Read Southern Kisi Chɔ̄ɔ̍chi̍a̍a̍ 11 Bible Online

Chɔ̄ɔ̍chi̍a̍a̍ 11 - Southern Kisi bible

Chɔ̄ɔ̍chi̍a̍a̍ 11

¹Po̍ Ku̍u̍ba̍nɔ̍ pi᷅lɛ̍ wa̍ fūlāa̍ o̍ būŋgɛ̄ī Ki̍li̍a̍a̍dīve̍ ni᷄ŋ dīōla̍ŋ āā Chɛ̍fi̍tāā, fi̍nyā ndɔ̍ dīōla̍ŋ āā Ki̍li̍a̍a̍dī. Kɛ̍ pōo̍ ho̍ō, kāla̍ ndɔ̄ wānā la̍nɔ̍ ti̍a̍māa̍ pi̍la̍ o̍ wa̍ ni̍.

²Kɛ̍, Ki̍li̍a̍a̍dī mi̍ la̍a̍ ndɔ̄ kpe̍e̍kpe̍i̍ yo̍ ō vīlūl ndu̍ pūa̍a̍, ndu̍yɛ̍, mi̍ pūa̍a̍ ha̍ā ā hīndū, ma̍ sīmnu᷄ŋ la̍ka̍a̍so̍ŋ. Mɛ̄ɛ̍ nda̍ sīmnu᷄ŋ la̍ka̍a̍so̍ŋ, ma̍ tūāū Chɛ̍fi̍tāā o̍ fi̍nyā ndā lo̍ chi̍ɛ̍ī ni᷄ŋ. Ma̍ dīmūl ndu̍ āā, “A̍ cho̍ o̍ nyɛ̄m ke᷅ŋ fi̍nyā nāa̍ chōo̍ le̍, fo̍ndōle̍, nūm wānā la̍nɔ̍ che᷅le̍ŋ pɔ̍ ve̍lū nu̍m ni̍.”

³O̍ ko̍ŋ, mi̍ Chɛ̍fi̍tāā nya̍a̍nu᷄ŋ pu̍a̍a̍ fi̍nyā ndɔ̄ ve̍lū a̍ la̍nɔ̍ kpe̍e̍kpe̍i̍yo̍ wa̍ mbo̍ kūānu᷅ŋ o̍ lɛ̄ŋndē To̍bīle̍ŋ ni᷄ŋ mbo̍ kɔ̍ cha᷅l lo̍ŋ. Mɛ̄ɛ̍ o̍ ku̍ɛ̄ lo̍ŋ, mi̍ pūa̍a̍ kɔ̄l vēsɛ̍i̍ya̍a̍ bɛ̍ndūa̍a̍ bu̍u̍la̍ŋ le̍ īsɔ̄ɔ̍ o̍ īsɔ̄ɔ̍ wɔ̍ɔ̍ŋ tōsā le̍ wa̍ ā tūāl ndu̍ kɔ̄ɔ̄lī mā bālū nda̍ nda̍ā, mā kēī nyɛ᷅m pi̍la̍ŋ pōōndīa̍a̍.

⁴Mɛ̄ɛ̍ A̍mɔ᷅na̍i̍tīi̍ya̍ ā bɛ̄ɛ̄ndi̍āŋ le̍ kɔ̄la̍ŋ I̍sɔ̄lūɛ̍i̍ya̍ dēlɔ̄ɔ̍ chōo̍ a̍ sɔ̍ŋgɔ̄ɔ̍,

⁵mi̍ wāŋ bɛ̄ndūa̍a̍ Ki̍li̍a̍a̍dī a̍ ma̍lnu᷄ŋ ma̍ kūā Chɛ̍fi̍tāā kɔ̄ɔ̄lī o̍ lɛ̄ŋndē To̍bīle̍ŋ ni᷄ŋ.

⁶Ma̍ kɔ̍ di̍mūl Chɛ̍fi̍tāā āā, “Hu̍ŋ mā hu̍ŋ si̍m pūa̍a̍ chɔ̄ūwa̍ lāchī mī ŋ̄ sɔ̄ŋga̍ a̍ A̍mɔ᷅na̍i̍tīi̍ya̍.”

⁷Kɛ̍ mi̍ Chɛ̍fi̍tāā di̍mūl nda̍ āā, “Lā tu᷄l la̍ lēyɛ̄ mi̍ lā sōlī ya̍ o̍ fi̍nyā nūu̍ lo̍ chi̍ɛ̍ī ni̍ŋ po̍. Tē nyɛ̄ pālāa̍ ō kōma̍l nya̍ ni᷅ŋ hāū pɛ̍, lā hīŋ ya̍ kɔ̄ɔ̄lī?”

⁸Mi̍ wāŋ bɛ̄ndūa̍a̍ Ki̍li̍a̍a̍dī a̍ di̍mūl ndu̍ āā, “Le̍nde̍ i̍ yɔ̍nu̍ŋ ni̍, kɛ̍ ŋ̄ yēēma̍ nu̍m mā hīŋ. Ŋ̄ kɔ̄ŋnu᷅ŋ ma̍ kɔ̍ ma̍lā na̍a̍ sɔ̍ŋgɔ̄ɔ̍ a̍ A̍mɔ᷅na̍i̍tīi̍ya̍. O̍ ko̍ŋ, mī ŋ̄ sīīŋgu̍u̍ nu̍m wānā ba̍nāa̍ le̍ būŋgɛ̄ī Ki̍li̍a̍a̍dīve̍ kpo̍u̍.”

⁹Mi̍ Chɛ̍fi̍tāā lo᷅ o̍ ko̍ŋ mbo̍ nyūnā nda̍ āā, “Tē ŋ̄ kūɛ̄ na̍a̍ nya̍ā pɛ̍, ndu̍yɛ̍ mī Mɛ̄lɛ̄ka̍ Ya̍a̍wɛ̄ɛ̄ o̍ ke̍ ya̍ kpāāyāa̍ mī ye᷅m A̍mɔ᷅na̍i̍tīi̍ya̍, lā chɛ᷅l la̍ ni̍ŋ mī wa̍ nya̍ kpo̍u̍ chi᷅la̍ŋ?”

¹⁰Mi̍ wāŋ bɛ̄ndūa̍a̍ Ki̍li̍a̍a̍dī a̍ mu̍lī āā, “E̍ī, ŋ̄ chɛ᷄l. Ndu̍yɛ̍, Mɛ̄lɛ̄ka̍ cho̍ se̍ī nāa̍ ni̍.”

¹¹O̍ ko̍ŋ, mi̍ Chɛ̍fi̍tāā chɛ᷅l ma̍ kūā nda̍ wāŋ bɛ̄ndūa̍a̍ Ki̍li̍a̍a̍dī. Ndu̍yɛ̍, ma̍ kɔ̍ kɛ̍sī ndu̍ būŋgɛ̄ī Ki̍li̍a̍a̍dī ve̍ kpo̍u̍ bo᷅lle̍ŋ. O̍ ko̍ŋ kɔ̍ɔ̍lī, ma̍ kɛ̄sī ndu̍ vɛ̄lɛ̄ pūa̍a̍ chɔ̄ūwa̍ kpo̍u̍ bo᷅lle̍ŋ. Ndu̍yɛ̍, nyɛ̄ o̍ nyɛ̄ nda̍ sūūki̍āŋ nda̍ wāŋ bɛ̄ndūa̍a̍, mbo̍ kɔ̍ mi̍ŋgī ndu̍ sōndō Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l Mi̍si̍pā chi̍e̍e̍.

¹²O̍ ko̍ŋ kɔ̍ɔ̍lī, mi̍ Chɛ̍fi̍tāā o̍ so̍lī ki̍i̍la̍a̍ mbo̍ vīām nda̍ nāa̍ māsa̍ A̍mɔ᷅na̍i̍tīi̍ya̍ chūā a̍ yōōŋgōo̍. Mbo̍ nyūnā ndu̍ āā, “Su̍ɛ̍i̍ yɛ̄ɛ̍nɛ̍ cho̍ yɛ̄ na̍a̍ tɛ̄ɛ̄ŋ na̍a̍ nya̍ā ma̍ chīŋa̍la᷅ŋ lɛ᷅ŋndē nāāle̍ŋ a̍ sɔ̍ŋgɔ̄ɔ̍?”

¹³Mɛ̄ɛ̍ Ki̍i̍la̍a̍ Chɛ̍fi̍tāā o̍ ve᷅m nda̍ ā kɔ̍ di̍mūl māsa̍ A̍mɔ᷅na̍i̍tīi̍ya̍ yōōŋgōo̍ ho̍ō, mbo̍ mūlūl nda̍ āā, “Bōōndi̍i̍ I̍sɔ̄lūɛ̍i̍ya̍ ā fūla̍ o̍ lɛ̄ŋndē I̍chi̍pīle̍ŋ ni᷄ŋ ma̍ hūŋ nde̍, ma̍ chūā lɛ̄ŋndē nīle̍ŋ chɔ̍ŋ A̍nɔ̄ŋ o̍ pēēlo̍ mbo̍ kūā a̍ Pīo̍o̍ Cha̍bɔ̍kī bā lūāŋndo̍, mbo̍ tūāl a̍ Chɔ̍ɔ̍dāŋ o̍ pēēlo̍ di̍. Le̍la̍ŋ, tē lā yēēma̍ sɔ̍ŋgɔ̄ o̍ sɔ̍ŋgɔ̄ le̍, mɛ̄ɛ̍ lā mīŋgi̍ lɛ᷅ŋndē nīle̍ŋ yɛ̍lɛ̍ŋ.”

¹⁴Mɛ̄ɛ̍ nda̍ kɔ̍ di̍mūl Chɛ̍fi̍tāā yōōŋgōo̍ ho̍ō, mbo̍ mīŋgūl māsa̍ A̍mɔ᷅na̍i̍tīi̍ya̍ dīōmnde̍ŋ a̍ ki̍i̍la̍a̍ hi᷅ŋ a̍ yōōŋgōo̍ wa̍.

¹⁵Mbo̍ dīmūl māsa̍ A̍mɔ᷅na̍i̍tīi̍ya̍ āā, “Ī cho̍ to᷅nya̍ le̍. I̍sɔ̄lūɛ̍i̍ya̍ ā chūa̍ lēlɛ̄ŋ o̍ lēlɛ̄ŋ Mo̍wa̍bī, kɛ̄lɛ̄ŋgāā wāŋnda̍ A̍mɔ᷅ŋ o̍ bā le̍.

¹⁶Nyɛ̄ yɔ̍nu̍ŋ ndo̍ ndu̍ cho̍ ho̍ō ni̍. Mɛ̄ɛ̍ wāŋnda̍ I̍sɔ̄lūɛ̄ī a̍ fu̍la̍ o̍ lɛ̄ŋndē I̍chi̍pīle̍ŋ ni᷄ŋ, ma̍ kēēkū o̍ lɛ̄ŋndē po̍lte̍ŋ, ma̍ tāŋ pēē bɛ̍ndū sīāŋā mɛ̄ŋmā īhɛ᷄llo̍ ma̍ fūūlūū Ka̍dɛ̍sī.

¹⁷Mɛ̄ɛ̍ nda̍ fūūlu̍u̍ Ka̍dɛ̍sī, nda̍ a̍a̍ ye̍e̍ma̍ mi̍ nda̍ a̍a̍ ke̍e̍ku̍ a̍ lɛ̄ŋndē I̍dɔ̄mnde̍ŋ. O̍ ko̍ŋ, ma̍ vīām ki̍i̍la̍a̍ nāa̍ māsāa̍ I̍dɔ̄m chu̍a̍, ma̍ nyūnā ndu̍ le̍ mbō chɛ᷄l nda̍ mā kēēku̍ o̍ lɛ̄ŋndē ndɔ̄le̍ŋ ni᷄ŋ. Kɛ̍ mi̍ māsāa̍ I̍dɔ̄m o̍ kɛ̍ɛ̄. Mɛ̄ɛ̍ o̍ kɛ̍ɛ̍, ma̍ nyūnā vɛ̄lɛ̄ māsāa̍ Mo̍wa̍bī le̍ mbō chɛ᷄l nda̍ mā kēēku̍ o̍ lɛ̄ŋndē ndɔ̄le̍ŋ ni᷄ŋ, kɛ̍ ndu̍ bɛ̍ɛ̍ mbo̍ kɛ̄ɛ̄. Mɛ̄ɛ̍ nda̍ kɛ̄ɛ̍, mi̍ I̍sɔ̄lūɛ̍i̍ya̍ ā chāl Ka̍dɛ̍sī le̍ te̍le̍ŋ ti̍ŋ.

¹⁸Mɛ̄ɛ̍ te̍le̍ŋ ti̍ŋ ō hīo̍u̍, ma̍ hīāū lāchī a̍ kɔ̄la̍ŋ, ma̍ kēēkū a̍ lɛ̄ŋndē po̍lte̍ŋ, ma̍ hōlnu᷄ŋ lɛ̍ŋndē I̍dɔ̄mnde̍ŋ a̍ lɛ̄ŋndē Mo̍wa̍bī le̍ŋ chɛ̍chɛ̍, ma̍ hu᷄ŋ fu̍lā o̍ lɛ̄ŋndē Mo̍wa̍bī le̍ŋ bā pāa̍le̍ŋ lē chāŋndo̍, o̍ Pīo̍o̍ A̍nɔ̄ŋ kɔ̄ŋgɔ̍ɔ̍ pīlɔ̍ɔ̍. O̍ ko̍ŋ, ma̍ kīālū dɔ̍ɔ̍ŋgɔ̍ɔ̍ o̍ Pīo̍o̍ A̍nɔ̄ŋ kɔ̍ŋgɔ̍ lo̍ŋ, ma̍ chāl lo̍ŋ. Kɛ̍ ā te᷄ŋ pi̍o̍o̍ A̍nɔ̄ŋ te̍, fo̍ndōle̍, pēē ko̍ŋ, ndu̍ wa̍ pɛ̄ŋgu̍la̍ŋ a̍ lɛ̄ŋndē Mo̍wa̍bīle̍ŋ ni̍.

¹⁹“O̍ ko̍ŋ kɔ̍ɔ̍lī, mi̍ I̍sɔ̄lūɛ̍i̍ya̍ ā sōlī ki̍i̍la̍a̍, ma̍ vīām nda̍ nāa̍ Māsāa̍ Si̍hɔ̄ŋ chu̍a̍, o̍ wa̍ māsāa̍ le̍ A̍mɔ̍lu̍a̍i̍tīi̍ya̍ wo̍. Ndu̍yɛ̍ Hɛ̍si̍bɔ̄ŋ chi̍e̍e̍ māsāa̍ Si̍hɔ̄ŋ o̍ wa̍ īchāli̍ ni̍. Mi̍ I̍sɔ̄lūɛ̍i̍ya̍ ā nyūna̍ ndu̍ le̍ mbō chɛ᷄l nda̍ mā kēēku̍ o̍ lɛ̄ŋndē ndɔ̄le̍ŋ ni᷄ŋ.

²⁰Kɛ̍ mi̍ Māsāa̍ Si̍hɔ̄ŋ o̍ kɛ̍ɛ̄, fo̍ndōle̍, ndu̍ o̍o̍ la̍a̍la̍ŋ a̍ I̍sɔ̄lūɛ̍i̍ya̍ le̍. O̍ ko̍ŋ, mbo̍ chūūŋgīāā pūa̍a̍ ndūa̍a̍ chɔ̄ūwa̍ kpo̍u̍, ma̍ kɔ̍ ki̍o̍lū dɔ̍ɔ̍ŋgɔ̍ɔ̍ Cha̍ha̍sī chi̍e̍e̍ ma̍ kɔ̍ chi᷅ŋa̍la᷅ŋ I̍sɔ̄lūɛ̍i̍ya̍ a̍ sɔ̍ŋgɔ̄ɔ̍.

²¹Kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ ō kē I̍sɔ̄lūɛ̍i̍ya̍ kpāāyāa̍, ma̍ yām Māsāa̍ Si̍hɔ̄ŋ nda̍ pūa̍a̍ ndūa̍a̍ chɔ̄ūwa̍. O̍ ko̍ŋ A̍mɔ̍lu̍a̍i̍tīi̍ya̍a̍ wa̍ o̍ lɛ̄ŋndē lēŋ ni᷄ŋ nda̍, mi̍ I̍sɔ̄lūɛ̍i̍ya̍ ā bīī būŋgɛ̄ī nda̍ wa̍ īchāli̍ le̍ni̍ŋ nde̍ kpo̍u̍.

²²Būŋgɛ̄ī A̍mɔ̍lu̍a̍i̍tīi̍ya̍ kpo̍u̍, chɔ̍ŋ o̍ pi̍o̍o̍ A̍nɔ̄ŋ bā tōūwo̍, mbo̍ kūā a̍ Pīo̍o̍ Cha̍bɔ̍kī bā lūāŋndo̍, a̍ chɔ̍ŋ vɛ̍lɛ̄ o̍ lɛ̄ŋndē po̍lte̍ŋ bā pāa̍le̍ŋ lē chāŋndo̍, mbo̍ kūā a̍ Pīo̍o̍ Chɔ̍ɔ̍dāŋ bā pāa̍le̍ŋ lē dēllo̍, būŋgɛ̄ī kēŋ kpo̍u̍ mi̍ ī wā I̍sɔ̄lūɛ̍i̍ya̍ o̍ bā bɛ̄ŋgu̍.

²³Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍, ndu̍ pi̍la̍ kpe̍e̍kpe̍i̍ to̍ū A̍mɔ̍lu̍a̍i̍tīi̍ya̍ ha̍ā wānāā ndūa̍a̍ I̍sɔ̄lūɛ̍i̍ lāchī ni̍, mbo̍ kē nda̍ lɛ̄ŋnde̍ŋ nde᷅ŋ. Le̍la̍ŋ a̍ nɔ̍ di̍ o̍ di̍, mā chu̍a̍ lɛ̄ŋndē lēŋ te̍.

²⁴Nyɛ̄ o̍ nyɛ̄ nya̍ sɔ̄la̍ mɛ̄lɛ̄ka̍ nyāa̍ Chɛ̍mɔ̍sī o̍ bā pɛ̍, mɛ̄ɛ̍ nya̍ nɔ̍ ko̍ŋ ni̍. Na̍a̍ bɛ̍ɛ̍ nyɛ̄ o̍ nyɛ̄ na̍a̍ ŋ̄ sɔ̄la̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ o̍ bā pɛ̍, mɛ̄ɛ̍ o̍ na̍a̍ cho̍ ko̍ŋ ni̍.

²⁵Tē ō wa̍ le̍ la̍ŋ pɛ̍, mɛ̄ɛ̍ Be̍la̍kī, po̍ Si̍pɔ̄ɔ̄ wo̍, o̍ wa̍ māsāa̍ le̍ Mo̍wa̍bī wo̍ mɛ̄ɛ̍ ndu̍ o̍o̍ chi᷅ŋa̍la᷅ŋ I̍sɔ̄lūɛ̍i̍ya̍ a̍ sɔ̍ŋgɔ̄ɔ̍ le̍ lɛ̄ŋnde̍ŋ nde᷅ŋ. Kɛ̍ pāa̍le̍ pi᷅lɛ̍ bɛ̍ɛ̍, kɔ̄l kōŋ ō de᷄l ndu̍ le̍. Ā nɔ̄ o̍ kɔ̄l ma̍a̍ a̍ bɛ̍nda̍ ma̍ hīāū Ba̍lu̍a̍kī?

²⁶Le̍ wɔ̄sīla̍ŋ kɛ̄mɔ̄ɔ̍ lēyāa̍, chi̍o̍o̍ŋ mu᷅ŋ ki̍nɛ̍i̍, Hɛ̍si̍bɔ̄ŋ ni̍, a̍ A̍lo̍yā, o̍ ko̍ŋ kɔ̍ɔ̍lī, a̍ chi̍e̍e̍ pɔ̍mbɔ᷄ŋ ba̍lu̍ mu̍ŋ ndo̍ŋ, ndu̍yɛ̍ a̍ chi̍e̍e̍ŋ bɛ̍ndu᷄ŋ ho̍lnu̍ŋ pi̍o̍o̍ A̍nɔ̄ŋ ndo̍ŋ kpo̍u̍, I̍sɔ̄lūɛ̍i̍ya̍ o̍ bā bɛ̄ŋgu̍ ŋ̄ cho̍ ni̍. Vɛ᷅ o̍ wɔ̄sīla̍ŋ nda᷅ŋ bɛ̄ŋgu̍ kpo̍u̍, a̍ nɔ̍la̍ mā po̍o̍ndi̍a̍a̍ chi̍o̍o̍ŋ mu᷅ŋ te̍?

²⁷Le̍la̍ŋ I̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ a̍ nūm te̍. Nu᷄m wɔ̍u̍ a̍ ya̍ ni̍. A̍ nɔ̍ di̍ o̍ di̍ mā hu̍ŋ chi᷅ŋa̍la᷅ŋ ya̍ a̍ sɔ̍ŋgɔ̄ɔ̍ le̍. Kɛ̍ ndu̍yɛ̍, Mɛ̄lɛ̄ka̍ Ya̍a̍wɛ̄ɛ̄, o̍ cho̍ yāma̍nɔ̄ bɛ̄ndōo̍ kpo̍u̍ wo̍, ndu̍ cho̍ yāmɛ̍i̍ he̍ī kīōlɔ̄ɔ̄ na̍a̍ I̍sɔ̄lūɛ̍i̍ya̍ tɛ̄ɛ̄ŋ a̍ nya̍ wāŋnda̍ A̍mɔ᷅ŋ ni̍.”

²⁸Kɛ̍ Māsāa̍ A̍mɔ᷅ŋ o̍ ye̍ŋ Chɛ̍fi̍tāā lānī le̍.

²⁹O̍ ko̍ŋ kɔ̍ɔ̍lī, mi̍ nyi̍na̍ Mɛ̄lɛ̄ka̍ Ya̍a̍wɛ̄ɛ̄ wo̍ ō tūāl Chɛ̍fi̍tāā kɔ̄ɔ̄lī. Mi̍ Chɛ̍fi̍tāā ke̍e̍kū o̍ būŋgɛ̄ī Ki̍li̍a̍a̍dī ve̍ ni᷄ŋ, mbo̍ kūā a̍ būŋgɛ̄i̍ Mānāa̍sē ve̍, mbo̍ mīīŋgū Mi̍si̍pā chi̍e̍e̍ o̍ būŋgɛ̄ī Ki̍li̍a̍a̍dī ve̍ ni᷄ŋ. O̍ ko̍ŋ kɔ̍ɔ̍lī, mbo̍ chūā pūa̍a̍ chɔ̄ūwa̍ I̍sɔ̄lūɛ̄ī, mā kūā le̍ A̍mɔ᷅na̍i̍tīi̍ya̍ chīŋa̍la᷅ŋndo̍ a̍ sɔ̍ŋgɔ̄ɔ̍.

³⁰Lɔ̍ɔ̍pa̍ ma̍ māl le̍ kɔ̄la̍ŋ, mi̍ Chɛ̍fi̍tāā o̍ chu̍ēl Mɛ̄lɛ̄ka̍ Ya̍a̍wɛ̄ɛ̄ būŋgɛ̄i̍. Mbō dīmūl ndu̍ āā, “Mɛ̄lɛ̄ka̍, tē ā ke̍ ya̍ kpāāyāa̍ pɛ̍ mī kɔ̍ yo᷅m A̍mɔ᷅na̍i̍tīi̍ya̍,

³¹mī ŋ̄ mi̍i̍ŋgu̍ na̍nu᷄ŋ kɛ̍ndīa̍a̍, wāna̍ tāse̍ cho̍ fūlā o̍ ya̍lo̍ chi̍ɛ̍ī ni̍ŋ le̍ ya̍ hūnɔ̄ɔ̍ dēmūllo̍ wo̍, I̍ cho̍ wānā ko̍ŋ sa̍lā lūāmāa̍ sōlī o̍ nūmndo̍.”

³²O̍ ko̍ŋ kɔ̍ɔ̍lī, mi̍ Chɛ̍fi̍tāā nda̍ pūa̍a̍ ndūa̍a̍ chɔ̄ūwa̍, ā tāŋ pīo̍o̍, ma̍ kɔ̍ chi᷅ŋa̍la᷅ŋ A̍mɔ᷅na̍i̍tīi̍ya̍ a̍ sɔ̍ŋgɔ̄ɔ̍. Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ nda̍ kpāāyāa̍, ma̍ yām A̍mɔ᷅na̍i̍tīi̍ya̍.

³³Chi̍e̍e̍ŋ ndāŋ bɛ̍ndu᷄ŋ wa̍ chɔ̍ŋ A̍lo̍yā chi̍e̍e̍ mbo̍ fūūlūū o̍ būŋgɛ̄ī Mi̍ni̍tīve̍ ni᷄ŋ ndo̍ŋ kpo̍u̍ mi̍ I̍sɔ̄lūɛ̍i̍ya̍ tɛ̄ɛ̄mbūū mu̍ŋ. Chi̍e̍e̍ŋ bɛ̍ndo̍ŋ ŋ̄ wa̍ kpo̍u̍ kpo̍u̍ bi̍di̍i̍ŋ o̍ būŋgɛ̄ī kēŋ ni᷄ŋ. O̍ ko̍ŋ kɔ̍ɔ̍lī, chi̍e̍e̍ŋ ndāŋ bɛ̍ndo̍ŋ ŋ̄ pīlɔ̍ŋ, chɔ̍ŋ le̍nde̍, mbo̍ fūūlūū a̍ E̍bɛ̄ɛ̄l Ki̍lu̍a̍mīm chi̍e̍e̍ di̍, ma̍ tɛ̄ɛ̄mbūū mu̍ŋ kpo̍u̍. Ndu̍yɛ̍ ma̍ dīū A̍mɔ᷅na̍i̍tīi̍ya̍ dīūwo̍ pīla̍. O̍ ko̍ŋ, mi̍ I̍sɔ̄lūɛ̍i̍ya̍ yām A̍mɔ᷅na̍i̍tīi̍ya̍.

³⁴Mɛ̄ɛ̍ Chɛ̍fi̍tāā o̍ kɔ̍ chi̍ī ya̍a̍mɔ̍ɔ̍wa̍a̍ ndāa̍ yɔ̄mɔ̄ɔ̍, mbo̍ mīīŋgū Mi̍si̍pā chi̍e̍e̍. Mɛ̄ɛ̍ o̍ fu̍u̍lu̍u̍ Mi̍si̍pā, wāna̍ tāse̍ fu̍la̍ o̍ ndu̍ lo̍ chi̍ɛ̍ī ni̍ŋ mbo̍ hūŋ ndu̍ dēmūllo̍ wo̍ wa̍ chūā ndɔ̄ɔ̍ ni̍. Ō wa̍ hūnɔ̄ɔ̍ a̍ nyɛ̄ chāā ta̍mbɔ̍lūīmndo̍ lɔ̄ɔ̍ mbō yā, le̍ yōmɔ̄ɔ̄ fi̍nyā ndɔ̄ o̍ ye᷅m ndo̍. Ndu̍yɛ̍, chūāāmbɔ̄ɔ̍ ho̍ō, ndu̍ pīlɛ̍ kpe̍ Chɛ̍fi̍tāā ndu̍ o̍o̍ ve̍lū ni̍, ndu̍ o̍o̍ nɔ̍ chu̍ā o̍ chūā chēle̍ŋ te̍.

³⁵Mɛ̄ɛ̍ Chɛ̍fi̍tāā o̍ che᷅ chūā ndɔ̄ɔ̍ hūnɔ̄ɔ̍, mbo̍ sāānu᷄ŋ do᷅māa̍ lēkɔ̄ɔ̍ mbo̍ sɛ̄ɛ̄sā. Mbo̍ māl yi̍o̍o̍ chōo̍ cho̍o̍ kpe̍le̍ŋ āā, “Kpo̍u̍ chūā nūu̍, ā dīī ya̍ fɔ̍! A̍ tu̍si̍ ya̍ kpūndɔ̍ɔ̍ chōo̍ fɔ̍! Nu᷄m hi᷅ŋ ya̍ dēmūllo̍ ni̍? I̍ chu̍a̍ būŋgɛ̄i̍ ī kālā ka̍lā o̍ Mɛ̄lɛ̄ka̍ Ya̍a̍wɛ̄ɛ̄ lo̍. Ndu̍yɛ̍ I̍ nɔ̍lā mī tɛ̍ɛ̍mbu̍u̍ būŋgɛ̄ī kēŋ te̍!”

³⁶Mi̍ chūā ndɔ̄ɔ̍ dīmūl ndu̍ āā, “Kɛ̄kɛ̍, a̍ chi̍i̍ ni᷅ŋ Mɛ̄lɛ̄ka̍ Ya̍a̍wɛ̄ɛ̄ būŋgɛ̄i̍ chūēl. Le̍la̍ŋ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ ke̍ nya̍ kpāāyāa̍, mi̍ lā mīŋgūl ya̍a̍mɔ̍ɔ̍wa̍a̍ nyāa̍ māa̍, nda̍ yɔ̍nūŋ māā A̍mɔ᷅na̍i̍tīi̍ya̍ ni̍ mi̍ lā yām nda̍ yɛ̍, mɛ̄ɛ̍ to̍sa̍ nyɛ᷅ ŋ̄ chūe̍l Mɛ̄lɛ̄ka̍ būŋgɛ̄i̍ māā ā chō tōsā a̍ ya̍ wo̍.

³⁷Kɛ̍ nyɔ̄ɔ̍ ndu̍ pīlɛ̍ kpe̍ ya̍ I̍ ye̍e̍ma̍ ni̍ mā to̍sa̍l la̍. Ma̍l la̍ mī ba̍lu̍ o̍ pēmbo᷄ŋ chōo̍ a̍ cha᷄ŋndo̍, na̍a̍ chāāŋāā nīa̍a̍ le̍ pāŋgo̍ŋ ŋ̄ mūu̍ŋ, fo̍ndōle̍, le̍ mɛ̄ɛ̍ ya̍ I̍ cho̍ wūo̍o̍ yūfu̍a̍a̍nɔ̍ yɛ̍.”

³⁸O̍ ko̍ŋ, mi̍ fi̍nyā ndɔ̄ chɛ᷅l ndu̍ le̍ mbō bālu̍ a̍ cha᷄ŋndo̍ le̍ pāŋgo̍ŋ ŋ̄ mūu̍ŋ. O̍ ko̍ŋ kɔ̍ɔ̍lī, ndu̍ ni̍, chāāŋāā ndūa̍a̍ ni̍, ma̍ kɔ̍ ba̍lū o̍ pēmbo᷄ŋ chōo̍ a̍ cha᷄ŋndo̍ le̍ pāŋgo̍ŋ ŋ̄ mūu̍ŋ, kāni̍ fo̍ndōle̍, le̍ mɛ̄ɛ̍ o̍ wa̍ wūo̍o̍ yūfu̍a̍a̍nɔ̍, ō vīlu̍ chu̍ā o̍ chūā mbō mɛ̄i̍ le̍ yɛ̍.

³⁹Mɛ̄ɛ̍ pāŋgu̍ŋ mūu̍ŋ ndo̍ŋ ŋ̄ chūu̍, mbo̍ mīīŋgū fi̍nyā ndɔ̍ o̍ ībūŋ. O̍ ko̍ŋ, mi̍ fi̍nyā ndɔ̄ to̍sā a̍ ndu̍ mɛ̄ɛ̍ o̍ chu̍e̍l Mɛ̄lɛ̄ka̍ Ya̍a̍wɛ̄ɛ̍ būŋgɛ̄i̍ yɛ̍. Mi̍ chūāāmbɔ̄ɔ̍ wū yūfu̍a̍a̍nɔ̍. Mɛ̄ɛ̍ mi̍ cha᷄ŋ chūa̍ Chɛ̍fi̍tāā wo̍ ho̍ō ō sīmnu᷄ŋ māā ka̍ā le̍ I̍sɔ̄lūɛ̍i̍ya̍.

⁴⁰Īwɔ̄sī o̍ īwɔ̄sī mɛ̄ɛ̍ mī chūāāmbūāā lāāndūa̍a̍ ā kūɛ̄ īnɛ̍ le̍ pālɛ̍i̍ ī hīɔ̍ɔ̍lu̍ mā chāŋ, le̍ lōōnɔ᷄ŋndo̍ a̍ chu̍a̍ Chɛ̍fi̍tāā wo̍, wānā wa̍ā Ki̍li̍a̍a̍dī.