Read Southern Kisi Sɔ̄ɔ̍ŋ Chɔ̍ɔ̍ma᷄ŋndo̍ŋ 11 Bible Online

Sɔ̄ɔ̍ŋ Chɔ̍ɔ̍ma᷄ŋndo̍ŋ 11 - Southern Kisi bible

Sɔ̄ɔ̍ŋ Chɔ̍ɔ̍ma᷄ŋndo̍ŋ 11

¹O̍ ko̍ŋ, ma̍ kē ya̍ yɔ̄m vīlɛ̄īyo̍ māā yɔ̄m tūwāā nyɛ̄. Ma̍ dīmūl la̍ āā, “Chɔ̍ŋ mā tu̍u̍ chīɛ̍i̍ Mɛ̄lɛ̄ka̍a̍ a̍ ma̍āŋndo̍, ndu̍yɛ̍ mā chɔ̍m wānāa̍ cho̍ Mɛ̄lɛ̄ka̍ sōōlūūwo̍ lēni᷄ŋ nda̍.

²Kɛ̍ tu̍ū bi̍ɔ̍ɔ̍ o̍ chīɛ̍i̍ Mɛ̄lɛ̄ka̍a̍ le̍. Mɛ̍i̍ ko̍ŋ, kāni̍ fu̍u̍le̍, ndu̍ nda̍ ma᷄l wānāa̍ cho̍ a̍ Chu̍ū le̍ wa̍ o̍ bā ni̍. Ndu̍yɛ̍, wānāa̍ cho̍ a̍ Chu̍ū le̍ wa̍, ā sōlī ni̍ŋ chi̍e̍e̍ cho̍ ho̍ō le̍ Mɛ̄lɛ̄ka̍ wo̍ a̍ chɔ̄ūwo̍, ndu̍yɛ̍ mbō wa̍ nda̍ o̍ bā bɛ̄ŋgu̍ le̍ pāŋgo̍ŋ be̍le̍-hi̍ɔ̍ɔ̍lu̍ a̍ ŋ̄ mūu̍ŋ.

³Ndu̍yɛ̍, I̍ cho̍ wānāa̍ su̍a̍ā le̍ Mɛ̄lɛ̄ka̍ wa̍ vīōmɔ̄ɔ̄, nda̍ ŋi̍ɔ̍ɔ̍ŋ a̍ nyɛ̄lā cha᷄ŋnda̍ŋ lēkɔ̄ɔ̍. Ā dīmūl ni̍ŋ wa᷅ŋnda̍ yōōŋgu̍ chɛ̍ŋ o̍ Mɛ̄lɛ̄ka̍ lo̍ wo̍ le̍ bōōndi̍i̍ wa̍ā le̍nde̍i̍ kpɛ̍, ko̍ŋ cho̍ ni̍ le̍ pālɛ̍i̍ wāa̍ ō pīlɛ̍ a̍ kɛ̄mɔ̄ɔ̍ lē dīi̍ŋ a̍ be̍le̍-ŋɔ̍mpu᷅m.”

⁴Yɔ̄mīī ɔ̄li̍fīi̍ ŋīi̍ŋnde̍, a̍ nyɛ̄lā kɛ̄sīāālā la̍mbūi̍la̍ ti̍ɔ̍ɔ̍ŋnda̍ cho̍ Mɛ̄lɛ̄ka̍ o̍ cho̍ Māsānɔ̄ɔ̍ le̍ chi̍e̍ēŋndo̍ wo̍ lāchī la̍ŋ, la̍ŋ la̍ si̍m le̍ wānāā ŋīɔ̍ɔ̍ŋnda̍ ha̍ā ni̍.

⁵Wānā o̍ wāna̍ ki̍ndi̍ le̍ wānāā ŋīɔ̍ɔ̍ŋnda̍ ha̍ā nyɛ̄ yɔ̄ŋ pɛ̍, yīŋnde̍ŋ lē fūla̍ nda̍ o̍ sōndō lē lōm ya̍a̍mɔ̍ɔ̍wa̍a̍ ndāā ka̍ŋ chi̍li̍kɔ̍. Mɛ̄ɛ̍ o̍ nɛ̄īyo̍ ho̍ō ni᷄ŋ wānā o̍ wāna̍ ki̍ndi̍ le̍ nda̍ nyɛ̄ yɔ̄ŋ pɛ̍, ā sɔ̄la̍ pīɔ̍mndo̍.

⁶Ndu̍yɛ̍, Mɛ̄lɛ̄ka̍ ke̍ nda̍ kpāāyāa̍ le̍ mā hāu̍ pīɔ̍ɔ̍, o̍ bōōndi̍i̍ nda̍ nɔ̄ le̍ wāŋnda̍ yōōŋgu̍ chɛ̍ŋ o̍ Mɛ̄lɛ̄ka̍ lo̍ wo̍ dīmūllo̍ ve̍, pīɔ̄ɔ̄ bɛ̍ɛ̍ se᷅ le̍. O̍ ko̍ŋ kɔ̍ɔ̍lī, Mɛ̄lɛ̄ka̍ ke̍ nda̍ kpāāyāa̍ le̍ mā tōsa̍ mī mɛ̄ŋnda̍ŋ o̍ pēēla̍ŋ mā sīmnu᷄ŋ ma̍ko̍o̍. Ā nɔ̄ kpāāyāa̍ mā hīŋ a̍ kpūndɛ̍ o̍ kpūndɛ̍ o̍ chi̍e̍ēŋndo̍ chōo̍, mɛ̄ɛ̍ o̍ mɛ̄ɛ̍ nda̍ hɛ̄na̍ŋ.

⁷Tē ā chīi̍ wāŋnda̍ yōōŋgū nda̍ nɔ̄ wo̍ dīmūl pɛ̍, vīsī wɔ̄ɔ̍ŋ wɔ̄ɔ̍ŋndo̍ ō pūm ō fūla̍ o̍ so̍o̍ŋ yi̍ŋgi̍lɛ̍i̍ nɔ̍ la̍mɛ̍ɛ̍lu̍ le̍ wo̍ ni᷄ŋ, ō sāa̍ nda̍ a̍ sɔ̍ŋgɔ̄ɔ̍, ō yēm nda̍, ō dīu̍ nda̍.

⁸Tē ō dīu̍ nda̍ pɛ̍, ā ma᷄l dīāllūŋ ndāa̍ŋ o̍ nɛ̄ī o̍ chi̍e̍e̍ bɛ̍ndōo̍ ni᷄ŋ, chi̍e̍e̍ nda̍ ba᷄ŋ Māsānɔ̄ɔ̍ Mɛ̄lɛ̄ka̍ ndāa̍ o̍ yɔ̄m sīŋgāfīlāa̍ chōo̍ ma̍ dīī ndu̍ wo̍. Dīōlā chēle̍ŋndā nda̍ vēēlū chi̍e̍e̍ ko̍ŋ mī lā wā o̍ lētāle̍ la̍ŋ la̍ cho̍ ni̍ āā, So̍dɔ̄m kɛ̄lɛ̄ŋgāā le̍ āā, I̍chi̍pī.

⁹Wāŋnda̍ su̍u̍ o̍ su̍u̍, a̍ lēkāa̍ o̍ lēkāa̍, a̍ īsɔ̄ɔ̍ o̍ īsɔ̄ɔ̍ ma̍ŋgālāā, a̍ lēlɛ̄ŋ o̍ lēlɛ̄ŋ, ā chō hūnɔ̄ɔ̄ mā tōfa̍ dīāllūŋ ndāa̍ŋ le̍ pālɛ̍i̍ ī yāa̍ a̍ nyɛ̄ pɔ̄mbɔ̄. Ā chɛ᷅l ni̍ŋ mā chɔ̍ nda̍ le̍.

¹⁰Wāŋnda̍ o̍ chi̍e̍ēŋndo̍ chōo̍ ā nāŋ ni̍ŋ kɔ̍l le̍ pīɔ̍m wānāā ŋīɔ̍ɔ̍ŋ nda̍ ha̍ā. Ā tōsā ni̍ŋ kɔ̍l kɛ̄ndɔ̄ɔ̍ mā kēna᷅ŋ nyɔ̍ɔ̍ŋ, kāni̍ fu̍u̍le̍, wānāā ŋīɔ̍ɔ̍ŋāa̍ su̍a̍ā ka̍ŋ le̍ Mɛ̄lɛ̄ka̍ wa̍ ā tōsa̍ bɔ̄ɔ̍ mi̍ wāŋndā chīe̍e̍ya̍ sɔ̄lā nyɛ̄ pālāa̍.

¹¹Mɛ̄ɛ̍ pālɛ̍i̍ hīōū ī yāa̍ a̍ nyɛ̄ pɔ̄mbɔ̄, mi̍ Mɛ̄lɛ̄ka̍ mīŋgī nda̍ yōōmōo̍ o̍ mīli̍ŋ. Ma̍ cha᷄ŋ ma̍ sīm. Mi̍ sīōōŋīī bɛ̄ndūe̍i̍ bīī wānāa̍ che᷅ nda̍ wa̍ kpo̍u̍.

¹²O̍ ko̍ŋ kɔ̍ɔ̍lī, mi̍ wānāā ŋīɔ̍ɔ̍ŋāa̍ su̍a̍ā ka̍ŋ le̍ Mɛ̄lɛ̄ka̍ wa̍ ā tūɛ̄ī mi̍ dīōmndo̍ vēēlū nda̍ chōo̍ cho̍o̍ kpe̍le̍ŋ ɛ̄chɛ̍nɛ̄ āā, “Lā he᷄l na̍nu᷄ŋ.” Ya̍a̍mɔ̍ɔ̍wa̍a̍ ndāa̍ ā lō nda̍ nūa̍a̍ ma̍ hēlnu᷄ŋ o̍ yu̍mbu̍ yu̍mbo̍o̍ ni᷄ŋ, ma̍ kūānu᷄ŋ ɛ̄chɛ̍nɛ̄.

¹³A̍ bōōndi̍i̍ ke̍ŋ kpe̍e̍kpe̍i̍, mi̍ chi̍e̍ēŋndo̍ nyīīyā ta̍u̍ ta̍u̍. Chīɛ̄īla̍ŋ o̍ chi̍e̍e̍ bɛ̍ndū kōŋ ni᷄ŋ, la̍ a̍a̍ wa̍ nyɛ̄ pīɔ̄ūvāā ku̍ndāla̍ŋ tɔ̍ pɛ̍, kūmbōo̍ ō pīlɔ̍ɔ̄ ki̍nɛ̍i̍ mi̍ lā pēsī wɔ̍ wɔ̍. Mi̍ wāŋnda̍ wū wāa̍la̍ŋ lā ŋɔ᷄mmɛ̍ū. Mi̍ sīōōŋnde̍ bīī wāŋnda̍ ā tūa̍a̍ ta̍u̍. O̍ ko̍ŋ ma̍ sāŋgālā Mɛ̄lɛ̄ka̍ o̍ cho̍ ɛ̄chɛ̍nɛ̄ wo̍.

¹⁴Mi̍ kpūndɛ̍ dīi̍ŋ ndɔ̄ɔ̍ hīāū. Kɛ̍ kpūndɔ̍ɔ̍ ŋgāa̍ ndɔ̄ɔ̍ ndu̍ cho̍ vɛ̄lɛ̄ hūnɔ̄ɔ̄ su̍ŋ su̍ŋ.

¹⁵O̍ ko̍ŋ kɔ̍ɔ̍lī, mi̍ ki̍i̍la̍nɔ̍ ŋɔ̍mmɛ̍ūwo̍ hūāŋ bu̍lo̍o̍ o̍ ndɔ̍ɔ̍. Mɛ̄ɛ̍ o̍ hɔ̍ŋ, mi̍ tu̍ɛ̍ī dīōmnda̍ŋ chōo̍ cho̍o̍ kpe̍le̍ŋ ɛ̄chɛ̍nɛ̄. Mi̍ lā dīmī āā, “Māsānɔ̄ɔ̍ Mɛ̄lɛ̄ka̍ nāa̍, nda̍ wāna̍ ndɔ̍ o̍ chu̍a̍ būŋgɛ̄i̍ māā ō chō vīōmɔ̄ɔ̍ le̍ wāŋnda̍ pīŋīo̍o̍ wo̍, nda̍ nɔ̍ ni᷅ŋ kpāāyāa̍ le̍ wāa̍ māsāa̍ chi̍e̍ēŋndo̍ kpo̍u̍ cho̍o̍ ni̍. Ndu̍yɛ̍, Māsānɔ̄ɔ̍ Mɛ̄lɛ̄ka̍ nāa̍, ndu̍ cho̍ māsāa̍ le̍ fɛ̍ɛ̍ŋ a̍ fɛ̍ɛ̍ŋ ni̍.”

¹⁶O̍ ko̍ŋ kɔ̍ɔ̍lī, mi̍ lāŋgba̍ā kālāā bi̍di̍i̍ŋ a̍ ā hīɔ̍ɔ̍lu̍a̍a̍ cha̍l o̍ kpe̍ŋgbe̍i̍la̍ lēmāsāla̍ŋ chōo̍ Mɛ̍lɛ̄ka̍ lāchī wa̍, ā cha᷄ŋ ma̍ kɔ̍ ba᷅ŋ wūla̍ŋ Mɛ̍lɛ̄ka̍ lāchī. Ma̍ sōōlūū ndu̍.

¹⁷Ma̍ dīmī āā, “Māsānɔ̄ɔ̍ Mɛ̄lɛ̄ka̍, nu᷄m nɔ̍ kpāāyāa̍ kpo̍u̍ ni̍. Nu᷄m cho̍ pɛ̄ŋgo̍o̍ ho̍ō ni̍, ndu̍yɛ̍ nu᷄m wa̍ kāni̍ ma̍si̍ndɛ̄ ni̍. Ŋ̄ yi᷄l nu̍m ba̍li̍ka̍ le̍ mɛ̄ɛ̍ ŋ̄ sōli̍ŋ kpe̍ku̍ a̍ kpāāyā nu̍m bɛ̄ndōo̍, ndu̍yɛ̍ ma̍ kāndū wāa̍ māsāa̍ ŋ̄wāŋndā chīe̍e̍ cho̍o̍ yɛ̍.

¹⁸Wānāa̍ cho̍ Mɛ̍lɛ̄ka̍ pīɛ̄ī le̍ wa̍, ā chō a̍ tu̍mbo̍o̍ ta̍u̍ ta̍u̍, kāni̍ fu̍u̍le̍, le̍ mɛ̄ɛ̍ bōōndi̍i̍ nūm Mɛ̄lɛ̄ka̍ nɔ̄ le̍ tu̍mbo̍o̍ dɔ̄ɔ̄nɔ᷄ŋndo̍ ve̍ ī fūūlu̍u̍ yɛ̍. Ndi̍ yɔ̄nūŋ ni̍ māā bōōndi̍i̍ ŋ̄ nɔ̄ mā kɔ̍ɔ̍sa̍ a̍ wānāa̍ vi᷅ wa̍ kpo̍u̍ ve̍. Ndu̍yɛ̍, bōōndi̍i̍ ŋ̄ nɔ̄ le̍ bu̍ɛ̍i̍yāā nūmnda̍ fāndāa̍ ve̍ ī fūūlu̍u̍, nda̍ yɔ̍nūŋ ni̍ māā wānāa̍ su̍a̍ā le̍ Mɛ̄lɛ̄ka̍ wa̍, a̍ wānāā nūmnda̍ kpo̍u̍, ko̍ŋ cho̍ ni̍, wānāa̍ ke᷅ nu̍m bɛ̄ɛ̄le̍ŋ nda̍, wānā pɔ̍mbɔ̄ ni̍, wānā bɛ̍ndū ni̍. Bōōnde̍i̍ fūūlu̍u̍ le̍ mā tɛ̍ɛ̍mbu̍u̍ wānāa̍ tɛ̍ɛ̍mbu̍u̍ chi̍e̍ēŋndo̍ wa̍.”

¹⁹O̍ ko̍ŋ, mi̍ cha᷅ mi̍ chīɛ̍i̍ Mɛ̄lɛ̄ka̍a̍ o̍ cho̍ ɛ̄chɛ̍nɛ̄ wo̍ ō kūmbi᷄ŋ. Mi̍ cha᷅ kɔ̍fu̍ si̍m le̍ kpe̍ma̍ Mɛ̄lɛ̄ka̍ yīi̍ nda̍ ŋ̄wāŋndā chīe̍e̍ wo̍ lēni᷄ŋ. O̍ ko̍ŋ kɔ̍ɔ̍lī, mi̍ cha᷅ mi̍ nyɔ̄ɔ̍ tōsā ŋu̍āla̍lɛ̍ī bɛ̄ndū. Mi̍ tu̍ɛ̍ī dīōmnda̍ŋ sūɛ̍i̍. Mi̍ ta᷅ŋnda̍ŋ mā dēŋī kpa̍ŋgāŋgāŋ kpāŋgāŋgāŋ bɛ̄ndū. Mi̍ lɛ̄ŋnde̍ŋ lē nyīīyā. Mi̍ lōōŋ kpu̍ŋgbāŋ ŋ̄ dēlī ta̍u̍ ta̍u̍.