Read Southern Kisi Chɔ̄ɔ̍chi̍a̍a̍ 14 Bible Online

Chɔ̄ɔ̍chi̍a̍a̍ 14 - Southern Kisi bible

Chɔ̄ɔ̍chi̍a̍a̍ 14

¹Pāa̍le̍ pi᷅lɛ̍, mɛ̄ɛ̍ Sa̍msīŋ ku̍ɛ̄ Ti̍mi̍nā chi̍e̍e̍, mbo̍ chā chūāāmbɔ̄ lāāndū Fīli̍i̍tīāŋnɔ̄ pīlɛ̍ lo̍ŋ. Ndu̍yɛ̍, mbo̍ hɛ̄na᷄ŋ a̍ sūɛ̍i̍ ndūɛ̍i̍ ta̍u̍.

²Mɛ̄ɛ̍ Sa̍msīŋ o̍ mi̍i̍ŋgu̍ o̍ ndu̍lo̍ chi̍e̍e̍, mbo̍ kɔ̍ di̍mūl fi̍nyā ndɔ̄ a̍ kāla̍ ndɔ̄ āā, “I̍ che᷅ chūā Fīli̍i̍tīāŋnɔ̄ pīlɛ̍ Ti̍mi̍nā chi̍e̍e̍ mi̍ hɛ̍na᷄ŋ a̍ sūɛ̍i̍ ndūɛ̍i̍. Le̍la̍ŋ, lā kāāla̍l la̍ ndu̍ mī ŋ̄ cha᷄l o̍ nɔ̄ɔ̍ ni᷄ŋ.”

³Mi̍ fi̍nyā ndɔ̄ a̍ kāla̍ ndɔ̄ a̍ nyu̍nā ndu̍ āā, “Bāā wānā la̍nɔ̍ kɛ̍ndɛ̄ ō cho̍ o̍ yu̍ŋgu̍ nāa̍ chōo̍, kɛ̄lɛ̄ŋgāā I̍sɔ̄lūɛ̍i̍ya̍ kpo̍u̍ tɛ̍ɛ̄ŋ ma̍ chu̍a̍ ndu̍ o̍ nɔ̄ɔ̍ ni᷄ŋ te̍, mɛ̄ɛ̍ wānā la̍nɔ̍ wa̍ā Fīli̍i̍tīāŋāa̍ cho̍ ka̍ŋ wa̍nāa̍ Mɛ̄lɛ̄ka̍ le̍ wa̍ tɛ̄ɛ̄ŋ?”[5] Kɛ̍ mi̍ Sa̍msīŋ di̍mūl fi̍nyā ndɔ̍ āā, “Ya̍ ndu̍ ya̍ I̍ ye̍e̍ma̍ mā ka̍a̍la̍l la̍ ni̍. Ndu̍ ya̍ I̍ ye̍e̍ma̍ ni̍ mbō wa̍ la̍a̍ nī.”

⁴Ndu̍yɛ̍ a̍ te̍le̍ŋ ko̍ŋ, Fīli̍i̍tīāŋnda̍ o̍ bā bɛ̄ŋgu̍ I̍sɔ̄lūɛ̍i̍ya̍ ā wa̍ ni̍. Mɛ̄lɛ̄ka̍ Ya̍a̍wɛ̄ɛ̄ pi̍la̍ bālā ndɔ̄la̍ŋ lā wa̍ o̍ nyɛ̄ Sa̍msīŋ o̍ wa̍ ho̍ō tōsāa̍ wo̍ ni᷄ŋ. Kɛ̍, Sa̍msīŋ wānāā ndūa̍a̍ ā sīna̍ ndi̍ pɛ̄ŋgu̍ le̍nde̍ le̍.

⁵Mɛ̄ɛ̍ Sa̍msīŋ di̍mu̍l wānāā ndūa̍a̍ le̍nde̍, nda̍ bɛ̍ɛ̍ ma̍ chɛ̄l. Ma̍ cha᷄ŋ ma̍ bīī kɔ̄la̍ŋ Ti̍mi̍nā chi̍e̍e̍ nda̍ Sa̍msīŋga̍ā lātūlu̍ le̍ kɔ̄la̍ŋ sūɛ̍i̍ chūa̍a̍ ho̍ō tōōsīa̍a̍. Mɛ̄ɛ̍ nda̍ fūūlu̍u̍ o̍ kpe̍le̍ yɔ̄mīī mākīle̍pīi̍ye̍ ni᷄ŋ Ti̍mi̍nā chi̍e̍e̍ le̍kɔ̍ɔ̍, mi̍ kpɔ̍kūŋ fɔ̍ŋndɔ̍ɔ̍ hīnūl Sa̍msīŋ kpu̍lūlū a̍ pɛ̄ɛ̄līa̍a̍, le̍ ndu̍ dēlɔ̄ɔ̄ chōo̍.

⁶Kɛ̍ o̍ lē pīlɛ̍ ni᷄ŋ kpe̍, mi̍ nyi̍na̍ Mɛ̄lɛ̄ka̍ Ya̍a̍wɛ̄ɛ̄ wo̍ tūāl Sa̍msīŋ kɔ̄ɔ̄lī a̍ kpāāyā bɛ̍ndōo̍. Mi̍ Sa̍msīŋ de᷅l kpɔ̍kūŋ kōŋ chōo̍ a̍ lābā mbo̍ tɛ̄ndā ndu̍ tɛ̄ɛ̄ŋ kpa̍la̍ o̍ lē pīlɛ̍ ni᷄ŋ kpe̍ mɛ̄ɛ̍ wāŋndo̍ ō sāā nu̍a̍ā chūīŋ chūa̍a̍ mbō sɛ̄ɛ̄sa̍ ndu̍ yɛ̍. Kɛ̍ Sa̍msīŋ o̍ di̍mu̍l fi̍nyā ndɔ̍ nda̍ kāla̍ ndɔ̍ a̍ nyɛ̍ yɔ̍nu̍ŋ ndo̍ o̍kɔ̄ɔ̄ le̍.

⁷Mɛ̄ɛ̍ Sa̍msīŋ o̍ fu̍u̍lu̍u̍ Ti̍mi̍nā chi̍e̍e̍, mbo̍ kɔ̍ su̍ūki̍āŋ a̍ chu̍a̍a̍ ho̍ō, ndu̍yɛ̍ mi̍ Sa̍msīŋ o̍ hi̍nī kɔ̄l ta̍u̍ a̍ chūa̍a̍ ho̍ō.

⁸Mɛ̄ɛ̍ te̍le̍ŋ ti᷄ŋ hīo̍u̍, mi̍ Sa̍msīŋ nda̍ wānāā ndūa̍a̍ ā cha᷄ŋ ma̍ kūā Ti̍mi̍nā chi̍e̍e̍ le̍ mā kɔ̍ bɛ̍ɛ̍ndīāā ni̍ko̍ su̍ɛ̍i̍ chūa̍a̍ ho̍ō, le̍ mbō sīmnu᷄ŋ la̍nɔ̍ɔ̍ Sa̍msīŋ. Mɛ̄ɛ̍ nda̍ wa̍ kɔ̄la̍ŋ ma̍ fūūlūū nāa̍ Sa̍msīŋ di̍ī kpɔ̍kūŋndo̍ wa̍, mi̍ Sa̍msīŋ o̍ se̍ī nāa̍ ndu̍ o̍o̍ di̍ī ka̍ŋ kpɔ̍kūŋndo̍ wa̍ le̍ mbō kɔ̍ to̍fā mbō chē nyɛ̍ yɔ̍nu̍ŋ a̍ kpɔ̍kūŋ kōŋ ndo̍. Mɛ̄ɛ̍ o̍ fu̍u̍lu̍u̍ lo̍ŋ, mbo̍ kōmāl līa̍a̍ ā sīīlāā o̍ pāālā kpɔ̍kūŋ ko̍ŋ, ma̍ to̍sā līa̍a̍ŋ ndo̍ŋ. O̍ ko̍ŋ, mbo̍ sōlī līa̍a̍ŋ mā ti᷄ŋ mbo̍ bīī o̍ bā, mbo̍ kūā a̍ ma̍ŋ dīo̍o̍. Mɛ̄ɛ̍ o̍ mi̍i̍ŋgu̍ nāa̍ fi̍nyā ndɔ̄ a̍ kāla̍ ndɔ̄ chu̍a̍, mbo̍ kē nda̍ mā ti᷄ŋ. Nda̍ bɛ̍ɛ̍ ma̍ dīā, kɛ̍ Sa̍msīŋ di̍mu̍l nda̍ māā o̍ pāālā kpɔ̍kūŋndo̍ le̍ o̍ so̍li̍ ma̍ŋ te̍.

⁹

¹⁰Mɛ̄ɛ̍ nda̍ fūūlu̍u̍ chi̍e̍e̍, mi̍ fi̍nyāa̍ Sa̍msīŋ o̍ ku̍ā o̍ chīɛ̄ī wānāa̍ chūa̍a̍ le̍ mbo̍ kɔ̍ bɛ̍ɛ̍ndīāā sūɛ̍i̍ chūa̍a̍ ho̍ō. Ndu̍yɛ̍, mi̍ Sa̍msīŋ to̍sā bɔ̄ŋa᷅ŋ dīāā nyɛ̄ dīāā bɛ̄ndōo̍ lo̍ŋ. Ndu̍yɛ̍, wāŋnda̍ ha̍ā tē chūā pīāāndōo̍ ndu̍ o̍o̍ wa̍ la̍nɔ̍ɔ̍ chūa̍a̍ o̍ nda̍ lo̍ chi̍e̍e̍ pɛ̍, mɛ̄ɛ̍ mī ndu̍ o̍o̍ to̍sa̍ bɔ̄ŋa᷅ŋ dīāā nyɛ̄ dīāā bɛ̄ndū wāā le̍nde̍.

¹¹O̍ ko̍ŋ kɔ̍ɔ̍lī, mi̍ wāŋnda̍ Fīli̍i̍tīāŋ a̍ hɛ̍lī pūa̍a̍ chu̍a̍ā pīāāndūa̍a̍ ŋ̄wāŋ be̍le̍-ya̍a̍, ma̍ vīām nda̍ le̍ mā wa᷄ a̍ Sa̍msīŋ la̍tu̍lu̍.

¹²Mi̍ Sa̍msīŋ lo᷅ o̍ ko̍ŋ mbo̍ dīmūl chūāā pīāāndūa̍a̍ ha̍ā āā, “I̍ vi̍ām ndɔ̍ ka̍a̍ma̍a̍ mī lā chɔ᷄m ya̍ tɛ̄ɛ̄sīāā ndɔ̄ɔ̍. Ndu̍yɛ̍, chɔ̍ŋ na̍nu᷄ŋ a̍ bɔ᷅ŋa᷅ŋ pālɛ̍i̍ ŋɔ̍mmɛ̍ūve̍ wo̍ ho̍ō chūwɔ̄ɔ̍, I̍ ye̍e̍ma̍ nya̍ mī lā chɔ᷄m ya̍ tɛ̄ɛ̄sīāā ka̍a̍ma̍a̍ ho̍ō. Tē lā chɔ᷄m ya̍ tɛ̄ɛ̄sīāā ka̍a̍ma̍a̍ ho̍ō pɛ̍, nya̍ ki̍nɛ̍i̍ I̍ ke̍ wānā o̍ wānā do᷅mā fe̍e̍ŋɛ̍i̍yo̍ ō pīlɛ̍, o̍ ko̍ŋ kɔ̍ɔ̍lī a̍ dōma̍ ba̍ā kālā bɛ̄ndōo̍ ō pīlɛ̍.

¹³Kɛ̍ ndu̍yɛ̍, tē lā dēma̍ le̍ ya̍ tɛ̄ɛ̄sīāā ka̍a̍ma̍a̍ ho̍ō chɔ̄mndo̍ pɛ̍, nya̍ bɛ̍ɛ̍ wānā o̍ wānā nɔ̍ mbō ke̍ ya̍ dōmā fe̍e̍ŋɛ̍i̍yo̍ ō pīlɛ̍, a̍ dōma̍ ba̍ā kālā bɛ̄ndōo̍ ō pīlɛ̍.” Nda̍ kpo̍u̍ ma̍ dīmī āā, “Bālā tīɔ̍ɔ̍ŋ, ŋ̄ chɛ᷄l, kɛ̍ ŋ̄ tūɛ̄ī yɔ̍ ka̍a̍ma̍ā kālāa̍.”

¹⁴Mbo̍ vi̍ām ka̍a̍ma̍a̍ āā, “Nyɛ̄ dīa̍a̍ ō fūlā o̍ wānā di̍a̍ā nyɛ̄ dīa̍a̍ ni᷄ŋ, ndu̍yɛ̍, mi̍ nyɛ̄ yēēlɛ̍i̍yo̍ fūlā o̍ wāna̍ dīāllūŋ kālāa̍ ni᷄ŋ.” Mī pālɛ̍i̍ hīāū ī yāa̍, ā nɔ̄la̍ mā tɛ̄ɛ̄si̍a̍l Sa̍msīŋ ka̍a̍ma̍a̍ ho̍ō le̍.

¹⁵O̍ pāa̍le̍ hi̍ɔ̍ɔ̍lu̍le̍ŋ chōo̍, ma̍ dīmūl la̍nɔ̍ɔ̍ Sa̍msīŋ āā, “Ke̍i̍ pɔ̍nɔ̍ nu̍m kɔ̄ɔ̄lī mbō tɛ̄ɛ̄si̍a̍l nu̍m ka̍a̍ma̍ā o̍ ve᷅m ndo̍ mā di̍mu̍l na̍a̍. Tē ō cho̍ ko̍ŋ te̍, nūm ni̍, a̍ yu̍ŋgu̍ fi̍nyā nūm ndo̍ kpo̍u̍, ŋ̄ chō nya̍ chīɛ̄īyo̍ mālɔ̄ɔ̄ chōo̍ mī lā ŋūɛ̄. Bāā le̍ na̍a̍ nyɛ̄m nāa̍ŋ pōōndīa̍a̍ o̍ lābā nya̍ vēēlu̍ na̍a̍ o̍ bɔ̄ŋa᷅ŋndo̍ ho̍ō ni̍?”

¹⁶O̍ ko̍ŋ, mi̍ la̍nɔ̍ɔ̍ Sa̍msīŋ ku̍ā nāa̍ Sa̍msīŋ chu̍a̍, mbo̍ kɔ̍ de᷅l ndu̍ chōo̍ a̍ cha᷄ŋndo̍, mbo̍ di̍mūl ndu̍ āā, “Ō cho̍ ka̍ālā le̍ ŋ̄ kāāla̍ ya̍ ho̍ō le̍. Yɛ̄le̍ŋ kpe̍e̍kpe̍i̍ ŋ̄ tu᷄l la̍ ni̍. Tē nūm o̍o̍ ka̍a̍la̍ ya̍ pɛ̍ le̍kɛ̍ndɛ̍ī, ka̍a̍ma̍ā ŋ̄ vēm ho̍ō ma̍ dīmūl wānāā nīa̍a̍ le̍ mā tɛ̄ɛ̄si̍a̍a̍ ndu̍ wo̍, a̍ wa̍ ya̍ tɛ̄ɛ̄sīāā ndɔ̄ɔ̍ chɔ̄m.” Mi̍ Sa̍msīŋ lo᷅ o̍ ko̍ŋ mbo̍ dīmūl ndu̍ āā, “Fi̍nyā nūu̍ bɛ̍ɛ̍ kɛ̍sɛ̍ kɛ̍sɛ̍ nda̍ kāla̍ nūu̍, I̍ di̍mu̍l nda̍ a̍ ndi̍ o̍kɔ̄ɔ̄ le̍. Le̍la̍ŋ, I̍ nɔ̍lā mi̍ chɔ̍m nu̍m tɛ̄ɛ̄sīāā ka̍a̍ma̍ā kōŋ te̍.”

¹⁷Ndu̍yɛ̍, o̍ pālɛ̍i̍ ŋɔ̍mmɛ̍ū bɔ̄ŋa᷅ŋndo̍ ho̍ō bɛ̄ŋgu̍ ki̍nɛ̍i̍, bɔ̄ŋa᷅ŋ Sa̍msīŋ o̍ ve̍e̍lu̍ ho̍ō wo̍, chūa̍a̍ ho̍ō ō chō cha᷄ŋndo̍ Sa̍msīŋ o̍ lānī, mbō dɛ̄ɛ̄nīāā ndu̍ le̍ mbō chɔ᷅m ndu̍ tɛ̄ɛ̄sīāā ka̍a̍ma̍a̍ ho̍ō. O̍ mɛ̄ɛ̄lu̍la̍ŋ kpɔ̍ŋ o̍ pāa̍le̍ ŋɔ̍mmɛ̍ūle̍ŋ chōo̍, mi̍ Sa̍msīŋ chɔ᷅m chūa̍a̍ ho̍ō tɛ̄ɛ̄sīāā ka̍a̍ma̍a̍ ho̍ō. Kāni̍ fo̍ndōle̍, chūa̍a̍ wa̍ hīōūwɔ̄ɔ̍ lāchī kɛ᷅ a̍ ndu̍ kōllo̍ lɛ̄ndīo̍o̍. Mɛ̄ɛ̍ sa̍msīŋ o̍ chɔ̍m chūa̍a̍ ho̍ō tɛ̄ɛ̄sīāā ka̍a̍ma̍a̍ ho̍ō, mi̍ chūa̍a̍ mālnu᷄ŋ mbo̍ kɔ̍ chɔ᷅m wānāā ndūa̍a̍.

¹⁸O̍ pāa̍le̍ ŋɔ̍mmɛ̍ūle̍ŋ chōo̍, lɔ̍ɔ̍pa̍ mi̍ pāa̍le̍ŋ lē de᷄l, mi̍ pūa̍a̍ chūāā pīāāndūa̍a̍ ha̍ā ā chɔ̄m Sa̍msīŋ tɛ̄ɛ̄sīāā ka̍a̍ma̍a̍ ho̍ō. Ma̍ dīmūl Sa̍msīŋ āā, “Nyɛ̄ o̍ nyɛ̄ ō yēēla̍ mbō hīōū līa̍a̍ŋ te̍. Ndu̍yɛ̍ nyɛ̄ o̍ nyɛ̄ ō nɔ̍ di̍a̍llūŋ kāla᷄ŋ mbō hīōū kpɔ̍kūŋndo̍ le̍.” Mi̍ Sa̍msīŋ di̍mūl nda̍ āā, “Tē nya̍ a̍a̍ ve̍e̍ a̍ nāū nī wa̍a̍ le̍, lā ve̍ tɛ̍ɛ̍sīāā ka̍a̍ma̍a̍ ho̍ō sīnā le̍.”

¹⁹O̍ ko̍ŋ kɔ̍ɔ̍lī, o̍ lē pīlɛ̍ ni᷄ŋ kpe̍, mi̍ nyi̍na̍ Mɛ̄lɛ̄ka̍ Ya̍a̍wɛ̄ɛ̄ wo̍ ō tūāl Sa̍msīŋ kɔ̄ɔ̄lī a̍ kpāāyā bɛ̍ndōo̍. Mi̍ Sa̍msīŋ ma̍lnu᷄ŋ mbō tūāl A̍si̍kɛ̍lɔ̄ŋ chi̍e̍e̍ mbo̍ kɔ̍ chi᷅ŋa̍la᷅ŋ wa᷅ŋnda̍ A̍ si̍kɛ̍lɔ̄ŋ a̍ sɔ̍ŋgɔ̄ɔ̍. Ndu̍yɛ̍, mbo̍ dīī ŋ̄wāŋ be̍le̍-ya̍a̍ nda̍ chōo̍. Mbo̍ sōōlūū nda̍ nyɛ̄la̍ŋ lēkɔ̄ɔ̍, mbo̍ chūā nyɛ̄lā lāŋ mbo̍ kɔ̍ ke᷅ pūa̍a̍ chu̍a̍ā pīāāndūa̍a̍ tɛ̍ɛ̍si̍a̍a̍ ka̍a̍ma̍ā o̍ ve᷅m ndo̍ wa̍. Mi̍ Sa̍msīŋ du̍a̍u̍nu᷄ŋ tu̍mbe̍ ta̍u̍ ta̍u̍ a̍ nyɛ᷄ yɔ̍nu̍ŋ ndo̍. O̍ ko̍ŋ kɔ̍ɔ̍lī, mbo̍ cha᷄ŋ mbo̍ mīīŋgū o̍ ndu̍lo̍ chi̍e̍e̍.

²⁰Mɛ̄ɛ̍ Sa̍msīŋ ku̍ɛ̍ŋnu᷄ŋ, mi̍ lēfūāā ndūa̍a̍ ā chūā la̍a̍ ndɔ̄ ma̍ kē wānā pɔ̍nɔ̍ che᷅le̍ŋ. Po̍ wa̍ Sa̍msīŋ īkɛ̄i̍ o̍ nɔ̄ɔ̍ ho̍ō kɛ̄sīo̍o̍ wo̍, ndu̍ nda̍ ke̍ chūa̍a̍ ho̍ō o̍ nɔ̄ɔ̍ ni᷄ŋ ni̍.