Read Southern Kisi Chɔ̄ɔ̍chi̍a̍a̍ 15 Bible Online

Chɔ̄ɔ̍chi̍a̍a̍ 15 - Southern Kisi bible

Chɔ̄ɔ̍chi̍a̍a̍ 15

¹Mɛ̄ɛ̍ te̍le̍ŋ ti᷄ŋ hīo̍u̍, a̍ te̍le̍ŋ wāŋnda̍ kāndu̍ wi̍tīi̍yo̍ŋ kōūwɔ̄ɔ̍ o̍ chīɔ̍ɔ̍ŋ ni᷄ŋ ndo̍ ki̍nɛ̍i̍, mi̍ Sa̍msīŋ o̍ bi̍ī chūīŋ fɔ̍ŋndɔ̍ɔ̍ mbo̍ kūā la̍a̍ ndɔ̍ yīlɔ̄ɔ̄. Mɛ̄ɛ̍ o̍ fu̍u̍lu̍u̍, mbo̍ dīmūl fi̍nyāa̍ chūa̍a̍ āā, “I̍ hi᷅ŋ ni̍ko̍ mā ke̍ ya̍ la̍a̍ nūu̍ mbō hīōū ya̍ kɔ̄ɔ̄lī.” Kɛ̍ mi̍ fi̍nyāa̍ chūa̍a̍ ō kɛ̄ɛ̄lū Sa̍msīŋ māā ā lɔ᷅l nda̍ chūā ndɔ̄ɔ̍ le̍.

²Mi̍ fi̍nyāa̍ chūa̍a̍ ō dīmūl Sa̍msīŋ āā, “I̍ cha᷅ ko̍ bɛ̍ɛ̍ māā a̍ hɛ̍na̍ŋ ndɛ̍ a̍ chūā nūu̍ le̍. Mɛ̄ɛ̍ nyɔ̄ɔ̍ ho̍ō to̍sa̍ ni̍ mi̍ chu̍ā ndu̍ mi̍ ke᷅ chāa̍ŋ nu᷄m le̍ mā cha᷄l nda̍ ndu̍. Kɛ̍ ī chō bɛ̍ɛ̍ le̍nde̍ ni̍, pɔ̄mbɔ̄ ndɔ̄ cho̍ na̍nu᷄ŋ. Ndu̍yɛ̍, pɔ̄mbɔ̄ ndɔ̍ hi̍o̍ū bɛ̍ɛ̍ na̍ŋɔ̄ɔ̄ a̍ ndu̍. Le̍la̍ŋ chu̍a̍ pɔ̍mbɔ̄ ndɔ̄ sɔ̍ŋgɔ̍ ndɔ̄ɔ̍.”

³Mi̍ Sa̍msīŋ o̍ di̍mūl nda̍ āā, “I̍ nya̍ tōsa̍ ni᷅ŋ he̍ī ye̍ ndi̍ ndi̍, I̍ che᷅ māā tɔ̍ɔ̍ya̍ŋ o̍ tɔ̍ɔ̍ya̍ŋ ō ve᷅ lɛ̍ ya̍ chōo̍ le̍ nyɛ̄ ya̍ I̍ cho̍ tōsā a̍ nya̍ Fīli̍i̍tīāŋnda̍ wo̍ le̍.”

⁴O̍ ko̍ŋ kɔ̍ɔ̍lī, mi̍ Sa̍msīŋ o̍ ku̍ā yōndōo̍ ni᷄ŋ mbo̍ kɔ̍ bi̍ī tūŋāā yōndūa̍a̍ kɛ̄mɔ̄ɔ̍ lē yāa̍. Mɛ̄ɛ̍ o̍ bi̍ī nda̍, mbo̍ yīū yīū nda̍ lōmnde̍ ā ŋīɔ̍ɔ̍ŋ ŋi̍ɔ̍ɔ̍ŋ, ā o̍ yi̍ī ko̍ lo᷅mnde̍, ō chūā tɛ̍ŋgɛ̍ lēyīŋndo̍, ō sɔ̄ɔ̄ŋā o̍ lōmīī kēŋ

⁵Mɛ̄ɛ̍ o̍ chi̍i̍ nda̍ yīū yīū le̍nde̍ mbo̍ chūā yīŋnde̍ŋ mbo̍ mɛ̄ndūl tɛ̄ŋgɛ̍la̍ la̍ŋ. O̍ ko̍ŋ kɔ̍ɔ̍lī, mbo̍ mūlī vīsīa̍a̍ ha̍ā hɔ̄lla̍ o̍ chīɔ̄ɔ̄ŋ Fīli̍i̍tīāŋnda̍ ni᷄ŋ mbo̍ māl nda̍ ma̍ tīū o̍ chīɔ̍ɔ̍ŋ ni᷄ŋ ma̍ sɛ̄ŋī yīŋnde̍ŋ o̍ chīɔ̍ɔ̍ŋ ni᷄ŋ kpo̍u̍. O̍ ko̍ŋ, wi̍tīi̍ŋ wāŋnda̍ Fīli̍i̍tīāā nda̍ a̍a̍ ko̍ū ma̍ dīū mu̍ŋ ku̍ndāla̍ŋ ndo̍ŋ ni̍, ŋ̍ wa̍ īsīsi̍ le̍ kōūwɔ̄ɔ̍ wo̍ŋ ni̍, mi̍ ŋ̄ ŋūā kpo̍u̍. Ndu̍yɛ̍ o̍ ko̍ŋ kɔ̍ɔ̍lī, kpe̍le̍la̍ ndāla̍ yɔ̄mīī ɔ̄li̍fīi̍ ve̍ bɛ̍ɛ̍, la̍ŋ kpo̍u̍ mi̍ lā ŋūā.

⁶Mɛ̄ɛ̍ Fīli̍i̍tīāŋnda̍ ā chē nyɛ̍ yɔ̍nu̍ŋ ndo̍, ma̍ nyūnā le̍ wāna̍ to̍sa̍ sūɛ̍i̍ he̍ī yo̍. O̍ ko̍ŋ, mi̍ wāŋnda̍ dīmūl nda̍ māā Sa̍msīŋ, lēfōo̍ wānā wa̍ā Ti̍mi̍nā chi̍e̍e̍, ndu̍ to̍sa̍ sūɛ̍i̍ he̍ī ni̍. Kāni̍ fo̍ndōle̍, māā le̍ mɛ̄ɛ̍ lēfū ndɔ̄ ko̍ŋ ō chu̍a̍ la̍nɔ̍ɔ̍ Sa̍msīŋ mbo̍ kē chāa̍ŋ o̍o̍ Sa̍msīŋ o̍ nɔ̄ɔ̍ ni᷄ŋ yɛ̍. Mɛ̄ɛ̍ Fīli̍i̍tīāŋnda̍ tūēī le̍nde̍, ma̍ kɔ̍ bi̍ī chūa̍a̍ ho̍ō nda̍ fi̍nyā ndɔ̄ ma̍ lūām nda̍ ma̍ wū, fo̍ndōle̍, le̍ nyɛ̄ nda̍ tōsa̍ wo̍.

⁷Mɛ̄ɛ̍ Sa̍msīŋ o̍ tu̍e̍ī nyɛ̍ yɔ̍nu̍ŋ ndo̍, mbo̍ dīmūl Fīli̍i̍tīāŋnda̍ āā, “Nya̍ mi̍ lā tōsā he̍ī, nya̍ bɛ̍ɛ̍ mɛ̄ɛ̍ mī mi̍ŋgu̍l nya̍ māa̍ ko̍ŋ. I̍ cho̍ nya̍ lō nyɛ̄ pālāa̍ tūsīo̍o̍ chōo̍ ha̍a̍a̍, mɛ̄ɛ̍ mī kɔ̄l nūu̍ ō hīni̍ ma̍lāŋ ya̍ I̍ pɛ̍ŋgī nya̍ ndu̍ tūsīo̍o̍ ndu̍ chōo̍.”

⁸O̍ ko̍ŋ, mi̍ Sa̍msīŋ o̍ chi᷅ŋa̍la᷅ŋ nda̍ a̍ sɔ̍ŋgɔ̄ɔ̍ a̍ kɔ̄l tūū kōŋ. Ndu̍yɛ̍, mbo̍ dīū nda̍ dīūwo̍ pīla̍. O̍ ko̍ŋ kɔ̍ɔ̍lī, mbo̍ nyāānu᷄ŋ, mbo̍ kɔ̍ vi̍o̍ŋnu᷄ŋ o̍ būūlōo̍ ni᷄ŋ o̍ pōū bɛ̄ndū pīlɛ̍ o̍ fo̍ndāŋndo̍ dīōla̍ŋ āā Ɛ̍tām.

⁹O̍ ko̍ŋ kɔ̍ɔ̍lī, mi̍ wāŋnda̍ Fīli̍i̍tīāŋ a̍ ma̍lnu᷄ŋ ma̍ kūā o̍ lɛ̄ŋndē Chu̍dāle̍ŋ ni᷄ŋ, ma̍ kɔ̍ ki̍o̍lū dɔ̍ɔ̍ŋgɔ̍ chɔ̄ūwo̍ lo̍ŋ le̍ wāŋnda̍ Chu̍dā chīŋa̍la᷅ŋndo̍. Ndu̍yɛ̍ ma̍ kɔ̍ chīŋa̍la᷅ŋ wa᷅ŋnda̍ Lɛ̍hī chi̍e̍e̍ a̍ sɔ̍ŋgɔ̄ɔ̍.

¹⁰O̍ ko̍ŋ, mi̍ pūa̍a̍ Chu̍dā a̍ kɔ̍ nyu̍nā Fīli̍i̍tīāŋnda̍ āā, “Lā vɛ᷅ na̍a̍ hūnɔ̄ɔ̍ chīŋa̍la᷅ŋndo̍ a̍ sɔ̍ŋgɔ̄ɔ̍?” Mi̍ wāŋnda̍ Fīli̍i̍tīāŋ a̍ di̍mūl nda̍ āā, “Ŋ̄ hīŋ le̍ Sa̍msīŋ bīyɔ̄ɔ̍ mī ŋ̄ kūɛ̄ a̍ ndu̍. Ndu̍ bɛ̍ɛ̍ mī ŋ̄ kɔ̍ tōsa̍l ndu̍ nyɛ̍ o̍ to̍sa̍l na̍a̍ wo̍.”

¹¹Mɛ̄ɛ̍ pūa̍a̍ Chu̍dā a̍ tu̍e̍ī mūlī wāŋnda̍ Fīli̍i̍tīāŋ a̍ mu̍lu̍l nda̍ wo̍, ma̍ cha᷄ŋ wāa̍la̍ŋ lā yāa̍ (3,000) ma̍ kūā o̍ būūlōo̍ Ɛ̍tām, nāa̍ Sa̍msīŋ wa̍ ō vīāŋna᷄ŋ nda̍. Ma̍ kɔ̍ di̍mūl ndu̍ āā, “A̍ si̍nā nu̍a̍ā māā Fīli̍i̍tīāŋnda̍ le̍ na̍a̍ ŋ̄ chō o̍ bā bɛ̄ŋgu̍ le̍? Vɛ᷅ ma̍ tōsāl na̍a̍ sūɛ̍i̍ wa̍ā nu̍a̍ā?” Mi̍ Sa̍msīŋ di̍mūl nda̍ āā, “Nyɛ̄ nda̍ tōsa̍l la̍ wo̍ māa̍ ko̍ŋ ya̍ I̍ mi̍ŋgu̍l nda̍ ko̍ŋ ni̍.”

¹²Ma̍ dīmūl Sa̍msīŋ āā, “Ŋ̄ hīŋ le̍ nu̍m yīīyo̍ mī ŋ̄ kɔ̍ yɔ̍ŋgū nu̍m o̍ Fīli̍i̍tīāŋnda̍ lo̍.” Mi̍ Sa̍msīŋ o̍ di̍mūl nda̍ āā, “I̍ chɛ̍l le̍ mī lā yīi̍ ya̍. Kɛ̍ lā chūe̍l la̍ ībūŋgā mī lā mēna̍ŋ māā ō cho̍ nya̍ pi̍la̍ le̍ cho̍ ya̍ dīyɔ̄ɔ̄ le̍.”

¹³Mi̍ pūa̍a̍ Chu̍dā a̍ di̍mūl ndu̍ āā, “Ŋ̄ cho̍ nu̍m nyɛ̄ o̍ nyɛ̄ yɔ̄ŋ te̍. Yīīyo̍ ko̍ni̍ na̍a̍ ŋ̄ chō nu̍m ni̍, mī ŋ̄ kɔ̍ yɔ̍ŋgū nu̍m o̍ nda̍ lo̍.” O̍ ko̍ŋ, ma̍ sōlī yūēī sɛ̄nɛ̄īye̍ ī ŋīi̍ŋ, ma̍ yīī ndu̍ yīīyo̍ pīla̍ a̍ ndi̍. Ma̍ sōlī ndu̍ nāa̍ o̍ wa̍ ka̍ŋ o̍ būūlōo̍ ni᷄ŋ nda̍, ma̍ kūā a̍ ndu̍ le̍ mā kɔ̍ yɔ̍ŋgu̍ ndu̍ o̍ Fīli̍i̍tīāŋnda̍ lo̍.

¹⁴Mɛ̄ɛ̍ nda̍ fūūlu̍u̍ a̍ ndu̍ Lɛ̍hī chi̍e̍e̍ nāā Fīli̍i̍tīāŋnda̍ ā wa̍ wa̍, mi̍ Fīli̍i̍tīāŋnda̍ ā hūŋ a̍ kīlta̍ŋ, o̍ ko̍ŋ kɔ̍ɔ̍lī, a̍ kūūlīāāla̍ŋ. Kāni̍ fo̍ndōle̍ le̍ mɛ̄ɛ̍ nda̍ bīīlu̍l nda̍ Sa̍msīŋ yɛ̍. Kɛ̍ o̍ lē pīlɛ̍ ni᷄ŋ kpe̍ mi̍ nyi̍na̍ Mɛ̄lɛ̄ka̍ Ya̍a̍wɛ̄ɛ̄ wo̍ ō tūāl Sa̍msīŋ kɔ̄ɔ̄lī a̍ kpāāyā bɛ̍ndōo̍. Yūe̍i̍ wa̍ Sa̍msīŋ ī yīyāā o̍ bāla̍ŋ a̍ o̍ chōŋgu̍la̍ŋ nde̍, mi̍ Sa̍msīŋ ki̍lī kīlī ndi̍ wāna̍ a̍a̍ cha᷅ ko̍ bɛ̍ɛ̍ āā kɛ̍īla̍ŋ nda̍ wa̍ kīlī kīlīo̍o̍ a̍ yīŋnde̍ŋ ni̍.

¹⁵O̍ ko̍ŋ kɔ̍ɔ̍lī, mi̍ Sa̍msīŋ o̍ cha᷅ ya̍a̍lo̍ sōfɛ̍lɛ̍ nda̍ dīī sɛ̄nɛ̄īyo̍ ō mālāā lɛ̄ŋ. Mbo̍ chūā ya̍a̍lo̍ kōŋ mbo̍ chīŋa̍la᷅ŋ Fīli̍i̍tīāŋnda̍ a̍ sɔ̍ŋgɔ̄ɔ̍. Ndu̍yɛ̍, mbo̍ dīū Fīli̍i̍tīāŋnda̍ wāa̍ ō pīlɛ̍ a̍ ya̍a̍lo̍ kōŋ.

¹⁶O̍ ko̍ŋ, mi̍ Sa̍msīŋ o̍ so̍lī chōndi̍i̍ kɔ̄l kɛ̄ndɛ̄i̍. Mbo̍ dīmī āā, “A̍ ya̍a̍lo̍ sōfɛ̍lɔ̍ɔ̍, mi̍ di̍ī pūa̍a̍ wāa̍ o̍ pīlɛ̍. A̍ ya̍a̍lo̍ sōfɛ̍lɔ̍ɔ̍, mi̍ yɛ̍ɛ̍mbūū nda̍, ndu̍yɛ̍, mi̍ di̍ū nda̍ ku̍ndālā bɛ̍ndūla̍ŋ.”

¹⁷Mɛ̄ɛ̍ Sa̍msīŋ o̍ chi̍i̍ chōnde̍i̍ he̍ī so̍lī o̍o̍, mbo̍ vīāū ya̍a̍lo̍ sōfɛ̍lɛ̍ ko̍ŋ. O̍ ko̍ŋ, mi̍ wāŋnda̍ kē fo̍ndāŋ kōŋ dīōla̍ŋ āā Lūāmātī Lɛ̍hī.[6]

¹⁸O̍ ko̍ŋ kɔ̍ɔ̍lī, mi̍ kōlɔ̄ɔ̍ bīī Sa̍msīŋ bīyɔ̄ɔ̍ pīla̍. O̍ ko̍ŋ, mbo̍ pīɛ̄ī Mɛ̄lɛ̄ka̍ Ya̍a̍wɛ̄ɛ̄. Mbo̍ dīmī āā, “Bu̍ɛ̍ī nūmndo̍ ya̍ I̍ cho̍ ni̍ Mɛ̄lɛ̄ka̍. Nu᷄m ke̍ ya̍ kpāāyāa̍ ho̍ō ni̍ mi̍ ya᷅m ya̍a̍mɔ̍ɔ̍wa̍a̍ nīa̍a̍. Le̍la̍ŋ, yāndi̍i̍ to̍sā mi̍ vi᷅ a̍ bo̍lōlā vēsɛ̍i̍la̍ŋ te̍, yɔ̄ŋi̍ Fīli̍i̍tīāŋāa̍ cho̍ ha̍ā wānāa̍ Mɛ̄lɛ̄ka̍ le̍ wa̍ ā chūa̍ ya̍ ō vīlɛ̍i̍yo̍ mā kūɛ̄nu᷄ŋ a̍ ya̍.”

¹⁹O̍ ko̍ŋ, mi̍ Mɛ̄lɛ̄ka̍ tūɛ̄ī pīɛ̄īlē ndɔ̄le̍ŋ. Mi̍ Mɛ̄lɛ̄ka̍ tōsā mi̍ lɛ̄ŋnde̍ŋ lē kūmbi᷄ŋ mi̍ pīo̍o̍ ō pīɔ̄l Lɛ̍hī chi̍e̍e̍ lo̍ŋ. O̍ ko̍ŋ, mi̍ Sa̍msīŋ ko᷅l. Mɛ̄ɛ̍ o̍ ko̍l, mbo̍ mīīŋgū yōōmūa̍ŋ sɔ̄lā. Mi̍ kɔ̄llo̍ nyūlūl ndu̍ fɛ̍ɛ̍. O̍ ko̍ŋ, ma̍ kē pēē ko̍ŋ dīōla̍ŋ āā Hākīlo̍lūē.[7] Ndu̍yɛ̍, a̍ pāa̍le̍ hāūle̍ŋ nde᷅ŋ bɛ̍ɛ̍, pēē pɔ̍mbɔ̄ kōŋ ō chō Lɛ̍hī chi̍e̍e̍ lo̍ŋ.

²⁰O̍ ko̍ŋ, mi̍ Sa̍msīŋ o̍ wa᷅ ni̍ko̍ lɛ᷅ŋndē I̍sɔ̄lūɛ̍i̍le̍ŋ chīla̍ŋ. Le̍ wɔ̄sīla̍ŋ bi̍dīi̍ŋ, ō wa̍ lɛ̄ŋndē I̍sɔ̄lūɛ̍i̍le̍ŋ chōo̍. Ndu̍yɛ̍ a̍ te̍le̍ŋ ko̍ŋ, Fīli̍i̍tīāŋnda̍ o̍ bā bɛ̄ŋgu̍ I̍sɔ̄lūɛ̍i̍ya̍ ā wa̍ ni̍.