Read Southern Kisi Chɔ̄ɔ̍chi̍a̍a̍ 16 Bible Online

Chɔ̄ɔ̍chi̍a̍a̍ 16 - Southern Kisi bible

Chɔ̄ɔ̍chi̍a̍a̍ 16

¹Pāa̍le̍ pi᷅lɛ̍, mi̍ Sa̍msīŋ ku̍ā Ka̍a̍sā, chi̍e̍e̍ Fīli̍i̍tīāŋnda̍. O̍ ko̍ŋ, mbo̍ chā wānā la̍nɔ̍ ti̍a̍māā bɛ̄ndū pīlɛ̍, mbo̍ kūā le̍ mā lɔ᷄l nda̍ chūa̍a̍ ho̍ō.

²Mɛ̄ɛ̍ wāŋnda̍ Ka̍a̍sā a̍ tu̍e̍ī māā Sa̍msīŋ o̍ ku̍ɛ̄ lo̍ŋ, ma̍ vēēla᷅ŋ kpo̍u̍ ma̍ kɔ̍ ba̍lū fo̍ndāŋ o̍ wa̍ wo̍. Mi̍ ā ti᷄ŋ ā kɔ̍ cha᷅l o̍ dīōlā sāāsa̍ chi̍o̍o̍ le̍ mī nda̍ a̍a̍ bi̍ī ndu̍. Īchɔ̄l kōŋ pi̍i̍ pi̍i̍, ā wa̍ ndu̍ mɛ̄ŋgɛ̄lāa̍, ā mēīyāā do̍ŋ do̍ŋ, ma̍ kɛ̄ɛ̄sīāā māā tē pāa̍le̍ŋ le̍e̍ sɛ᷅ dɔ̍ɔ̍ pɛ̍, nda̍ a̍a̍ de̍l ndu̍ chōo̍, nda̍ a̍a̍ di̍ī ndu̍.

³Kɛ̍ mɛ̄ɛ̍ Sa̍msīŋ o̍ te̍ndū a̍ dītɛ̍ɛ̄ŋndo̍, le̍ mbō kūɛ̄nu᷄ŋ, mbo̍ kēēkū dīō sāāsa̍ chi̍o̍o̍ sūŋgɔ̄ɔ̄ a̍ da̍kpe̍ŋnda̍ ndɔ̄la̍ŋ lātūlu̍, ndu̍yɛ̍, a̍ chīli̍ŋu̍ŋ bɛ̍ndūŋ nda̍ kīndā ndu̍ wo̍ŋ kpo̍u̍, mbo̍ bīī o̍ lāchōŋgu̍. Mbo̍ hēl a̍ ndu̍ o̍ pēmbēi̍ chōo̍ pɔ̍ɔ̍li̍ le̍ kɔ̄la̍ŋ kūmbū Hi̍būlɔ̄ŋ chi̍e̍e̍ wo̍.

⁴O̍ ko̍ŋ kɔ̍ɔ̍lī, mɛ̄ɛ̍ te̍le̍ŋ ti᷄ŋ ō hīo̍u̍, mi̍ Sa̍msīŋ ka̍a̍lā chūā pīlɛ̍ dīōla̍ŋ āā Dīla̍i̍lā, wānā wa̍ā o̍ chi̍e̍e̍ pi᷅lɛ̍ o̍ lɛ̄ŋndē dɛ̍ŋgbɛ̍le̍ŋ ni᷄ŋ So̍lu̍ɛ̍kī.

⁵Mɛ̄ɛ̍ wāŋ bɛ̄ndūa̍a̍ Fīli̍i̍tīāŋ a̍ che᷅ māā Sa̍msīŋ o̍ cho̍ nda̍ chūa̍a̍ ho̍ō, ma̍ mālnu᷄ŋ ma̍ kɔ̍ di̍mūl chūa̍a̍ ho̍ō āā, “Dɛ̄ɛ̄ni̍a̍a̍ Sa̍msīŋ mbō chɔ᷄m nu̍m nyɛ᷄ to̍sa̍ mbo̍ nɔ̄ kpāāyā bɛ̍ndōo̍ ho̍ō wo̍. Mbō chɔ̄m nu̍m mɛ̄ɛ̍ wānā nɔ̍lā mā yi̍i̍ ndu̍ mā ti̍u̍ ndu̍ bā ō nɔ̍lā mbō hɛ̄lu᷄ŋ te̍ yɛ̍. Tē a̍ nɔ̍la̍ mā to̍sa̍l na̍a̍ sūɛ̍i̍ he̍ī pɛ̍, na̍a̍ ki̍nɛ̍i̍ wānā o̍ wānā cho̍ nu̍m nyɛ̄ sɔ̄lāa̍ kē ka̍ni̍ŋ hu̍mbo᷄ŋ wāa̍ ō pīlɛ̍ a̍ kɛ̄mɛ̄.”

⁶Pāa̍le̍ pi᷅lɛ̍ mi̍ Dīla̍i̍lā o̍ di̍mūl Sa̍msīŋ āā, “Yāndi̍i̍ chɔ̍m ya̍ nyɛ̍ to̍sa̍ ma̍ nɔ̄ kpāāyā bɛ̍ndōo̍ ho̍ō wo̍. Ndu̍yɛ̍, tē wānā ye̍e̍ma̍ le̍ nu̍m yīīyo̍ mī wānā ti̍u̍ nu̍m bā a̍ he̍lūŋ te̍ pɛ̍, vɛ̄ɛ̍nɛ̍ wa̍nā lo̍o̍kū yɛ̍ ndi̍ tōsā?”

⁷Mi̍ Sa̍msīŋ di̍mūl ndu̍ āā, “Tē wānā yi̍i̍ ya̍ pɛ̍ a̍ yūēī nda̍ kīndū chīɔ̄ūwo̍ ve̍ ī kīyɛ̍i̍ye̍ ī ŋɔ᷄mmɛ̍ū, i̍ fɔ̍la̍ wɔ̍ le̍ ve̍ pɛ̍, I̍ nɔ᷅ lɛ̍ kpāāyā o̍ kpāāyā le̍, kpāāyā yɔ̍ŋāa̍ ho̍ō ko̍ni̍ ya̍ I̍ nɔ᷅ ni᷅ŋ ni̍.”

⁸O̍ ko̍ŋ, mi̍ māsāa̍ Fīli̍i̍tīāŋnda̍ ā chūū Dīla̍i̍lā yūēī nda̍ kīndū chīɔ̄ūwo̍ ve̍, ī kīyɛ̍i̍ye̍ ī ŋɔ᷄mmɛ̍ū i̍ ndi̍ i̍i̍ fɔ̍la̍ wɔ̍ le̍ ve̍. O̍ ko̍ŋ kɔ̍ɔ̍lī, mi̍ Dīla̍i̍lā o̍ yi̍ī Sa̍msīŋ a̍ ndi̍ po᷅ŋ.

⁹Ndu̍yɛ̍, Dīla̍i̍lā ndu̍ o̍o̍ kɛ̍si̍ ni᷅ŋ pūa̍a̍ o̍ lu̍mūi̍yo̍ ō pīlɔ̍ɔ̍ ni᷄ŋ le̍ Sa̍msīŋ hūnɔ̄ɔ̄ dēlɔ̄ɔ̍ chōo̍. Mɛ̄ɛ̍ Dīla̍i̍lā chi̍i̍ Sa̍msīŋ yīi̍, mbo̍ dēŋī chōo̍ cho̍o̍ āā, “Sa̍msīŋ, Sa̍msīŋ Fīli̍i̍tīāŋnda̍ hīŋ le̍ nu̍m dēlɔ̄ɔ̍ chōo̍.” O̍ ko̍ŋ, mi̍ Sa̍msīŋ o̍ yi̍ŋgā. Mɛ̄ɛ̍ o̍ yi̍ŋga̍, mi̍ yūēī nda̍ yīi̍ ndu̍ ve̍ ī kīōlī kīōlī, kpa̍li̍ kpa̍li̍, wānā a̍a̍ cha᷅ ko̍ bɛ̍ɛ̍ āā kɛ̍īyo̍ nda̍ wa̍ kīlī kīlīo̍o̍ a̍ yīŋnde̍ŋ ni̍. O̍ ko̍ŋ, mi̍ Fīli̍i̍tīāŋnda̍ dēmā le̍ mā sīna̍ sɔ̍ɔ̍sɔ̍ɔ̍yɛ̍ī kpāāya̍ Sa̍msīŋ ndo̍.

¹⁰O̍ ko̍ŋ kɔ̍ɔ̍lī, mi̍ Dīla̍i̍lā o̍ di̍mūl Sa̍msīŋ āā, “Dīɔ̄mnde̍ kpe̍e̍kpe̍i̍ ŋ̄ chē ya̍ he̍ī sūīyo̍ ni̍, ma̍ dīmūl la̍ chōōlā wāā nu̍a̍ā. Yāndi̍i̍, chɔ̍m ya̍ mɛ̄ɛ̍ wānā lo̍o̍kū nu̍m yīī mā tīu̍ nu̍m bā yɛ̍.”

¹¹Mi̍ Sa̍msīŋ o̍ di̍mūl ndu̍ āā, “Tē wānā yi̍i̍ ya̍ a̍ yūēī kīyɛ̍i̍ye̍ ī nda̍ sōli̍ wɔ̍ kpe̍ku̍ o̍ kpe̍ku̍ a̍ ndi̍ le̍ ve̍ pɛ̍, dīāllūŋ nīŋ ka̍la᷄ŋ ŋ̄ chūū. I̍ nɔ᷅ lɛ̍ kpāāyā o̍ kpāāyā le̍, kpāāyā yɔ̍ŋāa̍ ho̍ō ko̍ni̍ ya̍ I̍ nɔ᷅ ni᷅ŋ ni̍.”

¹²O̍ ko̍ŋ kɔ̍ɔ̍lī, mi̍ Dīla̍i̍lā chu̍ā vɛ̄lɛ̄ yūēī kīyɛ̍i̍ye̍ ī chēle̍ŋ mbo̍ yīī Sa̍msīŋ a̍ ndi̍ po᷅ŋ. Ndu̍yɛ̍ ndu̍ o̍o̍ kɛ̍si̍ ni᷅ŋ pūa̍a̍ o̍ lu̍mūi̍yo̍ ō pīlɔ̍ɔ̍ ni᷄ŋ le̍ Sa̍msīŋ dēlɔ̄ɔ̍ chōo̍. Mɛ̄ɛ̍ o̍ chi̍i̍ ndu̍ yīī kōŋ, mbo̍ dēŋī chōo̍ cho̍o̍ āā, “Sa̍msīŋ, Sa̍msīŋ, Fīli̍i̍tīāŋnda̍ hīŋ le̍ nu̍m dēlɔ̄ɔ̍ chōo̍.” Kɛ̍, mɛ̄ɛ̍ Sa̍msīŋ o̍ yi̍ŋga̍, mi̍ yūēī nda̍ yīi̍ ndu̍ bāla̍ŋ nde̍ a̍ ndi̍ ve̍ ī kīōlī kīōlī kpa̍li̍ kpa̍li̍ wānā a̍a̍ cha᷅ ko̍ bɛ̍ɛ̍ āā a̍ kɛ̍īyo̍ nda̍ a̍a̍ yi̍i̍ ndu̍ ni̍.

¹³Mi̍ Dīla̍i̍lā o̍ di̍mūl vɛ̄lɛ̄ Sa̍msīŋ āā, “Dīɔ̄mnde̍ kpe̍e̍kpe̍i̍ ŋ̄ chō wɔ̄ ya̍ he̍ī sūīyo̍ kɛ᷅ ni̍, mā dīmūl la̍ chōōla̍ŋ. Yāndi̍i̍ chɔ̍m ya̍ mɛ̄ɛ̍ wānā lo̍o̍kū nu̍m yīī mā ti̍u̍ nu̍m bā yɛ̍.” Mi̍ Sa̍msīŋ o̍ di̍mūl ndu̍ āā, “Tē wānā o̍ wānā lɔ̍fa̍ yīīŋīī nīi̍ ka̍nde̍la̍ ŋɔ̍mmɛ̍ūve̍ he̍ī ya̍ o̍ lēbōl pɛ̍ mɛ̄ɛ̍ nda̍ lūā nu̍a̍ā kōlāa̍ yɛ̍, ndu̍yɛ̍ mi̍ wānā sa̍a̍ ndi̍ mā yi̍i̍ ndi̍ a̍ pe̍nīi̍ye̍ po᷅ŋ, dīāllūŋ nīŋ ka̍lāŋ ŋ̄ chūū. I̍ nɔ᷅ lɛ̍ kpāāyā o̍ kpāāyā le̍, kpāāyā yɔ̍ŋāa̍ ho̍ō ko̍ni̍ ya̍ I̍ nɔ᷅ ni᷅ŋ ni̍.”

¹⁴O̍ ko̍ŋ, mi̍ Dīla̍i̍lā to̍sā mi̍ Sa̍msīŋ hi̍a̍ū o̍ lūa̍a̍ŋ. Mɛ̄ɛ̍ o̍ hi̍o̍ū o̍ lūa̍ŋ, mi̍ Dīla̍i̍lā o̍ lɔ̍fā yīīŋīi̍ wa̍ Sa̍msīŋ o̍ lēbōl ka̍nde̍la̍ŋ lā ŋɔ᷄mmɛ̍ū ve̍, mɛ̄ɛ̍ nda̍ lūā nu̍a̍ā kōlāa̍ yɛ̍, o̍ ko̍ŋ kɔ̍ɔ̍lī mbo̍ sāā ndi̍ mbo̍ yīī ndi̍ a̍ pe̍nīi̍ye̍. O̍ ko̍ŋ kɔ̍ɔ̍lī, mbo̍ tīndī Sa̍msīŋ, mbo̍ dīmūl ndu̍ āā, “Sa̍msīŋ, Sa̍msīŋ Fīli̍i̍tīāŋnda̍ hīŋ le̍ nu̍m dēlɔ̄ɔ̄ chōo̍.” Kɛ̍ mɛ̄ɛ̍ Sa̍msīŋ o̍ yi̍ŋga̍, yīīŋīī Dīla̍i̍lā o̍ lɔ̍fa̍ ndu̍ ke̍ŋ o̍ lēbōl, mbo̍ yīī ndi̍ a̍ pe̍nīi̍yo̍ŋ nde̍, mi̍ Sa̍msīŋ o̍ ti̍i̍mbūū ndi̍ kpo̍u̍.

¹⁵O̍ ko̍ŋ, mi̍ Dīla̍i̍lā di̍mūl Sa̍msīŋ āā, “Sa̍msīŋ, dīmīo̍o̍ ko̍ ŋ̄ dīmī a̍ sōndō ni̍ māā a̍ ka̍a̍la̍ ya̍, kɛ̍ a̍ ka̍a̍la̍ ya̍ a̍ kɔ̄l nu̍m kpo̍so̍ŋ te̍. Lēyāa̍ kpu̍lu̍ku̍u̍ ŋ̄ hūi̍ yɔ̄ ya̍ ni̍ mā sūēī ya̍ dīɔ̄mnde̍. Ndu̍yɛ̍, mɛ̄ɛ̍ na̍a̍ ŋ̄ sūāā nu̍a̍ā yɛ̍ bɛ̍ɛ̍ I̍ cho̍ nu̍m kɔ̄ɔ̄lī kɛ̍, a̍ nɔ̍la̍ wɔ̍ mā chɔ̍m ya̍ nyɛ̍ to̍sa̍ ma̍ nɔ̄ kpāāyā bɛ̍ndōo̍ ho̍ō wo̍ le̍.”

¹⁶O̍ ko̍ŋ kɔ̍ɔ̍lī, mi̍ chūa̍a̍ ho̍ō ō hīāū lāchī a̍ Sa̍msīŋ kɔ̄llo̍ lɛ̄ndīo̍o̍ a̍ sūɛ̍i̍ he̍ī. Le̍ te̍le̍ŋ o̍ te̍le̍ŋ ō wa̍ Sa̍msīŋ kɔ̄ɔ̄lī. Mɛ̄ɛ̍ o̍ hi̍u̍ Sa̍msīŋ kɔ̄llo̍ lɛ̄ndīo̍o̍ te̍i̍, mi̍ Sa̍msīŋ sa̍ŋgā a̍ ndu̍ kɔ̄llo̍ lɛ̄ndīo̍o̍.

¹⁷O̍ mɛ̄ɛ̄lu̍la̍ŋ kpɔ̍ŋ, mbo̍ dīmūl Dīla̍i̍lā tōnya̍a̍. Mbo̍ dīmūl ndu̍ āā, “Kāni̍ nda̍ vēlū ya̍, ā ke̍i̍ yɔ̍ ya̍ kūūsi̍e̍i̍ o̍ lēbōl mā sēndi̍ ya̍ le̍. Kāni̍ fo̍ndōle̍, dīmīo̍o̍ nu̍a̍ā ma̍ vīālū ya̍, ma̍ chūā ya̍ ma̍ yɔ̄ŋgū ya̍ o̍ Mɛ̄lɛ̄ka̍ lo̍ māā Na̍a̍sālūɛ̍i̍nɔ̍.[8] Tē wānā se᷅ndi̍ ya̍ yīīŋnde̍ he̍ī o̍ lēbōl pɛ̍, dīāllūŋ nīŋ ka̍la᷄ŋ kpo̍u̍ ŋ̄ chūū. I̍ nɔ᷅ lɛ̍ kpāāyā o̍ kpāāyā le̍, kpāāya̍ yɔ̍ŋāa̍ ho̍ō ko̍ni̍ ya̍ I̍ nɔ᷅ ni᷅ŋ ni̍.”

¹⁸Mɛ̄ɛ̍ Dīla̍i̍lā o̍ sa̍a̍lu̍ŋ māā Sa̍msīŋ o̍ chi̍i̍ ndu̍ kɔ̄l tɔ̄ɔ̄nɔ᷄ŋ o̍ bā, mbo̍ yɔ̄ŋ dīōmnde̍ŋ nāa̍ māsāa̍ māFīli̍i̍tīāŋnda̍ chūā. Mbo̍ dīmūl nda̍ āā, “Lā mīīŋgu̍ na̍nu᷄ŋ, ō chīi̍ ya̍ nyɛ̄ o̍ nyɛ̄ chɔ̄m. Hūnɔ̄ɔ̄ mɛ̄ɛ̄lāa̍ kpɔ̍ŋ nya̍ cho̍ ni᷅ŋ ho̍ō ni̍.” O̍ ko̍ŋ, mi̍ māsāa̍ māFīli̍i̍tīāŋnda̍ ā mīīŋgū o̍ chīɛ̍i̍ Dīla̍i̍lā wo̍. Ndu̍yɛ̍, mɛ̄ɛ̍ nda̍ wa̍ mīīŋgōo̍, ma̍ chūā nyɛ̄ sɔ̄lāā nda̍ chūe̍l Dīla̍i̍lā būŋgɛ̄i̍ yo̍ ma̍ kūā a̍ ndu̍ o̍ bā.

¹⁹O̍ ko̍ŋ kɔ̍ɔ̍lī, mi̍ Dīla̍i̍lā to̍sā mi̍ Sa̍msīŋ hi̍nī ndu̍ o̍ bɛ̄ŋgu̍, mbo̍ lō tōsāa̍ mi̍ Sa̍msīŋ hi̍a̍ū o̍ lūa̍a̍ŋ. O̍ ko̍ŋ, mi̍ Dīla̍i̍lā ve̍e̍lū po̍ pi᷅lɛ̍. Mi̍ pōo̍ ho̍ō ō hu᷄ŋ se̍ndī Sa̍msīŋ yīīŋīī ka̍nde̍la̍ ŋɔ̍mmɛ̍ū wa̍ ndu̍ ke̍ŋ o̍ lēbōl le̍ kpo̍u̍. Ndu̍yɛ̍ dīmīo̍o̍ nu̍a̍ā ma̍ chīī Sa̍msīŋ sēndī, mī kpāāya̍ ndɔ̄ɔ̍ o̍ chūū. O̍ ko̍ŋ kɔ̍ɔ̍lī, mi̍ Dīla̍i̍lā o̍ ka̍ndū Sa̍msīŋ hīīlūūwo̍, mbō pālā ndu̍.

²⁰Mi̍ Dīla̍i̍lā o̍ di̍mūl ndu̍ chōo̍ cho̍o̍ āā, “Sa̍msīŋ, Sa̍msīŋ, Fīli̍i̍tīāŋnda̍ hīŋ le̍ nu̍m dēlɔ̄ɔ̍ chōo̍.” Mɛ̄ɛ̍ Sa̍msīŋ o̍ te̍ndū, mbo̍ yīya᷄ŋ māā ō chō lɛ̄ hāū yi̍ŋgā a̍ kpāāya̍ bɛ̍ndōo̍ mbō kūɛ̄nu᷄ŋ māā pāāndū. Ō sīna̍ nu̍a̍ā māā Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ ndu̍ ni᷅ŋ fāŋa᷄ŋ kɔ̍ɔ̍lī le̍.

²¹O̍ ko̍ŋ, mi̍ Fīli̍i̍tīāŋnda̍ hu᷄ŋ de᷅l ndu̍ chōo̍. Ndu̍yɛ̍, ma̍ kāālīāā ndu̍ hɔ̄lta̍ŋ. O̍ ko̍ŋ kɔ̍ɔ̍lī, ma̍ chūā ndu̍ ma̍ kūā a̍ ndu̍ Ka̍a̍sā chi̍e̍e̍ ma̍ kɔ̍ dɔ̍ū ndu̍ o̍ chīɛ̄ī mānyūmndo̍ ni᷄ŋ. Ndu̍yɛ̍, ma̍ dūāū ndu̍ o̍ yɔ̄lɔ̄ŋ Būlɔ᷄ŋsīi̍ŋ bɛ̍ndo᷄ŋ. O̍ ko̍ŋ kɔ̍ɔ̍lī, ma̍ sīmī ndu̍ wi̍tīi̍yo̍ŋ chūīyo̍ o̍ chīɛ̄ī mānyūm kōŋ ni᷄ŋ.

²²Kɛ̍ mɛ̄ɛ̍ te̍le̍ŋ ti̍ŋ hīo̍u̍, mi̍ yīīŋīī ndūɛ̍i̍ kāndū vɛ̄lɛ̄ wūlɔ̄ɔ̍.

²³O̍ ko̍ŋ kɔ̍ɔ̍lī, mi̍ māsāa̍ māFīli̍i̍tīāŋnda̍ ā vēēlū bɔ̄ŋa᷄ŋ dīāā nyɛ̄ dīāā bɛ̄ndōo̍ le̍ mā tōsa̍ kɔ̄l kɛ̄ndɔ̄ɔ̍, ndu̍yɛ̍ mā sōli̍ sa̍lāla̍ŋ o̍ mɛ̄lɛ̄ka̍ ndāa̍ Da̍kɔ̄ŋ ndo̍. Kāni̍ fo̍ndōle̍, le̍ mɛ̄ɛ̍ nda̍ bīī Sa̍msīŋ yɛ̍. Nda̍ kpo̍u̍ ma̍ nāŋ kɔ̄l, ma̍ dīmī āā, “Mɛ̄lɛ̄ka̍ nāa̍ Da̍kɔ̄ŋ ō ke̍ na̍a̍ kpāāyāa̍ mi̍ ŋ̄ bīī Sa̍msīŋ, ya̍a̍mɔ̍ɔ̍nɔ̍ na̍a̍.”

²⁴Nda̍ kpo̍u̍ ma̍ tōsā kɔ̄l kɛ̄ndɛ̄ bɛ̄ndōo̍, ā wa̍ di̍o̍la̍ŋ a̍ kōlɔ̄ɔ̄la̍ŋ kpe̍e̍kpe̍i̍. Mɛ̄ɛ̍ nda̍ na᷄ŋ lākɔ̄l te̍i̍, ma̍ dīmī āā, “Lā sōlu̍l na̍a̍ Sa̍msīŋ mbo̍ hu᷄ŋ to̍sāl na̍a̍ nyɛ̄m māma᷄ŋ.” O̍ ko̍ŋ, ma̍ kɔ̍ so̍lī Sa̍msīŋ o̍ chīɛ̄ī mānyūmndo̍ ni᷄ŋ, ma̍ hu᷄ŋ si̍mī ndu̍ nda̍ lāchī o̍ sūŋgbu̍a̍ŋ tɛ̍ɛ̍ŋ, mā tōsā nyɛ᷅m māma᷄ŋ a̍ ndu̍. Mɛ̄ɛ̍ wāŋnda̍ chē Sa̍msīŋ, nda̍ kpo̍u̍ ma̍ sāŋgālā mɛ̄lɛ̄ka̍ ndāa̍, ma̍ lō o̍ ko̍ŋ ma̍ dīmī āā, “Mbɔ̄ mɛ̄lɛ̄ka̍ nāa̍ o̍ ba̍li̍ka̍ mbo̍ māl na̍a̍ ya̍a̍mɔ̍ɔ̍ nāa̍ o̍ bā. Po̍ di̍u̍ wāŋndā chīe̍e̍ya̍ dīū bɛ̄ndōo̍ lɛ̄ŋnde̍ŋ nde᷅ŋ mbo̍ tɛ̄ɛ̄mbūū lɛ̄ŋndē nāāle̍ŋ ndo̍ ō chō ni᷅ŋ hāū na̍a̍ o̍ bā.”

²⁵

²⁶O̍ ko̍ŋ kɔ̍ɔ̍lī, mi̍ Sa̍msīŋ di̍mūl po̍ bu̍ɛ̍i̍ wa̍ ndu̍ bāa̍ sāa̍ wo̍ āā, “Yāndi̍i̍ sɔ̍ɔ̍ŋgu̍u̍ ya̍ o̍ sūŋgbu̍ma̍ sa̍a̍ chīɛ̄īyo̍ wa̍ŋ īkɛ̄i̍ mī pi̍la̍ŋ, le̍ mī sɛ̍ɛ̍ŋu̍ŋ ma̍ŋ mī pɛ̍ŋgi̍.”

²⁷Ndu̍yɛ̍, wāŋnda̍ chīe̍e̍ya̍ ā wa̍ ā pīāā chīɛ̄īyo̍ cha̍, wāŋ pīāāndūa̍a̍ a̍ wāŋ lāāndūa̍a̍. O̍ ko̍ŋ kɔ̍ɔ̍lī, māsāa̍ māFīli̍i̍tīāŋāā ŋūɛ̍ɛ̍nu̍a̍a̍ kpo̍u̍ ā wa̍ lo̍ŋ. Wānāa̍ wa̍ o̍ chīɛ̄īyo̍ chōo̍ ma̍ wā Sa̍msīŋ tōfāa̍ wa̍, wāŋ pīāāndūa̍a̍ a̍ wāŋ lāāndūa̍a̍ nda̍ wa̍ wāa̍la̍ŋ lā yāa̍ (3,000).

²⁸O̍ ko̍ŋ kɔ̍ɔ̍lī, mi̍ Sa̍msīŋ o̍ pi̍ɛ̍ī Mɛ̄lɛ̄ka̍ Ya̍a̍wɛ̄ɛ̄. Mbo̍ dīmī āā, “O̍o̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, yāndi̍i̍ lo̍o̍nu̍ŋ a̍ ya̍. Yāndi̍i̍ Mɛ̄lɛ̄ka̍ nāa̍, ke̍ ya̍ kpāāyā mɛ̍ɛ̍lāa̍ kpɔ̍ŋ mi̍ mi̍ŋgu̍l Fīli̍i̍tīāŋnda̍ ha̍ā māa̍. Kāni̍ fo̍ndōle̍, le̍ kāālīāā nda̍ kāāli̍a̍a̍ ya̍ hɔ̄lta̍ŋ ndo̍.”

²⁹O̍ ko̍ŋ kɔ̍ɔ̍lī, mi̍ Sa̍msīŋ o̍ sa̍ā sūŋgbu̍ma̍ sa̍a̍ chīɛ̄īyo̍ mi̍ mā wā o̍ chīɛ̄īyo̍ tɛ̄ɛ̄ŋ nda̍ŋ vēllāa̍ vēllē. Mɛ̄ɛ̍ o̍ sa̍a̍ le᷅ŋ a̍ bā kɛ̄ndɔ̄ɔ̍, mbo̍ sāā lē pīlɛ̍ le̍ŋ a̍ bā mīāllo̍, mbo̍ kīndu᷄ŋ o̍ ma̍ŋ vēllāa̍ vēllē.

³⁰Mbo̍ dēŋī chōo̍ cho̍o̍ kpe̍le̍ŋ āā, “Na̍a̍ Fīli̍i̍tīāŋnda̍ ha̍ā, ŋ̄ wu᷄ ha̍ū lātūlu̍.” Mbo̍ nyīndū sūŋgbu̍a̍ŋ ma̍ŋ a̍ kpāāya̍ ndɔ̄ɔ̍ kpo̍u̍. O̍ ko̍ŋ, mi̍ chīɛ̄ī bɛ̄ndōo̍ ho̍ō ō kōmbā nda̍ chōo̍ kpu̍lūŋ. Wānā o̍ wāna̍ wa̍ chīɛ̄ī ni̍ŋ ndo̍ŋ, Fīli̍i̍tīāŋnda̍ māsāā ndāa̍ bɛ̄ndūa̍a̍ ni̍, wānāā tūa̍a̍ wa̍ lo̍ŋ nda̍ ni̍, nda̍ kpo̍u̍ mi̍ chīɛ̄īyo̍ ho̍ō ō dēl nda̍ chōo̍ ma̍ wū. Wānāā Sa̍msīŋ o̍ di̍ī pāa̍le̍ le̍ŋ nda̍, nda̍ a̍a̍ hi̍o̍ū a̍ wānāā o̍ di̍u̍ o̍ sɔ̍ŋgɔ̄ɔ̍ ni᷄ŋ nda̍.

³¹O̍ ko̍ŋ kɔ̍ɔ̍lī, mi̍ Sa̍msīŋ pɔ̄mbūāā ndūa̍a̍ a̍ wānāya̍ŋ ŋ̄ pīlɔ̍ŋ ā hu᷄ŋ chu̍ā ndu̍ ma̍ mīīŋgū a̍ ndu̍ o̍ nda̍lo̍ chi̍e̍e̍. Ma̍ kɔ̍ chɔ᷅ ndu̍ o̍ sɛ̄i̍ nda̍ chɔ᷅ Māno̍wā fi̍nyā ndɔ̄ wo̍ ni᷄ŋ So̍lūā a̍ Ɛ̄sīta̍wɔ̄ chi̍e̍e̍ tɛ̍ɛ̄ŋ. Sa̍msīŋ o̍ chi̍i̍ wɔ̄sīla̍ŋ bi̍di̍i̍ŋ I̍sɔ̄lūɛ̍i̍ya̍ chīla̍ŋ, mbo̍ wū.