Read Southern Kisi Chɔ̄ɔ̍chi̍a̍a̍ 8 Bible Online

Chɔ̄ɔ̍chi̍a̍a̍ 8 - Southern Kisi bible

Chɔ̄ɔ̍chi̍a̍a̍ 8

¹O̍ ko̍ŋ kɔ̍ɔ̍lī, mi̍ wāŋnda̍ E̍fi̍lūēm a̍ nyu̍nā Ki̍dīɔ̄ŋ āā, “Vɛ᷅ na̍a̍ tōsāllo̍ nu̍a̍ā? Vɛ᷅ a̍ ve̍e̍lu̍ na̍a̍ bōōndi̍i̍ ŋ̄ wa̍ kɔ̄la̍ŋ sɔ̍ŋgɔ̄ɔ̍ a̍ wāŋnda̍ Mi̍dīāŋ nde̍ le̍?” Mi̍ wāŋnda̍ E̍fi̍lūēm a̍ do̍u̍nu᷄ŋ ndu̍ tu̍mbe̍ ta̍u̍ ta̍u̍.

²Kɛ̍ mi̍ Ki̍dīɔ̄ŋ di̍mūl nda̍ āā, “Ō nya̍ tōsa̍ o̍ sɔ̍ŋgɔ̄ɔ̍ ho̍ō ni᷄ŋ ndo̍ wānā tu̍ū ndu̍ bɛ̍ɛ̍ a̍ ō ya̍ pi̍la̍ to̍sa̍ wo̍ le̍. I̍ ve̍e̍lu̍ nya̍ bɛ̍ɛ̍ le̍ ni̍, kɛ̍ ō nya̍ wāŋnda̍ E̍fi̍lūēm mɛ̍ɛ̍lu̍ tōsā wo̍, ndu̍ hi̍o̍ū a̍ ō ku̍ndā nūu̍ kpo̍u̍ o̍ to̍sa̍ wo̍.

³Tē ō wa̍ māā dīmī pɛ̍, nya̍ bɛ̍ɛ̍ kpe̍e̍kpe̍i̍ to̍sa̍ nyɛ̄ ni̍, ō cho̍ ya̍ le̍. Wāŋnda̍ Mi̍dīāŋ, wānāā ndāā bɛ̍ndūāā ŋīɔ̍ɔ̍ŋnda̍, O̍lu̍ɛ̍bī nda̍ Sɛ̍ɛ̍bī, mi̍ Mɛ̄lɛ̄ka̍ ke̍ nya̍ kpāāyāa̍ mi̍ lā nɔ̄lā mi̍ lā yām nda̍.” Mɛ̄ɛ̍ wāŋnda̍ E̍fi̍lūēm a̍ tu̍e̍ī nyɛ̄ Ki̍dīɔ̄ŋ o̍ di̍mi̍ wo̍, tu̍mbe̍ nda̍ dɔ̄ɔ̄nu᷄ŋ ndo̍, mi̍ kɔ̄lta̍ŋ lā pɔ̄lūl nda̍.

⁴Ki̍dīɔ̄ŋ ni̍, pūa̍a̍ ndūāā kɛ̍mɛ̄ le̍ ya̍a̍ wa̍ ni̍, ā wa̍ ni᷅ŋ ā sāŋgɛ̍i̍ya̍, kɛ̍ ma̍ hīāū lāchī a̍ ya̍a̍mɔ̍ɔ̍wa̍a̍ ndāa̍ kīlta̍ŋ kɔ̄ɔ̄lī. Ma̍ lō nda̍ kɔ̄ɔ̄lī ha̍a̍a̍ ma̍ tāŋ Chɔ̍ɔ̍dāŋ nda̍ŋ.

⁵Mɛ̄ɛ̍ nda̍ fūūlu̍u̍ Su̍kɔ̍tī chi̍e̍e̍, mi̍ Ki̍dīɔ̄ŋ o̍ di̍mūl wāŋ bɛ̄ndūāā chi̍e̍e̍ya̍ Su̍kɔ̍tī āā, “Yāndi̍i̍ tē lā nɔ̄ nyɛ̄ dīāā pɛ̍, lā ke᷄l la̍ pūa̍a̍ nīa̍a̍ chɔ̄ūwa̍ mā dē fɔ̍, ā sāŋga̍ ni᷅ŋ bɔ̄ɔ̍. Wāŋnda̍ Mi̍dīāŋ māsāa̍ ndāa̍, nda̍ yɔ̍nūŋ māā Sɛ̍bāā nda̍ Sālīmu̍nā ni̍, nda̍ na̍a̍ ŋ̄ chō kīlta̍ŋ kɔ̄ɔ̄lī ni̍.”

⁶Mi̍ wāŋ bɛ̄ndūāā chi̍e̍e̍ya̍ Su̍kɔ̍tī a̍ lo᷅ o̍ ko̍ŋ ma̍ dīmūl ndu̍ āā, “A̍ bi̍i̍ yɔ̍ Sɛ̍bāā nda̍ Sālīmu̍nā le̍, ā hīŋ na̍a̍ nyūnā le̍ mī ŋ̄ ke̍ pūa̍a̍ nu̍m ā chɔ̄ūwa̍ nyɛ̄ dīa̍a̍? Le̍ yɛ̄ɛ̄ na̍a̍ ŋ̄ kē yɛ̍ nu̍m nyɛ̄ dīa̍a̍ le̍ pūa̍a̍ nu̍m ā chɔ̄ūwa̍?”

⁷Mi̍ Ki̍dīɔ̄ŋ di̍mūl nda̍ āā, “I̍ si̍nā māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ ya̍ kpāāyāa̍ kē mī ye᷅m Sɛ̍bāā nda̍ Sālīmu̍nā. Ndu̍yɛ̍ tē I̍ kɔ̍ chi̍ī nda̍ yōmɔ̄ɔ̄ pɛ̍, mɛ̄ɛ̍ mī mi̍i̍ŋgu̍ na̍nu᷄ŋ, mī hu̍ŋ sɛ̍ɛ̍sīāā dīāllūŋ nyāa̍ŋ a̍ yɔ̄ɔ̄ŋ po̍llo̍ŋ o̍ ko̍ŋ kɔ̍ɔ̍lī, a̍ yɔ̄mīī ŋ̄yūɛ̍i̍ le̍ nyɛ̄ nya̍ sōō ho̍ō wo̍.”

⁸O̍ ko̍ŋ kɔ̍ɔ̍lī, mi̍ Ki̍dīɔ̄ŋ o̍ ma̍lnu᷄ŋ vɛ̍lɛ̄, mbo̍ hēl Pɛ̍nūɛ̄l chi̍e̍e̍. Mbo̍ kɔ̍ nyu̍nā wāŋnda̍ Pɛ̍nūɛ̄l le̍ mā ke̍ ndu̍ nyɛ̄ dīa̍a̍ le̍ pūa̍a̍ ndūa̍a̍. Kɛ̍ nda̍ bɛ̍ɛ̍ ma̍ mūlī ndu̍ dīōm mɛ̄ɛ̍ wāŋnda̍ Su̍kɔ̍tī a̍ mu̍li̍ ndu̍ dīōm yɛ̍ ko̍ni̍.

⁹Mi̍ Ki̍dīɔ̄ŋ o̍ di̍mūl wāŋnda̍ Pɛ̍nūɛ̄l āā, “I̍ si̍nā māā I̍ cho̍ lākɔ̄ mī kɔ̍ yo᷅m ya̍a̍mɔ̍ɔ̍wa̍a̍ nīa̍a̍. Ndu̍yɛ̍ tē I̍ kɔ̍ yo᷅m nda̍ pɛ̍, I̍ cho̍ mīīŋgū na̍nu᷄ŋ pi̍la̍. Bāndu̍ vi̍lɛ̄ī kālā ka̍lā nya̍ tāŋgu̍l ho̍ō le̍ cha᷄lle̍ lēchōo̍ le̍ mɛ̄ŋgɛ̄lāa̍ le̍ ya̍a̍mɔ̍ɔ̍wa̍ wo̍, I̍ cho̍ ndu̍ hūnɔ̄ɔ̄ pēsī pēsī wɔ̍ wɔ̍.”

¹⁰Sɛ̍bāā ni̍, Sālīmu̍nā ni̍, ā wa̍ Ka̍a̍kɔ̄ chi̍e̍e̍ nda̍ so̍vɛ̄i̍ya̍a̍ ndāa̍. Nda̍ a̍a̍ nɔ̍ pūa̍a̍ chɔ̄ūwa̍ wāa̍la̍ŋ tɔ̍ a̍ lā ŋūɛ̍ɛ̍nu̍ (15,000). Pūa̍a̍ ndāa̍ chɔ̄ūwāa̍ fu̍la̍ bā pāa̍le̍ŋ lē chāŋndo̍ wa̍, ā nda̍ a̍a̍ lo̍ ni᷅ŋ yōōmū wa̍, nda̍ ko̍ni̍ a̍ wa̍ ni᷅ŋ ka̍ŋ ni̍. Ā Ki̍dīɔ̄ŋ nda̍ pūa̍a̍ ndūa̍a̍ chɔ̄ūwa̍ ā dīu̍ wa̍, ā wa̍ wāa̍la̍ŋ kɛ̄mɛ̄ a̍ bi̍di̍i̍ŋ (120,000).

¹¹Mi̍ Ki̍dīɔ̄ŋ nda̍ pūa̍a̍ ndūa̍a̍ ā hōlnu᷄ŋ lɛ᷅ŋndē po̍lte̍ŋ kūmbū No̍bāā a̍ Cho̍kpɛ̍hāā wo̍, bā pāa̍le̍ŋ lē chāŋndo̍, ma̍ kɔ̍ wo̍o̍lū pūa̍a̍ chɔ̄ūwa̍ Mi̍dīāŋ, ma̍ chīŋa̍la᷅ŋ nda̍ a̍ sɔ̍ŋgɔ̄ɔ̍.

¹²O̍ ko̍ŋ, Sɛ̍bāā ni̍, a̍ Sālīmu̍nā, nda̍ yɔ̍nūŋ māā wāŋnda̍ Mi̍dīāŋ māsāa̍ ndāā bɛ̍ndūāā ŋīɔ̍ɔ̍ŋnda̍ ni̍, ma̍ nyāānu᷄ŋ. Kɛ̍ mi̍ Ki̍dīɔ̄ŋ nda̍ pūa̍a̍ ndūa̍a̍ chɔ̄ūwa̍ ā tīsā nda̍ kīlta̍ŋ kɔ̄ɔ̄lī, ma̍ lō nda̍ kīlta̍ŋ kɔ̄ɔ̄lī ha̍a̍a̍ ma̍ kɔ̍ bi̍ī nda̍. Pūa̍a̍ chɔ̄ūwāa̍ wa̍ nda̍ kɔ̄ɔ̄lī wa̍ kpo̍u̍ mi̍ Ki̍dīɔ̄ŋ nda̍ pūa̍a̍ ndūa̍a̍ chɔ̄ūwa̍ tōsā mi̍ sīōōŋīī bɛ̄ndūe̍i̍ ī bīī nda̍.

¹³Mɛ̄ɛ̍ Ki̍dīɔ̄ŋ, po̍ Cho̍wa̍sī wo̍ ō kɔ̍ chi̍ī ya̍a̍mɔ̍ɔ̍wa̍a̍ ndāa̍ yōmɔ̄ɔ̄ mbo̍ wā mīīŋgōo̍, mbo̍ kēēkū a̍ fo̍ndāŋ wānā a̍a̍ ke̍e̍kū mā he̍l Hɛ̄lu̍ɛ̍sī wo̍.

¹⁴Fūūlūūwo̍ lo̍ŋ, mi̍ Ki̍dīɔ̄ŋ bi̍ī po̍ chu̍ā pīāāndū pīlɛ̍ fūlāa̍ Su̍kɔ̍tī chi̍e̍e̍. Mɛ̄ɛ̍ o̍ bi̍ī ndu̍, mbo̍ dīmūl ndu̍ māā ō pōōnyi̍a̍l ndu̍ dīōlā wānāā bɛ̄ndūa̍a̍ a̍ lāŋgba̍ā kālla̍ Su̍kɔ̍tī chi̍e̍e̍ kpo̍u̍. O̍ ko̍ŋ, mi̍ pōo̍ pōōnyīāl ndu̍ dīōlā ndāla̍ŋ kpo̍u̍. Ā wa̍ kpo̍u̍ kpo̍u̍ ŋ̄wāŋ be̍le̍-ŋɔ̍mmɛ̍ū a̍ wānāā ŋɔ᷄mmɛ̍ū.

¹⁵O̍ ko̍ŋ kɔ̍ɔ̍lī, mi̍ Ki̍dīɔ̄ŋ o̍ ku̍ā Su̍kɔ̍tī chi̍e̍e̍. Mbo̍ kɔ̍ di̍mūl pūa̍a̍ Su̍kɔ̍tī āā, “Lā lōōnūŋ nyɛ᷅ nya̍ dīmu̍l la̍ wo̍? I̍ wa̍ Sɛ̍bāā nda̍ Sālīmu̍na̍ tōūwɔ̄ɔ̍, mi̍ hu̍ŋ nyu̍nā nya̍ le̍ mī lā ke᷄l la̍ pūa̍a̍ chɔ̄ūwa̍ nyɛ̄ dīa̍a̍. Mi̍ lā mām ya̍, mi̍ lā dīmūl la̍ āā, ‘A̍ nɔ̍la̍ wɔ̍ mā bīī Sɛ̍bāā nda̍ Sālīmu̍nā le̍, ā hīŋ na̍a̍ nyūnā le̍ mī ŋ̄ ke̍ pūa̍a̍ nu̍m ā chɔ̄ūwa̍ nyɛ̄ dīa̍a̍? Le̍ yɛ̄ɛ̄ na̍a̍ ŋ̄ kē yɛ̍ nu̍m nyɛ̄ dīa̍a̍?’ Le̍la̍ŋ lā chē ni̍ko̍ Sɛ̍bāā nda̍ Sālīmu̍nā.”

¹⁶O̍ ko̍ŋ, mi̍ Ki̍dīɔ̄ŋ o̍ chu̍ā yɔ̄ɔ̄ŋ po̍llo̍ŋ, o̍ ko̍ŋ kɔ̍ɔ̍lī, a̍ yɔ̄mīī ŋ̄yūɛ̍i̍, mbo̍ sūāŋ wāŋ bɛ̄ndūāā chi̍e̍e̍ya̍ Su̍kɔ̍tī sōŋɔ̄ɔ̍ pīla̍, le̍ nda̍ chɔ̄mndo̍ māā nyɛ̄ nda̍ tōsa̍ wo̍ ō ni᷄ŋ te̍.

¹⁷O̍ ko̍ŋ kɔ̍ɔ̍lī, bāndu̍ vi̍lɛ̄ī kālā ka̍lā wāŋnda̍ Pɛ̍nūɛ̄l a̍ ta̍ŋgu̍l le̍ cha᷄lle̍ le̍ mɛ̄ŋgɛ̄lāa̍ le̍ ya̍a̍mɔ̍ɔ̍wa̍ wo̍, mi̍ Ki̍dīɔ̄ŋ pe̍sī pēsī ndu̍ wɔ̍ wɔ̍. Ndu̍yɛ̍ o̍ ko̍ŋ kɔ̍ɔ̍lī, mbo̍ dīū wāŋ pīāāndūa̍a̍ wa̍ lo̍ŋ nda̍ kpo̍u̍.

¹⁸Mi̍ Ki̍dīɔ̄ŋ o̍ lo᷅ o̍ ko̍ŋ mbo̍ nyūnā Sɛ̍bāā nda̍ Sālīmu̍nā āā, “Pūa̍a̍ nya̍ dīu̍ Ta̍bɔ̄ɔ̄ wa̍ wānāā māāvɛ̄ɛ̄ nda̍ wa̍ yɛ̍.” Ma̍ dīmūl Ki̍dīɔ̄ŋ āā, “Mɛ̄ɛ̍ mɛ̄ɛ̍ ŋ̄ chō nu̍a̍ā, le̍nde̍ ko̍ni̍ pūa̍a̍ ka̍ŋ bɛ̍ɛ̍ a̍ wa̍ ni̍. Nda̍ kpo̍u̍ wānā a̍a̍ che᷅ nda̍ pɛ̍ āā chūāūwāā lēmāsāa̍ ni̍.”

¹⁹Mi̍ Ki̍dīɔ̄ŋ di̍mūl nda̍ āā, “Pūa̍a̍ nya̍ dīu̍ ka̍ŋ nda̍, na̍a̍ na̍a̍ nda̍ā kālāa̍ ndu̍ pīlɛ̍ kpe̍ ve̍lū na̍a̍ ni̍. I̍ me̍na̍ŋ o̍ Mɛ̄lɛ̄ka̍ Ya̍a̍wɛ̄ɛ̄ po̍, Mɛ̍lɛ̄ka̍ nūu̍, tē nya̍ a̍a̍ di̍u̍ pu̍a̍a̍ ka̍ŋ te̍, I̍ ve̍ nya̍ dīyɔ̄ɔ̄ le̍.”

²⁰Mi̍ Ki̍dīɔ̄ŋ di̍mūl Chɛ̍tɛ̄ɛ̄, ndu̍ yɔ̍nūŋ māā po̍ ndɔ̍ tāso̍o̍ ni̍ āā, “Kɔ̍ mā kɔ̍ di̍ī nda̍.” Kɛ̍ sīōōŋnde̍ wa̍ pōo̍mbɔ̄ɔ̍, kāni̍ fo̍ndōle̍, ō ve̍ wɔ̍ o̍ bɔ̍ɔ̍ le̍. Le̍ he̍ī, mbo̍ wō le̍ mūɛ̍i̍ sōlīo̍o̍ mbō dīu̍ nda̍.

²¹O̍ ko̍ŋ, mi̍ Sɛ̍bāā nda̍ Sālīmu̍nā a̍ di̍mūl Ki̍dīɔ̄ŋ āā, “Nūm pi̍la̍ hu̍ŋ mā hu̍ŋ di̍ū na̍a̍ fāllo̍. Ō cho̍ su̍ɛ̍i̍ chūāāmbɔ̄ tōsa̍ le̍ i̍ cho̍ he̍ī le̍.” O̍ ko̍ŋ, mi̍ Ki̍dīɔ̄ŋ pi̍la̍ ku̍ā mbo̍ kɔ̍ di̍ū nda̍. O̍ ko̍ŋ kɔ̍ɔ̍lī, nyɛ̄m kɛ̄ndɛ̄ kɛ̍ndɛ̄i̍ wa̍ nyɔ̍mi̍a̍a̍ ndāa̍ ŋ̄ bāāyīāā o̍ lābo̍lō wo̍ŋ mbo̍ sōōlūū.

²²O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ di̍mūl Ki̍dīɔ̄ŋ āā, “Ŋ̄ yēēma̍ nu̍m mā wa̍ na̍a̍ chōo̍ ma̍sāa̍, ndu̍yɛ̍ ā yɔ᷄ŋ bɛ̍ɛ̍ mā hu̍ŋ fa̍ŋa᷅ŋ fɛ̍ɛ̍ŋ, mī pūa̍a̍ nu̍mnda̍, a̍ pūa̍a̍ nu̍m ā māmāa̍ ā hīōū lāchī a̍ wāa̍ māsāa̍ lɛ̄ŋnde̍ŋ nde᷅ŋ chōo̍. Kāni̍ fo̍ndōle̍, nu̍m chi̍i̍ndi̍a̍a̍ yōōmūlā nāāla̍ŋ ni̍, ma̍ sōlī na̍a̍ wāŋnda̍ Mi̍dīāŋ o̍ bā.”

²³Kɛ̍ mi̍ Ki̍dīɔ̄ŋ o̍ di̍mūl nda̍ āā, “Ō cho̍ ya̍ le̍ nɔ̍ mī wa̍ nya̍ chōo̍ ma̍sā le̍. Ndu̍yɛ̍ pūa̍a̍ nīa̍a̍ bɛ̍ɛ̍ ō cho̍ nda̍ le̍ nɔ̍ mā wa̍ nya̍ chōo̍ la̍ma̍sā le̍. Mɛ̄lɛ̄ka̍ Ya̍a̍wɛ̄ɛ̄, ndu̍ nɔ̍ ni̍ mbō wa̍ nya̍ chōo̍ ma̍sāa̍.”

²⁴Mi̍ Ki̍dīɔ̄ŋ o̍ hi̍a̍ū a̍ sūɛ̍i̍, mbo̍ dīmūl nda̍ āā, “Kɛ̍ I̍ ye̍e̍ma̍ nya̍ mī lā tōsa̍l īsɔ̄ɔ̍. Nyɛ̄m nya̍ pūŋga̍ ya̍a̍mɔ̍ɔ̍wa̍ o̍ lābā wo̍ŋ, I̍ ye̍e̍ma̍ mī wānā o̍ wānā o̍ ke̍ ya̍ kēla̍ŋ lānīŋ o̍ sɔ̍la̍ o̍ chu̍a̍ wo̍ŋ.” Ndu̍yɛ̍ wāŋnda̍ I̍sɔ̄lūɛ̄ī ya̍a̍mɔ̍ɔ̍wa̍a̍ ndāa̍ ha̍ā, Īsīmāli̍īya̍ nda̍ wa̍ ni̍. Īsīmāli̍īya̍ yɛ̍, nda̍ kpo̍u̍ kēla᷄ŋ lānīŋ ŋ̄ko̍o̍līi̍yo̍ŋ nda̍ a̍a̍ wo̍u̍nūŋ ni̍.

²⁵Mi̍ wāŋnda̍ I̍sɔ̄lūɛ̄ī a̍ di̍mūl Ki̍dīɔ̄ŋ āā, “Kpo̍o̍ fāllo̍, tē ō wa̍ le̍ kēlāŋ mu̍ŋ pɛ̍, ŋ̄ chɛ᷄l mī ŋ̄ ke̍ nu̍m.” O̍ ko̍ŋ, ma̍ pɛ̄ŋgɛ̄lā dōmā bɛ̍ndōo̍ lɛ̄ŋ, nda̍ kpo̍u̍ mi̍ wānā o̍ wānā o̍ hu᷅ŋ a̍ kēla᷄ŋ lānīŋ o̍ sɔ̍la̍ o̍ nyɛ̄m nda̍ pūŋga̍ ya̍a̍mɔ̍ɔ̍wa̍ o̍ lābā wo̍ŋ ni᷄ŋ ndo̍ŋ, mbo̍ hu᷄ŋ ma᷅l o̍ dōmā ko̍ŋ chōo̍.

²⁶Ma̍ hūŋ a̍ kēla̍ŋ lānīo̍ŋ ta̍u̍ ta̍u̍. Kēla᷄ŋ lānīŋ nda̍ chūu̍ Ki̍dīɔ̄ŋ ndo̍ŋ, ŋ̄ wa̍ pa᷅ŋnda̍ŋ be̍le̍-hi̍ɔ̍ɔ̍lu̍ a̍ lā yāa̍. O̍ ko̍ŋ kɔ̍ɔ̍lī mi̍ Ki̍dīɔ̄ŋ o̍ sɔ̍lā vɛ̄lɛ̄ nyɛ̄m chēle̍ŋ ta̍u̍ ta̍u̍. Mbo̍ sɔ̄lā nyɛ̄m kɛ̄ndɛ̄ kɛ̍ndɛ̄ŋ māsāa̍ Mi̍dīāŋ ndu̍ o̍o̍ wo̍u̍nūŋ ndo̍ŋ, a̍ yɔ̄lɔ̄ŋ kɛ̍ndɛ̄ kɛ̍ndɔ᷄ŋ, a̍ dōmāla̍ lēmāsālā kɛ̍ndɛ̄ kɛ̍ndɛ̄la̍ŋ, ndu̍yɛ̍ a̍ nyɛ̄m nda̍ a̍a̍ ba̍i̍yīāā nyɔ̍mi̍a̍a̍ o̍ lābo̍lō la̍ŋ.

²⁷Mɛ̄ɛ̍ Ki̍dīɔ̄ŋ o̍ sɔ̍la̍ kēla᷄ŋ lānīŋ ŋ̄ko̍o̍līi̍yo̍ŋ mu̍ŋ, mbo̍ lō o̍ ko̍ŋ, mbo̍ tēēŋgīāā mu̍ŋ, mbo̍ tōōsīāā dōma̍ wānāā sōlīāā lāsa̍lāa̍ nda̍ a̍a̍ wo̍u̍nūŋ le̍ Mɛ̄lɛ̄ka̍ dīōmndo̍ nyūnāa̍ wo̍, mbo̍ kɛ̄sī ndu̍ o̍ ndu̍lo̍ chi̍e̍e̍ Ōfi̍i̍lūā. Kɛ̍ mi̍ wāŋnda̍ I̍sɔ̄lūɛ̄ī a̍ mu̍li᷄ŋ do᷅māa̍ ho̍ō sōōlūūwo̍. Nda̍ kpo̍u̍, ma̍ kɛ̄ɛ̄ Mɛ̄lɛ̄ka̍ ma̍ mūli᷄ŋ do᷅māa̍ ho̍ō sōōlūūwo̍. O̍ ko̍ŋ, mi̍ dōmāa̍ ho̍ō sīmnu᷄ŋ ya̍ŋɔ̄ɔ̄le̍ŋ le̍ Ki̍dīɔ̄ŋ nda̍ yu̍ŋgu̍ ndɔ̄ɔ̍.

²⁸Mɛ̄ɛ̍ nu̍a̍ā I̍sɔ̄lūɛ̍i̍ya̍ ā lōōku̍ wāŋnda̍ Mi̍dīāŋ bɛ̄ɛ̄vīāā ni̍, ma̍ tōsā wāŋnda̍ Mi̍dīāŋ a̍ nɔ̍la̍ lɛ̍ mā chɛ᷄ŋ te̍. Ndu̍yɛ̍ chɔ̍ŋ a̍ te̍le̍ŋ nda̍ yēm wāŋnda̍ Mi̍dīāŋ yōmɔ̄ɔ̄ kōŋ ndo̍, ha̍a̍a̍ a̍ mɛ̄ɛ̄lu̍la̍ yōōmu̍ Ki̍dīɔ̄ŋ ndo̍, lɛ̄ŋndē I̍sɔ̄lūɛ̍i̍le̍ŋ lē wa̍ o̍ kɔ̄l nyūlōo̍ ni᷄ŋ. Le̍ wɔ̄sīla̍ŋ be̍le̍-hi̍ɔ̍ɔ̍lu̍, lɛ̄ŋnde̍ŋ lē wa̍ o̍ kɔ̄l nyūlū ni᷄ŋ.

²⁹O̍ ko̍ŋ kɔ̍ɔ̍lī, mi̍ Ki̍dīɔ̄ŋ, ō ndu̍ o̍o̍ nɔ̍ vɛ̄lɛ̄ dīōla̍ŋ āā Chɛ̄lu̍bāā wo̍, po̍ Cho̍wa̍sī wo̍ o̍ mi̍i̍ŋgū o̍ ndu̍lo̍ chi̍e̍e̍, mbo̍ kɔ̍ cha᷅l lo̍ŋ.

³⁰Ki̍dīɔ̄ŋ yɛ̍, ndu̍ o̍o̍ ve̍lū pūa̍a̍ ŋ̄wāŋ be̍le̍-ŋɔ̍mmɛ̍ū, kāni̍ fo̍ndōle̍, lāāndūa̍a̍ pīla̍ ndu̍ o̍o̍ nɔ̍ ni̍.

³¹O̍ ko̍ŋ kɔ̍ɔ̍lī, ndu̍ o̍o̍ nɔ̍ vɛ̄lɛ̄ la̍nɔ̍ pɔ̍mbɔ̄ pīlɛ̍ Si̍ɛ̍kɛ̄m chi̍e̍e̍. La̍nɔ̍ pɔ̍mbɔ̄ kōŋ bɛ̍ɛ̍ mbo̍ vīlūl ndu̍ pōo̍, ma̍ kē ndu̍ dīōla̍ŋ āā Ābīmɛ̍lɛ̍kī.

³²O̍ ko̍ŋ kɔ̍ɔ̍lī, mi̍ Ki̍dīɔ̄ŋ, po̍ Cho̍wa̍sī wo̍ ō wū. Ndu̍yɛ̍ ō wa̍ ni᷅ŋ ō yūvɛ̍i̍ ku̍ndɛ̍ɛ̄ mbo̍ wū. Mɛ̄ɛ̍ o̍ vi᷅ ma̍ chɔ̄ ndu̍ Ōfi̍i̍lūā o̍ ndu̍lo̍ chi̍e̍e̍, o̍ būŋgɛ̄ī Ābīɛ̍ɛ̍sā ve̍ ni᷅ŋ, o̍ sɛ̄i̍ nda̍ yu̍ŋgo̍o̍ ni᷄ŋ.

³³Dīmīo̍o̍ nu̍a̍ā mi̍ Ki̍dīɔ̄ŋ o̍ wu᷅, mi̍ wāŋnda̍ I̍sɔ̄lūɛ̄ī a̍ kɛ̍ɛ̄ vɛ̄lɛ̄ wāa̍ sa̍kpō a̍ Mɛ̄lɛ̄ka̍, ma̍ mūli᷄ŋ vɛ̍lɛ̄ Bāāl sōōlūūwo̍. Ma̍ sīīŋgūū Ba̍a̍l mɛ̄lɛ̄ka̍ ndā, mā yīī kpe̍ma̍a̍ a̍ ndu̍.

³⁴O̍ ko̍ŋ, ma̍ kɛ̄ɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndāa̍, o̍ ba̍ŋa̍ yōōmūlā ndāla̍ŋ ya̍a̍mɔ̍ɔ̍wa̍a̍ ndāa̍ o̍ bā wo̍, a̍ wa̍ nda̍ ā bālāā kpɔ̍kɔ̍su̍ wa̍.

³⁵Ndu̍yɛ̍ o̍ ko̍ŋ kɔ̍ɔ̍lī, Ki̍dīɔ̄ŋ, ō ndu̍ o̍o̍ nɔ̍ vɛ̄lɛ̄ dīōla̍ŋ āā Chɛ̄lu̍bāā wo̍, kɛ̄ndɛ̄ī bɛ̍ndūī o̍ tōsa̍l I̍sɔ̄lūɛ̍i̍ya̍ kpo̍u̍ ve̍, ma̍ kɛ̄ɛ̄ le̍ yu̍ŋgu̍ ndɔ̄ɔ̍ kɛ̄ndɛ̄ī ke̍ŋ mīŋgūllo̍.