Read Southern Kisi Chɔ̄ɔ̍chi̍a̍a̍ 19 Bible Online

Chɔ̄ɔ̍chi̍a̍a̍ 19 - Southern Kisi bible

Chɔ̄ɔ̍chi̍a̍a̍ 19

¹A̍ bōōndi̍i̍ ke̍ŋ, lɛ̄ŋndē I̍sɔ̄lūɛ̍i̍le̍ŋ le̍e̍ nɔ̍ wɔ̍ ma̍sā o̍ māsā bɛ̍ndū le̍. Po̍ Li̍va̍īnɔ̍ pi᷅lɛ̍ ō wa̍ īchāli̍ o̍ lɛ̄ŋndē ŋ̄pēmbūle̍ŋ E̍fi̍lūēm o̍ sɔ̍ŋgi̍le̍ŋ ni᷄ŋ pɔ̍. Mi̍ pōo̍ ho̍ō ō chūā wānā wa̍ā Bɛ̍ti̍lɛ̍hɛ̄m chi̍e̍e̍ o̍ lɛ̄ŋndē Chu̍dāle̍ŋ ni᷄ŋ o̍ nɔ̄ɔ̍ ni᷄ŋ mbo̍ wā la̍a̍ ndɔ̄ pɔ̍mbɔ̄ɔ̍.

²Kɛ̍, mi̍ ī yɔ̄nu᷄ŋ mi̍ chūa̍a̍ ho̍ō ō sāā pɔ̍nɔ̍ ndɔ̄ ka̍fāla̍ŋ tōsāllo̍. O̍ ko̍ŋ, mi̍ sūɛ̍i̍ ī lūɛ̄ī nda̍ tɛ̄ɛ̄ŋ. Mi̍ chūa̍a̍ ho̍ō ō mālnu᷄ŋ mbo̍ kūānu᷄ŋ o̍ wānāā ndūa̍a̍ lo̍ Bɛ̍ti̍lɛ̍hɛ̄m. Le̍ pāŋgo̍ŋ ŋ̄ hīɔ̍ɔ̍lu̍ ō wānu̍ŋ fi̍nyā ndɔ̍ o̍ bɛ̄ŋgu̍ chōo̍.

³Mɛ̄ɛ̍ pāŋgu̍ŋ hi̍ɔ̍ɔ̍lo̍ŋ ŋ̄ chūu̍, mi̍ pōo̍ ho̍ō ō kɛ̄ɛ̄sīāā le̍ mbō kɔ̍ nyɔ̍ɔ̍lū ndu̍ mā mīīŋgu̍. O̍ ko̍ŋ, mi̍ pōo̍ ho̍ō ō chūā bu̍ɛ̍īyo̍ ō pīlɛ̍ a̍ sōfɛ̍li̍a̍a̍ ā ŋīɔ̍ɔ̍ŋ, mbo̍ mālnu᷄ŋ mbo̍ kūā Bɛ̍ti̍lɛ̍hɛ̄m. Mɛ̄ɛ̍ o̍ fu̍u̍lu̍u̍, mi̍ chūa̍a̍ ho̍ō ō chūā ndu̍ mbo̍ kūā a̍ ndu̍ o̍ fi̍nyā ndɔ̄ lo̍ chi̍ɛ̍ī ni̍ŋ. Mɛ̄ɛ̍ fi̍nyāa̍ chūa̍a̍ ho̍ō ō chē pōo̍ ho̍ō, mbo̍ nāŋ kɔ̄l ta̍u̍.

⁴O̍ ko̍ŋ kɔ̍ɔ̍lī, mi̍ pōo̍ ho̍ō lēfū ndɔ̄, fi̍nyāa̍ chūa̍a̍ ō dīmūl ndu̍ le̍ mā chɔ̄ɔ̄lu̍ vīōūwɔ̄ɔ̄ lo̍ŋ ti̍ŋ. O̍ ko̍ŋ, mi̍ pōo̍ ho̍ō ō chīī lɔ̄mā lē yāa̍ fi̍nyāa̍ chūa̍a̍ o̍ bɛ̄ŋgu̍ cho̍o̍. Ā wa̍ di̍o̍la̍ŋ a̍ kōlɔ̄ɔ̄la̍ŋ dīōm pīlɛ̍.

⁵Īdīi̍yo̍ pu̍u̍ŋ, o̍ pāa̍le̍ hi̍ɔ̍ɔ̍lu̍le̍ŋ chōo̍, mi̍ pōo̍ nda̍ la̍a̍ ndɔ̄ a̍ bɛ̍ɛ̍ndīa̍ŋ le̍ kɔ̄la̍ŋ. Kɛ̍ mi̍ fāllo̍ dīmūl lēfū ndɔ̍ āā, “Lā chu᷄m ndɔ̍ mā tōōsi̍a̍l nya̍ nyɛ̄ dīa̍a̍ mī lā dē. Le̍ mī lā sɔ̄la̍ yōōmūa̍ŋ le̍ kɔ̄la̍ŋ.”

⁶O̍ ko̍ŋ, ma̍ bɛ̄ɛ̄ndīāā nyɛ̄ dīa̍a̍. Mi̍ pōo̍ nda̍ lēfū ndɔ̄ a̍ cha᷅l ma̍ dīā nyɛ̄ dīa̍a̍ ho̍ō lātūlu̍, ndu̍yɛ̍ ma̍ kōl. Mi̍ fi̍nyāa̍ chūa̍a̍ nyɔ̄ɔ̄lū lēfū ndɔ̍ āā, “Mbɔ̄ lā lɔ᷄l ni̍ko̍ na̍nu᷄ŋ mī ŋ̄ chɔ̄ɔ̄lu̍ yēēmɛ̍i̍ sōlī. Sīɔ̄dīi̍ lā pēna̍ lākɔ̄.”

⁷Mɛ̄ɛ̍, pōo̍ chɛ᷄ŋ le̍ kɔ᷄ŋnda̍ŋ, kɛ̍ mi̍ lēfū ndɔ̄ dɛ̍ɛ̍nīāā ndu̍ vɛ̄lɛ̄ le̍ mbō lɔ᷄l vɛ̄lɛ̄ lo̍ŋ pa̍a̍le̍ le̍ŋ. O̍ ko̍ŋ, mi̍ pōo̍ ō chɛ̄l mbo̍ lɔ̄l vɛ̄lɛ̄ lo̍ŋ pa̍a̍le̍ le̍ŋ.

⁸I̍dīi̍yo̍ pu̍u̍ŋ o̍ pāa̍le̍ ŋūɛ̍ɛ̍nu̍le̍ŋ chōo̍, mi̍ pōo̍ ō cha᷄ŋ le̍ kɔ᷄ŋnda̍ŋ, kɛ̍ mi̍ fi̍nyāa̍ chūa̍a̍ ō dīmūl ndu̍ vɛ̍lɛ̄ āā, “Lā chu᷄m ndɔ̍ mā bɛ̄ɛ̄ndi̍a̍l nya̍ nyɛ̄ dīa̍a̍ mī lā dē. Ā pāa̍le̍ yɔ̍ŋga᷄ŋnde̍ŋ lā kūɛ̄.” O̍ ko̍ŋ, ma̍ bɛ̄ɛ̄ndīāl vɛ̄lɛ̄ nda̍ nyɛ̄ dīa̍a̍. Ma̍ chāl vɛ̄lɛ̄ lātūlu̍ nda̍ ŋi̍ɔ̍ɔ̍ŋ ma̍ dīā.

⁹O̍ ko̍ŋ, mɛ̄ɛ̍ pōo̍ ho̍ō nda̍ la̍a̍ ndɔ̄ pɔ̍mbɔ̄ɔ̍ a̍ bu̍ɛ̍ī ndɔ̄ɔ̍ ā bɛ̄ɛ̄ndi̍āŋ le̍ mālɔ̄ɔ̍, mi̍ fi̍nyāa̍ chūāāmbɔ̄ɔ̍ dīmūl ndu̍ āā, “Nyūmnda̍ŋ mā chō ni᷅ŋ hūnɔ̄ɔ̄ tōlɔ̄ɔ̍ nu̍a̍ā ni̍. Le̍la̍ŋ, lā ku̍ā lɛ̄ chūɛ̄llɛ̄ŋ te̍. Lā lɔ᷄l ni̍ko̍ na̍nu᷄ŋ mī ŋ̄ chɔ̄ɔ̄lu̍ vɛ̄lɛ̄ yēēmɛ̍i̍ sōlī. Sīɔ̄dīi̍ dīi̍ pu̍u̍ŋ, lā pe̍na̍ lākɔ̄.”

¹⁰Kɛ̍ pōo̍ ndu̍ o̍o̍ ye̍e̍ma̍ lɛ̍ mī ndu̍ o̍o̍ lɔ̍l īchɔ̄l kōŋ lo̍ŋ te̍. O̍ ko̍ŋ, mbo̍ chūā la̍a̍ ndɔ̄ a̍ bu̍ɛ̍ī ndɔ̄ɔ̍, a̍ sōfɛ̍li̍a̍a̍ ndūāā ŋi̍ɔ̍ɔ̍ŋnda̍ mbo̍ bīī kɔ̄la̍ŋ kūmbū Chɛ̍bu̍sī chi̍e̍e̍ wo̍ (ndu̍ yɔ̍nūŋ māā Chūlu̍sɛ̄lɛ̄m ni̍).

¹¹O̍ ko̍ŋ kɔ̍ɔ̍lī, ma̍ fūūlūū Chɛ̍bu̍sī chi̍e̍e̍ i̍kɛ̍i̍. Fūūlūū ndāa̍ ni᷅ŋ ndo̍ŋ, nyūmnda̍ŋ mā wa̍ ni᷅ŋ le̍ tōlɔ̄ɔ̍. O̍ ko̍ŋ, mi̍ po̍ bu̍ɛ̍īyo̍ ō dīmūl māsānɔ̍ ndɔ̄ɔ̍ āā, “Ŋ̄ hi̍a̍u̍nūŋ ndɛ̄ chūɛ̄llɛ̄ŋ te̍. Ŋ̄ lɔ̄lnu᷅ŋ Chɛ̍bu̍sī na̍nu᷄ŋ, sīɔ̄dīi̍ ŋ̄ pēna̍ hīōūwɔ̄ɔ̄.”

¹²Kɛ̍, mi̍ māsānɔ̍ ndɔ̄ɔ̍ ō dīmūl ndu̍ āā, “Sāko̍, Ŋ̄ cho̍ ma̍lɔ̍ o̍ chi̍e̍e̍ īsūmīāl nāa̍ I̍sɔ̄lūɛ̍i̍ya̍a̍ a̍ cho̍ le̍ wa̍ le̍. Ŋ̄ hīōūnu᷅ŋ Ki̍bīāā.

¹³Lā ŋ̄ kīndi̍ ki̍ndi᷅ŋ mī ŋ̄ kɔ̍ lɔ̍lnu᷄ŋ Ki̍bīāā. Tē ko̍ŋ te̍, ŋ̄ lɔ᷄l Lu̍a̍mā.”

¹⁴O̍ ko̍ŋ kɔ̍ɔ̍lī, ma̍ hīāū lāchī a̍ kɔ̄la̍ŋ, ma̍ fūūlūū Ki̍bīāā chi̍e̍e̍, o̍ Būŋgɛ̄ī yu̍ŋgu̍ Bɛ̍ŋnja̍mīŋ nde̍ ni᷄ŋ. Fūūlūū ndāa̍ ni᷅ŋ ndo̍ŋ, pāa̍le̍ŋ le̍e̍ de̍l ni᷅ŋ do̍o̍ŋ.

¹⁵Mɛ̄ɛ̍ nda̍ fūūlu̍u̍ lo̍ŋ, ma̍ sēī le̍ mī nda̍ a̍a̍ lɔ̍l lo̍ŋ īchɔ̄l kōŋ. Ma̍ cha᷄ŋ ma̍ kɔ̍ cha᷅l o̍ lu᷅ŋ, nāa̍ wāŋnda̍ nda̍ a̍a̍ bi̍ī bɔ᷅ŋa᷅ŋndā chi̍o̍o̍ la̍ŋ Kɛ̍ ā, sɔ̄la̍ wa̍nā o̍ wānā mbō yīya̍ nda̍ o̍ ndu̍ lo̍ chi̍ɛ̍ī ni̍ŋ te̍.

¹⁶Mi̍ ī yɔ̄nu᷄ŋ mi̍ fāl pīlɛ̍ ō cha᷄ŋ wa̍llo̍ o̍ chīɛ̄ī ndūɛ̍i̍ ni᷄ŋ i̍chɔ᷅l kōŋ, mbo̍ wā hēlɔ̄ɔ̍ chi̍e̍e̍. Ndu̍yɛ̍, fāllo̍ ho̍ō kɔ̄ɔ̄līma̍ ndūa̍ŋ ma̍ wa̍ ō lɛ̄ŋndē ŋ̄pēmbūle̍ŋ E̍fi̍lūēm ni̍. Kɛ̄, mbo̍ wā īchāli̍ Ki̍bīāā chi̍e̍e̍ o̍ būŋgɛ̄ī yu̍ŋgu̍ Bɛ̍ŋnja̍mīŋ nde̍ ni᷄ŋ chōo̍ wa̍ nda̍ wa̍ īchāli̍ lo̍ŋ ni̍.

¹⁷Mɛ̄ɛ̍ fāllo̍ ho̍ō ō chē pōo̍ ho̍ō nda̍ la̍a̍ ndɔ̄ a̍ bu̍ɛ̍ī ndɔ̄ɔ̍ īchāli̍ nāa̍ nda̍a̍ bi̍ī bɔ᷅ŋa᷅ŋnda̍ŋ nda̍, mbo̍ nyūnā nda̍ āā, “Kūɛ̍ɛ̍nɛ̍ nya̍ chɛ᷄ŋ yɛ̍, ndu̍yɛ̍, kūɛ̍ɛ̍nɛ̍ nya̍ chō yɛ̄ kɔ̄la̍ŋ?”

¹⁸Mi̍ po̍ Li̍va̍īnɔ̍ɔ̍ ho̍ō ō dīmūl ndu̍ āā, “Bɛ̍ti̍lɛ̍hɛ̄m chi̍e̍e̍ o̍ lɛ̄ŋndē Chu̍dāle̍ŋ ni᷄ŋ na̍a̍ ŋ̄ chɛ᷄ŋ ni̍ nāa̍ Tɛ̍ndīi̍ Mɛ̄lɛ̄ka̍ Ya̍a̍wɛ̄ɛ̄ wo̍ ō chō wa̍. Ŋ̄ cho̍ kɔ̄la̍ŋ o̍ lɛ̄ŋndē ŋ̄pēmbūle̍ŋ E̍fi̍lūēm pɔ̍ nāa̍ ya̍ I̍ cho̍ īchāli̍ wa̍. Kɛ̍, ŋ̄ sɔ̄la̍ wa̍nā o̍ wānā mbō yīya̍ na̍a̍ le̍.

¹⁹Ŋ̄ nɔ̄ nyɛ̄ o̍ nyɛ̄ na̍a̍ o̍ bā. Ŋ̄ nɔ̄ bīllo̍ le̍ chɔ̄lūāā nāa̍. Ndu̍yɛ̍ na̍a̍ pi̍la̍ bu̍ɛ̍i̍yāā nūmnda̍ bɛ̍ɛ̍, ya̍ ni̍, la̍a̍ nūu̍ ni̍, a̍ bu̍ɛ̍ī nūu̍, ŋ̄ nɔ̄ bēe̍dīi̍yo̍ a̍ mūɛ̄īya̍ŋ. Ndu̍yɛ̍ ŋ̄ hēu̍ ba̍ le̍ nyā o̍ nyɛ̄ le̍.”

²⁰O̍ ko̍ŋ mi̍ fāllo̍ dīmūl nda̍ āā, “Lā chāā hu̍nɔ̄ɔ̄ o̍ ya̍ lo̍ chi̍ɛ̍ī ni̍ŋ. Nyɛ̄ o̍ nyɛ̄ nya̍ yēēma̍ pɛ̍, I̍ nɔ̍lā mī ke̍ nya̍. Kɛ̍, lā lɔ᷅l o̍ lu᷅ŋ na̍nu᷄ŋ te̍.”

²¹O̍ ko̍ŋ, mi̍ fāllo̍ ho̍ō ō chūā nda̍, mbo̍ kūā a̍ nda̍ o̍ ndu̍ lo̍ chi̍ɛ̍ī ni̍ŋ. Mɛ̄ɛ̍ nda̍ fūūlu̍u̍, mbo̍ kē sōfɛ̍li̍a̍a̍ ndāa̍ nyɛ̄ dīa̍a̍ ma̍ dīā. O̍ ko̍ŋ kɔ̍ɔ̍lī, mbo̍ kē nda̍ mɛ̄ŋnda̍ŋ ma̍ pūlū pēlo᷄ŋ. Mɛ̄ɛ̍ nda̍ chīi̍ pēlo᷄ŋ pūlɔ̄ɔ̍, ma̍ chāl nyɛ̄ dīa̍a̍ dīo̍o̍ a̍ mūɛ̄īya̍ŋ kōlɔ̄ɔ̍.

²²Bōōndi̍i̍ nda̍ wa̍ nyɛ̄ dīa̍a̍ dīo̍o̍ ma̍ wā dīāāmbūlā kɛ̄ndɛ̄ kɛ̍ndɛ̄la̍ŋ nde̍, mi̍ pūa̍a̍ kɔ̄l vēsɛ̍i̍ya̍a̍ bɛ̍ndūāā pūm o̍ chi̍e̍e̍ ko̍ŋ ni᷄ŋ a̍ hi̍nī a̍ chāāŋāā ndāā wa᷅ŋ pīāāndūa̍a̍ wa̍ ā hūŋ o̍ chīɛ̄ī fāllo̍ ho̍ō. Ma̍ hu᷄ŋ ba̍lū chīɛ̄ī ndɔ̄ɔ̍ Si̍lɔ̍, ma̍ wā dīo̍o̍ lɔ̄ɔ̍ kpu᷅ŋ kpūŋ, mā dīmī cho̍o̍ cho̍o̍ āā, “Fāllo̍ ku̍mbi̍ di̍o̍o̍ mā so̍li̍ po̍ hi᷅ŋ chūɛ̄llɛ̄ŋ o̍ nūmndo̍ chi̍ɛ̍ī ni̍ŋ ndo̍ o̍ bɛ̍ɛ̄ na̍nu᷄ŋ mī ŋ̄ wa̍ a̍ ndu̍.”

²³O̍ ko̍ŋ, mi̍ fāllo̍ ho̍ō fūlā o̍ bɛ̍ɛ̄, mbo̍ dīmūl nda̍ āā, “Sāko̍ chāāŋāā nīa̍a̍. Lā to̍sā sūɛ̍i̍ dɛ̍nɛ̍ wɔ̍ɔ̍ŋīī bɛ̄ndūī wāā le̍nde̍ le̍. Mīāl nūu̍ fi̍nyāa̍ ho̍ō ō chō ni̍. Lā to̍sā sūɛ̍i̍ lāsi̍ɔ̍mbu̍i̍ wa̍ā le̍nde̍ a̍ ndu̍ le̍.

²⁴Chūā nūu̍ ō chō na̍nū, ō sīna̍ wɔ̍ bɛ̍ɛ̍ su̍ɛ̍i̍ wānā pɔ̍nɔ̍ le̍. Fi̍nyā kālāa̍ bɛ̍ɛ̍ la̍a̍ ndɔ̄ pɔ̍mbɔ̄ɔ̍ ō chō na̍nū. Tē nda̍ ni̍, I̍ so̍lūl nya̍ mī lā tōsa̍ nyɛ̄ nya̍ yēēma̍ tōsāa̍ a̍ nda̍ wo̍. Kɛ̍, lā to̍sā su̍ɛ̍i̍ lāsi̍ɔ̍mbu̍i̍ wa̍ā le̍nde̍ a̍ fi̍nyāa̍ ho̍ō le̍.”

²⁵Kɛ̍ pūa̍a̍ ā ye᷄ŋ ndu̍ bɛ̍ɛ̍ la̍ni̍ le̍. Mɛ̄ɛ̍ po̍ Li̍va̍īnɔ̍ɔ̍ ō chē le̍nde̍, mbo̍ chūā la̍a̍ ndɔ̄ yɔ̍ŋāa̍ mbo̍ sōlūl nda̍ ndu̍ o̍ bɛ̍ɛ̄. Mi̍ pūa̍a̍ ha̍ā ā kpūwā ndu̍ ma̍ lɔ̄ɔ̄lū hīni̍la̍ŋ a̍ chūa̍a̍ ho̍ō īchɔ̄l kōŋ pi̍i̍ pi̍i̍. Mɛ̄ɛ̍ pāa̍le̍ŋ lē hīŋ le̍ sīɔ̍ɔ̍, ma̍ māl ndu̍ le̍ mbo̍ kūɛ̄.

²⁶A̍ pāa̍le̍ si̍a̍ā le̍ŋ, mi̍ chūa̍a̍ ho̍ō ō kūā o̍ chīɛ̄ī pɔ̍nɔ̍ ndɔ̄ o̍ wa̍ o̍ yīya̍ wo̍ mbo̍ kɔ̍ de᷅l o̍ dīo̍o̍ bɛ̄ŋgu̍. Lo̍ŋ o̍ lo̍ ni᷅ŋ īhīni̍ ni̍ mi̍ pāa̍le̍ŋ lē sīōū sīɔ̄.

²⁷Mɛ̄ɛ̍ pɔ̍nɔ̍ ndɔ̄ o̍ chɛ̍ŋ i̍di̍i̍yo̍ mbo̍ kūmbī dīo̍o̍ le̍ kɔ᷄ŋnda̍ŋ, mbo̍ chā la̍a̍ ndɔ̄ īhīni̍ o̍ dīo̍o̍ bɛ̄ŋgu̍. Ō wa̍ īhīni̍ o̍ dīo̍o̍ bɛ̄ŋgu̍ mbo̍ hāndū bāla̍ŋ o̍ kēe̍dēi̍ chōo̍.

²⁸Mi̍ pɔ̍nɔ̍ ndɔ̄ o̍ di̍mūl ndu̍ āā, “Chɔ̍ŋ ŋ̄ kɔ̄nu᷅ŋ.” Kɛ̍ chūa̍a̍ kpēŋa̍ŋ te̍. O̍ ko̍ŋ mbo̍ chūā ndu̍ mbo̍ hēēlū ndu̍ o̍ sōfɛ̍lɔ̍ɔ̍ chōo̍, ma̍ bīī kɔ̄la̍ŋ nda̍ bu̍ɛ̍ī ndɔ̄ɔ̍.

²⁹Mɛ̄ɛ̍ po̍ Li̍va̍īnɔ̍ɔ̍ ho̍ō ō fūūlu̍u̍ o̍ ndu̍ lo̍ chi̍e̍e̍ mbo̍ lūɛ̄ī o̍ ndu̍ lo̍ chi̍ɛ̍ī ni̍ŋ, mbo̍ chūā mūɛ̍i̍ mbo̍ kīlī kīlī dīāllu᷄ŋ la̍a̍ ndɔ᷄ŋ mbo̍ dīū mu̍ŋ ku̍ndāla̍ŋ tɔ̍ a̍ lā tīɔ̍ɔ̍ŋ. Mbo̍ chūā vīsīŋ ku̍ndālā tɔ̍ a̍ lā tīɔ̍ɔ̍ŋ mu᷅ŋ mbo̍ yɔ̄ŋ mu̍ŋ o̍ yu̍ŋgu̍la̍ tɔ̍ a̍ lā tīɔ̍ɔ̍ŋndā I̍sɔ̄lūɛ̍i̍ya̍ lo̍, yu̍ŋgu̍ o̍ yu̍ŋgu̍ ku̍ndāa̍ ō pīlɛ̍.

³⁰Mɛ̄ɛ̍ wāŋnda̍ I̍sɔ̄lūɛ̄ī a̍ che᷅ nyɛ᷄ yɔ̍nu̍ŋ ndo̍, nda̍ kpo̍u̍ mi̍ kɔ̄ndɔ̄fi̍li̍ bɛ̄ndōo̍ ō bīī nda̍. Ma̍ dīmu̍la᷅ŋ āā, “Kāni̍ bɛ̍ɛ̍ sūɛ̍i̍ kpūndɛ̍i̍ ī wāā nu̍a̍ā ī yɔ̄nu̍ŋ ndɔ̍ I̍sɔ̄lūɛ̄ī le̍. Kāni̍ mi̍ I̍sɔ̄lūɛ̍i̍ya̍ ā fūlā o̍ lɛ̄ŋndē I̍chi̍pīle̍ŋ ni᷄ŋ, ī wāā nu̍a̍ā ī yɔ̄nu̍ŋ ndɔ̍ o̍ lɛ̄ŋnde̍ŋ nde᷅ŋ ni᷄ŋ te̍. Lā ŋ̄ yīya᷄ŋ ndɔ̄ a̍ ndi̍, mī ŋ̄ sūūki̍āŋ a̍ ndi̍ o̍kɔ̄ɔ̄ mī ŋ̄ sīna̍ nyɛ̄ na̍a̍ ŋ̄ chō tōsā wo̍.”