Read Southern Kisi Chɔ̄ɔ̍chi̍a̍a̍ 3 Bible Online

Chɔ̄ɔ̍chi̍a̍a̍ 3 - Southern Kisi bible

Chɔ̄ɔ̍chi̍a̍a̍ 3

¹Mi̍ Mɛ̄lɛ̄ka̍ tōsā mi̍ kāa̍la̍ che᷅le̍ŋ lā pūm lā hīāū lāchī a̍ cha᷄lle̍ o̍ lɛ̄ŋndē Ke̍nāŋnde̍ŋ ni᷄ŋ nda̍ I̍sɔ̄lūɛ̍i̍ya̍ lātūlu̍. Sa̍bū o̍ to̍sa̍ he̍ī yo̍ cho̍ ni̍, māā le̍ mī ndu̍ o̍o̍ to̍fa̍ yu̍ŋgu̍la̍ I̍sɔ̄lūɛ̍i̍la̍ la̍a̍ si̍na̍ a̍ chɔ̄ūwo̍ Ke̍nāŋ o̍kɔ̄ɔ̄ le̍ la̍ŋ.

²Ō tōsa̍ mātōsāā ndi̍ kpe̍e̍kpe̍i̍, le̍ mī ndu̍ o̍o̍ chɔ̍m yu̍ŋgu̍la̍ I̍sɔ̄lūɛ̍i̍la̍ŋ a̍ chɔ̄ūwo̍ o̍kɔ̄ɔ̄, la̍ŋ la̍ yɔ̍nūŋ ni̍ māā I̍sɔ̄lūɛ̍i̍ya̍ chūāā ndāā ma̍māa̍, ā nda̍ a̍a̍ si̍nā wɔ̍ a̍ chɔ̄ū o̍ chɔ̄ū o̍kɔ̄ɔ̄ le̍ wa̍.

³Kāa̍la̍ la̍a̍ lo̍ o̍ lɛ̄ŋnde̍ŋ nde᷅ŋ ni᷄ŋ nda̍ŋ, la̍ŋ la̍ wa̍ la᷅ŋ ni̍. Fīli̍i̍tīāŋnda̍ a̍ māsāa̍ ndāā bɛ̍ndūāā ŋūɛ̍ɛ̍nu̍a̍a̍, a̍ Ke̍na̍na̍i̍tīi̍ya̍ kpo̍u̍, a̍ Sa̍i̍dɔ̄ŋnda̍, a̍ Hi̍va̍i̍tīi̍ya̍, a̍ wa̍ o̍ pēmbūŋ Le̍ba̍nɔ̄ŋndo̍ŋ chōo̍, chɔ̍ŋ a̍ Pēmbīī Bāāl Ha̍mɔ̄ŋnde̍, mbo̍ fūūlūū Lēbō Ha̍ma̍tī di̍ ve̍.

⁴Kāa̍la̍ŋ ndāŋ lā wa̍ māwāā o̍ lɛ̄ŋnde̍ŋ nde᷅ŋ ni᷄ŋ, le̍ mī Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ to̍fa̍ I̍sɔ̄lūɛ̍i̍ya̍ le̍ mbō sīna̍ te̍ nda̍ a̍a̍ tu̍sīŋ ni̍ŋ o̍ dīōm ndɔ̄ɔ̍ bɛ̄ŋgu̍ pɛ̍, ndu̍ yɔ̍nūŋ ni̍ māā nyɛ̄ o̍ dɔ̍ū sīndɛ̄ Mūu̍sē o̍ sōndō mbo̍ dīmūl fi̍nyāā ndāā ma̍māa̍ wo̍.

⁵O̍ ko̍ŋ, mi̍ wāŋnda̍ I̍sɔ̄lūɛ̄ī a̍ hi̍a̍ū lāchī a̍ cha᷄lle̍ Ke̍na̍na̍i̍tīi̍ya̍ tɛ̄ɛ̄ŋ, a̍ Hi̍ta̍i̍tīi̍ya̍, a̍ A̍mɔ̍lu̍a̍i̍tīi̍ya̍, a̍ Pɛ̄lu̍i̍sa̍i̍tīi̍ya̍ a̍ Hi̍va̍i̍tīi̍ya̍ o̍ ko̍ŋ kɔ̍ɔ̍lī, a̍ Chɛ̄bu̍sa̍i̍tīi̍ya̍.

⁶Ndu̍yɛ̍ mi̍ wāŋnda̍ I̍sɔ̄lūɛ̄ī a̍ so̍lī Mɛ̄lɛ̄ka̍ dīōm, ma̍ kēna᷅ŋ la̍a̍ndūa̍a̍ nda̍ wāŋnda̍ ha̍ā, ndu̍yɛ̍ o̍ ko̍ŋ kɔ̍ɔ̍lī, mɛ̄lɛ̄ka̍ā wāŋnda̍ ha̍ā ā sōōlūū wa̍, nda̍ bɛ̍ɛ̍ ma̍ mūli᷄ŋ mɛ̍lɛ̄ka̍ā kāŋ sōōlūūwo̍.

⁷Mi̍ wāŋnda̍ I̍sɔ̄lūɛ̄ī a̍ to̍sā nyɛ̍ bɛ̍nda̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l te̍ wo̍. Ma̍ pūɛ̄ɛ̄nu᷄ŋ a̍ Mɛ̄lɛ̄ka̍ Ya̍a̍wɛ̄ɛ̄ o̍kɔ̄ɔ̄, o̍ cho̍ Mɛ̄lɛ̄ka̍ ndāa̍ wo̍, ma̍ mūli᷄ŋ mɛ̍lɛ̄ka̍ā yɛ̍ yi̍a̍a̍ sāāŋgīāllo̍, Bāāl nda̍ A̍si̍ɛ̍lūā.

⁸O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ a̍ nda̍ o̍ ka̍lā ka̍lā. Le̍ he̍ī, mbo̍ tōsā, mi̍ Māsāa̍ Kūsīāŋ Lu̍i̍si̍a̍tīm o̍ wa̍ o̍ lɛ̄ŋndē Mɛ̄sōpōte̍e̍mīāā le̍ŋ ni᷄ŋ ndo̍, ō hu᷄ŋ de᷅l nda̍ chōo̍ a̍ sɔ̍ŋgɔ̄ɔ̍, ndu̍yɛ̍ mbo̍ yām nda̍. Mi̍ I̍sɔ̄lūɛ̍i̍ya̍ ā wā ni̍ko̍ ndu̍ o̍ bā bɛ̄ŋgu̍. Le̍ wɔ̄sīla̍ŋ lā ŋɔ̄ma̍a̍ I̍sɔ̄lūɛ̍i̍ya̍ ā wa̍ ndu̍ o̍ bā bɛ̄ŋgu̍.

⁹O̍ ko̍ŋ, mi̍ wāŋnda̍ I̍sɔ̄lūɛ̄ī a̍ cha᷅ŋ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ le̍ mālāa̍. Mi̍ Mɛ̄lɛ̄ka̍ lō o̍ ko̍ŋ, mbo̍ hɛ̄lī po̍ pi᷅lɛ̍ dīōla̍ŋ āā O̍ti̍nīɛ̄l, po̍ Ke̍na̍sī wo̍, pɔ̄mbɔ̄ɔ̍ Ke̍lɛ̍bī, mbo̍ hāndū ndu̍ I̍sɔ̄lūɛ̍i̍ya̍ chīla̍ŋ. O̍ti̍nīɛ̄l ko̍ŋ ndu̍ ba̍ŋa̍ I̍sɔ̄lūɛ̍i̍ya̍ māsāa̍ ho̍ō o̍ bā ni̍.

¹⁰Ō wa̍ a̍ te̍le̍ŋ pi᷅lɛ̍, mi̍ nyi̍na̍ Mɛ̄lɛ̄ka̍ Ya̍a̍wɛ̄ɛ̄ wo̍ ō tūāl O̍ti̍nīɛ̄l kɔ̄ɔ̄lī. O̍ ko̍ŋ, mi̍ O̍ti̍nīɛ̄l o̍ si̍mnu᷄ŋ wa̍nā ba̍nāa̍ I̍sɔ̄lūɛ̍i̍ya̍ kpo̍u̍ chōo̍. Mi̍ O̍ti̍nīɛ̄l o̍ si᷅m I̍sɔ̄lūɛ̍i̍ya̍ lāchī, ma̍ kɔ̍ chi᷅ŋa̍la᷅ŋ Ma̍sāa̍ Kūsīāŋ Lu̍i̍si̍a̍tīm, o̍ wa̍ Mɛ̄sōpōte̍e̍mīāā wo̍ a̍ sɔ̍ŋgɔ̄ɔ̍. Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ O̍ti̍nīɛ̄l kpāāyāa̍ mbo̍ yām māsāa̍ ho̍ō, mbo̍ tōsā mi̍ I̍sɔ̄lūɛ̍i̍ya̍ fūlā ndu̍ o̍ bā bɛ̄ŋgu̍.

¹¹O̍ ko̍ŋ, mi̍ kɔ̄l nyūlōo̍ ō mīīŋgū I̍sɔ̄lūɛ̄ī. Le̍ wɔ̄sīla̍ŋ be̍le̍-hi̍ɔ̍ɔ̍lu̍, kɔ̄l nyūlōo̍ wa̍ I̍sɔ̄lūɛ̄ī. O̍ ko̍ŋ kɔ̍ɔ̍lī, mi̍ O̍ti̍nīɛ̄l po̍ Ke̍na̍sī wo̍ ō wū.

¹²O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ to̍sā vɛ̄lɛ̄ nyɛ̍ bɛ̍nda̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l te̍ wo̍. O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā mi̍ Māsāa̍ Ɛ̍ki̍lɔ̄ŋ, o̍ wa̍ Mo̍wa̍bī wo̍ ō hu᷄ŋ yo᷅m I̍sɔ̄lūɛ̍i̍ya̍ a̍ sɔ̍ŋgɔ̄ɔ̍, mi̍ I̍sɔ̄lūɛ̍i̍ya̍ ā wā ndu̍ ni᷅ŋ o̍ bā bɛ̄ŋgu̍.

¹³Ō wa̍ a̍ te̍le̍ŋ pi᷅lɛ̍, mi̍ Māsāa̍ Ɛ̍ki̍lɔ̄ŋ o̍ chu̍u̍ŋgīāā A̍mɔ᷅na̍i̍tīi̍ya̍, a̍ Āma̍la̍kāi̍tīi̍ya̍ nāa̍ pi᷅lɛ̍, mbo̍ kɔ̍ chi᷅ŋa̍la᷅ŋ I̍sɔ̄lūɛ̍i̍ya̍ a̍ sɔ̍ŋgɔ̄ɔ̍. Ndu̍yɛ̍ mbo̍ yām I̍sɔ̄lūɛ̍i̍ya̍, mbo̍ bīī chi̍e̍e̍ ndā bɛ̍ndōo̍ Chɛ̄lu̍i̍kō, chi̍e̍e̍ māwāūwo̍.

¹⁴Le̍ wɔ̄sīla̍ŋ tɔ̍ a̍ lā ŋɔ̄ma̍a̍ I̍sɔ̄lūɛ̍i̍ya̍ wa̍ Māsāa̍ Ɛ̍ki̍lɔ̄ŋ o̍ bā bɛ̄ŋgu̍, māsāa̍ le̍ Mo̍wa̍bī, mā sāāŋgīāl ndu̍.

¹⁵O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ cha᷅ŋ vɛ̄lɛ̄ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ le̍ mālāa̍. Mi̍ Mɛ̄lɛ̄ka̍ Ya̍a̍wɛ̄ɛ̄ lo᷅ o̍ ko̍ŋ, mbo̍ hɛ̄lī po̍ pi᷅lɛ̍ dīōla̍ŋ āā I̍hu̍dī, po̍ Kɛ̍lūā wo̍, fūlāa̍ o̍ yu̍ŋgu̍ Bɛ̍ŋnja̍mīŋ ndo̍ chōo̍, mbo̍ hāndū ndu̍ I̍sɔ̄lūɛ̍i̍ya̍ chīla̍ŋ le̍ mbō bāŋa̍ nda̍. Ndu̍yɛ̍ I̍hu̍dī yɛ̍, wāna̍ īmīāllo̍ o̍ wa̍ ni̍. Ō wa̍ a̍ te̍le̍ŋ pi᷅lɛ̍ mi̍ wāŋnda̍ I̍sɔ̄lūɛ̄ī a̍ vi̍ām I̍hu̍dī a̍ pāāwā nda̍ lēlɛ̄ŋ ndo̍ nāa̍ Māsāa̍ Ɛ̍ki̍lɔ̄ŋ chu̍a̍, o̍ wa̍ Mo̍wa̍bī wo̍.

¹⁶Ndu̍yɛ̍ I̍hu̍dī ndu̍ o̍o̍ chɔ̍ū mūɛ̄ī fāŋīī pīlɛ̍, sōndōla̍ŋ lā tīɔ̍ɔ̍ŋ ndi̍ i̍i̍ nɔ̍ ni̍. Mūɛ̍i̍ he̍ī ī wa̍ bānde̍i̍ le̍ nɛ̄īyo̍ lēpīlɛ̍ a̍ tɛ̄ndāa̍ tɛ̄ɛ̄ŋ. Mi̍ I̍hu̍dī o̍ chu̍ā mūɛ̄ī ndūɛ̍i̍ he̍ī, mbo̍ sāāyīa̍ŋ ndi̍ o̍ bā ndɔ̄ kɛ̍ndɔ̄ɔ̍ chōo̍ o̍ dōmāa̍ bɛ̄ŋgu̍.

¹⁷O̍ ko̍ŋ kɔ̍ɔ̍lī, mbo̍ chūā pāāwā lēlɛ̄ŋ nda̍ vēm ndu̍ a̍ ndu̍ wo̍, mbo̍ kūā a̍ ndu̍ nāa̍ Māsāa̍ Ɛ̍ki̍lɔ̄ŋ chu̍a̍. Ɛ̍ki̍lɔ̄ŋ yɛ̍, chēlu̍llo̍ pīla̍ ndu̍ o̍o̍ che̍lu̍l ni̍.

¹⁸Mɛ̄ɛ̍ I̍hu̍dī o̍ chi̍i̍ pāāwāa̍ yɔ̄ŋgu̍ ma̍ bīī mīīŋgōo̍ nda̍ wānāa̍ li̍i̍la̍ ndu̍ a̍ pāāwāa̍ wa̍, mɛ̄ɛ̍ nda̍ fūūlu̍u̍ Ki̍lkāl i̍kɛ̍i̍ nāa̍ nda̍ sɛ̄l pōūta̍ŋ nda̍, mbo̍ dīmūl wānāa̍ li̍i̍la̍ ndu̍ a̍ pāāwāa̍ wa̍ le̍ mā kūɛ̄ pɔ̍ɔ̍ lāchī. O̍ ko̍ŋ kɔ̍ɔ̍lī, mbo̍ mīīŋgū chi̍e̍e̍ nāa̍ Māsāa̍ Ɛ̍ki̍lɔ̄ŋ chu̍a̍. Mbo̍ kɔ̍ di̍mūl Māsāa̍ Ɛ̍ki̍lɔ̄ŋ āā, “Fāllo̍, I̍ nɔ̍ yōōŋgōo̍ le̍ nu̍m, kɛ̍ na̍a̍ ŋi̍ɔ̍ɔ̍ŋ kpe̍.” O̍ ko̍ŋ, mi̍ Māsāa̍ Ɛ̍ki̍lɔ̄ŋ o̍ di̍mūl bu̍ɛ̍i̍ya̍a̍ ndūa̍a̍ āā, “Lā mēi̍ yɔ̍,” o̍ ko̍ŋ kɔ̍ɔ̍lī mbo̍ dīmūl nda̍, nda̍ kpo̍u̍ ma̍ fūlā.

¹⁹

²⁰Māsāa̍ Ɛ̍ki̍lɔ̄ŋ o̍ wa̍ īchāli̍ o̍ chīɛ̄īyo̍ lēchōo̍ o̍ fo̍ndā chālāā nda̍ bɛ̄ɛ̄ndi̍a̍a̍ le̍ te̍le̍ŋ hāŋgu̍llo̍ wo̍. Bu̍ɛ̍i̍ya̍a̍ wa̍ a̍ ndu̍ la̍tu̍lu̍ lo̍ŋ nda̍ kpo̍u̍, ma̍ fūlā mbo̍ lō lo̍ŋ ndu̍ pīlɛ̍ kpe̍e̍le̍. Mi̍ I̍hu̍dī sɔ̍ɔ̍ŋgūū ndu̍ īkɛ̄i̍ nāa̍ o̍ wa̍ īchāli̍ wa̍. Mbo̍ dīmūl ndu̍ āā, “Mɛ̄lɛ̄ka̍ ke̍ ya̍ yōōŋgōo̍ le̍ nūm.” Tūēīyɔ̄ɔ̄ kōŋ mi̍ I̍hu̍dī o̍ di̍mūl ndu̍ le̍nde̍, mi̍ Māsāa̍ Ɛ̍ki̍lɔ̄ŋ o̍ cha̍ŋ o̍ kpe̍ŋgbe̍i̍ ndɔ̄ɔ̍ chōo̍ nya̍ mbo̍ sīm.

²¹O̍ ko̍ŋ, mi̍ I̍hu̍dī o̍ wo̍ū bā ndɔ̄ mi̍āllo̍ sɔ̍ɔ̍ o̍ dōmāa̍ bɛ̄ŋgu̍, mbo̍ nāŋ mūɛ̍i̍ wa̍ ndu̍ o̍ chāŋ o̍ bā kɛ̄ndɔ̄ɔ̍ chōo̍ ve̍, mbo̍ chūkū Māsāa̍ Ɛ̍ki̍lɔ̄ŋ dēmbōo̍ a̍ ndi̍.

²²Mūɛ̍i̍ kpo̍u̍ mi̍ ī lūɛ̄īnu᷄ŋ ndu̍ ni᷄ŋ a̍ pīa̍u̍wo̍ lātūlu̍, mi̍ ī fūlā ndu̍ o̍ kɔ̄ɔ̄. Chūkɔ̄ɔ̄ kōŋ ndu̍ a̍ ndi̍ mi̍ pūlo̍ŋ hūlu᷄ŋ. Mi̍ I̍hu̍dī o̍ ma᷅l ndu̍ le̍nde̍ yɛ̍lɛ̍ŋ, mūɛ̄ī kēŋ bɛ̍ɛ̍ ō sōli̍ le̍. Mi̍ chūɛ̄īma̍ wa̍ ndu̍ fūlāa̍ ni᷄ŋ nda̍ŋ mā kūmbū mūɛ̍i̍ kpo̍u̍.

²³O̍ ko̍ŋ kɔ̍ɔ̍lī, mi̍ I̍hu̍dī o̍ mɛ̍ī ndu̍ īhīni̍ lo̍ŋ, mbo̍ fūla᷄ŋ to̍ŋgōo̍ ni᷄ŋ. Mbo̍ kīīndīāā ndu̍ dīōla̍ŋ kɔ̄ɔ̄lī, mbo̍ bēŋī la̍ŋ kpa̍ŋ kpa̍ŋ,

²⁴mbo̍ kūānu᷄ŋ. Mɛ̄ɛ̍ te̍le̍ŋ ti̍ŋ hīo̍u̍, mi̍ bu̍ɛ̍i̍ya̍a̍ to̍sā wa̍llo̍ o̍ māsāa̍ lo̍ chi̍ɛ̍ī ni̍ŋ nda̍ ā hūŋ, ā kōma̍l dīōla̍ŋ kpo̍u̍ la̍ be̍ŋī bēŋīāā. O̍ ko̍ŋ, ma̍ yīya᷄ŋ māā hīōūwɔ̄ɔ̍ ndu̍ o̍o̍ ku̍ɛ̄ o̍ chīɛ̄ī kɔ̄ɔ̄lī ni̍.

²⁵Kɛ̍ mɛ̄ɛ̍ nda̍ chu᷄m te̍i̍, ā chi᷅ lɛ̍ mī māsāa̍ ō kūmbi̍ dīōla̍ŋ te̍, nda̍ bɛ̍ɛ̍ ā hīu̍ lɛ̍ lāchī a̍ bīūwɔ᷄ŋndo̍ le̍. Ma̍ chūā ki̍īyo̍ŋ ma̍ kūūmbūū dīōla̍ŋ. Mɛ̄ɛ̍ nda̍ kūūmbu̍u̍ dīōla̍ŋ, ma̍ sāālu᷄ŋ ma̍sāa̍ īhīni̍ lɛ᷅ŋ ō vīlɛ̍i̍yo̍.

²⁶Chūm nda̍ wa̍ ni᷅ŋ ko̍ŋ ndo̍ kpo̍u̍, I̍hu̍dī ndu̍ o̍o̍ ku̍ɛ̍ŋnu᷄ŋ ni᷅ŋ. Dīmīo̍o̍ nu̍a̍ā mbo̍ dīī ndu̍, mbo̍ fūla᷄ŋ mbo̍ kēēku᷄ŋ a̍ fo̍ndāŋ nda̍ sɛ̄l pōūta̍ŋ māā lāpīɔ̄m ndo̍, mbo̍ nyāānu᷄ŋ Sɛ̍i̍lūā chi̍e̍e̍.

²⁷Mɛ̄ɛ̍ o̍ fu̍u̍lu̍u̍ lo̍ŋ, mbo̍ hūāŋ bu̍lu̍ chɔ̄ūwo̍, le̍ mbō dīmu̍l pūa̍a̍ chɔ̄ūwa̍ o̍ lɛ̄ŋndē ŋ̄pēmbūle̍ŋ E̍fi̍lūēm kpo̍u̍ mā bɛ̄ɛ̄ndi̍a̍a̍ le̍ sɔ̍ŋgɔ̄ɔ̍. Mbo̍ sīm nda̍ lāchī, ma̍ cha᷄ŋ nāa̍ nda̍ wa̍ o̍ pēmbo᷄ŋ chōo̍ wa̍, ma̍ kūā le̍ sɔ̍ŋgɔ̄ɔ̍ a̍ wāŋnda̍ Mo̍wa̍bī.

²⁸Mi̍ I̍hu̍dī o̍ dīmūl pūa̍a̍ I̍sɔ̄lūɛ̍i̍ āā, “Lā to᷄l la̍ kɔ̄ɔ̄lī. Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ wāŋnda̍ Mo̍wa̍bī yōmɔ̄ɔ̄, ya̍a̍mɔ̍ɔ̍wa̍a̍ nyāa̍.” Ma̍ tūāl nāa̍ nda̍ wa̍ o̍ pēmbo᷄ŋ chōo̍ wa̍. Nda̍ kpo̍u̍ ma̍ tūāl I̍hu̍dī kɔ̄ɔ̄lī le̍ kɔ̄la̍ŋ sɔ̍ŋgɔ̄ɔ̍ a̍ wāŋnda̍ Mo̍wa̍bī. Ma̍ kɔ̍ bi̍ī fo̍ndā wāŋnda̍ Mo̍wa̍bī nda̍ a̍a̍ nɔ̍ mī nda̍ a̍a̍ ta̍ŋ Chɔ̍ɔ̍dāŋ nda̍ŋ mā nyāānu̍ŋ ndo̍. Ndu̍yɛ̍ pūa̍a̍ ku̍ɛ̄ le̍ tāŋɔ̄ɔ̍ wa̍ ki̍nɛ̍i̍, I̍sɔ̄lūɛ̍i̍ya̍ ā me᷄l o̍ pi᷅lɛ̍ bɛ̍ɛ̍ mbō ta᷄ŋ te̍.

²⁹Wāŋnda̍ Mo̍wa̍bī, so̍vɛ̄i̍ya̍a̍ ndāa̍ kpāāyāā bɛ̍ndūa̍a̍ sɔ̍ŋgā sɔ̍ŋgā bɛ̄ndōo̍ wa̍ wāa̍la̍ŋ tɔ̍ (10,000), mi̍ I̍sɔ̄lūɛ̍i̍ya̍ ā dīū nda̍ kpo̍u̍ pa̍a̍le̍ le̍ŋ, ō pīlɛ̍ bɛ̍ɛ̍ o̍ he̍lu̍ŋ te̍.

³⁰O̍ ko̍ŋ, mi̍ I̍sɔ̄lūɛ̍i̍ya̍ yām wāŋnda̍ Mo̍wa̍bī pāa̍le̍ le̍ŋ, mi̍ nda̍ mīīŋgū I̍sɔ̄lūɛ̍i̍ya̍ o̍ bā bɛ̄ŋgu̍. O̍ ko̍ŋ kɔ̍ɔ̍lī, mi̍ kɔ̄l nyūlōo̍ mīīŋgu̍ vɛ̄lɛ̄ I̍sɔ̄lūɛ̄ī. Le̍ wɔ̄sīla̍ŋ be̍le̍-ŋɔ̍ma̍a̍ (80) kɔ̄l nyūlōo̍ wa̍ o̍ lɛ̄ŋnde̍ŋ ni᷄ŋ.

³¹Mɛ̄ɛ̍ I̍hu̍dī o̍ wa̍ I̍sɔ̄lūɛ̍i̍ya̍ chīla̍ŋndo̍ ō fāŋa̍ŋ, mi̍ Si̍a̍mi̍kā po̍ A̍na̍tī wo̍ ō mīīŋgū o̍ fōōfo̍ ndɔ̄ɔ̍. Ndu̍yɛ̍ ndu̍ bɛ̍ɛ̍ mbo̍ bāŋā I̍sɔ̄lūɛ̍i̍ya̍ ya̍a̍mɔ̍ɔ̍wa̍a̍ ndāa̍ o̍ bā. Mbo̍ sɔ̄ŋgā a̍ Fīli̍i̍tīāŋnda̍ a̍ yɔ̄m sɛ̄ɛ̄mbīāā wānā ma̍ndāā lānāūwo̍ ō bīī o̍ bā wo̍, mbo̍ dīū nda̍ kɛ̄mɔ̄ɔ̍ lē ŋɔ᷄mpu᷅m (600).