Read Southern Kisi Chɔ̄ɔ̍chi̍a̍a̍ 12 Bible Online

Chɔ̄ɔ̍chi̍a̍a̍ 12 - Southern Kisi bible

Chɔ̄ɔ̍chi̍a̍a̍ 12

¹O̍ ko̍ŋ kɔ̍ɔ̍lī, mi̍ wāŋnda̍ E̍fi̍lūēm a̍ bɛ̍ɛ̍ndīa̍ŋ le̍ sɔ̍ŋgɔ̄ɔ̍ a̍ Chɛ̍fi̍tāā. Ma̍ vēēlū pūa̍a̍ ndāa̍ chɔ̄ūwa̍ kpo̍u̍, ma̍ tāŋ Chɔ̍ɔ̍dāŋ nda̍ŋ ma̍ kūā Sa̍fɔ̄ŋ chi̍e̍e̍ le̍ Chɛ̍fi̍tāā chīŋa̍la᷅ŋndo̍ a̍ sɔ̍ŋgɔ̄ɔ̍. Ma̍ lō o̍ ko̍ŋ ma̍ nyūnā chɛ̍fi̍tāā āā, “Vɛ᷅ ma̍ wā kɔ̄la̍ŋ sɔ̍ŋgɔ̄ɔ̍ a̍ A̍mɔ᷅na̍i̍tīi̍ya̍ a̍ ve̍e̍lu̍ na̍a̍ mī ŋ̄ kūɛ̄nūŋ na̍na̍a̍ nya̍ā le̍? Le̍ nyɛ̄ ŋ̄ tōsa̍ ko̍ŋ ndo̍, ŋ̄ chō nu̍m chīɛ̄īyo̍ mālɔ̄ɔ̄ chōo̍ o̍ yīŋ mā ŋūɛ̄.”

²Mi̍ Chɛ̍fi̍tāā o̍ di̍mūl nda̍ āā, “Ya̍ ni̍, wānāā nīa̍a̍ ni̍, A̍mɔ᷅na̍i̍tīi̍ya̍ ā wa̍ na̍a̍ kīndɔ̄ɔ̍ kpe̍e̍kpe̍i̍. Mi̍ lo᷅ o̍ ko̍ŋ, mi̍ ve̍e̍lū nya̍ le̍ mī lā hu᷄ŋ ma̍lā na̍a̍ sɔ̍ŋgɔ̄ɔ̍ a̍ nda̍. Kɛ̍ lā chɛ᷄l le̍ mī lā māla̍ na̍a̍ sɔ̍ŋgɔ̄ɔ̍ a̍ nda̍ le̍.

³Mɛ̄ɛ̍ ya̍ I̍ che᷅ māā lā cho̍ na̍a̍ mālā le̍, mi̍ pīsī yōōmū nūu̍ chi̍, mi̍ ta᷅ŋ mi̍ kɔ̍ chi᷅ŋa̍la᷅ŋ A̍mɔ᷅na̍i̍tīi̍ya̍ a̍ sɔ̍ŋgɔ̄ɔ̍. Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ si᷅m ya̍ kɔ̄ɔ̄lī, mi̍ nɔ̍lā mi̍ ya᷅m nda̍. I̍ chi̍ sa̍bū o̍ sābū nya̍ hūŋ vɛ̍lɛ̄ ya̍ chīŋa̍la᷅ŋndo̍ pāa̍le̍ hāūle̍ŋ nde᷅ŋ te̍.”

⁴Mi̍ wāŋ bɛ̄ndūa̍a̍ E̍fi̍lūēm a̍ mu̍lī ndu̍ dīōm āā, “Nya̍ wāŋnda̍ Ki̍li̍a̍a̍dī, wānāa̍ cho̍ ā tūāūwāā o̍ būŋgɛ̄i̍ E̍fi̍lūēmnde̍ ni᷄ŋ a̍ būŋgɛ̄i̍ Mānāa̍sē ve̍ ni᷄ŋ nda̍ nya̍ chō ni̍.” O̍ ko̍ŋ, mi̍ Chɛ̍fi̍tāā o̍ ve̍e̍lū pūa̍a̍ Ki̍li̍a̍a̍dī kpo̍u̍ nāa̍ pi᷅lɛ̍, ma̍ chīŋa̍la᷅ŋ wa᷅ŋnda̍ E̍fi̍lūēm a̍ sɔ̍ŋgɔ̄ɔ̍. Ndu̍yɛ̍ ma̍ yām wāŋnda̍ E̍fi̍lūēm.

⁵O̍ ko̍ŋ kɔ̍ɔ̍lī, mi̍ pūa̍a̍ Ki̍li̍a̍a̍dī a̍ kɔ̍ bi̍ī fo̍ndāŋndā tāŋāāla̍ŋ Chɔ̍ɔ̍dāŋ o̍ pēēlo̍, nāa̍ wāŋnda̍ E̍fi̍lūēm a̍ ke̍i̍ ma̍ tāŋ nda̍. O̍ ko̍ŋ, tē pūa̍a̍ chɔ̄ūwa̍ E̍fi̍lūēm, a̍ lo̍ yōōmū wa̍ ā wa̍ kīndī kīndīo̍o̍ pɛ̍ le̍ mā tāŋnu̍ŋ o̍ lɛ̄ŋndē ndāle̍ŋ ni᷄ŋ, mā fūūlu̍u̍ o̍ nāa̍ ta̍ŋāa̍, pūa̍a̍ Ki̍li̍a̍a̍dī a̍ nyu̍na̍ nda̍ āā, “O̍ yu̍ŋgu̍ E̍fi̍lūēmndo̍ chōo̍ nya̍ fūla̍ ni̍?” Tē ā dīmi̍ pɛ̍ āā, “Ɛ̄ ɛ̍, ŋ̄ fūla̍ o̍ yu̍ŋgu̍ E̍fi̍lūēm cho̍o̍ le̍.”

⁶Pūa̍a̍ Ki̍li̍a̍a̍dī a̍ di̍mu̍l nda̍ āā, “Mɛ̄ɛ̍ lā dīmī wɔ̍ āā, ‘Sībōlɛ̍tī?’ ” Ndu̍yɛ̍ wānāa̍ fu̍la̍ o̍ yu̍ŋgu̍ E̍fi̍lūēmndo̍ chōo̍ wa̍ ki̍nɛ̍i̍, nda̍ a̍a̍ chi̍e̍ē di̍ōm kōŋ vēēlōo̍ le̍. Nu̍a̍ā nda̍ a̍a̍ di̍mī ni̍ āā, “Sībōlɛ̍tī.” O̍ ko̍ŋ, tē pūa̍a̍ Ki̍li̍a̍a̍dī a̍ di̍mu̍l nda̍ le̍ dīōm kōŋ vēēlōo̍ pɛ̍ mā būmba̍, pūa̍a̍ Ki̍li̍a̍a̍dī a̍ bi̍ī nda̍ ā dīu̍ nda̍ o̍ fo̍ndāŋ tɛ̄ɛ̄ŋgāa̍ lo̍ŋ. Ndu̍yɛ̍ ma̍ dīū pūa̍a̍ E̍fi̍lūēm dīūwo̍ pīla̍ o̍ te̍le̍ŋ ko̍ŋ bɛ̄ŋgu̍. Ā nda̍ dīu̍ wa̍ ā wa̍ kpo̍u̍ kpo̍u̍ wāa̍la̍ŋ be̍le̍-hi̍ɔ̍ɔ̍lu̍ ā lā tīɔ̍ɔ̍ŋ (42,000).

⁷Chɛ̍fi̍tāā Ki̍li̍a̍a̍dīnɔ̄ o̍ chi̍i̍ wɔ̄sīla̍ŋ lā ŋɔ᷄mpu᷅m I̍sɔ̄lūɛ̍i̍ya̍ chīla̍ŋ, o̍ ko̍ŋ kɔ̍ɔ̍lī, mbo̍ wū. Ndu̍yɛ̍ ma̍ chɔ̄ ndu̍ o̍ ndu̍ lo̍ chi̍e̍e̍ o̍ būŋgɛ̄ī Ki̍li̍a̍a̍dī ve̍ ni᷄ŋ.

⁸Mɛ̄ɛ̍ Chɛ̍fi̍tāā o̍ wa̍ I̍sɔ̄lūɛ̍i̍ya̍ chīla̍ŋndo̍ ō vī, mi̍ I̍bi̍sāŋ, wānā wa̍ā Bɛ̍ti̍lɛ̍hɛ̄m chi̍e̍e̍ o̍ si̍mnu᷄ŋ wa̍nā ba̍nāa̍ le̍ I̍sɔ̄lūɛ̍i̍ya̍ o̍ fōōfo̍ ndɔ̄ɔ̍.

⁹I̍bi̍sāŋ yɛ̍, ndu̍ o̍o̍ ve̍lū pūa̍a̍ ŋ̄wāŋ be̍le̍-ya̍a̍ a̍ wāŋ lāāndūa̍a̍ ŋ̄wāŋ be̍le̍-ya̍a̍. Chūāūwāā ndūāā wa᷅ŋ lāāndūa̍a̍ ki̍nɛ̍i̍, mbo̍ chūā nda̍ mbo̍ yɔ̄ŋgū nda̍ o̍ nɔ̄la̍ŋ, wāŋ pīāāndūāā chēle̍ŋnda̍ pɔ̍ o̍ lābā, ā nda̍ a̍a̍ fu̍la̍ bɛ̍ɛ̍ o̍ yu̍ŋgu̍ pi᷅lɛ̍ nda̍ nda̍ā chōo̍ le̍ wa̍. O̍ ko̍ŋ kɔ̍ɔ̍lī, pūa̍a̍ ndūa̍a̍ kpo̍u̍, mbo̍ yīl nda̍ lāāndūa̍a̍, fūlāa̍ o̍ yu̍ŋgu̍la̍ che᷅le̍ŋ chōo̍ pɔ̍. I̍bi̍sāŋ o̍ chi̍i̍ wɔ̄sīla̍ŋ lā ŋɔ᷄mmɛ̍ū I̍sɔ̄lūɛ̍i̍ya̍ chīla̍ŋ.

¹⁰O̍ ko̍ŋ kɔ̍ɔ̍lī, mi̍ I̍bi̍sāŋ o̍ wu᷅, ndu̍yɛ̍ ma̍ chɔ̄ ndu̍ Bɛ̍ti̍lɛ̍hɛ̄m chi̍e̍e̍.

¹¹Mɛ̄ɛ̍ I̍bi̍sāŋ vi᷅, mi̍ Ɛ̍lɔ̄ŋ, o̍ fu̍la̍ o̍ yu̍ŋgu̍ Sɛ̍bu̍lɔ̄ŋ ndo̍ chōo̍ wo̍ ō sīmnu᷄ŋ wa̍nā ba̍nāa̍ le̍ I̍sɔ̄lūɛ̍i̍ya̍. Ō chīi̍ wɔ̄sīla̍ŋ tɔ̍ I̍sɔ̄lūɛ̍i̍ya̍ chīla̍ŋ mbo̍ wū.

¹²Mɛ̄ɛ̍ o̍ vi᷅, ma̍ chɔ̄ ndu̍ A̍i̍cha̍lɔ̄ŋ chi̍e̍e̍ o̍ būŋgɛ̄ī Sɛ̍bu̍lɔ̄ŋ nde̍ ni᷄ŋ.

¹³O̍ ko̍ŋ kɔ̍ɔ̍lī, mɛ̄ɛ̍ Ɛ̍lɔ̄ŋ vi᷅, mi̍ A̍bi̍dɔ̄ŋ, po̍ Hi̍lɛ̄ɛ̄l wo̍ fūlāa̍ Pi̍lu̍a̍tɔ̄ŋ chi̍e̍e̍ o̍ si̍mnu᷄ŋ wa̍nā ba̍nāa̍ le̍ I̍sɔ̄lūɛ̍i̍ya̍.

¹⁴A̍bi̍dɔ̄ŋ ndu̍ o̍o̍ ve̍lū pūa̍a̍ ŋ̄wāŋ be̍le̍ hīɔ̍ɔ̍lu̍, ndu̍yɛ̍ mbo̍ nɔ̄ pūa̍a̍ ma̍māa̍ ŋ̄wāŋ be̍le̍-ya̍a̍. Ndu̍yɛ̍, pūa̍a̍ ndūāā ka̍ŋ, a̍ pūa̍a̍ ndūāā ma̍māā kāŋ, ō kɛ᷅ o̍ kɛ᷅ ndu̍ o̍o̍ nɔ̍ sōfɛ̍lɔ̍ɔ̍ ō pīlɛ̍ le̍ bālɔ̄ɔ̍ lēchōo̍. A̍bi̍dɔ̍ŋ o̍ chi̍i̍ wɔ̄sīla̍ŋ lā ŋɔ̄ma̍a̍ I̍sɔ̄lūɛ̍i̍ya̍ chīla̍ŋ.

¹⁵O̍ ko̍ŋ kɔ̍ɔ̍lī, mi̍ A̍bi̍dɔ̄ŋ, po᷄ Hi̍lɛ̄ɛ̄l wo̍, wānā wa̍ā Pi̍lu̍a̍tɔ̄ŋ o̍ wu᷅, ndu̍yɛ̍ ma̍ chɔ̄ ndu̍ Pi̍lu̍a̍tɔ̄ŋ chi̍e̍e̍, o̍ būŋgɛ̄ī E̍fi̍lūēmnde̍ ni᷄ŋ o̍ lɛ̄ŋndē ŋ̄pēmbūlē Āma̍la̍kāi̍tīi̍ya̍ ni᷄ŋ.