Read Southern Kisi Chɔ̄ɔ̍chi̍a̍a̍ 18 Bible Online

Chɔ̄ɔ̍chi̍a̍a̍ 18 - Southern Kisi bible

Chɔ̄ɔ̍chi̍a̍a̍ 18

¹A̍ te̍le̍ŋ ko̍ŋ lɛ̄ŋndē I̍sɔ̄lūɛ̍i̍le̍ŋ le̍e̍ ve̍ ma̍sā o̍ māsā bɛ̍ndū bā bɛ̄ŋgu̍ le̍. Ndu̍yɛ̍, a̍ bōōndi̍i̍ ke̍ŋ yu̍ŋgu̍ Da᷅ŋndo̍ ndu̍ ndu̍ o̍o̍ sɔ̍la̍ wɔ̍ le̍lɛ̍ŋ o̍ lēlɛ̄ŋ chāāŋāā ndāā I̍sɔ̄lūɛ̍i̍ya̍ tɛ̄ɛ̄ŋ te̍. Le̍ he̍ī ma̍ wā nɛ̄īla̍ŋ nūūvīa̍a̍ le̍ nda̍ bɛ̍ɛ̍ mā sɔ̄la̍ fo̍ndāa̍ o̍ nda̍a̍ mā cha᷄l lo̍ŋ.

²Ō wa̍ o̍ te̍le̍ŋ pi᷅lɛ̍, mi̍ wāŋnda̍ Da᷅ŋ a̍ hɛ̍lī pūa̍a̍ ku̍u̍ba̍a̍ ā ŋūɛ̍ɛ̍nu̍ fūlāa̍ o̍ yu̍ŋgu̍la̍ ndāla̍ŋ chōo̍, yu̍ŋgu̍ o̍ yu̍ŋgu̍ pōo̍ ō pīlɛ̍. Ma̍ vīām nda̍ māā lāsu̍a̍ŋsu̍a̍ŋ chɔ̄nɔ᷄ŋndo̍ nāa̍ nda̍ wa̍ īchāli̍ So̍lūā a̍ Ɛ̄sīta̍wɔ̄ chi̍e̍e̍ wa̍. Ma̍ dīmūl nda̍ āā, “Lā kɔ̍ mī lā kɔ̍ ba̍lū o̍ lɛ̄ŋnde̍ŋ ni᷄ŋ mī lā mɛ̄ɛ̄ndi̍a̍ŋ, le̍ na̍a̍ bɛ̍ɛ̍ mī ŋ̄ sɔ̄la̍ fo̍ndāa̍ o̍ na̍a̍.” O̍ ko̍ŋ, mi̍ pūa̍a̍ nda̍ vēm ha̍ā wa̍ ā mālnu᷄ŋ ma̍ kūā. Mɛ̄ɛ̍ nda̍ fūūlu̍u̍ o̍ lɛ̄ŋndē ŋ̄pēmbū le̍ŋ E̍fi̍lūēm, ma̍ kūā o̍ Mi̍kāā lo̍ chi̍ɛ̍ī ni᷄ŋ le̍ mā kɔ̍ lɔ᷅l lo̍ŋ.

³Bōōndi̍i̍ nda̍ wa̍ o̍ Mi̍kāā lo̍ chi̍ɛ̍ī ni̍ŋ nde̍, ma̍ tūɛ̄ī po̍ Li̍va̍īnɔ̍ wa̍ lo̍ŋ ndo̍ sūɛ̍i̍. Mɛ̄ɛ̍ nda̍ tūēī ndu̍ sūɛ̍i̍, ma̍ sīnā māā ō cho̍ wa̍nā wa̍ā lo̍ŋ te̍ o̍ cho̍ le̍. O̍ ko̍ŋ, ma̍ nyūnā pōo̍ āā, “Nɛ̄ɛ̍nɛ̍ hi᷅ŋ yɛ̍ a̍ nūm na̍nu᷄ŋ? Yɛ̄ɛ̍nɛ̍ ŋ̄ chō yɛ̄ tōsāa̍ na̍nu᷄ŋ? Wa̍li̍ yɛ̄ɛ̍nɛ̍ kpe̍e̍kpe̍i̍, ŋ̄ chō yɛ̄ tōsāa̍ na̍nu᷄ŋ?”

⁴Mi̍ po̍ Li̍va̍īnɔ̍ɔ̍ ho̍ō ō mūlī nda̍ dīōm āā, “Chɛ̄la᷅ŋndo̍ na̍a̍ ŋ̄ chɛ̄la᷅ŋ na̍a̍ Mi̍kāā ni̍, mbo̍ chūā ya̍ māā wāna̍ ndɔ̍ wa̍li̍, le̍ mī wa̍ wāna̍ ndɔ̄ so̍līāā lāsa̍lāa̍ mbō pāāwā ya̍.”

⁵Mi̍ pūa̍a̍ su̍a̍ŋsu̍a̍ŋnda̍ ha̍ā ā dīmūl ndu̍ āā, “Yāndi̍i̍ nyu̍na̍l na̍a̍ Mɛ̄lɛ̄ka̍ dīōm tē dɛ̍nɛ̍ kɛ̍ndɛ̄ ō wā ni̍ŋ na̍a̍ lāchī nāa̍ na̍a̍ ŋ̄ chō kɔ̄la̍ŋ nda̍.”

⁶Mi̍ wānā so̍līāā lāsa̍lāa̍ ho̍ō ō dīmūl nda̍ āā, “Lā bu̍u̍la᷄ŋ te̍ lā kɔ̍. Mɛ̄lɛ̄ka̍ Ya̍a̍wɛ̄ɛ̄ pi̍la̍ o̍ cho̍ a̍ nya̍ la̍tu̍lu̍.”

⁷O̍ ko̍ŋ kɔ̍ɔ̍lī, mi̍ pūa̍a̍ su̍a̍ŋsu̍a̍ŋa̍a̍ ŋu̍ɛ̍ɛ̍nu̍a̍a̍ ha̍ā ā mālnu᷄ŋ ma̍ kūā La̍i̍sī chi̍e̍e̍. Mɛ̄ɛ̍ nda̍ fūūlu̍u̍ La̍i̍sī chi̍e̍e̍, ma̍ sāālu᷄ŋ māā wāŋnda̍ ha̍ā ā chōŋnu᷄ŋ yɛ̍lɛ̍kɛ̍lɛ̍ɛ̍ o̍ bā ndāa̍ chōo̍ mɛ̄ɛ̍ wāŋnda̍ Sa̍i̍dɔ̄ŋ a̍ wa̍ŋnu̍ŋ o̍ bā ndāa̍ chōo̍ yɛ̍. Ndu̍yɛ̍ vɛ̍lɛ̄ māā ā wānu̍ŋ o̍ bā ndāa̍ chōo̍ a̍ kɔ̄ltā nyūlū, ā būūla̍ŋ le̍ nyɛ̄ o̍ nyɛ̄ le̍. O̍ ko̍ŋ kɔ̍ɔ̍lī, ma̍ sāālu᷄ŋ vɛ̍lɛ̄ māā wāŋnda̍ ha̍ā ā hūu̍ ba̍ le̍ nyɛ̄ o̍ nyɛ̄ le̍. Kāni̍ fo̍ndōle̍, māā lɛ̄ŋndē ndāle̍ŋ lɛ̄ŋndē sūlāāle̍ŋ le̍ wa̍ ni̍. Ma̍ sāālu᷄ŋ vɛ̍lɛ̄ māā wāŋnda̍ Sa̍i̍dɔ̄ŋ ā wa̍ lēvīl la̍nda̍ŋ a̍ wāŋnda̍ ha̍ā. Ndu̍yɛ̍ māā nda̍ a̍a̍ nɔ̍ i̍cha᷅ŋnja̍ o̍ īchāŋnja̍ a̍ wānā o̍ wānā le̍.

⁸Mɛ̄ɛ̍ pūa̍a̍ ŋūɛ̍ɛ̍nu̍a̍a̍ su̍a̍ŋsu̍a̍ŋnda̍ ha̍ā ā mīīŋgu̍ So̍lūā a̍ Ɛ̄sīta̍wɔ̄ chi̍e̍e̍, mi̍ wānāā ndāa̍ nyūnā nda̍ āā, “Vɛ̄ɛ̄ la̍wa̍ā lo̍ŋ?”

⁹Mi̍ pūa̍a̍ ku̍ɛ̄ su̍a̍ŋsu̍a̍ŋnde̍ŋ nda̍ ā dīmūl nda̍ āā, “Lā ŋ̄ kɔ̄ŋnu᷅ŋ mī ŋ̄ kɔ̍ chi᷅ŋa̍la᷅ŋ wa᷅ŋnda̍ La̍i̍sī a̍ sɔ̍ŋgɔ̄ɔ̍. Ŋ̄ kūɛ̄ mī ŋ̄ kɔ̍ chɔ᷅ lɛ̄ŋnde̍ŋ pɛ̍ɛ̍ŋ. Ndu̍yɛ̍, lē chō lɛ̄ŋndē kɛ̄ndɛ̄ lē bɛ̄ndū. Lā ŋ̄ cha̍lnūŋ te̍, ŋ̄ kɔ̄ŋnu᷅ŋ chɔ̍chɔ̍ mī ŋ̄ kɔ̍ chi᷅ŋa̍la᷅ŋ nda̍, mī ŋ̄ bīī lɛ̄ŋndē lēŋ. Wānā o̍ wānā ki̍i̍sa᷄ŋ te̍.

¹⁰Tē lā fūūlu̍u̍ lo̍ŋ pɛ̍, lā chō sīnā māā wānāā kāŋ ā cho̍ bɛ̍ɛ̍ kɔ̍l māā wānā de᷅l nda̍ chōo̍ a̍ sɔ̍ŋgɔ̄ le̍. Ndu̍yɛ̍, lɛ̄ŋndē lēŋ lē chō lɛ̄ŋndē bɛ̄ndū. Nyɛ̄ o̍ nyɛ̄ chōŋnu᷄ŋ ndo̍ŋ wa̍chāko̍. Wānā he̍ū ba̍ le̍ nyɛ̄ o̍ nyɛ̄ lo̍ŋ te̍. Ndu̍yɛ̍, Mɛ̄lɛ̄ka̍ chīi̍ na̍a̍ le̍ŋ ke̍.”

¹¹O̍ ko̍ŋ, mi̍ pūa̍a̍ fūlā kɛ̄mɔ̄ɔ̍ lē ŋɔ᷄mpu᷅m o̍ yu̍ŋgu̍ Da᷅ŋ ndo̍ chōo̍, ā wa̍ bɛ̄ɛ̄ndīa̍ŋ a̍ wōlɔ̄ɔ̄ lā ndāla̍ chɔ̄ūla̍ŋ ma̍ mālnu᷄ŋ nāa̍ nda̍ wa̍ īchāli̍ So̍lūā chi̍e̍e̍ a̍ Ɛ̄sīta̍wɔ̄ chi̍e̍e̍ wa̍ ma̍ kūā le̍ sɔ̍ŋgɔ̄ɔ̍.

¹²O̍ kɔ̄lā ndāla̍ŋ ni᷄ŋ, mɛ̄ɛ̍ nda̍ fūūlu̍u̍ Kīlīāātī Chi̍a̍a̍lūīm chi̍e̍e̍ o̍ lɛ̄ŋndē Chu̍dāle̍ŋ ni᷄ŋ, ma̍ kīālū dɔ̍ɔ̍ŋgɔ̍ɔ̍ lo̍ŋ. Mɛ̄ɛ̍, nyɛ̄ ko̍ŋ to̍sa̍ ni̍ mi̍ wāŋnda̍ ā kē fo̍ndā kōŋ dīōla̍ŋ āā Māha̍nɛ̄ɛ̄.[9] Fo̍ndāa̍ ho̍ō yɛ̍, Kīlīāātī Chi̍a̍a̍lūīm chi̍e̍e̍ kūmbū pāa̍le̍ŋ lē dēl lo̍ o̍ wa̍ ni̍. Ndu̍yɛ̍, a̍ pāa̍le̍ hāūle᷅ŋ bɛ̍ɛ̄ dīōlā lāŋ wāŋnda̍ chō wɔ̄ fo̍ndāŋ kōŋ vēēlōo̍ ni̍.

¹³O̍ ko̍ŋ kɔ̍ɔ̍lī, ma̍ hīāū lāchī a̍ kɔ̄la̍ŋ. Mɛ̄ɛ̍ nda̍ fūūlu̍u̍ o̍ lɛ̄ŋndē ŋ̄pēmbūle̍ŋ E̍fi̍lūēm, ma̍ kēēkū bā chīɛ̍i̍ Mi̍kāā wo̍.

¹⁴Mɛ̄ɛ̍ nda̍ fūūlu̍u̍ lo̍ŋ, mi̍ pūa̍a̍ ŋu̍ɛ̍ɛ̍nu̍a̍a̍ nda̍ a̍a̍ ve᷅m su̍a̍ŋsu̍a̍ŋnde̍ŋ nda̍ ā dīmūl chāāŋāā ndāa̍ āā, “Chīɛ̄ī pīlɛ̍ chō o̍ chīɛ̄īla̍ŋ ndāŋ na̍nu᷄ŋ tɛ̄ɛ̄ŋ, pīɔ̍m nda̍ tōōsi̍a̍a̍ a̍ yɔ̄mndo̍ ma̍ kūmbū ndu̍ kpo̍u̍ a̍ ka̍ni̍ŋ hu̍mbūŋ tēēŋgīa̍ŋ ndo̍ ō chō o̍ chīɛ̄ī ko̍ŋ ni᷄ŋ. Ndu̍yɛ̍ vɛ̍lɛ̄, pīɔ̄māā lāyu̍ŋgu̍a̍a̍ che᷅le̍ŋ ā chō vɛ̄lɛ̄ chīɛ̄ī ni̍ŋ ndo̍ŋ, a̍ dōma̍ wānā so̍līāā lāsa̍lāa̍ ō wōōnūŋ ndo̍. Le̍la̍ŋ, ō yɛ̄ɛ̍nɛ̍ na̍a̍ ŋ̄ tōsa᷅ŋ yɛ̄ a̍ ndi̍ o̍kɔ̄ɔ̄?”

¹⁵O̍ ko̍ŋ, mi̍ pūa̍a̍ ŋu̍ɛ̍ɛ̍nu̍a̍a̍ nda̍ a̍a̍ ve᷅m su̍a̍ŋsu̍a̍ŋnde̍ŋ nda̍ ā sēī, ma̍ kūā nāa̍ po̍ chu̍a̍ pīāāndū Li̍va̍īnɔ̄ɔ̍ ō wa̍ o̍ Mi̍kāā lo̍ chi̍ɛ̍ī ni̍ŋ nda̍, ma̍ kɔ̍ yi᷅l ndu̍.

¹⁶A̍ te̍le̍ŋ ko̍ŋ, so̍vɛ̄i̍ya̍a̍ kɛ̍mɛ̄ le̍ ŋɔ̍mpu᷅m nda̍, a̍ fu̍la̍ o̍ yu̍ŋgu̍ Da᷅ŋ ndo̍ chōo̍ ma̍ wā ā bɛ̄ɛ̄ndīa̍ŋ le̍ kɔ̄la̍ŋ le̍ sɔ̍ŋgɔ̄ɔ̍ wa̍, ā wa̍ īsīsi̍ o̍ dīō kpākīo̍o̍ sōndōo̍ ma̍ wā pūa̍a̍ ŋu̍ɛ̍ɛ̍nu̍a̍a̍ ha̍ā chūmndo̍.

¹⁷Mi̍ pūa̍a̍ ŋu̍ɛ̍ɛ̍nu̍a̍a̍ ku̍ɛ̄ su̍a̍ŋsu̍a̍ŋnde̍ŋ nda̍ ā lūɛ̄ī sa̍kpō o̍ Mi̍kāā lo̍ chi̍ɛ̍ī ni̍ŋ. Ma̍ kɔ̍ chu̍ā pīɔ̄m wa̍ lo̍ŋ o̍ ku̍mbāā kpo̍u̍ a̍ ka̍ni̍ŋ hu̍mbūŋ tēēŋgīa̍ŋ ndo̍. O̍ ko̍ŋ kɔ̍ɔ̍lī, ma̍ chūā vɛ̍lɛ̄ pīɔ̄māā lāyu̍ŋgu̍a̍a̍ wa̍ lo̍ŋ nda̍, a̍ dōma̍ wānā so̍līāā lāsa̍lāa̍ ma̍ fūla᷄ŋ. A̍ te̍le̍ŋ ko̍ŋ, po̍ Li̍va̍īnɔ̍ wa̍ wānā so̍līāā lāsa̍lā Mi̍kāā wo̍ wo̍ ō wa̍ īsīsi̍ o̍ dīō kpākīo̍o̍, nda̍ pūa̍a̍ kɛ̍mɛ̄ le̍ ŋɔ̍mpu᷅m a̍a̍ wa̍ kɔ̄la̍ŋ sɔ̍ŋgɔ̄ɔ̍ wa̍ lātūlu̍.

¹⁸Mɛ̄ɛ̍ wānā so̍līāā lāsa̍la̍ Mi̍kāā wo̍ ho̍ō ō chē mi̍ pūa̍a̍ su̍a̍ŋsu̍a̍ŋnda̍ ha̍ā ā lūɛ̄ī o̍ Mi̍kāā lo̍ chi̍ɛ̍ī ni̍ŋ ma̍ kɔ̍ chu̍ā pīɔ̍m wa̍ lo̍ŋ ō ku̍mbāā kpo̍u̍ a̍ ka̍ni̍i̍ hu̍mbūe̍i̍ yo̍, o̍ ko̍ŋ kɔ̍ɔ̍lī, a̍ pīɔ̄māā lāyu̍ŋgu̍a̍a̍ wa̍ lo̍ŋ nda̍ ndu̍yɛ̍ a̍ dōma̍ wānā so̍līāā lāsa̍lāa̍, ma̍ wā fūlāa̍ a̍ mu̍ŋ, mbo̍ nyūnā nda̍ āā, “Kūɛ̍ɛ̍nɛ̍ ya̍ chō yɛ̄ kɔ̄la̍ŋ a̍ nyɛ̄m mu᷅ŋ?”

¹⁹Mi̍ pūa̍a̍ ha̍ā dīmūl ndu̍ āā, “Ki̍nda̍ so̍ndō nūmndo̍ mā to̍fa̍ na̍a̍. Ŋ̄ yēēma̍ nu̍m mā sōō ba̍kō le̍. To̍l na̍a̍ kɔ̄ɔ̄lī mā wa̍ wānā na̍a̍ si̍lāā, ndu̍yɛ̍ mā wa̍ vɛ̄lɛ̄ wānā na̍a̍ sōlīāā lāsa̍lā. A̍ la̍a̍la̍ŋ māā wāa̍ wānā so̍līāā lāsa̍lāa̍ le̍ yu̍ŋgu̍la̍ŋ I̍sɔ̄lūɛ̄ī kpo̍u̍, ndu̍ le̍ hi̍o̍ū wā ō kɛ̄ndɛ̄ a̍ nūm a̍ wāa̍ wānā so̍līāā lāsa̍lāa̍ le̍ wāŋndo̍ ndu̍ pīlɛ̍ kpe̍ le̍?”

²⁰Mɛ̄ɛ̍ wānā so̍līāā lāsa̍lāa̍ ho̍ō ō tūēī nyɛ̄ pūa̍a̍ ha̍ā ā dīmu̍l ndu̍ wo̍, mbo̍ nāŋ kɔ̄l ta̍u̍. O̍ ko̍ŋ, mbo̍ bīī pīɔ̄m kōŋ a̍ pīɔ̄māā lāyu̍ŋgu̍a̍a̍ ka̍ŋ a̍ dōma̍ wānā so̍līāā lāsa̍lā kōŋ mbo̍ tūāl nda̍ kɔ̄ɔ̄lī ma̍ kūā nda̍ nda̍ā.

²¹Ndu̍yɛ̍ kɔ̄lā pūa̍a̍ chɔ̄ūwa̍ Da᷅ŋ a̍ wa̍ la̍ŋ ā wa̍ kɔ̄la̍ŋ a̍ yu̍ŋgu̍la̍ ndāla̍ŋ ndu̍yɛ̍ a̍ nyɛ̄ o̍ nyɛ̄ nda̍ a̍a̍ nɔ̍. Ma̍ sīmi᷄ŋ chu̍a̍u̍wāā ndāa̍ lāchī, a̍ chɔ̄lūāā ndāa̍, ma̍ hīāū lāchī a̍ kɔ̄la̍ŋ.

²²Mɛ̄ɛ̍ Mi̍kāā o̍ ko̍ma̍ sa̍a̍lu᷄ŋ nyɛ᷅ yɔ̍nu̍ŋ ndo̍, mbo̍ vēēlū pūa̍a̍ nda̍ chīɛ̄ɛ̄li̍āŋnda̍ kpo̍u̍ ma̍ tīsā pūa̍a̍ Da᷅ŋ kɔ̄ɔ̄lī. Kɛ̍ a̍ te̍le̍ŋ ko̍ŋ, pūa̍a̍ Da᷅ŋ nda̍ a̍a̍ ku̍ɛ̍ŋnu᷄ŋ ni᷅ŋ la̍nda̍ŋ. Mɛ̄ɛ̍ nda̍ chē pūa̍a̍ Da᷅ŋ nda̍ lāchī,

²³ma̍ vēēlū nda̍ chōo̍ cho̍o̍ kpe̍le̍ŋ le̍ mā si᷄m. Mi̍ pūa̍a̍ Da᷅ŋ a̍ mu̍li᷄ŋ ma̍ nyūnā Mi̍kāā āā, “Yɛ̄ɛ̍nɛ̍ yɔ̍nu̍ŋ yɛ̍ ma̍ chūūŋgīāā pūa̍a̍ ha̍ā kpo̍u̍ ma̍ tīsā na̍a̍ kɔ̄ɔ̄lī le̍ hūnɔ̄ɔ̍ sɔ̍ŋgɔ̄ɔ̍ a̍ na̍a̍?”

²⁴Mi̍ Mi̍kāā o̍ di̍mūl nda̍ āā, “Mī lā nyūna̍ ya̍ le̍ nyɛ᷄ yɔ̍nu̍ŋ ndo̍, vɛ̄ɛ̍nɛ̍ lā si̍nā nyɛ᷅ nya̍ tōsa̍ wo̍ le̍? Lā bīī mi̍ lā chūā mɛ̄lɛ̄ka̍a̍ nīa̍a̍ ya̍ i̍ to̍o̍si̍a̍a̍ wa̍ kpo̍u̍ a̍ wāna̍ nī so̍līāā lāsa̍lāa̍ lātūlu̍ mi̍ lā hūŋnu᷄ŋ a̍ nda̍. Ō yɛ̄ɛ̍nɛ̍ ya̍ I̍ nɔ̍ yɛ̄ lɛ̄ o̍ bā?”

²⁵Mi̍ pūa̍a̍ Da᷅ŋ a̍ di̍mūl ndu̍ āā, “Ŋ̄ yēēma̍ nu̍m bɛ̍ɛ̍ mā ku̍ŋ ŋu̍e̍ le̍, yɔ̄ŋi̍ pūa̍a̍ kɔ̄l tūūwāa̍ cho̍ na̍a̍ tɛ̄ɛ̄ŋ nda̍ ā chīŋa̍la᷅ŋ nu̍m a̍ yu̍ŋgu̍ nu̍mndo̍, mā dīu̍ nya̍ kpo̍u̍.”

²⁶O̍ ko̍ŋ kɔ̍ɔ̍lī, mi̍ pūa̍a̍ Da᷅ŋ a̍ mu̍li᷄ŋ ma̍ mɛ̄ī nda̍ īsīsi̍ lo̍ŋ ma̍ kūānu᷄ŋ. Mɛ̄ɛ̍ Mi̍kāā o̍ che᷅ māā pūa̍a̍ Da᷅ŋ a̍ hi̍o̍ū ndu̍ māyōōmu̍, mbo̍ mīīŋgū o̍ ndu̍lo̍.

²⁷O̍ ko̍ŋ, mi̍ pūa̍a̍ Da᷅ŋ a̍ chu̍ā mɛ̄lɛ̄ka̍a̍ Mi̍kāā o̍ to̍o̍si̍a̍a̍ wa̍ kpo̍u̍ a̍ wāna̍ ndɔ̄ so̍līāā lāsa̍lāa̍ ma̍ kūānu᷄ŋ a̍ nda̍ nāa̍ nda̍ wa̍ kɔ̄la̍ŋ sɔ̍ŋgɔ̄ɔ̍ La̍i̍sī chi̍e̍e̍ wa̍. Ndu̍yɛ̍, La̍i̍sī wa̍ chi̍e̍e̍ kɔ̄l nyūlū bɛ̄ndū. Wāŋnda̍ ha̍ā ā ve̍ bɛ̍ɛ̍ kɔ̍l māā wānā hu᷅ŋ mbō hu᷄ŋ de᷅l nda̍ chōo̍ lo̍ŋ a̍ sɔ̍ŋgɔ̍ te̍. Mi̍ pūa̍a̍ Da᷅ŋ a̍ kɔ̍ de᷅l chi̍o̍o̍ ho̍ō chōo̍ a̍ sɔ̍ŋgɔ̄ɔ̍ a̍ mɔ̄ɔ̄ŋ nda̍ŋ fāŋndo̍ŋ, ndu̍yɛ̍ ma̍ lūām ndu̍ chi̍li̍kɔ̍.

²⁸Ndūyɛ̍ wāŋnda̍ La̍i̍sī nda̍ a̍a̍ nɔ̍ wa̍nā o̍ wānā ma̍lā nda̍ a̍ sɔ̍ŋgɔ̄ɔ̍ mbo̍ chīīndi̍a̍a̍ nda̍ wāŋnda̍ ha̍ā o̍ bā le̍. Kāni̍ fu̍u̍le̍ wāŋnda̍ ha̍ā ā wa̍ la̍nda̍ŋ a̍ wāŋnda̍ Sa̍i̍dɔ̄ŋ chi̍e̍e̍, ndu̍yɛ̍ vɛ̍lɛ̄ nda̍ a̍a̍ nɔ̍ i̍cha᷅ŋnja̍ a̍ wānā o̍ wānā le̍. Ndu̍yɛ̍ chi̍o̍o̍ ho̍ō yɛ̍, o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ Bɛ̄tīlu̍ɛ̍hɔ̍bī i̍kɛ̍i̍ o̍ wa̍ ni̍, ndu̍yɛ̍ ma̍ yām ndu̍, ma̍ dīū wānā o̍ wāna̍ wa̍ lo̍ŋ. O̍ ko̍ŋ, mi̍ wāŋnda̍ Da᷅ŋ a̍ chu̍ā ni̍ko̍ chi̍o̍o̍ ho̍ō māā chi̍e̍e̍ nda̍. Ma̍ mīŋgī ndu̍ tāŋgūl, ma̍ chāl lo̍ŋ.

²⁹Mɛ̄ɛ̍ nda̍ mīŋgi̍ chīo̍o̍ ho̍ō tāŋgūl, ma̍ fāŋā ndu̍ La̍i̍sī la̍ŋ chōo̍. Ma̍ mīŋgī ndu̍ ni᷅ŋ dīōla̍ŋ kē āā Da᷅ŋ, dīōla̍ fi̍nyā ndā ma̍mā la̍ŋ, ndu̍ yɔ̍nūŋ ni̍ māā pūa̍a̍ Che̍kɔ̍pū wa̍ ō pīlɔ̍ɔ̍.

³⁰O̍ ko̍ŋ kɔ̍ɔ̍lī, mi̍ wāŋnda̍ Da᷅ŋ a̍ si̍mī pīɔ̄m nda̍ chu̍a̍ ko̍ŋ o̍ Mi̍kāā lo̍ chi̍ɛ̍ī ni̍ŋ ndo̍, ma̍ wā ndu̍ sōōlūūwo̍. Ndu̍yɛ̍ ma̍ sīīŋgūū Chōna̍ta᷅ŋ, po̍ Kɛ̍ɛ̍sīɔ̄m ndo̍ wānā so̍līāā lāsa̍lā le̍ yu̍ŋgu̍ Da᷅ŋ ndo̍ kpo̍u̍. Ndu̍yɛ̍, Chōna̍ta᷅ŋ ko̍ŋ yɛ̍, fi̍nyā ndɔ̄ ma̍ma̍ wa̍ Mūu̍sē ni̍. O̍ ko̍ŋ kɔ̍ɔ̍lī mɛ̄ɛ̍ Chōna̍ta᷅ŋ ko̍ŋ ō vī, mi̍ yu̍ŋgu̍ ndɔ̄ɔ̍ ō hīāū lāchī a̍ sa̍lāla̍ŋ sōlīo̍o̍ le̍ wāŋnda̍ Da᷅ŋ, ha̍a̍a̍ mbō lō o̍ ko̍ŋ mi̍ ya̍a̍mɔ̍ɔ̍wa̍ ā hu᷄ŋ kɔ᷅ a̍ wāŋnda̍ I̍sɔ̄lūɛ̄ī o̍ chɛ̄le̍ŋ ni᷄ŋ. Mi̍ chē bɛ̍ɛ̍ mi̍ Tɛ̍ndīi̍ Mɛ̄lɛ̄ka̍a̍ ndu̍ o̍o̍ wa᷅ Si̍lɔ̄ɔ̄ chi̍e̍e̍ nāa̍ wāŋnda̍ I̍sɔ̄lūɛ̄ī kpo̍u̍ nda̍ a̍a̍ ku̍ā le̍ Mɛ̄lɛ̄ka̍ sōōlūūwo̍ wa̍ ni̍, kɛ̍ mi̍ wāŋnda̍ Da᷅ŋ nda̍ hīāū lāchī a̍ pīɔ̄m nda̍ chūa̍ o̍ Mi̍kāā lo̍ chi̍ɛ̍ī ni̍ŋ ndo̍ sōōlūūwo̍.