Read Southern Kisi Sɔ̄ɔ̍ŋ Chɔ̍ɔ̍ma᷄ŋndo̍ŋ 22 Bible Online

Sɔ̄ɔ̍ŋ Chɔ̍ɔ̍ma᷄ŋndo̍ŋ 22 - Southern Kisi bible

Sɔ̄ɔ̍ŋ Chɔ̍ɔ̍ma᷄ŋndo̍ŋ 22

¹O̍ ko̍ŋ kɔ̍ɔ̍lī, mi̍ ki̍i̍la̍nɔ̍ Mɛ̄lɛ̄ka̍ kōŋ chɔ̄m ya̍ pēe̍ nɔ̍ mɛ̄ŋma̍ ke᷅ wa᷅ŋnda̍ yōōmōo̍ wa̍ŋ ndo̍. Wānā a̍a̍ che᷅ pīo̍o̍ ho̍ō mɛ̄ŋmā ndūa̍ŋ īyēlēŋgi̍ ye̍lēŋgi̍e̍i̍ pɛ̍ āā tōfa᷅ŋndo̍ ni̍. Mɛ̄lɛ̄ka̍ nda̍ Sāā Fɔ̍ŋndɔ̍ɔ̍, o̍ kpe̍ŋgbe̍i̍ nda̍ lēmāsāa̍ pīo̍o̍ ho̍ō wa̍ fūlāa̍ ni̍.

²O̍ nɛ̄i̍ cho̍ o̍ chi̍o̍o̍ ho̍ō ni᷄ŋ ndo̍ tɛ̄ɛ̄ŋ kpe̍e̍kpe̍i̍, pīo̍o̍ ho̍ō hīni̍ kpa̍la̍ŋ ni̍. Yɔ̄mīi̍ yɔ̍ŋgū yo̍o̍mōo̍ ve̍, ī wa̍ o̍ pīo̍o̍ ho̍ō īkɛ̄i̍ o̍ kɔ̄ŋgɔ̍la̍ŋ ve̍llāa̍ vēllē. Yɔ̄mnde̍ he̍ī, tɔ̍ a̍ lē dīi̍ŋ i̍ ku̍ām o̍ wɔ̄sī o̍ wɔ̄sī ni᷄ŋ ni̍, mɛ̄ɛ̍ īpāŋgu̍ o̍ pāŋgu̍ kōmɔ̄ɔ̍. Pēi̍ ndūɛ̍i̍ bɛ̍ɛ̍, a̍ ndi̍ nda̍ sīŋgī wa᷅ŋnda̍ o̍ lɛ̄ŋnde̍ ni᷄ŋ kpo̍u̍ o̍ chi̍e̍ēŋndo̍ chōo̍ ni̍.

³Nyɛ̄ o̍ nyɛ̍ cho̍ mi̍ Mɛ̄lɛ̄ka̍ chūā ndu̍ māā nyɛ̄ wɔ̄ɔ̍ŋndo̍ o̍ cho̍ ni̍, ō ve᷅ o̍ chi̍o̍o̍ ho̍ō ni᷄ŋ te̍. O̍ chi̍o̍o̍ ho̍ō ni᷄ŋ Mɛ̄lɛ̄ka̍ kpe̍ŋgbe̍i̍ ndɔ̍ lē māsāa̍ chō wā ni̍, nda̍ Sāā Fɔ̍ŋndɔ̍ɔ̍, ndu̍yɛ̍ mī bu̍ɛ̍i̍yāā ndūa̍a̍ sāāŋgi̍a̍l ndu̍ lo̍ŋ.

⁴Ā chō Mɛ̄lɛ̄ka̍ hɔ̄lla̍ chɔ̄ pɛ̍ɛ̍ŋ, ndu̍yɛ̍ dīōla̍ Mɛ̄lɛ̄ka̍la̍ŋ lā chō wā lā pōōnyi̍a̍a̍ nda̍ o̍ ŋ̄tēndu̍.

⁵Nyūmmā bɛ̍ɛ̍ ma̍ ve᷅ ni̍ŋ lɛ̍ le̍. Wāŋnda̍ ā nɔ᷅ lɛ̍ ni̍ŋ kpe̍ku̍ a̍ lāla̍mbūi̍ kɛ̄lɛ̄ŋgāā lēpāa̍ le̍. Kāni̍ fu̍u̍le̍, Māsānɔ̄ɔ̍ Mɛ̄lɛ̄ka̍ pi̍la̍ ndu̍ cho̍ wā nyɛ̄ ndā wa̍wo̍ŋndo̍ ni̍. Ndu̍yɛ̍, ā chō wā lāmāsā le̍ fɛ̍ɛ̍ŋ a̍ fɛ̍ɛ̍ŋ.

⁶O̍ ko̍ŋ kɔ̍ɔ̍lī, mi̍ ki̍i̍la̍nɔ̍ Mɛ̄lɛ̄ka̍ kōŋ dīmūl la̍ āā, “Tōnya̍a̍ dīōmnda̍ŋ nda᷅ŋ lā chō ni̍. Ndu̍yɛ̍, lā chō dīōmndā wānā nɔ̍lā mā ti̍i̍nda̍ŋ. Ndu̍yɛ̍, Māsānɔ̄ɔ̍ Mɛ̄lɛ̄ka̍ o̍ yɔ̍ŋgū nyi̍nā ndɔ̄ɔ̍ mbō wa̍ wānāa̍ su̍a̍ā le̍ Mɛ̄lɛ̄ka̍ wa̍ kɔ̄ɔ̄lī wo̍, ō vēm ki̍i̍la̍nɔ̍ ndɔ̄ɔ̍ le̍ mbō chɔ᷄m bu̍ɛ̍i̍yāā ndūa̍a̍ sɔ̄ɔ̍ŋ nɔ̍ le̍ hūnɔ̄ɔ̄ su̍ŋ su̍ŋ yɔ̍nɔ᷄ŋndo̍ wo̍ŋ.”

⁷O̍ ko̍ŋ kɔ̍ɔ̍lī, mi̍ Chi̍i̍sū di̍mī āā, “Lā kɛ̄si̍ŋ o̍ lākɔ̄l māā I̍ cho̍ hūnɔ̄ɔ̄ su̍ŋ su̍ŋ.” Yōōŋgu̍ chɛ̍ŋ ɛ̄chɛ̍nɛ̄ mbo̍ wā ō pōōnyīāā o̍ yāu̍wo̍ ho̍ō ni᷄ŋ ndo̍, wānā o̍ wāna̍ to̍sa̍ nyɛ̄ o̍ di̍mi̍ wo̍ pɛ̍, mɛ̄ɛ̍ ā pɛ̄l tɔ̄nɔ̄ɔ̍.

⁸Ya̍ Chɔ᷄ŋ ya̍ tu̍e̍ī ndu̍yɛ̍ mi̍ cha᷅ sɔ̄ɔ̍ŋ mu᷅ŋ kpo̍u̍ ni̍. Mɛ̄ɛ̍ ya̍ I̍ tu̍e̍ī mu̍ŋ, ndu̍yɛ̍ mi̍ cha᷅ mu̍ŋ, mi̍ ba᷅ŋ wūla̍ŋ ki̍i̍la̍nɔ̍ Mɛ̄lɛ̄ka̍ chɔ̍m ya̍ mu̍ŋ ndo̍ lāchī le̍ ndu̍ sōōlūūwo̍.

⁹Kɛ̍ mbo̍ dīmūl la̍ āā, “To̍sā ko̍ŋ te̍. Ya̍ bɛ̍ɛ̍ bu̍ɛ̍i̍ Mɛ̄lɛ̄ka̍a̍ ko̍ni̍ ya̍ I̍ cho̍ ni̍ mɛ̄ɛ̍ nūm bɛ̍ɛ̍ nūm cho̍ yɛ̍, a̍ chāāŋāā nūm nda̍, a̍ wa̍nāa̍ su̍a̍ā le̍ Mɛ̄lɛ̄ka̍ wa̍, a̍ wānāa̍ to̍sā nyɛ᷅ dīōmnda̍ cho̍ o̍ yāu̍wo̍ ho̍ō ni᷄ŋ nda̍ŋ lā dīmi̍ wo̍ wa̍. Mɛ̄lɛ̄ka̍ ŋ̄ nɔ̄ mā so̍o̍lu̍u̍ ni̍.”

¹⁰Mbo̍ dīmūl la̍ āā, “Dīōmnda̍ chɛ̍ŋ la᷅ŋ ɛ̄chɛ̍nɛ̄ mi̍ lā wā lā pōōnyīāā o̍ yāu̍wo̍ ho̍ō ni᷄ŋ nda̍ŋ, vi᷅ŋ wāŋnda̍ la̍ŋ te̍. Kāni̍ fu̍u̍le̍, te̍le̍ŋ sɔ̄ɔ̍ŋ mu᷅ŋ kpo̍u̍ ŋ̍ cho̍ yɔ̄nɔ᷄ŋ ndo̍ ō chō ni᷅ŋ kpɛ̍ɛ̍lūŋ.

¹¹Wāna̍ cho̍ yɔ̄ŋ wɔ̄ɔ̍ŋndo̍ tōsāa̍ wo̍, ō hīo̍u̍ la̍chi̍ a̍ yɔ̄ŋ ndɔ̄ wɔ̍ɔ̍ŋ kōŋ tōsāa̍. Ndu̍yɛ̍, wāna̍ cho̍ sɔ̄ɔ̍ŋ nɔ̍ɔ̍lɛ̍i̍yo̍ŋ tōsāa̍ wo̍, ō hīo̍u̍ la̍chi̍ a̍ sɔ̄ɔ̍ŋ ndɔ̄ŋ nɔ̍ɔ̍lɛ̍i̍ mu̍ŋ tōsāa̍. Wāna̍ cho̍ sa̍kpō wo̍, ō hīo̍u̍ la̍chi̍ a̍ wāa̍ sa̍kpō. Ndu̍yɛ̍, wāna̍ cho̍ le̍ Mɛ̄lɛ̄ka̍ wo̍, ō hīo̍u̍ la̍chi̍ a̍ wāa̍ le̍ Mɛ̄lɛ̄ka̍.”

¹²Chi̍i̍sū di̍mi̍ āā, “Lā kɛ̄si̍ŋ o̍ lākɔ̄l māā I̍ cho̍ hūnɔ̄ɔ̄ su̍ŋ su̍ŋ. I̍ cho̍ hūnɔ̄ɔ̄ a̍ pāāwā ya̍ I̍ nɔ̍ le̍ wāŋnda̍ wo̍ o̍ bā, ndu̍yɛ̍ mī I̍ pa̍a̍wa̍ wānā o̍ wānā mɛ̄ɛ̍ kūɛ̍i̍la̍ ndɔ̄la̍ŋ lā wā yɛ̍.

¹³Ya̍ cho̍ kāndɔ᷄ŋndo̍ ni̍, ya̍ cho̍ mɛ̄ɛ̄lu̍la̍ŋ ni̍. Ya̍ cho̍ wāna̍ tāso̍o̍ ni̍, ya̍ cho̍ wānā mɛ̍ɛ̍lāa̍ ni̍.”

¹⁴Wānāa̍ tɔ̍ɔ̄ nyɛ̄lā ndāla̍ŋ mi̍ lā dīāndū fo̍ wa̍, ā pɛ̄l tɔ̄nɔ̄ɔ̍. O̍ he̍ī ni᷄ŋ, ā nɔ̄ di̍ mā dē yɔ᷄m yɔ̍ŋgū yo̍o̍mōo̍ wo̍ kōmɔ̄ɔ̄ ndɔ̄ɔ̍. Ndu̍yɛ̍, ā nɔ̄ di̍ mā kēēku̍ o̍ dīō sāāsāa̍ mā lūɛ̄ī o̍ chi̍o̍o̍ ho̍ō ni᷄ŋ.

¹⁵Kɛ̍ ndu̍yɛ̍ wānāa̍ to̍sā dɛ̍nɛ̍ wɔ̍ɔ̍ŋndo̍ wa̍, a̍ wānāa̍ bi̍ī ko̍o̍ma̍ wɔ̍ɔ̍ŋnda̍ŋ nda̍, a̍ wānāā sūūndɛ̍i̍ya̍, a̍ wānāa̍ di̍ū wa᷅ŋnda̍ wa̍, a̍ wānāa̍ so̍o̍lūū nyɛ̍m cho̍ Mɛ̍lɛ̄ka̍ le̍ wo̍ŋ nda̍, a̍ wānāa̍ hɛ̍na̍ŋ cho̍ōla̍ŋ dīmīo̍o̍ lɔ̍ɔ̍ lɔ̍ɔ̍ wa̍, wānāā wāā nu̍a̍ā ki̍nɛ̍i̍, ā lu̍e̍ī o̍ chi̍o̍o̍ ho̍ō ni᷄ŋ te̍.

¹⁶Mi̍ Chi̍i̍sū di̍mī āā, “Ya̍ Chi̍i̍sū I̍ ve᷅m ki̍i̍la̍nɔ̍ nūu̍, le̍ mbō kɔ̍ di̍mūl nya̍ sɔ̄ɔ̍ŋ mu᷅ŋ o̍ ku̍ndālā wānāā lāāla᷄ŋnda̍ tɛ̄ɛ̄ŋ. Ya̍ cho̍ wāna̍ fu̍la̍ o̍ pūlāle̍ māsāa̍ Dēēve̍le̍ŋ chōo̍ wo̍ ni̍. Ndu̍yɛ̍, ya̍ cho̍ lūēī di̍a̍ndɛ̄ī īdīi̍ye̍ ni̍.”

¹⁷Mi̍ Nyi̍na̍ Mɛ̄lɛ̄ka̍a̍, a̍ la̍nɔ̍ Sāā Fɔ̍ŋndɔ̍ɔ̍ chō chūa̍a̍ o̍ nɔ̄ɔ̍ ni᷄ŋ ndo̍, ā dīmi̍ āā, “Hu̍ŋ”. Wānā o̍ wāna̍ cho̍ dīōmnda̍ŋ nda᷅ŋ tūēīyɔ̄ɔ̍ ō nɔ̄ mbō dīmī āā, “Hu̍ŋ”. Wānā o̍ wāna̍ cho̍ a̍ bo̍lōlā vēsɛ̍i̍la̍ŋ, lā hu᷄ŋ. Wānā o̍ wāna̍ hɛ̍na̍ŋ pɛ̍, lā hu᷄ŋ mī lā bīī mɛ̄ŋma̍ ke᷅ wa̍nā yo̍o̍mōo̍ wa̍ŋ fo̍ndō, lā pa̍a̍wā nyɛ᷅ o̍ nyɛ̄ le̍.

¹⁸Wānā o̍ wāna̍ cho̍ yōōŋgu̍ chɛ̍ŋ ho̍ō ɛ̄chɛ̍nɛ̄, mbo̍ wā ō pōōnyīāā o̍ yāu̍wo̍ ho̍ō ni᷄ŋ ndo̍ tūēīyɔ̄ɔ̍, mī si̍la̍ nya̍ sīlāa̍ ho̍ō. Wānā o̍ wāna̍ ha̍ndu̍ nyɛ̄ o̍ nyɛ̄ chēle̍ŋ, o̍ nyɛ̄ yōōŋgōo̍ ho̍ō dīmi̍ wo̍ chōo̍ pɛ̍, Mɛ̄lɛ̄ka̍ chu̍a̍ sɔ̄ɔ̍ŋ kpūndɛ̍ŋ cho̍ ŋ̄ pōōnyīāā o̍ yāu̍wo̍ ho̍ō ni᷄ŋ ndo̍ŋ kpo̍u̍, ō hāndu̍ mu̍ŋ o̍ nyɛ̄ pālāā o̍ cho̍ ndu̍ tūsī chōo̍ wo̍ chōo̍.

¹⁹Wānā o̍ wāna̍ fa̍ŋa̍ nyɛ̄ o̍ nyɛ̄ o̍ yōōŋgu̍ chɛ̍ŋ ho̍ō ɛ̄chɛ̍nɛ̄, mbo̍ wā ō pōōnyīāā o̍ yāu̍wo̍ ho̍ō ni᷄ŋ ndo̍ lēchōo̍ pɛ̍, Mɛ̄lɛ̄ka̍ pūu̍ ndu̍ nyɛ̄m kɛ̄ndɛ̄ŋ o̍ chu̍a̍ būŋgɛ̄i̍ mi̍ ŋ̄ wā ŋ̄ pōōnyīāā o̍ yāu̍wo̍ ho̍ō ni᷄ŋ, le̍ wāŋnda̍ kīo̍o̍ wo̍ŋ o̍ bā. Ko̍ŋ cho̍ ni̍, wānā ko̍ŋ Mɛ̄lɛ̄ka̍ chɛ᷅l ndu̍ mbō dē yɔ᷄m yɔ̍ŋgū yo̍o̍mōo̍ wo̍ kōmɔ̄ɔ̄ ndɔ̄ɔ̍ le̍, ndu̍yɛ̍ ō chɛ᷅l ndu̍ mbō lūɛ̄ī o̍ chi̍e̍e̍ cho̍ ho̍ō le̍ Mɛ̄lɛ̄ka̍ wo̍ ni᷄ŋ te̍.

²⁰Wāna̍ chɔ̍m ho̍ō māā sɔ̄ɔ̍ŋ mu᷅ŋ tōnya̍a̍ ŋ̍ cho̍ ni̍ wo̍, ō dīmi̍ āā, “Le̍nde̍ kpe̍e̍kpe̍i̍ i̍ cho̍ ni̍. I̍ cho̍ hūnɔ̄ɔ̄ su̍ŋ su̍ŋ.” Āmi̍i̍nā. Hu̍ŋ Māsānɔ̄ɔ̍ Chi̍i̍sū.

²¹Mbɔ̄ Māsānɔ̄ɔ̍ Chi̍i̍sū ō yīya̍ŋ wa᷅ŋnda̍ kpo̍u̍ cho̍o̍ fɔ̍. Āmi̍i̍nā.