Read Southern Kisi Chɔ᷄ŋ Tāso̍o̍ 5 Bible Online

Chɔ᷄ŋ Tāso̍o̍ 5 - Southern Kisi bible

Chɔ᷄ŋ Tāso̍o̍ 5

¹Wānā o̍ wāna̍ la̍a̍la̍ŋ pɛ̍ māā Chi̍i̍su̍ cho̍ Ki̍li̍tī ni̍, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, mɛ̄ɛ̍ chu̍a̍ Mɛ̄lɛ̄ka̍a̍ o̍ cho̍ ni̍. Tē wāŋndo̍ kāāla̍ fi̍nyā ndɔ̍ pɛ̍, kāālāa̍ o̍ ka̍a̍lā chu̍a̍u̍wāā fi̍nyā ndɔ̄ ve̍lū wa̍ ni̍.

²O̍ nɛ̄ī wa̍ā nu̍a̍ā chōo̍ ko̍ni̍ na̍a̍ ŋ̄ lōōkū si̍nā ni̍ māā ŋ̄ kāāla̍ chūāūwāa̍ Mɛ̄lɛ̄ka̍a̍. Tē ō wa̍ pɛ̍ mī ŋ̄ kāāla̍ Mɛ̄lɛ̄ka̍, ndu̍yɛ̍ mī ŋ̄ wa̍ nyɛ̄ o̍ di̍mūl na̍a̍ wo̍ tōsāa̍, mɛ̄ɛ̍ kāālāa̍ na̍a̍ ŋ̄ kāālā vɛ̍lɛ̄ chūāūwāā ndūa̍a̍ ni̍.

³Mɛ̄lɛ̄ka̍ kāālāa̍ cho̍ ho̍ō ni̍, nyɛ̄ o̍ di̍mūl na̍a̍ wo̍ tōsāa̍. Ndu̍yɛ̍, nyɛ̄ o̍ di̍mūl na̍a̍ le̍ tōsāa̍ wo̍, ō cho̍ nyɛ̍ ke̍ndū māā mī ŋ̄ būmba̍ ndu̍ tōsā le̍.

⁴Wānā o̍ wāna̍ cho̍ chu̍a̍ Mɛ̄lɛ̄ka̍, ā chīi̍ chi̍e̍ēŋndo̍ yōmɔ̄ɔ̄. A̍ yɛ̄ɛ̍nɛ̍ na̍a̍ ŋ̄ yēm yɛ̄ chi̍e̍ēŋndo̍? A̍ tīīnda᷄ŋ na̍a̍ ŋ̄ nɔ̄ o̍ Chi̍i̍sū ni̍ŋ ndo̍.

⁵Ō nɛ̄ɛ̍nɛ̍ ya᷅m yɛ̍ chi̍e̍ēŋndo̍? Wānā o̍ wāna̍ la̍a̍la̍ŋ māā Chi̍i̍su̍ cho̍ Po̍ Mɛ̄lɛ̄ka̍a̍ ni̍, ndu̍ ya᷅m chi̍e̍ēŋndo̍ ni̍.

⁶Chi̍i̍sū Ki̍li̍tī ndu̍ kpe̍e̍kpe̍i̍ hi᷅ŋ ni̍, ndu̍yɛ̍ mbo̍ sɔ̄lā yīŋɔ̄ɔ̍ a̍ mɛ̄ŋnda̍ŋ, o̍ ko̍ŋ kɔ̍ɔ̍lī mi̍ kōo̍ma̍ ndūa̍ŋ mā tālā mbo̍ wū. Ō cho̍ yīŋɔ̄ɔ̍ ko̍ni̍ le̍ o̍ sɔ̍la̍ a̍ mɛ̄ŋnda̍ŋ te̍. Ō sɔ̄la̍ yīŋɔ̄ɔ̍ a̍ mɛ̄ŋnda̍ŋ, ndu̍yɛ̍ mi̍ kōo̍ma̍ ndūa̍ŋ mā tālā.

⁷Nyi̍na̍ Mɛ̄lɛ̄ka̍a̍ pi̍la̍ bɛ̍ɛ̍, ō chō wāŋnda̍ chɔ̄mndo̍ a̍ sūɛ̍i̍ he̍ī o̍kɔ̄ɔ̄. Ndu̍yɛ̍, Nyi̍na̍ Mɛ̄lɛ̄ka̍a̍ di̍mī la̍cho̍o̍wā le̍.

⁸Sɔ̄ɔ̍ŋ sa̍lā yāa̍ ŋ̍ chɔ᷅m na̍a̍ fūlā mākɔ̄ɔ̍ ni̍, māā Chi̍i̍su̍ cho̍ Po̍ Mɛ̄lɛ̄ka̍a̍ ni̍, Nyi̍na̍ Mɛ̄lɛ̄ka̍a̍, a̍ mɛ̄ŋnda̍ŋ, a̍ kōo̍ma̍ Chi̍i̍sūa̍a̍ŋ. Ndu̍yɛ̍, nyɛ̄ pīlɛ̍ kpe̍ sɔ̄ɔ̍ŋ sa̍lā yāa̍wo̍ŋ mu᷅ŋ ŋ̄ chō dīmīo̍o̍ ni̍.

⁹Tē wāŋndā chīe̍e̍ya̍ ā chɔ᷄m na̍a̍ fūlā mākɔ̄ɔ̍ a̍ īsɔ̄ɔ̍ o̍ īsɔ̄ɔ̍ o̍kɔ̄ɔ̄ pɛ̍, ŋ̄ lāāla̍ŋ. Kɛ̍ ndu̍yɛ̍ fūlā mākɔ̄ɔ̄ Mɛ̄lɛ̄ka̍ chɔ᷄m ndo̍, ndu̍ bɛ̍ɛ̍ hi̍o̍ū ka̍ ka̍. Fūlā mākɔ̄ɔ̄ Mɛ̄lɛ̄ka̍ chɔ᷄m a̍ Po̍ ndɔ̄ɔ̍ o̍kɔ̄ɔ̄ wo̍, ndu̍ yɔ̍nūŋ ni̍ māā fūlā mākɔ̄ɔ̄ sɔ̄ɔ̍ŋ sa̍lā yāa̍wo̍ŋ ŋ̄ chō na̍a̍ chɔ̄mndo̍ wo̍ŋ ni̍.

¹⁰Wānāa̍ la̍a̍la̍ŋ a̍ nyɛ̍ di̍mi̍ŋ a̍ Po̍ Mɛ̄lɛ̄ka̍a̍ o̍kɔ̄ɔ̄ wo̍ wa̍, ā sīnā o̍ kɔ̄ltā ndāla̍ŋ ni᷄ŋ wa̍la̍ŋ, māā sūɛ̍i̍ he̍ī chō tōnya̍. Kɛ̍ wānā o̍ wāna̍ la̍a̍la̍ŋ a̍ Mɛ̄lɛ̄ka̍ le̍, mɛ̄ɛ̍ ō sīīŋgu̍u̍ Mɛ̄lɛ̄ka̍ wāna̍ lāchōōwā, kāni̍ fu̍u̍le̍, le̍ mɛ̄ɛ̍ o̍ la̍a̍la̍ŋ a̍ fūlā mākɔ̄ɔ̄ Mɛ̄lɛ̄ka̍ chɔ᷄m a̍ Po̍ ndɔ̄ɔ̍ o̍kɔ̄ɔ̄ wo̍ le̍ yɛ̍.

¹¹Fūlā mākɔ̄ɔ̄ kōŋ ndu̍ cho̍ ho̍ō ni̍ māā, Mɛ̄lɛ̄ka̍ ke̍ na̍a̍ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍. Ndu̍yɛ̍, o̍ Po̍ ndɔ̄ɔ̍ lo̍ sa̍na̍a̍ yōōmōo̍ ho̍ō chō chɔ̄nɔ᷄ŋndo̍ ni̍.

¹²Wāna̍ wa̍ o̍ dīōm pīlɔ̍ɔ̍ ni᷄ŋ a̍ Po̍ Mɛ̄lɛ̄ka̍a̍ pɛ̍, mɛ̄ɛ̍ ō nɔ̄ yōōmū kpe̍e̍kpe̍i̍yo̍. Wāna̍ ve̍ o̍ dīōm pīlɔ̍ɔ̍ ni᷄ŋ a̍ Po̍ Mɛ̄lɛ̄ka̍a̍ le̍, mɛ̄ɛ̍ ō nɔ̍ yo̍o̍mū kpe̍e̍kpe̍i̍yo̍ le̍.

¹³Nya̍ dɔ̍ū tīīnda᷄ŋndo̍ o̍ Po̍ Mɛ̄lɛ̄ka̍a̍ ni᷄ŋ nda̍, nya̍ ya̍ I̍ cho̍ dīōmnda̍ŋ nda᷅ŋ pōōnyīāllo̍ ni̍, le̍ mī lā sīna̍ māā lā nɔ̄ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍.

¹⁴Kīīsa᷄ŋ cho̍ na̍a̍ le̍ hūnɔ̄ɔ̍ nāa̍ Mɛ̄lɛ̄ka̍ chūā le̍. Kāni̍ fu̍u̍le̍, ŋ̄ sīnā māā pɛ̄ŋgu̍ o̍ pɛ̄ŋgu̍ tē ŋ̄ nyūna̍ ndu̍ le̍ nyɛ̄ o̍ nyɛ̄ pɛ̍, ndu̍yɛ̍ mbō wa̍ o̍ hɛ̄na᷄ŋ ndɔ̄ɔ̍ ni᷄ŋ pɛ̍, nīla̍ŋ o̍ ya᷅ŋ na̍a̍ ni̍.

¹⁵Mɛ̄ɛ̍ na̍a̍ ŋ̄ sīna̍ nu̍a̍ā māā, nyɛ̄ o̍ nyɛ̄ na̍a̍ ŋ̄ nyūna̍ ndu̍ pɛ̍, nīla̍ŋ o̍ ya᷅ŋ na̍a̍ ni̍ yɛ̍, mɛ̄ɛ̍ ŋ̄ sīnā māā nyɛ̄ na̍a̍ ŋ̄ nyūnā ndu̍ wo̍ ŋ̄ chīi̍ ndu̍ sɔ̄lā.

¹⁶Wānā o̍ wānā, tē ā chē mī chāa̍ŋ nūm wa̍nā la̍a̍la᷄ŋndo̍ ō tōsa̍ yɔ̄ŋ wɔ̄ɔ̍ŋndo̍ pɛ̍, mbō ve̍ yɔ᷅ŋ wɔ̄ɔ̍ŋ mɛ̍ɛ̍lu̍ o̍ pīɔ̍m te̍, mɛ̄ɛ̍ pi̍ɛ̍i̍ Mɛ̍lɛ̄ka̍ le̍ ndu̍, ko̍ŋ to̍sā mbō sɔ̄la̍ yōōmōo̍. Yɔ̄ŋ wɔ̄ɔ̍ŋ mɛ̍ɛ̍lū o̍ pīɔ̍mndo̍ wo̍ chō. Ō cho̍ yɔ᷅ŋ wɔ̄ɔ̍ŋ wāā le̍nde̍ le̍ ya̍ I̍ cho̍ dīmī māā lā pīɛ̄ī le̍ ndu̍ le̍.

¹⁷Dɛ̍nɛ̍ o̍ dɛ̍nɛ̍ wāŋndo̍ tōsa̍ pɛ̍ mbō sēndu̍ le̍, mɛ̄ɛ̍ yɔ̄ŋ wɔ̄ɔ̍ŋndo̍ o̍ to̍sa̍ ni̍. Kɛ̍ ndu̍yɛ̍, yɔ̄ŋ wɔ̄ɔ̍ŋ mɛ̍ɛ̍lu̍ o̍ pīɔ̍m te̍ wo̍ chō.

¹⁸Ŋ̄ sīnā māā wānā o̍ wāna̍ cho̍ chu̍a̍ Mɛ̄lɛ̄ka̍, ō hi̍ū la̍chi̍ a̍ yɔ̄ŋ wɔ̄ɔ̍ŋndo̍ tōsāa̍ le̍. Kāni̍ fo̍ndōle̍, Po̍ Mɛ̄lɛ̄ka̍a̍ chō ndu̍ māndāa̍, ndu̍yɛ̍ Māsa̍ Nyi̍nāā Wɔ̄ɔ̍ŋnda̍ nɔ̍lā ndu̍ nyɛ̄ o̍ nyɛ̄ yɔ̄ŋ te̍.

¹⁹Chi̍e̍ēŋndo̍ ho̍ō kpe̍de̍ ō chō Māsa̍ Nyi̍nāā Wɔ̄ɔ̍ŋnda̍ o̍ bā bɛ̄ŋgu̍. Kɛ̍ o̍ ko̍ŋ ni̍ŋ fa̍ū, ŋ̄ sīnā māā na̍a̍ na̍a̍, chūāūwāa̍ Mɛ̄lɛ̄ka̍a̍ na̍a̍ ŋ̄ chō ni̍.

²⁰Ŋ̄ sīnā māā Po̍ Mɛ̄lɛ̄ka̍a̍ hīŋ mbo̍ kē na̍a̍ sīnā pɛ̄ŋgo̍o̍, le̍ mī ŋ̄ sīna̍ Mɛ̄lɛ̄ka̍ kpe̍e̍kpe̍i̍yo̍. Ndu̍yɛ̍, ŋ̄ chō o̍ dīōm pīlɔ̍ɔ̍ ni᷄ŋ a̍ Mɛ̄lɛ̄ka̍ kpe̍e̍kpe̍i̍yo̍, kāni̍ fu̍u̍le̍, ŋ̄ chō o̍ dīōm pīlɔ̍ɔ̍ ni᷄ŋ a̍ Po̍ ndɔ̄ɔ̍ Chi̍i̍sū Ki̍li̍tī. Ndu̍ cho̍ Mɛ̄lɛ̄ka̍ kpe̍e̍kpe̍i̍yo̍ ni̍, ndu̍yɛ̍ ndu̍ cho̍ yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍ ni̍.

²¹Chūāūwāā nīāā ka̍a̍lāa̍, lā mānda̍ nya̍ pi̍la̍. Lā wo̍ū bā o̍ nyɛ̄ o̍ nyɛ̄ sōōlūū ni᷄ŋ te̍, ō fūla̍ o̍ Mɛ̄lɛ̄ka̍ kpe̍e̍kpe̍i̍yo̍ kɔ̄ɔ̄lī.