Read Southern Kisi Lu̍fū 3 Bible Online

Lu̍fū 3 - Southern Kisi bible

Lu̍fū 3

¹Pāa̍le̍ pi᷅lɛ̍ mi̍ Nāo̍mī di̍mūl Lu̍fū āā, “Ō bɛ̄ndā mī nu̍u̍vi̍a̍l nu̍m pɔ̍nɔ̍ɔ̍ o̍ cha̍ā nu̍m bīyɔ̄ɔ̄ wo̍.

²I̍ di̍mu̍l nu̍m māā Bo̍wa̍ā, ō ŋ̄ wa̍ ko̍ŋ wa̍llo̍ o̍ chīɛ̄ī ndūɛ̍i̍ ni᷄ŋ nya̍ bu̍ɛ̍i̍yāā ndūāā la̍a̍ndūa̍a̍ wo̍, pɔ̍nɔ̍ ni̍ vi᷅ wo̍, wānāyɛ̍ī ndūɛ̍i̍ o̍ cho̍ ni̍. I̍ chɔ᷅m ndɔ̍ nu̍m īsɔ̄ɔ̍. Bo̍wa̍ā ko̍ŋ chō chūɛ̄llɛ̄ŋ ba̍a̍līi̍ŋ ndɔ᷄ŋ lɔ̄ɔ̍ o̍ nāa̍ lu̍a̍ā ŋ̄ba̍a̍līi̍ya̍.

³Le̍la̍ŋ, pu̍lu̍ŋ mā su̍u̍nu̍ŋ chu̍ɛ̍i̍mā chūŋ kɛ̄ndīa̍ŋ, o̍ ko̍ŋ kɔ̍ɔ̍lī, mā wo̍u̍nu̍ŋ nyɛ᷅lā nūmnda̍ kɛ̍ndɛ̄la̍ŋ, mā kūɛ̄ nāa̍ o̍ cho̍ ba̍a̍līi̍yo̍ŋ lɔ̄ɔ̍ wa̍. Kɛ̍ tē ā kūɛ̄ pɛ̍, ke̍lēŋā ndu̍ chɔ̄mnɔ᷄ŋ te̍. Chu̍m fɛ̍lɛ̍ŋ mbō chīi̍ nyɛ̄m dīa̍ŋ dīo̍.

⁴Tē ō chīi̍ pɛ̍ mbō kɔ̍ hi̍nī, a̍ mɛ̍ɛ̍nda̍ŋ fo̍ndāŋ o̍ hi̍ni̍ wo̍. Ō lɔ᷄l pɛ̍, ā kūɛ̄ a̍ kɔ̍ fa̍ŋā ndu̍ kōlāa̍ o̍ pēlo᷄ŋ,[2] a̍ hi̍ni̍ ndu̍ o̍ pēlo᷄ŋ bɛ̄ŋgu̍. Tē ō tēndū pɛ̍, ō chō nu̍m chɔ̄m nyɛ̄ ŋ̄ nɔ̄ le̍ tōsāa̍ wo̍.”

⁵Mi̍ Lu̍fū mu̍lī āā, “Nyɛ̄ o̍ nyɛ̄ ŋ̄ dīmu̍l la̍, I̍ cho̍ tōsā.”

⁶O̍ ko̍ŋ, mi̍ Lu̍fū ku̍ā nāa̍ lu̍a̍ā ŋ̄ba̍a̍līi̍ya̍, mbo̍ kɔ̍ to̍sā mɛ̄ɛ̍ kālā lɛ̍ɛ̍ ndɔ̄ di̍mu̍l ndu̍ yɛ̍.

⁷Mbo̍ chūm mi̍ Bo̍wāā chi̍ī di̍o̍la̍ŋ kpo̍u̍ mbo̍ nāŋ kɔ̄l. O̍ ko̍ŋ kɔ̍ɔ̍lī, mbo̍ kɔ̍ hi̍nī o̍ ku̍ndā ŋ̄ba̍a̍līi̍yo̍ īkɛ̄i̍. Mɛ̄ɛ̍ o̍ hi̍ni̍, mi̍ Lu̍fū ku̍ā yɛ̍lɛ̍ŋ yɛ̍lɛ̍ŋ mbo̍ kɔ̍ kpe̍e̍ŋā ndu̍ kōlāa̍ o̍ pēlo᷄ŋ, mbo̍ hīnī ndu̍ o̍ pēlo̍ŋ bɛ̄ŋgu̍.

⁸Dītɛ̍ɛ̄ŋndo̍ tɛ̄ndāa̍ ki̍nɛ̍i̍, mi̍ Bo̍wāā ti̍a̍ndū o̍ lūa̍a̍ŋ. Mɛ̄ɛ̍ o̍ mu̍li̍ŋ, mbo̍ wōōlū. Mbo̍ sāālu̍ŋ māā wānā la̍nɔ̍ɔ̍ chō ndu̍ īhīni̍ o̍ pēlo᷄ŋ bɛ̄ŋgu̍.

⁹Mbo̍ nyūnā āā, “Ō nɛ̄ɛ̍nɛ̍ hi̍ni̍ yɛ̄ ho̍ō?” Mi̍ Lu̍fū mu̍lūl ndu̍ āā, “Ya̍ Lu̍fū ni̍, fāllo̍. I̍ hi᷅ŋ nāa̍ nūm chu̍a̍, kāni̍ fu̍u̍le̍, nu᷄m cho̍ wānāyɛ̍i̍ pɔ̍nɔ̍ ni̍ vi᷅ wo̍ ni̍. Le̍la̍ŋ, nu᷄m nɔ̍ le̍ ya̍ lōōwo̍ ni̍.”

¹⁰Mi̍ Bo̍wāā di̍mūl ndu̍ āā, “Mɛ̄lɛ̄ka̍ bɛ̄ndōo̍ Ya̍a̍wɛ̄ɛ̄ o̍ dɔ̍u̍ nu̍m sa̍lā fɔ̍. Kāālā kpe̍e̍kpe̍i̍yo̍ ŋ̄ chɔ᷄m ho̍ō le̍ yu̍ŋgu̍ nāa̍ ni̍. Nyɛ̄ ŋ̄ tōsa̍ ho̍ō wo̍ ndu̍ bɛ̍ɛ̍ hi̍o̍ū a̍ nyɛ̄ o̍ nyɛ̄ ŋ̄ tōsa̍l kālā lɛ̍ɛ̍ nu̍m. Mɛ̄ɛ̍ nūm o̍o̍ wa̍ nu̍a̍ā chūāāmbɔ̄ lāāndū yɛ̍, chūāā pīāāndūa̍a̍ ko̍ nūm o̍o̍ ku̍ā kɔ̍ɔ̍lī ni̍. Nda̍ a̍a̍ wa̍ a̍ su̍lāā kɛ̄lɛ̄ŋgāā ā tāmbɛ̍i̍, nda̍ ko̍ nūm o̍o̍ tu̍āl kɔ̍ɔ̍lī ni̍.

¹¹Le̍la̍ŋ, bu̍u̍la᷄ŋ te̍ Lu̍fū. Wānā o̍ wāna̍ cho̍ chi̍e̍e̍ na̍nū ā sīnā māā ā chō wāna̍ lēbɛ̄ɛ̄. Le̍la̍ŋ, nyɛ̄ o̍ nyɛ̄ ŋ̄ nyūna̍ ya̍, I̍ cho̍ nu̍m tōsāl.

¹²Ī chō tōnya̍ māā pɔ̍nɔ̍ nu̍m vi᷅ wo̍, wānāyɛ̍ī ndūɛ̍i̍ ya̍ I̍ cho̍ ni̍. Ndu̍yɛ̍, I̍ nɔ̍ di̍ mī lo̍o̍ nu̍m. Kɛ̍ po̍ pi᷅lɛ̍ chō ma̍ wā nda̍ ndu̍ kpɛ̍ɛ̍lūŋ o̍ wānāyɛ̍ī ni᷄ŋ mbo̍ hīāū ya̍.

¹³Kɛ̍ ndu̍yɛ̍, si̍o̍u̍ ni̍ko̍ pāa̍le̍ŋ sēl na̍nū. Tē pāa̍le̍ŋ lē sɛ̄ sīɔ̄dīi̍ pɛ̍, ŋ̄ chō ndu̍ nyūnā. Tē ō yēēma̍ le̍ nu̍m lōōwo̍ pɛ̍, ŋ̄ sīna̍. Tē ō yēēma̍ le̍, ŋ̄ sīna̍ vɛ̄lɛ̄. Tē ō chɛ᷄l le̍ nu̍m lōōwo̍ pɛ̍, mɛ̄ɛ̍ ō bɛ̄nda̍. Kɛ̍ tē ō chɛ᷄l te̍, I̍ chu̍e̍l nu̍m būŋgɛ̄i̍ Mɛ̄lɛ̄ka̍ Bɛ̄ndōo̍ Ya̍a̍wɛ̄ɛ̄ o̍ hɔ̄l māā I̍ cho̍ nu̍m lōō. Le̍la̍ŋ, hi̍ni̍ mī pāa̍le̍ŋ lē sīo̍u̍ sīɔ̄.”

¹⁴Mi̍ Lu̍fū lo᷅ ni̍ko̍ i̍hi̍ni̍ lo̍ŋ ha̍a̍a̍ mi̍ pāa̍le̍ŋ lē sīā. Kɛ̍ lɔ̍ɔ̍pa̍ mi̍ nyɔ̄ɔ̍ tēŋga̍, mi̍ Lu̍fū cha̍ŋ, kāni̍ fu̍u̍le̍, Bo̍wāā ndu̍ o̍o̍ ye̍e̍ma̍ mī wānā o̍ wānā ndu̍ o̍o̍ si̍na̍ māā lo̍ŋ te̍ o̍ lɔ̍l te̍.

¹⁵Kɛ̍ lɔ̍ɔ̍pa̍ o̍ ma᷅l mi̍ Bo̍wāā di̍mūl ndu̍ āā, “Hu̍ŋ a̍ dōmā nu̍m lēchōo̍ wo̍ mā pɛ̍ŋgɛ̍la̍ mī do̍u̍ nu̍m ba̍a̍līi̍yo̍ŋ.” Mbo̍ sōlī dōmāa̍ mbo̍ pɛ̄ŋgɛ̄lā. Mi̍ Bo̍wāā tu̍ū ba̍a̍līi̍yo̍ŋ nyɛ̄ tūwāa̍ lē ŋɔ᷄mpu᷅m, mbo̍ sīīlūū ndu̍. Mi̍ Lu̍fū ku̍ā a̍ mu̍ŋ chi̍e̍e̍.

¹⁶Mɛ̄ɛ̍ o̍ fu̍u̍lu̍u̍ a̍ mu̍ŋ nāa̍ kālā lɛ̍ɛ̍ ndɔ̄ chu̍a̍, mi̍ kālā lɛ̍ɛ̍ ndɔ̄ nyu̍nā ndu̍ āā, “Vɛ̄ɛ̄ la̍wa̍ā nāa̍ ŋ̄ wa̍ wa̍ chūā nūu̍?” Mi̍ Lu̍fū chɔ᷅m ndu̍ nyɛ̄ o̍ nyɛ̄ Bo̍wāā kɔ̍ to̍sāl ndu̍.

¹⁷Mbo̍ chɔ̄m ndu̍ ba̍a̍līi̍ŋ Bo̍wāā o̍ ke̍ ndu̍ wo̍ŋ. Mbo̍ dīmūl ndu̍ āā, “Mɛ̄ɛ̍ ya̍ I̍ wa̍ hūnɔ̄ɔ̍ mbo̍ dīmūl la̍ māā ya̍ I̍ ko̍māl nu̍m bālā fo̍ndō le̍, mbo̍ tūū ba̍a̍līi̍yo̍ŋ nyɛ̄ tūwāa̍ lē ŋɔ᷄mpu᷅m mbo̍ ke̍ ya̍.”

¹⁸Mi̍ Nāo̍mī di̍mūl ndu̍ āā, “Nūm cha̍l tu̍ŋ mā to̍fa̍ chūā nūu̍. Ā chō chɔ̄ nyɛ̍ cho̍ yɔ̄nɔ᷄ŋ o̍ sūɛ̍i̍ he̍ī ni᷄ŋ ndo̍. Hāū ndu̍ ndu̍, nu̍a̍ā o̍ bɛ̍ɛ̍ndīāā su̍ɛ̍i̍ he̍ī. Mɛ̄ɛ̍ mbō bɛ̄ɛ̄ndi̍a̍a̍ ndi̍ ma̍lāŋ o̍ pɛ̍ŋgī.”