Read Southern Kisi Chɔ̄ɔ̍chi̍a̍a̍ 21 Bible Online

Chɔ̄ɔ̍chi̍a̍a̍ 21 - Southern Kisi bible

Chɔ̄ɔ̍chi̍a̍a̍ 21

¹Bōōndi̍i̍ I̍sɔ̄lūɛ̍i̍ya̍ ā bɛ̄ɛ̄ndi̍a̍ŋ le̍ sɔ̍ŋgɔ̄ɔ̍ a̍ yu̍ŋgu̍ Bɛ̍ŋnja̍mīŋ ndo̍ ma̍ chūūŋgi̍āŋ Mi̍si̍pā chi̍e̍e̍ Mɛ̍lɛ̄ka̍ lāchī ve̍, ma̍ chūā būŋgɛ̄i̍ ī kālā ka̍lā Mɛ̄lɛ̄ka̍ o̍ hɔ̄l. Ma̍ dīmī āā, “Na̍a̍ ki̍nɛ̍i̍, wānā o̍ wānā ō nɔ̍ mbō yɔ̄ŋgu̍ chūā ndɔ̄ɔ̍ o̍ nɔ̄ɔ̍ ni᷄ŋ o̍ yu̍ŋgu̍ Bɛ̍ŋnja̍mīŋ ndo̍ chōo̍ le̍.”

²Mɛ̄ɛ̍ sɔ̍ŋgɔ̄ɔ̍ ō chūu̍, mi̍ wāŋnda̍ I̍sɔ̄lūɛ̄ī a̍ ku̍ā Bɛ̍tɛ̄ɛ̄l chi̍e̍e̍ Mɛ̍lɛ̄ka̍ lāchī. Ma̍ kɔ̍ ko̍ŋūl chōo̍ cho̍o̍ kpe̍le̍ŋ Mɛ̍lɛ̄ka̍ lāchī. Ndu̍yɛ̍, ma̍ chāŋ cha᷄ŋndo̍ pīla̍. Chɔ̍ŋ i̍di̍i̍yo̍ ha̍a̍a̍ mi̍ pāa̍le̍ŋ lē dēl do̍o̍ŋ a̍ wa̍ cha᷄ŋndo̍ Mɛ̄lɛ̄ka̍ lāchī.

³Ma̍ dīmī āā, “Ōo̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍, vɛ᷅ mi̍ he̍ī ī yɔ̄nu᷄ŋ I̍sɔ̄lūɛ̄ī? Vɛ᷅ yu̍ŋgo̍o̍ ō pīlɛ̍ ō fāŋa᷅ŋ pa̍a̍le̍ hāūle̍ŋ nde᷅ŋ I̍sɔ̄lūɛ̍i̍ya̍ chōo̍?”

⁴Mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍, ma̍ pēnā ma̍āŋndo̍ tāŋgūl ma̍ sōlī sa̍lālā lūāmāāla̍ŋ a̍ sa̍lālā kɔ̄l nyūlūla̍ŋ o̍ Mɛ̄lɛ̄ka̍ lo̍.

⁵O̍ ko̍ŋ kɔ̍ɔ̍lī, ma̍ nyūūni̍āŋ āā, “O̍ yu̍ŋgu̍la̍ I̍sɔ̄lūɛ̍i̍ya̍ tɛ̄ɛ̄ŋ ki̍nɛ̍i̍, ɔ̍ɔ̄ yu̍ŋgu̍ ndu̍ o̍o̍ lo̍ kūe̍ o̍ chūūŋgi̍āŋ na̍a̍ ŋ̄ chūūŋgi̍āŋ Mi̍si̍pā chi̍e̍e̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l le̍ wo̍?” Ndu̍yɛ̍, mi̍ nda̍ a̍a̍ chu̍ā būŋgɛ̄i̍ ma̍ mēna᷄ŋ po̍ māā, wānā o̍ wānā ndu̍ o̍o̍ lo̍ pɛ̍ le̍ kɔ̄la̍ŋ o̍ chūūŋgi̍āŋ kōŋ Mi̍si̍pā chi̍e̍e̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l, māā wānā ko̍ŋ ō nɔ̄ mbō sɔ̄la̍ pīɔ̍mndo̍.

⁶O̍ ko̍ŋ kɔ̍ɔ̍lī, mi̍ nyīɛ̍ɛ̍ye̍ bīī wāŋnda̍ I̍sɔ̄lūɛ̄ī le̍ nyɛ᷄ yɔ̍nu̍ŋ a̍ chāāŋāā ndāa̍ I̍sɔ̄lūɛ̍i̍ya̍ wo̍, nda̍ yɔ̍nūŋ ni̍ māā yu̍ŋgu̍ Bɛ̍ŋnja̍mīŋndo̍. Ma̍ dīmī āā, “Yu̍ŋgo̍o̍ ō pīlɛ̍ ō fāŋa̍ŋ I̍sɔ̄lūɛ̍i̍ chōo̍ pa̍a̍le̍ hāūle̍ŋ nde̍ŋ.

⁷Vɛ̄ɛ̍nɛ̍ na̍a̍ ŋ̄ chō yɛ̄ lōōkū tōsā le̍ mī pūa̍a̍ o̍ yu̍ŋgu̍ Bɛ̍ŋnja̍mīŋ ndo̍ chōo̍, a̍ lo̍ yōōmū wa̍ ā sɔ̄la̍ lāāndūa̍a̍? Ndu̍yɛ̍, ŋ̄ chīi̍ ni᷅ŋ būŋgɛ̄i̍ chūā Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l mi̍ ŋ̄ mēna᷄ŋ po̍, māā ŋ̄ yɔ̍ŋgū nda̍ chūāā nāa̍ o̍ nɔ̄ ni̍ŋ te̍.”

⁸Mɛ̄ɛ̍ wāŋnda̍ I̍sɔ̄lūɛ̄ī a̍ nyu̍u̍ni̍āŋ nyu̍ūni̍āŋ kōŋ āā, “O̍ yu̍ŋgu̍la̍ I̍sɔ̄lūɛ̍i̍ya̍ tɛ̄ɛ̄ŋ ki̍nɛ̍i̍, ɔ̍ɔ̄ yu̍ŋgu̍ lo̍ le̍ kɔ̄la̍ŋ o̍ chūūŋgi̍āŋ na̍a̍ ŋ̄ chūūŋgi̍āŋ Mi̍si̍pā chi̍e̍e̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l lo̍?” Ma̍ sāālu᷄ŋ māā wāŋnda̍ Cha̍bɛ̍sī chi̍e̍e̍ ki̍nɛ̍i̍ o̍ būŋgɛ̄ī Ki̍li̍a̍a̍dī ve̍ ni᷄ŋ māā nda̍ ku̍e̍ le̍.

⁹Kāni̍ fo̍ndōle̍, mɛ̄ɛ̍ nda̍ chɔ᷄m pūa̍a̍ chɔ̄ūwa̍ a̍ yu̍ŋgu̍la̍ŋ kpɛ̍ kpɛ̍, ma̍ sāālu᷄ŋ māā wāŋnda̍ Cha̍bɛ̍sī chi̍e̍e̍ o̍ būŋgɛ̄ī Ki̍li̍a̍a̍dī ve̍ ni᷄ŋ nda̍ ve̍ lo̍ŋ te̍.

¹⁰O̍ ko̍ŋ, mi̍ I̍sɔ̄lūɛ̍i̍ya̍a̍ di̍i̍ŋ ha̍ā ku̍ndāa̍ wa̍ ā hɛ̄lī pūa̍a̍ chɔ̄ūwa̍ wāa̍la̍ŋ tɔ̍ a̍ lā tīɔ̍ɔ̍ŋ (12,00) ma̍ vīām nda̍ le̍ mā kɔ̍ chi᷅ŋa̍la᷅ŋ wa᷅ŋnda̍ cha̍bɛ̍sī a̍ sɔ̍ŋgɔ̄ɔ̍, o̍ būŋgɛ̄ī Ki̍li̍a̍a̍dī ve̍ ni᷄ŋ. Mɛ̄ɛ̍ nda̍ wa̍ nda̍ vīōmɔ̄ɔ̍, ma̍ dīmūl nda̍ āā, “Wānā o̍ wāna̍ cho̍ Cha̍bɛ̍sī chi̍e̍e̍, wānā pɔ̍nɔ̍ ni̍, wānā la̍nɔ̍ hi̍o̍ū ni᷅ŋ wānā pɔ̍nɔ̍ kɔ̍ɔ̍lī ni̍, chūāāmbɔ̄ pɔ̄mbɔ̄ ni̍, lā kɔ̍ di̍ū nda̍ kpo̍u̍.”

¹¹

¹²O̍ ko̍ŋ, mi̍ pūa̍a̍ kūā, ma̍ kɔ̍ to̍sā mɛ̄ɛ̍ nda̍ dīmu̍l nda̍ yɛ̍. Mɛ̄ɛ̍ nda̍ kūɛ̄, ma̍ sāālu᷄ŋ chu̍a̍ā lāāndūa̍a̍ kɛ̄mɔ̄ɔ̍ lē hīɔ̍ɔ̍lu̍ (400) ā nda̍ a̍a̍ hi̍u̍ wɔ̍ wa̍nā pɔ̍nɔ̍ kɔ̍ɔ̍lī le̍ wa̍. O̍ ko̍ŋ, ma̍ chūā nda̍ kpo̍u̍ ma̍ hūŋ a̍ nda̍ o̍ dɔ̍ɔ̍ŋgɔ̍ I̍sɔ̄lūɛ̍i̍ya̍ ni᷄ŋ Si̍lɔ̄ɔ̄ chi̍e̍e̍ o̍ lɛ̄ŋndē Ke̍nāŋnde̍ŋ ni᷄ŋ.

¹³O̍ ko̍ŋ kɔ̍ɔ̍lī, mi̍ I̍sɔ̄lūɛ̍i̍ya̍a̍ di̍i̍ŋ ha̍ā ku̍ndāa̍ wa̍ ā yɔ̄ŋ dīōmnde̍ŋ nāa̍ pūa̍a̍ Bɛ̍ŋnja̍mīŋ chu̍a̍ ā nda̍ a̍a̍ lo̍ yōōmū ma̍ wā o̍ pōū bɛ̄ndōo̍ Lu̍i̍mɔ̄ŋ nda̍, māā sɔ̍ŋgɔ̄ɔ̍ ō chūū, kɔ̄l nyūlōo̍ ō mīīŋgu̍ nda̍ tɛ̄ɛ̄ŋ.

¹⁴A̍ te̍le̍ŋ ko̍ŋ, mi̍ pūa̍a̍ Bɛ̍ŋnja̍mīŋ a̍ ma᷅l nāa̍ nda̍ wa̍ ka̍ŋ nda̍ ma̍ mīīŋgū o̍ fo̍ndāŋndā ndāla̍ŋ. O̍ ko̍ŋ kɔ̍ɔ̍lī, mi̍ wāŋnda̍ I̍sɔ̍lūɛ̄ī a̍ chu̍ā chūāā lāāndūāā kɛ̄mɛ̄ le̍ hi̍ɔ̍ɔ̍lu̍a̍a̍ Cha̍bɛ̍sī, ā I̍sɔ̄lūɛ̍i̍ya̍ mɛ̄i̍ yōōmū wa̍, ma̍ kē pūa̍a̍ Bɛ̍ŋnja̍mīŋ le̍ mā wa̍ lāāndāā ndā. Kɛ̍ chūāā lāāndūa̍a̍ ha̍ā ā ve̍ le̍tu̍u̍ le̍ nda̍ kpo̍u̍ le̍.

¹⁵Mi̍ nyīɛ̍ɛ̍ye̍ bīī wāŋnda̍ I̍sɔ̍lūɛ̄ī ta̍u̍ le̍ yu̍ŋgu̍ Bɛ̍ŋnja̍mīŋ ndo̍, fo̍ndōle̍, le̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ mi̍ sɔ̍ndɔ̍ɔ̍ lūɛ̄ī yu̍ŋgu̍la̍ŋ I̍sɔ̄lūɛ̄ī tɛ̄ɛ̄ŋ yɛ̍.

¹⁶I̍sɔ̄lūɛ̍i̍ya̍a̍ chu̍u̍ŋgi̍āŋ nda̍, mi̍ wāŋ bɛ̄ndūa̍a̍ wa̍ nda̍ chōo̍ wa̍ ā dīmu̍la᷅ŋ āā, “Vɛ̄ɛ̍nɛ̍ na̍a̍ ŋ̄ chō yɛ̄ lōōkū tōsā mī pūa̍a̍ Bɛ̍ŋnja̍mīŋ ā tūa̍a̍ lo̍ ha̍ā wa̍ ā si̍o̍u̍ lāāndūa̍a̍ sɔ̄lā? Ndu̍yɛ̍, wāŋ lāāndūa̍a̍ o̍ yu̍ŋgu̍ Bɛ̍ŋnja̍mīŋ ndo̍ chōo̍ kpo̍u̍ a̍ chūū o̍ chɔ̄ūwo̍ ni᷄ŋ.

¹⁷Mɛ̄ɛ̍ mī ŋ̄ tōsa̍ mī pūa̍a̍ Bɛ̍ŋnja̍mīŋ ā tūa̍a̍ lo̍ ha̍ā yōōmū wa̍ ā sīo̍u̍ lāāndūa̍a̍ sɔ̄lā, mā vēlū chūāūwa̍ a̍ nda̍. Tē ā sɔ̄la̍ ŋ̍chu̍a̍u̍ le̍, mɛ̄ɛ̍ yu̍ŋgo̍o̍ ō pīlɛ̍ kpu̍lu̍ku̍u̍ o̍ hɛ̍lu᷄ŋ na̍a̍ I̍sɔ̄lūɛ̄ī ni̍.

¹⁸Kɛ̍ ndu̍yɛ̍ vɛ̍lɛ̄, na̍a̍ ki̍nɛ̍i̍ ŋ̄ nɔ̍ mī ŋ̄ ke̍ nda̍ chūāūwāā nāa̍ o̍ lānɔ̄ ni̍ŋ te̍. Kāni̍ fo̍ndōle̍, ŋ̄ mēna̍ŋ po̍ māā wānā o̍ wāna̍ ke̍ nda̍ chūā ndɔ̄ɔ̍ o̍ nɔ̄ɔ̍ ni᷄ŋ pɛ̍, wānā ko̍ŋ sēndi̍o̍o̍ chō ndu̍ chōo̍.”

¹⁹O̍ ko̍ŋ kɔ̍ɔ̍lī, ma̍ yīya᷄ŋ a̍ bɔ̄ŋa᷅ŋ dīāā nyɛ̄ dīāā bɛ̄ndū nda̍ a̍a̍ nɔ̍ le̍ bīyɔ̄ɔ̍ wɔ̄sī kōŋ Si̍lɔ̄ɔ̄ chi̍e̍e̍ le̍ Mɛ̄lɛ̄ka̍ Ya̍a̍wɛ̄ɛ̄ bɛ̄ɛ̄le̍ŋ kīo̍o̍ wo̍ o̍kɔ̄ɔ̄, bɔ̄ŋa᷅ŋ nda̍ a̍a̍ bi̍ī īwɔ̄sī o̍ īwɔ̄sī wo̍. Si̍lɔ̄ɔ̄ yɛ̍, Bɛ̍tɛ̄ɛ̄l i̍kɛ̍i̍ kūmbū lūāŋndo̍ o̍ cho̍ ni̍. Tē wānā wa̍ Le̍bo̍nāā chi̍e̍e̍ pɛ̍, kūmbū tōūwo̍ chi̍o̍o̍ ho̍ō ō chō ni̍. Nɛ̄i̍ chɛ̍ŋ Bɛ̍tɛ̄ɛ̄l chi̍e̍e̍ mbo̍ kūā Si̍ɛ̍kɛ̄m ndo̍, o̍ nɛ̄ī ko̍ŋ bā pāa̍le̍ŋ lē chāŋ ndo̍ chi̍o̍o̍ ho̍ō ō chō ni̍.

²⁰Mɛ̄ɛ̍ bɔ̄ŋa᷅ŋndo̍ ho̍ō ō fūūlu̍u̍, mi̍ wāŋnda̍ I̍sɔ̄lūɛ̄ī a̍ di̍mūl pūa̍a̍ Bɛ̍ŋnja̍mīŋ ā nda̍ a̍a̍ lo̍ le̍ lāāndūa̍a̍ sɔ̄lāa̍ wa̍ āā, “Lā kɔ̍ mī lā kɔ̍ vi̍ŋi᷄ŋ o̍ kpe̍le̍la̍ mākīle̍pīi̍la̍ŋ ni᷄ŋ.

²¹Tē lā vīŋi̍ŋ pɛ̍, lā wa̍ mɛ̄ŋgɛ̄lāa̍. O̍ ko̍ŋ, tē chūāā lāāndūa̍a̍ Si̍lɔ̄ɔ̄ chi̍e̍e̍ a̍ fu̍la̍ le̍ yōla̍ŋ pɛ̍, lā fūla̍ a̍ kīlta̍ŋ nāa̍ nya̍ chō ā vīŋīa̍ŋ nda̍ wānā o̍ wānā hu̍ŋ bi̍ī ō pīlɛ̍ ō kūɛ̄nu᷄ŋ a̍ ndu̍ chi̍e̍e̍ o̍ būŋgɛ̄ī Bɛ̍ŋnja̍mīŋ nde̍ ni᷄ŋ ō kɔ̍ si̍i̍ŋgūū ndu̍ la̍a̍ ndɔ̄.

²²Tē fi̍nyāā ndāa̍, kɛ̄lɛ̄ŋgāā yēmāa̍ nda̍a̍ ā hīŋ pɛ̍ mā hu᷄ŋ dɔ̍ū na̍a̍ lāchī, ŋ̄ chō nda̍ nyɔ̄ɔ̄lū mī ŋ̄ dīmu̍l āā, ‘Yāndi̍i̍ lā ma᷄l nda̍ mā cha᷄l nda̍ nda̍ā. Kāni̍ fo̍ndōle̍, wāŋ lāāndūāā na̍a̍ ŋ̄ sɔ̄la̍ o̍ chɔ̄ūwo̍ ni᷄ŋ le̍ nda̍ wa̍ ā ve̍ le̍tu̍u̍ le̍ nda̍ le̍. Ndu̍yɛ̍, tɔ̍ɔ̍ya̍ŋ o̍ tɔ̍ɔ̍ya̍ŋ ō cho̍ nya̍ chōo̍ le̍ sēndi̍ na̍a̍ ŋ̄ mēna̍ŋ ndo̍ le̍. Kāni̍ fo̍ndōle̍, ō cho̍ nya̍ pi̍la̍ le̍ chu̍a̍ chūāūwāā nyāa̍ mi̍ lā kē nda̍ le̍ cha᷄lle̍ o̍ nɔ̄ɔ̍ ni᷄ŋ te̍.’ ”

²³O̍ ko̍ŋ, mi̍ pūa̍a̍ Bɛ̍ŋnja̍mīŋ a̍ to̍sā mɛ̄ɛ̍ nda̍ dīmu̍l nda̍ yɛ̍. Mɛ̄ɛ̍ chūāā lāāndūa̍a̍ Si̍lɔ̄ɔ̄ a̍ fu̍la̍ yōla̍ŋ, ma̍ fūlā nāa̍ nda̍ wa̍ ā vīŋīa̍ŋ nda̍ mi̍ wānā o̍ wānā hu̍ŋ bi̍ī ō pīlɛ̍ mbo̍ kūānu᷄ŋ a̍ ndu̍ mbo̍ sīīŋgūū ndu̍ la̍a̍ ndɔ̄. O̍ ko̍ŋ kɔ̍ɔ̍lī, ma̍ mīīŋgū o̍ lɛ̄ŋndē ndāle̍ŋ ni᷄ŋ ma̍ kɔ̍ mi̍ŋgī chi̍e̍e̍ŋ nda̍ŋ tāŋgūl ma̍ chālnu᷄ŋ ndo̍ŋ.

²⁴O̍ ko̍ŋ kɔ̍ɔ̍lī, mi̍ I̍sɔ̄lūɛ̍i̍ya̍ ā pīɔ̄l nāa̍ nda̍ wa̍ ā chūūŋgi̍āŋ nda̍, mi̍ wānā o̍ wānā mi̍i̍ŋgū o̍ yu̍ŋgu̍ ndɔ̄ɔ̍ chōo̍ a̍ o̍ ku̍ndā ndɔ̄ɔ̍ chōo̍. Mi̍ wānā o̍ wānā mi̍i̍ŋgū o̍ cha᷄lta̍ ndɔ̄la̍ŋ, o̍ nyɛ̄m ndɔ᷄ŋ chōo̍.

²⁵Ndu̍yɛ̍ a̍ te̍le̍ŋ ko̍ŋ, lɛ̄ŋndē I̍sɔ̄lūɛ̍i̍le̍ŋ le̍e̍ nɔ̍ ma̍sā o̍ māsā bɛ̍ndū le̍. Le̍ he̍ī, nyɛ̄ wānā o̍ wānā, ndu̍ o̍o̍ ye̍e̍mā le̍ tōsāa̍ wo̍ ko̍ni̍ ndu̍ o̍o̍ to̍sā ni̍.