Read Southern Kisi Sɔ̄ɔ̍ŋ Chɔ̍ɔ̍ma᷄ŋndo̍ŋ 1 Bible Online

Sɔ̄ɔ̍ŋ Chɔ̍ɔ̍ma᷄ŋndo̍ŋ 1 - Southern Kisi bible

Sɔ̄ɔ̍ŋ Chɔ̍ɔ̍ma᷄ŋndo̍ŋ 1

¹Sɔ̄ɔ̍ŋ Chi̍i̍sū Ki̍li̍tī chɔ̍m bu̍ɛ̍i̍yāā ndūa̍a̍ wo̍ŋ, mu̍ŋ cho̍ o̍ yāu̍wo̍ ho̍ō ni᷄ŋ ni̍. Mɛ̄lɛ̄ka̍ chɔ̍m Chi̍i̍su̍ mu̍ŋ ni̍ le̍ mbō tōsa̍ mī bu̍ɛ̍i̍yāā ndūa̍a̍ sīna̍ sɔ̄ɔ̍ŋ cho̍ hūnɔ̄ɔ̄ su̍ŋ yɔ̍nɔ᷄ŋ ndo̍ŋ. O̍ ko̍ŋ, mi̍ Chi̍i̍sū vi̍ām ki̍i̍la̍nɔ̍ Mɛ̄lɛ̄ka̍a̍ nāa̍ bu̍ɛ̍ī ndɔ̄ɔ̍ Chɔ᷄ŋ chu̍a̍ le̍ mbō chɔ̄ɔ̄mu̍u̍ mu̍ŋ nāa̍ ndu̍ chu̍a̍.

²O̍ ko̍ŋ kɔ̍ɔ̍lī, mi̍ Chɔ᷄ŋ ndu̍ chɔ᷅m nyɛ̄ o̍ nyɛ̄ fe̍e̍ ki̍i̍la̍nɔ̍ Mɛ̄lɛ̄ka̍a̍ chɔ᷄m ndu̍ mbo̍ chā. Sɔ̄ɔ̍ŋ ka̍la᷄ŋ ŋ̄ chō māchūāā a̍ yōōŋgu̍ chɛ̍ŋ o̍ Mɛ̄lɛ̄ka̍ lo̍ wo̍ o̍kɔ̄ɔ̄, a̍ sɔ̄ɔ̍ŋ tōnya̍ŋ Chi̍i̍sū Ki̍li̍tī chɔ̍m ndo̍ŋ.

³Ndu̍yɛ̍, yōōŋgu̍ chɛ̍ŋ ho̍ō o̍ Mɛ̄lɛ̄ka̍ lo̍ mbo̍ pōōnyīa̍ŋ ndo̍, wānā o̍ wāna̍ cho̍ wāŋnda̍ tōfāl lēni᷄ŋ, nda̍ kpo̍u̍ ā pɛ̄l tɔ̄nɔ̄ɔ̍. Ndu̍yɛ̍, wānāa̍ cho̍ bɛ̍ɛ̍ ni᷅la̍ŋ yāŋɔ̄ɔ̄ o̍ yōōŋgū kālāa̍, o̍ ko̍ŋ kɔ̍ɔ̍lī, mā tōsa̍ nyɛ̍ di̍mi̍ŋ le̍ni̍ŋ ndo̍ wa̍, nda̍ bɛ̍ɛ̍ ā pɛ̄l tɔ̄nɔ̄ɔ̍. Kāni̍ fu̍u̍le̍, ō be̍ndū lɛ̍ ni̍ŋ fo̍ndāŋ te̍, mī sɔ̄ɔ̍ŋ mu᷅ŋ ki̍nɛ̍i̍ ŋ̄ hu᷄ŋ yɔ̄nu᷄ŋ.

⁴Ya̍ Chɔ̍ŋ, I̍ yɔ̍ŋ yīlɔ̄ɔ̍ nāa̍ nya̍ wānāā lāāla᷄ŋa̍a̍ ku̍ndālā ŋɔ᷄mmɛ̍ūwa̍ chūā o̍ būŋgɛ̄ī E̍e̍sīāve̍ ni᷄ŋ. Mɛ̄lɛ̄ka̍ o̍ cho̍ pɛ̄ŋgo̍o̍ ho̍ō, mbo̍ wā kāni̍ ma̍si̍ndɛ̄ wo̍, ndu̍yɛ̍ mbo̍ wā vɛ̄lɛ̄ hūnɔ̄ɔ̄ wo̍, mbɔ̄ ō tōsa̍l nya̍ kɛ̄ndɛ̄i̍ ndūɛ̍i̍, ndu̍yɛ̍ mbō ke̍ nya̍ kɔ̄l nyūlōo̍ fɔ̍. Mbɔ̄ Nyi̍nāā ŋɔ᷄mmɛ̍ūwa̍ a̍ cho̍ o̍ kpe̍ŋgbe̍i̍ lēmāsa̍ Mɛ̄lɛ̄ka̍a̍ hɔ̄lndɔ̄ wa̍, ā tōsa̍l nya̍ īkɛ̄ndɛ̄, o̍ ko̍ŋ kɔ̍ɔ̍lī, mā ke̍ nya̍ kɔ̄l nyūlōo̍ fɔ̍.

⁵Mbɔ̄ Chi̍i̍sū Ki̍li̍tī bɛ̍ɛ̍ ō tōsa̍l nya̍ kɛ̄ndɛ̄i̍ ndūɛ̍i̍ ndu̍yɛ̍ mbō ke̍ nya̍ kɔ̄l nyūlōo̍ fɔ̍. Ndu̍ cho̍ wāna̍ di̍mi̍ tōnya̍ Mɛ̄lɛ̄ka̍a̍ ō wānā nɔ̍lā mā ti̍i̍nda̍ŋ ndo̍ ni̍. Ndu̍ cho̍ wāna̍ tāse̍ mi̍i̍ŋgu̍ yōōmū wo̍ ni̍. Māsāa̍ kpo̍u̍ o̍ chi̍e̍ēŋndo̍ chōo̍, ndu̍ cho̍ māsā bɛ̍ndōo̍ nda̍ chōo̍ kpo̍u̍ ni̍. Chi̍i̍sū Ki̍li̍tī ka̍a̍la̍ na̍a̍, ndu̍yɛ̍ mbo̍ sɔ̄lā pīɔ̍mndo̍ le̍ hāli̍ kpe̍ŋ mbō bāŋa̍ na̍a̍ o̍ yɔ̄ŋndā nāāla̍ wɔ̍ɔ̍ŋnda̍ŋ ni᷄ŋ.

⁶Ō sīīŋgu̍u̍ na̍a̍ wānāā o̍ wa᷅ ni̍ŋ cho̍o̍ ma̍sā wa̍, ndu̍yɛ̍ mbo̍ sīīŋgūū na̍a̍ wānāā sōlīāā lāsa̍lāa̍ o̍ Mɛ̄lɛ̄ka̍ ndɔ̄ɔ̍ lo̍, o̍ cho̍ vɛ̄lɛ̄ Fi̍nyā ndɔ̄ wo̍. Chi̍i̍sū Ki̍li̍ti̍ nɔ̍ mbō sɔ̄la̍ līsāa̍ ni̍, ndu̍yɛ̍ ndu̍ nɔ̍ mbō wa̍ māsāa̍ le̍ fɛ̍ɛ̍ŋ a̍ fɛ̍ɛ̍ŋ ni̍. Āmi̍i̍nā.

⁷Lā kɛ̄si̍ŋ o̍ kɔ̄l māā Ki̍li̍tī cho̍ ni᷅ŋ le̍ hūnɔ̄ɔ̄ o̍ yu̍mbu̍ yu̍mbo̍o̍ ni᷄ŋ. Wāŋnda̍ kpo̍u̍ o̍ chi̍e̍ēŋndo̍ chōo̍, ā chā ni̍ŋ ndu̍ o̍ hūnɔ̄ɔ̍. Wānāa̍ di̍ī ndu̍ wa̍ bɛ̍ɛ̍, ā chā ni̍ŋ ndu̍. Hūnɔ̄ɔ̄ ndɔ̄ɔ̍ tōsā ni̍ŋ mī wāŋnda̍ kāa̍la̍ŋ kpo̍u̍ o̍ chi̍e̍ēŋndo̍ chōo̍ mā cha᷄ŋ. Āmi̍i̍nā.

⁸Māsānɔ̄ɔ̍ Mɛ̄lɛ̄ka̍ ndu̍ nɔ̍ kpāāyāa̍ kpo̍u̍ ni̍. Ndu̍yɛ̍ ndu̍ cho̍ pɛ̄ŋgo̍o̍ ho̍ō ni̍, ndu̍ wa̍ kāni̍ ma̍si̍ndɛ̄ ni̍, ndu̍ cho̍ vɛ̄lɛ̄ hūnɔ̄ɔ̄ ni̍. Mbo̍ dīmī āā, “Ya̍ cho̍ kāndɔ᷄ŋndo̍ ni̍, ya̍ cho̍ mɛ̄ɛ̄lu̍la̍ŋ ni̍.”

⁹Ya̍ cha̍a̍ŋ nyā wa̍nā la̍a̍la᷄ŋndo̍ Chɔ᷄ŋ ni̍. Na̍a̍ na̍a̍ nya̍a̍ ŋ̍ cho̍ o̍ dīōm pīlɔ̍ɔ̍ ni᷄ŋ a̍ Chi̍i̍sū la̍tu̍lu̍ ni̍. Na̍a̍ na̍a̍ nya̍ā nda̍ chō nyɛ̄ pālāa̍ tūsīo̍o̍ chōo̍ ni̍ le̍ mɛ̄ɛ̍ na̍a̍ ŋ̄ chō le̍ māsāle̍ Mɛ̄lɛ̄ka̍le̍ŋ yɛ̍, ndu̍yɛ̍ mi̍ ŋ̄ wā nyɛ̄ pālāā kōŋ bīūwɔ᷄ŋndo̍. Le̍ mɛ̄ɛ̍ ya̍ I̍ di̍mu̍l wāŋnda̍ sūɛ̍i̍ Mɛ̄lɛ̄kɛ̍i̍ a̍ sɔ̄ɔ̍ŋ tōnya᷅ŋ Chi̍i̍sū chɔ̍m ndo̍ŋ yɛ̍, le̍la̍ŋ nda̍ bīī ya̍ ni̍ ma̍ hūŋ a̍ ya̍ o̍ lɛ̄ŋndē vēsɛ̍i̍le̍ŋ o̍ mɛ̄ŋnda̍ŋ tɛ̄ɛ̄ŋ, o̍ lɛ̄ŋndē Pa̍ti̍mɔ̄ɔ̄le̍ŋ nde᷅ŋ ni᷄ŋ ni̍.

¹⁰Bōōndi̍i̍ ya̍ I̍ wa̍ Pa̍ti̍mɔ̄ɔ̄ ve̍, mi̍ Nyi̍na̍ Mɛ̄lɛ̄ka̍a̍ tūāl la̍ kɔ̄ɔ̄lī o̍ pāa̍le̍ Kpu̍yālē pīlɛ̍ chōo̍. O̍ ko̍ŋ, mi̍ tu̍ɛ̍ī mi̍ dīōmndo̍ sūāā ya̍ kɔ̄ɔ̄lī chōo̍ cho̍o̍ kpe̍le̍ŋ māā bu̍lu̍ bɛ̍ndū.

¹¹Mbo̍ dīmūl la̍ āā, “Chu̍a̍ ya̍u̍wo̍ mā po̍o̍nyi̍a̍a̍ nyɛ̄ ŋ̄ chō hūnɔ̄ɔ̄ chɔ̄ wo̍. Tē a̍ po̍o̍nyi̍a̍a̍ pɛ̍, a̍ yɔ̍ŋ yāu̍la̍ la̍ŋ o̍ wānāā lāāla᷄ŋa̍a̍ ku̍ndālā ŋɔ᷄mmɛ̍ūwa̍ lo̍ o̍ chi̍e̍e̍ŋ ŋɔ̍mmɛ̍ūwo̍ŋ mu᷅ŋ, Ɛ̍fi̍sīā ni̍, a̍ Si̍ma̍nā, a̍ Pɛ̍ka̍mɔ̄m, a̍ Tāya̍ti̍lūā, a̍ Sa̍a̍dīī, a̍ Fīlēdɛ̍ɛ̍fīāā, a̍ Lāwo̍di̍sīā.”

¹²Mɛ̄ɛ̍ o̍ so̍ō le̍nde̍, mi̍ mu̍li᷄ŋ le̍ mī ya̍ i̍i̍ che᷅ wāna̍ wa̍ sūɛ̍i̍ nāa̍ ya̍ chu̍a̍ wo̍. O̍ ko̍ŋ kɔ̍ɔ̍lī, mi̍ cha᷅ nyɛ̄lā nda̍ kɛ̄sī la̍mbūi̍la̍ŋ nda̍ŋ lā ŋɔ᷄mmɛ̍ū lā tōōsīāā a̍ ko̍o̍līi̍yo̍ŋ.

¹³Mi̍ cha᷅ vɛ̄lɛ̄ wāŋndo̍, kɛ̍ māā wānā pɔ̍nɔ̍. Ō wa̍ īsīsi̍ o̍ nyɛ̄lā kɛ̄sīāālā la̍mbūi̍la̍ la̍ŋ tɛ̄ɛ̄ŋ. Dōma̍ wa̍ ndu̍ lēkɔ̄ɔ̍ wo̍ ō vīlɛ̄ī, ō fūūlāā ndu̍ o̍ pēlūŋ mɛ̄so̍ŋ di̍. Nyɔ̄ɔ̍ wa̍ ndu̍ ō kānda᷄ŋ o̍ būŋgɛ̄ī tɛ̄ɛ̄ŋnde̍ ō tōōsīāā a̍ ko̍o̍līi̍yo̍ŋ.

¹⁴Yīīŋīi̍ wa̍ ndu̍ o̍ lēbōl le̍, ī wa̍ ī hūmbū fo̍ fo̍ bɛ̍ndū māā fe̍ŋgbɛ̍. Wānā a̍a̍ che᷅ ndu̍ hɔ̄lta̍ŋ īmālākā mālākɛ̄i̍ pɛ̍, to̍fa̍ wɔ̍ ko̍ mɛ̄ɛ̍ yīŋnde̍ŋ lē sāndū nu̍a̍ā wu̍le̍ wu᷅le̍ yɛ̍.

¹⁵Pēlūŋ ndɔ̄ɔ̍ŋ ŋ̄ wa̍ ŋɛ̍lɛ̄ŋgi̍ ŋɛ̍lɛ̄ŋgi̍ bɛ̄ndū, mɛ̄ɛ̍ nda̍ wōū nu̍a̍ā chīli̍ŋnde̍ o̍ yīŋ mā bɛ̄ɛ̄ndi̍a̍a̍ ndi̍ mī ī dēndū nyɛ̄ kɛ̄ndɛ̄ fo̍ fo̍ yɛ̍. Sūɛ̍i̍ o̍ so̍ō ve̍, wānā a̍a̍ tu̍e̍ī dīōm ndɔ̄ɔ̍ pɛ̍ āā bāl bɛ̄ndū bɛ̍ndōo̍ ni̍.

¹⁶Lōo̍ŋ ŋ̄ wa̍ ndu̍ o̍ bā kɛ̄ndɔ̄ɔ̍ mu̍ŋ ŋɔ̍mmɛ̍ū. Ndu̍yɛ̍, mūɛ̄ī fāŋīī sōndōlā tīɔ̍ɔ̍ŋīī lūɛ̄īyɛ̄i̍ ŋɛ̍lɛ̍ ŋɛ̍lɛ̍i̍ ī wa̍ ndu̍ fūlāa̍ o̍ sōndō. Wānā a̍a̍ che᷅ ndu̍ hɔ̄lla̍ pɛ̍ āā, mɛ̄ɛ̍ pāa̍le̍ŋ lē sīm nu̍a̍ā o̍ bōlle̍ŋ chōo̍ yɛ̍ ni̍, a̍ īmālākā mālākɛ̄i̍.

¹⁷Mɛ̄ɛ̍ ya̍ I̍ che᷅ ndu̍ mi̍ de᷅l lɛ̄ŋ sa̍kpō ndu̍ lāchī. Mi̍ hi̍nī kpɛ̍ māā wānā vi̍lɛ̍i̍. Kɛ̍ mbo̍ hāndū ya̍ bā ndɔ̄ kɛ̍ndɔ̄ɔ̍ chōo̍. Mbo̍ dīmūl la̍ āā, “Yɔ᷅ŋ īsīōōŋ te̍. Ya̍ cho̍ wāna̍ tāso̍o̍ ni̍, ya̍ cho̍ wānā mɛ̍ɛ̍lāa̍ ni̍.

¹⁸Ya̍ cho̍ wāna̍ cho̍ yōōmū wo̍ ni̍. Ya̍ i̍i̍ vi᷅, kɛ̍ I̍ cho̍ ni᷅ŋ yōōmū le̍ fɛ̍ɛ̍ŋ a̍ fɛ̍ɛ̍ŋ. I̍ nɔ̍ kpāāyāa̍ pīɔ̍mndo̍ chōo̍. Ndu̍yɛ̍, I̍ nɔ̍ kpāāyāa̍ chi̍e̍e̍ pīɔ̍m chōo̍.

¹⁹Le̍la̍ŋ, sɔ̄ɔ̍ŋ ŋ̄ chē mu᷅ŋ ndo̍ŋ po̍o̍nyi̍a̍a̍ mu̍ŋ. Ko̍ŋ cho̍ ni̍, sɔ̄ɔ̍ŋ cho̍ mu᷅ŋ yɔ̄nɔ᷄ŋndo̍ pɛ̄ŋgo̍o̍ ho̍ō wo̍ŋ, a̍ sɔ̄ɔ̍ŋ cho̍ hūnɔ̄ɔ̄ yɔ̄nɔ᷄ŋ o̍ sīɔ̄dīi̍ lāchīo̍o̍ ni᷄ŋ ndo̍ŋ.

²⁰I̍ chɔ᷅m ndɔ̍ nu̍m a̍ lōōŋ ŋɔ̍mmɛ̍ū ŋ̄ chē ya̍ o̍ bā kɛ̄ndɔ̄ɔ̍ wo̍ŋ o̍kɔ̄ɔ̄, a̍ nyɛ̄lā kɛ̄sīāālā la̍mbūi̍lā ŋ̄ko̍o̍līi̍la̍ ŋɔ̍mmɛ̍ūla̍ŋ, tɛ̄ɛ̄sīa̍a̍ cho̍ lēni᷄ŋ ndo̍. Lōōŋ ŋɔ̍mmɛ̍ūwo̍ŋ ŋ̄ si᷄m le̍ ki̍i̍la̍a̍ Mɛ̄lɛ̄ka̍a̍ a̍ cho̍ wānāā lāāla᷄ŋa̍a̍ ku̍ndālā ŋɔ̍mmɛ̍ūwa̍ māndāa̍ wa̍. Nyɛ̄lā kɛ̄sīāālā la̍mbūi̍la̍ sa̍lā ŋɔ᷄mmɛ̍ūla̍ŋ, lā si᷄m le̍ wānāā lāāla᷄ŋa̍a̍ ku̍ndālā ŋɔ᷅mmɛ̍ūwāā kāŋ.”