Read Southern Kisi Sa̍a̍mi̍ɛ̍ɛ̄ Tāso̍o̍ 12 Bible Online

Sa̍a̍mi̍ɛ̍ɛ̄ Tāso̍o̍ 12 - Southern Kisi bible

Sa̍a̍mi̍ɛ̍ɛ̄ Tāso̍o̍ 12

¹O̍ ko̍ŋ kɔ̍ɔ̍lī, mi̍ Sa̍a̍mi̍ɛ̍ɛ̄ di̍mūl I̍sɔ̄lūɛ̍i̍ya̍ kpo̍u̍ āā, “Nyɛ̄ o̍ nyɛ̄ nya̍ dīmu̍l la̍ le̍ mī to̍sa̍l nya̍ I̍ chi̍i̍ nya̍ ndu̍ tōsāl. Māsa̍ nya̍ yēēma̍ wo̍ I̍ chi̍i̍ nya̍ ndu̍ kē.

²Lā nɔ̄ ni᷅ŋ māsā bɛ̍ndōo̍ nya̍ chōo̍, o̍ si᷅m nya̍ lāchī wo̍. Chɔ̍ŋ a̍ chūā pīāāndūyɛ̍ī nīi̍ ha̍a̍a̍ mbo̍ bīī a̍ te̍le̍ŋndo̍ ho̍ō, ya̍ wa̍ nya̍ chīla̍ŋ ni̍. I̍ lo̍ nya̍ chōo̍ ha̍a̍a̍ mi̍ yu̍wā ni᷅ŋ ku̍ndɛ̍ɛ̄ bɛ̄ndū. Pūa̍a̍ nīa̍a̍ ya̍ I̍ ve̍lū wa̍ ā chō hāū nya̍ tɛ̄ɛ̄ŋ.

³Kɛ̍ tē I̍ to̍sa̍l wānā i̍sɔ̍ɔ̍ o̍ īsɔ̄ɔ̍ bōōndi̍i̍ ya̍ I̍ wa̍ nya̍ chōo̍ ve̍, pɛ̍ mi̍ lā chē ya̍. Lā dīmi̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l na̍nu᷄ŋ kpe̍nde̍ke̍le̍, nda̍ wāna̍ ndɔ̍ o̍ hɛ̍li̍ le̍ wāā māsāa̍ nya̍ chōo̍ wo̍. Pāa̍le̍ cho̍ lēpīlɛ̍, tē I̍ pu̍u̍ wānā nāū nūm o̍ bā pɛ̍, kɛ̄lɛ̄ŋgāā mī bi̍ī sōfɛ̍lɛ̍ nu̍m di̍mi̍ kpe̍nde̍ke̍le̍. Tē I̍ to̍sa̍l wānā la̍ka̍fā o̍ lāka̍fā pɛ̍, ɔ̄ɔ̄ mī tu̍si̍ wānā nyɛ᷅ pālāā chōo̍, ɔ̄ɔ̄ mī bi̍ī wānā lu̍ɛ̍i̍yɔ̄ɔ̄ ni᷄ŋ o̍ bā sɔ̍ɔ̍sɔ̍ɔ̍ pɛ̍, lā vi̍āŋ te̍, lā dīmi̍ kpe̍nde̍ke̍le̍. Mu᷅ŋ ki̍nɛ̍i̍ tē I̍ to̍sa̍l wānā i̍ pi᷅lɛ̍ bɛ̍ɛ̍ pɛ̍, lā di̍mi̍ kpe̍nde̍ke̍le̍, I̍ nɔ̍lā mī bɛ̍ɛ̍ndi̍a̍a̍.”

⁴Mi̍ wāŋnda̍ dīmūl ndu̍ āā, “Pāa̍le̍ pīlɛ̍, bɛ̍ɛ̍ a̍ to̍sa̍l wa̍nā la̍ka̍fā kɛ̄lɛ̄ŋgāā mā tu̍si̍ wānā nyɛ᷅ pālāā chōo̍ ɔ̄ɔ̄ mā chu̍a̍ nyɛ̄ wānā le̍.”

⁵Mi̍ Sa̍a̍mi̍ɛ̍ɛ̄ lo᷅ o̍ ko̍ŋ, mbo̍ dīmī āā, “Mɛ̄lɛ̄ka̍ Ya̍a̍wɛ̄ɛ̄ nda̍ wāna̍ ndɔ̍ o̍ hɛ̍li̍ le̍ wāa̍ māsāa̍ nya̍ chōo̍ wo̍, nda̍ cho̍ se̍i̍yāā nīa̍a̍ pāa̍le̍ hāūle᷅ŋ ni̍, māā nya̍ pi̍la̍ dīmi̍ kpe̍nde̍ke̍le̍ māā I̍ to̍sa̍l wa̍nā i̍sɔ̍ɔ̍ o̍ īsɔ̄ɔ̍ wɔ̍ɔ̍ŋ te̍.” Mi̍ wāŋnda̍ chɛ̄l āā, “E̍ī, Mɛ̄lɛ̄ka̍ Ya̍a̍wɛ̄ɛ̍ cho̍ se̍īyo̍ ni̍.”

⁶Mi̍ Sa̍a̍mi̍ɛ̍ɛ̄ di̍mūl nda̍ āā, “Bōōndi̍i̍ fi̍nyāā nyāā ma̍māa̍ ā wa̍ sīndɛ̄ o̍ chɛ̄le̍ŋ ni᷄ŋ I̍chi̍pī ve̍, Mɛ̄lɛ̄ka̍ Ya̍a̍wɛ̄ɛ̍ hɛ̍li̍ Mūu̍sē ni̍ nda̍ E̍lɔ̄ŋ mbo̍ vīām nda̍ ma̍ kɔ̍ so̍lī nda̍ o̍ chɛ̄le̍ŋ ni᷄ŋ.

⁷Le̍la̍ŋ wānā o̍ wānā ya̍ŋ ya̍ nīla̍ŋ mī yi̍ya̍la̍ŋ nya̍ a̍ wa̍lta̍ kɔ̄ndɔ̄fi̍ltā Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ le̍ mbō chīīndīa̍a̍ yōōmūlā nyāla̍ŋ a̍ yōōmūlā fi̍nyāā nyāā ma̍māa̍ la̍ŋ.

⁸Mɛ̄ɛ̍ Che̍kɔ̍pū fi̍nyā nyā ma̍mā nda̍ yu̍ŋgu̍ ndɔ̄ɔ̍ ā ma᷄l sīndɛ̄ ma̍ kūā I̍chi̍pī, mi̍ wāŋnda̍ I̍chi̍pī a̍ kɔ̍ tu̍sī nda̍ nyɛ̄ pālāa̍ chōo̍ ta̍u̍ ta̍u̍. O̍ ko̍ŋ, mi̍ fi̍nyāā nyāā ma̍māa̍ ā kōŋūl nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ le̍ mbō māla̍ nda̍. Ndu̍yɛ̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍ɛ̍ī nda̍ dīōm mbo̍ yɔ̄ŋ Mūu̍sē nda̍ E̍lɔ̄ŋ, ma̍ kɔ̍ so̍lī nda̍ lo̍ŋ ma̍ hūŋ a̍ nda̍ o̍ lɛ̄ŋnde̍ŋ nde᷅ŋ ni᷄ŋ.

⁹Kɛ̍ mi̍ fi̍nyāā nyāā ma̍māa̍ ā hu᷄ŋ pu̍ɛ̍ɛ̍ŋ a̍ Mɛ̍lɛ̄ka̍ Ya̍a̍wɛ̄ɛ̄. O̍ ko̍ŋ mi̍ Mɛ̄lɛ̄ka̍ māl nda̍ Fīli̍i̍tīāŋnda̍, a̍ māsā bɛ̍ndōo̍ Mo̍wa̍bī, a̍ Sīsɛ̍lūā, wāna̍ wa̍ pūa̍a̍ chɔ̄ūwa̍ Ha̍sɔ̄ɔ̄ chi̍e̍e̍ bōlle̍ŋ ndo̍ o̍ bā ma̍ hu᷄ŋ sɔ̍ŋgā a̍ fi̍nyāā nyāā ma̍māā kāŋ ma̍ yām nda̍.

¹⁰O̍ ko̍ŋ kɔ̍ɔ̍lī, mi̍ fi̍nyāā nyāā ma̍māa̍ ā chāŋ vɛ̄lɛ̄ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ le̍ mbō māla̍ nda̍. Ma̍ dīmūl ndu̍ āā, ‘Mɛ̄lɛ̄ka̍ Ya̍a̍wɛ̄ɛ̄, ŋ̄ tōsa̍ yɔ̄ŋ wɔ̄ɔ̍ŋndo̍ a̍ nūm. Nu̍m cho̍ Mɛ̄lɛ̄ka̍ nāa̍ ni̍, kɛ̍ mi̍ ŋ̄ kɛ̄ɛ̄ nu̍m mi̍ ŋ̄ mūli᷄ŋ Bāāl nda̍ Āsīta̍tɛ̄ɛ̄ sōōlūūwo̍ māā mɛ̄lɛ̄ka̍a̍ nāā. Kɛ̍ yāndi̍i̍ Mɛ̄lɛ̄ka̍, chi̍i̍ndi̍a̍a̍ yo̍o̍mūlā nāā la̍ŋ mā so̍li̍ na̍a̍ ya̍a̍mɔ̍ɔ̍wa̍a̍ nāa̍ o̍ bā. Tē a̍ chi̍i̍ndi̍a̍a̍ na̍a̍ pɛ̍ Mɛ̄lɛ̄ka̍, ŋ̄ chō nu̍m mīīŋgū sōōlūūwo̍.’

¹¹O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ yɔ᷅ŋ wānāā yɛ̍ yi̍a̍a̍ le̍ nya̍ mālāa̍ mā chīīndīa̍a̍ nya̍ ya̍a̍mɔ̍ɔ̍wa̍a̍ nyāa̍ o̍ bā. Mbo̍ yɔ̄ŋ Ki̍bīɔ̄ŋ, mɛ̄ɛ̍ Ki̍dīɔ̄ŋ fa̍a̍ŋ, mbo̍ yɔ̄ŋ Ba̍lu̍a̍kī, mɛ̄ɛ̍ ndu̍ fa̍a̍ŋ, mbo̍ yɔ̄ŋ Chɛ̍fi̍tāā, mɛ̄ɛ̍ Chɛ̍fi̍tāā fa̍a̍ŋ mbo̍ mɛ̄ɛ̄lū ni᷅ŋ ya̍ Sa̍a̍mi̍ɛ̍ɛ̄ yɔ̄ŋ. Ndu̍yɛ̍ mi̍ ŋ̄ kīndī kīndī, mi̍ ŋ̄ chīīndīāā nya̍ ya̍a̍mɔ̍ɔ̍wa̍a̍ nyāa̍ o̍ bā, mi̍ lā wānu᷄ŋ ni᷅ŋ ō ba̍ nyāā chōo̍ yɛ̍lɛ̍kɛ̍lɛ̍ɛ̍, wānā o̍ wānā nɔ̍lā nya̍ nyɛ̄ yɔ̄ŋ te̍.

¹²Kɛ̍ mɛ̄ɛ̍ māsā bɛ̍ndōo̍ Na̍ha̍sī, o̍ wa̍ A̍mɔ᷅ŋ ndo̍, ō bɛ̄ɛ̄ndi̍a̍ŋ le̍ nya̍ hūnɔ̄ɔ̍ dēlɔ̄ɔ̍ chōo̍, mi̍ lā kɛ̄ɛ̄ Mɛ̄lɛ̄ka̍ Ya̍a̍wɛ̄ɛ̄, o̍ wa̍ nya̍ chōo̍ ma̍sāa̍ wo̍ māā ō wa᷅ lɛ̄ nya̍ chōo̍ ma̍sā le̍. Mi̍ lā dīmī āā, ‘Na̍a̍ bɛ̍ɛ̍ ŋ̄ yēēma̍ māsāa̍ nāa̍ chōo̍ mɛ̄ɛ̍ lɛ̄ŋīī chēle̍ŋnde̍ ī chō yɛ̍, mbō si᷄m na̍a̍ lāchī mbō kūɛ̄ a̍ na̍a̍ o̍ chɔ̄ūwo̍.’

¹³“Le̍la̍ŋ mi̍ lā chē māsa̍ nya̍ nyūna̍ le̍ ndu̍ wo̍, ō nya̍ pīla̍ hɛ̄li̍ wo̍. Ndu̍ Mɛ̄lɛ̄ka̍ Ya̍a̍wɛ̄ɛ̄ o̍ kɛ̍si̍ ni᷅ŋ nya̍ chōo̍ kpo̍u̍ ni̍.

¹⁴Ndu̍yɛ̍, nya̍ ni̍, māsa̍ nyā bɛ̍ndōo̍ ni̍, tē lā ke̍ Mɛ̄lɛ̄ka̍ nyāa̍ Ya̍a̍wɛ̄ɛ̍ bɛ̄ɛ̄le̍ŋ pɛ̍, o̍ ko̍ŋ kɔ̍ɔ̍lī mī lā sōōlu̍u̍ ndu̍, ndu̍yɛ̍ nyɛ̄ o̍ nyɛ̄ o̍ di̍mu̍l nya̍ mī lā ya᷄ŋ ndu̍ nīla̍ŋ, mī lā tōsa̍ ndu̍, ndu̍yɛ̍ mī lā tōl ndu̍ kɔ̄ɔ̄lī pɛ̍, dɛ̍nɛ̍ kɛ̍ndɛ̄ bɛ̄ndōo̍ ō wā ni̍ŋ le̍ nya̍.

¹⁵Kɛ̍ tē lā sōli̍ ndu̍ dīōm pɛ̍, mī lā kɛ̄ɛ̍ nyɛ̄ o̍ di̍mu̍l nya̍ wo̍ tōsāa̍ nya̍ ni̍, a̍ māsa̍ nyā bɛ̍ndōo̍, ō chō nya̍ dɛ̍nɛ̍ pa̍lāā bɛ̄ndōo̍ tūsī chōo̍.

¹⁶Le̍la̍ŋ lā tōfa̍ mī lā chē sūɛ̍i̍ kɔ̄ndɔ̄fi̍li̍i̍ Mɛ̄lɛ̄ka̍ Ya̍a̍wɛ̄ɛ̄ o̍ hi᷅ŋ nya̍ tōsā o̍ hɔ̄l pāa̍le̍ hāūle̍ŋ nde᷅ŋ nde̍.

¹⁷Mi̍ chē bɛ̍ɛ̍ wɔ̄ɔ̄le̍ŋ le̍ cho̍ le᷅ŋ ni̍, ō cho̍ te̍le̍ŋ pīɔ̄ɔ̄ sīa̍ le̍ ni̍, kɛ̍ I̍ cho̍ Mɛ̄lɛ̄ka̍ Ya̍a̍wɛ̄ɛ̍ nyūnā, mbō yɔ᷄ŋ pīɔ̍ɔ̍ a̍ ta᷅ŋnda̍ŋ nya̍ o̍ hɔ̄l na̍nu᷄ŋ. O̍ ko̍ŋ, mī lā sīna̍ māā yɔ̄ŋ wɔ̄ɔ̍ŋ bɛ̄ndū bɛ̍ndōo̍ pīla̍ nya̍ tōsa̍ a̍ Mɛ̄lɛ̄ka̍ Ya̍a̍wɛ̄ɛ̄ ni̍ le̍ nyūnā nya̍ nyūna̍ ndu̍ māā ō ke̍ nya̍ māsā bɛ̍ndū chɛ̍le̍ŋ ndo̍.”

¹⁸O̍ ko̍ŋ kɔ̍ɔ̍lī, mi̍ Sa̍a̍mi̍ɛ̍ɛ̄ pi̍ɛ̍ī Mɛ̄lɛ̄ka̍ Ya̍a̍wɛ̄ɛ̄, ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ mu̍lī ndu̍ dīōm, mbo̍ yɔ᷅ŋ pīɔ̍ɔ̍ a̍ ta᷅ŋnda̍ŋ nda̍ o̍ hɔ̄l pāa̍le̍ le̍ŋ lo̍ŋ. Mɛ̄ɛ̍ wāŋnda̍ I̍sɔ̄lūɛ̄ī a̍ che᷅ nyɛ̍ yɔ̍nu̍ŋndo̍, nda̍ kpo̍u̍ mi̍ sīōōŋīī bɛ̄ndūe̍i̍ bīī nda̍ a̍ Mɛ̄lɛ̄ka̍ Ya̍a̍wɛ̄ɛ̄ nda̍ Sa̍a̍mi̍ɛ̍ɛ̄.

¹⁹Ma̍ lō o̍ ko̍ŋ ma̍ dīmūl Sa̍a̍mi̍ɛ̍ɛ̄ āā, “Yāndi̍i̍ fāllo̍, pi̍ɛ̍i̍ Mɛ̍lɛ̄ka̍ Ya̍a̍wɛ̄ɛ̄, o̍ cho̍ Mɛ̄lɛ̄ka̍ nūmndo̍ wo̍ le̍ na̍a̍ ō di̍ī na̍a̍ le̍ fɔ̍. Na̍a̍ pi̍la̍ bɛ̍ɛ̍ ŋ̄ sīna̍ ni᷅ŋ kɛ̍sɛ̍ kɛ̍sɛ̍ māā ō fūla̍ wɔ̍ o̍ yɔ̄ŋndā wɔ̄ɔ̍ŋndā chēle̍ŋndā na̍a̍ ŋ̄ tōsa̍ la̍ŋ kɔ̄ɔ̄lī, ŋ̄ tōsa̍ yɔ̄ŋ wɔ̄ɔ̍ŋndo̍ a̍ Mɛ̄lɛ̄ka̍ Ya̍a̍wɛ̄ɛ̄, le̍ ndu̍ nyūnāa̍ māā ō ke̍ na̍a̍ māsā bɛ̍ndū chɛ̍le̍ŋ ndo̍.”

²⁰Mi̍ Sa̍a̍mi̍ɛ̍ɛ̄ di̍mūl nda̍ āā, “Sīōōŋīī bi̍ī nya̍ le̍. Mi̍ chē bɛ̍ɛ̍ mi̍ lā tōsā le̍nde̍ a̍ Mɛ̄lɛ̄ka̍ Ya̍a̍wɛ̄ɛ̄, kɛ̍ lā ma᷅l ndu̍ le̍. Lā hīo̍u̍ la̍chi̍ a̍ ndu̍ sōōlūūwo̍ a̍ kɔ̄ltā nyāla̍ŋ kpo̍u̍.

²¹Lā kɛ̍ɛ̄ ndu̍ mī lā mūli̍ŋ nyɛ᷅m fo̍ndo̍ŋ sōōlūūwo̍ le̍. Nyɛ̄m mu᷅ŋ ŋ̄ nɔ̍lā mī ŋ̄ māla̍ nya̍ le̍, kɛ̄lɛ̄ŋgāāle̍ mī ŋ̄ chīīndi̍a̍a̍ nya̍, fo̍ndōle̍ nyɛ̄m fo̍ndō fu̍u̍ ko̍ ŋ̍ cho̍ ni̍.

²²Mɛ̄lɛ̄ka̍ Ya̍a̍wɛ̄ɛ̄ o̍ me᷅l nya̍ le̍, ō wa̍ bɛ̍ɛ̍ le̍ bɛ̄ɛ̄le̍ dīōlā ndɔ̄la̍ŋ. Fo̍ndōle̍, ndu̍ pi̍la̍ hɛ̍li̍ nya̍ ni̍, mbo̍ sīīŋgūū nya̍ wānāā ndɔ̄.

²³Ya̍ le̍ ya̍ le̍ te̍le̍ŋ o̍ te̍le̍ŋ I̍ cho̍ ō bɛ̄ɛ̄ndīa̍ŋ le̍ pīɛ̄īle̍ŋ le̍ nya̍, ndu̍yɛ̍ mī hi̍o̍ū lāchī a̍ nya̍ nyɛ̍ bɛ̍nda̍, ndu̍yɛ̍ mbo̍ wā sa̍kpō le̍ tōsāa̍ wo̍ chɔ̄mndo̍. Tē I̍ kɛ̍ɛ̍ pīɛ̄īle̍ŋ le̍ nya̍ pɛ̍ mɛ̄ɛ̍ yɔ̄ŋ wɔ̄ɔ̍ŋndo̍ ya̍ I̍ to̍sā ko̍ŋ a̍ Mɛ̄lɛ̄ka̍ Ya̍a̍wɛ̄ɛ̄ ni̍.

²⁴Le̍la̍ŋ lā hīo̍u̍ la̍chi̍ a̍ Mɛ̄lɛ̄ka̍ Ya̍a̍wɛ̄ɛ̄ bɛ̄ɛ̄le̍ŋ kīo̍o̍, ndu̍yɛ̍ mī lā sōōlu̍u̍ ndu̍ o̍ nɛ̄ī sa̍kpōo̍ chōo̍ a̍ kɔ̄ltā nyāla̍ŋ kpo̍u̍. Lā lōōnu̍ŋ ndɔ̍ sɔ̍ɔ̍ŋ kɔ̄ndɔ̄fi̍li̍ŋ bɛ̄ndūŋ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ le̍ nya̍ wo̍ŋ.

²⁵Kɛ̍ tē lā hīōū lāchī a̍ yɔ̄ŋ wɔ̄ɔ̍ŋndo̍ tōsāa̍ pɛ̍, nya̍ ni̍ māsa̍ bɛ̍ndū nyāa̍ ni̍, ō chō nya̍ bāsɔ̄ɔ̄ tɛ̍ɛ̍.”