Read Southern Kisi Chɔ᷄ŋ Tāso̍o̍ 4 Bible Online

Chɔ᷄ŋ Tāso̍o̍ 4 - Southern Kisi bible

Chɔ᷄ŋ Tāso̍o̍ 4

¹Chāāŋāā nīāā ka̍a̍lāa̍, lā la̍a̍la᷄ŋ a̍ wāŋnda̍ fa̍ū a̍ di̍mī māā Nyi̍na̍ Mɛ̄lɛ̄ka̍a̍ chō nda̍ kɔ̄ɔ̄lī wa̍ le̍. Kɛ̍ lā tōfa̍ nda̍ nyɛ̄ kɛ̄ndɛ̍ī tē Nyi̍na̍ Mɛ̄lɛ̄ka̍a̍ cho̍ nda̍ kɔ̄ɔ̄lī ni̍. Kāni̍ fu̍u̍le̍ wānāā lāchōōwāa̍ ā tīu̍ o̍ chi̍e̍ēŋndo̍ chōo̍ kpe̍de̍, mā kēī di̍mīo̍o̍ māā wānāa̍ su̍a̍ā le̍ Mɛ̄lɛ̄ka̍ wa̍ nda̍ chō ni̍.

²Kɛ̍ ndu̍yɛ̍ tē ō wa̍ pɛ̍ māā, Nyi̍na̍ Mɛ̄lɛ̄ka̍a̍ cho̍ wāŋndo̍ kɔ̄ɔ̄lī ni̍, mɛ̄ɛ̍ nya̍ lōōkū si̍nā yɛ̍ cho̍ ho̍ō ni̍. Wānā o̍ wāna̍ chɔ̍ɔ̍mu̍u̍ pɛ̍ kpe̍nde̍ke̍le̍ māā, mi̍ Chi̍i̍sū Ki̍li̍tī hu᷅ŋ o̍ chi̍e̍ēŋndo̍ chōo̍ o̍ īwāna̍ chi̍e̍e̍ya̍, mɛ̄ɛ̍ Nyi̍na̍ Mɛ̄lɛ̄ka̍a̍ cho̍ ndu̍ kɔ̄ɔ̄lī ni̍.

³Kɛ̍ wāna̍ sɛ̍ɛ̍ŋgi̍a̍a̍ pɛ̍ māā Chi̍i̍sū hi̍ŋ o̍ chi̍e̍ēŋndo̍ chōo̍ o̍ īwāna̍ chi̍e̍e̍ya̍ le̍, mɛ̄ɛ̍ ō cho̍ Nyi̍na̍ Mɛ̄lɛ̄ka̍a̍ le̍ cho̍ ndu̍ kɔ̄ɔ̄lī le̍. Wānā wa̍ā le̍ndo̍o̍ mɛ̄ɛ̍ nyi̍na̍ ya̍a̍mɔ̍ɔ̍ Ki̍li̍tīo̍o̍ cho̍ ndu̍ kɔ̄ɔ̄lī ni̍, ndu̍ yɔ̍nūŋ ni̍ māā ō nya̍ tūēī māā ō chō hūnɔ̄ɔ̄ wo̍ ni̍. Ndu̍yɛ̍, ō chō ni᷅ŋ bɛ̍ɛ̍ o̍ chi̍e̍ēŋndo̍ ni᷄ŋ mɛ̄ɛ̍ na̍a̍ ŋ̄ sūāā nu̍a̍ā yɛ̍.

⁴Kɛ̍ nya̍ nya̍ chūāūwāā nīāā ka̍a̍lāa̍, le̍ Mɛ̄lɛ̄ka̍ nya̍ chō ni̍. Ndu̍yɛ̍, wānāā lāchōōwāa̍ di̍mi̍ ha̍ā māā, wānāa̍ su̍a̍ā le̍ Mɛ̄lɛ̄ka̍ wa̍ nda̍ chō ni̍ wa̍, lā chīi̍ nda̍ yōmɔ̄ɔ̄. Kāni̍ fo̍ndōle̍, Nyi̍na̍ cho̍ nya̍ kɔ̄ɔ̄lī wo̍, ndu̍ hi̍o̍ū kpāāyā a̍ nyi̍na̍ cho̍ wānāa̍ cho̍ le̍ chi̍e̍ēŋndo̍ ho̍ō wa̍ kɔ̄ɔ̄lī wo̍.

⁵Nda̍ nda̍, le̍ chi̍e̍ēŋndo̍ nda̍ chō ni̍. Le̍la̍ŋ, a̍ sɔ̄ɔ̍ŋ wa̍ā chi̍e̍ēŋ na̍nu᷄ŋ o̍kɔ̄ɔ̄ ko̍ni̍ nda̍ sūāā ni̍, ndu̍yɛ̍ mī chi̍e̍ēŋndo̍ yāŋ nda̍ nīla̍ŋ.

⁶Kɛ̍ na̍a̍ na̍a̍, le̍ Mɛ̄lɛ̄ka̍ na̍a̍ ŋ̄ chō ni̍. Ndu̍yɛ̍, wāna̍ si̍nā kpe̍e̍kpe̍i̍ wa᷅na̍ Mɛ̄lɛ̄ka̍ chō wo̍ wo̍, ndu̍ ya᷅ŋ na̍a̍ lānī ni̍. Ndu̍yɛ̍, wāna̍ cho̍ le̍ Mɛ̄lɛ̄ka̍ le̍ wo̍, ndu̍ ye᷅ŋ na̍a̍ lānī le̍. Mɛ̄ɛ̍ nu̍a̍ā na̍a̍ ŋ̄ lōōkū yɛ̍ yi̍ɔ̍ɔ̍ sīnā ni̍, tē Nyi̍nā tōnya̍a̍ cho̍ wāŋndo̍ kɔ̄ɔ̄lī ni̍, ɔ̄ɔ̄ tē nyi̍nā hūīyāa̍ ni̍.

⁷Chāāŋāā nīāā ka̍a̍lāa̍, lā kāāli̍āŋ ve̍llāa̍ vēllē, kāni̍ fo̍ndōle̍, o̍ Mɛ̄lɛ̄ka̍ lo̍ kāālāa̍ chɛ᷄ŋ ni̍. Wānā o̍ wāna̍ ka̍a̍la̍ pɛ̍, mɛ̄ɛ̍ chu̍a̍ Mɛ̄lɛ̄ka̍a̍ o̍ cho̍ ni̍, mɛ̄ɛ̍ ō sīnā wa᷅na̍ Mɛ̄lɛ̄ka̍ chō wo̍.

⁸Wānā o̍ wāna̍ ka̍a̍la̍ le̍, mɛ̄ɛ̍ ō si̍nā wa᷅na̍ Mɛ̄lɛ̄ka̍ chō wo̍ le̍, kāni̍ fo̍ndōle̍, ka̍a̍ Mɛ̄lɛ̄ka̍a̍ ndu̍ cho̍ hīōūwɔ̄ɔ̍ lāchī a̍ kāālāa̍ lɔ̍ɔ̍ lɔ̍ɔ̍ ni̍.

⁹Nɛ̄i̍ Mɛ̄lɛ̄ka̍ chɔ᷄m na̍a̍ kāālā o̍ ka̍a̍la̍ na̍a̍ wo̍ wo̍, ndu̍ cho̍ ho̍ō ni̍. Mbo̍ vīām Po̍ ndɔ̄ pi᷅lɔ̍ɔ̍ kpe̍ o̍ chi̍e̍ēŋndo̍ ni᷄ŋ le̍ mī ŋ̄ sɔ̄la̍ yōōmū kpe̍e̍kpe̍i̍yo̍ a̍ ndu̍.

¹⁰Nyɛ̍ cho̍ kāālā kpe̍e̍kpe̍i̍yo̍ wo̍ cho̍ ho̍ō ni̍, māā ō cho̍ mī ŋ̄ kāāla̍ Mɛ̄lɛ̄ka̍ le̍, kɛ̍ ndu̍yɛ̍ mi̍ ndu̍ ka̍a̍lā na̍a̍, ndu̍yɛ̍ mbo̍ vīām Po̍ ndɔ̄ɔ̍ o̍ chi̍e̍ēŋndo̍ ni᷄ŋ, le̍ wāa̍ māā sa̍lāa̍ le̍ yɔ̄ŋndā nāāla̍ wɔ̍ɔ̍ŋnda̍ŋ fāŋāa̍.

¹¹Chāāŋāā nīāā ka̍a̍lāa̍, ha̍a̍a̍ mi̍ Mɛ̄lɛ̄ka̍ kāālā na̍a̍ nu̍a̍ā kpɛ̍, na̍a̍ bɛ̍ɛ̍ ŋ̄ nɔ̄ mī ŋ̄ kāāli̍āŋ ve᷅llāa̍ vēllē.

¹²Wānā o̍ wānā bɛ̍ɛ̍ chi̍ wɔ̍ Mɛ̍lɛ̄ka̍ lē pīlɛ̍ le̍, kɛ̍ tē ŋ̄ kāāli̍āŋ ve᷅llāa̍ vēllē pɛ̍, mɛ̄ɛ̍ ŋ̄ chō o̍ dīōm pīlɔ̍ɔ̍ ni᷄ŋ a̍ Mɛ̄lɛ̄ka̍, ndu̍yɛ̍ mɛ̄ɛ̍ kāālā Mɛ̄lɛ̄ka̍ dɔ̄ū na̍a̍ o̍ kɔ̄l lo̍ ō fūūlu̍u̍ mɛ̍ɛ̄.

¹³Ŋ̄ sīnā wa̍la̍ŋ māā ŋ̄ chō o̍ dīōm pīlɔ̍ɔ̍ ni᷄ŋ a̍ Mɛ̄lɛ̄ka̍, ndu̍yɛ̍ mi̍ ndu̍ wa᷅ o̍ dīōm pīlɔ̍ɔ̍ ni᷄ŋ a̍ na̍a̍, kāni̍ fu̍u̍le̍, ō tōsa̍ mi̍ Nyi̍nā ndɔ̄ɔ̍ tūāl na̍a̍ kɔ̄ɔ̄lī.

¹⁴Ndu̍yɛ̍, ō fūla̍ o̍ ko̍ŋ kɔ̍ɔ̍lī, ŋ̄ chē Po̍ Mɛ̄lɛ̄ka̍a̍ pɛ̍ɛ̍ŋ, ndu̍yɛ̍ ŋ̄ chō wāŋnda̍ dīmūllo̍ māā Mɛ̄lɛ̄ka̍ Fi̍nyā nāa̍ ō vēm Po̍ ndɔ̄ɔ̍ o̍ chi̍e̍ēŋndo̍ ni᷄ŋ le̍ mbō pīŋi̍ ŋ̄wāŋndā chīe̍e̍.

¹⁵Wānā o̍ wāna̍ di̍mu̍l pɛ̍ wa᷅ŋnda̍ māā ō lāāla̍ŋ māā Chi̍i̍su̍ cho̍ Po̍ Mɛ̄lɛ̄ka̍a̍ ni̍, mɛ̄ɛ̍ Mɛ̄lɛ̄ka̍ chō o̍ dīōm pīlɔ̍ɔ̍ ni᷄ŋ a̍ ndu̍, ndu̍yɛ̍ mi̍ ndu̍ wa᷅ o̍ dīōm pīlɔ̍ɔ̍ ni᷄ŋ a̍ Mɛ̄lɛ̄ka̍.

¹⁶Ŋ̄ sīnā mɛ̄ɛ̍ kpɛ̍ Mɛ̄lɛ̄ka̍ kāāla̍ na̍a̍ yɛ̄, ndu̍yɛ̍ kāālā kōŋ na̍a̍ ŋ̄ tīīnda̍ŋ ni̍. Mɛ̄lɛ̄ka̍ ka̍ā ndɔ̄ɔ̍, ndu̍ cho̍ ni̍, hīōūwɔ̄ɔ̍ lāchī a̍ kāālāa̍ lɔ̍ɔ̍ o̍ lɔ̍ɔ̍. Ndu̍yɛ̍, wānā o̍ wāna̍ ka̍a̍la̍ pɛ̍, mɛ̄ɛ̍ ndu̍ cho̍ o̍ dīōm pīlɔ̍ɔ̍ ni᷄ŋ a̍ Mɛ̄lɛ̄ka̍ ni̍, ndu̍yɛ̍ mi̍ Mɛ̄lɛ̄ka̍ wā o̍ dīōm pīlɔ̍ɔ̍ ni᷄ŋ a̍ ndu̍.

¹⁷Mɛ̄lɛ̄ka̍ chō tōsāa̍ mi̍ kāālā ndɔ̄ɔ̍ wā fūūlūūwo̍ na̍a̍ o̍ lākɔ̄l mɛ̍ɛ̄, le̍ hāli̍ kpe̍ŋ būūla᷄ŋ ve᷅ na̍a̍ o̍ pāa̍le̍ o̍ kɔ̍ɔ̍sā ni̍ŋ a̍ ŋ̄wāŋndā chīe̍e̍ le̍ŋ chōo̍ le̍. Kāni̍ fo̍ndōle̍, mɛ̄ɛ̍ bɛ̄ndāa̍ cho̍ Ki̍li̍tī tɛ̄ɛ̄ŋ nda̍ Mɛ̄lɛ̄ka̍ yɛ̍, le̍nde̍ bɛ̄ndāa̍ cho̍ na̍a̍ tɛ̄ɛ̄ŋ na̍a̍ Mɛ̄lɛ̄ka̍ wa̍ā chi̍e̍ēŋ na̍nu᷄ŋ ni̍.

¹⁸Kāālāa̍ ndu̍ nɔ̍ i̍si̍o̍o̍ŋ te̍. Ndu̍yɛ̍, tē kāāla̍ Mɛ̄lɛ̄ka̍a̍ ō wa̍ ō fūūlāā na̍a̍ o̍ lākɔ̄l pɛ̍, mɛ̄ɛ̍ fāŋāa̍ kāālā kōŋ fāŋā si̍o̍ōŋnde̍ na̍a̍ o̍ lākɔ̄l fa̍ū ni̍, le̍ nyɛ̄ nɛ̄īyāā Mɛ̄lɛ̄ka̍ tūsī ni̍ŋ wa᷅ŋnda̍ chōo̍ wo̍. Tē sīōōŋnde̍ wa̍ wɔ̄ na̍a̍ pɛ̍ mɛ̄ɛ̍ ŋ̄ nɔ̄ mānūāā o̍ kɔ̄l māā ō hāndū ni̍ŋ na̍a̍ nyɛ̄ nɛ̄īyāa̍ chōo̍. Tē ī wa̍ yɛ̄ le̍nde̍ pɛ̍, mɛ̄ɛ̍ ke̍ŋ chɔ᷅m ma̍chɔ̍māā māā kāāla̍ Mɛ̄lɛ̄ka̍a̍ fūūlu̍u̍ wɔ̍ na̍a̍ o̍ lākɔ̄l mɛ̍ɛ̄ le̍.

¹⁹Ŋ̄ nɔ̄ kāālāa̍ na̍a̍ o̍ lākɔ̄l kāni̍ fo̍ndōle̍, Mɛ̄lɛ̄ka̍ fɛ̍lɛ̍ŋ ka̍a̍la̍ na̍a̍.

²⁰Tē wānā o̍ wāna̍ di̍mi̍ pɛ̍ āā, “I̍ ka̍a̍la̍ Mɛ̄lɛ̄ka̍,” kɛ̍ mbō tu᷄l cha̍a̍ŋ ndɔ̍ wa̍nā la̍a̍la᷄ŋndo̍ lēyɛ̄ pɛ̍, mɛ̄ɛ̍ wāna̍ lāchōōwāa̍ o̍ cho̍ ni̍. Kāni̍ fo̍ndōle̍, tē wāŋndo̍ kāāla̍ cha̍a̍ŋ ndɔ̄ wa̍nā la̍a̍la᷄ŋndo̍ ō o̍ cho̍ chɔ̄ɔ̍ wo̍ le̍, ō nɔ̍lā mbō kāāla̍ Mɛ̄lɛ̄ka̍ o̍ chi̍ wɔ̍ le̍ wo̍ le̍.

²¹Le̍la̍ŋ sāwa̍ o̍ do̍u̍ na̍a̍ wo̍ cho̍ ho̍ō ni̍, māā wānā o̍ wāna̍ ka̍a̍la̍ Mɛ̄lɛ̄ka̍ pɛ̍, mɛ̄ɛ̍ mbo̍ kāāla̍ vɛ̍lɛ̄ chāa̍ŋ ndɔ̄.