Read Southern Kisi Chɔ᷄ŋ Tāso̍o̍ 3 Bible Online

Chɔ᷄ŋ Tāso̍o̍ 3 - Southern Kisi bible

Chɔ᷄ŋ Tāso̍o̍ 3

¹Lā tōfa̍ wɔ̍ ka̍a̍lā bɛ̄ndū Mɛ̄lɛ̄ka̍ kāāla̍ na̍a̍ wo̍. Ō kāāla̍ na̍a̍ ha̍a̍a̍, mbo̍ vēēlū na̍a̍ āā, chūāūwāā ndūa̍a̍, ndu̍yɛ̍ māā lēkɛ̍ndɛ̄, chūāūwāā ndūa̍a̍ na̍a̍ ŋ̄ chō ni̍. Ndu̍yɛ̍, wāŋnda̍ o̍ chi̍e̍ēŋndo̍ chōo̍ ā si̍nā wa᷅na̍ Mɛ̄lɛ̄ka̍ chō wo̍ le̍. Le̍ sa̍bōo̍ ho̍ō, ā si̍nā wa̍nāā na̍a̍ ŋ̄ chō wa̍ le̍.

²Chāāŋāā nīāā ka̍a̍lāa̍, chūāūwāa̍ Mɛ̄lɛ̄ka̍a̍ na̍a̍ ŋ̄ chō ni᷅ŋ ni̍. Kɛ̍ ī cho̍ wɔ̍ i̍ chɔ̍mna᷄ŋ mɛ̄ɛ̍ na̍a̍ ŋ̄ chō hūnɔ̄ɔ̄ wā yɛ̍ le̍. Kɛ̍ ŋ̄ sīnā wa̍la̍ŋ māā, tē pāa̍le̍ Ki̍li̍tī hu᷅ŋ ni̍ŋ nde̍ŋ lē fūūlu̍u̍ pɛ̍, ŋ̄ chō sīmnɔ᷄ŋ mɛ̄ɛ̍ o̍ cho̍ yɛ̍. Kāni̍ fu̍u̍le̍ ŋ̄ chō ndu̍ hūnɔ̄ɔ̄ chɔ̄ mɛ̄ɛ̍ o̍ cho̍ kɛ̍sɛ̍ kɛ̍sɛ̍ yɛ̍.

³Wānā o̍ wāna̍ wa̍ hɔ̄lte̍ŋ o̍ nɛ̄ī le̍ mī Ki̍li̍tī to̍sa̍l ndu̍ he̍ī pɛ̍, dīndīo̍o̍ wānā ko̍ŋ ō dīndī kɔ᷅l ndɔ̄ɔ̍ ni̍, mɛ̄ɛ̍ Ki̍li̍tī cho̍ wānā di̍a̍ndāā yɛ̍.

⁴Wānā o̍ wāna̍ to̍sa̍ yɔ̄ŋ wɔ̄ɔ̍ŋndo̍ pɛ̍, mɛ̄ɛ̍ ō tɛ̄ɛ̄mbu̍u̍ sāwa̍ Mɛ̄lɛ̄ka̍a̍. Kāni̍ fo̍ndōle̍, sāwa̍ Mɛ̄lɛ̄ka̍a̍ tɛ̄ɛ̄mbūūwo̍ ndu̍ cho̍ yɔ̄ŋ wɔ̄ɔ̍ŋndo̍ ni̍.

⁵Kɛ̍ ndu̍yɛ̍, lā sīnā māā Ki̍li̍tī hi᷅ŋ māhūnāā le̍ mbō fāŋa̍ na̍a̍ yɔ̄ŋndā wɔ̄ɔ̍ŋndā na̍a̍ ŋ̄ tōsa̍ la̍ŋ chōo̍. Ndu̍yɛ̍, Ki̍li̍tī ndu̍ ndu̍, ō tōsa̍ yɔ᷅ŋ o̍ yɔ̄ŋ wɔ̄ɔ̍ŋ te̍.

⁶Le̍la̍ŋ, wānā o̍ wāna̍ wa̍ o̍ dīōm pīlɔ̍ɔ̍ ni᷄ŋ a̍ Ki̍li̍tī pɛ̍, ō hi̍ū la̍chi̍ a̍ yɔ̄ŋ wɔ̄ɔ̍ŋndo̍ tōsāa̍ le̍. Wāna̍ o̍ wāna̍ hi̍o̍ū lāchī a̍ yɔ̄ŋ wɔ̄ɔ̍ŋndo̍ tōsāa̍ pɛ̍, mɛ̄ɛ̍ ō chi̍ wɔ̍ Ki̍li̍ti̍ le̍, kɛ̄lɛ̄ŋgāā ni᷅ŋ te̍ mbō sīna̍ ndu̍.

⁷Chūāūwāā nīāā ka̍a̍lāa̍, lā chɛ᷅l mī wānā o̍ wānā fa̍ŋa̍ nya̍ o̍ nɛ̄ī le̍. Tē wāŋndo̍ tōsa̍ nyɛ̍ cho̍ sa̍kpō wo̍ pɛ̍, mɛ̄ɛ̍ ō chō wānā sa̍kpō Mɛ̄lɛ̄ka̍ o̍ hɔ̄l, mɛ̄ɛ̍ Ki̍li̍tī cho̍ sa̍kpō Mɛ̄lɛ̄ka̍ o̍ hɔ̄l lɛ̍.

⁸Wānā o̍ wāna̍ hi̍o̍ū lāchī a̍ yɔ̄ŋ wɔ̄ɔ̍ŋndo̍ pɛ̍, mɛ̄ɛ̍ Māsa̍ Nyi̍nāā Wɔ̄ɔ̍ŋnda̍ chūā ndɔ̄ɔ̍ o̍ cho̍ ni̍. Kāni̍ fu̍u̍le̍, wāna̍ yɔ̄ŋ wɔ̄ɔ̍ŋndo̍ Māsa̍ Nyi̍nāā Wɔ̄ɔ̍ŋnda̍ ō chō kāni̍ ma̍si̍ndɛ̄ ni̍, chɔ̍ŋ bɛ̍ɛ̍ a̍ chi̍e̍ēŋndo̍ kāndɔ᷄ŋndo̍ di̍. Po̍ Mɛ̄lɛ̄ka̍a̍ hīŋ māhūnāā le̍ mbō tɛ̄ɛ̄mbu̍u̍ nyɛ̄ o̍ nyɛ̄ Māsa̍ Nyi̍nāā Wɔ̄ɔ̍ŋnda̍ chō tōsāa̍.

⁹Wānā o̍ wāna̍ cho̍ chu̍a̍ Mɛ̄lɛ̄ka̍ ō hi̍ū la̍chi̍ a̍ yɔ̄ŋ wɔ̄ɔ̍ŋndo̍ tōsāa̍ le̍. Kāni̍ fo̍ndōle̍, Mɛ̄lɛ̄ka̍yɛ̍ī Mɛ̄lɛ̄kɛ̍i̍ ī chō o̍ ndu̍ ni᷄ŋ. Ndu̍yɛ̍, ō hi̍ū la̍chi̍ a̍ yɔ̄ŋ wɔ̄ɔ̍ŋndo̍ tōsāa̍ le̍, kāni̍ fo̍ndōle̍, chu̍a̍ Mɛ̄lɛ̄ka̍a̍ o̍ cho̍ ni̍.

¹⁰Nyɛ̍ to̍sā mī ŋ̄ sīna̍ wānāa̍ cho̍ chūāūwāa̍ Mɛ̄lɛ̄ka̍a̍ wa̍ a̍ wānāa̍ cho̍ chūāūwāā Māsa̍ Nyi̍nāā Wɔ̄ɔ̍ŋnda̍ wa̍ wo̍, ndu̍ cho̍ ho̍ō ni̍. Wānā o̍ wāna̍ to̍sa̍ nyɛ᷅ cho̍ sa̍kpō wo̍ le̍, mɛ̄ɛ̍ ō cho̍ chu̍a̍ Mɛ̄lɛ̄ka̍ le̍. Ndu̍yɛ̍ wānā o̍ wāna̍ ka̍a̍la̍ cha̍a̍ŋ ndɔ̄ wa̍nā la̍a̍la᷄ŋndo̍ le̍, mɛ̄ɛ̍ ō cho̍ chu̍a̍ Mɛ̄lɛ̄ka̍ le̍.

¹¹Yōōŋgū nya̍ tūēī chɔ̍ŋ bɛ̍ɛ̍ a̍ bōōndi̍i̍ nya̍ sīmnu᷄ŋ wa̍nāā lāāla᷄ŋ o̍ Chi̍i̍sū ni̍ŋ nde̍, ndu̍ cho̍ ho̍ō ni̍, māā ŋ̄ nɔ̄ le̍ kāāli̍āŋndo̍ vēllāa̍ vēllē.

¹²Lā wa᷅ māā Ke᷅ŋ te̍. Kāni̍ fu̍u̍le̍, Ke᷅ŋ ndu̍ ndu̍, le̍ Māsa̍ Nyi̍nāā Wɔ̄ɔ̍ŋnda̍ o̍ wa̍ ni̍. Mbo̍ lō o̍ ko̍ŋ mbo̍ dīī pɔ̄mbɔ̄ ndɔ̍ pɛ̍. Le̍ sa̍bū yɛ̄ɛ̄ o̍ di̍ī yɛ̄ ndu̍? Le̍ mɛ̄ɛ̍ ka̍ālā ndɔ̄la̍ŋ lā wa̍ lā wɔ̄ɔ̍ŋ, kɛ̍ mi̍ ka̍ālā pɔ̄mbɔ̄ ndɔ̄la̍ŋ lā wā sa̍kpō yɛ̍, le̍la̍ŋ o̍ di̍ī ndu̍ ni̍.

¹³Chāa̍ŋāā nīa̍a̍, kɔ̄ndɔ̄fi̍li̍ bɛ̍ɛ̍ bi̍ī nya̍ le̍ mɛ̄ɛ̍ wāŋnda̍ o̍ chi̍e̍ēŋndo̍ ni᷄ŋ a̍ tu᷅l nya̍ yɛ̄le̍ŋ yɛ̍ le̍.

¹⁴Tē ō wa̍ māā yɔ̄ŋɔ̄ɔ̄ pɛ̍, na̍a̍ ŋ̄ sīnā māā ŋ̄ cho̍ lɛ̍ pīɔ̍mndo̍ o̍ bā bɛ̄ŋgu̍ le̍. O̍ yōōmōo̍ ni᷄ŋ na̍a̍ ŋ̄ chō ni᷅ŋ ni̍. Ŋ̄ sīnā māā le̍nde̍ i̍ cho̍ ni̍, kāni̍ fu̍u̍le̍ na̍a̍ na̍a̍ ŋ̄ kāāla̍ chāāŋāā nāā wa̍nāā lāāla᷄ŋnda̍. Wānā o̍ wāna̍ ka̍a̍la̍ cha̍a̍ŋ ndɔ̍ le̍, mɛ̄ɛ̍ wānā ko̍ŋ ō chō wɔ̄ pīɔ̍mndo̍ o̍ bā bɛ̄ŋgu̍.

¹⁵Wānā o̍ wāna̍ tu̍l chāa̍ŋ ndɔ̄ wa̍nā la̍a̍la᷄ŋndo̍ lēyɛ̄ pɛ̍, mɛ̄ɛ̍ wānā di̍yāā ŋ̄wāŋndā chīe̍e̍ wo̍ o̍ cho̍ ni̍. Ndu̍yɛ̍ lā sīnā māā wānā di̍yāā ŋ̄wāŋndā chīe̍e̍ wo̍, ndu̍ ndu̍ ō nɔ̍ yo̍o̍mū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍ le̍.

¹⁶Wu̍ Ki̍li̍tī vi᷅ le̍ na̍a̍ wo̍, ndu̍ chɔ̍m na̍a̍ nyɛ̍ cho̍ kāālāa̍ wo̍ ni̍. Na̍a̍ bɛ̍ɛ̍ mɛ̄ɛ̍ mī ŋ̄ chɛ᷄l mī ŋ̄ vī le̍ chāāŋāā nāā wa̍nāā lāāla᷄ŋnda̍.

¹⁷Wānā o̍ wāna̍ wa̍ pɛ̍ mbō nɔ̄ nyɔ̄ɔ̍, ndu̍yɛ̍ mbō chē chāa̍ŋ ndɔ̄ wa̍nā la̍a̍la᷄ŋndo̍ a̍ bā hāvɛ̍i̍yo̍, kɛ̍ mbō tūīīnu̍ŋ ndu̍ īnyīɛ̍ɛ̍ le̍ pɛ̍, mɛ̄ɛ̍ kāāla̍ Mɛ̄lɛ̄ka̍a̍ cho̍ o̍ ndu̍ ni᷄ŋ te̍.

¹⁸Chūāūwāā nīāā ka̍a̍lāa̍, kāālā nāa̍ ō mɛ̍ɛ̍lū o̍ dīmīo̍o̍ a̍ sōndō su̍e̍e̍ le̍. Ŋ̄ chɔ̄mnu᷄ŋ kāālāa̍ kpe̍e̍kpe̍i̍ a̍ sɔ̄ɔ̍ŋ na̍a̍ ŋ̄ tōsā wo̍ŋ.

¹⁹Tē ŋ̄ nɔ̄ kāālā wāā nu̍a̍ā pɛ̍, mɛ̄ɛ̍ o̍ he̍ī ni᷄ŋ na̍a̍ ŋ̄ sīnā ni̍ māā ŋ̄ chō o̍ nɛ̄i̍ tōnya̍a̍ chōo̍. Ndu̍yɛ̍ tē ŋ̄ nɔ̄ kāālā wāā nu̍a̍ā pɛ̍, būūla᷄ŋ ve᷅ o̍ kɔ̄ltā nāāla̍ŋ ni᷄ŋ le̍ sīsi̍la̍ŋ Mɛ̄lɛ̄ka̍ o̍ hɔ̄l te̍.

²⁰Ndu̍yɛ̍, ā yɔ᷄ŋ bɛ̍ɛ̍ mī kɔ̄ltā nāāla̍ŋ lā kīlu̍l na̍a̍ yāmɛ̍i̍ a̍ sɔ̄ɔ̍ŋ ŋ̄ pūm o̍kɔ̄ɔ̄, ŋ̄ bu̍u̍lāŋ le̍ sīsi̍la̍ŋ Mɛ̄lɛ̄ka̍ o̍ hɔ̄l te̍. Kāni̍ fu̍u̍le̍, Mɛ̄lɛ̄ka̍ ndu̍ hi̍o̍ū a̍ kɔ̄ltā nāāla̍ŋ, ndu̍yɛ̍ ndu̍ ndu̍ si̍nā nyɛ᷅ o̍ nyɛ̄ fe̍e̍.

²¹Chāāŋāā nīāā ka̍a̍lāa̍, tē ō wa̍ pɛ̍ mī kɔ̄ltā nāāla̍ŋ lā kīlu̍l na̍a̍ īyāma̍ le̍, mɛ̄ɛ̍ būūla᷄ŋ ve᷅ na̍a̍ le̍ lākɔ̄ sīsi̍la̍ŋ Mɛ̄lɛ̄ka̍ o̍ hɔ̄l te̍.

²²O̍ ko̍ŋ, nyɛ̄ o̍ nyɛ̄ na̍a̍ ŋ̄ nyūna̍ pɛ̍ Mɛ̍lɛ̄ka̍, kīo̍o̍ o̍ ke᷅ na̍a̍ ni̍, kāni̍ fu̍u̍le̍, le̍ mɛ̄ɛ̍ na̍a̍ ŋ̄ tōsā nyɛ᷅ o̍ di̍mūl na̍a̍ wo̍ yɛ̍, a̍ nyɛ̍ nɛ̍ŋī ndu̍ kɔ̄llo̍ wo̍.

²³Ndu̍yɛ̍, nyɛ̄ o̍ di̍mu̍l na̍a̍ le̍ tōsāa̍ wo̍ cho̍ ho̍ō ni̍, māā ŋ̄ dɔ̄u̍ ti̍i̍nda᷄ŋndo̍ o̍ Po̍ ndɔ̄ɔ̍ Chi̍i̍sū Ki̍li̍tī ni̍ŋ, ndu̍yɛ̍ mī ŋ̄ kāāli̍āŋ ve̍llāa̍ vēllē mɛ̄ɛ̍ o̍ di̍mu̍l na̍a̍ yɛ̍.

²⁴Wānāa̍ to̍sā sɔ̍ɔ̍ŋ Mɛ̄lɛ̄ka̍ dīmi̍ wo̍ŋ nda̍, nda̍ cho̍ o̍ dīōm pīlɔ̍ɔ̍ ni᷄ŋ a̍ Mɛ̄lɛ̄ka̍ ni̍, ndu̍yɛ̍ mi̍ Mɛ̄lɛ̄ka̍ wā o̍ dīōm pīlɔ̍ɔ̍ ni᷄ŋ a̍ nda̍. Ndu̍yɛ̍, nyɛ̍ to̍sā mī ŋ̄ sīna̍ māā ō chō a̍ na̍a̍ di̍ōm pīlɛ̍ wo̍ cho̍ ho̍ō ni̍, Nyi̍nā ndɔ̍ o̍ to̍sa̍ mbo̍ wā na̍a̍ kɔ̄ɔ̄lī wo̍.