Read Southern Kisi Sɔ̄ɔ̍ŋ Chɔ̍ɔ̍ma᷄ŋndo̍ŋ 2 Bible Online

Sɔ̄ɔ̍ŋ Chɔ̍ɔ̍ma᷄ŋndo̍ŋ 2 - Southern Kisi bible

Sɔ̄ɔ̍ŋ Chɔ̍ɔ̍ma᷄ŋndo̍ŋ 2

¹O̍ ko̍ŋ kɔ̍ɔ̍lī, mbo̍ dīmūl la̍ āā, “Po̍o̍nyi̍a̍a̍ yo̍o̍ŋgōo̍ ho̍ō nāa̍ ki̍i̍la̍nɔ̍ Mɛ̄lɛ̄ka̍a̍ chūā, o̍ cho̍ ku̍ndā wānāā lāāla᷄ŋnda̍ Ɛ̍fi̍sīā chi̍e̍e̍ māndāa̍ wo̍. Di̍mu̍l ndu̍ māā, “Wāna̍ nɔ̍ lōōŋ ŋɔ̍mmɛ̍ūwo̍ŋ o̍ bā ndɔ̄ kɛ̍ndɔ̄ɔ̍ wo̍, ndu̍yɛ̍ mbo̍ wā bālɔ̄ɔ̍ o̍ nyɛ̄lā ŋ̄ko̍o̍līi̍la̍ kɛ̍sīāālā la̍mbūi̍la̍ ŋɔ̍mmɛ̍ūla̍ŋ tɛ̄ɛ̄ŋ ndo̍, yōōŋgū o̍ yɔ̍ŋ ndo̍, ndu̍ cho̍ ho̍ō ni̍.

²Ō dīmi̍ āā, nyɛ̄ o̍ nyɛ̄ nya̍ chō tōsāa̍ I̍ si̍nā. I̍ si̍nā mɛ̄ɛ̍ nya̍ chō wa̍llo̍ ō kālā ka̍lā yɛ̍. Ndu̍yɛ̍, I̍ si̍nā mɛ̄ɛ̍ nya̍ chō nyɛ̄ pālāa̍ bīūwɔ᷄ŋndo̍ yɛ̍. I̍ si̍nā māā lā chɛ᷅l wa̍nāā wɔ̄ɔ̍ŋnda̍ nya̍ tɛ̄ɛ̄ŋ te̍. O̍ ko̍ŋ kɔ̍ɔ̍lī, wānāa̍ di̍mi̍ ka̍ŋ māā wānāā Chi̍i̍sū ve᷅m hɔ̄ltē ndɔ̄ wa̍ nda̍ chō ni̍, kɛ̍ ndu̍yɛ̍ ā cho̍ yɛ̍ wānāā wāā le̍nde̍ le̍ wa̍, mi̍ lā mɛ̄ɛ̄nda᷄ŋ nda̍. Ndu̍yɛ̍, mi̍ lā sāālu᷄ŋ māā ā cho̍ wa̍nāā Chi̍i̍sū ve᷅m hɔ̄ltē ndɔ̄ le̍kɛ̍ndɛ̍ī le̍.

³I̍ si̍nā mɛ̄ɛ̍ nya̍ chō nyɛ̄ pālāa̍ bīūwɔ᷄ŋndo̍ yɛ̍. Ndu̍yɛ̍, mi̍ wāŋnda̍ tūsi̍ nya̍ nyɛ̄ pālāa̍ chōo̍ le̍ ya̍, kɛ̍ lā me᷄l te̍.

⁴Kɛ̍ ndu̍yɛ̍, nyɛ̄ ya̍ I̍ bi̍ī nya̍ tɛ̄ɛ̄ le̍ ndu̍ wo̍ cho̍ ho̍ō ni̍. Kāālā nya̍ a̍a̍ nɔ̍ o̍ tāse̍la̍ ndɔ̄ɔ̍ wo̍, lā nɔ̍ lɛ̍ kāālā kōŋ o̍ kɔ̄l te̍.

⁵Lā yīya̍ŋ a̍ mɛ̄ɛ̍ nya̍ wa̍ o̍ tāse̍la̍ ndɔ̄ɔ̍ yɛ̍, bōōndi̍i̍ nya̍ a̍a̍ de̍l lɔ̍ le̍ ve̍. Lā ma᷄l yɔ᷅ŋndā nyāla̍ wɔ̍ɔ̍ŋnda̍ŋ mī lā tōsa̍ ka̍ālā nya̍ wa̍ tōsāa̍ o̍ tāse̍la̍ ndɔ̄ɔ̍ la̍ŋ. Tē lā me᷄l yɔ᷅ŋndā nyāla̍ wɔ̍ɔ̍ŋnda̍ŋ te̍, mɛ̄ɛ̍ I̍ cho̍ hūnɔ̄ɔ̄ nāa̍ nya̍ chūā mī hu̍ŋ fa̍ŋā nyɛ̄ nyā kɛ̍sīāā la̍mbūi̍yo̍ o̍ fo̍ndāŋ ndɔ̄ɔ̍ ba̍ū.

⁶Kɛ̍ ndu̍yɛ̍ nyɛ̄ nya̍ tōsa̍ mi̍ cha̍ndū nya̍ le̍ ndu̍ wo̍ cho̍ ho̍ō ni̍. Wānāa̍ to᷅l pɛ̄ɛ̄kūla̍ Nīko̍la̍i̍tāŋ kɔ̄ɔ̄lī wa̍, mi̍ lā tūl ka̍ālā nda̍ chō tōsāa̍ la̍ŋ lēyɛ̄, mɛ̄ɛ̍ ya̍ bɛ̍ɛ̍ ya̍ I̍ tu̍l la̍ŋ lēyɛ̄ yɛ̍.

⁷“Wānā o̍ wāna̍ nɔ̍ nīlā tūɛ̄īyāā īsɔ̄ɔ̍ pɛ̍, mɛ̄ɛ̍ lā ya᷄ŋ ni᷅la̍ŋ mī lā tūēī mī lā sīna̍ nyɛ̄ Nyi̍na̍ Mɛ̄lɛ̄ka̍a̍ chō ku̍ndālā wānāā lāāla᷄ŋnda̍ dīmūllo̍ wo̍ pɛ̄ŋgu̍. “Wānā o̍ wāna̍ hi̍o̍ū lāchī a̍ sīsi̍la̍ŋ a̍ dīāllūŋ kālā pɛ̍ yi̍, mbō lo̍ o̍ ko̍ŋ mbō yēm pɛ̍, I̍ chɛ̍l ndu̍ ō dē kōmɔ̄ɔ̄ yɔ᷄m cho̍ o̍ kpe̍le̍ Mɛ̄lɛ̄ka̍a̍ ni᷄ŋ ndo̍ o̍ to̍sā mī wānā wa̍ yōōmū kpe̍e̍kpe̍i̍ yo̍.”

⁸O̍ ko̍ŋ kɔ̍ɔ̍lī, mbo̍ dīmūl la̍ āā, “Po̍o̍nyi̍a̍a̍ yo̍o̍ŋgōo̍ ho̍ō nāa̍ ki̍i̍la̍nɔ̍ Mɛ̄lɛ̄ka̍a̍ chūā, o̍ cho̍ ku̍ndā wānāā lāāla᷄ŋnda̍ Si̍ma̍nā chi̍e̍e̍ māndāa̍ wo̍. Di̍mu̍l ndu̍ āā, “ ‘Wāna̍ cho̍ wāna̍ tāso̍o̍, ndu̍yɛ̍ mbo̍ wā wānā mɛ̍ɛ̍lāa̍ wo̍, ō ndu̍ o̍o̍ vi᷅, kɛ̍ mbo̍ mīīŋgū yōōmū wo̍, yōōŋgū o̍ yɔ̍ŋ ndo̍, ndu̍ cho̍ ho̍ō ni̍.

⁹Ō dīmi̍ āā, I̍ si̍nā mɛ̄ɛ̍ wāŋnda̍ chō nya̍ nyɛ̄ pālāa̍ tūsīo̍o̍ chōo̍ yɛ̍. Ndu̍yɛ̍, I̍ si̍nā māā wānāā tāmbɛ̍i̍ya̍ nya̍ chō ni̍. Kɛ̍ ndu̍yɛ̍ o̍ sa̍na̍a̍ īsɔ̄ɔ̍ ni᷄ŋ, lā chō ā sūlāā. Wānāa̍ cho̍ ha̍ā dīmīo̍o̍ māā Chu̍ūwa̍ nda̍ chō ni̍, kɛ̍ ā cho̍ a̍ Chu̍ū kpe̍e̍kpe̍i̍ le̍ wa̍, I̍ si̍nā cho̍o̍lā wɔ̄ɔ̍ŋndā nda̍ chō dīmīo̍o̍ a̍ nya̍ o̍kɔ̄ɔ̄ la̍ŋ fa̍ū. Nda̍ cho̍ Sēta̍nā māsa̍ nyi̍nāā wɔ̄ɔ̍ŋnda̍ ku̍ndā ndɔ̄ɔ̍ ni̍.

¹⁰Ndu̍yɛ̍, sīōōŋīī bi̍ī nya̍ le̍ nyɛ̄ pālāa̍ ko̍māl nya̍ ni̍ŋ ndo̍ le̍. Lā kɛ̄si̍ŋ o̍ kɔ̄l māā Māsa̍ Nyi̍nāā Wɔ̄ɔ̍ŋnda̍ chō tōsā mā dɔ̄ū nya̍ pūm nda̍ o̍ chīɛ̄īlā mānyūmnda̍ŋ ni᷄ŋ le̍ nya̍ tɔ̄ɔ̄nda᷄ŋndo̍. Ā chō nya̍ nyɛ̄ pālāa̍ tūsī chōo̍ le̍ pālɛ̍i̍ tɔ̍. Kɛ̍ lā hīo̍u̍ la̍chi̍ a̍ tīīnda᷄ŋndo̍ nɔ̄ɔ̍ o̍ Mɛ̄lɛ̄ka̍ ni᷄ŋ, ā yɔ᷄ŋ bɛ̍ɛ̍ mbō wa̍ sūɛ̍i̍ nya̍ sɔ̄la̍ pīɔ̍m le̍ni̍ŋ. O̍ ko̍ŋ I̍ to̍sā mī lā sɔ̄la̍ yōōmū kpe̍e̍kpe̍i̍yo̍ māā fāndā nyā.’

¹¹“Wānā o̍ wāna̍ nɔ̍ nīlā tūɛ̄īyāā īsɔ̄ɔ̍ pɛ̍, mɛ̄ɛ̍ lā ya᷄ŋ ni᷅la̍ŋ mī lā tūēī mī lā sīna̍ nyɛ̄ Nyi̍na̍ Mɛ̄lɛ̄ka̍a̍ chō ku̍ndālā wānāā lāāla᷄ŋnda̍ dīmūllo̍ wo̍ pɛ̄ŋgu̍. “Wānā o̍ wāna̍ hi̍o̍ū lāchī a̍ sīsi̍la̍ŋ a̍ dīāllūŋ kālā pɛ̍ yi̍, mbō lo̍ o̍ ko̍ŋ mbō yēm pɛ̍, pīɔ̍m di̍i̍ŋ ndɔ̄ɔ̍ ō nɔ̍lā ndu̍ nyɛ̄ o̍ nyɛ̄ yɔ̄ŋ te̍.”

¹²O̍ ko̍ŋ kɔ̍ɔ̍lī mbo̍ dīmūl la̍ āā, “Po̍o̍nyi̍a̍a̍ yo̍o̍ŋgōo̍ ho̍ō nāa̍ ki̍i̍la̍nɔ̍ Mɛ̄lɛ̄ka̍a̍ chūā, o̍ cho̍ ku̍ndā wānāā lāāla᷄ŋnda̍ Pɛ̍ka̍mɔ̄m chi̍e̍e̍ māndāa̍ wo̍. Di̍mu̍l ndu̍ āā, “ ‘Wāna̍ nɔ̍ ho̍ō mūɛ̄ī fāŋīī sōndōlā tīɔ̍ɔ̍ŋīī lūɛ̄īyɛ̄i̍ ŋɛ̍lɛ̍ ŋɛ̍lɛ̍i̍ yo̍ yōōŋgū o̍ yɔ̍ŋ ndo̍, ndu̍ cho̍ ho̍ō ni̍.

¹³Ō dīmi̍ āā, I̍ si̍nā fo̍ndāŋ nya̍ chō wo̍. Nāa̍ nya̍ chō wa̍ lo̍ŋ Sēta̍nā, māsa̍ nyi̍nāā wɔ̄ɔ̍ŋnda̍ chō māsāa̍ ni̍. Kɛ̍ o̍ ko̍ŋ ni̍ŋ fa̍ū, mi̍ lā hīāū lāchī a̍ tīīnda᷄ŋndo̍ dɔ̄wɔ̄ɔ̍ o̍ ya̍ ni̍ŋ. Ndu̍yɛ̍, bōōndi̍i̍ nda̍ dīī A̍ŋti̍pa̍a̍sī nya̍ tɛ̄ɛ̄ŋ o̍ fo̍ndāŋ Sēta̍nā cho̍ wo̍ ve̍ bɛ̍ɛ̍, lā me᷄l ti̍i̍nda᷄ŋ nya̍ nɔ̄ o̍ ya̍ ni̍ŋ ndo̍ le̍, ndu̍ yɔ̍nūŋ ni̍ māā A̍ŋti̍pa̍a̍sī o̍ di̍mu̍l wāŋnda̍ a̍ ya̍ o̍kɔ̄ɔ̄, ndu̍yɛ̍ ō me᷄l ti̍i̍nda᷄ŋ o̍ nɔ̍ o̍ ya̍ ni̍ŋ ndo̍ le̍ wo̍.

¹⁴Kɛ̍ ndu̍yɛ̍, sɔ̄ɔ̍ŋ ŋ̄ ti᷄ŋ chō mi̍ bi̍ī nya̍ tɛ̄ɛ̄ le̍ mu̍ŋ. Mu̍ŋ yɔ̍nūŋ ni̍ māā wānāā pūm ā chō nya̍ tɛ̄ɛ̄ŋ lo̍ŋ ma̍ chūā ka̍ālā Be̍la᷅mnda̍ŋ. Ndu̍ yɔ̍nūŋ ni̍ māā, Be̍la᷅m o̍ pɛ̍ɛ̍ku̍ Be̍la̍kī le̍ tōsāa̍ mī wāŋnda̍ I̍sɔ̄lūɛ̄ī a̍ de̍l o̍ yɔ̄ŋ wɔ̄ɔ̍ŋndo̍ ni᷄ŋ ndo̍. Mbo̍ tōsā ma̍ dīā nyɛ̄ dīāā lāsōōlu̍u̍ wo̍. O̍ ko̍ŋ kɔ̍ɔ̍lī, mbo̍ tōsā ma̍ wōū bāla̍ŋ o̍ nīīlū sūūndɛ̍i̍yo̍ ni᷄ŋ.

¹⁵Le̍nde̍ ko̍ni̍ wānāā pūm ā chō nya̍ tɛ̄ɛ̄ŋ ma̍ chūā ka̍ālā wānāa̍ to᷅l pɛ̄ɛ̄kūla̍ Nīko̍la̍i̍tāŋ kɔ̄ɔ̄lī wa̍.

¹⁶Le̍la̍ŋ lā ma᷄l yɔ᷅ŋndā nyāla̍ wɔ̍ɔ̍ŋndā lāŋ. Tē lā me᷄l te̍, mɛ̄ɛ̍ I̍ cho̍ su̍ŋ su̍ŋ hu̍nɔ̄ɔ̄ nāa̍ nya̍ chūā mī chi̍e̍i̍ a̍ wānāā kāŋ a̍ mūɛ̄ī fāŋīi̍ fu̍lā ya̍ o̍ sōndō ve̍.’

¹⁷“Wānā o̍ wāna̍ nɔ̍ nīlā tūɛ̄īyāā īsɔ̄ɔ̍ pɛ̍, mɛ̄ɛ̍ lā ya᷄ŋ ni᷅la̍ŋ mī lā tūēī, mī lā sīna̍ nyɛ̄ Nyi̍na̍ Mɛ̄lɛ̄ka̍a̍ chō ku̍ndālā wānāā lāāla᷄ŋnda̍ dīmūllo̍ wo̍ pɛ̄ŋgu̍. “Wānā o̍ wāna̍ hi̍o̍ū lāchī a̍ sīsi̍la̍ŋ a̍ dīāllūŋ kālā pɛ̍ yi̍ mbō lo̍ o̍ ko̍ŋ mbō yēm pɛ̍, I̍ ke̍ ndu̍ ma̍nā nyɛ̄ dīa̍a̍ cho̍ ō vīāŋāā wo̍. O̍ ko̍ŋ kɔ̍ɔ̍lī, mī I̍ ke̍ ndu̍ vɛ̄lɛ̄ pōū hūmbōo̍ a̍ dīōlā sɛ̄nɛ̄īlā pūm lā pōōnyīāā lēchōo̍. Wānā o̍ wānā che᷅le̍ŋ ō si̍nā di̍o̍lā lāŋ te̍, mɛ̄ɛ̍ wāna̍ nda̍ ke̍ ko̍ŋ la̍ŋ ndo̍.”

¹⁸O̍ ko̍ŋ kɔ̍ɔ̍lī, mbo̍ dīmūl la̍ āā, “Po̍o̍nyi̍a̍a̍ yo̍o̍ŋgōo̍ ho̍ō nāa̍ ki̍i̍la̍nɔ̍ Mɛ̄lɛ̄ka̍a̍ chūā, o̍ cho̍ ku̍ndā wānāā lāāla᷄ŋnda̍ Tāya̍ti̍lūā chi̍e̍e̍ māndāa̍ wo̍. Di̍mu̍l ndu̍ āā, “ ‘Po̍ Mɛ̄lɛ̄ka̍a̍ o̍ nɔ̍ hɔ̄lta̍ŋ māā yīŋndē wūle̍ wu᷅le̍ wo̍, a̍ pēlo᷄ŋ ŋɛ̍lɛ̄ŋgi̍ ŋɛ̍lɛ̄ŋgi̍ māā chīli̍ŋi̍i̍ nda̍ bɛ̄ɛ̄ndīāā mī ī dēndū fo̍ fo̍ ve̍, yōōŋgū o̍ yɔ̍ŋ ndo̍ ndu̍ cho̍ ho̍ō ni̍.

¹⁹Ō dīmi̍ āā, Nyɛ̄ o̍ nyɛ̄ nya̍ chō tōsāa̍ I̍ si̍nā. I̍ si̍nā mɛ̄ɛ̍ kpɛ̍ nya̍ kāāla̍ yɛ̍. I̍ si̍nā mɛ̄ɛ̍ kpɛ̍ nya̍ dɔ̄ū tīīnda᷄ŋndo̍ o̍ ya̍ ni̍ŋ yɛ̍. Ndu̍yɛ̍, I̍ si̍nā mɛ̄ɛ̍ kpɛ̍ nya̍ chō wāŋnda̍ mālāa̍ yɛ̍, a̍ mɛ̄ɛ̍ nya̍ chō nyɛ̄ pālāa̍ bīūwɔ᷄ŋndo̍ yɛ̍. I̍ si̍nā māā wa̍li̍ kɛ̍ndɛ̄ nya̍ chō tōsāa̍ pɛ̄ŋgo̍o̍ ho̍ō wo̍ ō hīōū bɛ̍ɛ̍ mɛ̄ɛ̍ nya̍ wa̍ tōsāa̍ o̍ tāse̍la̍ ndɔ̄ɔ̍ yɛ̍.

²⁰Kɛ̍ ndu̍yɛ̍, nyɛ̄ ya̍ I̍ bi̍ī nya̍ tɛ̄ɛ̄ le̍ ndu̍ wo̍ cho̍ ho̍ō ni̍ māā chūa̍a̍ ho̍ō, ndu̍ yɔ̍nūŋ māā Chɛ̍si̍bɛ̄ɛ̄ ni̍, mi̍ lā chɛ̄l ndu̍ nya̍ tɛ̄ɛ̄ŋ. Chɛ̍si̍bɛ̄ɛ̄ wo̍ ho̍ō, mbo̍ chūā ndu̍ pi̍la̍ māā wāna̍ su̍a̍ā le̍ Mɛ̄lɛ̄ka̍ wo̍ o̍ cho̍ ni̍, mbo̍ wā bu̍ɛ̍i̍yāā nīa̍a̍ pɛ̄ɛ̄kū lāchōōwāa̍ chūūwo̍. Mbo̍ wā nda̍ hūīyo̍ le̍ mā wōu̍ bāla̍ŋ o̍ nīīlū sūūndɛ̍i̍yo̍ ni᷄ŋ. Ndu̍yɛ̍, mbō tōsā mā dīā nyɛ̍ dīāā lāsōōlu̍u̍wo̍.

²¹Mi̍ ke᷅ chūa̍a̍ ho̍ō fo̍ndāa̍, le̍ mbō ma᷄l yɔ̄ŋndā ndɔ̄la̍ wɔ̍ɔ̍ŋnda̍ŋ, kɛ̍ mbo̍ kɛ̄ɛ̄ le̍ nīīlū ndɔ̄ su̍u̍ndɛ̍i̍ ko̍ŋ mālɔ̄ɔ̍.

²²Lā kɛ̄si̍ŋ o̍ kɔ̄l māā I̍ cho̍ ndu̍ dīālīī nɛ̄īyɛ̄i̍ lūēī. Ndu̍yɛ̍, I̍ cho̍ tōsā mī wānāa̍ wa̍ hīni̍la̍ŋ a̍ ndu̍ wa̍ ā sɔ̄la̍ nyɛ̄ nɛ̄īyāa̍ ta̍u̍ ta̍u̍. Tē ā me᷄l yɔ᷅ŋndā wɔ̄ɔ̍ŋndā nda̍ chō tōsāa̍ a̍ ndu̍ la̍tu̍lu̍ la̍ŋ te̍, I̍ cho̍ ke̍ŋ to̍sā.

²³Ndu̍yɛ̍, I̍ cho̍ chūāūwāā ndūa̍a̍ dīū. Ku̍ndālā wānāā lāāla᷄ŋnda̍ kpo̍u̍, ā chō sīnā māā ya̍ si̍nā yi̍ya᷄ŋnda̍ wāŋnda̍ yīyāŋ nda̍ŋ ni̍, ndu̍yɛ̍ māā ya̍ si̍nā sɔ̍ɔ̍ŋ wa᷅ nda̍ o̍ lākɔ̄l lo̍ŋ ni̍. Ndu̍yɛ̍, wānā o̍ wānā, mɛ̄ɛ̍ wa̍lta̍ nu̍mnda̍ŋ lā wā yɛ̍, le̍nde̍ ya̍ I̍ pa̍a̍wā nu̍m ni̍.

²⁴“ ‘Kɛ̍ nya̍ wānāā lāāla᷄ŋnda̍ ā tūa̍a̍ Tāya̍ti̍lūā, nya̍ nya̍ chu̍e̍ pɛ̍ɛ̍kū yɔ̄ŋ wɔ̄ɔ̍ŋ kōŋ te̍. Ndu̍yɛ̍, sɔ̄ɔ̍ŋ wāŋnda̍ ā pīli̍a̍ā vēēlu̍ āā, Sēta̍nā, sɔ̄ɔ̍ŋ ndɔ᷄ŋ cho̍ ŋ̄ vīāŋna᷄ŋ kpi̍ŋ ndo̍ŋ, nya̍ nya̍ chɛ᷄l mā pɛ̄ɛ̄ku̍ nya̍ mu̍ŋ te̍. Le̍la̍ŋ nya̍ nya̍, mī di̍mu̍l nya̍, I̍ cho̍ nya̍ wōlɔ̄ɔ̄ lūsu̍lɛ̍i̍ che᷅le̍ŋ hāndɔ̄ɔ̄ chōo̍ le̍.

²⁵Kɛ̍ nyɛ̄ ya̍ cho̍ nya̍ dīmūllo̍ wo̍ ko̍ni̍ cho̍ ni̍ māā, nyɛ̄ nya̍ nɔ̄ wo̍ lā bīi̍ ndu̍ kpi̍ŋ mbō lo̍ o̍ ko̍ŋ ha̍a̍a̍ mī I̍ hi᷅ŋ.

²⁶Wānā o̍ wāna̍ hīōū lāchī a̍ sīsi̍la̍ŋ a̍ dīāllūŋ kālā nyɛ̄ kɛ̄ndɛ̄ yi̍ pɛ̍, mbō lo̍ o̍ ko̍ŋ mbō yēm pɛ̍, ndu̍yɛ̍ mbō tōsa̍ nyɛ̄ ya̍ I̍ di̍mūl ndu̍ wo̍ pɛ̍, ha̍a̍a̍ mbō lo̍ o̍ ko̍ŋ mī mɛ̄ɛ̄lu̍la̍ chi̍e̍ēŋndo̍ lā fūūlu̍u̍ pɛ̍, wānā ko̍ŋ I̍ cho̍ ndu̍ kpāāyāa̍ kē mī wāŋnda̍ lɛ̄ŋnde̍ kpo̍u̍ o̍ chi̍e̍ēŋndo̍ chōo̍ mā wa̍ ndu̍ o̍ bā bɛ̄ŋgu̍.

²⁷Ndu̍yɛ̍, ō chō kūūmbɔ᷄ŋ nda̍ chōo̍ kpu̍lu̍ bɛ̍ndū. Ndu̍yɛ̍, ō tɛ̄ɛ̄mbūū ni̍ŋ nda̍ mɛ̄ɛ̍ wāŋndo̍ pēsī pēsī nu̍a̍ā kpɛ̍ɛ̍nɛ̍i̍ pūūlūe̍i̍ wɔ̍ wɔ̍ yɛ̍. I̍ cho̍ ndu̍ kpāāyāa̍ kē mɛ̄ɛ̍ Fi̍nyā nūu̍ o̍ ke̍ ya̍ kpāāyāa̍ yɛ̍.

²⁸Ndu̍yɛ̍, I̍ cho̍ vɛ̄lɛ̄ wānā ko̍ŋ lūe̍i̍ di̍a̍ndū a̍ pāa̍le̍ si̍a̍āle̍ŋ nde̍ kē.’

²⁹“Wānā o̍ wāna̍ nɔ̍ nīlā tūɛ̄īyāā īsɔ̄ɔ̍ pɛ̍, mɛ̄ɛ̍ lā ya᷄ŋ ni᷅la̍ŋ mī lā tūēī mī lā sīna̍ nyɛ̄ Nyi̍na̍ Mɛ̄lɛ̄ka̍a̍ chō ku̍ndālā wānāā lāāla᷄ŋnda̍ dīmūllo̍ wo̍ pɛ̄ŋgu̍.”