Read Southern Kisi Sɔ̄ɔ̍ŋ Chɔ̍ɔ̍ma᷄ŋndo̍ŋ 7 Bible Online

Sɔ̄ɔ̍ŋ Chɔ̍ɔ̍ma᷄ŋndo̍ŋ 7 - Southern Kisi bible

Sɔ̄ɔ̍ŋ Chɔ̍ɔ̍ma᷄ŋndo̍ŋ 7

¹O̍ ko̍ŋ kɔ̍ɔ̍lī, mi̍ cha᷅ ki̍i̍la̍a̍ Mɛ̄lɛ̄ka̍a̍ nda̍ nda̍ hi̍ɔ̍ɔ̍lu̍. Ā wa̍ īsīsi̍ o̍ chi̍e̍ēŋndo̍ kpēŋgūŋ hi̍ɔ̍ɔ̍lo̍ŋ. Ma̍ hāū nɛ̄īla̍ hi̍ɔ̍ɔ̍lu̍la̍ hūēīye̍ ī hūāŋ nda̍ŋ, yɔ̄ŋi̍ i̍ hɔ̍ŋ o̍ chi̍e̍ēŋndo̍ chōo̍, a̍ o̍ mɛ̄ŋnda̍ŋ chōo̍, a̍ o̍ yɔ̄m o̍ yɔ̄m chōo̍.

²O̍ ko̍ŋ kɔ̍ɔ̍lī, mi̍ cha᷅ mi̍ ki̍i̍la̍nɔ̍ Mɛ̄lɛ̄ka̍ chēle̍ŋ cha᷄ŋ kpe̍ŋgīi̍ pāa̍le̍ŋ lē chāŋ nde̍. Nyɛ̄ hāndāā lātāāmāsi̍ Mɛ̄lɛ̄ka̍ cho̍ yōōmū wo̍ ō wa̍ ndu̍ o̍ bā. Ki̍i̍la̍a̍ Mɛ̄lɛ̄ka̍a̍ hīɔ̍ɔ̍lu̍a̍a̍, ā kpāāyāa̍ wa̍ ō kēna᷄ŋ le̍ mā tɛ̄ɛ̄mbu̍u̍ nyɔ̄ɔ̍ŋ o̍ chi̍e̍ēŋndo̍ chōo̍, a̍ mu᷅ŋ o̍ mɛ̄ŋnda̍ŋ ni᷄ŋ nda̍, mi̍ tu̍ɛ̍ī ki̍i̍la̍nɔ̍ ko̍ŋ mbo̍ vēēlū nda̍ chōo̍ cho̍o̍ kpe̍le̍ŋ.

³Mbo̍ dīmūl nda̍ āā, “Lā tɛ̍ɛ̍mbūū wɔ̄ nyɔ̄ɔ̍ŋ o̍ chi̍e̍ēŋndo̍ chōo̍, a̍ mu᷅ŋ o̍ mɛ̄ŋnda̍ŋ ni᷄ŋ, a̍ yɔ̄mnde̍ le̍ ha̍a̍, a̍ mbō lo̍ o̍ ko̍ŋ mī ŋ̄ hāndu̍ tāāmāsi̍la̍ŋ bu̍ɛ̍i̍yāa̍ Mɛ̄lɛ̄ka̍ nāa̍ o̍ ŋ̄tēndu̍.”

⁴Mi̍ tu̍ɛ̍ī ma̍ chɔ̄m mɛ̄ɛ̍ wānāā nda̍ ho᷄l tāāmāsi̍ Mɛ̄lɛ̄ka̍a̍ o̍ ŋ̄tēndu̍ wa̍ chō bōllē pīlɛ̍ yɛ̍, māā ā chō wāa̍la̍ŋ kɛ̄mɛ̄ a̍ wāa̍la̍ŋ be̍le̍-hi̍ɔ̍ɔ̍lu̍ a̍ lā hīɔ̍ɔ̍lu̍, fūlāa̍ o̍ yu̍ŋgu̍ o̍ yu̍ŋgu̍ cho̍o̍ I̍sɔ̄lūɛ̄ī. Nda̍ cho̍ ha̍ā ni̍.

⁵Yu̍ŋgu̍ Chu̍dā wo̍, wāa̍la̍ŋ tɔ̍ a̍ lā tīɔ̍ɔ̍ŋ (12). Yu̍ŋgu̍ Lūbɛ᷅ŋndo̍, wāa̍la̍ŋ tɔ̍ a̍ lā tīɔ̍ɔ̍ŋ (12). Yu̍ŋgu̍ Ka̍a̍dī wo̍, wāa̍la̍ŋ tɔ̍ a̍ lā tīɔ̍ɔ̍ŋ (12).

⁶Yu̍ŋgu̍ A̍sīɛ̄ɛ̄ wo̍, wāa̍la̍ŋ tɔ̍ a̍ lā tīɔ̍ɔ̍ŋ (12). Yu̍ŋgu̍ Nāfi̍ta̍līīyo̍, wāa̍la̍ŋ tɔ̍ a̍ lā tīɔ̍ɔ̍ŋ (12). Yu̍ŋgu̍ Māna̍sɛ̄ wo̍, wāa̍la̍ŋ tɔ̍ a̍ lā tīɔ̍ɔ̍ŋ (12).

⁷Yu̍ŋgu̍ Si̍mīɔ̄ŋndo̍, wāa̍la̍ŋ tɔ̍ a̍ lā tīɔ̍ɔ̍ŋ (12). Yu̍ŋgu̍ Li̍vāīyo̍, wāa̍la̍ŋ tɔ̍ a̍ lā tīɔ̍ɔ̍ŋ (12). Yu̍ŋgu̍ I̍sa̍a̍kā wo̍, wāa̍la̍ŋ tɔ̍ a̍ lā tīɔ̍ɔ̍ŋ (12).

⁸Yu̍ŋgu̍ Sɛ̍bu̍lɔ̄ŋndo̍, wāa̍la̍ŋ tɔ̍ a̍ lā tīɔ̍ɔ̍ŋ (12). Yu̍ŋgu̍ Chōo̍sɛ̍ wo̍, wāa̍la̍ŋ tɔ̍ a̍ lā tīɔ̍ɔ̍ŋ (12). Yu̍ŋgu̍ Bɛ̍ŋnja̍mīŋndo̍, wāa̍la̍ŋ tɔ̍ a̍ lā tīɔ̍ɔ̍ŋ (12).

⁹O̍ ko̍ŋ kɔ̍ɔ̍lī, mi̍ cha᷅ wāŋnda̍ fāŋgā bɛ̍ndū bɛ̄ndōo̍. Ā wa̍ fāŋgā ha̍a̍a̍, nda̍ a̍a̍ chu̍ū chɔ᷅m te̍. Nda̍ a̍a̍ fu̍la̍ o̍ lēlɛ̄ŋ o̍ lēlɛ̄ŋ, a̍ lēkāa̍ o̍ lēkāa̍, a̍ wāŋnda̍ su̍u̍ o̍ su̍u̍, a̍ īsɔ̄ɔ̍ o̍ īsɔ̄ɔ̍ ma̍ŋgālāā. Ā wa̍ ā dōvīa̍ŋ o̍ nyɛ̄lā hūmbūla̍ŋ ni᷄ŋ, a̍ sīɔ̍ɔ̍la̍ wāūla̍ŋ nda̍ o̍ lābā, ma̍ wā īsīsi̍ o̍ kpe̍ŋgbe̍i̍ lēmāsāa̍, a̍ Sāā Fɔ̍ŋndɔ̍ɔ̍ lāchī.

¹⁰Ma̍ dīmī chōo̍ cho̍o̍ āā, “Sāŋgālāa̍ chō o̍ Mɛ̄lɛ̄ka̍ nāa̍ lo̍, o̍ cho̍ īchāli̍ o̍ kpe̍ŋgbe̍i̍ lēmāsāa̍ chōo̍ wo̍, nda̍ Sāā Fɔ̍ŋndɔ̍ɔ̍ le̍ pīŋī nda̍ pīŋi̍ na̍a̍ wo̍.”

¹¹O̍ ko̍ŋ kɔ̍ɔ̍lī, mi̍ cha᷅ ki̍i̍la̍a̍ Mɛ̄lɛ̄ka̍a̍ kpo̍u̍ īsīsi̍ a̍ ba̍lāā kpe̍ŋgbe̍i̍ lēmāsāa̍, a̍ lāŋgba̍ā kālla̍, a̍ nyāā yōōmāā hīɔ̍ɔ̍lu̍a̍a̍. Ma̍ bāŋ wūla̍ŋ o̍ kpe̍ŋgbe̍i̍ lēmāsāa̍ hɔ̄lndɔ̄ ma̍ sōōlūū Mɛ̄lɛ̄ka̍.

¹²Ma̍ dīmī āā, “Āmi̍i̍nā. Nūm Mɛ̄lɛ̄ka̍ nāa̍, sāŋgālāa̍ chō le̍ nūm, a̍ līsāa̍, a̍ kɔ̄l kālo̍o̍, a̍ ba̍li̍ka̍a̍, a̍ bɛ̄ɛ̄le̍ŋ, a̍ kpāāyāa̍, a̍ dīāllūŋ kāla᷄ŋ le̍ fɛ̍ɛ̍ŋ a̍ fɛ̍ɛ̍ŋ. Āmi̍i̍nā.”

¹³O̍ ko̍ŋ kɔ̍ɔ̍lī, mi̍ lāŋgba̍ā kālla̍ ō pīlɛ̍ nyūnā ya̍ āā, “Ō nɛ̄ɛ̍ni̍a̍ā cho̍ yɛ̄ ha̍ā a̍ nyɛ̄lā hūmbūla̍ŋ lēkɔ̄ɔ̍? Ndu̍yɛ̍, kūɛ̍ɛ̍nɛ̍ nda̍ fūla̍ yɛ̄?”

¹⁴Mi̍ mu̍lūl ndu̍ a̍a̍, “I̍ si̍nā le̍ fāllo̍. Kɛ̍ nūm sīnā.” Mbo̍ dīmūl la̍ āā, “Wānāa̍ fu̍la̍ o̍ nyɛ̄ pālāā bɛ̄ndōo̍ ni᷄ŋ nda̍ cho̍ ha̍ā ni̍. Nda̍ tɔ̍ɔ̄ nyɛ̄lā ndāla̍ŋ a̍ kōo̍ma̍ Sāā Fɔ̍ŋndɔ̍ɔ̍ mi̍ lā yɔ̄nu᷄ŋ la̍ hu̍mbū fo̍ fo̍ ni̍.

¹⁵Le̍ sa̍bū kōŋ nda̍ chō o̍ kpe̍ŋgbe̍i̍ lēmāsa̍ Mɛ̄lɛ̄ka̍a̍ hɔ̄lndɔ̄, ma̍ wā ndu̍ sāāŋgīāllo̍ īdīi̍ a̍ īchɔ̄l o̍ chīɛ̍i̍ Mɛ̄lɛ̄ka̍a̍ ni᷄ŋ ni̍. Ndu̍yɛ̍, wāna̍ cho̍ ho̍ō o̍ kpe̍ŋgbe̍i̍ lēmāsāa̍ chōo̍ wo̍, ndu̍ pi̍la̍ cho̍ wā nda̍ īkɛ̄i̍, mbō mānda̍ nda̍ nyɛ̄ o̍ nyɛ̄ bɛ̍ɛ̍ yɔ̍nūŋ nda̍ le̍.

¹⁶Yīmā nɛ̍ī lɛ̍ nda̍ le̍. Bo̍lōlā ve̍sā lɛ̍ nda̍ le̍. Pāa̍le̍ lo̍ō lɛ̍ nda̍ le̍, ndu̍yɛ̍ hāŋgu̍l bi̍ī lɛ̍ nda̍ le̍.

¹⁷Kāni̍ fu̍u̍le̍, Sāā Fɔ̍ŋndɔ̍ cho̍ īsīsi̍ o̍ lu᷅ŋndo̍ tɛ̄ɛ̄ŋ o̍ kpe̍ŋgbe̍i̍ lēmāsāa̍ hɔ̄lndɔ̄ wo̍, ndu̍ cho̍ wāna̍ ma̍ndā nda̍ wo̍ ni̍, mɛ̄ɛ̍ wānā ma̍ndāā lāsāa̍ māndā sa̍a̍ ndūa̍a̍ yɛ̍. Ndu̍yɛ̍, ō chō lākɔ̄ a̍ nda̍ o̍ so̍o̍ŋ mɛ̄ŋma̍ ke᷅ wa̍nā yo̍o̍mōo̍ wa̍ŋ. Ndu̍yɛ̍, māmɛ̍mɛ̍ o̍ māmɛ̍mɛ̍ ma̍ cho̍ nda̍ o̍ hɔ̄l, Mɛ̄lɛ̄ka̍ chō wɔ̄ɔ̄sūū fo̍.”