Read Southern Kisi Sɔ̄ɔ̍ŋ Chɔ̍ɔ̍ma᷄ŋndo̍ŋ 12 Bible Online

Sɔ̄ɔ̍ŋ Chɔ̍ɔ̍ma᷄ŋndo̍ŋ 12 - Southern Kisi bible

Sɔ̄ɔ̍ŋ Chɔ̍ɔ̍ma᷄ŋndo̍ŋ 12

¹O̍ ko̍ŋ kɔ̍ɔ̍lī, mi̍ kɔ̄ndɔ̄fi̍li̍ bɛ̄ndōo̍ chɔ̄mnu᷄ŋ o̍ ha̍lāa̍ ni᷄ŋ. Mi̍ cha᷅ wānā la̍nɔ̍ɔ̍ o̍ ha̍la̍a̍ ni᷄ŋ. Pāa̍le̍ŋ lē wa̍ ndu̍ lēkɔ̄ɔ̍ māā dōmā, mbo̍ sīm o̍ pāŋge̍i̍ chōo̍. Mɔ̍si̍l lēmāsāa̍ wa̍ ndu̍ o̍ lēbōl a̍ lōo̍ŋ tɔ̍ a̍ ŋ̄ mūu̍ŋ o̍ mɔ̍si̍l ko̍ŋ.

²Chūa̍a̍ ho̍ō wa̍ a̍ yo᷄llo̍. Pūle̍i̍ wa̍ ndu̍ nɛ̄īyo̍ ta̍u̍ le̍ vīōlɔ̄ɔ̍, mbo̍ wā cha᷄ŋndo̍ ta̍u̍.

³O̍ ko̍ŋ kɔ̍ɔ̍lī, mi̍ kɔ̄ndɔ̄fi̍li̍ chēle̍ŋ chɔ̄mnu᷄ŋ vɛ̍lɛ̄ o̍ ha̍la̍a̍ ni᷄ŋ. Mi̍ cha᷅ tāmba̍lāka̍ sīāŋā bɛ̄ndōo̍. Tāmba̍lāka̍a̍ ho̍ō ndu̍ o̍o̍ nɔ̍ bōlle̍ ī ŋɔ᷄mmɛ̍ū a̍ lēēla̍ŋ tɔ̍. Mɔ̍si̍lta̍ lēmāsāla̍ŋ lā pūm lā wa̍ o̍ bōlīī ŋɔ᷄mmɛ̍ūve̍ he̍ī.

⁴Tē lōo̍ŋ di̍a̍ndū o̍ ha̍la̍ wo̍ŋ mu̍ŋ wa̍ nyɛ̄ pīɔ̄ūwāā sālā yāa̍ pɛ̍, mɛ̄ɛ̍ ku̍ndāa̍ ō pīlɔ̍ɔ̄ ki̍nɛ̍i̍, mi̍ tāmba̍lāka̍a̍ ho̍ō kōōndīāā mu̍ŋ a̍ lōmndē ndɔ̄le̍ŋ, mbo̍ māl mu̍ŋ o̍ chi̍e̍ēŋndo̍ chōo̍. Mi̍ tāmba̍lāka̍a̍ ho̍ō sīm wānā la̍nɔ̍ wa̍ ni᷅ŋ ho̍ō le̍ vīōlɔ̄ɔ̍ wo̍ lāchī, māā tē ndu̍ o̍o̍ ve̍lū dɔ̍ɔ̍ pɛ̍, ndu̍ o̍o̍ de᷅ chɛ̄lɛ̄kpɛ̍ ko̍ŋ.

⁵Mi̍ chūa̍a̍ ho̍ō vīālū wānā pɔ̍nɔ̍ɔ̍. Ndu̍yɛ̍, po̍ ko̍ŋ ndu̍ o̍o̍ nɔ̍ le̍ hūnɔ̄ɔ̄ wāa̍ māsāa̍ le̍ lɛ̄ŋnde̍ kpo̍u̍ o̍ chi̍e̍ēŋndo̍ cho̍o̍, mbō kūūmbu̍ŋ chi̍e̍ēŋndo̍ chōo̍ kpu̍lu̍ ni̍. Mɛ̄ɛ̍ chūa̍a̍ ho̍ō ve̍lū dɔ̍ɔ̍, ma̍ kūānu᷄ŋ a̍ chɛ̄lɛ̄kpɛ̍ ka̍lāa̍ o̍ Mɛ̄lɛ̄ka̍ lo̍ o̍ cho̍ o̍ kpe̍ŋgbe̍i̍ lēmāsāa̍ chōo̍ wo̍.

⁶Mi̍ chūa̍a̍ ndu̍ nya̍a̍nu᷄ŋ o̍ po̍llo̍ ni᷄ŋ, nāa̍ Mɛ̄lɛ̄ka̍ bɛ̄ɛ̄ndi̍a̍a̍ fo̍ndāa̍ le̍ ndu̍ māndāa̍ le̍ pālɛ̍i̍ wāa̍ ō pīlɛ̍ a̍ kɛ̄mɔ̄ɔ̍ lē dīi̍ŋ a̍ be̍le̍-ŋɔ̍mpu᷅m nda̍.

⁷O̍ lēpīlɛ̍ ni᷄ŋ kpe̍, mi̍ chɔ̄ūwo̍ kīōlū ɛ̄chɛ̍nɛ̄. Mi̍ Mɛ̄lɛ̄ka̍ ki̍i̍la̍nɔ̍ ndɔ̄ bɛ̍ndōo̍ Ma̍i̍kɛ̄l, nda̍ ki̍i̍la̍a̍ Mɛ̄lɛ̄ka̍a̍ a̍ cho̍ ndu̍ o̍ bā bɛ̄ŋgu̍ wa̍, ma̍ dēl tāmba̍lāka̍a̍ ho̍ō a̍ ki̍i̍la̍a̍ cho̍ tāmba̍lāka̍a̍ ho̍ō o̍ bā bɛ̄ŋgu̍ wa̍ chōo̍ a̍ chɔ̄ūwo̍. Mi̍ tāmba̍lāka̍a̍ bɛ̍ɛ̍ nda̍ ki̍i̍la̍a̍ ndūa̍a̍ ā sāā sɔ̍ŋgɔ̄ɔ̍ a̍ nda̍.

⁸Kɛ̍ mi̍ ki̍i̍la̍a̍ Mɛ̄lɛ̄ka̍a̍ ā yām nda̍. Fo̍ndāŋ chālāā bɛ̍ɛ̍ nda̍ a̍a̍ nɔ̍ lɛ̍ ɛ̄chɛ̍nɛ̄ le̍.

⁹Tāmba̍lāka̍ bɛ̄ndōo̍ ho̍ō ma̍ sōlī ndu̍ ɛ̄chɛ̍nɛ̄ po̍, nda̍ ki̍i̍la̍a̍ ndūa̍a̍ cho̍ ndu̍ o̍ bā bɛ̄ŋgu̍ wa̍, ma̍ māl nda̍ o̍ chi̍e̍ēŋndo̍ chōo̍. Ndu̍ yɔ̍nūŋ ni̍ māā, kɛ̄ū pāāndū pa̍a̍ndōo̍, ō nda̍ vēēlū āā, Māsa̍ Nyi̍nāā Wɔ̄ɔ̍ŋnda̍ wo̍, mā vēēlū ndu̍ vɛ̄lɛ̄ āā, Sēta̍nā. Ndu̍ hu̍i̍ ŋ̄wāŋndā chīe̍e̍ kpo̍u̍ ma̍ tōsā yɔ̄ŋ wɔ̄ɔ̍ŋndo̍ ni̍.

¹⁰Mi̍ tu̍ɛ̍ī mi̍ dīōmndo̍ sūāā chōo̍ cho̍o̍ kpe̍le̍ŋ ɛ̄chɛ̍nɛ̄ āā, “Bōōnde̍i̍ he̍ī Mɛ̄lɛ̄ka̍ nāa̍ chō wānāā ndūa̍a̍ pīŋī ni̍. Bōōnde̍i̍ he̍ī o̍ cho̍ kpāāya̍ ndɔ̄ɔ̍ chɔ̄m, mbō wa̍ māsāa̍ ni̍. Ndu̍yɛ̍, wāna̍ ndɔ̍ o̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, bōōnde̍i̍ he̍ī o̍ cho̍ kpāāya̍ ndɔ̄ɔ̍ chɔ̄m mbō wa̍ chi̍e̍ēŋndo̍ bōlle̍ŋ ni̍. Kāni̍ fu̍u̍le̍, wāna̍ ndu̍ o̍o̍ nɔ̍ sīsi̍la̍ŋ Mɛ̄lɛ̄ka̍ lāchī le̍ chāāŋāā nāā bu̍ɛ̍īya̍ sɔ̄ɔ̍ŋ chɔ̄mndo̍ chōo̍ i̍dīi̍ a̍ īchɔ̄l lo̍, ā sōli̍ ndu̍ ɛ̄chɛ̍nɛ̄.

¹¹Chāāŋāā nāā wa̍nāā lāāla᷄ŋnda̍ ā yēm ndu̍ sa̍na̍a̍ a̍ pīɔ̍m wāna̍ nda̍ vēēlū āā, Sāā Fɔ̍ŋndɔ̍ɔ̍ wo̍, vɛ̄lɛ̄ a̍ dīo̍m Mɛ̄lɛ̄ka̍ nda̍ dīmūl wa᷅ŋnda̍ wo̍. Ā wa̍ ā chɛ̄lāā ā yɔ᷄ŋ bɛ̍ɛ̍ āā, pīɔ̍mndo̍ ni̍, mā sɔ̄la̍ ndu̍ le̍ tīīnda᷄ŋ nda̍ nɔ̄ o̍ Mɛ̄lɛ̄ka̍ ni᷄ŋ ndo̍.

¹²Le̍la̍ŋ, nya̍ cho̍ ɛ̄chɛ̍nɛ̄ wa̍, lā na᷄ŋ kɔ̍l. Kɛ̍ kpūndɔ̍ɔ̍ wā ni̍ŋ bɔ̍ɔ̍ le̍ nyɛ̄ o̍ nyɛ̍ cho̍ o̍ chi̍e̍ēŋndo̍ chōo̍, a̍ nyɛ̄ o̍ nyɛ̍ cho̍ o̍ pēe̍ mɛ̄ŋmā īhɛ᷄llo̍ ni᷄ŋ. Kāni̍ fu̍u̍le̍, Māsa̍ Nyi̍nāā Wɔ̄ɔ̍ŋnda̍ hīŋ nya̍ tɛ̄ɛ̄ŋ. Ō chō a̍ tu̍mbo̍o̍ ta̍u̍ ta̍u̍, kāni̍ fu̍u̍le̍, ō sīnā māā te̍le̍ŋ ndɔ̄ɔ̍ chō ni᷅ŋ ō bīŋgi̍i̍ na̍a̍.”

¹³Mɛ̄ɛ̍ tāmba̍lāka̍a̍ chē māā ā ma᷄l ndu̍ o̍ chi̍e̍ēŋndo̍ chōo̍, mbo̍ tīsa̍ wānā la̍nɔ̍ ve̍lū pōo̍mbɔ̄ɔ̍ wo̍ kɔ̄ɔ̄lī.

¹⁴Kɛ̍ ndu̍yɛ̍, mi̍ Mɛ̄lɛ̄ka̍ kē ndu̍ kūmba᷅ŋnda̍ŋ lā tīɔ̍ɔ̍ŋ māā kōwɔ̍ bɛ̍ndū, le̍ mbō chɛ᷄ŋ cho̍o̍ mbō nyāānu̍ŋ kɛ̍ūwo̍ ho̍ō mbō kūɛ̄nu᷄ŋ o̍ po̍llo̍ ni᷄ŋ, nāa̍ o̍ chō wā māndāa̍ ni᷄ŋ, le̍ wɔ̄sīla̍ŋ lā yāa̍ a̍ pāŋgo̍ŋ ŋ̄ ŋɔ᷄mpu᷅m ndo̍.

¹⁵O̍ ko̍ŋ kɔ̍ɔ̍lī, mi̍ kɛ̄ūwo̍ ho̍ō sōli᷄ŋ mɛ᷅ŋnda̍ŋ o̍ sōndō, mi̍ mā sīmnu᷄ŋ mɛ᷅ŋmā hūnɔ̄ɔ̄ le̍ mī mā kɔ̍ hi̍o̍ū a̍ chūa̍a̍ ho̍ō.

¹⁶Kɛ̍ mi̍ lɛ̄ŋnde̍ŋ lē mālā chūa̍a̍ ho̍ō. Mi̍ lē kūmbi᷄ŋ, mi̍ lē sɔ̄ɔ̄sīāā mɛ̄ŋmā hūnāāmā tāmba̍lāka̍a̍ ho̍ō sōli̍ŋ o̍ sōndō wa̍ŋ.

¹⁷O̍ ko̍ŋ, mi̍ tāmba̍lāka̍a̍ ho̍ō dūāūnu᷄ŋ tu̍mbe̍ a̍ chūa̍a̍. Mbo̍ kūā le̍ chɔ̄ūwo̍ mālɔ̄ɔ̍ o̍ yɛ̄yi̍i̍ chūa̍a̍ ho̍ō chōo̍, ndi̍ yɔ̍nūŋ ni̍ māā wānāa̍ to̍sā nyɛ᷅ sāwāla̍ Mɛ̄lɛ̄ka̍la̍ŋ lā dīmi̍ wo̍, ndu̍yɛ̍ mā dīmūl wa᷅ŋnda̍ tōnya̍a̍ a̍ sɔ̄ɔ̍ŋ Chi̍i̍sū chɔ̍m ndo̍ŋ o̍kɔ̄ɔ̄ wa̍.

¹⁸Mi̍ tāmba̍lāka̍a̍ sīm o̍ pēe̍ mɛ̄ŋmā īhɛ᷄llo̍ kɔ̄ŋgɔ̍.