Read Southern Kisi Sɔ̄ɔ̍ŋ Chɔ̍ɔ̍ma᷄ŋndo̍ŋ 16 Bible Online

Sɔ̄ɔ̍ŋ Chɔ̍ɔ̍ma᷄ŋndo̍ŋ 16 - Southern Kisi bible

Sɔ̄ɔ̍ŋ Chɔ̍ɔ̍ma᷄ŋndo̍ŋ 16

¹O̍ ko̍ŋ kɔ̍ɔ̍lī, mi̍ tu̍ɛ̍ī mi̍ dīōmndo̍ sūāā chōo̍ cho̍o̍ kpe̍le̍ŋ fūlāa̍ o̍ chīɛ̍i̍ Mɛ̄lɛ̄ka̍a̍ ni᷄ŋ. Mi̍ dīōm kōŋ dīmūl ki̍i̍la̍a̍ Mɛ̄lɛ̄ka̍a̍ ŋɔ᷄mmɛ̍ūwa̍ āā, “Lā kɔ̍ mī lā kɔ̍ chu̍ā hɛ̄ŋgɛ̍i̍la̍ ŋɔ̍mmɛ̍ūla̍ŋ, mī lā hūlū tu̍mbe̍ Mɛ̄lɛ̄ka̍ cho̍ lēni᷄ŋ ndo̍ o̍ chi̍e̍ēŋndo̍ chōo̍.”

²O̍ ko̍ŋ, mi̍ ki̍i̍la̍nɔ̍ tāso̍o̍ kūā mbo̍ kɔ̍ hu̍lū hɛ̄ŋgɔ̍ɔ̍ o̍ ndɔ̍ɔ̍ o̍ chi̍e̍ēŋndo̍ chōo̍. Mɛ̄ɛ̍ o̍ hu̍lū, wānāa̍ nɔ̍ tāāmāsi̍ vīsīo̍o̍ ō dūāūwāā nda̍ o̍ ŋ̄dīāl, ndu̍yɛ̍ mā sōōlūū ve᷅la᷅ŋ vi̍sīo̍o̍ wa̍, mi̍ pāūvīī nɛ̄īyāā wɔ̄ɔ̍ŋīī bɛ̍ndūe̍i̍ fūlā nda̍ kpo̍u̍.

³O̍ ko̍ŋ kɔ̍ɔ̍lī, mi̍ ki̍i̍la̍nɔ̍ di̍i̍ŋ ndɔ̄ɔ̍ kūā mbo̍ kɔ̍ hu̍lū hɛ̄ŋgɔ̍ɔ̍ o̍ ndɔ̍ɔ̍ o̍ pēe̍ mɛ̄ŋmā īhɛ᷄llo̍ ni᷄ŋ. Mɛ̄ɛ̍ o̍ hu̍lū, mi̍ mɛ̄ŋnda̍ŋ mā sīmnu᷄ŋ māā kōo̍ma̍ wānā vi̍lɛ̍i̍. Nyɛ̄ o̍ nyɛ̄ yōōmāa̍ wa̍ lēni᷄ŋ ma̍ wū kpo̍u̍.

⁴O̍ ko̍ŋ kɔ̍ɔ̍lī, mi̍ ki̍i̍la̍nɔ̍ ŋga̍a̍ ndɔ̄ɔ̍ kūā mbo̍ kɔ̍ hu̍lū hɛ̄ŋgɔ̍ɔ̍ o̍ ndɔ̍ɔ̍ o̍ pēēla̍ yɔ̍ŋāāla̍ŋ ni᷄ŋ, a̍ pēēla̍ būūlūla̍ŋ. O̍ ko̍ŋ mi̍ lā sīmnu᷄ŋ ma̍ko̍o̍.

⁵Mi̍ tu̍ɛ̍ī mi̍ ki̍i̍la̍nɔ̍ Mɛ̄lɛ̄ka̍ cho̍ le̍ mɛ̄ŋnda̍ŋ māndāa̍ wo̍ līsā Mɛ̄lɛ̄ka̍ āā, “Mɛ̄lɛ̄ka̍, ā chō Mɛ̄lɛ̄ka̍ sa̍kpō. Nu᷄m cho̍ pɛ̄ŋgo̍o̍ ho̍ō ni̍, ndu̍yɛ̍ nu᷄m wa̍ kāni̍ ma̍si̍ndɛ̄ bɛ̍ɛ̍ ni̍. Nyɛ̄m pālāŋ ŋ̄ tūsi̍ mu᷅ŋ chi̍e̍ēŋndo̍ chōo̍ wo̍ŋ, o̍ nɛ̄ī sa̍kpō ŋ̄ tōsa̍ ndi̍ ni̍.

⁶Kāni̍ fu̍u̍le̍, wāŋnda̍ bīī ma̍ dīū wānāā nūmnda̍ a̍ wānāa̍ su̍a̍ā le̍ nūm nda̍. Le̍la̍ŋ ŋ̄ ke̍ nda̍ kōo̍wa̍ŋ le̍ mā ko᷄l ni̍. Ko̍ŋ kpe̍e̍kpe̍i̍ bɛ̍nda̍ le̍ nda̍ ni̍.”

⁷O̍ ko̍ŋ kɔ̍ɔ̍lī, mi̍ tu̍ɛ̍ī mi̍ dīōmndo̍ fūlā o̍ ma̍āŋndo̍ āā, “Tōnya̍ kpe̍e̍kpe̍i̍ i̍ cho̍ ni̍ māā Māsā bɛ̍ndū bɛ̄ndōo̍ o̍ nɔ̍ kpāāyāa̍ kpo̍u̍ wo̍ nūm Mɛ̄lɛ̄ka̍ chō ni̍. Nyɛ̄m pālāŋ ŋ̄ tūsi̍ mu᷅ŋ o̍ chi̍e̍ēŋndo̍ chōo̍ wo̍ŋ, o̍ nɛ̄ī sa̍kpō ŋ̄ tōsa̍ ndi̍ ni̍. Ndu̍yɛ̍, ko̍ŋ kpe̍e̍kpe̍i̍ bɛ̍nda̍ le̍ nda̍ ni̍.”

⁸O̍ ko̍ŋ kɔ̍ɔ̍lī, mi̍ ki̍i̍la̍nɔ̍ hīɔ̍ɔ̍lo̍o̍ kūā mbo̍ kɔ̍ hu̍lū hɛ̄ŋgɛ̍i̍ ndɔ̄ɔ̍ o̍ pāa̍le̍ŋ chōo̍. Mɛ̄ɛ̍ o̍ hu̍lū, mi̍ pāa̍le̍ŋ lē chɔ̄ɔ̄lū tūūlu̍ ta̍u̍ ta̍u̍. Mi̍ tūūlu̍ bɛ̍ndū kōŋ lūmī wāŋnda̍ ta̍u̍.

⁹Mɛ̄ɛ̍ tūūlu̍ bɛ̍ndū kōŋ lūmi̍ nda̍ te̍i̍, ma̍ sāā Mɛ̄lɛ̄ka̍ o̍ nɔ̍ kpāāyāa̍ le̍ kpūndɛ̍lā lāŋ tūsīo̍o̍ wo̍ yīōūla̍ŋ. Ndu̍yɛ̍, a̍ nyɛ̄ nɛ̄īyāā kōŋ kpo̍u̍ wāŋnda̍ chɛ᷄l mā ma᷄l yɔ̄ŋndā ndāla̍ wɔ̍ɔ̍ŋnda̍ŋ mā sāŋga̍la̍ Mɛ̄lɛ̄ka̍ le̍.

¹⁰O̍ ko̍ŋ kɔ̍ɔ̍lī, mi̍ ki̍i̍la̍nɔ̍ ŋu̍ɛ̍ɛ̍no̍o̍ hūlū hɛ̄ŋgɛ̍i̍ ndɔ̄ɔ̍ o̍ kpe̍ŋgbe̍i̍ lēmāsa̍ vīsi̍ fu̍la̍ ho̍ō, o̍ pēe̍ mɛ̄ŋmā īhɛ᷄llo̍ ni᷄ŋ ndo̍ chōo̍. Mɛ̄ɛ̍ o̍ hu̍lū, mi̍ nyūmnda̍ŋ mā tūāl lēpīlɛ̍ ti̍ŋgīsi̍ o̍ fo̍ndāŋ vīsīo̍o̍ ho̍ō ō wa̍ o̍ māsāle̍ŋ chōo̍ wo̍. O̍ ko̍ŋ kɔ̍ɔ̍lī, mi̍ wāŋnda̍ nda̍ pi̍la̍ sāā dīɔ̄ɔ̄mūīī ndɛ̄i̍ kīsī kīsīo̍o̍, a̍ nyɛ̄ nɛ̄īyāa̍ wa̍ nda̍ o̍ dīāllo̍ŋ ni᷄ŋ ndo̍.

¹¹Kɛ̍ o̍ ko̍ŋ ni̍ŋ fa̍ū, ā chɛ᷄l mā ma᷄l yɔ̄ŋndā ndāla̍ wɔ̍ɔ̍ŋnda̍ŋ te̍. Ma̍ sāā Mɛ̄lɛ̄ka̍ o̍ cho̍ ɛ̄chɛ̍nɛ̄ wo̍ yīōūla̍ŋ, le̍ nyɛ̄ nɛ̄īyāa̍ cho̍ nda̍ chōo̍ wo̍, a̍ pāūvīi̍ cho̍ nda̍ lēkɔ̄ɔ̍ ve̍.

¹²O̍ ko̍ŋ kɔ̍ɔ̍lī, mi̍ ki̍i̍la̍nɔ̍ ŋɔ̍mpu᷅mndo̍ hūlū hɛ̄ŋgɛ̍i̍ ndɔ̄ɔ̍ o̍ Pēē Bɛ̍ndōo̍ Yūfi̍lu̍a̍tīī. Mɛ̄ɛ̍ o̍ hu̍lū, mi̍ mɛ̄ŋnda̍ŋ mā vēlā sɛ̍ɛ̍ŋ le̍ mī māsāa̍ o̍ lɛ̄ŋīī yɛ̍ yɛ̍i̍ bā pāa̍le̍ŋ lē chāŋ ndo̍ ā nɔ̄la̍ mā ta᷄ŋ.

¹³O̍ ko̍ŋ kɔ̍ɔ̍lī, mi̍ cha᷅ nyi̍nāā wɔ̄ɔ̍ŋnda̍ ā yāa̍ māā lāchōka̍a̍chō. Mi̍ cha᷅ mi̍ ō pīlɛ̍ fūlā tāmba̍lāka̍a̍ o̍ sōndō, mi̍ ō pīlɛ̍ fūlā vīsi̍ fu̍la̍ o̍ pēe̍ mɛ̄ŋmā īhɛ᷄llo̍ ni᷄ŋ ndo̍ o̍ sōndō. Wāna̍ lāchōōwa̍ di̍mi̍ māā wāna̍ su̍a̍ā le̍ Mɛ̄lɛ̄ka̍ wo̍ o̍ cho̍ ni̍ wo̍, mi̍ ō pīlɛ̍ fūlā ndu̍ o̍ sōndō.

¹⁴Ndu̍yɛ̍, nyi̍nāā wɔ̄ɔ̍ŋāā hīɔ̍ɔ̍lu̍a̍a̍ ha̍ā nɔ̄ kpāāyāa̍ mā tōsa̍ sɔ̄ɔ̍ŋ kɔ̄ndɔ̄fi̍llo̍ŋ. Ndu̍yɛ̍, nda̍ nɔ̍ le̍ bālɔ̄ɔ̍ māsāa̍ cho̍ lɛ̄ŋnde̍ bōlle̍ wa̍ chōo̍ kpo̍u̍ ni̍, le̍ nda̍ chūūŋgīa̍a̍ nāa̍ pi᷅lɛ̍ le̍ chɔ̄ūwo̍ o̍ pāa̍le̍ bɛ̍ndūlē lēŋ chōo̍. Le̍ŋ le̍ yɔ̍nūŋ ni̍ māā, Mɛ̄lɛ̄ka̍ nɔ̍ kpāāyāa̍ kpo̍u̍ wo̍, pāa̍le̍ ndɔ̄le̍ŋ.

¹⁵Mi̍ Māsānɔ̄ɔ̍ dīmi̍ āā, “Lā kɛ̄si̍ŋ o̍ kɔ̄l māā I̍ cho̍ hūnɔ̄ɔ̄ bōōndi̍i̍ nya̍ ve᷅ ni̍ŋ kɔ̍l te̍ ve̍, mɛ̄ɛ̍ vīīnɔ̄ɔ̍ wōōlū nu̍a̍ā wānā yɛ̍. Wāna̍ lo̍ lāhɔ̄l pɛ̍, ndu̍yɛ̍ mbō mānda̍ nyɛ̄ ndɔ̄ chu̍ɛ̍i̍ya᷄ŋndo̍ pɛ̍, ō be̍lū tu̍ū fo̍ndō mī si̍ɔ̍mbu̍la̍ŋ lā bīī ndu̍ fāŋgāa̍ o̍ hɔ̄l te̍. Ndu̍yɛ̍, wānā ko̍ŋ mɛ̄ɛ̍ ō pɛ̄l tɔ̄nɔ̄ɔ̍.”

¹⁶O̍ ko̍ŋ kɔ̍ɔ̍lī, mi̍ nyi̍nāā wɔ̄ɔ̍ŋāā yāa̍ ka̍ŋ ā chūūŋgīāā māsāa̍ cho̍ lɛ̄ŋnde̍ bōlle̍ wa̍ o̍ fo̍ndāŋ pīlɛ̍, mā vēēlū ndu̍ o̍ Hi̍būlūi̍ye̍ ni᷄ŋ āā, Āmākɛ̍dɔ̄ŋ.

¹⁷O̍ ko̍ŋ kɔ̍ɔ̍lī, mi̍ ki̍i̍la̍nɔ̍ ŋɔ̍mmɛ̍ūwo̍ hūlū hɛ̄ŋgɛ̍i̍ ndɔ̄ɔ̍ o̍ hūēīye̍ ni᷄ŋ. Mɛ̄ɛ̍ o̍ hu̍lū, mi̍ dīōmndo̍ sūāā chōo̍ cho̍o̍ chɔ̄nɔ᷄ŋndo̍ o̍ kpe̍ŋgbe̍i̍ lēmāsa̍ Mɛ̄lɛ̄ka̍a̍ o̍ chīɛ̍i̍ Mɛ̄lɛ̄ka̍a̍ ni᷄ŋ. Mi̍ dīōm kōŋ dīmī āā, “Nyɛ̄ o̍ nyɛ̄ chūū yɔ̄nɔ᷄ŋ.”

¹⁸O̍ ko̍ŋ kɔ̍ɔ̍lī, mi̍ nyɔ̄ɔ̍ kāndū tōsāa̍ ŋu̍āla̍lɛ̍ī ŋūāla̍lɛ̍ī bɛ̄ndū. Mi̍ tu̍ɛ̍ī dīōmnda̍ŋ sūɛ̍i̍. Mi̍ ta᷅ŋnda̍ŋ mā dēŋī kpa̍ŋgāŋgāŋ kpāŋgāŋgāŋ bɛ̄ndū. Mi̍ lɛ̄ŋnde̍ŋ lē kāndū nyīīyāa̍ ta̍u̍ ta̍u̍. Kāni̍ bɛ̍ɛ̍ mi̍ Mɛ̄lɛ̄ka̍ tōōsīāā wāna̍ chi̍o̍o̍, lɛ̄ŋndē nyīīya̍ wɔ̍ le̍nde̍ le̍. Lɛ̄ŋnde̍ŋ nyīīyā bɛ̄ndū bɛ̍ndōo̍ wa̍ ko̍ŋ ni̍.

¹⁹Mɛ̄ɛ̍ lɛ̄ŋnde̍ŋ lē nyīīya̍ nyīīyā kōŋ, mi̍ lɛ̄ŋnde̍ŋ lē tɛ̄ɛ̄ndīāā o̍ chi̍e̍e̍ bɛ̍ndōo̍ ni᷄ŋ. Mi̍ chi̍e̍e̍ bɛ̍ndōo̍ ho̍ō tɛ̄ndā tɛ̄ndūla̍ŋ sālā yāa̍. O̍ ko̍ŋ kɔ̍ɔ̍lī, chi̍o̍o̍ŋ o̍ lɛ̄ŋnde̍ ni᷄ŋ kpo̍u̍ mi̍ ŋ̄ pēsī wɔ̍ wɔ̍. Mɛ̄ɛ̍ o̍ he̍ī ni᷄ŋ, Mɛ̄lɛ̄ka̍ lōōnu̍ŋ ma̍lo̍o̍na᷄ŋ kpe̍e̍kpe̍i̍ nyɛ᷅ o̍ nyɛ̄ wɔ̄ɔ̍ŋ chi̍e̍e̍ bɛ̍ndōo̍ Ba̍bi̍lɔ̄ŋ o̍ to̍sa̍. Ndu̍yɛ̍, mi̍ Mɛ̄lɛ̄ka̍ tōsā mi̍ wāŋnda̍ Ba̍bi̍lɔ̄ŋ ko᷅l mūɛ̄īma̍ wa̍ o̍ tāāla̍ Mɛ̄lɛ̄ka̍a̍ ni᷄ŋ nda̍ŋ fa̍ū, ma̍ŋ ma̍ yɔ̍nūŋ ni̍ māā, tu̍mbe̍ Mɛ̄lɛ̄ka̍ dɔ̄ɔ̍ŋ a̍ nda̍ mbo̍ tūsī nda̍ nyɛ̄ pālāa̍ chōo̍ wo̍.

²⁰O̍ ko̍ŋ, lɛ̄ŋīi̍ cho̍ ī bālāā a̍ mɛ̄ŋnda̍ŋ nde̍ mi̍ ī lō. Pēmbo᷄ŋ bɛ̍ɛ̍ mi̍ ŋ̄ fāŋa᷄ŋ.

²¹Mi̍ lōo̍ŋ fūlā chōo̍ cho̍o̍ kpu̍ŋgbāŋ bɛ̄ndo᷄ŋ, mi̍ ŋ̄ dēlī wāŋnda̍ chōo̍. Lōōŋ kpu̍ŋgba᷄ŋ mu᷅ŋ ī kɛ᷅ kɛ᷅ ndi̍ i̍i̍ wa᷅ lu̍su̍llo̍ le̍ pa᷅ŋnda̍ŋ kɛ̄mɛ̄. Mɛ̄ɛ̍ ŋ̍ de̍li̍ wāŋnda̍ chōo̍ te̍i̍, ma̍ kāndū Mɛ̄lɛ̄ka̍ yīōūla̍ŋ le̍ kpūndɛ̍ lōōŋ kpu̍ŋgbāa̍ ho̍ō. Kāni̍ fu̍u̍le̍, ō wa̍ kpūndɛ̍ wɔ̄ɔ̍ŋ bɛ̄ndū bɛ̍ndū.