Read Southern Kisi Chɔ᷄ŋ Ŋga̍a̍ Ndɔ̄ɔ̍ 1 Bible Online

Chɔ᷄ŋ Ŋga̍a̍ Ndɔ̄ɔ̍ 1 - Southern Kisi bible

Chɔ᷄ŋ Ŋga̍a̍ Ndɔ̄ɔ̍ 1

¹Ya̍ cho̍ ho̍ō māā lāŋu̍nɔ̄ ka̍lāa̍ o̍ ku̍ndā wānāā lāāla᷄ŋnda̍ chōo̍ wo̍, ya̍ cho̍ yāu̍wo̍ ho̍ō pōōnyīa̍a̍ ni̍. I̍ cho̍ ndu̍ yɔ̄ŋndo̍ nāa̍ nūm chāa̍ŋ nī ka̍a̍lāa̍ Ka̍yɔ̄ɔ̄ chu̍a̍, nūm ya̍ I̍ ka̍a̍la̍ a̍ kɔ̄l nūu̍ kpo̍u̍ wo̍.

²Chāa̍ŋ nī ka̍a̍lāa̍, I̍ cho̍ Mɛ̄lɛ̄ka̍ pīɛ̄īyo̍ māā wa̍ kɛ̍ndi̍a̍a̍, ndu̍yɛ̍ mī nyɛ̄ o̍ nyɛ̄ hīōū lāchī a̍ wāa̍ ō kɛ̄ndɛ̄, mɛ̄ɛ̍ ŋ̄ chō kɛ̍ndi̍a̍a̍ o̍ nyi̍nā nūmndo̍ ni᷄ŋ yɛ̍.

³Mɛ̄ɛ̍ chāāŋāā nāa̍ ā ti᷄ŋ ā hīŋ ma̍ hu᷄ŋ dɔ̍u̍nu᷄ŋ ko̍na̍ mi̍ na᷅ŋ kɔ̄l ta̍u̍. Kāni̍ fo̍ndōle̍, ma̍ dūāūnu᷄ŋ ko̍na̍ a̍ mɛ̄ɛ̍ ŋ̄ chō hīōūwɔ̄ɔ̍ lāchī a̍ kɔ̄la̍ŋ o̍ tōnya̍ cho̍ a̍ Mɛ̄lɛ̄ka̍ o̍kɔ̄ɔ̄ wo̍ chōo̍ a̍ kɔ̄l kpo̍u̍ yɛ̍. Ndu̍yɛ̍, māā lēkɛ̍ndɛ̍ī ā chō kɔ̄la̍ŋ o̍ tōnya̍a̍ chōo̍.

⁴Tē I̍ tu̍e̍ī pɛ̍ māā, chūāūwāā nīa̍a̍ o̍ Ki̍li̍tī ni̍ŋ a̍ cho̍ kɔ̄la̍ŋ o̍ tōnya̍ cho̍ a̍ Mɛ̄lɛ̄ka̍ o̍kɔ̄ɔ̄ wo̍ chōo̍, ko̍ŋ nɛ̍ŋī ya̍ kɔ̄l mbō hīōū nyɛ̄ o̍ nyɛ̄.

⁵Chāa̍ŋ nī ka̍a̍lāa̍, nyɛ̄ o̍ nyɛ̄ ŋ̄ chō chāāŋāā nāā wa̍nāā lāāla᷄ŋnda̍ tōsāllo̍, ō chō ō kɛ̄ndɛ̄ ta̍u̍, tāāma̍ nyɛ̄ ŋ̄ tōsa̍ le̍ ā nya̍ sīna᷅ŋ ndɔ̍ bɛ̍ɛ̍ le̍ pi᷅lɛ̍ le̍ wa̍.

⁶Ā hu᷄ŋ do̍o̍nu᷄ŋ ku̍ndā wānāā lāāla᷄ŋnda̍ ko̍na̍, a̍ mɛ̄ɛ̍ ŋ̄ chɔ᷄m nda̍ kāālāa̍ ma̍ bīī nda̍ bīyɔ̄ɔ̄ kɛ̄ndɔ̄ɔ̍ yɛ̄. Tē ā wa̍ kɔ̄la̍ŋ pɛ̍, cho̍ŋgu̍ŋ nda̍ nyɛ̄ kɛ̄ndɛ̍ī mɛ̄ɛ̍ Mɛ̄lɛ̄ka̍ hīnī kɔ̍l lɛ̍.

⁷Kāni̍ fo̍ndōle̍, ā ma᷄l ma̍ wā kɔ̄la̍ŋ o̍ wa̍li̍ Ki̍li̍tīo̍o̍ ni᷄ŋ. Ndu̍yɛ̍, wānā o̍ wāna̍ cho̍ wa̍nā lāāla᷄ŋ te̍, ā bi̍ī ma̍lā nda̍ o̍ bā le̍, mɛ̄ɛ̍ wānāā lāāla᷄ŋnda̍.

⁸Le̍la̍ŋ, na̍a̍ ŋ̍ cho̍ wānāā lāāla᷄ŋnda̍ wa̍, ŋ̄ nɔ̄ mī ŋ̄ māla̍ wānāā wāā nu̍a̍ā. Tē ŋ̄ tōsa̍ he̍ī pɛ̍, mɛ̄ɛ̍ na̍a̍ nda̍ā ŋ̄ chō māchūāā wa̍llo̍ lātūlu̍ le̍ tōnya̍ cho̍ a̍ Mɛ̄lɛ̄ka̍ o̍kɔ̄ɔ̄ wo̍, hīvīo̍o̍ lāchī.

⁹Mi̍ po̍o̍nyīāā yāu̍wo̍ nāa̍ ku̍ndā wānāā lāāla᷄ŋnda̍ chūā lo̍ŋ, kɛ̍ Dīōtɛ̄lu̍ɛ̍fɛ̍sī ndu̍ ndu̍, ō ye᷅ŋ nyɛ᷅ ya̍ I̍ di̍mī wo̍ lānī le̍. Kāni̍ fo̍ndōle̍, ō hɛ̄na̍ŋ mbō sīīŋgu̍u̍ ndu̍ pi̍la̍ wānā bɛ̍ndū wānāā lāāla᷄ŋnda̍ chōo̍ lo̍ŋ kpe̍de̍.

¹⁰Le̍la̍ŋ, tē I̍ hi᷅ŋ pɛ̍, I̍ cho̍ hūnɔ̄ɔ̄ nya̍ chɔ̄m a̍ kēlā o̍ kēlā o̍ cho̍, kɔ̍ bi̍ī a̍ nyɛ̄ o̍ nyɛ̄ wɔ̄ɔ̍ŋ o̍ cho̍ bālɔ̄ɔ̄ dīmīo̍o̍ a̍ na̍a̍ o̍kɔ̄ɔ̄. Kɛ̍, ō mɛ̄ɛ̄lu̍ bɛ̍ɛ̍ o̍ ko̍ŋ te̍. Chāāŋāā nāā wa̍nāā lāāla᷄ŋa̍a̍ ku̍ā le̍ ku̍ndā wānāā lāāla᷄ŋnda̍ yīlɔ̄ɔ̍ wa̍ bɛ̍ɛ̍, ō chɛ᷅l nda̍ le̍. Wānāa̍ hɛ̍nāŋ vɛ̍lɛ̄ le̍ nda̍ chɛ̄lɔ̄ɔ̍ wa̍, mbō sōōlūū nda̍ o̍ ku̍ndā wānāā lāāla᷄ŋnda̍ chōo̍.

¹¹Chāa̍ŋ nūu̍, chu̍ā ka̍ā wɔ̄ɔ̍ŋ wāŋndo̍ ndu̍ wa᷅ to̍sāa̍ wo̍ le̍. Chu̍a̍ ka̍ā kɛ̄ndɛ̄ wāŋndo̍ wā to̍sāa̍ wo̍, kāni̍ fu̍u̍le̍, wānā o̍ wāna̍ to̍sa̍ sūɛ̍i̍ kɛ̍ndɛ̄i̍ pɛ̍, mɛ̄ɛ̍ chu̍a̍ Mɛ̄lɛ̄ka̍a̍ o̍ cho̍ ni̍. Kɛ̍ wānā o̍ wāna̍ to̍sa̍ sūɛ̍i̍ wɔ̍ɔ̍ŋnde̍ pɛ̍, mɛ̄ɛ̍ ō si̍nā Mɛ̍lɛ̄ka̍ le̍.

¹²Wāŋnda̍ kpo̍u̍, ā chō dīmīo̍o̍ a̍ mɛ̄ɛ̍ Dɛ̄mi̍tu̍lu̍i̍sī cho̍ wānā kɛ̍ndɛ̄ yɛ̍. Ka̍ā tōnya̍ o̍ cho̍ lēni᷄ŋ ndo̍ bɛ̍ɛ̍, ō chɔ̄m māā ō chō wānā kɛ̍ndɛ̄. Na̍a̍ bɛ̍ɛ̍, ŋ̄ chɔ̄m māā ō chō wānā kɛ̍ndɛ̄, ndu̍yɛ̍ ā sīnā māā tōnya̍a̍ ya̍ I̍ di̍mūl nu̍m ni̍.

¹³I̍ nɔ̍ sɔ̄ɔ̍ŋ ta̍u̍ le̍ nu̍m dīmūl, kɛ̍ ndu̍yɛ̍ I̍ hɛ̍na̍ŋ mī dɔ̍ū mu̍ŋ mu̍ŋ o̍ yāu̍ ni̍ŋ te̍.

¹⁴I̍ nɔ̍ o̍ kɔ̄l le̍ mī ŋ̄ chīīki̍āŋ su̍ŋ na̍a̍ nūm, mī ŋ̄ sūūki̍āŋ na̍a̍ nūm a̍ mu̍ŋ o̍kɔ̄ɔ̄.

¹⁵Mbɔ̄ Mɛ̄lɛ̄ka̍ ke̍ nu̍m kɔ̄l nyūlōo̍ fɔ̍. Chāāŋāā nāa̍ na̍nu᷄ŋ, a̍ yi̍l nu̍m lāpi̍. Yi̍l la̍ chāāŋāā nīa̍a̍ cho̍ lo̍ŋ nda̍ kpo̍u̍ la̍pi̍.