Read Southern Kisi Chɔ̄ɔ̍chi̍a̍a̍ 1 Bible Online

Chɔ̄ɔ̍chi̍a̍a̍ 1 - Southern Kisi bible

Chɔ̄ɔ̍chi̍a̍a̍ 1

¹Mɛ̄ɛ̍ Chɔ̄ɔ̍sūāā wāna̍ wa̍ I̍sɔ̄lūɛ̍i̍ya̍ chīla̍ŋndo̍ ō vī, mi̍ I̍sɔ̄lūɛ̍i̍ya̍ nyūnā Mɛ̄lɛ̄ka̍ Ya̍a̍wɛ̄ɛ̄ āā, “Yu̍ŋgu̍ kūɛ̍ɛ̍nɛ̍ nɔ̍ yɛ̄ fɛ̍lɛ̍ŋ mbō kūɛ̄ mbō kɔ̍ chi᷅ŋa̍la᷅ŋ Ke̍na̍na̍i̍tīi̍ya̍ a̍ sɔ̍ŋgɔ̄ɔ̍?”

²Mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl nda̍ āā, “Yu̍ŋgu̍ Chu̍dā wo̍ ndu̍ cho̍ yu̍ŋgu̍ ta̍se̍ nɔ̍ le̍ nda̍ kɔ̄la̍ŋ chīŋa̍la᷅ŋndo̍ wo̍ ni̍. Ndu̍yɛ̍ I̍ chi̍i̍ ni᷅ŋ nda̍ kpāāyāa̍ kē le̍ mā kɔ̍ yo᷅m wāŋnda̍ Ke̍nāŋ mā chūa̍ lɛ̄ŋndē lēŋ.”

³O̍ ko̍ŋ kɔ̍ɔ̍lī, mi̍ pūa̍a̍ Chu̍dā a̍ di̍mūl chāāŋāā ndāā I̍sɔ̄lūɛ̍i̍ya̍ ā pīli̍a̍a̍, nda̍ yɔ̍nūŋ māā yu̍ŋgu̍ Si̍mīɔ̄ŋndo̍ ni̍ āā, “Lā ŋ̄ kɔ̄ŋnu᷅ŋ mī lā kɔ̍ ma̍lā na̍a̍ sɔ̍ŋgɔ̄ɔ̍ a̍ Ke̍na̍na̍i̍tīi̍ya̍a̍ cho̍ o̍ būŋgɛ̄ī nda̍ ke̍ na̍a̍ ve̍ ni᷄ŋ nda̍. Tē ŋ̄ yēm ka̍ŋ pɛ̍, ŋ̄ kūɛ̄ vɛ̄lɛ̄ o̍ būŋgɛ̄ī nyɛ̄i̍ ni᷄ŋ ŋ̄ kɔ̍ ma̍lā nya̍ sɔ̍ŋgɔ̄ɔ̍ a̍ Ke̍na̍na̍i̍tīi̍ya̍a̍ cho̍ lo̍ŋ nda̍.” O̍ ko̍ŋ, mi̍ yu̍ŋgu̍ Si̍mīɔ̄ŋ ndo̍ ā chɛ̄la᷅ŋ a̍ nyɛ̄ yu̍ŋgu̍ Chu̍dā wo̍ ā dīmu̍l nda̍ wo̍, ma̍ kūā nda̍ nda̍ā.

⁴Ma̍ kɔ̍ chi᷅ŋa̍la᷅ŋ Ke̍na̍na̍i̍tīi̍ya̍ a̍ Pɛ̍lu̍i̍sa̍i̍tīi̍ya̍ a̍ sɔ̍ŋgɔ̄ɔ̍. Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ nda̍ kpāāyāa̍, ma̍ yām nda̍ ndu̍yɛ̍ ma̍ dīū nda̍ dīūwo̍ pīla̍ Bɛ̍sɛ̍kī chi̍e̍e̍. Ā nda̍ dīu̍ wa̍ ā wa̍ kpo̍u̍ kpo̍u̍ wāa̍la̍ŋ tɔ̍ (10,000).

⁵O̍ sɔ̍ŋgɔ̄ kōŋ ni᷄ŋ Bɛ̍sɛ̍kī chi̍e̍e̍, pūa̍a̍ Chu̍dā a̍ pūa̍a̍ o̍ yu̍ŋgu̍ Si̍mīɔ̄ŋndo̍ chōo̍ a̍ lo̍ sɔ̍ŋgɔ̄ɔ̍, ma̍ sāālu᷄ŋ māā Māsāa̍ Ādōnībɛ̍sɛ̍kī o̍ cho̍ lo̍ŋ. O̍ ko̍ŋ, ma̍ chīŋa̍la᷅ŋ ndu̍ a̍ sɔ̍ŋgɔ̄ɔ̍.

⁶Mi̍ Māsāa̍ Ādōnībɛ̍sɛ̍kī o̍ nya̍a̍nu᷄ŋ. Kɛ̍ mi̍ pūa̍a̍ Chu̍dā a̍ pūa̍a̍ o̍ yu̍ŋgu̍ Si̍mīɔ̄ŋndo̍ chōo̍ a̍ lo᷅ ndu̍ kīlta̍ŋ kɔ̄ɔ̄lī ha̍a̍a̍, ma̍ kɔ̍ bi̍ī ndu̍. Mɛ̄ɛ̍ nda̍ bīī ndu̍, ma̍ kīlī kīlī ndu̍ sōōŋ bɛ̄ndūŋ lābāa̍ŋ a̍ sōōŋ bɛ̄ndūŋ lābɛ̄ŋgo̍ŋ kpo̍u̍.

⁷O̍ ko̍ŋ, mi̍ Māsāa̍ Ādōnībɛ̍sɛ̍kī o̍ yi̍ya᷄ŋ a̍ nyɛ̄ o̍ to̍sa̍ wo̍. Mbo̍ dīmī āā, “Nyɛ̄ ya̍ I̍ to̍sa̍ a̍ māsāa̍ bɛ̍ndūāā ŋ̄wāŋ be̍le̍-ŋɔ̍mmɛ̍ū wa̍ wo̍, ndu̍ ko̍ni̍ Mɛ̄lɛ̄ka̍ tōsa̍ ho̍ō a̍ ya̍ ni̍. Mɛ̄ɛ̍ ya̍ I̍ bi̍ī nda̍ mi̍ kīlī kīlī nda̍ sōōŋ bɛ̄ndūŋ lābāa̍ŋ a̍ sōōŋ bɛ̄ndūŋ lābɛ̄ŋgo̍ŋ kpo̍u̍. Tē ya̍ i̍i̍ wa̍ nyɛ̄ dīa̍a̍ dīo̍o̍ o̍ ti̍bīi̍ nūu̍ chōo̍ pɛ̍, nyɛ̄ dīā pɔ̄m pɔ̍mbɔ̍ ndu̍ o̍o̍ de̍lī lɛ᷅ŋ ndo̍, ndu̍ nda̍ a̍a̍ chɔ̍ɔ̍vīāā ni̍ mā dīā.” Mi̍ pūa̍a̍ Chu̍dā a̍ pūa̍a̍ o̍ yu̍ŋgu̍ Si̍mīɔ̄ŋndo̍ chōo̍ a̍ ku̍ā a̍ Māsāa̍ Ādōnībɛ̍sɛ̍kī Chūlu̍sɛ̄lɛ̄m chi̍e̍e̍. Lo̍ŋ o̍ lo̍ ni᷅ŋ ni̍ ha̍a̍a̍ mbo̍ wū.

⁸O̍ ko̍ŋ kɔ̍ɔ̍lī, mi̍ pūa̍a̍ Chu̍dā a̍ ma̍lnu᷄ŋ vɛ̍lɛ̄ ma̍ kɔ̍ chi᷅ŋa̍la᷅ŋ Ke̍na̍na̍i̍tīi̍ya̍a̍ wa̍ Chūlu̍sɛ̄lɛ̄m nda̍ a̍ sɔ̍ŋgɔ̄ɔ̍. Ndu̍yɛ̍ ma̍ bīī Chūlu̍sɛ̄lɛ̄m ma̍ dīū Ke̍na̍na̍i̍tīi̍ya̍a̍ wa̍ lo̍ŋ nda̍, o̍ ko̍ŋ kɔ̍ɔ̍lī, ma̍ māl ndu̍ o̍ yīŋ.

⁹Ma̍ mālnu᷄ŋ vɛ̍lɛ̄ lo̍ŋ, ma̍ tūūsū bā tōūwo̍, le̍ mā kɔ̍ chi᷅ŋa̍la᷅ŋ Ke̍na̍na̍i̍tīi̍ya̍a̍ wa̍ o̍ lɛ̄ŋndē ŋ̄pēmbūle̍ŋ ni᷄ŋ nda̍, a̍ ha̍ā o̍ pēmbo᷄ŋ bɛ̄ŋgu̍, o̍ ko̍ŋ kɔ̍ɔ̍lī, a̍ ha̍ā bā tōūwo̍ o̍ lɛ̄ŋndē vēsɛ̍i̍le̍ŋ ni᷄ŋ.

¹⁰Ma̍ kūā, ma̍ kɔ̍ chi᷅ŋa̍la᷅ŋ Ke̍na̍na̍i̍tīi̍ya̍a̍ wa̍ Hi̍būlɔ̄ŋ nda̍, ndu̍yɛ̍ ma̍ yām vɛ̄lɛ̄ kāa̍la̍ wa̍ lo̍ŋ nda̍ŋ, la̍ŋ la̍ yɔ̍nūŋ ni̍ māā kāa̍le̍ Si̍ɛ̍sīāīle̍ŋ, a̍ kāa̍le̍ A̍hi̍māŋnde̍ŋ, a̍ kāa̍le̍ Ta̍li̍māīle̍ŋ. Ndu̍yɛ̍ Hi̍būlɔ̄ŋ yɛ̍, dīōlā ndɔ̄la̍ŋ la̍ wa̍ pāāndū ni̍ āā Kīlīāātī A̍bā.

¹¹O̍ ko̍ŋ kɔ̍ɔ̍lī, mi̍ pūa̍a̍ Chu̍dā a̍ ma̍lnu᷄ŋ vɛ̍lɛ̄ ma̍ kūā le̍ Ke̍na̍na̍i̍tīi̍ya̍a̍ wa̍ Dɛ̍bi̍lūīī wa̍ chīŋa̍la᷅ŋndo̍ a̍ sɔ̍ŋgɔ̄ɔ̍. Ndu̍yɛ̍ Dɛ̍bi̍lūīī ndu̍ o̍o̍ nɔ̍ pāāndū dīōla̍ŋ ni̍ āā Kīlīāātī Sɛ̍fɛ̄ɛ̄.

¹²Wānā pi᷅lɛ̍ wa̍ pūa̍a̍ Chu̍dā tɛ̍ɛ̄ŋ dīōla̍ŋ āā, Ke̍lɛ̍bī.[1] Mi̍ Ke̍lɛ̍bī ko̍ŋ dīmī āā, “Tē wānā o̍ wānā bi̍ī chi̍e̍e̍ bɛ̍ndōo̍ Kīlīāātī Sɛ̍fɛ̄ɛ̄ pɛ̍, I̍ ke̍ nu̍m A̍ki̍sā chu̍a̍ nī lā cha᷄l nya̍ ndu̍ o̍ nɔ̄ɔ̍ ni᷄ŋ.”

¹³Po̍ pi᷅lɛ̍ wa̍ dīōla̍ŋ āā O̍ti̍nīɛ̄l. Fi̍nyā ndɔ̍ dīōla̍ŋ āā Ke̍na̍sī, pɔ̄mbɔ̄ɔ̍ Ke̍lɛ̍bī. Mi̍ O̍ti̍nīɛ̄l ko̍ŋ ō kɔ̍ bi̍ī chi̍o̍o̍ ho̍ō. O̍ ko̍ŋ, mi̍ Ke̍lɛ̍bī ke᷅ ndu̍ A̍ki̍sā chu̍a̍ ndɔ̄ le̍ mā cha᷄l nda̍ ndu̍ o̍ nɔ̄ɔ̍ ni᷄ŋ.

¹⁴Pāa̍le̍ nda̍ wa̍ cha᷄lle̍ o̍ nɔ̄ɔ̍ ni᷄ŋ nde̍ŋ, mi̍ O̍ti̍nīɛ̄l di̍mūl A̍ki̍sā āā, “Di̍mu̍l fi̍nyā nu̍m mbō ke̍ na̍a̍ chīɛ̍i̍.” O̍ ko̍ŋ, mi̍ A̍ki̍sā tu̍āl o̍ sōfɛ̍lɛ̍ ndɔ̄ɔ̍ chōo̍, mbo̍ kūā nāa̍ Ke̍lɛ̍bī fi̍nyā ndɔ̄ chu̍a̍. Mi̍ Ke̍lɛ̍bī nyu̍nā ndu̍ āā, “Ō yɛ̄ɛ̍nɛ̍ ŋ̄ yēēma̍ yɛ̄ mī to̍sa̍l nu̍m chūā nūu̍?”

¹⁵Mi̍ A̍ki̍sā mu̍lūl ndu̍ āā, “Lɛ̄ŋndē ŋ̄ ke̍ ya̍ le̍ŋ o̍ fo̍ndā vēsɛ̍i̍yo̍ le̍ cho̍ ni̍. Le̍la̍ŋ ke̍ ya̍ so̍o̍ŋnda̍ māmɛ̄ŋnda̍ŋ lā ti᷄ŋ māā fāndā.” O̍ ko̍ŋ, mi̍ Ke̍lɛ̍bī ke᷅ ndu̍ so̍o̍ŋnda̍ māmɛ̄ŋnda̍ŋ mālūāŋ, a̍ la᷅ŋ mātōū.

¹⁶Ndu̍yɛ̍, wānāa̍ fu̍la̍ o̍ pūlāle̍ lēfōo̍ Mūu̍sēle̍ŋ chōo̍ wa̍, nda̍ yɔ̍nūŋ māā Ke̍na̍na̍i̍tīi̍ya̍ ni̍, Chɛ̄lu̍i̍kō chi̍e̍e̍ nda̍ wa̍ īchāli̍ ni̍, chi̍e̍e̍ ndu̍ o̍o̍ nɔ̍ vɛ̄lɛ̄ dīōla̍ŋ āā chi̍e̍e̍ māwāūwo̍ wo̍. Kɛ̍ mi̍ wāŋnda̍ ha̍ā ā fāŋa᷄ŋ nāa̍ nda̍ wa̍ ka̍ŋ nda̍ ma̍ kūā nda̍ yu̍ŋgu̍ Chu̍dā wo̍ lātūlu̍ le̍ mā kɔ̍ cha᷅l o̍ lɛ̄ŋndē Chu̍dāle̍ŋ ni᷄ŋ. Ma̍ kūā o̍ lɛ̄ŋndē po̍lte̍ŋ ni᷄ŋ A̍lu̍a̍dī chi̍e̍e̍ i̍kɛ̍i̍ o̍ lɛ̄ŋndē Chu̍dāle̍ŋ ni᷄ŋ, ma̍ kɔ̍ cha᷅l lo̍ŋ wa᷅ŋnda̍ ha̍ā tɛ̄ɛ̄ŋ.

¹⁷Mi̍ pūa̍a̍ Chu̍dā nda̍ pūa̍a̍ fu̍la̍ o̍ yu̍ŋgu̍ Si̍mīɔ̄ŋ ndo̍ chōo̍ wa̍ ā mālnu᷄ŋ ma̍ kɔ̍ de᷅l Ke̍na̍na̍i̍tīi̍ya̍a̍ wa̍ Sɛ̍fa̍tī chi̍e̍e̍ wa̍ chōo̍ a̍ sɔ̍ŋgɔ̄ɔ̍. Ma̍ yām Ke̍na̍na̍i̍tīi̍ya̍, ndu̍yɛ̍ ma̍ tɛ̄ɛ̄mbūū Sɛ̍fa̍tī kpo̍u̍. O̍ ko̍ŋ, ma̍ kē Sa̍fɛ̍tī dīōlā chēle̍ŋ āā, Hɔ̍ɔ̍māā.

¹⁸O̍ ko̍ŋ kɔ̍ɔ̍lī, mi̍ wāŋnda̍ Chu̍dā a̍ bi̍ī vɛ̄lɛ̄ chi̍e̍e̍ŋ bɛ̍ndūŋ chēle̍ŋ lātūlu̍ a̍ būŋga᷄ŋ ba̍lu̍ mu̍ŋ ndo̍ŋ kpo̍u̍. Chi̍e̍e̍ŋ mu̍ŋ mu̍ŋ cho̍ mu᷅ŋ ni̍. Ka̍a̍sā, a̍ A̍si̍kɛ̍lɔ̄ŋ a̍ Ɛ̍ki̍lɔ̄ŋ.

¹⁹Ndu̍yɛ̍ bā o̍ bā wāŋnda̍ Chu̍dā nda̍ a̍a̍ kɔ̍ a̍ sɔ̍ŋgɔ̄ɔ̍, Mɛ̄lɛ̄ka̍ Ya̍a̍wɛ̄ɛ̄ o̍ wa̍ nda̍ kɔ̄ɔ̄lī. Lɛ̄ŋndē ŋ̄pēmbūle̍ŋ kpo̍u̍ ma̍ chīī le̍ŋ bīyɔ̄ɔ̄. Kɛ̍ ndu̍yɛ̍ Ke̍na̍na̍i̍tīi̍ya̍ wa̍ o̍ lɛ̄ŋndē dɛ̍ŋgbɛ̍le̍ŋ ni᷄ŋ nda̍ ki̍nɛ̍i̍, ā nɔ̄la̍ mā sōli̍ nda̍ le̍, kāni̍ fo̍ndōle̍ wāŋnda̍ ha̍ā nyɛ̄m ndāŋ nya̍a̍na᷄ŋ ŋ̄chɔ̄ū su̍a̍ā ndāa̍ nda̍ a̍a̍ na᷅ŋ ndo̍ŋ, a̍ chīli̍ŋndo̍ŋ kpo̍sōŋ ŋ̍ wa̍ ŋ̄ tōōsīāā ni̍.

²⁰Mi̍ wāŋnda̍ I̍sɔ̄lūɛ̄ī a̍ ke᷅ Ke̍lɛ̍bī chi̍e̍e̍ bɛ̍ndōo̍ Hi̍būlɔ̄ŋ mɛ̄ɛ̍ Mūu̍sē ndu̍ o̍o̍ di̍mu̍l nda̍ yɛ̍. Ndu̍yɛ̍ po̍ pi᷅lɛ̍ wa̍ dīōla̍ŋ āā A̍na̍kīm pūa̍a̍ ndūāā ya̍a̍wa̍, yu̍ŋgu̍la̍ fu̍la̍ o̍ nda̍ ni᷄ŋ nda̍ŋ, nda̍ wa̍ o̍ chi̍o̍o̍ ho̍ō ni᷄ŋ ni̍. Kɛ̍ mi̍ Ke̍lɛ̍bī tu̍a̍ū nda̍ lo̍ŋ kpo̍u̍ mbō chūā chi̍e̍e̍ ko̍ŋ.

²¹Kɛ̍ yu̍ŋgu̍ Bɛ̍ŋnja̍mīŋ ndo̍ ndu̍ ā nɔ̄la̍ mā tōū Chɛ̍bu̍sa̍i̍tīi̍ya̍a̍ wa̍ Chūlu̍sɛ̄lɛ̄m chi̍e̍e̍ o̍ būŋgɛ̄ī ndɛ̄i̍ ni᷄ŋ nda̍ le̍. Le̍ he̍ī, a̍ pāa̍le̍ hāūle᷅ŋ bɛ̍ɛ̍, Chɛ̄bu̍sa̍i̍tīi̍ya̍ ā chō wɔ̄ wānāa̍ fu̍la̍ o̍ yu̍ŋgu̍ Bɛ̍ŋnja̍mīŋ ndo̍ chōo̍ wa̍ tɛ̄ɛ̄ŋ Chūlu̍sɛ̄lɛ̄m chi̍e̍e̍.

²²O̍ ko̍ŋ kɔ̍ɔ̍lī, mi̍ yu̍ŋgu̍ E̍fi̍lūēm ndo̍ a̍ yu̍ŋgu̍ Mānāa̍sē wo̍ a̍ fu̍la̍ o̍ pūlāle̍ Chōo̍sɛ̍ le̍ŋ chōo̍ wa̍, ā kūā le̍ Bɛ̍tɛ̄ɛ̄l dēlɔ̄ɔ̍ chōo̍ a̍ sɔ̍ŋgɔ̄ɔ̍. Ndu̍yɛ̍ Mɛ̄lɛ̄ka̍ Ya̍a̍wɛ̄ɛ̄ o̍ wa̍ nda̍ kɔ̄ɔ̄lī.

²³Bɛ̍tɛ̄ɛ̄l yɛ̍, dīōlā ndɔ̄la̍ŋ la̍ wa̍ pāāndū ni̍ āā Lu̍u̍sī. Mɛ̄ɛ̍ nda̍ kūɛ̄ le̍ ndu̍ dēlɔ̄ɔ̍ chōo̍, ma̍ sōlī su̍a̍ŋsu̍a̍ŋnda̍ ma̍ vīām nda̍ le̍ mā kɔ̍ mɛ̍ɛ̍nda᷄ŋ chi̍o̍o̍ ho̍ō mɛ̄ɛ̍ o̍ wa̍ yɛ̍.

²⁴Su̍a̍ŋsu̍a̍ŋnda̍ ā lo̍ kɔ̄la̍ŋ ma̍ bɔ̄ŋa᷅ŋ a̍ po̍ pi᷅lɛ̍ ō wa̍ chɔ̄nɔ᷄ŋndo̍ Bɛ̍tɛ̄ɛ̄l chi̍e̍e̍. Ma̍ dīmūl pōo̍ ho̍ō āā, “Chɔ̍m na̍a̍ mɛ̄ɛ̍ na̍a̍ ŋ̄ lōōkū mī ŋ̄ lūɛ̄ī chi̍e̍e̍ yɛ̍. Tē a̍ chɔ̍m na̍a̍ pɛ̍, ŋ̄ chō nu̍m hūnɔ̄ɔ̄ īnyīɛ̍ɛ̍ tūīīnɔ᷄ŋ.”

²⁵O̍ ko̍ŋ, mi̍ pōo̍ chɔ̄m nda̍ mɛ̄ɛ̍ nda̍ lōōkū mā lūɛ̄ī chi̍e̍e̍ yɛ̍. Mɛ̄ɛ̍ su̍a̍ŋsu̍a̍ŋnda̍ ha̍ā ā mīīŋgu̍ a̍ ko̍na̍a̍, mi̍ yu̍ŋgu̍ E̍fi̍lūēm ndo̍ a̍ yu̍ŋgu̍ Mānāa̍sē wo̍, ā kɔ̍ de᷅l Bɛ̍tɛ̄ɛ̄l chōo̍, ndu̍yɛ̍ ma̍ dīū wānā o̍ wāna̍ wa̍ lo̍ŋ. Wānāā nda̍ mɛ̄i̍ yōōmū wa̍, mɛ̄ɛ̍ po̍ chɔ̍m nda̍ ko̍ŋ nɛ̍īyo̍ wo̍ nda̍ yu̍ŋgu̍ ndɔ̄ɔ̍. Kɛ̍ wānā o̍ wa᷅na̍ wa̍ lo̍ŋ, ma̍ dīū nda̍ kpo̍u̍.

²⁶O̍ ko̍ŋ kɔ̍ɔ̍lī, mi̍ po̍ nda̍ mɛ̄i̍ ko̍ŋ yo̍o̍mū wo̍ ō kūā o̍ lɛ̄ŋndē Hi̍ta̍i̍tīi̍ya̍ ni᷄ŋ mbo̍ kɔ̍ ta̍ŋgūl chi̍o̍o̍ lo̍ŋ, mbo̍ kē chi̍e̍e̍ ko̍ŋ dīōla̍ŋ āā Lu̍u̍sī. Ndu̍yɛ̍ a̍ pāa̍le̍ hāūle᷅ŋ bɛ̍ɛ̍, dīōlā la᷄ŋ la̍ cho̍ wɔ̄ chi̍e̍e̍ ko̍ŋ chōo̍ ni̍.

²⁷Yu̍ŋgu̍ Mānāa̍sē wo̍ ā sōli̍ Ke̍na̍na̍i̍tīi̍ya̍a̍ wa̍ o̍ chi̍e̍e̍ŋ ndāŋ bɛ̍ndo᷄ŋ a̍ sɔ̄ndɔ̄kɔ̍lta̍ ba̍lū chi̍e̍e̍ŋ mu̍ŋ nda̍ŋ ni᷄ŋ te̍. Chi̍e̍e̍ŋ mu̍ŋ cho̍ mu᷅ŋ ni̍. Bɛ̄tī Si̍āŋ, a̍ Tāāna̍kī, a̍ Dɔ̍ɔ̄, a̍ Kātīlu̍i̍mɔ̄m, a̍ Mɛ̍ki̍dɔ̄ɔ̄. Ke̍na̍na̍i̍tīi̍ya̍a̍ wa̍ o̍ chi̍o̍o̍ŋ mu᷅ŋ nda̍ ki̍nɛ̍i̍. Yu̍ŋgu̍ Mānāa̍sē wo̍ ā sōli̍ nda̍ le̍. Ma̍ hīāū lāchī a̍ cha᷄lle̍ yu̍ŋgu̍ Mānāa̍sē wo̍ tɛ̄ɛ̄ŋ.

²⁸Kɛ̍ mɛ̄ɛ̍ te̍le̍ŋ ti̍ŋ hīo̍u̍, mi̍ I̍sɔ̄lūɛ̍i̍ya̍ ā sɔ̄lā kpāāyāa̍, ma̍ kīndīlā Ke̍na̍na̍i̍tīi̍ya̍ ha̍ā, ma̍ sīīŋgūū nda̍ chīa̍a̍ nda̍a̍ wa̍lla̍. Kɛ̍ ā chīi̍ lɛ̍ nda̍ sōlī o̍ chi̍e̍e̍ŋ mu̍ŋ ni᷄ŋ te̍, mi̍ ā ti᷄ŋ ā hīāū lāchī a̍ cha᷄lle̍ nda̍ tɛ̄ɛ̄ŋ.

²⁹Yu̍ŋgu̍ E̍fi̍lūēm ndo̍ bɛ̍ɛ̍ ā sōli̍ Ke̍na̍na̍i̍tīi̍ya̍a̍ wa̍ Kɛ̍sɛ̄ɛ̄ chi̍e̍e̍ wa̍ le̍. Le̍ he̍ī, mi̍ Ke̍na̍na̍i̍tīi̍ya̍ ā hīāū lāchī a̍ cha᷄lle̍ nda̍ tɛ̄ɛ̄ŋ.

³⁰Yu̍ŋgu̍ Sɛ̍bu̍lɔ̄ŋ ndo̍ bɛ̍ɛ̍ ā sōli̍ Ke̍na̍na̍i̍tīi̍ya̍a̍ wa̍ Ki̍ti̍lɔ̄ŋ chi̍e̍e̍ a̍ Na̍ha̍lāl chi̍e̍e̍ wa̍ le̍. O̍ ko̍ŋ, nda̍ bɛ̍ɛ̍ mi̍ Ke̍na̍na̍i̍tīi̍ya̍ ā hīāū lāchī a̍ cha᷄lle̍ nda̍ tɛ̄ɛ̄ŋ. Kɛ̍ mi̍ yu̍ŋgu̍ Sɛ̍bu̍lɔ̄ŋ ndo̍ ō sīīŋgūū Ke̍na̍na̍i̍tīi̍ya̍a̍ ka̍ŋ chīa̍a̍ ndāa̍ wa̍lla̍.

³¹Yu̍ŋgu̍ A̍sīɛ̄ɛ̄ wo̍ bɛ̍ɛ̍ ā sōli̍ Ke̍na̍na̍i̍tīi̍ya̍a̍ wa̍ o̍ chi̍o̍o̍ŋ mu᷅ŋ nda̍ le̍, mu̍ŋ yɔ̍nūŋ ni̍ māā A̍kɔ̄ɔ̄ chi̍e̍e̍, a̍ Sa̍i̍dɔ̄ŋ, a̍ A̍la̍bī, a̍ A̍ki̍si̍bī, a̍ Hɛ̍li̍bāā, a̍ A̍fɛ̍kī, a̍ Lu̍ɛ̍ho̍bī.

³²O̍ ko̍ŋ, mi̍ yu̍ŋgu̍ A̍sīɛ̄ɛ̄ wo̍ ā chāl Ke̍na̍na̍i̍tīi̍ya̍ tɛ̄ɛ̄ŋ, o̍ būŋgɛ̄ī kēŋ ni᷄ŋ, fo̍ndōle̍, ā sōli̍ Ke̍na̍na̍i̍tīi̍ya̍ wa̍ lo̍ŋ nda̍ le̍.

³³Yu̍ŋgu̍ Nāfi̍ta̍lī wo̍ bɛ̍ɛ̍ ā sōli̍ Ke̍na̍na̍i̍tīi̍ya̍a̍ wa̍ Bɛ̄tī Si̍ɛ̍mɛ̍sī chi̍e̍e̍ a̍ Bɛ̄tāna̍tī chi̍e̍e̍ wa̍ le̍. O̍ ko̍ŋ, mi̍ yu̍ŋgu̍ Nāfi̍ta̍lī wo̍ ā chāl Ke̍na̍na̍i̍tīi̍ya̍ ha̍ā tɛ̄ɛ̄ŋ. Kɛ̍ mi̍ yu̍ŋgu̍ Nāfi̍ta̍lī wo̍ ā sīīŋgūū Ke̍na̍na̍i̍tīi̍ya̍a̍ wa̍ o̍ chi̍o̍o̍ŋ mu᷅ŋ nda̍ chīa̍a̍ ndāa̍ wa̍li̍.

³⁴Yu̍ŋgu̍ Da᷅ŋndo̍ ndu̍, mi̍ A̍mɔ̍lu̍a̍i̍tīi̍ya̍ wa̍ o̍ būŋgɛ̄ī ndɛ̄i̍ ni᷄ŋ nda̍, ā sīmūl nda̍ sīmūllo̍ pīla̍, ma̍ tūāū yu̍ŋgu̍ Da᷅ŋndo̍, mi̍ yu̍ŋgu̍ Da᷅ŋndo̍ ā kɔ̍ cha᷅l o̍ lɛ̄ŋndē ŋ̄pēmbū le̍ŋ. Yu̍ŋgu̍ Da᷅ŋndo̍ ā nɔ̄la̍ mā tōl o̍ lɛ̄ŋndē dɛ̍ŋgbɛ̍le̍ŋ ni᷄ŋ mā cha᷄l lo̍ŋ te̍.

³⁵Le̍ he̍ī, mi̍ A̍mɔ̍lu̍a̍i̍tīi̍ya̍ ā hīāū lāchī a̍ chālle̍ A̍i̍cha̍lɔ̄ŋ chi̍e̍e̍, a̍ Si̍a̍a̍lbīm, o̍ ko̍ŋ kɔ̍ɔ̍lī, a̍ o̍ Pēmbīī Hɛ̄lu̍ɛ̍sīve̍ chōo̍. Kɛ̍ mi̍ yu̍ŋgu̍la̍ fu̍la̍ o̍ pūlāle̍ Chōo̍sɛ̍le̍ŋ chōo̍ la̍ŋ, yu̍ŋgu̍ E̍fi̍lūēm ndo̍ a̍ yu̍ŋgu̍ Mānāa̍sē wo̍ ā kīndīlā A̍mɔ̍lu̍a̍i̍tīi̍ya̍ ha̍ā ma̍ sīīŋgūū nda̍ chīa̍a̍ ndāa̍ wa̍li̍.

³⁶Ndu̍yɛ̍ A̍mɔ̍lu̍a̍i̍tīi̍ya̍ ha̍ā pɛ̄ŋgu̍la̍ lɛ̄ŋndē ndāle̍ŋ mɛ̄ɛ̍ la̍ chɛ̍ŋ Ākīlūābī Pa̍a̍sī, mi̍ lā kūā a̍ Sɛ̍lā chi̍e̍e̍, o̍ ko̍ŋ kɔ̍ɔ̍lī, mi̍ lā hēēlū kɛ᷅.