Read Southern Kisi Chɔ̄ɔ̍chi̍a̍a̍ 4 Bible Online

Chɔ̄ɔ̍chi̍a̍a̍ 4 - Southern Kisi bible

Chɔ̄ɔ̍chi̍a̍a̍ 4

¹Mɛ̄ɛ̍ I̍hu̍dī, wāna̍ wa̍ I̍sɔ̄lūɛ̍i̍ya̍ chīla̍ŋndo̍ ō vī, mi̍ I̍sɔ̄lūɛ̍i̍ya̍ ā tōsā vɛ̄lɛ̄ nyɛ̍ bɛ̍nda̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l te̍ wo̍.

²O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄, o̍ ma᷅l nda̍ Māsā Bɛ̍ndōo̍ Cha̍bīŋ o̍ bā, māsa̍ Ke̍na̍na̍i̍tīi̍ya̍, o̍ wa̍ īchāli̍ Ha̍sɔ̄ɔ̄ chi̍e̍e̍ wo̍, mbo̍ hu᷄ŋ yo᷅m nda̍. Ndu̍yɛ̍ Māsāa̍ Cha̍bīŋ, wāna̍ wa̍ pūa̍a̍ ndūa̍a̍ chɔ̄ūwa̍ kpo̍u̍ bɔ̍lle̍ŋ ndo̍, dīōlā ndɔ̄la̍ŋ āā, Sīsɛ̍lūā. Sīsɛ̍lūā ko̍ŋ yɛ̍, Hālɔ̄si̍ɛ̍tī Ha̍kɔ̍yīm chi̍e̍e̍ o̍ wa̍ īchāli̍ ni̍.

³Māsāa̍ Cha̍bīŋ ndu̍ o̍o̍ nɔ̍ nyɛ̄lā ŋ̄chīli̍ŋnda̍ su̍a̍a̍ ā nāŋ nda̍ŋ kɛ̄mɔ̄ɔ̍ lē ŋɔ̍ma̍hīɔ̍ɔ̍lu̍ (900) le̍ pūa̍a̍ ndūa̍a̍ chɔ̄ūwa̍. Lɛ̄ŋndē I̍sɔ̄lūɛ̍i̍le̍ŋ kpo̍u̍ ndu̍ o̍ bā bɛ̄ŋgu̍ le̍ wa̍ ni̍. Le̍ wɔ̄sīla̍ŋ bi̍di̍i̍ŋ ō chō I̍sɔ̄lūɛ̍i̍ya̍ nyɛ̄ pālāā bɛ̄ndōo̍ tūsīo̍o̍ cho̍o̍. O̍ ko̍ŋ, mi̍ wāŋnda̍ I̍sɔ̄lūɛ̄ī a̍ cha᷅ŋ vɛ̄lɛ̄ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ le̍ mālāa̍.

⁴Ndu̍yɛ̍, a̍ te̍le̍ŋ ko̍ŋ, Dībo̍o̍lūā, la̍nɔ̍ɔ̍ Lāpi̍dɔ̍tī, ndu̍ wa̍ chɔ̄ɔ̍chi̍nɔ̍ ndu̍ o̍o̍ di̍mī sɔ̍ɔ̍ŋ wāŋnda̍ tɛ̄ɛ̄ŋ I̍sɔ̄lūɛ̄ī wo̍ ni̍. Dībo̍o̍lūā ko̍ŋ yɛ̍, wāna̍ su̍a̍a̍ le̍ Mɛ̄lɛ̄ka̍ wo̍ o̍ wa̍ vɛ̄lɛ̄ ni̍.

⁵Wāū pīlɛ̍ wa̍ Lu̍a̍mā tɛ̍ɛ̄ŋ a̍ Bɛ̍tɛ̄ɛ̄l, o̍ lɛ̄ŋndē ŋ̄pēmbūle̍ŋ E̍fi̍lūēm, lēbɛ̄ŋgu̍ ndu̍ o̍o̍ cha᷅l sɔ̍ɔ̍ŋ dīmīo̍o̍ wāŋnda̍ tɛ̄ɛ̄ŋ ni̍. Lo̍ŋ I̍sɔ̄lūɛ̍i̍ya̍ nda̍ a̍a̍ hu᷅ŋ a̍ sɔ̄ɔ̍ŋ nda᷄ŋ le̍ dīmīo̍o̍ ni̍.

⁶Pāa̍le̍ pi᷅lɛ̍, mi̍ Dībo̍o̍lūā o̍ yo̍o̍ŋgū Ba̍lu̍a̍kī, po̍ Ābīno̍wām ndo̍, wānā wa̍ā Kɛ̍dɛ̍sī chi̍e̍e̍, o̍ lɛ̄ŋndē Nāfi̍ta̍līīle̍ŋ ni᷄ŋ. Mbo̍ dīmūl Ba̍lu̍a̍kī āā, “Nyɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ ō dīmi̍ a̍ nūm o̍kɔ̄ɔ̄ wo̍ cho̍ ho̍ō ni̍, ō dīmi̍ āā, ‘Kɔ̍, mā kɔ̍ hɛ̍lī pūa̍a̍ chɔ̄ūwa̍ wāa̍la̍ŋ tɔ̍ o̍ yu̍ŋgu̍ Nāfi̍ta̍līīyo̍ chōo̍, a̍ yu̍ŋgu̍ Sɛ̍bu̍lɔ̄ŋ ndo̍, mā si̍m nda̍ lāchī mā kūɛ̄ a̍ nda̍ o̍ Pēmbīī Ta̍bɔ̄ɔ̄ve̍ chōo̍.

⁷I̍ cho̍ tōsā mī Sīsɛ̍lūā, wāna̍ cho̍ so̍vɛ̄i̍ya̍a̍ Cha̍bīŋ nda̍ bōlle̍ŋ ndo̍, ō chūa̍ nyɛ̄lā ndɔ̄la̍ nya̍a̍na᷄ŋnda̍ chɔ̄ūlā su̍a̍a̍ ā nāŋ nda̍ŋ, a̍ pūa̍a̍ ndūa̍a̍ chɔ̄ūwa̍ mā kɔ̍ chi᷅ŋa̍la᷅ŋ nya̍ a̍ sɔ̍ŋgɔ̄ɔ̍ Ki̍sīɔ̄ŋ o̍ pēēlo̍. Kɛ̍ ndu̍yɛ̍, I̍ cho̍ tōsā mī lā yēm nda̍.’ ”

⁸Mi̍ Ba̍lu̍a̍kī o̍ lo᷅ o̍ ko̍ŋ mbo̍ dīmūl Dībo̍o̍lūā āā, “Bālā tīɔ̍ɔ̍ŋ, I̍ tu̍e̍ī nyɛ̄ ŋ̄ dīmi̍ wo̍. Kɛ̍ mɛ̄ɛ̍ mī ŋ̄ kūɛ̄ na̍a̍ nūm. Tē a̍ chɛ̍l pɛ̍ le̍ mī ŋ̄ kūɛ̄ na̍a̍ nu̍m I̍ ku̍ɛ̄, kɛ̍ tē a̍ chɛ̍l te̍, mɛ̄ɛ̍ I̍ ku̍ē ni̍ŋ te̍.”

⁹Mi̍ Dībo̍o̍lūā di̍mūl ndu̍ āā, “Bālā tīɔ̍ɔ̍ŋ, I̍ chɛ̍l le̍ mī ŋ̄ kūɛ̄ na̍a̍ nūm. Kɛ̍ ndu̍yɛ̍ mɛ̄ɛ̍ ŋ̄ dīmi̍ māā na̍a̍ ŋ̄ kɔ̍ na̍a̍ nūm yɛ̍, mɛ̄ɛ̍ si̍na̍ pɛ̍ŋgu̍ māā tē ŋ̄ kɔ̍ yo᷅m Sīsɛ̍lūā nda̍ so̍vɛ̄i̍ya̍a̍ ndūa̍a̍ pɛ̍, chāndɔ̄ɔ̄lā nūm o̍o̍ nɔ̍ le̍ sɔ̄lāa̍ la̍ŋ, a̍ sɔ̍lā lɛ̍ ni̍ŋ nda̍ŋ te̍. Ya̍ cho̍ chāndɔ̄ɔ̄la̍ŋ sɔ̄lā ni̍, fo̍ndōle̍, nu̍a̍ā ko̍ni̍ i̍ wa᷅ ni̍, māā ya̍ wa̍nā la̍nɔ̍ɔ̍ māā ya̍ Mɛ̄lɛ̄ka̍ Ya̍a̍wɛ̄ɛ̄ o̍ ke̍ kpāāyāa̍ ni̍, mi̍ ya᷅m nda̍.” O̍ ko̍ŋ kɔ̍ɔ̍lī, Dībo̍o̍lūā ni̍, Ba̍lu̍a̍kī ni̍, ma̍ kūā Kɛ̍dɛ̍sī chi̍e̍e̍.

¹⁰Mɛ̄ɛ̍ nda̍ fūūlu̍u̍, mi̍ Ba̍lu̍a̍kī ve̍e̍lū yu̍ŋgu̍ Sɛ̍bu̍lɔ̄ŋ ndo̍, a̍ yu̍ŋgu̍ Nāfi̍ta̍lī yo̍ nāa̍ pi᷅lɛ̍. Mbo̍ hɛ̄lī pūa̍a̍ chɔ̄ūwa̍ yu̍ŋgu̍la̍ ti̍ɔ̍ɔ̍ŋnda̍ŋ ndāŋ tɛ̄ɛ̄ŋ wāa̍la̍ŋ tɔ̍ (10,000), mbo̍ sīm nda̍ lāchī ma̍ kūā nāa̍ Mɛ̄lɛ̄ka̍ dīmu̍l nda̍ wa̍. Ndu̍yɛ̍, Dībo̍o̍lūā bɛ̍ɛ̍ mbo̍ tūāl nda̍ kɔ̄ɔ̄lī ma̍ kūā nda̍ nda̍ā.

¹¹Po̍ pi᷅lɛ̍ wa̍ dīōlā ndɔ̄la̍ŋ āā Hɛ̍bā, Ke̍na̍i̍tīi̍nɔ̍ɔ̍ o̍ wa̍ ni̍. Ndu̍yɛ̍ Ke̍na̍na̍i̍tīi̍ya̍ yɛ̄ o̍ pūlāle̍ Ho̍ba̍bī le̍ŋ chōo̍ nda̍ a̍a̍ fu̍la̍ ni̍. Ho̍ba̍bī ko̍ŋ yɛ̄, lēfōo̍ Mūu̍sē o̍ wa̍ ni̍. Kɛ̍ mi̍ Hɛ̍bāā ndu̍ fa̍ŋa᷄ŋ nāa̍ Ke̍na̍na̍i̍tīi̍ya̍ ā wa̍ wa̍, mbo̍ hu᷄ŋ to̍o̍sīāā Tɛ̍ndīi̍ ndɔ̄ɔ̍ Sa̍a̍na̍nīm chi̍e̍e̍, o̍ yɔ̄m ɔ̍kū wo̍ bɛ̄ŋgu̍, mbo̍ chāl lo̍ŋ. Ndu̍yɛ̍ fo̍ndāa̍ ho̍ō ō ve̍ le̍vi̍l a̍ Kɛ̍dɛ̍sī le̍.

¹²Mɛ̄ɛ̍ nda̍ dīmu̍l Sīsɛ̍lūā, māā Ba̍lu̍a̍kī, po̍ Ābīno̍wām ndo̍ ō kūɛ̄ o̍ Pēmbīī Ta̍bɔ̄ɔ̄ve̍ chōo̍,

¹³mbo̍ chūūŋgīāā nyɛ̄lā ndɔ̄la̍ ŋ̄chīli̍ŋnda̍ su̍a̍ā chɔ̄ūwa̍ a̍ nāŋ nda̍ŋ kpo̍u̍, a̍ pūa̍a̍ ndūa̍a̍ chɔ̄ūwa̍ kpo̍u̍ le̍ kɔ̄la̍ŋ Ba̍lu̍a̍kī chīŋa̍la᷅ŋndo̍ a̍ sɔ̍ŋgɔ̄ɔ̍. Ndu̍yɛ̍ ndu̍ o̍o̍ nɔ̍ nyɛ̄lā ŋ̄chīli̍ŋnda̍ su̍a̍ā chɔ̄ūwa̍ ā nāŋnda̍ŋ kɛ̄mɔ̄ɔ̍ lē ŋɔ̍ma̍hīɔ̍ɔ̍lu̍ (900). Mbo̍ chūā nyɛ̄lā lāŋ, a̍ pūa̍a̍ ndūa̍a̍ chɔ̄ūwa̍ kpo̍u̍, ma̍ cha᷄ŋ nāa̍ nda̍ wa̍ Hālɔ̄si̍ɛ̍tī nda̍ ma̍ tūāl Ki̍sīɔ̄ŋ o̍ pēēlo̍, le̍ Ba̍lu̍a̍kī nda̍ pūa̍a̍ ndūa̍a̍ chɔ̄ūwa̍ kɔ̄la̍ŋ chīŋa̍la᷅ŋndo̍.

¹⁴Mi̍ Dībo̍o̍lūā di̍mūl Ba̍lu̍a̍kī āā, “Chɔ̍ŋ mā chu̍a̍ pūa̍a̍ nu̍mnda̍, mī lā kūɛ̄ le̍ sɔ̍ŋgɔ̄ɔ̍. Mɛ̄lɛ̄ka̍ Ya̍a̍wɛ̄ɛ̄ o̍ cho̍ nya̍ kpāāyāa̍ kē pāa̍le̍ hāūle̍ŋ nde᷅ŋ mī lā yēm Sīsɛ̍lūā. Mɛ̄lɛ̄ka̍ Ya̍a̍wɛ̄ɛ̄ pi̍la̍ o̍ cho̍ nya̍ īsīsi̍ la̍chi̍ mī lā kɔ̍ yo᷅m ndu̍.” O̍ ko̍ŋ, mi̍ Ba̍lu̍a̍kī o̍ chu̍ā pūa̍a̍ ndūa̍a̍ chɔ̄ūwāā wāa̍la̍ tɔ̍ wa̍, ma̍ tūāl Pēmbīī Ta̍bɔ̄ɔ̄ve̍.

¹⁵Ma̍ kɔ̍ chi᷅ŋa̍la᷅ŋ Si̍sɛ̍lūā nda̍ pūa̍a̍ ndūa̍a̍ chɔ̄ūwa̍. Ndu̍yɛ̍ mi̍ ī yɔ̄nu᷄ŋ, dīmīo̍o̍ nu̍a̍ā mi̍ Ba̍lu̍a̍kī nda̍ pūa̍a̍ ndūa̍a̍ chɔ̄ūwa̍ ā chīŋa̍la᷅ŋ nda̍, Sīsɛ̍lūā ni̍, so̍vɛ̄i̍ya̍a̍ ndūa̍a̍ ni̍, a̍ so̍vɛ̄i̍ya̍a̍ ku̍ā o̍ nyɛ̄lā chɔ̄ūlā su̍a̍a̍ ā nāŋ nda̍ŋ chōo̍ wa̍, nda̍ kpo̍u̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā mi̍ sīōōŋīī bɛ̄ndūe̍i̍ bīī nda̍, mi̍ kɔ̄lta̍ŋ lā hīīlu᷄ŋ nda̍ ni᷄ŋ kpo̍u̍. Mi̍ Sīsɛ̍lūā o̍ tu̍āl o̍ nyɛ̄ ndɔ̄ nya̍a̍na᷄ŋ su̍a̍a̍ ā nāŋ ndo̍ chōo̍ mbo̍ nyāānu᷄ŋ.

¹⁶Pūa̍a̍ ndūa̍a̍ chɔ̄ūwa̍ kpo̍u̍ lātu̍lu̍ a̍ nyɛ̄lā ndāla̍ chɔ̄ūlā su̍a̍a̍ ā nāŋ nda̍ŋ, ma̍ nyāānu᷄ŋ. Kɛ̍ mi̍ Ba̍lu̍a̍kī nda̍ pūa̍a̍ ndūa̍a̍ chɔ̄ūwa̍ ā tīsā nda̍ kīlta̍ŋ kɔ̄ɔ̄lī, ma̍ lō nda̍ kīlta̍ŋ kɔ̄ɔ̄lī ha̍a̍a̍, ma̍ fūūlūū a̍ nda̍ Hālɔ̄si̍ɛ̍tī di̍. Ndu̍yɛ̍ ma̍ dīū pūa̍a̍ chɔ̄ūwāa̍ Sīsɛ̍lūā wa̍ kpo̍u̍, ō pīlɛ̍ bɛ̍ɛ̍ ā me᷄l ndu̍ mbō kūɛ̄ le̍.

¹⁷Kɛ̍ mi̍ Sīsɛ̍lūā pi̍la̍ ndu̍ nya̍a̍nu᷄ŋ o̍ Tɛ̍ndīi̍ chūā pīlɛ̍ ni᷄ŋ dīōla̍ŋ āā Cha̍yɛ̄ɛ̄, la̍nɔ̍ɔ̍ Hɛ̍bā ke̍na̍na̍i̍tīi̍nɔ̍. Ndu̍yɛ̍ Māsāa̍ Cha̍bīŋ, o̍ wa̍ Ha̍sɔ̄ɔ̄ wo̍, ndu̍ yɔ̍nūŋ māā Sīsɛ̍lūā māsānɔ̍ ndɔ̄ɔ̍ ni̍, nāāŋa᷅ŋndo̍ pīla̍ nda̍ a̍a̍ na̍a̍ŋa᷅ŋ nda̍ yu̍ŋgu̍ Hɛ̍bā wo̍ ni̍.

¹⁸Mɛ̄ɛ̍ Cha̍yɛ̄ɛ̄ o̍ che᷅ Sīsɛ̍lūā hūnɔ̄ɔ̍ a̍ kīlta̍ŋ, mbo̍ kūā ndu̍ lāchī, mbo̍ dīmūl ndu̍ āā, “Hu̍ŋ fāllo̍, hu̍ŋ mā hu̍ŋ lu̍ɛ̍ī o̍ Tɛ̍ndīi̍ nūu̍ ni᷄ŋ. Yɔ᷅ŋ īsīōōŋ te̍.” O̍ ko̍ŋ, mi̍ Sīsɛ̍lūā o̍ kɔ̍ lu̍ɛ̍ī o̍ Tɛ̍ndīi̍ ndɔ̄ɔ̍ ni᷄ŋ le̍ mbō vēŋnu᷄ŋ. Mi̍ Cha̍yɛ̄ɛ̄ o̍ ku̍u̍mbūū ndu̍ kōlā bɛ̍ndōo̍ mu̍la̍a̍ yɔ̄ŋi̍ wānā a̍a̍ chɔ̍ ndu̍.

¹⁹Mi̍ Sīsɛ̍lūā di̍mūl Cha̍yɛ̄ɛ̄ āā, “Yāndi̍i̍ ke̍ ya̍ wɔ̄ I̍ ko᷅l fɔ̍, kōlɔ̄ɔ̍ bīī ya̍ ō bɔ̄ɔ̍.” O̍ ko̍ŋ, mi̍ Cha̍yɛ̄ɛ̄ o̍ ku̍mbī bɔ̄lɔ̍ ndɔ̍ mi̍li̍kīi̍ya̍ŋ mā wa̍ lēni᷄ŋ ndo̍, mbo̍ kē ndu̍ mi̍li̍kīi̍ya̍ŋ mā ti᷄ŋ mbo̍ kōl. O̍ ko̍ŋ kɔ̍ɔ̍lī, mbo̍ mīŋgī ndu̍ kōlāa̍ kūūmbūū.

²⁰Mi̍ Sīsɛ̍lūā o̍ di̍mūl Cha̍yɛ̄ɛ̄ āā, “Yāndi̍i̍ si̍m o̍ tɛ̍ndɛ̄i̍yo̍ sōndōo̍. Tē wānā o̍ wānā hi᷅ŋ pɛ̍ mbō hu᷄ŋ nyu̍nā māā wānā cho̍ o̍ tɛ̍ndɛ̄i̍yo̍ ho̍ō ni᷄ŋ te̍, a̍ di̍mu̍l ndu̍ māā wānā o̍ wānā cho̍ na̍nu᷄ŋ te̍.”

²¹Sīsɛ̍lūā wa̍ īhīni̍ o̍ bā chōo̍. Ndu̍yɛ̍ hīni̍la̍ŋ dɔ̍ɔ̍ kpɛ̍ɛ̍ mbo̍ hīāūnu᷄ŋ bɛ̍ɛ̍ o̍ lūa̍a̍ŋ, fo̍ndōle̍, a̍ mɛ̄ɛ̍ ndu̍ o̍o̍ sa̍ŋga̍ yɛ̍. O̍ ko̍ŋ, mi̍ Cha̍yɛ̄ɛ̄ o̍ cha̍ŋ yɛ̍lɛ̍ŋ yɛ̍lɛ̍ŋ, mbo̍ chūā ku̍ndūwa̍a̍, a̍ pɛ̍ɛ̍kīi̍ŋ nda̍ tūāndū tɛ̍ndɛ̄i̍yo̍ a̍ ndi̍ ve̍ lē pīlɛ̍, mbo̍ kɔ̍ ba᷅ŋ ndu̍ Sīsɛ̍lūā o̍ lēbōl pe̍ŋ. Mi̍ yɔ̄mndo̍ būlī ndu̍ bōlle̍ŋ, mbo̍ fūlā lēkɔ̍ɔ̍lī, mbo̍ lūɛ̄ī lɛ̄ŋ. Mi̍ Sīsɛ̍lūā o̍ wu᷅.

²²Mi̍ Ba̍lu̍a̍kī o̍ fu̍u̍lūū o̍ Tɛ̍ndīi̍ Cha̍yɛ̄ɛ̄ yo̍, ō wa̍ Sīsɛ̍lūā kīlta̍ŋ kɔ̄ɔ̄lī. Mɛ̄ɛ̍ Cha̍yɛ̄ɛ̄ o̍ che᷅ Ba̍lu̍a̍kī hūnɔ̄ɔ̍, mbo̍ kūā ndu̍ lāchī, mbo̍ kɔ̍ di̍mūl ndu̍ āā, “Hu̍ŋ, mī hu̍ŋ chɔ᷅m nu̍m po̍ ŋ̄ cho̍ nūūwāa̍ wo̍ nāa̍ o̍ cho̍ wa̍.” O̍ ko̍ŋ, ma̍ lūɛ̄ī o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ nda̍ Ba̍lu̍a̍kī. Mɛ̄ɛ̍ nda̍ lūɛ̍i̍, mi̍ Ba̍lu̍a̍kī o̍ sa̍a̍lu᷄ŋ Si̍sɛ̍lūā īhīni̍ o̍ vi̍lɛ̍i̍yo̍, a̍ yɔ̄m sɛ̄ɛ̄mbīa̍a̍ ndu̍ ō bāŋāā o̍ lēbōl.

²³O̍ ko̍ŋ, mi̍ Mɛ̄lɛ̄ka̍ tōsā mi̍ I̍sɔ̄lūɛ̍i̍ya̍ ā yām Cha̍bīŋ pāa̍le̍ le̍ŋ, Māsa̍ Ke̍na̍na̍i̍tīi̍ya̍.

²⁴Ndu̍yɛ̍ chɔ᷅ŋ ni᷅ŋ a̍ te̍le̍ŋ ko̍ŋ, I̍sɔ̄lūɛ̍i̍ya̍ ā lo̍ ni᷅ŋ kpāāyāa̍ sɔ̄lāa̍ ha̍a̍a̍, ma̍ chīī a̍ ndu̍.