Read Southern Kisi Chɔ̄ɔ̍chi̍a̍a̍ 5 Bible Online

Chɔ̄ɔ̍chi̍a̍a̍ 5 - Southern Kisi bible

Chɔ̄ɔ̍chi̍a̍a̍ 5

¹Pāa̍le̍ I̍sɔ̄lūɛ̍i̍ya̍ ā yēm ya̍a̍mɔ̍ɔ̍wa̍a̍ ndāa̍ le̍ŋ Dībo̍o̍lūā ni̍, Ba̍lu̍a̍kī po̍ Ābīno̍wām ndo̍ ni̍, ma̍ sōlī chōnde̍i̍ he̍ī āā,

²“Lā ŋ̄ sāŋga̍la᷅ŋ Mɛ̄lɛ̄ka̍ Ya̍a̍wɛ̄ɛ̄ le̍ nyɛ̍ yɔ̍nu̍ŋ ndo̍. Wāŋ bɛ̄ndūa̍a̍ I̍sɔ̄lūɛ̄ī, nda̍ pi̍la̍ si̍m I̍sɔ̄lūɛ̍i̍ya̍ lāchī le̍ kɔ̄la̍ŋ sɔ̍ŋgɔ̄ɔ̍ a̍ ya̍a̍mɔ̍ɔ̍wa̍a̍ ndāa̍. Wāŋnda̍ I̍sɔ̄lūɛ̄ī nda̍ pi̍la̍ kɛ̍sɛ̍ kɛ̍sɛ̍ a̍ yɔ̍ŋgu̍ŋ ni̍ le̍ kɔ̄la̍ŋ sɔ̍ŋgɔ̄ɔ̍ a̍ ya̍a̍mɔ̍ɔ̍wa̍a̍ ndāa̍.

³Lā ya᷄ŋ ni᷅la̍ŋ nya̍ māsāā bɛ̍ndūa̍a̍ o̍ chi̍e̍ēŋndo̍ ni᷄ŋ. Lā tūe̍i̍ nyɛ᷅ ya̍ I̍ cho̍ dīmīo̍o̍ wo̍, nya̍ wānāa̍ cho̍ wāŋnda̍ chīla̍ŋ nda̍. I̍ cho̍ chōnde̍i̍ sōlī ndu̍yɛ̍ mī lɔ̍ɔ̄ nyɛ̄ chāa̍ le̍ Mɛ̄lɛ̄ka̍ Ya̍a̍wɛ̄ɛ̄ sāŋgālāa̍, Mɛ̄lɛ̄ka̍ I̍sɔ̄lūɛ̍i̍ya̍.

⁴Mɛ̄lɛ̄ka̍ Ya̍a̍wɛ̄ɛ̄, bōōndi̍i̍ ŋ̄ chɛ᷄ŋ o̍ pēmbo᷄ŋ chōo̍ Sɛ̍yāā ma̍ wā hūnɔ̄ɔ̍ ve̍, bōōndi̍i̍ ŋ̄ fūla̍ o̍ būngɛ̄ī I̍dɔ̄mnde̍ ni᷄ŋ nde̍, lɛ̄ŋnde̍ŋ kpo̍u̍ mī lē hīīlu᷄ŋ, mi̍ pīɔ̍ɔ̍ cha᷄ŋ cho̍o̍ cho̍o̍ mbo̍ sīā o̍ chi̍e̍ēŋndo̍ ni᷄ŋ. Le̍nde̍ kpe̍e̍kpe̍i̍ i̍ yɔ̍nu̍ŋ ni̍, mi̍ mɛ̄ŋnda̍ŋ o̍ ha̍la̍a̍ ni̍ŋ cho̍o̍ cho̍o̍ ma̍ hu̍lu᷄ŋ o̍ chi̍e̍ēŋndo̍ ni᷄ŋ.

⁵“Pēmbūŋ bɛ̄ndo᷄ŋ kpo̍u̍, mi̍ ŋ̄ hīīlu᷄ŋ Mɛ̍lɛ̄ka̍ Ya̍a̍wɛ̄ɛ̄ lāchī, mɛ̄ɛ̍ o̍ wa̍ hūnɔ̄ɔ̍. Pēmbīī Sa̍a̍nāī ve̍ bɛ̍ɛ̍, mi̍ ī hīīlu᷄ŋ wo᷅ŋa̍ wo᷅ŋa̍ Mɛ̍lɛ̄ka̍ Ya̍a̍wɛ̄ɛ̍ lāchī, Mɛ̄lɛ̄ka̍ I̍sɔ̄lūɛ̍i̍ya̍.

⁶“O̍ pālɛ̍i̍ Si̍a̍mi̍kā wa̍ā ni᷄ŋ, po̍ A̍na̍tī wo̍, pālɛ̍i̍ Cha̍yɛ̄ɛ̄ wa̍ā ā wa̍ lēcho̍ō ve̍, nɛ̄īla̍ bɛ̄ndūla̍ŋ kpo̍u̍ mi̍ wāŋnda̍ ā māl la̍ŋ wa̍ŋ wa̍ŋ, wānā a̍a̍ tɔ̍ɔ̍ŋndāŋ bɛ̍ɛ̍ mī nūm o̍o̍ ke̍la̍ o̍ nɛ̄īla̍ bɛ̄ndūla̍ŋ chōo̍ le̍. Wānāā kēla᷄ŋnda̍, o̍ pēma̍ŋ nda̍ a̍a̍ ba̍lū ni̍.

⁷Chi̍e̍e̍ŋ I̍sɔ̄lūɛ̍i̍ya̍ kpo̍u̍ mi̍ ŋ̄ pīɔ̄l, mi̍ ŋ̄ lō sɔ̍ŋgɔ̍ fo̍ndō fu̍u̍, ha̍a̍a̍ mbo̍ lō o̍ ko̍ŋ, mi̍ Dībo̍o̍lūā o̍ hu̍ŋ si̍mnu᷄ŋ māā kālā le̍ lɛ̄ŋndē I̍sɔ̄lūɛ̍i̍le̍ŋ kpo̍u̍.

⁸Le̍ kɛ̄ɛ̄ I̍sɔ̄lūɛ̍i̍ya̍ ā kɛ̄ɛ̍ Mɛ̄lɛ̄ka̍ ndāa̍ le̍ mɛ̄lɛ̄ka̍a̍ chēle̍ŋ nda̍ wo̍, mi̍ ya̍a̍mɔ̍ɔ̍wa̍ ō hu᷄ŋ de᷅l lɛ̄ŋndē I̍sɔ̄lūɛ̍i̍le̍ŋ chōo̍. Ndu̍yɛ̍, pūa̍a̍ chɔ̄ūwāā wāa̍la̍ be̍le̍ hi̍ɔ̍ɔ̍lu̍a̍a̍ (40,000) I̍sɔ̄lūɛ̄ī ki̍nɛ̍i̍, nyɛ̄lā pūa̍a̍ chɔ̄ūwa̍ sɔ̄ŋgā o̍ lābā māā bōo̍la̍ bɛ̍ndū le̍ nda̍ māndāa̍ la̍ŋ ō pīlɛ̍ bɛ̍ɛ̍ wānā a̍a̍ se̍e̍lūŋ nda̍ tɛ̄ɛ̄ŋ te̍, kɛ̄lɛ̄ŋgāā ni᷅ŋ te̍, mī wānā a̍a̍ sa̍a̍lu̍ŋ ba̍llo̍ ō pīlɛ̍ bɛ̍ɛ̍ nda̍ tɛ̄ɛ̄ŋ.

⁹Le̍la̍ŋ kɔ̄l nūu̍ ō fe̍ēŋ ha̍ū a̍ wānāa̍ cho̍ pūa̍a̍ chɔ̄ūwa̍ I̍sɔ̄lūɛ̍i̍ bōlle̍ŋ nda̍ le̍, wānāa̍ chɛ̍l ma̍ yɔ̄nu̍ŋ nda̍ pi̍la̍ le̍ sɔ̍ŋgɔ̄ɔ̍ a̍ ya̍a̍mɔ̍ɔ̍wa̍a̍ ndāa̍ wa̍, le̍ te̍le̍ŋ o̍ te̍le̍ŋ kɔ̄llo̍ chō ya̍ o̍ wāŋnda̍ ha̍ā lo̍. Sāŋgālāa̍ chō o̍ Mɛ̄lɛ̄ka̍ Ya̍a̍wɛ̄ɛ̄ lo̍.

¹⁰Nya̍ cho̍ bālɔ̄ɔ̍ o̍ sōfɛ̍li̍a̍a̍ kɛ̍ndɛ̄ kɛ̍ndīa̍a̍ chōo̍, mī lā chāl o̍ bīlāla̍ kɛ̍ndɛ̄ kɛ̍ndɛ̄lā nda̍ hāndū sōfɛ̍li̍a̍a̍ o̍ lākɔ̄ɔ̄ le̍ cha᷄lle̍ lēcho̍ō wa̍, a̍ nya̍ cho̍ bālɔ̄ɔ̍ o̍ nɛ̄īla̍ŋ nda̍, lā dīmu̍l wa᷅ŋnda̍ a̍ nyɛ̍ yɔ̍nu̍ŋ ndo̍ o̍kɔ̄ɔ̄.

¹¹Lā ya᷄ŋ ni᷅la̍ŋ mī lā tūēī nyɛ̍ cho̍ dīmi᷄ŋndo̍ o̍ chōnde̍i̍ he̍ī ni᷄ŋ, fūlāa̍ wānāā ŋ̄chōndu̍a̍a̍ o̍ lāsōndō wo̍, a̍ cho̍ o̍ pēēla̍ ko̍lāā la̍ŋ nda̍. Sɔ̄ɔ̍ŋ bɛ̍ndūŋ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ le̍ ya̍a̍mɔ̍ɔ̍wa̍a̍ I̍sɔ̄lūɛ̍i̍ya̍ yōmɔ̄ɔ̍ wo̍ŋ, a̍ yōmɔ̄ɔ̄lā bɛ̄ndūla̍ yɔ̍nu̍ŋ nda̍ŋ, a̍ mu̍ŋ o̍kɔ̄ɔ̄ wānāā ŋ̄chōndu̍a̍a̍ ha̍ā ā chō chɔ̄mndo̍ ni̍. “Ya̍a̍mɔ̍ɔ̍wa̍ nda̍ a̍a̍ hi᷅ŋ ma̍ hu᷄ŋ de᷅l wānāa̍ Mɛ̄lɛ̄ka̍ Ya̍a̍wɛ̄ɛ̄ wa̍ chōo̍ o̍ lɛ̄ŋndē ndāle̍ŋ ni᷄ŋ, kɛ̍ mi̍ wānāa̍ Mɛ̄lɛ̄ka̍ Ya̍a̍wɛ̄ɛ̄ wa̍ ā fūlā o̍ chi̍e̍e̍ŋ ndāŋ bɛ̍ndo᷄ŋ ma̍ hu᷄ŋ chi᷅ŋa̍la᷅ŋ nda̍.

¹²Chɔ̍ŋ Dībo̍o̍lūā, chɔ̍ŋ. Chɔ̍ŋ mā si̍m wāŋnda̍ lāchī. So̍li̍ cho̍nde̍i̍ Dībo̍o̍lūā. Si̍m pu̍a̍a̍ chɔ̄ūwa̍ lāchī Ba̍lu̍a̍kī, po̍ Ābīno̍wām ndo̍. Bi̍u̍ ya̍a̍mɔ̍ɔ̍wa̍ mā kūɛ̄ a̍ nda̍ o̍ bīyɔ̄ɔ̍ ni᷄ŋ.

¹³Pūa̍a̍ I̍sɔ̄lūɛ̍i̍ya̍a̍ tu̍a̍ā nda̍ a̍a̍ lo̍ wa̍ kpo̍u̍, ma̍ chūūŋgi̍āŋ ma̍ tūāl le̍ sɔ̍ŋgɔ̄ɔ̍ a̍ pūa̍a̍ chɔ̄ūwāā kpāāyāā bɛ̍ndūa̍a̍. Mi̍ wānāa̍ Mɛ̄lɛ̄ka̍ Ya̍a̍wɛ̄ɛ̄ wa̍ ā vēēla᷅ŋ ma̍ tūāl la̍ kɔ̄ɔ̄lī, le̍ hūnɔ̄ɔ̍ sɔ̍ŋgɔ̄ɔ̍ a̍ pūa̍a̍ ku̍u̍ba̍a̍ bɛ̍ndūa̍a̍.

¹⁴Mi̍ ā ti᷄ŋ cha᷄ŋ o̍ lɛ̄ŋndē E̍fi̍lūēmnde̍ŋ ni᷄ŋ, nāa̍ Āma̍la̍kāi̍tīi̍ya̍ ā wa̍ pāāndū wa̍ ma̍ hūŋ. Yu̍ŋgu̍ Bɛ̍ŋnja̍mīŋ ndo̍ bɛ̍ɛ̍ ma̍ tūāl nu̍m kɔ̄ɔ̄lī. Wānāa̍ cho̍ pūa̍a̍ chɔ̄ūwa̍ bōlle̍ o̍ lɛ̄ŋndē Māka̍yāle̍ŋ ni᷄ŋ nda̍, nda̍ kpo̍u̍ ma̍ tūāl le̍ hūnɔ̄ɔ̍ sɔ̍ŋgɔ̄ɔ̍. Pūa̍a̍ chɔ̄ūwa̍ Sɛ̍bu̍lɔ̄ŋ, wānāā ndāā bɛ̍ndūa̍a̍ nɔ̍ tīnda̍la̍ kpāāyāla̍ŋ o̍ lābā wa̍ kpo̍u̍, ma̍ hūŋ.

¹⁵Wāŋ bɛ̄ndūa̍a̍ o̍ yu̍ŋgu̍ I̍sa̍a̍kā wo̍ chōo̍, nda̍ bɛ̍ɛ̍ ma̍ tūāl Dībo̍o̍lūā kɔ̄ɔ̄lī le̍ hūnɔ̄ɔ̍ sɔ̍ŋgɔ̄ɔ̍ a̍ ya̍a̍mɔ̍ɔ̍wa̍a̍ ndāa̍. I̍sa̍a̍kā, yɔ̍ŋgu̍ ndɔ̄ɔ̍ bɛ̍ɛ̍ ma̍ tūāl Ba̍lu̍a̍kī kɔ̄ɔ̄lī ni̍, mbo̍ sīm nda̍ lāchī mbo̍ tūāl a̍ nda̍ o̍ lɛ̄ŋndē dɛ̍ŋgbɛ̍le̍ cho̍ o̍ pēmbo᷄ŋ tɛ̄ɛ̄ŋ nde̍ŋ. Kɛ̍ yu̍ŋgu̍ Lūbɛ᷅ŋ ndo̍ ndu̍, ma̍ sa̍āŋ kɔ᷅lta̍ŋ kēēlīa̍a̍ le̍ mɛ̄ɛ̍ nda̍ tōsā yɛ̍, māā ko̍ ā kɔ̍ ko̍ ā ku̍ā le̍.

¹⁶Vɛ᷅ mi̍ nya̍ nya̍ chālnu᷄ŋ o̍ fo̍ndāŋndā nyāla̍ ma̍ndāā lāsāa̍ la̍ŋ, lā chɛ᷄l mī lā kūɛ̄ le̍ ya̍a̍mɔ̍ɔ̍wa̍a̍ nyāa̍ sɔ̄ŋgā le̍? Bāā mbō wa̍ le̍ wānāā māndāā lāsāa̍ nīla̍ŋ yāŋɔ̄ɔ̍ o̍ sāa̍ vēēlōo̍ nyɛ̄ kōŋ nya̍ ku̍e̍ le̍ ni̍? Yu̍ŋgu̍ Lūbɛ᷅ŋ ndo̍ ki̍nɛ̍i̍, ā chɛ᷄l mā kūɛ̄ le̍, ma̍ sa̍āŋ kɔ᷅lta̍ŋ kēēlīa̍a̍ ko̍ ā kɔ̍ ko̍ ā ku̍ā le̍.

¹⁷Yu̍ŋgu̍ Ka̍a̍dī wo̍ bɛ̍ɛ̍ ma̍ bīī ma̍ chālnu᷄ŋ Chɔ̍ɔ̍dāŋ le̍e̍lōo̍ bā pāa̍le̍ŋ lē chāŋndo̍. Yu̍ŋgu̍ Da᷅ŋ ndo̍ bɛ̍ɛ̍ le̍nde̍ ko̍ni̍, ma̍ chālnu᷄ŋ dɛ̍ndɛ̄la̍ ndāla̍ bɛ̄ndūla̍ŋ īkɛ̄i̍. Yu̍ŋgu̍ A̍sīɛ̄ɛ̄ wo̍, nda̍ bɛ̍ɛ̍ ma̍ chālnu᷄ŋ o̍ pēe̍ mɛ̄ŋmā īhɛ᷄llo̍ kɔ̄ŋgɔ̍, tāāma̍ mī nda̍ a̍a̍ nɔ̍ ko̍ si̍o̍o̍ŋīī ndɛ̄i̍ kɛ̍ndɛ̄ kɛ̍ndɛ̄ le̍ chālnɔ᷄ŋndo̍ lēchōo̍ le̍.

¹⁸Kɛ̍ yu̍ŋgu̍ Sɛ̍bu̍lɔ̄ŋ ndo̍ ni̍, a̍ yu̍ŋgu̍ Nāfi̍ta̍lī yo̍, ma̍ bīī ma̍ pīsī yōōmūlā ndāla̍ŋ chi̍ o̍ chɔ̄ūwo̍ lāchī.

¹⁹“Mi̍ māsāā bɛ̍ndūa̍a̍ ā hūŋ ma̍ hu᷄ŋ sɔ̍ŋgā a̍ I̍sɔ̄lūɛ̍i̍ya̍ Tāāna̍kī chi̍e̍e̍ o̍ pēēla̍ pɔ̍mbɔ̄la̍ŋ Mɛ̍ki̍dɔ̄ɔ̄. Māsāā bɛ̍ndūāā māKēnāna̍i̍tīi̍ya̍ bɛ̍ɛ̍ ma̍ hu᷄ŋ sɔ̍ŋgā a̍ nda̍ lo̍ŋ, kɛ̍ ā nɔ̄la̍ mā yēm I̍sɔ̄lūɛ̍i̍ya̍ mā pūŋga̍ ka̍ni̍ŋ ndāŋ hu̍mbo᷄ŋ māā pāāndū le̍.

²⁰Lōo̍ŋ cho̍ o̍ ha̍la̍a̍ ni᷄ŋ cho̍o̍ cho̍o̍ wo̍ŋ bɛ̍ɛ̍ mi̍ ŋ̄ sɔ̄ŋgā a̍ ya̍a̍mɔ̍ɔ̍wa̍a̍ I̍sɔ̄lūɛ̍i̍ya̍, ŋ̄ lo̍ o̍ fo̍ndāŋndā ndāla̍ŋ chōo̍ cho̍o̍ nāa̍ ŋ̍ cho̍ hīŋnɔ᷄ŋndo̍ o̍ ha̍la̍a̍ ni᷄ŋ nda̍, mi̍ ŋ̄ sɔ̄ŋgā a̍ Sīsɛ̍lūā, bōllē pūa̍a̍ chɔ̄ūwāā ya̍a̍mɔ̍ɔ̍wa̍a̍ nāa̍.

²¹Nda̍ kpo̍u̍ ma̍ lō Ki̍sīɔ̄ŋ o̍ pēēlo̍. Mi̍ tīndi̍le̍ kpāāyāle̍, pēe̍ māsīndɛ̄ si̍ndɛ̄ kōŋ lē hīāū a̍ nda̍ yo̍kī. Le̍ he̍ī, I̍ cho̍ kɔ̄ŋga᷄ŋ lēku̍u̍ba̍a̍ a̍ kpāāya̍ nūu̍ kpo̍u̍.

²²Su̍a̍ā chɔ̄ūwāa̍ Sīsɛ̍lūā wa̍, kpo̍u̍ ma̍ yōm a̍ kīlta̍ŋ. Mɛ̄ɛ̍ su̍a̍ā ndūa̍a̍ ā yo᷄m ma̍ wā kīlta̍ŋ, lɛ̄ŋnde̍ŋ le̍e̍ lo᷅ ko̍ mī le̍e̍ nyi̍i̍ya̍, a̍ īdīkī dīkīī bɛ̄ndūī nda̍ wa̍ ve̍.

²³“Mi̍ ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ ō dīmī āā, ‘Mbɔ̄ māā Mɛ̄lɛ̄ka̍ ō hāndu̍ wa᷅ŋnda̍ Mɛ̍lɔ̍sī sēndi̍o̍o̍ chōo̍ fɔ̍. Mbɔ̄ māā sēndi̍ kālā ka̍lā bɛ̄ndōo̍ ō wa̍ wa᷅ŋnda̍ ha̍ā chōo̍ fɔ̍, fo̍ndōle̍, le̍ mɛ̄ɛ̍ nda̍ kɛ̄ɛ̍ le̍ hūnɔ̄ɔ̍, le̍ Mɛ̄lɛ̄ka̍ Ya̍a̍wɛ̄ɛ̄ sɔ̍ŋgɔ̄ɔ̍ mālāa̍ yɛ̍, le̍ mɛ̄ɛ̍ nda̍ kɛ̄ɛ̍ le̍ Mɛ̄lɛ̄ka̍ Ya̍a̍wɛ̄ɛ̍ sɔ̍ŋgɔ̄ɔ̍ mālāa̍ a̍ ya̍a̍mɔ̍ɔ̍wa̍a̍ ndūa̍a̍ kpāāyāā bɛ̍ndūa̍a̍ yɛ̍.’

²⁴“Mbɔ̄ māā Mɛ̄lɛ̄ka̍ dɔ̄u̍ Cha̍yɛ̄ɛ̄ sa̍lā, la̍nɔ̍ɔ̍ Hɛ̍bā Ke̍na̍na̍i̍tīi̍nɔ̍ mbō hīōū wāŋ lāāndūāā tūa̍a̍ kpo̍u̍. Mbɔ̄ māā Mɛ̄lɛ̄ka̍ dɔ̄u̍ ndu̍ sa̍lā mbō hīōū wāŋ lāāndūa̍a̍ cho̍ o̍ tɛ̍ndɛ̄i̍la̍ŋ ni᷄ŋ nda̍ kpo̍u̍.

²⁵Mɛ̄ɛ̍ Sīsɛ̍lūā o̍ pi̍ɛ̍i̍ ndu̍ mɛ̄ŋnda̍ŋ le̍ kōlɔ̄ɔ̍, mbo̍ kē mi̍li̍kīi̍ya̍ŋ. O̍ hɛ̄ŋgɛ̍i̍ kɛ̍ndɛ̄ kɛ̍ndɛ̄ bɛ̄ndōo̍ ni᷄ŋ o̍ ke̍ ndu̍ mi̍li̍kīi̍ma̍ hi̍līhīlīmā kɛ̄ndɛ̄ kɛ̍ndīa̍ŋ ni̍ mbo̍ kōl.

²⁶Mi̍ Cha̍yɛ̄ɛ̄ o̍ si̍ɛ̍ndī bāa̍, mbo̍ chūā pɛ̍ɛ̍kīi̍ŋ nda̍ tūāndū tɛ̍ndɛ̄i̍yo̍ ve̍ a̍ ndi̍ ve̍ lē pīlɛ̍, a̍ bāa̍ ō pīlɔ̍ɔ̍, o̍ ko̍ŋ kɔ̍ɔ̍lī, mbo̍ chūā ku̍ndūwa̍ pūa̍a̍ ā tōsā wa̍llo̍ wo̍ a̍ bā kɛ̄ndɔ̄ɔ̍. Sīsɛ̍lūā lo̍ o̍ lūa̍a̍ŋ, mbo̍ kɔ̍ ba᷅ŋ ndu̍ yɔ̄m sɛ̄ɛ̄mbīāā kōŋ o̍ lēbōl mbo̍ pīāl ndu̍ kpōkpōo̍. Bāŋɔ̄ɔ̍ ndu̍ yɔ̄m sɛ̄ɛ̄mbīa̍a̍ o̍ lēbōl, mi̍ yɔ̄mndo̍ būlī ndu̍ bōlle̍ŋ mbo̍ fūlā lēkɔ̍ɔ̍lī.

²⁷Sīsɛ̍lūā o̍ lo̍ ni᷅ŋ wūla̍ŋ kpūūkpīa̍a̍ lɛ̄ŋ īkpūū kpūūve̍ mbo̍ wū. Ō lo̍ ni᷅ŋ Cha̍yɛ̄ɛ̄ pēlo᷄ŋ lɔ̄ɔ̍ ībābɛ̄i̍ o̍ lābɛ̄ŋgu̍ ni̍ŋ ndo̍ŋ, mbo̍ mālnu᷄ŋ kɔ᷅l. Nāa̍ o̍ wa̍ īhīni̍ wa̍, lo̍ŋ o̍ lo̍ pēlo̍ŋ lɔ̄ɔ̍ ībābɛ̄i̍ ni̍, mbo̍ wū Cha̍yɛ̄ɛ̄ o̍ lābɛ̄ŋgu̍ ni̍ŋ lɛ᷅ŋ ndo̍ŋ.

²⁸“Kālāa̍ Sīsɛ̍lūā o̍ wa̍ īchāli̍ o̍ ndu̍lo̍ chi̍ɛ̍ī ni̍ŋ mbō tōfā o̍ wu̍ndɛ̄i̍yo̍. Ō wa̍ tōfāa̍ o̍ nɛ̄ī le̍ po̍ ndɔ̄ɔ̍. Mbo̍ dīmī āā, ‘Ko̍ vɛ᷅ mi̍ po̍ nūu̍ nyɛ̄ ndɔ̄ nya̍a̍na᷄ŋ su̍a̍a̍ ā nāŋ ndo̍ ō wā hāū dɔ̍ŋgu̍ dɔ̍ŋgo̍o̍ ho̍ō le̍ hūnɔ̄ɔ̍? Te̍le̍ŋ wa̍ā nu̍a̍ā pāāndū, su̍a̍ā ndūa̍a̍ na᷅ŋ nyɛ᷅ ndɔ̄ nya̍a̍na᷄ŋ ndo̍ wa̍ ā wā ni᷅ŋ na̍nu᷄ŋ. Kɛ̍ ko̍ vɛ᷅ dɔ̍ɔ̍ dɔ̍ŋgu̍ dɔ̍ŋgo̍o̍ ho̍ō?’

²⁹Mi̍ wāŋ lāāndūa̍a̍ wa̍ chīɛ̄ī ni̍ŋ nda̍, a̍ nɔ̍ kɔ̄l kālo̍o̍ ma̍ hīāū ha̍ā kpo̍u̍ wa̍ ā mūlī ndu̍ dīōm. Kɛ̍ mbo̍ yīsīlā ndi̍ dīmīo̍o̍, āā,

³⁰‘I̍ che᷅ māā nyɛ̄m nda̍ pōōndi̍a̍a̍ ya̍a̍mɔ̍ɔ̍wa̍ o̍ bā wo̍ŋ, mu̍ŋ nda̍ wā ni̍ŋ dɔ̍ɔ̍ pīɔ̄ūvi̍āŋndo̍ ni̍. Kɛ̄lɛ̄ŋgāā dɔ̍ɔ̍ so̍vɛ̄i̍ya̍ nda̍ ki̍nɛ̍i̍, mī wānā pi᷅lɛ̍ ō sɔ̄la̍ dɔ̍ɔ̍ chūāā lāāndūāā nda̍ bīī o̍ chɔ̄ūwo̍ wa̍ ō pīlɛ̍, kɛ̄lɛ̄ŋgāā ā ŋīɔ̍ɔ̍ŋ. Dōmāla̍ tɔ̍ɔ̍la̍ bɛ̍ndūla̍ŋ ni᷅ŋ ki̍nɛ̍i̍, a̍ nyɛ̄lā ba̍ā kālālā bɛ̄ndūlā ya̍ I̍ wo̍u̍nūŋ ni̍ŋ nda̍ŋ, la̍ŋ ki̍nɛ̍i̍ mī lā wa̍ le̍ Sīsɛ̍lūā.’

³¹“O̍o̍ Mɛ̄lɛ̄ka̍ Ya̍a̍wɛ̄ɛ̄, ya̍a̍mɔ̍ɔ̍wa̍a̍ nu̍mnda̍ ki̍nɛ̍i̍, mɛ̄ɛ̍ i̍ yɔ̍nu̍ŋ nu̍a̍ā a̍ Sīsɛ̍lūā yɛ̍, le̍nde̍ i̍ yɔ̍nu̍ŋ a̍ nda̍ ni̍ fɔ̍. Kɛ̍ ndu̍yɛ̍ wānāa̍ ka̍a̍la̍ nu̍mnda̍ ki̍nɛ̍i̍, ā sɔ̄la̍ di̍a̍llūŋ kāla᷄ŋ, ndu̍yɛ̍ mā dēndū ya̍a̍mɔ̍ɔ̍wa̍a̍ ndāa̍ tɛ̄ɛ̄ŋ māā lēpāla̍ fɔ̍.” O̍ ko̍ŋ kɔ̍ɔ̍lī, mi̍ kɔ̄l nyūlōo̍ ō mīīŋgū vɛ̄lɛ̄ o̍ lɛ̄ŋnde̍ŋ ni᷄ŋ. Le̍ wɔ̄sīla̍ŋ be̍le̍-hi̍ɔ̍ɔ̍lu̍ wāŋnda̍ I̍sɔ̄lūɛ̄ī a̍ cho̍ o̍ kɔ̄l nyūlōo̍ ni᷄ŋ.