Read Southern Kisi Sɔ̄ɔ̍ŋ Chɔ̍ɔ̍ma᷄ŋndo̍ŋ 14 Bible Online

Sɔ̄ɔ̍ŋ Chɔ̍ɔ̍ma᷄ŋndo̍ŋ 14 - Southern Kisi bible

Sɔ̄ɔ̍ŋ Chɔ̍ɔ̍ma᷄ŋndo̍ŋ 14

¹O̍ ko̍ŋ kɔ̍ɔ̍lī, mi̍ cha᷅ Sāā Fɔ̍ŋndɔ̍ɔ̍ īsīsi̍ o̍ Pēmbīī Sa̍a̍yɔ̄ŋnde̍ chōo̍. Mi̍ cha᷅ wāŋnda̍ fāŋgā bɛ̍ndū bɛ̄ndōo̍ ndu̍ kɔ̄ɔ̄lī. Ā wa̍ wāa̍la̍ŋ kɛ̄mɛ̄ a̍ be̍le̍-hi̍ɔ̍ɔ̍lu̍ a̍ lā hīɔ̍ɔ̍lu̍. Sāa̍ Fɔ̍ŋndɔ̍ɔ̍ ho̍ō dīōlā ndɔ̄la̍ŋ a̍ dīōla̍ fi̍nyā ndɔ̄la̍ŋ, lā wa̍ lā pōōnyīāā nda̍ o̍ ŋ̄tēndu̍.

²O̍ ko̍ŋ kɔ̍ɔ̍lī, mi̍ tu̍ɛ̍ī mi̍ dīōmndo̍ fūlā ɛ̄chɛ̍nɛ̄. Wānā a̍a̍ tu̍e̍ī pɛ̍ āā bāl bɛ̄ndū bɛ̍ndōo̍ cho̍ sūɛ̍i̍ ni̍, vɛ̄lɛ̄ mɛ̄ɛ̍ ta᷅ŋnde̍ŋ lē dēŋī nu̍a̍ā yɛ̍. Wānā a̍a̍ tu̍e̍ī vɛ̄lɛ̄ pɛ̍ āā mɛ̄ɛ̍ wānāā nyɛ̄ chāa̍ wā nu̍a̍ā tōwāla̍ŋ lɔ̄ɔ̍ yɛ̍ ni̍.

³Wānāā wāa̍la̍ kɛ̍mɛ̄ a̍ be̍le̍-hi̍ɔ̍ɔ̍lu̍ a̍ lā hīɔ̍ɔ̍lu̍ wa̍ ha̍ā, ā wa̍ īsīsi̍ o̍ kpe̍ŋgbe̍i̍ lēmāsāa̍ hɔ̄lndɔ̄, a̍ nyāā yōōmāā hīɔ̍ɔ̍lu̍a̍a̍, a̍ lāŋgba̍ā kālla̍. Fāŋgā bɛ̄ndōo̍ ho̍ō ā wa̍ chōndi̍i̍ sɛ̍nɛ̄ī pūm sōlīo̍o̍. Wānā o̍ wānā che᷅le̍ŋ ndu̍ o̍o̍ nɔ̍lā cho̍ndi̍i̍ ke̍ŋ sōlī le̍, mɛ̄ɛ̍ nda̍ pi̍la̍. Ŋ̄wāŋndā chīe̍e̍ tɛ̍ɛ̄ŋ ki̍nɛ̍i̍ wāŋnda̍ ha̍ā, nda̍ sɔ̍la̍ bāŋāa̍ ni̍.

⁴Nda̍ cho̍ pūa̍a̍ a̍ ma̍nda̍ nda̍ pi̍la̍ nyɛ̄ kɛ̄ndɛ̄ kɛ̍ndɛ̄ wa̍ ni̍, ā sīna̍ su̍ɛ̍i̍ wānā la̍nɔ̍ le̍. Nda̍ wa᷅ Sāā Fɔ̍ŋndɔ̍ɔ̍ ho̍ō kɔ̄ɔ̄lī bā o̍ bā fe̍e̍ o̍ kɔ̍ ni̍. Ŋ̄wāŋndā chīe̍e̍ tɛ̍ɛ̄ŋ ki̍nɛ̍i̍, nda̍ sɔ̍la̍ bāŋāa̍ ni̍ māā wānāā tāse̍ a̍ cho̍ ā hɛ̄līāā le̍ Mɛ̄lɛ̄ka̍ a̍ Sāā Fɔ̍ŋndɔ̍ɔ̍ ho̍ō wa̍.

⁵Lē pīlɛ̍ bɛ̍ɛ̍ ā dīmi̍ la̍cho̍o̍ le̍, ndu̍yɛ̍ īsɔ̄ɔ̍ o̍ īsɔ̄ɔ̍ wɔ̍ɔ̍ŋ bɛ̍ɛ̍ cho̍ mī wānā chɔ̍m a̍ nda̍ o̍kɔ̄ɔ̄ le̍.

⁶O̍ ko̍ŋ kɔ̍ɔ̍lī, mi̍ cha᷅ ki̍i̍la̍nɔ̍ Mɛ̄lɛ̄ka̍ chēle̍ŋ. Ō wa̍ hūnɔ̄ɔ̍ o̍ ha̍la̍a̍ ni᷄ŋ cho̍o̍ cho̍o̍ pɔ̍ pɔ̍. Ndu̍ o̍o̍ hi᷅ŋ a̍ yōōŋgū kɛ̄ndɔ̄ɔ̍ o̍ cho̍ le̍ fɛ̍ɛ̍ŋ a̍ fɛ̍ɛ̍ŋ ndo̍ le̍ mbō dīmu̍l wānāa̍ cho̍ o̍ chi̍e̍ēŋndo̍ chōo̍ wa̍, a̍ wāŋnda̍ lēlɛ̄ŋ o̍ lēlɛ̄ŋ, a̍ lēkāa̍ o̍ lēkāa̍, a̍ īsɔ̄ɔ̍ o̍ īsɔ̄ɔ̍ ma̍ŋgālāā, a̍ wāŋnda̍ su̍u̍ o̍ su̍u̍.

⁷Mi̍ ki̍i̍la̍nɔ̍ Mɛ̄lɛ̄ka̍a̍ ho̍ō dīmī chōo̍ cho̍o̍ kpe̍le̍ŋ āā, “Lā ke̍ Mɛ̍lɛ̄ka̍ bɛ̄ɛ̄le̍ŋ ta̍u̍ ta̍u̍, ndu̍yɛ̍ mī lā sāŋga̍la̍ ndu̍. Kāni̍ fu̍u̍le̍, te̍le̍ŋ o̍ cho̍ ŋ̄wāŋndā chīe̍e̍ ya᷅mɛ̍i̍ kīlūl mbō tūsi̍ nda̍ nyɛ̄ pālāa̍ chōo̍ wo̍ ō fūūlu̍u̍. Lā sōōlu̍u̍ Mɛ̍lɛ̄ka̍ o̍ to̍o̍si̍a̍a̍ ha̍la̍a̍, a̍ chi̍e̍ēŋndo̍, a̍ pēe̍ mɛ̄ŋmā īhɛ᷄llo̍, a̍ pēēla̍ lābūūlūla̍ŋ ndo̍.”

⁸O̍ ki̍i̍la̍nɔ̍ Mɛ̄lɛ̄ka̍ tāso̍o̍ ho̍ō kɔ̄ɔ̄lī, mi̍ dīi̍ŋ ndɔ̄ɔ̍ fūlā. Mbo̍ dīmī āā, “Chi̍o̍o̍ ho̍ō pīɔ̍l. Ba̍bi̍lɔ̄ŋ tɔ̍ɔ̍ bɛ̄ndōo̍ ho̍ō pīɔ̍l. Ndu̍ to̍sa̍ ni̍ mi̍ wāŋnda̍ lɛ̄ŋnde̍ kpo̍u̍ o̍ chi̍e̍ēŋndo̍ ni᷄ŋ, a̍ ko᷅l mūɛ̄īmā ndɔ̄ma̍ ka̍lā ka̍la᷄ŋ, ma̍ŋ ma̍ yɔ̍nūŋ ni̍ māā nīīlū ndɔ̄ sūūndɛ̍i̍yo̍.”

⁹O̍ ā ŋīɔ̍ɔ̍ŋāā kāŋ kɔ̍ɔ̍lī, mi̍ ki̍i̍la̍nɔ̍ Mɛ̄lɛ̄ka̍ ŋgāa̍ ndɔ̄ɔ̍ fūlā. Mbo̍ dīmī chōo̍ cho̍o̍ āā, “Wānā o̍ wāna̍ so̍o̍lu̍u̍ vīsīo̍o̍ ho̍ō pɛ̍, kɛ̄lɛ̄ŋgāā mbō sōōlu̍u̍ vēla᷅ŋ ndɔ̍ nda̍ tōōsi̍a̍a̍ wo̍ pɛ̍, ndu̍yɛ̍ mbō chɛ᷄l mā dɔ̄ū ndu̍ tāāmāsi̍ ndɔ̄ɔ̍ o̍ ītēndu̍ kɛ̄lɛ̄ŋgāā o̍ bā pɛ̍,

¹⁰wānā ko̍ŋ, mɛ̄ɛ̍ ō chō mūɛ̄īmā Mɛ̄lɛ̄ka̍ bɛ̄ɛ̄ndi̍a̍a̍ wa̍ŋ hūnɔ̄ɔ̄ kōlɔ̄ɔ̄. Ma̍ŋ ma̍ yɔ̍nūŋ ni̍ māā, tu̍mbe̍ Mɛ̄lɛ̄ka̍a̍. Tu̍mbe̍ Mɛ̄lɛ̄ka̍ dūāūnūŋ ni̍ŋ ndo̍, ō tūūlū ni̍ŋ, nu̍a̍ wɔ̍ ko̍ mɛ̄ɛ̍ mūɛ̄īmā nɛ̄īyāā nɛ̄īya᷄ŋ mā wā nu̍a̍ā ā tɔ̍mūl ma̍ŋ bɛ̍ɛ̍ nyɛ̄ pɔ̄mbɔ̄ le̍ yɛ̍. Ndu̍yɛ̍, Mɛ̄lɛ̄ka̍ chō tōsā mɛ̄ɛ̍ mā ko᷄l ma̍ŋ kpo̍u̍. Ā hāndū ni̍ŋ wa̍nāā wāā nu̍a̍ā nyɛ̄ nɛ̄īyāā bɛ̄ndōo̍ chōo̍, o̍ yīŋndē bɛ̄ndūle̍ŋ ni᷄ŋ ki̍i̍la̍a̍ Mɛ̄lɛ̄ka̍a̍ o̍ hɔ̄l a̍ Sāā Fɔ̍ŋndɔ̍ɔ̍.

¹¹Yīŋnde̍ lu̍e̍ī ni᷅ŋ nda̍ nyɛ̍ nɛ̄īyāa̍ le̍ŋ, lē hīāū ni̍ŋ la̍chi̍ a̍ sānde̍i̍ le̍ fɛ̍ɛ̍ŋ a̍ fɛ̍ɛ̍ŋ lē nyu᷅m te̍. Wānāa̍ so̍o̍lūū ka̍ŋ vi̍sīo̍o̍ ho̍ō a̍ vēla᷅ŋ ndɔ̍ nda̍ tōōsi̍a̍a̍ ko̍ŋ ndo̍ wa̍, a̍ wānā o̍ wāna̍ chɛ̍l ma̍ dūāū ndu̍ tāāmāsi̍ dīōlā vīsīo̍o̍ ho̍ō, nda̍ ki̍nɛ̍i̍, le̍ pāa̍le̍ŋ a̍ nyūmnda̍ŋ nyɛ̄ nɛ̄īyāā nda̍ hāndū ni̍ŋ nda̍ chōo̍ wo̍ ō pɛ̍ŋgī le̍.”

¹²Le̍la̍ŋ, nya̍ wānāa̍ Mɛ̄lɛ̄ka̍a̍ ki̍nɛ̍i̍, nya̍ cho̍ nyɛ̄ sāwāla̍ Mɛ̄lɛ̄ka̍la̍ŋ lā dīmi̍ wo̍ tōsāa̍, ndu̍yɛ̍ mi̍ lā wā hīōūwɔ̄ɔ̍ lāchī a̍ Chi̍i̍su̍ tīīnda᷄ŋndo̍ wa̍, lā nɔ̄ mī lā hīōū lāchī a̍ sīsi̍la̍ŋ a̍ dīāllūŋ kālā yi̍.

¹³O̍ ko̍ŋ kɔ̍ɔ̍lī, mi̍ tu̍ɛ̍ī mi̍ dīōmndo̍ sūāā ɛ̄chɛ̍nɛ̄. Mbo̍ dīmūl la̍ āā, “Po̍o̍nyi̍a̍a̍ di̍ōmnda̍ŋ nda᷅ŋ māā, chɔ̍ŋ a̍ bōōnde̍i̍ he̍ī mbō kūɛ̄ a̍ lāchī kɛ᷅, wānāa̍ lo᷅ o̍ dīōm pīlɔ̍ɔ̍ ni᷄ŋ nda̍ Māsānɔ̄ɔ̍ Mɛ̄lɛ̄ka̍ wa̍ā ha̍a̍a̍ mbō lo̍ o̍ ko̍ŋ mā vī wa̍, wānāā kāŋ ā pɛ̄l tɔ̄nɔ̄ɔ̍.” Mi̍ Nyi̍na̍ Mɛ̄lɛ̄ka̍a̍ dīmī āā, “Le̍nde̍ i̍ cho̍ ni̍. Ā pɛ̄ŋgī ni̍ŋ a̍ wa̍li̍ ka̍lā ka̍lā nda̍ chō tōsāa̍ wo̍. Ndu̍yɛ̍ nyɛ̄ o̍ nyɛ̄ nda̍ tōsa̍, dɛ̍nɛ̍ kɛ̍ndɛ̄ kōŋ chō nda̍ tōlɔ̄ɔ̄ kɔ̄ɔ̄lī.”

¹⁴O̍ ko̍ŋ kɔ̍ɔ̍lī, mi̍ cha᷅ yu̍mbu̍ yu̍mbu̍ hu̍mbōo̍ a̍ nyɔ̄ɔ̍ īchāli̍ le̍cho̍o̍ māā wāna̍ chi̍e̍e̍. Mɔ̍si̍l lēmāsāa̍ wa̍ ndu̍ o̍ lēbōl ō tōōsīāā a̍ ko̍o̍līi̍yo̍ŋ. Mūɛ̄ī lūɛ̄īyɛ̄i̍ pūm ī wa̍ ndu̍ o̍ bā māā mūɛ̄ī kīālāā ŋ̄mālū.

¹⁵Mi̍ ki̍i̍la̍nɔ̍ Mɛ̄lɛ̄ka̍ chēle̍ŋ fūlā o̍ chīɛ̍i̍ Mɛ̄lɛ̄ka̍a̍ ni᷄ŋ. Mbo̍ dīmūl wāna̍ wa̍ īchāli̍ o̍ yu̍mbu̍ yu̍mbo̍o̍ chōo̍ wo̍ chōo̍ cho̍o̍ kpe̍le̍ŋ āā, “Chīɛ̍i̍ o̍ chi̍e̍ēŋndo̍ chōo̍ ī vēsa̍ kpu̍lūku̍. Ndu̍yɛ̍, bōōnde̍i̍ fūūlu̍u̍ le̍ kōūwɔ̄ɔ̍. Kāndu̍ wa̍llo̍ a̍ mūɛ̄ī nūm nde̍.”

¹⁶Mi̍ wāna̍ wa̍ īchāli̍ o̍ yu̍mbu̍ yu̍mbo̍o̍ chōo̍ wo̍, tōsā wa̍llo̍ a̍ mūɛ̄ī ndūɛ̍i̍ o̍ chi̍e̍ēŋndo̍ chōo̍. Ndu̍yɛ̍, mi̍ chīɛ̍i̍ chūū kōūwɔ̄ɔ̄.

¹⁷O̍ ko̍ŋ kɔ̍ɔ̍lī, mi̍ ki̍i̍la̍nɔ̍ Mɛ̄lɛ̄ka̍ chēle̍ŋ fūlā o̍ chīɛ̍i̍ Mɛ̄lɛ̄ka̍a̍ ni᷄ŋ ɛ̄chɛ̍nɛ̄. Ndu̍ bɛ̍ɛ̍ mūɛ̄ī lūɛ̄īyɛ̄i̍ ī wa̍ ndu̍ o̍ bā māā mūɛ̄ī kīālāā ŋ̄mālū.

¹⁸O̍ ko̍ŋ kɔ̍ɔ̍lī, mi̍ ki̍i̍la̍nɔ̍ Mɛ̄lɛ̄ka̍ chēle̍ŋ fūlā o̍ ma̍āŋndo̍. Ki̍i̍la̍nɔ̍ Mɛ̄lɛ̄ka̍a̍ ho̍ō ndu̍ o̍o̍ ma̍ndā yi᷅ŋnde̍ cho̍ o̍ ma̍āŋndo̍ chōo̍ le̍ŋ ni̍. Mbo̍ dīmūl ki̍i̍la̍nɔ̍ Mɛ̄lɛ̄ka̍ mūɛ̄ī lūɛ̄īyɛ̄i̍ ī wa̍ o̍ bā wo̍ chōo̍ cho̍o̍ āā, “Kpe̍le̍ yɔ̄mīī kūāmāa̍ ho̍ō ō dīū. Ka̍ndu̍ wa̍llo̍ a̍ mūɛ̄ī nūm i̍ lu̍ɛ̍i̍yɛ̄i̍ mā ke̍e̍ndu̍u̍ kɔ̄mnde̍ŋ.”

¹⁹Mi̍ ki̍i̍la̍nɔ̍ mūɛ̍i̍ wa̍ ō bā wo̍, ō tōsā wa̍llo̍ a̍ mūɛ̄ī ndūɛ̍i̍ o̍ chi̍e̍ēŋndo̍ chōo̍, mbo̍ kēēndūū kɔ̄mnde̍ŋ. Mɛ̄ɛ̍ o̍ ke̍e̍ndu̍u̍, mbo̍ dūāū o̍ so̍o̍ŋ bɛ̍ndū nda̍ wāāyīāā kɔ᷅mndē yɔ̄mnde̍ le̍ mūɛ̄īya̍ŋ tōōsīa̍a̍ wo̍ ni᷄ŋ. So̍o̍ŋndo̍ ho̍ō, ndu̍ si̍m le̍ tu̍mbe̍ Mɛ̄lɛ̄ka̍ dūāūnūŋ ni̍ŋ a̍ wānāā wɔ̄ɔ̍ŋnda̍, mbō hāndu̍ nda̍ nyɛ̄ pālāa̍ chōo̍ wo̍ ni̍.

²⁰Ndu̍yɛ̍, so̍o̍ŋndo̍ ho̍ō ō wa̍ māwāā chi̍e̍e̍ le̍kɔ̍ɔ̍ o̍ chi̍e̍e̍ bɛ̍ndōo̍ ho̍ō. Lo̍ŋ nda̍ wāāyīāā kɔ̄mnde̍ŋ ni̍. O̍ ko̍ŋ, mi̍ kōo̍wa̍ŋ mā cha᷄ŋ o̍ so̍o̍ŋ wa̍a̍yīāā kōŋ ni᷄ŋ, mi̍ mā yāmbū pīo̍o̍, mi̍ mā tūūsū le̍ mɛ̍ɛ̍līi̍la̍ŋ kɛ̄mɔ̄ɔ̍ lē dīi̍ŋ. Pīo̍o̍ ho̍ō yīŋgīlā ndɔ̄ɔ̍ ndu̍ o̍o̍ wa᷅ a̍ bāndi̍i̍ wāna̍ chi̍e̍e̍ kpe̍ŋ.