Read Southern Kisi Chɔ̄ɔ̍chi̍a̍a̍ 13 Bible Online

Chɔ̄ɔ̍chi̍a̍a̍ 13 - Southern Kisi bible

Chɔ̄ɔ̍chi̍a̍a̍ 13

¹O̍ ko̍ŋ kɔ̍ɔ̍lī, mi̍ I̍sɔ̄lūɛ̍i̍ya̍ ā tōsā vɛ̄lɛ̄ nyɛ̍ bɛ̍nda̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l te̍ wo̍. Le̍ he̍ī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ma᷅l nda̍ Fīli̍i̍tīāŋnda̍ o̍ bā. Le̍ wɔ̄sīla̍ŋ be̍le̍-hi̍ɔ̍ɔ̍lu̍, ā wa̍ fīli̍i̍tīāŋnda̍ o̍ bā bɛ̄ŋgu̍.

²Po̍ pi᷅lɛ̍ ō wa̍ īchāli̍ So̍lūā chi̍e̍e̍ dīōla̍ŋ āā Māno̍wā. O̍ yu̍ŋgu̍ Da᷅ŋndo̍ chōo̍ pōo̍ ho̍ō ndu̍ o̍o̍ fu̍la̍ ni̍. Kɛ̍ Ma̍no̍wāā la̍a̍ ndɔ̄ o̍ ve̍ wa̍nā la̍nɔ̍ vi̍a̍lāā le̍.

³Pāa̍le̍ pi᷅lɛ̍, mi̍ ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ chɔ̄mnu᷄ŋ chu̍a̍a̍ ho̍ō. Mbo̍ dīmūl chūa̍a̍ āā, “Mi̍ chē bɛ̍ɛ̍ māā a̍ cho̍ wa̍nā la̍nɔ̍ vi̍a̍lāā le̍ ni̍, kɛ̍ ndu̍yɛ̍, ā chō hūnɔ̄ɔ̄ yɔ̍llo̍ chūā mā vēlū pōo̍.

⁴Le̍la̍ŋ, chɔ̍ŋ a̍ hāū, ko᷅l māmūɛ̄ī o̍ māmūɛ̄ī le̍, kɛ̄lɛ̄ŋgāā mā ko̍l bɛ̍ɛ̍ mūɛ̄īmā kālā ka̍lā. O̍ ko̍ŋ kɔ̍ɔ̍lī, nyɛ̄ dīāā o̍ nyɛ̄ dīāā Mɛ̄lɛ̄ka̍ kūūna̍ nya̍ le̍ dīo̍o̍ di̍ā ndu̍ le̍.

⁵Kāni̍ fu̍u̍le̍, ā chō hūnɔ̄ɔ̄ yɔ̍llo̍ chūā mā vēlū pōo̍. Tē ā vēlū ndu̍ pɛ̍, ke̍ī ndu̍ īkūūsu̍ o̍ lēbōl mā se᷅ndi̍ ndu̍ le̍. Kāni̍ fu̍u̍le̍, chɔ̍ŋ a̍ pāa̍le̍ ŋ̄ chō ndu̍ vīōlɔ̄ɔ̍ le̍ŋ ō chō wā ō yɔ̄ŋga᷄ŋ o̍ Mɛ̄lɛ̄ka̍ lo̍ māā Na̍a̍sa̍lūɛ̍i̍nɔ̍.[4] Ndu̍yɛ̍, ō chō kāndɔ̄ɔ̄ I̍sɔ̄lūɛ̍i̍ya̍ bāŋāa̍ Fīli̍i̍tīāŋnda̍ o̍ bā.”

⁶Mɛ̄ɛ̍ chūa̍a̍ ho̍ō ō tūēī dīōmndā ki̍i̍la̍nɔ̍ Mɛ̄lɛ̄ka̍a̍ ō dīmu̍l ndu̍ la᷅ŋ nda̍ŋ, mbō kūā nāa̍ pɔ̍nɔ̍ ndɔ̄ chu̍a̍, mbo̍ kɔ̍ di̍mūl ndu̍ āā, “Wāna̍ Mɛ̄lɛ̄ka̍ pīlɛ̍ ō hīŋ nāa̍ ya̍ chu̍a̍, wānā a̍a̍ che᷅ ndu̍ pɛ̍ āā ki̍i̍la̍nɔ̍ Mɛ̄lɛ̄ka̍a̍ ni̍, a̍ īmālākā mālākɛ̄ī o̍ wa̍ ve̍. I̍ nyu̍na̍ ndu̍ le̍ nāa̍ o̍ chɛ̍ŋ nda̍ le̍, ndu̍yɛ̍ ō chɔ̍m ya̍ vɛ̄lɛ̄ dīōlā ndɔ̄la̍ŋ te̍.

⁷Kɛ̍ mbo̍ dīmūl la̍ māā, ya̍ I̍ cho̍ hūnɔ̄ɔ̄ yo᷄llo̍ chūā mī ve̍lū pōo̍. Mbo̍ dīmūl la̍ vɛ̄lɛ̄ māā ya̍ I̍ ko᷅l māmūɛ̄ī o̍ māmūɛ̄ī le̍, kɛ̄lɛ̄ŋgāā mī ko̍l mūɛ̄īmā kālā ka̍lā, ndu̍yɛ̍ māā ya̍ I̍ di̍ā nyɛ̄ o̍ nyɛ̄ dīāā Mɛ̄lɛ̄ka̍ kūūna̍ na̍a̍ le̍ dīo̍o̍ le̍. Kāni̍ fo̍ndōle̍, māā chɛ̄lɛ̄kpɛ̍ ya̍ I̍ cho̍ hūnɔ̄ɔ̄ vīōlɔ̄ɔ̄ wo̍, Na̍a̍sālūɛ̍i̍nɔ̍ɔ̍ o̍ wa᷅ ni̍ŋ ni̍, wāna̍ cho̍ ō yɔ̄ŋga᷄ŋ o̍ Mɛ̄lɛ̄ka̍ lo̍ wo̍, ha̍a̍a̍ a̍ yōōmū ndɔ̄ɔ̍ mɛ̄ɛ̄lu̍ la̍ŋ.”

⁸Mɛ̄ɛ̍ Ma̍no̍wāā tu̍e̍ī dīōmnda̍ŋ nda᷄ŋ, mbo̍ pīɛ̄ī Mɛ̄lɛ̄ka̍ Ya̍a̍wɛ̄ɛ̄ āā, “Yāndi̍i̍ Mɛ̄lɛ̄ka̍ Ya̍a̍wɛ̄ɛ̄, to̍sa̍ mī wāna̍ Mɛ̄lɛ̄ka̍ ŋ̄ vēm ndo̍ ō mīīŋgu̍ na̍a̍ o̍ ībūŋ, mbō hu᷄ŋ pɛ̍ɛ̍ku̍ na̍a̍ mɛ̄ɛ̍ na̍a̍ ŋ̄ māndā po̍o̍mbɔ̄ na̍a̍ ŋ̄ cho̍ hūnɔ̄ɔ̄ vīōlɔ̄ɔ̄ wo̍ yɛ̍.”

⁹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ mu̍lī pīɛ̄īlē Ma̍no̍wāā le̍ŋ, mbo̍ tōsā mi̍ ki̍i̍la̍nɔ̍ Mɛ̄lɛ̄ka̍ kōŋ ō chɔ̄mnu᷄ŋ vɛ̍lɛ̄ chūa̍a̍ ho̍ō, nāa̍ o̍ wa̍ īchāli̍ o̍ chīɛ̍i̍ ni᷄ŋ nda̍. Kɛ̍ Ma̍no̍wāā pɔ̍nɔ̍ ndɔ̄ ndu̍ ve̍ lo̍ŋ te̍.

¹⁰O̍ ko̍ŋ, mi̍ chūa̍a̍ kūā a̍ kīlta̍ŋ nāa̍ pɔ̍nɔ̍ ndɔ̄ chu̍a̍, mbo̍ dīmūl ndu̍ āā, “Po̍ ya̍ I̍ di̍mu̍l nu̍m māā mbo̍ chɔ̄mnu᷄ŋ ya̍ pɛ̍i̍ yo̍ ō hīŋ vɛ̄lɛ̄.”

¹¹Mi̍ Ma̍no̍wāā cha̍ŋ a̍ kīlta̍ŋ, ma̍ kūā nda̍ la̍a̍ ndɔ̄. Mɛ̄ɛ̍ nda̍ fūūlu̍u̍ nāa̍ pōo̍ ō wa̍ wa̍, mi̍ Ma̍no̍wāā o̍ nyu̍nā pōo̍ āā, “Nu᷄m hi᷅ŋ pɛ̍i̍ nāa̍ la̍a̍ nūu̍ chūā ni̍, ma̍ sūāā nāa̍ ndu̍ chu̍a̍?” Mi̍ pōo̍ chɛ̄l āā, “E̍ī, ya̍ ni̍.”

¹²Mi̍ Ma̍no̍wāā o̍ nyu̍nā ndu̍ āā, “Tē ī yɔ̄nu̍ŋ pɛ̍ mɛ̄ɛ̍ ŋ̄ dīmi̍ yɛ̍ mī pōo̍mbɔ̄ɔ̍ ho̍ō ō hūŋ vi̍o̍lu᷄ŋ, sāwāla̍ yɛ̄ɛ̍nɛ̍ kpɛ̍ la̍ cho̍ yɛ̄ lā pōo̍mbɔ̄ɔ̍ ho̍ō ō nɔ̄ mbō wa̍ lēbɛ̄ŋgu̍ la̍ŋ? Ndu̍yɛ̍ wa̍li̍ yɛ̄ɛ̍nɛ̍ o̍ nɔ̍ yɛ̄ mbō hu᷄ŋ to̍sā?”

¹³Mi̍ Ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ ō mūlūl ndu̍ āā, “La̍a̍ nu̍m nɔ̄ mbō chūa̍ sāwāla̍ ya̍ ke̍ ndu̍ la̍ŋ kpe̍de̍.

¹⁴Ō nɔ̍ mbō dē nyɛ̄ o̍ nyɛ̄ nda̍ tōōsi̍a̍a̍ a̍ mākīle̍pīi̍ le̍. Ō nɔ̍ mbō ko᷄l māmūɛ̄ī o̍ māmūɛ̄ī le̍, kɛ̄lɛ̄ŋgāā mbō ko᷄l mūɛ̄īmā kālā ka̍lā. Ndu̍yɛ̍ o̍ ko̍ŋ kɔ̍ɔ̍lī, ō nɔ̍ mbō dē nyɛ̄ o̍ nyɛ̄ dīāā Mɛ̄lɛ̄ka̍ kūūna̍ nya̍ le̍ dīo̍o̍ wo̍ le̍. Sāwāla̍ ya̍ I̍ ke̍ ndu̍ la᷅ŋ nda̍ŋ, ō nɔ̄ mbō chūa̍ la̍ŋ kpo̍u̍.”

¹⁵Ma̍no̍wāā o̍ si̍na̍ nu̍a̍ā māā nda̍ Ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ le̍ wa̍ sūūki̍āŋndo̍ ho̍ō le̍. O̍ ko̍ŋ, mbo̍ dīmūl ndu̍ āā, “Yāndi̍i̍ ku̍ā wɔ̄ le̍. Chu̍m mī ŋ̄ bɛ̄ɛ̄ndi̍a̍l nu̍m chūīŋ fɔ̍ŋndɔ̍ɔ̍ mā dē ma̍lāŋ ŋ̄ kūā.” Mi̍ Ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ ō dīmūl ndu̍ āā, “I̍ cho̍ chūm, kɛ̍ I̍ cho̍ nyɛ̍ dīāā o̍ nyɛ̄ dīāā nyā di̍o̍ le̍. Tē lā yēēma̍ pɛ̍, lā bɛ̄ɛ̄ndi̍a̍a̍ chɔ̍lū nya̍ dīmi̍ wo̍ mī lā sōli̍ ndu̍ sa̍lā lūāmāa̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍.”

¹⁶

¹⁷O̍ ko̍ŋ kɔ̍ɔ̍lī, mi̍ Ma̍no̍wāā nyu̍nā Ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ ho̍ō āā, “Ɔ̍ɔ̄ dīōlā nūmnda̍ŋ? Kāni̍ fo̍ndōle̍, tē nyɛ̄ ŋ̄ dīmi̍ wo̍ hu᷄ŋ yɔ̄nu᷄ŋ pɛ̍, ŋ̄ kē nu̍m ni̍ŋ bɛ̍ɛ̄le̍ŋ.”

¹⁸Mi̍ Ki̍i̍la̍nɔ̍ Mɛ̄lɛ̄ka̍a̍ dīmūl ndu̍ āā, “Le̍ yɛ̄ɛ̍nɛ̍ ŋ̄ yēēma̍ yɛ̄ le̍ dīōlā nīla̍ŋ sīnāa̍? I̍ chɔ̍m nu̍m bɛ̍ɛ̍ dīōlā nīla̍ŋ a̍ si̍nā ni̍ŋ la̍ŋ pɛ̄ŋgu̍ le̍.”

¹⁹O̍ ko̍ŋ kɔ̍ɔ̍lī, mi̍ Ma̍no̍wāā o̍ chu̍ā chūīŋ fɔ̍ŋndɔ̍ɔ̍ lātūlu̍ a̍ nyɛ̄ dīāā ku̍llo̍ mbo̍ sōlī la̍ŋ sa̍lāa̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍, o̍ ma̍āŋ pōūwo̍ chōo̍. Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā sūɛ̍i̍ kɔ̄ndɔ̄fi̍li̍i̍ bɛ̄ndūe̍i̍, Ma̍no̍wāā nda̍ la̍a̍ ndɔ̄ o̍ hɔ̄l lo̍ŋ.

²⁰Mɛ̄ɛ̍ sa̍lāa̍ ho̍ō ō wa̍ ŋɔ̄ɔ̍, yīŋnde̍ wa̍ nu̍a̍ā kīōlōo̍ mī lē hēl cho̍o̍ cho̍o̍ le̍ŋ, ma̍ chā ki̍i̍la̍nɔ̍ Mɛ̄lɛ̄ka̍a̍ ho̍ō hēlɔ̄ɔ̍ o̍ yīŋndē lēŋ ni᷄ŋ mbo̍ kūānu᷄ŋ cho̍o̍ cho̍o̍. O̍ ko̍ŋ, Ma̍no̍wāā ni̍, la̍a̍ ndɔ̄ ni̍, ma̍ hīnī lɛ̄ŋ sa̍kpō a̍ hɔ̄lla̍ ā kūūmbāā lɛ̄ŋ.

²¹Mi̍ Ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ ō lō nda̍ o̍ hɔ̄l pɛ̍, ā chi᷄ lɛ̍ ndu̍ le̍. O̍ ko̍ŋ, mi̍ Ma̍no̍wāā o̍ si̍nā ni᷅ŋ kpe̍e̍kpe̍i̍ māā Ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ nda̍ chē chɔ̄ kōŋ ni̍.

²²Mi̍ Ma̍no̍wāā o̍ di̍mūl la̍a̍ ndɔ̍ āā, “Mbɔ̄ ŋ̄ hīŋ pīɔ̍mndo̍ sɔ̄lā fɔ̍. Mɛ̄lɛ̄ka̍ na̍a̍ ŋ̄ chē nu̍a̍ā pɛ̍ɛ̍ŋ a̍ lēhɔ̄l ni̍.”

²³Kɛ̍ mi̍ la̍a̍ ndɔ̄ o̍ di̍mūl ndu̍ āā, “Tē Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ ye̍e̍ma̍ le̍ na̍a̍ dīyɔ̄ɔ̄ pɛ̍, ō ve̍ sa̍lā lūāmāā ā sa̍lā nyɛ̄ dīāā ku̍l na̍a̍ ŋ̄ sōli̍ nāa̍ ndu̍ chu̍a̍ wo̍ chɛ̄lɔ̄ɔ̄ le̍. Sɔ̄ɔ̍ŋ o̍ chɔ̍m na̍a̍ mu᷅ŋ kpo̍u̍ wo̍ŋ, ō ve̍ na̍a̍ mu̍ŋ chɔ̄m te̍, kɛ̄lɛ̄ŋgāā ni᷅ŋ te̍, mī ndu̍ o̍o̍ di̍mu̍l na̍a̍ bɛ̍ɛ̍ yo̍o̍ŋgū o̍ di̍mu̍l na̍a̍ ho̍ō wo̍.”

²⁴O̍ ko̍ŋ kɔ̍ɔ̍lī, mi̍ la̍nɔ̍ɔ̍ Māno̍wā o̍ chu̍ā yo᷄llo̍ mbo̍ vīālū pōo̍. Ma̍ kē ndu̍ dīōla̍ŋ āā Sa̍msīŋ. Mi̍ pōo̍mbɔ̄ɔ̍ ho̍ō hīndū mbo̍ sīmnu᷄ŋ ka̍a̍so̍ŋnɔ̍. Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍ū ndu̍ sa̍lā ta̍u̍.

²⁵Mi̍ nyi̍na̍ Mɛ̄lɛ̄ka̍ Ya̍a̍wɛ̄ɛ̄ wo̍ ō kāndū ndu̍ tōlɔ̄ɔ̍ kɔ̄ɔ̄lī, nāa̍ o̍ wa̍ īchāli̍ o̍ dɔ̍ɔ̍ŋgɔ̍ Da᷅ŋndo̍ ni᷄ŋ So̍lūā chi̍e̍e̍ tɛ̍ɛ̄ŋ a̍ Ɛ̄sīta̍wɔ̄ wa̍.