Read Southern Kisi Sɔ̄ɔ̍ŋ Chɔ̍ɔ̍ma᷄ŋndo̍ŋ 19 Bible Online

Sɔ̄ɔ̍ŋ Chɔ̍ɔ̍ma᷄ŋndo̍ŋ 19 - Southern Kisi bible

Sɔ̄ɔ̍ŋ Chɔ̍ɔ̍ma᷄ŋndo̍ŋ 19

¹O̍ ko̍ŋ kɔ̍ɔ̍lī, mi̍ tu̍ɛ̍ī bɔ̄ɔ̄lūūwo̍ ɛ̄chɛ̍nɛ̄ māā fāŋgā bɛ̍ndū bɛ̄ndū. Ā wa̍ Mɛ̄lɛ̄ka̍ līsāa̍ chōo̍ cho̍o̍ āā, “Sāŋgālāa̍ chō le̍ Mɛ̄lɛ̄ka̍ nāa̍. Ndu̍ pi̍ŋi̍ na̍a̍ ni̍. Ō chō o̍ nāŋɔ̄ɔ̍ chōo̍ a̍ kpāāyāa̍.

²Nyɛ̄ pālāā o̍ tu̍sī ŋ̍wa᷅ŋndā chīe̍e̍ cho̍o̍ o̍ chi̍e̍ēŋndo̍ chōo̍ wo̍, o̍ nɛ̄ī sa̍kpō o̍ to̍sa̍ ndi̍ ni̍. Nyɛ̄ kpe̍e̍kpe̍i̍ bɛ̍nda̍ le̍ nda̍ wo̍ cho̍ ko̍ŋ ni̍. Chūā sūūndɛ̍i̍ tɔ̍ɔ̍ bɛ̍ndōo̍, o̍ to̍sa̍ ho̍ō mi̍ ŋ̄wāŋndā chīe̍e̍ a̍ to̍sā yɔ̄ŋ wɔ̄ɔ̍ŋndo̍ le̍ bāa̍ wōūwo̍ o̍ nīīlū ndɔ̄ su̍u̍ndɛ̍i̍yo̍ ni᷄ŋ ndo̍, Mɛ̄lɛ̄ka̍ kīlu̍l ndu̍ yāmɛ̍i̍, mbo̍ hāndū ndu̍ nyɛ̄ pālāa̍ chōo̍. Māa̍ Mɛ̄lɛ̄ka̍ mīŋgu̍l ndu̍ ni̍, le̍ bu̍ɛ̍i̍yāā ndūa̍a̍ o̍ di̍u̍ wa̍.”

³Ma̍ dīmī vɛ̄lɛ̄ chōo̍ cho̍o̍ āā, “Sāŋgālāa̍ chō o̍ Mɛ̄lɛ̄ka̍ lo̍. Yīŋnde̍ cho̍ ndu̍ lōmɔ̄ɔ̍ le̍ŋ, ndu̍ yɔ̍nūŋ ni̍ māā chi̍e̍e̍ tɔ̍ɔ̍ bɛ̍ndōo̍ ho̍ō, kūmi̍i̍ ke̍ŋ chō hīōūwɔ̄ɔ̄ lāchī a̍ hēlɔ̄ɔ̍ le̍ fɛ̍ɛ̍ŋ a̍ fɛ̍ɛ̍ŋ.”

⁴O̍ ko̍ŋ, mi̍ cha᷅ mi̍ lāŋgba̍ā kālāā ŋ̄wāŋ bi̍di̍i̍ŋ a̍ wānāā hīɔ̍ɔ̍lu̍a̍a̍, a̍ nyāā yōōmāā hīɔ̍ɔ̍lu̍a̍a̍ ā bāŋ wūla̍ŋ Mɛ̄lɛ̄ka̍ lāchī, o̍ cho̍ īchāli̍ o̍ kpe̍ŋgbe̍i̍ lēmāsāa̍ chōo̍ wo̍. Ma̍ līsā ndu̍ āā, “Le̍nde̍ i̍ cho̍ ni̍. Sāŋgālāa̍ chō le̍ nūm Mɛ̄lɛ̄ka̍.”

⁵Mi̍ dīōmndo̍ sūāā o̍ kpe̍ŋgbe̍i̍ lēmāsāa̍. Mbo̍ dīmī āā, “Nya̍ wānāa̍ cho̍ bu̍ɛ̍i̍yāa̍ Mɛ̄lɛ̄ka̍a̍, mi̍ lā nɔ̄ sīōōŋīī ndūɛ̍i̍ ya̍ ki̍nɛ̍i̍, wānā pɔ̍mbɔ̄ ni̍, wānā bɛ̍ndū ni̍, nya̍ kpo̍u̍ lā sāŋga̍la̍ Mɛ̍lɛ̄ka̍.”

⁶O̍ ko̍ŋ kɔ̍ɔ̍lī, mi̍ tu̍ɛ̍ī vɛ̄lɛ̄ bɔ̄ɔ̄lūūwo̍ māā fāŋgā bɛ̍ndū bɛ̄ndū. Wānā a̍a̍ tu̍e̍ī pɛ̍ āā bāl bɛ̄ndōo̍ cho̍ sūɛ̍i̍ ni̍, vɛ̄lɛ̄ mɛ̄ɛ̍ ta᷅ŋnda̍ŋ mā wā nu̍a̍ā dēŋīo̍o̍ mī pīɔ̍ɔ̍ wa̍ yīmndo̍ yɛ̍. Ma̍ dīmī āā, “Sāŋgālāa̍ chō le̍ Mɛ̄lɛ̄ka̍. Māsānɔ̄ɔ̍ Mɛ̄lɛ̄ka̍ nāa̍ o̍ nɔ̍ kpāāyāa̍ kpo̍u̍ wo̍, ō kāndu̍ wāa̍ māsāa̍ ŋ̄wāŋndā chīe̍e̍ cho̍o̍ o̍ chi̍e̍ēŋndo̍ ni᷄ŋ.

⁷Lā ŋ̄ tōsa᷅ŋ kɔ̄l kɛ̄ndɔ̄ɔ̍. Lā ŋ̄ wūūnu᷅ŋ kpe̍njo̍o̍. Lā ŋ̄ sōōlu᷅ŋ ndu̍, kāni̍ fu̍u̍le̍, bōōndi̍i̍ Sāā Fɔ̍ŋndɔ̍ɔ̍ chō la̍nɔ̍ɔ̍ chūa̍a̍ ve̍ ī fūūlu̍u̍. Ndu̍yɛ̍, chūā kālāa̍ chīi̍ ni᷅ŋ tōōsīa̍ŋ.

⁸Mɛ̄lɛ̄ka̍ bīī mbo̍ kē chūa̍a̍ ho̍ō nyɛ̄lā kɛ̄ndɛ̄ kɛ̍ndɛ̄lā hūmbūlā fo̍ fo̍ la̍ŋ, le̍ mbō dōvi̍ŋ.” Nyɛ̄lā hūmbūla̍ŋ nda᷅ŋ, la̍ŋ la̍ si̍m le̍ sɔ̄ɔ̍ŋ sa̍kpōŋ wānāa̍ Mɛ̄lɛ̄ka̍a̍ ā tōsa̍ wo̍ŋ ni̍.

⁹O̍ ko̍ŋ kɔ̍ɔ̍lī, mi̍ ki̍i̍la̍nɔ̍ Mɛ̄lɛ̄ka̍a̍ dīmūl la̍ āā, “Po̍o̍nyi̍a̍a̍ di̍ōmnda̍ŋ nda᷅ŋ, māā wānāa̍ sɔ̍la̍ vēēlōo̍ le̍ hūnɔ̄ɔ̍ o̍ bɔ̄ŋa᷅ŋ Sāā Fɔ̍ŋndɔ̍ɔ̍ chō la̍nɔ̍ɔ̍ chūa̍a̍ wo̍ wa̍, ā pɛ̄l tɔ̄nɔ̄ɔ̍.” Mbo̍ dīmūl la̍ vɛ̄lɛ̄ āā, “Mɛ̄lɛ̄ka̍ dīōmndā ndɔ̄la̍ tōnya̍la̍ŋ la̍ cho̍ la᷅ŋ ni̍.”

¹⁰O̍ ko̍ŋ, mi̍ ba᷅ŋ wūla̍ŋ ki̍i̍la̍nɔ̍ Mɛ̄lɛ̄ka̍a̍ ho̍ō lāchī le̍ ndu̍ sōōlūūwo̍. Kɛ̍ mbo̍ dīmūl la̍ āā, “To̍sā ke̍ŋ te̍. Ya̍ bɛ̍ɛ̍ bu̍ɛ̍i̍ Mɛ̄lɛ̄ka̍a̍ ko̍ni̍ ya̍ cho̍ ni̍, mɛ̄ɛ̍ ŋ̄ chō nu̍a̍ā nya̍ chāāŋāā nyāā wa̍nāā lāāla᷄ŋnda̍ yɛ̍, a̍ bi̍ī sɔ̄ɔ̍ŋ tōnya᷅ŋ Chi̍i̍sū chɔ᷅m mu᷅ŋ ŋ̄wāŋndā chīe̍e̍ wo̍ŋ, nyɛ̄ kɛ̄ndɛ̄ kpi̍ŋ nda̍. Mɛ̄lɛ̄ka̍ nya̍ nɔ̄ ni̍ mī lā sōōlu̍u̍. Wānāa̍ di̍mūl wāŋnda̍ tōnya̍ cho̍ a̍ sɔ̄ɔ̍ŋ Chi̍i̍sū chɔ̍m wāŋnda̍ wo̍ŋ nda̍, wānāā kāŋ Nyi̍na̍ Mɛ̄lɛ̄ka̍a̍ cho̍ nda̍ kɔ̄ɔ̄lī ni̍ mɛ̄ɛ̍ wānāa̍ su̍a̍ā le̍ Mɛ̄lɛ̄ka̍ wa̍ ā chō yɛ̍.”

¹¹O̍ ko̍ŋ kɔ̍ɔ̍lī, mi̍ cha᷅ ɛ̄chɛ̍nɛ̄ ō kūmbīāā. Mi̍ cha᷅ so᷅ hūmbōo̍ a̍ wāŋndo̍ īchāli̍ le̍cho̍o̍. Wāŋndo̍ ho̍ō dīōlā ndɔ̄la̍ŋ la̍ wa̍ ni̍ āā, “Wānā sa̍kpōo̍ ō wāŋnda̍ nɔ̄lā mā tīīnda̍ŋ ndo̍.” O̍ nɛ̄ī sa̍kpō o̍ ki̍a̍lū ya᷅mɛ̍i̍ ni̍. Ndu̍yɛ̍, le̍ sɔ̄ɔ̍ŋ cho̍ sɔ̄ɔ̍ŋ sa̍kpo᷄ŋ ndo̍ŋ o̍ chu̍ā ni̍.

¹²Wānā a̍a̍ che᷅ ndu̍ hɔ̄lta̍ŋ īyēlēŋgi̍ ye̍lēŋgi̍e̍i̍ pɛ̍ āā, mɛ̄ɛ̍ yīŋnde̍ŋ lē wā nu̍a̍ā sānde̍i̍ yɛ̍ ni̍. Mɔ̍si̍lta̍ lēmāsāla̍ŋ lā wa̍ ndu̍ o̍ lēbōl ta̍u̍. Ndu̍yɛ̍, dīōlā pūm lā wa̍ ndu̍ lā pōōnyīa̍ŋ, wānā o̍ wānā ndu̍ o̍o̍ si̍nā la̍ŋ te̍, mɛ̄ɛ̍ ndu̍ pi̍la̍.

¹³Dōma̍ wa̍ ndu̍ lēkɔ̄ɔ̍ wo̍, kōo̍wa̍ŋ mā wa̍ mā tīūwāā lēni᷄ŋ kpo̍u̍. Wāŋndo̍ ho̍ō nda̍ a̍a̍ ve̍e̍lū ndu̍ vɛ̄lɛ̄ āā, “Dīo̍m Mɛ̄lɛ̄ka̍a̍.”

¹⁴Wānāā chɔ̄ūwa̍ ɛ̄chɛ̍nɛ̄ ā wa̍ ndu̍ kɔ̄ɔ̄lī. Nyɛ̄la̍ wa̍ nda̍ lēkɔ̄ɔ̍ la̍ŋ, lā wa̍ lā hūmbū fo̍ fo̍ bɛ̍ndū. Nda̍ kpo̍u̍, ā wa̍ īchāli̍ o̍ su̍a̍ā hūmbūa̍a̍ chōo̍.

¹⁵Wāna̍ wa̍ ho̍ō o̍ so̍ hūmbōo̍ chōo̍ wo̍, mūɛ̄ī fāŋīī lūɛ̄īyɛ̄i̍ wa̍ ndu̍ fūlāā o̍ sōndō le̍ sɔ̍ŋgɔ̄ɔ̍ a̍ ndi̍ mbō yēm lɛ̄ŋnde̍ o̍ chi̍e̍ēŋndo̍ chōo̍. Ō chō wā māsāa̍ lɛ̄ŋnde̍ chōo̍, ndu̍yɛ̍ mbō kūūmbu̍ŋ nda̍ chōo̍ kpu̍lu̍ bɛ̍ndū. Ndu̍ wa̍a̍yīāā ni̍ŋ kɔ᷅mnde̍ŋ o̍ so̍o̍ŋ nda̍ dūāū kɔ᷅mnde̍ŋ le̍ wāāyīa̍a̍, mā tōōsi̍a̍a̍ mūɛ̄īya̍ŋ ndo̍ ni̍. Ma̍ŋ ma̍ si̍m le̍ Mɛ̄lɛ̄ka̍ nɔ̍ kpāāyāa̍ kpo̍u̍ wo̍, tu̍mbe̍ ndɔ̄ɔ̍ ni̍ a̍ nyɛ̄ pālāā o̍ tu̍sī ni̍ŋ nda̍ chōo̍ wo̍.

¹⁶Wāŋndo̍ ho̍ō mi̍ cha᷅ dīōla̍ŋ lā pōōnyīāā ndu̍ o̍ do᷅māa̍ a̍ o̍ lɔ̄lōo̍. Dīōlā la᷄ŋ la̍ wa̍ ni̍ āā, “Māsānɔ̍ nɔ̍ kpāāyāa̍ kpo̍u̍ wo̍, Māsa̍ hi̍o̍ū māsāa̍ kpo̍u̍ wo̍.”

¹⁷O̍ ko̍ŋ kɔ̍ɔ̍lī, mi̍ cha᷅ ki̍i̍la̍nɔ̍ Mɛ̄lɛ̄ka̍a̍ īsīsi̍ o̍ pāa̍le̍ŋ chōo̍. Mi̍ ki̍i̍la̍nɔ̍ Mɛ̄lɛ̄ka̍a̍ ho̍ō sūāā chōo̍ cho̍o̍ kpe̍le̍ŋ, nāa̍ yōūwāa̍ wa̍ bālɔ̄ɔ̍ o̍ ha̍la̍a̍ ni᷄ŋ nda̍ chūā āā, “Lā hu᷅ŋ mī lā chūūŋgi̍āŋ, le̍ nyɛ̄ dīāā bɛ̄ndū bɛ̍ndū Mɛ̄lɛ̄ka̍ bɛ̄ɛ̄ndi̍a̍a̍ wo̍ dīo̍o̍.

¹⁸Lā hu᷄ŋ mī lā hu᷄ŋ di̍ō vīsīŋ wāŋndā chīe̍e̍ya̍, a̍ vīsīŋ māsāa̍, a̍ vīsīŋ wānāa̍ cho̍ so̍vɛ̄i̍ya̍ bōlle̍ wa̍, a̍ vīsīŋ so̍vɛ̄i̍ya̍, o̍ ko̍ŋ kɔ̍ɔ̍lī, a̍ vīsīŋ su̍a̍ā, a̍ vīsīŋ so̍vɛ̄i̍ya̍a̍ ku̍ā o̍ su̍a̍ā kāŋ chōo̍ wa̍, a̍ vīsīŋ wānā o̍ wānā, chɛ̄ ni̍, wānā yɔ̍ŋāā ni̍, wānā pɔ̍mbɔ̄ ni̍, wānā bɛ̍ndū ni̍, kpo̍u̍.”

¹⁹O̍ ko̍ŋ kɔ̍ɔ̍lī, mi̍ cha᷅ vīsi̍ fu̍la̍ o̍ pēe̍ mɛ̄ŋmā īhɛ᷄llo̍ ni᷄ŋ ndo̍, a̍ māsāa̍ o̍ chi̍e̍ēŋndo̍ ni᷄ŋ, a̍ wānāā ndāa̍ chɔ̄ūwa̍. Ma̍ chūūŋgi̍āŋ le̍ chɔ̄ūwo̍ a̍ wāna̍ wa̍ ko̍ŋ i̍cha̍li̍ o̍ so᷅ hūmbōo̍ chōo̍ wo̍ nda̍ wānāā ndūa̍a̍ chɔ̄ūwa̍.

²⁰Mi̍ wāna̍ wa̍ o̍ so᷅ hūmbōo̍ chōo̍ wo̍, nda̍ wānāā ndūa̍a̍ ā bīī vīsī kōŋ, a̍ wāna̍ lāchōōwa̍ di̍mi̍ māā wāna̍ su̍a̍ā le̍ Mɛ̄lɛ̄ka̍ wo̍ o̍ cho̍ ni̍, mī ndu̍ o̍o̍ to̍sā sɔ̍ɔ̍ŋ kɔ̄ndɔ̄fi̍li̍ŋ bɛ̄ndo᷄ŋ vīsīo̍o̍ ho̍ō o̍ hɔ̄l lo̍. A̍ sɔ̄ɔ̍ŋ kɔ̄ndɔ̄fi̍li̍ŋ bɛ̄ndūŋ mu᷅ŋ o̍ hu̍i̍ wāŋnda̍ ni̍. Nda̍ yɔ̍nūŋ ni̍ māā, wānāa̍ chɛ̍l ma̍ hōl nda̍ tāāmāsi̍ vīsīo̍o̍, ndu̍yɛ̍ ma̍ sōōlūū vēla᷅ŋ ndɔ̍ nda̍ tōōsi̍a̍a̍ wo̍ wa̍. Vīsīo̍o̍ ho̍ō ni̍, a̍ wāna̍ lāchōōwa̍ di̍mi̍ ho̍ō māā wāna̍ su̍a̍ā le̍ Mɛ̄lɛ̄ka̍ wo̍ o̍ cho̍ ni̍ wo̍, mɛ̄ɛ̍ nda̍ bīī nda̍, ā lo̍ yōōmū le̍nde̍ ma̍ wūū nda̍ o̍ fo̍ndāŋ yīŋndē wūle̍ wu᷅le̍ bɛ᷅ndōo̍ ni᷄ŋ.

²¹Mi̍ wāna̍ wa̍ ko̍ŋ o̍ so᷅ hūmbōo̍ chōo̍ wo̍ dīū wānāā ndāa̍ chɔ̄ūwa̍, ā tūa̍a̍ pa̍ku̍ a̍ mūɛ̄ī fāŋīi̍ wa̍ ndu̍ o̍ sōndō ve̍. O̍ ko̍ŋ kɔ̍ɔ̍lī, yōūwa̍ kpo̍u̍ ma̍ hūŋ ma̍ dīā vīsīŋ ndāa̍ŋ ma̍ sāŋgā.