Read Southern Kisi Chɔ̄ɔ̍chi̍a̍a̍ 20 Bible Online

Chɔ̄ɔ̍chi̍a̍a̍ 20 - Southern Kisi bible

Chɔ̄ɔ̍chi̍a̍a̍ 20

¹Mɛ̄ɛ̍ I̍sɔ̄lūɛ̍i̍ya̍ ā tūēī nyɛ̄ yɔ̍nu̍ŋ ndo̍, nda̍ kpo̍u̍, chɔ̍ŋ Da᷅ŋ chi̍e̍e̍ ku̍mbū lūāŋndo̍, mbo̍ kūā Bīɛ̄ɛ̄si̍ɛ̍bā chi̍e̍e̍, ku̍mbū tōūwo̍, a̍ ha̍ā ō būŋgɛ̄ī Ki̍li̍a̍a̍dī ve̍ ni᷄ŋ kpo̍u̍ ba᷅ pāa̍le̍ŋ lē chāŋ ndo̍, ma̍ chūūŋgi̍āŋ di̍ōm pīlɛ̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l Mi̍si̍pā chi̍e̍e̍.

²Māsāa̍ I̍sɔ̄lūɛ̄ī, a̍ wa̍ yu̍ŋgu̍la̍ yɛ̍ yɛ̍la̍ŋ I̍sɔ̄lūɛ̍i̍ chīla̍ŋ nda̍, nda̍ kpo̍u̍ ma̍ chūūŋgi̍āŋ ndo̍ŋ. So̍vɛ̄i̍ya̍ ā bɛ̄ɛ̄ndīa̍ŋ a̍ mɔ̄ɔ̄ŋ nda̍ŋ fāŋndo̍ŋ ma̍ chūūŋgi̍āŋ lo̍ŋ nda̍, ā wa̍ wāa̍la̍ŋ kɛ̄mɔ̄ɔ̍ lē hīɔ̍ɔ̍lu̍ (400,000).

³O̍ ko̍ŋ, mi̍ wāŋnda̍ Bɛ̍ŋnja̍mīŋ a̍ tu̍ɛ̍ī māā I̍sɔ̄lūɛ̍i̍ya̍a̍ tūa̍a̍ kpo̍u̍ a̍ chu̍u̍ŋgi̍āŋ Mi̍si̍pā chi̍e̍e̍. O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ nyu̍na̍ po̍ Li̍va̍īnɔ̍ɔ̍ āā, “Chɔ̍m na̍a̍ mɛ̄ɛ̍ sūɛ̍i̍ kpūndɛ̍ī bɛ̄ndūe̍i̍ he̍ī ī lōōku̍ yɔ̄nɔ᷄ŋ yɛ̍.”

⁴Mi̍ po̍ Li̍va̍īnɔ̍ɔ̍, ō nda̍ dīī ho̍ō la̍a̍ ndɔ̍ wo̍ ō dīmūl nda̍ āā, “Ya̍ ni̍, la̍a̍ nī pɔ̍mbɔ̄ɔ̍ ni̍, mi̍ ŋ̄ cha᷄ŋ mi̍ hūŋ Ki̍bīāā chi̍e̍e̍ o̍ būŋgɛ̄ī Bɛ̍ŋnja̍mīŋ nde̍ ni᷄ŋ le̍ mī ŋ̄ lɔ᷄l lo̍ŋ.

⁵Mɛ̄ɛ̍ na̍a̍ ŋ̄ hīŋ ndo̍ŋ, pūa̍a̍ Ki̍bīāā a̍ ko̍ōndi̍āŋ kpo̍u̍ a̍ nyūmnda̍ŋ ma̍ hu᷄ŋ ba̍lū chīɛ̄ī na̍a̍ ŋ̄ wa̍ o̍ yīya̍ wo̍ le̍ ya̍ dēlɔ̄ɔ̍ chōo̍. Nda̍ a̍a̍ ye̍e̍ma̍ mī nda̍ a̍a̍ di̍ī ya̍. Ma̍ bīī la̍a̍ nūu̍, ma̍ lō hīni̍la̍ŋ a̍ ndu̍ te̍i̍ ma̍ dīī ndu̍.

⁶Le̍ he̍ī ya̍ I̍ chu̍a̍ dīāllūŋ chūa̍a̍ ho̍ō ni̍ mi̍ ki̍lī kīlī mu̍ŋ mi̍ di̍u̍ dīū mu̍ŋ ku̍ndāla̍ŋ tɔ̍ a̍ lā tīɔ̍ɔ̍ŋ mi̍ yɔ᷅ŋ mu̍ŋ o̍ yu̍ŋgu̍la̍ tɔ̍ a̍ lā tīɔ̍ɔ̍ŋ ndā I̍sɔ̄lūɛ̍i̍ya̍ lo̍, yu̍ŋgu̍ o̍ yu̍ŋgu̍, ku̍ndāa̍ ō pīlɛ̍. I̍ to̍sa̍ he̍ī le̍ mī chɔ̍m nya̍ nyɛ̍ yɔ̍nu̍ŋ ndo̍. Kāni̍ fo̍ndōle̍, sūɛ̍i̍ pūa̍a̍ ha̍ā ā tōsa̍ ve̍ ī chō sūɛ̍i̍ wɔ̍ɔ̍ŋīī bɛ̄ndū ndu̍yɛ̍ mi̍ ī wā vɛ̄lɛ̄ sūɛ̍i̍ lāsi̍ɔ̍mbu̍i̍ bɛ̍ndū.

⁷Le̍la̍ŋ, ō fūūlu̍u̍ o̍ nya̍ lo̍, nya̍ wāŋnda̍ I̍sɔ̄lūɛ̄ī kpo̍u̍. Nya̍ nɔ̍ ni̍ mī lā kɛ̄ɛ̄si̍a̍a̍ nyɛ̄ na̍a̍ ŋ̄ nɔ̄ mī ŋ̄ tōsa̍ a̍ sūɛ̍i̍ he̍ī o̍kɔ̄ɔ̄ wo̍ ni̍.”

⁸O̍ ko̍ŋ, mi̍ pūa̍a̍ kpo̍u̍ a̍ cha̍ŋ i̍si̍si̍ ma̍ mūlī āā, “Na̍a̍ cho̍ ha̍ā na̍nu᷄ŋ nda̍ ki̍nɛ̍i̍, wānā pi᷅lɛ̍ bɛ̍ɛ̍ cho̍ mi̍i̍ŋgū o̍ Tɛ̍ndīi̍ ndɔ̄ɔ̍ ni᷄ŋ kɛ̄lɛ̄ŋgāā o̍ ndu̍ lo̍ chi̍ɛ̍ī ni̍ŋ te̍, mɛ̄ɛ̍ mī ŋ̄ tōsa̍ nyɛ̄ a̍ sūɛ̍i̍ he̍ī o̍kɔ̄ɔ̄.

⁹Ŋ̄ nɔ̄ mī kɔ̍ chi᷅ŋa̍la᷅ŋ wa᷅ŋnda̍ Ki̍bīāā a̍ sɔ̍ŋgɔ̄ɔ̍. Kɛ̍ mɛ̄ɛ̍ mī ŋ̄ wūu̍ kōo̍ŋ le̍ mī Mɛ̄lɛ̄ka̍ chɔ᷄m na̍a̍ wānāa̍ nɔ̍ ma̍ kɔ̍ chi᷅ŋa̍la᷅ŋ nda̍ wa̍.

¹⁰Ndu̍yɛ̍, o̍ yu̍ŋgu̍ o̍ yu̍ŋgu̍ cho̍o̍ I̍sɔ̄lūɛ̄ī, tē wāŋnda̍ wa̍ pɛ̍ kɛ̄mɛ̄, ŋ̄ hɛ̄li̍ ŋ̄wāŋ tɔ̍ nda̍ tɛ̄ɛ̄ŋ, tē wāŋnda̍ wa̍ pɛ̍ wa̍a̍ ō pīlɛ̍ ŋ̄ hɛ̄lī wāŋnda̍ kɛ̄mɛ̄, tē wāŋnda̍ wa̍ pɛ̍ wa̍a̍la̍ŋ tɔ̍ ŋ̄ hɛ̄li̍ wāŋnda̍ wāa̍ ō pīlɛ̍. Wānāā na̍a̍ ŋ̄ chō ka̍ŋ hɛ̍lī wa̍ nda̍ cho̍ wā le̍ pūa̍a̍ chɔ̄ūwāa̍ cho̍ wā sɔ̍ŋgɔ̄ɔ̍ wa̍ nyɛ̄ dīa̍a̍ kīo̍o̍ ni̍. O̍ ko̍ŋ kɔ̍ɔ̍lī na̍a̍ tūa̍a̍ ŋ̍ cho̍ lō wa̍ ŋ̄ kūɛ̄ le̍ wāŋnda̍ Ki̍bīāā chīŋa̍la᷅ŋndo̍ o̍ būŋgɛ̄ī Bɛ̍ŋnja̍mīŋ nde̍ ni᷄ŋ, mī ŋ̄ tūsi̍ nda̍ nyɛ̄ pālāa̍ chōo̍, le̍ sūɛ̍i̍ wɔ̍ɔ̍ŋīī bɛ̄ndūīī nda̍ tōsa̍ he̍ī I̍sɔ̄lūɛ̄ī ve̍.”

¹¹O̍ ko̍ŋ pūa̍a̍ I̍sɔ̄lūɛ̄ī kpo̍u̍ ma̍ vēēla᷅ŋ ma̍ chūūŋgi̍āŋ na̍a̍ pi᷅lɛ̍, nda̍ kpo̍u̍ ā wa̍ kɔ̄llo̍ pīlɛ̍ le̍ kɔ̄la̍ŋ chi̍o̍o̍ ho̍ō dēlɔ̄ɔ̍ chōo̍.

¹²O̍ ko̍ŋ kɔ̍ɔ̍lī, mi̍ yu̍ŋgu̍la̍ŋ I̍sɔ̄lūɛ̄ī la̍ yɔ̍ŋ pūa̍a̍ ma̍ bālū o̍ būŋgɛ̄i̍ yu̍ŋgu̍ Bɛ̍ŋnja̍mīŋ nde̍ ni᷄ŋ kpo̍u̍ a̍ yōōŋgōo̍ ma̍ dīmūl yu̍ŋgu̍ Bɛ̍ŋnja̍mīŋ ndo̍ āā, “Lā vɛ᷅ mi̍ sūɛ̍i̍ dɛ̍nɛ̍ bɛ̍ndūīī wāā nu̍a̍ā ī yɔ̄nu᷄ŋ nya̍ tɛ̄ɛ̄ŋ?

¹³Pūa̍a̍ Ki̍bīāā, a̍ to̍sa̍ sūɛ̍i̍ wɔ̍ɔ̍ŋīī bɛ̄ndūī kēŋ nda̍, lā yɔ̄ŋgu̍ nda̍ mī ŋ̄ dīī nda̍. Ko̍ŋ to̍sā ni̍ mī dɛ̍nɛ̍ wɔ̍ɔ̍ŋ bɛ̄ndōo̍ ho̍ō ō kpēēŋa̍ŋ I̍sɔ̄lūɛ̄ī chōo̍.” Kɛ̍, wāŋnda̍ Bɛ̍ŋnja̍mīŋ a̍ ye̍ŋ nda̍ lānī le̍.

¹⁴Mi̍ pūa̍a̍ Bɛ̍ŋnja̍mīŋ, a̍ wa̍ o̍ chi̍e̍e̍ŋ bɛ̍ndūŋ yɛ̍i̍ yɔ̍ŋ nda̍ ā vēēla᷅ŋ kpo̍u̍ le̍ mā bɔ̄ɔ̄ŋi̍āŋ Ki̍bīāā chi̍e̍e̍ le̍ hūnɔ̄ɔ̄ sɔ̍ŋgɔ̄ɔ̍ a̍ I̍sɔ̄lūɛ̍i̍ya̍.

¹⁵Ō lē pīlɛ̍ ni᷄ŋ kpe̍ mi̍ pūa̍a̍ Bɛ̍ŋnja̍mīŋ a̍ chu̍ūŋgi̍āŋ Ki̍bīāā chi̍e̍e̍, wa̍a̍la̍ŋ bi̍di̍i̍ŋ a̍ lā ŋɔ᷄mpu᷅m (26,000), ā nda̍ a̍a̍ sɔ̍ŋgā a̍ mɔ̄ɔ̄ŋ fāŋndo̍ŋ nda̍, hāndɔ̄ɔ̍ o̍ so̍vɛ̄i̍ya̍a̍ kɛ̍mɛ̄ le̍ ŋɔ̍mmɛ̍ūwāa̍ wa̍ ni᷅ŋ ā hɛ̄līāā ma̍ wā Ki̍bīāā chi̍e̍e̍ wa̍ chōo̍.

¹⁶Pūa̍a̍ chɔ̄ūwa̍ Bɛ̍ŋnja̍mīŋ tɛ̍ɛ̄ŋ ki̍nɛ̍i̍, pūa̍a̍ nda̍ a̍a̍ sɔ̍ŋgā sɔ̍ŋgā bɛ̄ndōo̍ a̍ mīāllo̍ŋ mi̍ nda̍ a̍a̍ wa᷅ ni᷅ŋ ā hɛ̄līāā yɛ̍ le̍ sɔ̍ŋgɔ̄ɔ̍ wa̍ ā wa̍ kɛ̄mɔ̄ɔ̍ lē ŋɔ᷄mmɛ̍ū (700). Ndu̍yɛ̍, pūa̍a̍ kɛ̍mɛ̄ le̍ ŋɔ̍mmɛ̍ū wa̍ ha̍ā tɛ̄ndɛ̄lāa̍ pīla̍ nda̍ a̍a̍ tɛ̍ndɛ̄lā ni̍. Ō pīlɛ̍ ndu̍ o̍o̍ chu̍ā pōū fa̍āŋnda̍a̍ mbō tōfa̍ wāŋndo̍ yīīŋnde̍ŋ o̍ lēbōl chi̍ŋ mbō wūu̍, ō bi̍ndū le̍ŋ te̍.

¹⁷Yu̍ŋgu̍la̍ŋ I̍sɔ̄lūɛ̄ī ki̍nɛ̍i̍, ō fūla̍ o̍ yu̍ŋgu̍ Bɛ̍ŋnja̍mīŋ ndo̍ kɔ̄ɔ̄lī, la̍ŋ bɛ̍ɛ̍ mi̍ lā chūūŋgīāā so̍vɛ̄i̍ya̍a̍ ndāa̍, ā nda̍ a̍a̍ sɔ̍ŋgā a̍ mɔ̄ɔ̄ŋ fāŋndo̍ŋ nda̍ wāa̍la̍ŋ kɛ̄mɔ̄ɔ̍ lē hīɔ̍ɔ̍lu̍ (400,000) le̍ sɔ̍ŋgɔ̄ɔ̍ a̍ pūa̍a̍ Bɛ̍ŋnja̍mīŋ.

¹⁸O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ ku̍ā Bɛ̍tɛ̄ɛ̄l, nāa̍ nda̍ a̍a̍ so̍o̍lūū Mɛ̍lɛ̄ka̍ wa̍, le̍ mā nyūna̍ Mɛ̍lɛ̄ka̍ dīōm. Ma̍ nyūnā Mɛ̄lɛ̄ka̍ āā, “Yu̍ŋgu̍ kūɛ̍ɛ̍nɛ̍ nɔ̍ yɛ̄ fɛ̍ɛ̍ŋ mbō kɔ̍ chi᷅ŋa̍la᷅ŋ yu̍ŋgu̍ Bɛ̍ŋnja̍mīŋ a̍ sɔ̍ŋgɔ̄ɔ̍?” Mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl nda̍ āā, “Yu̍ŋgu̍ Chu̍dā wo̍ fɛ̍lɛ̍ŋ nɔ̍ ni̍ mbō kɔ̍ chi᷅ŋa̍la᷅ŋ nda̍.”

¹⁹Mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍, mi̍ wāŋnda̍ I̍sɔ̄lūɛ̄ī a̍ pe̍nā chɔ̄nɔ᷄ŋ, ma̍ kɔ̍ ki̍o̍lū dɔ̍ɔ̍ŋgɔ̍ chɔ̄ūwo̍ Ki̍bīāā i̍kɛ̍i̍.

²⁰O̍ ko̍ŋ kɔ̍ɔ̍lī, ma̍ māl nāa̍ nda̍ wa̍ o̍ dɔ̍ɔ̍ŋgɔ̍ɔ̍ wa̍ ma̍ kūā Ki̍bīāā chi̍e̍e̍ le̍ pūa̍a̍ Bɛ̍ŋnja̍mīŋ chīŋa̍la᷅ŋndo̍ a̍ sɔ̍ŋgɔ̄ɔ̍. Ma̍ sīmī so̍vɛ̄i̍ya̍ o̍ fo̍ndāŋnda̍ŋ kpɛ̍ kpɛ̍.

²¹O̍ ko̍ŋ, mi̍ ku̍u̍ba̍a̍ chɔ̄ūwa̍ Bɛ̍ŋnja̍mīŋ a̍ wa̍ chi̍o̍o̍ māndāa̍ wa̍ ā fūlā ma̍ hu᷄ŋ chi᷅ŋa̍la᷅ŋ I̍sɔ̄lūɛ̍i̍ya̍ a̍ sɔ̍ŋgɔ̄ɔ̍. Ndu̍yɛ̍, ma̍ yām I̍sɔ̄lūɛ̍i̍ya̍. Ma̍ dīū so̍vɛ̄i̍ya̍a̍ I̍sɔ̄lūɛ̍i̍ya̍ wāa̍la̍ŋ bi̍dīi̍ŋ a̍ lā tīɔ̍ɔ̍ŋ (22,000) pāa̍le̍ le̍ŋ.

²²O̍ ko̍ŋ, mi̍ wāŋnda̍ I̍sɔ̄lūɛ̄ī a̍ kūā Bɛ̍tɛ̄ɛ̄l nāa̍ nda̍ a̍a̍ so̍o̍lūū Mɛ̍lɛ̄ka̍ wa̍, ma̍ kɔ̍ cha᷄ŋ chāŋndo̍ pīla̍ Mɛ̍lɛ̄ka̍ Ya̍a̍wɛ̄ɛ̄ lāchī. Chɔ̍ŋ i̍di̍i̍yo̍ ha̍a̍a̍ mi̍ pāa̍le̍ŋ lē dēl do̍ŋ, ā chō chāŋndo̍ Mɛ̄lɛ̄ka̍ lāchī. Ma̍ nyūnā Mɛ̄lɛ̄ka̍ āā, “Bāā ŋ̄ kɔ̍ vɛ̍lɛ̄ mī ŋ̄ kɔ̍ chi᷅ŋa̍la᷅ŋ yu̍ŋgu̍ Bɛ̍ŋnja̍mīŋ a̍ sɔ̍ŋgɔ̄ɔ̍, wānāya᷅ŋ na᷄ŋ?” Mi̍ Mɛ̄lɛ̄ka̍ Ya̍a̍wɛ̄ɛ̄ o̍ mu̍lī nda̍ dīōm āā, “E̍ī, lā kɔ̍ mī lā kɔ̍ chi᷅ŋa̍la᷅ŋ nda̍.” O̍ ko̍ŋ, mi̍ pūa̍a̍ I̍sɔ̄lūɛ̄ī a̍ sɔ̍lā kɔ̄l sīmūlāa̍. Ma̍ kūā vɛ̄lɛ̄ wāŋnda̍ Bɛ̍ŋnja̍mīŋ chīŋa̍la᷅ŋndo̍. Ma̍ kɔ̍ si̍mī vɛ̄lɛ̄ pūa̍a̍ chɔ̄ūwa̍ kpɛ̍ kpɛ̍ o̍ fo̍ndāŋndā pīlɛ̍lā lāŋ kpe̍ māā pāāndū.

²³

²⁴Ma̍ kūā vɛ̄lɛ̄ pūa̍a̍ Bɛ̍ŋnja̍mīŋ chīŋa̍la᷅ŋndo̍ o̍ dīi̍ŋ ndɔ̄ɔ̍.

²⁵Kɛ̍, mi̍ wāŋnda̍ Bɛ̍ŋnja̍mīŋ a̍ ya᷅m vɛ̄lɛ̄ wāŋnda̍ I̍sɔ̄lūɛ̄ī o̍ dīi̍ŋ ndɔ̄ɔ̍. Ma̍ dīū so̍vɛ̄i̍ya̍a̍ I̍sɔ̄lūɛ̍i̍ya̍ ā nda̍ a̍a̍ cha̍ā sɔ̍ŋgɔ̄ɔ̍ a̍ mɔ̄ɔ̄ŋ fāŋndo̍ŋ nda̍ wāa̍la̍ŋ tɔ̍ a̍ lā ŋɔ̄ma̍a̍ (18,000).

²⁶O̍ ko̍ŋ, wāŋnda̍ I̍sɔ̄lūɛ̄ī kpo̍u̍, ma̍ cha᷄ŋ vɛ̄lɛ̄ ma̍ kūā Bɛ̍tɛ̄ɛ̄l chi̍e̍e̍. Ma̍ kɔ̍ cha᷅ŋ cha᷄ŋndo̍ pi̍la̍ Mɛ̍lɛ̄ka̍ Ya̍a̍wɛ̄ɛ̄ lāchī. Chɔ̍ŋ i̍di̍i̍yo̍ ha̍a̍a̍ mi̍ pāa̍le̍ŋ lē dēl le̍nde̍ do̍ŋ, ā mēēnu̍ŋ nyɛ᷅ o̍ nyɛ̄ sōndō le̍, ā wā Mɛ̄lɛ̄ka̍ lāchi̍. Ndu̍yɛ̍ o̍ ko̍ŋ kɔ̍ɔ̍lī, ma̍ sōlī vɛ̄lɛ̄ sa̍lālā kɔ̄l nyūlūla̍ŋ a̍ sa̍lālā lūāmāāla̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍.

²⁷Ndu̍yɛ̍ a̍ te̍le̍ŋ ko̍ŋ, Bɛ̍tɛ̄ɛ̄l chi̍e̍e̍ kɔ̍fū kpe̍ma̍ Mɛ̄lɛ̄ka̍a̍ ō wa̍ ni̍. Fi̍ni̍ha̍a̍sī, po̍ Ɛ̄li̍a̍a̍sā wo̍, ndu̍ yɔ̍nūŋ māā po̍ ma̍ma̍ E̍lɔ̄ŋ ndo̍ ni̍, ndu̍ ndu̍ o̍o̍ so̍lī sa̍lāla̍ŋ kɔ̍fu̍ Mɛ̄lɛ̄ka̍a̍ lāchī a̍ te̍le̍ŋ ko̍ŋ ni̍. Mi̍ wāŋnda̍ I̍sɔ̄lūɛ̄ī a̍ nyu̍nā Mɛ̄lɛ̄ka̍ Ya̍a̍wɛ̄ɛ̄ āā, “Bāā ŋ̄ kɔ̍ vɛ̍lɛ̄ mī ŋ̄ kɔ̍ chi᷅ŋa̍la᷅ŋ yūŋgu̍ Bɛ̍ŋnja̍mīŋ a̍ sɔ̍ŋgɔ̄ɔ̍, wānāya᷅ŋ na᷄ŋ, bāā ŋ̄ ku̍ā le̍?” Mi̍ Mɛ̄lɛ̄ka̍ Ya̍a̍wɛ̄ɛ̄ o̍ mu̍lī nda̍ dīōm āā, “Lā kɔ̍ mī lā kɔ̍ chi᷅ŋa̍la᷅ŋ nda̍ sīɔ̄dīi̍, I̍ cho̍ nya̍ kpāāyāa̍ kē mī lā kɔ̍ yo᷅m nda̍.”

²⁸

²⁹O̍ ko̍ŋ kɔ̍ɔ̍lī, mi̍ I̍sɔ̄lūɛ̍i̍ya̍ a̍ vi̍ām so̍vɛ̄i̍ya̍ ā ti᷄ŋ ma̍ kɔ̍ vi̍ŋī vīŋi᷄ŋ Ki̍bīāā ma̍ bālū ndu̍ si̍lɔ̍.

³⁰Mi̍ wāŋnda̍ I̍sɔ̄lūɛ̄ī a̍ ku̍ā vɛ̄lɛ̄ le̍ wāŋnda̍ Bɛ̍ŋnja̍mīŋ chīŋa̍la᷅ŋndo̍ o̍ yāa̍ ndɔ̄ɔ̍. Ma̍ kɔ̍ si̍mī vɛ̄lɛ̄ so̍vɛ̄i̍ya̍ o̍ fo̍ndāŋnda̍ŋ kpɛ̍ kpɛ̍ māā pāāndū.

³¹Mɛ̄ɛ̍ wāŋnda̍ Bɛ̍ŋnja̍mīŋ a̍ che᷅ I̍sɔ̄lūɛ̍i̍ya̍, ma̍ fūlā, ma̍ kɔ̍ chi᷅ŋa̍la᷅ŋ nda̍ a̍ sɔ̍ŋgɔ̄ɔ̍. Mɛ̄ɛ̍ nda̍ chīŋa̍la᷅ŋ nda̍ mi̍ wāŋnda̍ I̍sɔ̄lūɛ̄ī a̍ to̍sā māā nyāānɔ᷄ŋndo̍ nda̍ wa̍ ni̍. Wāŋnda̍ Bɛ̍ŋnja̍mīŋ lo̍ nda̍ kīlta̍ŋ kɔ̄ɔ̄lī, mi̍ I̍sɔ̄lūɛ̍i̍ya̍ ā fāŋā nda̍ chi̍e̍e̍ ma̍ kūā a̍ nda̍ la̍nda̍ŋ. Mi̍ wāŋnda̍ Bɛ̍ŋnja̍mīŋ a̍ ka̍ndū bɛ̍ɛ̍ I̍sɔ̄lūɛ̍i̍ya̍ dīūwo̍ māā pāāndū. Ma̍ dīū I̍sɔ̄lūɛ̍i̍ya̍ ŋ̄wāŋ be̍le̍-ya̍a̍ o̍ chīɔ̍ɔ̍ŋ ni᷄ŋ o̍ nɛ̄īla̍ bɔ̄ŋa᷅ŋndā tīɔ̍ɔ̍ŋ nda̍ŋ, nɛ̄i̍ ku̍ɛ̄ Bɛ̍tɛ̄ɛ̄l chi̍e̍e̍ wo̍ a̍ nɛ̄i̍ ku̍ɛ̄ Ki̍bīāā chi̍e̍e̍ wo̍.

³²O̍ ko̍ŋ, mi̍ wāŋnda̍ Bɛ̍ŋnja̍mīŋ a̍ di̍mī āā, “Ŋ̄ chīi̍ nda̍ lɛ̄ hāū yo̍mɔ̄ɔ̄ māā pāāndū” Ā sīna̍ nu̍a̍ā māā kāŋgālāa̍ le̍ I̍sɔ̄lūɛ̍i̍ya̍ a̍ wa̍ nda̍ tōsāllo̍ le̍ mā lo̍ nda̍ nānɔ̄ɔ̍ mā fāŋa̍ nda̍ chi̍e̍e̍ ba̍ū mā kūɛ̄ a̍ nda̍ o̍ nɛ̄īla̍ŋ te̍.

³³Mi̍ pūa̍a̍ chɔ̄ūwa̍ I̍sɔ̄lūɛ̄ī, ā kpe̍e̍kpe̍i̍ya̍a̍ ku̍ɛ̄ le̍ wāŋnda̍ Bɛ̍ŋnja̍mīŋ chīŋa̍la᷅ŋndo̍ wa̍ ā nyāānu᷄ŋ ma̍ kūā Bāāl Ta̍māā, ma̍ kɔ̍ di̍i̍ŋnu᷄ŋ ku̍ndāa̍ lo̍ŋ ma̍ bɛ̄ɛ̄ndīa̍ŋ le̍ sɔ̍ŋgɔ̄ɔ̍. O̍ ko̍ŋ kɔ̍ɔ̍lī, mi̍ pūa̍a̍ I̍sɔ̄lūɛ̍i̍ya̍a̍ wa̍ ā vīŋīa̍ŋ Ki̍bīāā i̍kɛ̍i̍ ku̍mbū pāa̍le̍ŋ lē dēl lo̍ wa̍ ā kōma̍ fūlā ma̍kɔ̄ɔ̄ a̍ kīlta̍ŋ, le̍ Ki̍bīāā dēlɔ̄ɔ̍ chōo̍.

³⁴Ndu̍yɛ̍, wānāā nda̍ a̍a̍ cha̍ā sɔ̍ŋgɔ̄ɔ̍ wa̍ nda̍ kpo̍so̍ŋ I̍sɔ̄lūɛ̍i̍ya̍ nda̍ a̍a̍ hɛ̍lī ni̍ ma̍ ā wā ā vīŋīa̍ŋ Ki̍bīāā i̍kɛ̍i̍. Ā wa̍ fa̍ū fa̍ū wāa̍la̍ŋ tɔ̍ (10,000). Mi̍ pūa̍a̍ ha̍ā ā fūlā nāa̍ nda̍ wa᷄ ā vīŋīa̍ŋ nda̍ ma̍ kɔ̍ de᷅l Ki̍bīāā chōo̍. Mi̍ sɔ̍ŋgɔ̄ɔ̍ ō tūūlū tūūlo̍o̍ pīla̍. Wāŋnda̍ Bɛ̍ŋnja̍mīŋ ā sīna̍ nu̍a̍ā māā dɛ̍nɛ̍ pa̍lāā bɛ̄ndōo̍ ō hīŋ nda̍ tōlɔ̄ɔ̄ chōo̍ le̍.

³⁵O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā mi̍ I̍sɔ̄lūɛ̍i̍ya̍ ā dīū pūa̍a̍ Bɛ̍ŋnja̍mīŋ wāa̍la̍ŋ bi̍dīi̍ŋ a̍ lā ŋūɛ̍ɛ̍nu̍ a̍ kɛ̄mɔ̄ɔ̍ lē pīlɛ̍ (25,100). Ndu̍yɛ̍, pūa̍a̍ nda̍ dīu̍ ka̍ŋ nda̍, nda̍ kpo̍u̍ wānāā nda̍ a̍a̍ cha̍ā sɔ̍ŋgɔ̄ɔ̍ a̍ mɔ̄ɔ̄ŋ fāŋndo̍ŋ nda̍ nda̍ wa̍ ni̍.

³⁶O̍ ko̍ŋ, mi̍ wāŋnda̍ Bɛ̍ŋnja̍mīŋ a̍ si̍nā māā I̍sɔ̄lūɛ̍i̍ya̍ ā yēm nda̍. Mɛ̄ɛ̍ nu̍a̍ā I̍sɔ̄lūɛ̄ī ā lōōku̍ wāŋnda̍ Bɛ̍ŋnja̍mīŋ yōmɔ̄ɔ̄ ni̍. Mi̍ I̍sɔ̄lūɛ̍i̍ya̍ tōsā māā nyāānɔ᷄ŋndo̍ nda̍ wa̍ ni̍. Mā lō wāŋnda̍ Bɛ̍ŋnja̍mīŋ nānɔ̄ɔ̍ ha̍a̍a̍ ma̍ fāŋā nda̍ o̍ chi̍o̍o̍ īkɛ̄i̍ ba̍ū. Kāni̍ fo̍ndōle̍, I̍sɔ̄lūɛ̍i̍ya̍ nda̍ a̍a̍ ti̍i̍nda̍ŋ pūa̍a̍ ndāa̍ ā pīli̍a̍a̍ ā wa̍ ā vīŋīa̍ŋ o̍ chi̍o̍o̍ lēkɔ̍ɔ̍lī wa̍.

³⁷O̍ ko̍ŋ, mi̍ pūa̍a̍ wa̍ ā vīŋīa̍ŋ nda̍ ā kōma̍ fu̍lā a̍ kīlta̍ŋ ma̍ hu᷄ŋ de᷅l chi̍o̍o̍ŋ chōo̍. Ndu̍yɛ̍, wānā o̍ wāna̍ wa̍ lo̍ŋ ma̍ dīū nda̍ pa̍ku̍ a̍ mɔ̄ɔ̄ŋ fāŋndo̍ŋ.

³⁸Ndu̍yɛ̍, chɛ̄la᷅ŋndo̍ ō wa̍ pūa̍a̍ I̍sɔ̄lūɛ̄ī a̍ kɔ̍ chi᷅ŋa̍la᷅ŋ chi̍o̍o̍ ma̍ nyāānu᷄ŋ nda̍ tɛ̄ɛ̄ŋ nda̍ pūa̍a̍ wa̍ ā vīŋīa̍ŋ nda̍ māā tē pūa̍a̍ chīŋa̍la᷅ŋ chi̍o̍o̍ mā nyāānu᷄ŋ nda̍ chē pɛ̍ mī ku᷄mnde̍ he᷄l Ki̍bīāā tu̍ū,

³⁹māā nda̍ kpo̍u̍ ā nɔ̄ mā mūlu̍la᷅ŋ pu̍a̍a̍ Bɛ̍ŋnja̍mīŋ a̍ sɔ̍ŋgɔ̄ɔ̍. Mɛ̄ɛ̍ pūa̍a̍ I̍sɔ̍lūɛ̄ī a̍ kɔ̍ chi᷅ŋa̍la᷅ŋ wa᷅ŋnda̍ Bɛ̍ŋnja̍mīŋ, mi̍ wāŋnda̍ Bɛ̍ŋnja̍mīŋ a̍ ka̍ndū nda̍ dīūwo̍ māā pāāndū. Ma̍ dīū I̍sɔ̄lūɛ̍i̍ya̍ ŋ̄wāŋ be̍le̍-ya̍a̍. O̍ ko̍ŋ, mi̍ pūa̍a̍ Bɛ̍ŋnja̍mīŋ a̍ di̍mī āā, “Ŋ̄ chō nda̍ lɛ̄ hāū bɛ̍ŋī māā pāāndū.”

⁴⁰Kɛ̍ mɛ̄ɛ̍ pūa̍a̍ Bɛ̍ŋnja̍mīŋ a̍ to̍fa̍ŋ a̍ mākɔ̄ɔ̍, ma̍ chā ku᷄mnde̍ hēlɔ̄ɔ̍ Ki̍bīāā chi̍e̍e̍ tu̍kpā tūkpā bɛ̄ndū.

⁴¹O̍ ko̍ŋ kɔ̍ɔ̍lī, mi̍ pūa̍a̍ I̍sɔ̄lūɛ̍i̍ya̍a̍ wa̍ kīlta̍ŋ nda̍ ā mūlu̍la᷅ŋ pu̍a̍a̍ Bɛ̍ŋnja̍mīŋ ō kālā ka̍lā a̍ sɔ̍ŋgɔ̄ɔ̍. O̍ ko̍ŋ, mi̍ pūa̍a̍ Bɛ̍ŋnja̍mīŋ ā si̍nā māā kpūndɛ̍ bɛ̄ndōo̍ ō hīŋ le̍ nda̍. Mi̍ sīōōŋīī bɛ̄ndūe̍i̍ ī bīī nda̍.

⁴²Mɛ̄ɛ̍ pūa̍a̍ Bɛ̍ŋnja̍mīŋ a̍ che᷅ le̍nde̍, ma̍ mūli᷄ŋ ki᷅lta̍ŋ kūmbū po̍llo̍. Kɛ̍, ā sɔ̄la̍ fo̍ndā o̍ fo̍ndā mā hɛ̄lu᷄ŋ te̍. I̍sɔ̄lūɛ̍i̍ya̍a̍ ke̍le̍ŋa̍ nda̍ chīŋa̍la᷅ŋdo̍ ā wa̍ nda̍ tōūwɔ̄ɔ̍, mi̍ pūa̍a̍ ko̍ma̍ lo᷅m chi̍o̍o̍ wa̍ nda̍ kīālū nda̍ lāchī. Ma̍ wā nda̍ hūnɔ̄ɔ̍ o̍ ībūŋ a̍ sɔ̍ŋgɔ̄ɔ̍.

⁴³O̍ ko̍ŋ, mi̍ I̍sɔ̄lūɛ̍i̍ya̍a̍ dūāū nda̍ o̍ pi̍ŋndo̍ ni᷄ŋ. Ma̍ dīū nda̍ dīūwo̍ pīla̍. Ā lo̍ kɔ̄la̍ŋ a̍ sɔ̍ŋgɔ̄ɔ̍ a̍ nda̍ ha̍a̍a̍ ma̍ fūūlūū a̍ nda̍ Ki̍bīāā ku̍mbūe̍i̍ pīlɛ̍i̍ bā pāa̍le̍ŋ lē chāŋndo̍. Ko̍ŋ kpo̍u̍ ā chō kɔ̄la̍ŋ a̍ nda̍ dīūwo̍.

⁴⁴Ma̍ dīī pūa̍a̍ Bɛ̍ŋnja̍mīŋ wāa̍la̍ŋ tɔ̍ a̍ lā ŋɔ̄ma̍a̍ (18,000). Ndu̍yɛ̍, so̍vɛ̄i̍ya̍a̍ nda̍ dīu̍ ka̍ŋ nda̍ kpo̍u̍, pūa̍a̍ kɔ̄l sīmūlāa̍ pīla̍ nda̍ wa̍ ni̍.

⁴⁵Mi̍ pūa̍a̍ Bɛ̍ŋnja̍mīŋ ā ti᷄ŋ ā nyāānu᷄ŋ ku̍mbū po̍llo̍ ma̍ kūānu᷄ŋ o̍ pōū bɛ̄ndōo̍ Lu̍i̍mɔ̄ŋ. Kɛ̍ mi̍ pūa̍a̍ I̍sɔ̄lūɛ̄ī a̍ lo᷅ nda̍ tōūwɔ̄ɔ̍ ma̍ dīī nda̍ vɛ̄lɛ̄ wāa̍la̍ŋ lā ŋūɛ̍ɛ̍nu̍ (5,000) o̍ nɛ̄i̍. O̍ ko̍ŋ kɔ̍ɔ̍lī, mi̍ pūa̍a̍ I̍sɔ̄lūɛ̄ī a̍ hi̍a̍ū lāchī a̍ nda̍ kīndɔ̄ɔ̍. Ma̍ lō nda̍ tōūwɔ̄ɔ̍ ha̍a̍a̍ ma̍ fūūlūū a̍ nda̍ Ki̍dɔ̄m chi̍e̍e̍. Ndu̍yɛ̍, ma̍ dīī nda̍ vɛ̄lɛ̄ wāa̍la̍ŋ lā tīɔ̍ɔ̍ŋ (2,000) nɛ̄ī tɛ̍ɛ̄ŋ.

⁴⁶O̍ pāa̍le̍ le̍ŋ chōo̍, pūa̍a̍ Bɛ̍ŋnja̍mīŋ a̍ sɔ̍la̍ pīɔ̍mndo̍ wāa̍la̍ŋ bi̍dīi̍ŋ a̍ lā ŋūɛ̍ɛ̍nu̍ (25,000). Ndu̍yɛ̍, pūa̍a̍ ha̍ā kpo̍u̍, so̍vɛ̄i̍ya̍a̍ kɔ̄l sīmūlāa̍ pīla̍ nda̍ wa̍ ni̍.

⁴⁷Kɛ̍, mi̍ pūa̍a̍ Bɛ̍ŋnja̍mīŋ kɛ̄mɔ̄ɔ̍ lē ŋɔ᷄mpu᷅m (600) a̍ hi̍a̍lu᷄ŋ ma̍ nya̍a̍nu᷄ŋ ku̍mbū po̍llo̍, ma̍ kɔ̍ vi̍o̍ŋnu᷄ŋ o̍ pōūtā bɛ̄ŋnda̍ŋ tɛ̄ɛ̄ŋ Lu̍i̍mɔ̄ŋ. Le̍ pāŋgo̍ŋ ŋ̄ hīɔ̍ɔ̍lu̍ ā wa̍ ā vīāna᷄ŋnda̍ lo̍ŋ.

⁴⁸O̍ ko̍ŋ kɔ̍ɔ̍lī, mi̍ pūa̍a̍ I̍sɔ̍lūɛ̄ī a̍ mi̍i̍ŋgū ā mākɔ̄ɔ̄ ma̍ kɔ̍ chi᷅ŋa̍la᷅ŋ chi̍e̍e̍ŋ wāŋnda̍ Bɛ̍ŋnja̍mīŋ kpo̍u̍. Wānā o̍ wāna̍ wa̍ o̍ chi̍e̍e̍ŋ mu̍ŋ ni᷄ŋ, wānā pɔ̍nɔ̍ ni̍, wānā la̍nɔ̍ ni̍, chūāāmbɔ̄ ni̍, bɛ̄ndū ni̍, a̍ chɔ̄lū o̍ chɔ̄lu̍ wa̍ lo̍ŋ ma̍ dīū nda̍ pa̍ku̍. O̍ ko̍ŋ kɔ̍ɔ̍lī, ma̍ māl chi̍e̍e̍ŋ mu̍ŋ o̍ yīŋ.