Read Southern Kisi Chɔ̄ɔ̍chi̍a̍a̍ 9 Bible Online

Chɔ̄ɔ̍chi̍a̍a̍ 9 - Southern Kisi bible

Chɔ̄ɔ̍chi̍a̍a̍ 9

¹Ō wa̍ a̍ te̍le̍ŋ pi᷅lɛ̍, mi̍ Ābīmɛ̍lɛ̍kī, po̍ Ki̍bīɔ̄ŋ ndo̍ ō mālnu᷄ŋ wa̍ŋ mbo̍ kūā o̍ bōmīī ndūɛ̍i̍ Si̍ɛ̍kɛ̄m chi̍e̍e̍, nāa̍ wānāya᷅ŋ kāla᷄ŋ ndɔ᷄ŋ chūa̍. Mbo̍ dīmūl nda̍

²le̍ ma̍ nyūna̍ wāŋnda̍ Si̍ɛ̍kɛ̄m kpo̍u̍ āā, “Pūa̍a̍ be̍le̍-ŋɔ̍mmɛ̍ūwāa̍ Ki̍dīɔ̄ŋ nda̍ wāa̍ nya̍ chōo̍ ma̍sāa̍, a̍ wānā pi᷅lɛ̍ wāa̍ nya̍ chōo̍ ma̍sāa̍, o̍ kūɛ̍ɛ̍nɛ̍ nya̍ yēēma̍ yɛ̄? Ndu̍yɛ̍, lā lōōnu̍ŋ māā Ābīmɛ̍lɛ̍kī bɛ̍ɛ̍ nya̍ nda̍ā dīālle̍ ī pīlɛ̍ a̍ kōo̍ma̍ pi᷅li̍a̍ŋ kpe̍ nya̍ chō ni̍.”

³O̍ ko̍ŋ mi̍ bōmāa̍ Ābīmɛ̍lɛ̍kī wa̍ vēēlū wāŋnda̍ Si̍ɛ̍kɛ̄m kpo̍u̍, ma̍ sūāā nāa̍ nda̍ chu̍a̍ a̍ tōōŋgo̍o̍ nda̍ o̍kɔ̄ɔ̄. Mɛ̄ɛ̍ wāŋnda̍ Si̍ɛ̍kɛ̄m kpo̍u̍ a̍ tu̍e̍ī nyɛ̄ wāŋnda̍ dīmu̍l nda̍ a̍ Ābīmɛ̍lɛ̍kī o̍kɔ̄ɔ̄ wo̍, nda̍ kpo̍u̍ ma̍ kɛ̄ɛ̄sīāā le̍ Ābīmɛ̍lɛ̍kī hīōūwɔ̄ɔ̍ kɔ̄ɔ̄lī, fo̍ndōle̍ le̍ mɛ̄ɛ̍ o̍ wa̍ po᷄ ndā vi̍a̍lāa̍ yɛ̍.

⁴O̍ ko̍ŋ kɔ̍ɔ̍lī, ma̍ chūā nyɛ̄ sɔ̄lāa̍ ka̍ni̍ŋ hu̍mbo᷄ŋ be̍le̍-ŋɔ̍mmɛ̍ū ō chīɛ̄ī nda̍ a̍a̍ so̍o̍lūū Bāāl wo̍ ni᷄ŋ, mɛ̄lɛ̄ka̍ wāŋnda̍ nda̍ a̍a̍ yi̍ī kpe̍ma̍a̍ ō ndu̍ lo̍ wo̍, ma̍ kē Ābīmɛ̍lɛ̍kī. Mi̍ Ābīmɛ̍lɛ̍kī o̍ chu̍ā nyɛ̄ sɔ̄lāā kōŋ mbo̍ kɔ̍ hi̍o̍ū pūa̍a̍ kɔ̄l vēsɛ̍i̍ya̍a̍ bɛ̍ndūa̍a̍ bu̍u̍la̍ŋ le̍ īsɔ̄ɔ̍ o̍ īsɔ̄ɔ̍ wɔ̍ɔ̍ŋ tōsā le̍ wa̍ kɔ̄ɔ̄lī, ma̍ tūāl ndu̍ kɔ̄ɔ̄lī.

⁵O̍ ko̍ŋ kɔ̍ɔ̍lī, mi̍ Ābīmɛ̍lɛ̍kī chu̍ā pūa̍a̍ kɔ̄l vēsɛ̍i̍ya̍a̍ o̍ hi̍o̍ū ka̍ŋ kɔ̍ɔ̍lī wa̍, mbo̍ kūā a̍ nda̍ o̍ fi̍nyā ndɔ̄ lo̍ chi̍e̍e̍ Ōfi̍i̍lūā. Mɛ̄ɛ̍ o̍ ku̍ɛ̄, ndu̍ ni̍, pūa̍a̍ kɔ̄l vēsɛ̍i̍ya̍a̍ o̍ hi̍o̍ū ka̍ŋ kɔ̍ɔ̍lī wa̍ ni̍, ma̍ dēl pūa̍a̍ be̍le̍-ŋɔ̍mmɛ̍ūwāa̍ fi̍nyā ndɔ̄ wa̍ ā pīli̍a̍a̍ chōo̍ ma̍ dīū nda̍ o̍ pōū pūm chōo̍ lo̍ŋ. Kɛ̍ mi̍ Cho̍tām, ndu̍ yɔ̍nūŋ māā pɔ̄mbɔ̄ nda̍ lu᷅mndo̍ ni̍, mi̍ ndu̍ nya̍a̍nu᷄ŋ mbo̍ vīāŋnu᷄ŋ.

⁶O̍ ko̍ŋ kɔ̍ɔ̍lī, mi̍ pi̍la̍ chi̍e̍e̍ya̍ Si̍ɛ̍kɛ̄m chi̍e̍e̍ a̍ ha̍ā Bɛ̍tī Mi̍lo̍ chi̍e̍e̍ a̍ chu̍ūŋgi̍āŋ o̍ yɔ̄m ɔ̍kū wo̍ bɛ̄ŋgu̍, nāa̍ nda̍ a̍a̍ so̍o̍lūū mɛ̍lɛ̄ka̍ ndāa̍ wa̍. O̍ ko̍ŋ, ma̍ sīīŋgūū Ābīmɛ̍lɛ̍kī māsāa̍.

⁷Mɛ̄ɛ̍ Cho̍tām o̍ tu̍e̍ī a̍ nyɛ̍ yɔ̍nu̍ŋndo̍, mbo̍ hēl o̍ Pēmbīī Kɛ̍lu̍i̍sīmnde̍ chōo̍ mbo̍ kɔ̍ si᷅m o̍ pēmbēi̍ bōlle̍ŋ, mbo̍ yōndā chōo̍ cho̍o̍ kpe̍le̍ŋ mbo̍ dīmī āā, “Lā ya᷄ŋ ya̍ nīla̍ŋ nya̍ pi̍la̍ chi̍e̍e̍ya̍ Si̍ɛ̍kɛ̄m chi̍e̍e̍, mī lā tūēī tālo̍o̍ ho̍ō. Kɛ̄lɛ̄ŋgāā ndɔ̍ɔ̍ mī Mɛ̄lɛ̄ka̍ ya᷄ŋ nya̍ nīla̍ŋ.

⁸Yɔ̄mnde̍ chɛ̍ŋ si̍ndɛ̄ ni̍, mi̍ ī yēēmā le̍ māsāa̍ chūa̍a̍. Mi̍ ī dīmūl yɔ̄m ɔ̄li̍fīi̍ wo̍ āā, ‘Wa̍ na̍a̍ chōo̍ ma̍sā.’

⁹Kɛ̍ mi̍ yɔ̄m ɔ̄li̍fīi̍ wo̍ ō kɛ̄ɛ̄. Mbo̍ dīmūl yɔ̄mnde̍ he̍ī āā, ‘Chūɛ̄īma̍ to̍sā mī mɛ̄lɛ̄ka̍a̍ a̍ wāŋndā chīe̍e̍ya̍ ā sɔ̄la̍ bɛ̄ɛ̄le̍ nda̍ŋ, ya̍ to̍o̍sīāā ma̍ŋ ni̍. Bāā I̍ ma̍l chu̍ɛ̍i̍mā māŋ tōōsīa̍a̍ le̍ hāli̍kpe̍ŋ mī si̍mnu᷄ŋ ma̍sāa̍ mī wa̍ nya̍ ni᷅ŋ kpo̍u̍ bɔ̍lle̍ŋ?’

¹⁰O̍ ko̍ŋ kɔ̍ɔ̍lī, mi̍ yɔ̄mnde̍ he̍ī ī dīmūl yɔ̄m fi̍kīi̍yo̍ āā, ‘Mɛ̄ɛ̍ nūm hu̍ŋ mā wa̍ na̍a̍ chōo̍ ma̍sāa̍.’

¹¹Kɛ̍, yɔ̄m fi̍kīi̍yo̍ mbo̍ kɛ̄ɛ̄. Mbo̍ dīmī āā, ‘I̍ me᷅l wa̍li̍ nūu̍ tōsāa̍, ndu̍ yɔ̍nūŋ ni̍ māā le̍ wāŋnda̍ kōmɔ̄ɔ̄ nī kɛ̍ndɛ̄ yēēlɛ̍i̍yo̍ kīo̍o̍ mī si̍mnu᷄ŋ ma̍sāa̍ mī wa̍ ni᷅ŋ nya̍ kpo̍u̍ bo᷅lle̍ŋ te̍.’

¹²O̍ ko̍ŋ kɔ̍ɔ̍lī, mi̍ yɔ̄mnde̍ he̍ī ī dīmūl yɔ̄m mākīle̍pīi̍yo̍ āā, ‘Mɛ̄ɛ̍ nūm hu̍ŋ mā hu̍ŋ wa̍ na̍a̍ chōo̍ ma̍sāa̍.’

¹³Mi̍ yɔ̄m mākīle̍pīi̍yo̍ dīmūl ndi̍ āā, ‘Ya̍ to̍o̍sīāā mu̍ɛ̍īma̍ to̍sā ma᷅ŋ mī mɛ̄lɛ̄ka̍a̍ a̍ wāŋndā chīe̍e̍ya̍ ā dɔ̄ɔ̄nu᷄ŋ nya̍a̍le̍ wa̍ŋ ni̍. Bāā I̍ ma̍l wa̍li̍ nī ko̍ŋ le̍ mī si̍mnu᷄ŋ ma̍sā mī wa̍ ni᷅ŋ nya̍ kpo̍u̍ bo᷅lle̍ŋ?’

¹⁴O̍ mɛ̄ɛ̄lu̍la̍ŋ kpɔ̍ŋ mi̍ yɔ̄mnde̍ he̍ī ī dīmūl yɔ̄m ŋyɔ̄ɔ̍ āā, ‘Mɛ̄ɛ̍ yɔ̄mnde̍ he̍ī kpo̍u̍ i̍ kɛ̍ɛ̍ le̍ na̍a̍ wāa̍ chōo̍ la̍ma̍sā yɛ̍, mɛ̄ɛ̍ nūm hu̍ŋ mā wa̍ na̍a̍ chōo̍ ma̍sā.’

¹⁵Mi̍ yɔ̄m ŋyɔ̄ɔ̍ lō o̍ ko̍ŋ mbo̍ dīmūl yɔ̄mnde̍ he̍ī āā, ‘Tē lā yēēma̍ ya̍ mī si̍mnu᷄ŋ ma̍sā nya̍ chōo̍ lēkɛ̍ndɛ̍ī pɛ̍, mɛ̄ɛ̍ nya̍ kpo̍u̍ lā hu᷄ŋ cha᷅l o̍ wūndu̍ma̍ nīa̍a̍ŋ bɛ̄ŋgu̍ mī ma̍nda̍ nya̍. Kɛ̍ tē ō wa̍ pɛ̍ māā hūīyo̍ ko̍ni̍ nya̍ chō ya̍ ni̍, I̍ cho̍ tōsā mī yīŋndē bɛ̄nde̍ŋ lē fūla̍ o̍ lɛ̄ūwūŋ ni̍ ŋyɔ̄ɔ̍ mī lē kɔ̍ lo᷅m yɔ̄mīī si̍dāā ve̍ kpo̍u̍ Le̍ba̍nɔ̄ŋ.’ ”

¹⁶Mi̍ Cho̍tām hi̍a̍ū lāchī a̍ sūɛ̍i̍ mbo̍ dīmī āā, “Nya̍ wāŋnda̍ Si̍ɛ̍kɛ̄m a̍ wāŋnda̍ Bɛ̄tī Mi̍lo̍, lā nɔ̄ o̍ kɔ̄l, ī chō o̍ nɛ̄ī kpe̍e̍kpe̍i̍ le̍ mī lā sīīŋgu̍u̍ Ābīmɛ̍lɛ̍kī māsāa̍? Kɛ̄ndɛ̄i̍ Ki̍dīɔ̄ŋnde̍, ndi̍ nya̍ lōōnu̍ŋ he̍ī ni̍ mi̍ lā mīŋgūl yu̍ŋgu̍ ndɔ̄ɔ̍? Bɛ̄ɛ̄le̍ fi̍nyā nūu̍ nɔ̄ mbō sɔ̄la̍ le̍ŋ le̍ŋ nya̍ ke᷄ ndu̍ le᷅ŋ ni̍?

¹⁷Lā yīya̍ŋ ndɔ̍ a̍ mɛ̄ɛ̍ fi̍nyā nūu̍ ō sɔ̄ŋga̍ le̍ nya̍, mbo̍ pīsī yōōmū ndɔ̄ɔ̍ chi̍ le̍ nya̍ bāŋāa̍ wāŋnda̍ Mi̍dīāŋ o̍ bā yɛ̍.

¹⁸Kɛ̍ nya̍ kpo̍u̍ mi̍ lā bīī kɔ̄llo̍ mi̍ lā sīmūl yu̍ŋgu̍ fi̍nyā nūu̍ pāa̍le̍ hāūle̍ŋ nde᷅ŋ. Pūa̍a̍ ndūāā ŋ̍wa᷅ŋ be̍le̍-ŋɔ̍mmɛ̍ū wa̍ mi̍ lā dīū nda̍ o̍ pōū pīlɔ̍ɔ̍ chōo̍. Mi̍ lā sīīŋgūū Ābīmɛ̍lɛ̍kī, po᷄ fi̍nyā nūu̍ vēlū a̍ wānā la̍nɔ̍ chi̍ɔ̍ɔ̍ wo̍ māsāa̍ nya̍ chōo̍, fo̍ndōle̍ le̍ mɛ̄ɛ̍ o̍ cho̍ tōōŋgo̍o̍ nya̍ yɛ̍.

¹⁹Kɛ̍ ndu̍yɛ̍, nyɛ̄ nya̍ tōsa̍l Ki̍dīɔ̄ŋ nda̍ yu̍ŋgu̍ ndɔ̄ɔ̍ pāa̍le̍ hāūle̍ŋ nde᷅ŋ ndo̍, tē o̍ nɛ̄ī kpe̍e̍kpe̍i̍ nya̍ tōsa̍ ndi̍ ni̍, mɛ̄ɛ̍ Mɛ̄lɛ̄ka̍ tōsa̍ nya̍ ni̍, Ābīmɛ̍lɛ̍kī ni̍, mī lā wa̍ a̍ kɔ̄l nyūlū vēllāa̍ vēllē fɔ̍.

²⁰Kɛ̍ tē ō cho̍ o̍ nɛ̄ī kpe̍e̍kpe̍i̍ le̍ nya̍ tōsa̍ ndi̍ le̍, nu̍a̍ā yīŋndē bɛ̄nde̍ŋ lē kīōlu̍ A̍bīmɛ̍lɛ̍kī o̍ bā mī lē lōm nya̍ fɔ̍. Ndu̍yɛ̍ mbɔ̄ māā nya̍ wāŋnda̍ Si̍ɛ̍kɛ̄m ni̍, nya̍ wāŋnda̍ Bɛ̄tī Mi̍lo̍ ni̍, nu̍a̍ā yīŋnde̍ŋ lē kīōlu̍ nya̍ o̍ bā mī lē lōm Ābīmɛ̍lɛ̍kī fɔ̍.”

²¹Mɛ̄ɛ̍ Cho̍tām chi̍i̍ dīōmnda̍ŋ ndāŋ dīmī, mbo̍ nyāānu᷄ŋ mbo̍ kɔ̍ cha᷅l Bi̍a̍ā chi̍e̍e̍. Kāni̍ fu̍u̍le̍, ō wa̍ sīōōŋīi̍ Ābīmɛ̍lɛ̍kī bɛ̍ndɔ̄ ve̍.

²²O̍ ko̍ŋ, mi̍ Ābīmɛ̍lɛ̍kī wa᷅ ni̍ko̍ māsāa̍ le̍ I̍sɔ̄lūɛ̄ī. Mbo̍ tōsā māsāle̍ŋ le̍ wɔ̄sīla̍ŋ lā yāa̍.

²³O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ tōsā mi̍ ya̍a̍mɔ̍ɔ̍le̍ŋ lē lūɛ̄ī Ābīmɛ̍lɛ̍kī tɛ̄ɛ̄ŋ nda̍ wāŋnda̍ Si̍ɛ̍kɛ̄m. Mi̍ wāŋnda̍ Si̍ɛ̍kɛ̄m a̍ si̍mūl Ābīmɛ̍lɛ̍kī sīmūllo̍ pīla̍.

²⁴Le̍ sa̍bū Mɛ̄lɛ̄ka̍ tōsa̍ sūɛ̍i̍ he̍ī yo̍ cho̍ ni̍, māā le̍ mbō mīŋgu̍l Ābīmɛ̍lɛ̍kī nda̍ wāŋnda̍ Si̍ɛ̍kɛ̄m māa̍ le̍ dīyɔ̄ɔ̄ Ābīmɛ̍lɛ̍kī o̍ di̍ī pūa̍a̍ be̍le̍-ŋɔ̍mmɛ̍ūwāa̍ Ki̍dīɔ̄ŋ nda̍ wo̍. Ndu̍yɛ̍, wāŋnda̍ Si̍ɛ̍kɛ̄m nda̍ ma̍la̍ ndu̍ ni̍ mbo̍ sɔ̄lā yōōmūa̍ŋ.

²⁵Mi̍ wāŋnda̍ Si̍ɛ̍kɛ̄m a̍ wa᷅ nɛ̄īla̍ŋ nūūvīa̍a̍ le̍ Ābīmɛ̍lɛ̍kī dīyɔ̄ɔ̍. O̍ ko̍ŋ, mi̍ wāŋnda̍ Si̍ɛ̍kɛ̄m a̍ vi̍ŋī vīŋī pūa̍a̍ o̍ pēmbo᷄ŋ chōo̍ le̍ mā dīī ndu̍. Ndu̍yɛ̍ o̍ ko̍ŋ kɔ̍ɔ̍lī, ma̍ sāā wāŋnda̍ dēlɔ̄ɔ̍ chōo̍ mā pōōndīāā nda̍ nyɛ̄m nda᷄ŋ o̍ lābā. O̍ ko̍ŋ, mi̍ wāŋndo̍ mālnu᷄ŋ mbo̍ kɔ̍ di̍mūl Ābīmɛ̍lɛ̍kī a̍ ndi̍ o̍kɔ̄ɔ̄.

²⁶A̍ te̍le̍ŋ ko̍ŋ, mi̍ po᷄ pi᷅lɛ̍ dīōla̍ŋ āā Ka̍ā, o̍ hu᷅ŋ le̍ cha᷄lle̍ Si̍ɛ̍kɛ̄m chi̍e̍e̍ nda̍ pɔ̄mbūāā ndūa̍a̍. Pōo̍ ho̍ō fi̍nyā ndɔ̍ dīōla̍ŋ āā Ɛ̍bɛ̍dī. Mɛ̄ɛ̍ pi̍la̍ chi̍e̍e̍ya̍ Si̍ɛ̍kɛ̄m a̍ che᷅ pōo̍ ho̍ō, nda̍ kpo̍u̍ ma̍ dūāū tīīnda᷄ŋ ndāa̍ o̍ ndu̍ ni̍ŋ.

²⁷O̍ ko̍ŋ kɔ̍ɔ̍lī, mɛ̄ɛ̍ te̍le̍ŋ ke̍ndīāā mākīle̍pīi̍yo̍ ō fūūlu̍u̍, mi̍ wāŋnda̍ Si̍ɛ̍kɛ̄m a̍ ke̍e̍ndūū kīle̍pīi̍ma̍ nda᷄ŋ o̍ kpe̍le̍la̍ ndāla̍ŋ ni᷄ŋ kpo̍u̍. Mɛ̄ɛ̍ nda̍ kēēndu̍u̍, ma̍ tōōsīāā mūɛ̄īmā nda᷄ŋ a̍ ma̍ŋ. O̍ ko̍ŋ kɔ̍ɔ̍lī, ma̍ bīī bɔ̄ŋa᷅ŋ ndīāā nyɛ̄ dīāā bɛ̄ndōo̍ o̍ chīɛ̄ī nda̍ sōōlūū mɛ̍lɛ̄ka̍ ndāa̍ wo̍ ni᷄ŋ. Mɛ̄ɛ̍ nda̍ wa̍ di̍o̍la̍ŋ a̍ kōlɔ̄ɔ̄la̍ŋ, ma̍ kāndū dīōmndā wɔ̄ɔ̍ŋnda̍ŋ dīmīo̍o̍ a̍ Ābīmɛ̍lɛ̍kī o̍kɔ̄ɔ̄.

²⁸Mi̍ Ka̍ā di̍mī āā, “Wāna̍ māāvɛ̄ɛ̄ A̍bīmɛ̍lɛ̍kī cho̍ yɛ̄ mbō wa̍ māsāa̍ le̍ Si̍ɛ̍kɛ̄m? Ābīmɛ̍lɛ̍kī cho̍ pi̍la̍chi̍e̍e̍ wa̍ā Si̍ɛ̍kɛ̄m te̍. Wānā wa̍ā o̍ yu̍ŋgu̍ Ki̍dīɔ̄ŋ ndo̍ chōo̍ pɔ̍ o̍ cho̍ ni̍. Vɛ᷅ mī ŋ̄ wa̍ ndu̍ o̍ bā bɛ̍ŋgu̍? Ndu̍ ni̍, Sɛ̍būl, wāna̍ o̍ Kɛ̍si̍ hɔ̄ltē ndɔ̄ chi̍e̍e̍ na̍nu᷄ŋ ndo̍ ni̍, vɛ᷅ mā wa̍ na̍a̍ chōo̍ la̍ma̍sā? Ha̍mɔ̄ŋ, wāna̍ ki̍lā chi̍o̍o̍ ho̍ō wo̍, pūa̍a̍ ndūa̍a̍ nda̍ na̍a̍ ŋ̄ nɔ̄ ni̍ mī ŋ̄ sāāŋgi̍a̍l. Kɛ̍, ŋ̄ sa̍a̍ŋgīāl A̍bīmɛ̍lɛ̍kī le̍.

²⁹Tē ndu̍ o̍o̍ wa̍ pɛ̍ māā ya̍ wa̍ wāŋnda̍ ha̍ā chīla̍ŋ ni̍, Ābīmɛ̍lɛ̍kī ve̍ wa᷅ yōōmū le̍. I̍ wa̍ ndu̍ dīmūl a̍a̍, ‘Chɔ̍ɔ̍lu̍ pu̍a̍a̍ nu̍m ā chɔ̄ūwa̍ chūūŋgīāā nyɛ̄ kɛ̄ndɛ̄ kɛ̍ndɛ̄, mā hīŋ mī ŋ̄ hu᷄ŋ sɔ̍ŋgā.’ ”

³⁰Mɛ̄ɛ̍ Sɛ̍būl, o̍ wa̍ māsa̍ chi̍o̍o̍ Si̍ɛ̍kɛ̄m ndo̍ ō tūēī nyɛ̄ Ka̍ā o̍ di̍mi̍ wo̍, mbo̍ dūāūnu᷄ŋ tu̍mbe̍.

³¹Mbo̍ sōlī ki̍i̍la̍a̍ mbo̍ vīām nda̍ sɔ̍ɔ̍ sɔ̍ɔ̍ A̍lu̍mā chi̍e̍e̍. Mbo̍ dīmūl Ābīmɛ̍lɛ̍kī āā, “Po᷄ pi᷅lɛ̍ hīŋ chi̍e̍e̍ na̍nū nda̍ pɔ̄mbūāā ndūa̍a̍, dīōla̍ŋ āā Ka̍ā, fi̍nyā ndɔ̍ dīōla̍ŋ āā Ɛ̍bɛ̍dī. Pōo̍ ho̍ō ni̍, pɔ̄mbūāā ndūa̍a̍ ni̍, ā chō tōsāa̍ mi̍ chi̍o̍o̍ yēēmā le̍ nu̍m sīmūllo̍.

³²Le̍la̍ŋ, chu̍a̍ pu̍a̍a̍ nu̍m āā chɔ̄ūwa̍ a̍ nyūmnda̍ŋ, mī lā hu᷄ŋ vi̍ŋī vīŋi᷄ŋ o̍ chīɔ̍ɔ̍ŋ ni᷄ŋ.

³³Tē pāa̍le̍ŋ lē sɛ̄ dɔ̍ɔ̍ pɛ̍ si̍ɔ̍dīi̍, lā pēna̍ fūlā pu̍u̍ŋ lā hu᷄ŋ de᷅l chi̍o̍o̍ chōo̍ a̍ sɔ̍ŋgɔ̄ɔ̍ o̍ lē pīlɛ̍ ni᷄ŋ kpe̍. Tē Ka̍ā nda̍ pūa̍a̍ ndūa̍a̍ ā sīmu̍l nya̍ pɛ̍, lā nɔ̄lā mī lā tōsa̍ a̍ nda̍ mɛ̄ɛ̍ nya̍ yēēma̍ yɛ̍.”

³⁴Īchɔ̄llo̍, mi̍ Ābīmɛ̍lɛ̍kī nda̍ pūa̍a̍ ndūa̍a̍ chɔ̄ūwa̍ kpo̍u̍ a̍ cha̍ŋ ma̍ kūā Si̍ɛ̍kɛ̄m, ma̍ pīɔ̄ūvi̍āŋ ku̍ndāla̍ŋ sālā hīɔ̍ɔ̍lu̍. Ma̍ vīŋī vīŋi᷄ŋ, ma̍ bālū chi̍o̍o̍ si̍lɔ̍.

³⁵Mɛ̄ɛ̍ pāa̍le̍ŋ lē sɛ̄ īdīi̍yo̍, mi̍ Ka̍ā o̍ ku̍ā mbo̍ kɔ̍ si᷅m o̍ sāāsa̍ chi̍o̍o̍ sōndōo̍. Mi̍ ī yɔ̄nu᷄ŋ ki̍nɛ̍i̍, mi̍ Ābīmɛ̍lɛ̍kī nda̍ pūa̍a̍ ndūa̍a̍ chɔ̄ūwa̍ ā wā fūlāa̍ nāa̍ nda̍ wa̍ ā vīŋīa̍ŋ nda̍, le̍ hūnɔ̄ɔ̍ chi̍o̍o̍ dēlɔ̄ɔ̍ chōo̍ a̍ sɔ̍ŋgɔ̄ɔ̍.

³⁶O̍ ko̍ŋ, mi̍ Ka̍ā o̍ cha᷅ nda̍. Mɛ̄ɛ̍ o̍ che᷅ nda̍, mbo̍ dīmūl Sɛ̍būl āā, “I̍ cho̍ pūa̍a̍ chɔ̄ɔ̍ pēmbo᷄ŋ tōlɔ̄ɔ̍ ma̍ wā hūnɔ̄ɔ̍.” Mi̍ Sɛ̍būl di̍mūl ndu̍ āā, “Ō wā ni̍ŋ wu̍ndu̍ma̍ ŋ̄pēmbūa̍ŋ ŋ̄ chō chɔ̄ɔ̍ ni̍ ma̍ dīmī māā pūa̍a̍ chō hūnɔ̄ɔ̍.”

³⁷Kɛ̍ mi̍ Ka̍āl di̍mī āā, “Sāko̍, wāŋndā chīe̍e̍ya̍ cho̍ hūnɔ̄ɔ̍ ni̍. I̍ cho̍ wāŋnda̍ chɔ̄ɔ̍ hūnɔ̄ɔ̍ ku̍ndā chēle̍ŋ o̍ nɛ̄ī, fūlāa̍ o̍ yɔ̄m ɔ̍kū wo̍ bɛ̄ŋgu̍, nāa̍ wāŋnda̍ vīām ya̍wāla̍ŋ nda̍ bɛ̄ŋgu̍.”

³⁸Mi̍ Sɛ̍būl di̍mūl ndu̍ āā, “Ō cho̍ nu᷅m te̍ wa̍ sōndō bɛ̄ndōo̍ a̍ Ābīmɛ̍lɛ̍kī o̍kɔ̄ɔ̄ le̍? Ō cho̍ nu᷅m te̍ di̍mi̍ āā, ‘Wāna̍ māāvɛ̄ɛ̄ A̍bīmɛ̍lɛ̍kī cho̍ yɛ̄ mī ŋ̄ sāāŋgi̍a̍l ndu̍?’ Pūa̍a̍ ŋ̄ pɛ̄ɛ̄sa̍ ma̍ dātā wa̍, nda̍ cho̍ ka̍ŋ hu̍nɔ̄ɔ̍ ni̍. Kɔ̍ ni̍ko̍ mā kɔ̍ sɔ̍ŋgā a̍ nda̍.”

³⁹O̍ ko̍ŋ, mi̍ Ka̍āl si᷅m pūa̍a̍ Si̍ɛ̍kɛ̄m lāchī ma̍ kɔ̍ chi᷅ŋa̍la᷅ŋ Ābīmɛ̍lɛ̍kī nda̍ pūa̍a̍ ndūa̍a̍ chɔ̄ūwa̍.

⁴⁰Kɛ̍, mi̍ Ābīmɛ̍lɛ̍kī nda̍ pūa̍a̍ ndūa̍a̍ ā yām nda̍. Mi̍ Ka̍ā nda̍ wāŋnda̍ Si̍ɛ̍kɛ̄m a̍ nya̍a̍nu᷄ŋ. Kɛ̍, mi̍ Ābīmɛ̍lɛ̍kī ti̍sā Ka̍ā kīlta̍ŋ kɔ̄ɔ̄lī. Ndu̍yɛ̍, ma̍ yɔ̄ŋūl wānāā bɔ̄ɔ̍ bɔ̍ɔ̍ wāŋnda̍ Si̍ɛ̍kɛ̄m tɛ̍ɛ̄ŋ. Ma̍ cha᷄ŋ le̍nde̍ a̍ nda̍ yɔ̄ŋūllo̍ ha̍a̍a̍ ma̍ fūūlūū o̍ dīō sāāsa̍ chi̍o̍o̍ sōndōo̍ di̍.

⁴¹Ndu̍yɛ̍, A̍lu̍mā chi̍e̍e̍ Ābīmɛ̍lɛ̍kī ndu̍ wa̍ īchāli̍ ni̍, mi̍ Sɛ̍būl ndu̍ wa᷅ īchāli̍ Si̍ɛ̍kɛ̄m chi̍e̍e̍. O̍ ko̍ŋ kɔ̍ɔ̍lī, mi̍ Sɛ̍būl tu̍a̍ū Ka̍ā nda̍ pɔ̄mbūāā ndūa̍a̍, mbo̍ sōlī nda̍ Si̍ɛ̍kɛ̄m chi̍e̍e̍ po̍.

⁴²Mɛ̄ɛ̍ sɔ̍ŋgɔ̄ɔ̍ ō chūu̍, dīi̍mā ndɔ̄ɔ̍ mi̍ wāŋnda̍ Si̍ɛ̍kɛ̄m a̍ kɛ̍ɛ̍sīāā le̍ kɔ̄la̍ŋ o̍ chīɔ̄ɔ̄ŋ nda᷄ŋ ni᷄ŋ. O̍ ko̍ŋ, mi̍ wāŋndo̍ mālnu᷄ŋ mbo̍ kɔ̍ di̍mūl Ābīmɛ̍lɛ̍kī a̍ ndi̍ o̍kɔ̄ɔ̄.

⁴³Mɛ̄ɛ̍ nda̍ dīmu̍l ndu̍ a̍ ndi̍ o̍kɔ̄ɔ̄, mbo̍ vēēlū pūa̍a̍ ndūa̍a̍ chɔ̄ūwa̍ mbo̍ pīɔ̄ū nda̍ ku̍ndāla̍ŋ lā yāa̍ ma̍ kɔ̍ vi̍ŋī vīŋi᷄ŋ o̍ chīɔ̄ɔ̄ŋ wāŋnda̍ Si̍ɛ̍kɛ̄m ni᷄ŋ le̍ nda̍ dēlɔ̄ɔ̍ chōo̍ a̍ sɔ̍ŋgɔ̄ɔ̍. Mɛ̄ɛ̍ nda̍ chē wāŋnda̍ Si̍ɛ̍kɛ̄m chɔ̄nɔ᷄ŋndo̍ chi̍e̍e̍ ma̍ wā hūnɔ̄ɔ̍ o̍ chīɔ̄ɔ̄ŋ nda᷄ŋ ni᷄ŋ, ma̍ fūlā nāa̍ nda̍ wa̍ ā vīŋī vīŋīa̍ŋnda̍ ma̍ dēl nda̍ chōo̍ a̍ sɔ̍ŋgɔ̄ɔ̍ le̍ nda̍ dīūwo̍.

⁴⁴Mi̍ Ābīmɛ̍lɛ̍kī nda̍ ku̍ndā pūa̍a̍ chɔ̄ūwa̍ ō pīlɔ̍ɔ̍ ā nyāānu᷄ŋ ma̍ kɔ̍ si᷅m o̍ dīō sāāsa̍ chi̍o̍o̍ sōndōo̍, yɔ̄ŋi̍ wāŋnda̍ Si̍ɛ̍kɛ̄m nda̍ a̍a̍ mi̍i̍ŋgu̍ chi̍e̍e̍. Mi̍ pūa̍a̍ chɔ̄ūwāā ku̍ndālā tīɔ̍ɔ̍ŋāa̍ kɔ̍ de᷅l wāŋnda̍ Si̍ɛ̍kɛ̄m chōo̍ o̍ chīɔ̄ɔ̄ŋ ni᷄ŋ nda᷄ŋ ā dīū nda̍ kpo̍u̍.

⁴⁵Mi̍ Ābīmɛ̍lɛ̍kī nda̍ pūa̍a̍ ndūa̍a̍ chɔ̄ūwa̍ ā lō sɔ̍ŋgɔ̄ɔ̍ pāa̍le̍ le̍ŋ Si̍ɛ̍kɛ̄m chi̍e̍e̍ ha̍a̍a̍ mi̍ pāa̍le̍ŋ lē dēl do̍o̍ŋ. Ndu̍yɛ̍, mi̍ Ābīmɛ̍lɛ̍kī bi̍ī chi̍o̍o̍ mbo̍ dīū wānāa̍ wa̍ lo̍ŋ nda̍ dīūwo̍ pīla̍. O̍ ko̍ŋ kɔ̍ɔ̍lī, mbō tɛ̄ɛ̄mbūū chi̍o̍o̍ kpo̍u̍. Ndu̍yɛ̍, mbo̍ sɛ̄ŋī hɛ᷄lle̍ lɛ̄ŋ[3] mbo̍ tīū ndi̍ chi̍o̍o̍ si̍lɔ̍.

⁴⁶Mɛ̄ɛ̍ wānāa̍ wa̍ o̍ fo̍ndāŋ vīlɛ̄ī kālā ka̍lāa̍ Si̍ɛ̍kɛ̄m nda̍ ā tūēī nyɛ̍ yɔ̍nu̍ŋ ndo̍, ma̍ lūɛ̄ī o̍ fo̍ndāŋ kālā ka̍la̍ wa̍ o̍ fo̍ndāŋ ko̍ŋ ndo̍, nāa̍ Bāāl, mɛ̄lɛ̄ka̍ wāŋnda̍ nda̍ a̍a̍ yi̍ī kpe̍ma̍a̍ a̍ ndu̍ wo̍ ō wa̍ wa̍, ma̍ kɔ̍ vi̍o̍ŋnu᷄ŋ ndo̍ŋ.

⁴⁷Mɛ̄ɛ̍ Ābīmɛ̍lɛ̍kī tu̍e̍ī māā lo̍ŋ nda̍ chūūŋgi̍āŋ ni̍,

⁴⁸mbo̍ chūā pūa̍a̍ ndūa̍a̍ ma̍ hēl o̍ Pēmbīī Sa̍li̍mɔ̄ŋnde̍ chōo̍. Mi̍ Ābīmɛ̍lɛ̍kī chu̍ā chūe̍i̍ mbo̍ kīlī lɛ̄wūŋ yɔ̄mndo̍ŋ mbo̍ bīī o̍ chōŋgu̍. Mbo̍ dīmūl pūa̍a̍ ndūa̍a̍ chɔ̄ūwa̍ āā, “Nya̍ bɛ̍ɛ̍ lā kīōlu̍ lɛ̍ūwo̍ŋ chɔ̍ chɔ̍ mī lā tōl la̍ kɔ̄ɔ̄lī a̍ mu̍ŋ.”

⁴⁹O̍ ko̍ŋ, nda̍ kpo̍u̍ ma̍ kīlī lɛ̄ūwo̍ŋ ma̍ bīī o̍ lāchōŋgu̍ ma̍ tūāl ndu̍ kɔ̄ɔ̄lī. Fo̍ndāŋ kālā ka̍lā wāŋnda̍ Si̍ɛ̍kɛ̄m a̍ wa̍ ko̍ŋ a̍ vi̍a̍ŋna᷄ŋ ndo̍, ma̍ kɔ̍ mɛ̍lī lɛ̄ūwūŋ mu᷅ŋ o̍ fo̍ndāŋ kōŋ bālɔ̄ɔ̍ chɛ̍ chɛ̍ ndu̍yɛ̍ ma̍ māl mu̍ŋ o̍ yīŋ. O̍ ko̍ŋ, wānā o̍ wāna̍ wa̍ o̍ fo̍ndā kōŋ, nda̍ kpo̍u̍ ma̍ wū. Wānāa̍ vi᷅ o̍ fo̍ndāŋ kōŋ nda̍ nda̍ a̍a̍ wa᷅ le̍ wāa̍ ō pīlɛ̍ (1,000).

⁵⁰O̍ ko̍ŋ kɔ̍ɔ̍lī, mi̍ Ābīmɛ̍lɛ̍kī nda̍ pūa̍a̍ ndūa̍a̍ chɔ̄ūwa̍ ā mālnu᷄ŋ vɛ̍lɛ̄ ma̍ kūā le̍ chi̍e̍e̍ bɛ̍ndōo̍ Tɛ̍bɛ̍sī dēlɔ̄ɔ̍ chōo̍. Ma̍ kɔ̍ ba̍lū chi̍o̍o̍ ho̍ō ma̍ dūāū ndu̍ o̍ pi̍ŋndo̍ ni᷄ŋ kpɔ̍kɔ̍su̍. Ndu̍yɛ̍, ma̍ bīī chi̍e̍e̍ ka̍lāa̍,

⁵¹Kɛ̍ o̍ chi̍o̍o̍ ho̍ō ni᷄ŋ, nda̍ a̍a̍ nɔ̍ fo̍ndāŋ kālā ka̍lā pūm ō bālāā a̍ kpākīla̍ŋ kpo̍kɔ̍su̍. Wāŋnda̍ Tɛ̍bɛ̍sī kpo̍u̍, wānā pɔ̍nɔ̍ ni̍, wānā la̍nɔ̍ ni̍, a̍ lāŋgba̍ā kālla̍ kpo̍u̍ ma̍ nya̍a̍nu᷄ŋ ma̍ kɔ̍ lu̍ɛ̍i̍nu᷄ŋ o̍ fo̍ndāa̍ ho̍ō ma̍ kīīndīa̍ŋ di̍ōla̍ŋ kɔ̄ɔ̄lī, ma̍ hēlnu᷄ŋ o̍ fo̍ndāa̍ ho̍ō tūllo̍ pɔ̍.

⁵²O̍ ko̍ŋ, mi̍ Ābīmɛ̍lɛ̍kī nda̍ pūa̍a̍ ndūa̍a̍ kūā le̍ fo̍ndāa̍ ho̍ō pīɔ̄lɔ̄ɔ̍. Nda̍ a̍a̍ ye̍e̍ma̍ mī nda̍ a̍a̍ ma̍l ndu̍ o̍ yīŋ. Kɛ̍ mɛ̄ɛ̍ Ābīmɛ̍lɛ̍kī o̍ sɔ̍ɔ̍ŋgu̍u̍ o̍ dīō kpāki̍ fo̍ndāa̍ ho̍ō īkɛ̄i̍ le̍ ndu̍ mālɔ̄ɔ̍ o̍ yīŋ,

⁵³mi̍ chūā pīlɛ̍ lō ō fo̍ndāa̍ ho̍ō tūllo̍ mbo̍ māl ndu̍ pōū bɛ̄ndōo̍ o̍ lēbōl mbo̍ pīāl ndu̍ bōlle̍ŋ.

⁵⁴Lɔ̍ɔ̍ pa̍ mi̍ Ābīmɛ̍lɛ̍kī o̍ ma̍lnu᷄ŋ ko᷅l, mbo̍ di̍mūl wāna̍ ndɔ̍ bi̍i̍lūl ndu̍ wōlɔ̄ɔ̄lā ndɔ̄la̍ chɔ̄ūla̍ŋ ndo̍ āā, “So̍li̍ mu̍ɛ̍ī nūm i̍i̍ fāŋnde̍ chɔ̍ chɔ̍ ma̍ si̍o̍u̍ ya̍ dīyɔ̄ɔ̄, yɔ̄ŋi̍ wāŋnda̍ dīmi̍ māā wānā la̍nɔ̍ɔ̍ ndu̍ di̍ī ya̍ ni̍!” O̍ ko̍ŋ, mi̍ wāna̍ ndɔ̍ bi̍i̍lūl ndu̍ wōlɔ̄ɔ̄lā ndɔ̄la̍ chɔ̄ūla̍ŋ ndo̍ ō sōlī mūɛ̄ī ndūɛ̍i̍ mbo̍ dīī ndu̍.

⁵⁵Mɛ̄ɛ̍ I̍sɔ̄lūɛ̍i̍ya̍a̍ wa̍ Ābīmɛ̍lɛ̍kī kɔ̄ɔ̄lī wa̍ chē māā ō vī, ma̍ mīīŋgu᷄ŋ o̍ lā nda̍ lo̍.

⁵⁶Mɛ̄ɛ̍ nu̍a̍ā Mɛ̄lɛ̄ka̍ lōōku̍ Ābīmɛ̍lɛ̍kī nyɛ̄ pālāa̍ tūsī chōo̍ ni̍, kāni̍ fo̍ndōle̍, le̍ nyɛ̄ wɔ̄ɔ̍ŋ o̍ to̍sa̍ a̍ yu̍ŋgu̍ fi̍nyā ndɔ̄ wo̍, mbo̍ dīū pūa̍a̍ fi̍nyā ndɔ̄ wa̍ ŋ̄wāŋ be̍le̍-ŋɔ̍mmɛ̍ū.

⁵⁷O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ tūsī vɛ̄lɛ̄ pūa̍a̍ Si̍ɛ̍kɛ̄m nyɛ̄ pālāa̍ chōo̍, fo̍ndōle̍ le̍ yɔ̄ŋ wɔ̄ɔ̍ŋ nda̍ tōsa̍ wo̍. O̍ ko̍ŋ, mi̍ sēndi̍ Cho̍tām, po᷄ Ki̍dīɔ̄ŋ ndo̍ ō mēna̍ wo̍ ō bīī Ābīmɛ̍lɛ̍kī nda̍ wāŋnda̍ Si̍ɛ̍kɛ̄m.