lɛ̄ka̍ Fi̍nyā nāa̍ le̍ ma̍l mu̍ŋ te̍. O̍ chi̍e̍ēŋndo̍ ho̍ō ni᷄ŋ ŋ̍ fu̍la̍ ni̍.

¹⁷Chi̍e̍ēŋndo̍ chō chūwɔ̄ɔ̄ a̍ yēēma̍ŋ cho̍ lē ni᷄ŋ ndo̍ŋ fa̍ū. Kɛ̍ wānā o̍ wāna̍ to̍sa̍ nyɛ̄ Mɛ̄lɛ̄ka̍ hɛ̄na̍ŋ ndo̍ pɛ̍, ō chō wā yōōmū le̍ fɛ̍ɛ̍ŋ a̍ fɛ̍ɛ̍ŋ.

¹⁸Chūāā nīa̍a̍, ŋ̄ chō ni᷅ŋ kpɛ̍ɛ̍lūŋ a̍ te̍le̍ŋ nyɛ̄ o̍ nyɛ̄ chō hūnɔ̄ɔ̄ mɛ̄ɛ̄lū wo̍. Lā tūēī māā ya̍a̍mɔ̍ɔ̍ Ki̍li̍tīo̍o̍ chō hūnɔ̄ɔ̄. Kɛ̍ o̍ su̍ŋ su̍ŋndo̍ ho̍ō ni᷄ŋ bɛ̍ɛ̍, ya̍a̍mɔ̍ɔ̍wa̍a̍ Ki̍li̍tīa̍a̍ ā hīŋ ni᷅ŋ. Tāāmāsi̍o̍o̍ cho̍ ho̍ō ni̍, māā ŋ̄ chō ni᷅ŋ fūūlūūwo̍ o̍ te̍le̍ŋ nyɛ̄ o̍ nyɛ̄ chō hūnɔ̄ɔ̄ o̍ mɛ̄ɛ̄lu̍la̍ŋ ndo̍.

¹⁹Ya̍a̍mɔ̍ɔ̍wa̍ ha̍ā ā wa̍ pāāndū na̍a̍ chōo̍, kɛ̍ ma̍ fāŋa᷄ŋ. Kɛ̍ o̍ sa̍na̍a̍ īsɔ̄ɔ̍ ni᷄ŋ ā ve̍ na̍a̍ chōo̍ kpe̍e̍kpe̍i̍ le̍. Kāni̍ fo̍ndōle̍ tē nda̍ a̍a̍ wa̍ na̍a̍ chōo̍ lēkɛ̍ndɛ̍ī pɛ̍, ā wa̍ hīōūwɔ̄ɔ̄ lāchī a̍ wāa̍ na̍a̍ chōo̍. Kɛ̍ ndu̍yɛ̍ ma̍ fāŋa᷄ŋ na̍a̍ chōo̍. He̍ī chɔ̍m ni̍ māā nda̍ ki̍nɛ̍i̍, ō pīlɛ̍ bɛ̍ɛ̍ ve̍ na̍a̍ chōo̍ kpe̍e̍kpe̍i̍ le̍.

²⁰Kɛ̍ nya̍ nya̍, Ki̍li̍tī to̍sa̍ mi̍ Nyi̍na̍ Kāsīo̍o̍ tūāl nya̍ kɔ̄ɔ̄lī. Ndu̍yɛ̍, nya̍ kpe̍de̍ lā sīna̍ ni᷅ŋ tōnya̍a̍.

²¹Ō cho̍ mī I̍ di̍mi̍ māā lā si̍nā to᷅nya̍a̍ le̍ le̍, le̍la̍ŋ mī I̍ wa̍ nya̍ dīōmnda̍ŋ nda᷅ŋ pōōnyīāl te̍. I̍ cho̍ māchūāā nya̍ la̍ŋ pōōnyīāllo̍, kāni̍ fu̍u̍le̍ le̍ mɛ̄ɛ̍ nya̍ sīnā to᷅nya̍a̍ yɛ̍. Ndu̍yɛ̍, nya̍ pi̍la̍ sīnā wa̍la̍ŋ māā ō cho̍ o̍ tōnya̍a̍ ni᷄ŋ te̍ chōōla̍ŋ lā chɛ᷄ŋ tu̍m te̍.

²²Ndu̍yɛ̍, wāna̍ di̍mi̍ pɛ̍ māā, ō cho̍ Chi̍i̍sū le̍ cho̍ Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ le̍, mɛ̄ɛ̍ ndu̍ kpe̍e̍kpe̍i̍ cho̍ wāna̍ lāchōōwāa̍ ni̍. Wānā wa̍ā le̍nde̍ ndu̍ cho̍ ya̍a̍mɔ̍ɔ̍ Ki̍li̍tīo̍o̍ ni̍, mɛ̄ɛ̍ ndu̍ kɛ̍ɛ̍ Mɛ̄lɛ̄ka̍ Fi̍nyāa̍ nda̍ Po̍ ndɔ̄ɔ̍ ni̍.

²³Wānā o̍ wāna̍ kɛ̍ɛ̍ Po̍ Mɛ̄lɛ̄ka̍a̍ pɛ̍, mɛ̄ɛ̍ a̍ cho̍ o̍ dīōm pīlɛ̍ ni᷄ŋ a̍ Fi̍nyā ndɔ̄ le̍. Wāna̍ o̍ wāna̍ di̍mu̍l wāŋnda̍ pɛ̍ māā, ō lāāla̍ŋ a̍ Po̍ Mɛ̄lɛ̄ka̍a̍, mɛ̄ɛ̍ ō chō o̍ dīōm pīlɔ̍ɔ̍ ni᷄ŋ a̍ Fi̍nyā ndɔ̄.

²⁴Di̍ōmndā nya̍ tūēī lɔ̍ɔ̍ nya̍ sīmnu᷄ŋ wa̍nāā lāāla᷄ŋ o̍ Chi̍i̍sū ni̍ŋ nda̍ŋ, lā mānda̍ la̍ŋ o̍ kɔ̄ltā nyāla̍ŋ ni᷄ŋ. Tē lā mānda̍ la̍ŋ o̍ kɔ̄ltā nyāla̍ŋ ni᷄ŋ pɛ̍, mɛ̄ɛ̍ nya̍ bɛ̍ɛ̍ lā hīōū lāchī a̍ wāa̍ o̍ dīōm pīlɔ̍ɔ̍ ni᷄ŋ nya̍ Po̍ Mɛ̄lɛ̄ka̍a̍ wa̍ā a̍ Fi̍nyā ndɔ̄.

²⁵Ndu̍yɛ̍ ō chu̍a̍ būŋgɛ̄i̍ le̍ na̍a̍ nyɛ̄ kē, ndu̍ yɔ̍nūŋ ni̍ māā yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍.

²⁶A̍ wānāa̍ cho̍ kīndīo̍o̍ le̍ nya̍ fāŋāa̍ o̍ nɛ̄ī ya̍ o̍kɔ̄ɔ̄, ya̍ I̍ cho̍ nya̍ dīōmnda̍ŋ nda̍ŋ pōōnyīāllo̍ ni̍.

²⁷Kɛ̍ nya̍ nya̍, Nyi̍nā Kāsī Ki̍li̍tī to̍sa̍ mbo̍ tūāl nya̍ kɔ̄ɔ̄lī wo̍, ō chō hīōūwɔ̄ɔ̍ lāchī a̍ wāa̍ nya̍ kɔ̄ɔ̄lī ha̍a̍a̍. Le̍la̍ŋ, wānā che᷅le̍ŋ nɔ̍ lɛ̍ mbō pɛ̄ɛ̄ku̍ nya̍ le̍. Kāni̍ fo̍ndōle̍, Nyi̍na̍ Mɛ̄lɛ̄ka̍a̍ ndu̍ pɛ̍ɛ̍kū nya̍ nyɛ̄ o̍ nyɛ̄ fe̍e̍ ni̍. Ndu̍yɛ̍, pɛ̄ɛ̄kū tōnya̍a̍ o̍ pɛ̍ɛ̍kū nya̍ ni̍, ō cho̍ pɛ̍ɛ̍kū lāchōōwā le̍. Le̍la̍ŋ, mɛ̄ɛ̍ o̍ pɛ̍ɛ̍ku̍ nya̍ yɛ̍, lā wa̍ le̍nde̍ o̍ dīōm pīlɔ̍ɔ̍ ni᷄ŋ nya̍ Ki̍li̍tī wa̍ā.

²⁸Le̍la̍ŋ chūāūwāā nīāā ka̍a̍lāa̍, lā hīo̍u̍ la̍chi̍ a̍ wāa̍ o̍ dīōm pīlɔ̍ɔ̍ ni᷄ŋ a̍ ndu̍. Tē ŋ̄ hīōū lāchī pɛ̍, būūla᷄ŋ ve᷅ na̍a̍ o̍ pāa̍le̍ o̍ hu᷅ŋ ni̍ŋ nde̍ŋ chōo̍ le̍, ndu̍yɛ̍ si̍ɔ̍mbu̍la̍ bi̍ī na̍a̍ le̍.

²⁹Lā sīnā māā Ki̍li̍tī cho̍ sa̍kpō Mɛ̄lɛ̄ka̍ o̍ hɔ̄l. Le̍la̍ŋ, lā nɔ̄ vɛ̄lɛ̄ mī lā sīna̍ māā wānā o̍ wāna̍ to̍sa̍ nyɛ̍ cho̍ sa̍kpō wo̍ pɛ̍, mɛ̄ɛ̍ chu̍a̍ Mɛ̄lɛ̄ka̍a̍ o̍ cho̍ ni̍.