Read Southern Kisi Sa̍a̍mi̍ɛ̍ɛ̄ Tāso̍o̍ 14 Bible Online

Sa̍a̍mi̍ɛ̍ɛ̄ Tāso̍o̍ 14 - Southern Kisi bible

Sa̍a̍mi̍ɛ̍ɛ̄ Tāso̍o̍ 14

¹Pāa̍le̍ pi᷅lɛ̍, mi̍ Chōna̍ta᷅ŋ, po̍ Sɔ̍ɔ̄ wo̍ dīmūl po̍ chu̍ā pīāāndu̍ bi̍īlūl ndu̍ wōlɔ̄ɔ̄lā ndɔ̄la̍ chɔ̄ūla̍ŋ ndo̍ āā, “ŋ tāŋ ŋ̄ kɔ̍ o̍ dɔ̍ɔ̍ŋgɔ̍ Fīli̍i̍tīāŋnda̍.” Kɛ̍ Chōna̍ta᷅ŋ di̍mu̍l Sɔ̍ɔ̄ fi̍nyā ndɔ̄ a̍ ndi̍ o̍kɔ̄ɔ̄ le̍.

²Sɔ̍ɔ̄ nda̍ pūa̍a̍ ndūa̍a̍ chɔ̄ūwa̍ ā wa̍ īchāli̍ Ki̍bīāā chi̍e̍e̍ le̍kɔ̍ɔ̍ o̍ yɔ̄m bɛ̄ndū pīlɛ̍ bɛ̄ŋgu̍, o̍ fo̍ndāŋ nda̍ vēēlū āā, Mi̍ki̍lɔ̄ŋ ndo̍. Ndu̍ o̍o̍ nɔ̍ pūa̍a̍ chɔ̄ūwa̍ kɛ̄mɔ̄ɔ̍ lē ŋɔ᷄mpu᷅m.[3]

³Po̍ pi᷅lɛ̍ wa̍ nda̍ tɛ̄ɛ̄ŋ dīōla̍ŋ āā, A̍hi̍chā, ndu̍ wa̍ wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍ ni̍. Dōma̍ wānāā sōlīāā lāsa̍lāa̍ ō wa̍ ndu̍ lēkɔ̄ɔ̍. Ndu̍yɛ̍ A̍hi̍chā ko̍ŋ fi̍nyā ndɔ̍ wa̍ A̍hi̍tu̍bī ni̍, bɛ̄ndōo̍ I̍ka̍bɔ̄ɔ̄. I̍ka̍bɔ̄ɔ̄ yɛ̍ fi̍nyā ndɔ̍ wa̍ Fi̍ni̍ha̍a̍sī, po̍ I̍lā wo̍, wāna̍ ndu̍ o̍o̍ so̍lī sa̍lāa̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍ Si̍lɔ̄ɔ̄ chi̍e̍e̍ wo̍. Ndu̍yɛ̍ bōōndi̍i̍ Chōna̍ta᷅ŋ ma̍l mbo̍ kūā kɔ̄lā lāŋ nde̍ wānā o̍ wānā si̍na̍ a̍ ndi̍ o̍kɔ̄ɔ̄ le̍.

⁴Ndu̍yɛ̍ nɛ̄i̍ Chōna̍ta᷅ŋ o̍ ke̍e̍ku̍ le̍ kɔ̄la̍ŋ o̍ dɔ̍ɔ̍ŋgɔ̍ Fīli̍i̍tīāŋnda̍ ha̍ā ni᷄ŋ ndo̍, pōūtā bɛ̄ŋnda̍ŋ lā wa̍ ndu̍ lāchī fe̍ke̍fe̍ke̍, ho̍ō wa̍ ba̍ā, ho̍ō wa̍ ba̍ā. Pōūta̍ŋ ndāŋ ō pīlɔ̍ɔ̍ dīōla̍ŋ āā, Bōsɛ̍sī, ō pīlɔ̍ɔ̍ āā Sɛ̍nɛ̄ɛ̄.

⁵Pōūwo̍ ō pīlɔ̍ɔ̍ wa̍ bā lūāŋ ndo̍ kūmbū Mīkīma̍sī chi̍e̍e̍ wo̍ mi̍ ō pīlɔ̍ɔ̍ wā bā tōū wo̍ kūmbū Ɛ̄sīɔ̄ŋkɛ̍bɛ̄ chi̍e̍e̍ wo̍.

⁶Mi̍ Chōna̍ta᷅ŋ di̍mūl po̍ chu̍ā pīāāndu̍ bi̍i̍lūl ndu̍ wōlɔ̄ɔ̄lā ndɔ̄la̍ chɔ̄ūla̍ŋ ndo̍ āā, “ŋ̄ kɔ̍ o̍ dɔ̍ɔ̍ŋgɔ̍ wānāa̍ fo̍ndūa̍a̍ cho̍ ha̍ā ā si̍nā ha̍ā Mɛ̄lɛ̄ka̍ le̍ wa̍, mī ŋ̄ kɔ̍ chi᷅ŋa̍la᷅ŋ nda̍. Kɛ̄lɛ̄ŋgāā mī Mɛ̄kɛ̄ka̍ Ya̍a̍wɛ̄ɛ̄ o̍ ma̍la̍ na̍a̍ mī ŋ̄ yēm nda̍. Mi̍ chē bɛ̍ɛ̍ mi̍ ŋ̄ wā na̍a̍ ŋi̍ɔ̍ɔ̍ŋ kpe̍, kɛ̍ Mɛ̄lɛ̄ka̍ Ya̍a̍wɛ̄ɛ̄ o̍ nɔ̍lā mbō ke̍ na̍a̍ kpāāyāa̍ mī ŋ̄ yēm nda̍.”

⁷Mi̍ po̍ chu̍ā pīāāndōo̍ ō dīmūl ndu̍ āā, “Nyɛ̄ o̍ nyɛ̄ ŋ̄ yīya̍ŋ pɛ̍ māā ō bɛ̄nda̍ to̍sa̍, ŋ̄ chō dīōm pīlɛ̍. I̍ cho̍ nu̍m kɔ̄ɔ̄lī.”

⁸Mi̍ Chōna̍ta᷅ŋ lo᷅ o̍ ko̍ŋ mbo̍ dīmūl ndu̍ āā, “Ŋ̄ kɔ̍ mī ŋ̄ kɔ̍ fu̍lā nda̍ o̍ hɔ̄l de̍ŋ mā chē na̍a̍.

⁹Tē ā chē na̍a̍ pɛ̍, mā dīmu̍l na̍a̍ āā, ‘Lā chu᷄m ndɔ̍ na̍a̍ lo̍ŋ, ŋ̄ kōmāl nya̍?’ Ŋ̄ chu᷄m nda̍, ŋ̄ ku̍ē nāa̍ nda̍ chō wa̍ le̍.

¹⁰Kɛ̍ tē ā vēēlu̍ na̍a̍ pɛ̍ āā, ‘Lā he᷄l na̍nu᷄ŋ mī lā kōma̍l na̍a̍,’ ŋ̄ he᷄l. Ko̍ŋ cho̍ wa̍ tāāmāsi̍o̍o̍ ni̍ māā Mɛ̄lɛ̄ka̍ Ya̍a̍wɛ̄ɛ̄ o̍ ke̍ na̍a̍ kpāāyāa̍ le̍ mī ŋ̄ yēm nda̍.”

¹¹O̍ ko̍ŋ, ma̍ kɔ̍ fu̍lā Fīli̍i̍tīāŋnda̍ o̍ hɔ̄l de̍ŋ, mi̍ Fīli̍i̍tīāŋnda̍ ā chā nda̍. Mɛ̄ɛ̍ Fīli̍i̍tīāŋnda̍ chē nda̍, ma̍ dīmu̍la᷅ŋ āā, “Mi̍ lā chē Hi̍būlūi̍ya̍ hūnɔ̄ɔ̍ a̍ wūūwo̍ lɛ̄ŋ, ā chō fūlāa̍ o̍ so̍o̍ŋnda̍ŋ ni᷄ŋ nāa̍ nda̍ chō ā vīŋīa̍ŋ nda̍.”

¹²O̍ ko̍ŋ kɔ̍ɔ̍lī, mi̍ Fīli̍i̍tīāŋnda̍ wa̍ o̍ dɔ̍ɔ̍ŋgɔ̍ nda̍ kēlū ho̍ō wo̍ wa̍ ni᷄ŋ nda̍ ā dīmūl Chōna̍ta᷅ŋ nda̍ wāna̍ ndɔ̍ bi̍i̍lūl ndu̍ wōlɔ̄ɔ̄lā ndɔ̄la̍ chɔ̄ūla̍ŋ ndo̍ chōo̍ cho̍o̍ āā, “Lā he᷄l na̍nu᷄ŋ mī lā kōma̍l na̍a̍, ŋ̄ chō nya̍ chɔ̄m.” O̍ ko̍ŋ, mi̍ Chōna̍ta᷅ŋ di̍mūl wāna̍ ndɔ̍ bi̍i̍lūl ndu̍ wōlɔ̄ɔ̄lā ndɔ̄la̍ chɔ̄ūla̍ŋ ndo̍ āā, “He̍l la̍ kɔ̄ɔ̄lī, Mɛ̄lɛ̄ka̍ Ya̍a̍wɛ̄ɛ̄ o̍ ma̍l Fīli̍i̍tīāŋnda̍ pāa̍le̍ hāūle᷅ŋ I̍sɔ̄lūɛ̍i̍ya̍ o̍ bā.”

¹³O̍ ko̍ŋ, mi̍ Chōna̍ta᷅ŋ nda̍ wāna̍ ndɔ̍ bi̍i̍lūl ndu̍ wōlɔ̄ɔ̄lā ndɔ̄la̍ chɔ̄ūla̍ŋ ndo̍ ā wūū a̍ lābā ma̍ hēl. O̍ ko̍ŋ kɔ̍ɔ̍lī, ma̍ kɔ̍ chi᷅ŋa̍la᷅ŋ Fīli̍pīāŋnda̍ ha̍ā a̍ sɔ̍ŋgɔ̍ɔ̍. Mī Chōna̍ta᷅ŋ ku̍ā la̍chi̍ a̍ nda̍ lɔ̄ɔ̍ mā dēlī, mī wāna̍ ndɔ̍ bi̍i̍lūl ndu̍ wōlɔ̄ɔ̄lā ndɔ̄la̍ chɔ̄ūla̍ŋ ndo̍ ndu̍ di̍ū nda̍ ā mākɔ̄ɔ̄.

¹⁴O̍ bēndu̍ bɛ̍ɛ̍ a̍ ti᷅ŋ te̍ mi̍ Chōna̍ta᷅ŋ nda̍ wāna̍ ndɔ̍ bi̍i̍lūl ndu̍ wōlɔ̄ɔ̄lā ndɔ̄la̍ chɔ̄ūla̍ŋ ndo̍ ā dīī Fīli̍i̍tīāŋnda̍ ŋ̄wāŋ bi̍di̍i̍ŋ (20) o̍ yōndō ībūŋgā pɔ̄mbu̍i̍i̍ni̍i̍ ni̍ŋ.

¹⁵O̍ ko̍ŋ, mi̍ sīōōŋīī bɛ̄ndūe̍i̍ bīī wāŋnda̍ Fīli̍i̍tīāā mi̍ kɔ̄lta̍ŋ lā hīīlu᷄ŋ nda̍ ni᷄ŋ kpo̍u̍, so̍vɛ̄i̍ya̍a̍ wa̍ o̍ dɔ̍ɔ̍ŋgɔ̍ wa̍ ni̍, a̍ ku̍ā I̍sɔ̄lūɛ̍i̍ya̍ dēlɔ̄ɔ̍ chōo̍ mā pūŋgā nyɛ᷅m nda᷄ŋ nda̍ ni̍, nda̍ kpo̍u̍ mi̍ kɔ̄lta̍ŋ lā lāāsi̍a̍ŋ nda̍ ni᷄ŋ tu᷅. Mi̍ Mɛ̄lɛ̄ka̍ tōsā, mi̍ lɛ̄ŋnde̍ŋ lē nyīīyā o̍ fo̍ndā nda̍ wa̍ wo̍, o̍ ko̍ŋ kɔ̍ɔ̍lī, mi̍ sīōōŋīī bɛ̄ndūe̍i̍ chɔ̄ɔ̄lū nda̍ bīyɔ̄ɔ̄.

¹⁶Ndu̍yɛ̍ Sɔ̍ɔ̄ pūa̍a̍ ndūāā mɛ̍ŋgɛ̄lāa̍ ā wa̍ Ki̍bīāā, o̍ būŋgɛ̄ī Bɛ̍ŋnja̍mīŋnde̍ ni᷄ŋ. O̍ ko̍ŋ, ma̍ chā, Fīli̍i̍tīāŋnda̍ ā pūūsi̍a̍ŋ o̍ dɔ̍ɔ̍ŋgɔ̍ nda̍ wa̍ wo̍ ma̍ wā nyāānɔ᷄ŋndo̍ kpe̍e̍kpe̍i̍, ā wa̍ kīlta̍ŋ bā o̍ bā fe̍e̍.

¹⁷O̍ ko̍ŋ kɔ̍ɔ̍lī, ma̍ dīmūl Sɔ̍ɔ̄. Mi̍ Sɔ̍ɔ̄ di̍mūl wānāa̍ wa̍ pūa̍a̍ ndūa̍a̍ bōlle̍ŋ nda̍ āā, “Lā mɛ̄ɛ̄ndi̍a̍ŋ ndɔ̍ so̍vɛ̄i̍ya̍ tɛ̄ɛ̄ŋ kpo̍u̍, mī lā sīna̍ wāna̍ cho̍ na̍a̍ tɛ̄ɛ̄ŋ te̍ wo̍.” O̍ ko̍ŋ, ma̍ mɛ̄ɛ̄ndīa̍ŋ, ma̍ sāālu᷄ŋ māā Chōna̍ta᷅ŋ nda̍ wāna̍ ndɔ̍ bi̍i̍lūl ndu̍ wōlɔ̄ɔ̄lā ndɔ̄la̍ chɔ̄ūla̍ŋ māā ndo̍ ā cho̍ nda̍ tɛ̄ɛ̄ŋ te̍.

¹⁸Mi̍ Sɔ̍ɔ̄ lo᷅ o̍ ko̍ŋ mbo̍ dīmūl A̍hi̍chā, wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍ āā, “Hu̍ŋ a̍ kɔ̍fu̍ Mɛ̄lɛ̄ka̍ Ya̍a̍wɛ̄ɛ̄ wo̍ na̍nu᷄ŋ.” Ndu̍yɛ̍ a̍ te̍le̍ŋ ko̍ŋ tē I̍sɔ̄lūɛ̍i̍ya̍ nda̍ a̍a̍ wa̍ kɔ̄la̍ŋ o̍ chɔ̄ūwo̍ pɛ̍, a̍ kɔ̍fu̍ Mɛ̄lɛ̄ka̍a̍ nda̍ a̍a̍ ku̍ā ni̍.

¹⁹Sɔ̍ɔ̄ cho̍ sūɛ̍i̍ nāa̍ wāna̍ so̍lī sa̍lāa̍ wo̍ chūā mbo̍ tūɛ̄ī mi̍ bɔ̄ɔ̄lūū bɛ̄ndōo̍ chɔ̄ɔ̄lū yɔ̄nu᷄ŋ Fīli̍i̍tīāŋnda̍ tɛ̄ɛ̄ŋ, ā wa̍ īwo̍o̍lūŋ wo̍o̍lūŋnde̍ kpe̍e̍kpe̍i̍. O̍ ko̍ŋ, mi̍ Sɔ̍ɔ̄ di̍mūl wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍ āā, “Ō wa̍ ni̍ko̍ le̍nde̍ Āchi̍chā.”

²⁰O̍ ko̍ŋ kɔ̍ɔ̍lī, mi̍ Sɔ̍ɔ̄ chu̍ā pūa̍a̍ ndūāā kɛ̍mɛ̄ le̍ ŋɔ̍mpu᷅m nda̍ ma̍ kɔ̍ sa̍ā Fīli̍i̍tīāŋnda̍ ha̍ā a̍ sɔ̍ŋgɔ̄ɔ̍. Ā kōma̍l Fīli̍i̍tīāŋnda̍ nda̍ pi̍la̍ chō lɔ̄ɔ̄vi̍āŋndo̍ kpe̍e̍kpe̍i̍, dīūwa᷅ŋndo̍ tu̍ŋ nda̍ wa̍ ni̍, nda̍ a̍a̍ si̍nā nyɛ᷅ o̍ nyɛ̄ nda̍ a̍a̍ yɔ᷅ŋ te̍.

²¹O̍ ko̍ŋ kɔ̍ɔ̍lī, Hi̍būlūi̍ya̍a̍ wa̍ Fīli̍i̍tīāŋnda̍ tɛ̄ɛ̄ŋ, ma̍ wā nda̍ nda̍ā o̍ dɔ̍ɔ̍ŋgɔ̍ nda̍ kēlū wo̍ wa̍ ni᷄ŋ nda̍, nda̍ bɛ̍ɛ̍ mɛ̄ɛ̍ nda̍ chē le̍nde̍ ma̍ hīāū nu᷄ŋ chāāŋāā ndāā I̍sɔ̄lūɛ̍i̍ya̍ kɔ̄ɔ̄lī ma̍ mūlu̍la᷅ŋ Fīli̍i̍tīāŋnda̍ a̍ sɔ̍ŋgɔ̄ɔ̍.

²²O̍ ko̍ŋ kɔ̍ɔ̍lī, mɛ̄ɛ̍ I̍sɔ̄lūɛ̍i̍ya̍a̍ wa̍ ā vīŋīa̍ŋ o̍ lɛ̄ŋndē īpēmbūle̍ŋ E̍fi̍lūēm nda̍ ā tūēī māā I̍sɔ̄lūɛ̍i̍ya̍ yēm Fīli̍i̍tīāŋnda̍ mi̍ Fīli̍i̍tīāŋnda̍ wā nyāānɔ᷄ŋndo̍, nda̍ bɛ̍ɛ̍ ma̍ fūūlīāā nāa̍ nda̍ wa̍ ā vīŋīa̍ŋnda̍, ma̍ tīsā Fīli̍i̍tīāŋnda̍ kɔ̄ɔ̄lī.

²³Ndu̍yɛ̍, ma̍ lō sɔ̍ŋgɔ̄ɔ̍ a̍ Fīli̍i̍tīāŋnda̍ ma̍ hīāū Bɛ̍ta̍vīŋ chi̍e̍e̍ le̍kɔ̍ɔ̍lī a̍ nda̍. O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā mi̍ I̍sɔ̄lūɛ̍i̍ya̍ yām Fīli̍i̍tīāŋnda̍, mi̍ Mɛ̄lɛ̄ka̍ chīīndīāā I̍sɔ̄lūɛ̍i̍ya̍ pāa̍le̍ le̍ŋ ya̍a̍mɔ̍ɔ̍wa̍a̍ ndāa̍ o̍ bā.

²⁴Mɛ̄ɛ̍ sɔ̍ŋgɔ̄ɔ̍ ho̍ō ō kāndu̍ŋ, mi̍ Sɔ̍ɔ̄ do̍ū pūa̍a̍ ndūa̍a̍ sāwāa̍, mbo̍ dīmūl nda̍ āā, “Pāa̍le̍ŋ lē dēl le̍nde̍, ha̍a̍a̍ mbō lo̍ o̍ ko̍ŋ mī chi̍i̍ Fīli̍i̍tīāŋnda̍ yōmɔ̄ɔ̄, wānā o̍ wānā mi̍a̍a̍nu᷄ŋ nyɛ᷅ dīa̍a̍ o̍ sōndō le̍. Sɔ̍ŋgɔ̄ɔ̍ ho̍ō chūū le̍nde̍ wānā o̍ wāna̍ mɛ̍ɛ̍nu᷄ŋ nyɛ᷅ dīa̍a̍ o̍ sōndō pɛ̍ sēndi̍o̍o̍ chō nu̍m chōo̍.” Ndu̍yɛ̍ pāa̍le̍ le̍ŋ kpɛ᷅ŋ wānā o̍ wānā me̍e̍nu̍ŋ nyɛ᷅ dīa̍a̍ o̍ sōndō le̍, yīa̍a̍ŋ mā wa̍ ni᷅ŋ nda̍ nɛ̄īyo̍ kpe̍e̍kpe̍i̍.

²⁵O̍ ko̍ŋ kɔ̍ɔ̍lī, nda̍ kpo̍u̍ ma̍ cha᷄ŋ ma̍ kūā o̍ būndɔ̍ɔ̍ ni᷄ŋ. Ā lo̍ bālɔ̄ɔ̍, ma̍ sāālu᷄ŋ li̍a̍a̍ŋ lɛ̄ŋ.

²⁶Mɛ̄ɛ̍ nda̍ hīōū vɛ̄lɛ̄ lāchi̍, ma̍ kōmāl vɛ̄lɛ̄ ma᷅ŋ, o̍ yɔ̄mndo̍ mā chō dēlīo̍o̍ pa̍ pā, kɛ̍ wānā o̍ wānā ye̍ē ba̍ le̍, fo̍ndōle̍ sīōōŋnde̍ wa̍ nda̍ le̍ sēndi̍ Sɔ̍ɔ̄ o̍ me̍na̍ wo̍.

²⁷Kɛ̍ bōōndi̍i̍ Sɔ̍ɔ̄ wa̍ sūɛ̍i̍ he̍ī dīmīo̍o̍ ve̍, Chōna̍ta᷅ŋ po̍ ndɔ̍ ndu̍ tu̍i̍i̍ le̍. Mɛ̄ɛ̍ nda̍ kōma̍l līa̍a̍ŋ ma̍ŋ, mi̍ Chōna̍ta᷅ŋ wo̍ū tīnda̍ wa̍ ndu̍ o̍ bā wo̍, mbo̍ sōlī mā ti᷄ŋ mbo̍ dīā. Ndu̍yɛ̍ dīmīo̍o̍ nu̍a̍ā mbo̍ dīā līa̍a̍ŋ māŋ mbo̍ yɔ̄nu᷄ŋ bɛ̍ɛ̍ nyɛ᷅ kɛ̄ndɛ̍ī.

²⁸Mi̍ pūa̍a̍ fi̍nyā ndɔ̄ wa̍ ō pīlɛ̍ dīmūl ndu̍ āā, “Na̍a̍ kpo̍u̍ yīa̍a̍ŋ mā chō na̍a̍ nɛ̄īyo̍. Kɛ̍ fi̍nyā nūm o̍ si̍la̍ na̍a̍ o̍ kālā ka̍lā, ndu̍yɛ̍ mbo̍ mēnā po̍ māā hāū kpɛ᷅ŋ, wānā o̍ wānā mɛ̍ɛ̍nu᷄ŋ nyɛ᷅ dīa̍a̍ o̍ sōndō pɛ̍ sēndi̍o̍o̍ chō nu̍m chōo̍.”

²⁹Mi̍ Chōna̍ta᷅ŋ di̍mī āā, “Dɛ̍nɛ̍ pa̍lāā yɛ̄ɛ̄ kpe̍e̍kpe̍i̍ kɛ̄kɛ̍ tūsi̍ yɛ̄ ho̍ō hāū wa᷅ŋnda̍ chōo̍! To̍fa̍ wɔ̍, lɛ̄ma̍ pɔ̍mbɔ̄mā ya̍ I̍ la̍ŋga̍ di̍ō ma᷅ŋ nda̍ŋ I̍ yɔ̍nu̍ŋ bɛ̍ɛ̍ nyɛ᷅ kɛ̄ndɛ̍ī.

³⁰Wāŋnda̍ di̍ nyɛ᷅ dīāā le̍ ma̍ sɔ̄ŋgā nu̍a̍ā tē nda̍ a̍a̍ de᷅ ni᷅ŋ pɛ̍ ha̍ū nyɛ̍ dīāā nda̍ chō ho̍ō ya̍a̍mɔ̍ɔ̍wa̍a̍ ndāa̍ pūŋgāa̍ o̍ lābā wo̍, ā wa̍ yōōmūa̍ŋ sɔ̄lā le̍ sɔ̍ŋgɔ̄ɔ̍, mī nda̍ a̍a̍ di̍u̍ Fīli̍i̍tīāŋnda̍ mi̍ ndu̍ o̍o̍ hi̍o̍ū bɛ̍ɛ̍ ā nda̍ dīu̍ ha̍ā wa̍. Kɛ̍ mɛ̄ɛ̄māā nu̍a̍ā o̍ to̍sa̍ hāū ni̍ I̍ si̍na̍ le̍.”

³¹O̍ ko̍ŋ, mi̍ I̍sɔ̄lūɛ̍i̍ya̍ yām Fīli̍i̍tīāŋnda̍. Mɛ̄ɛ̍ nda̍ chūa̍ nda̍ a̍ sɔ̍ŋgɔ̄ɔ̍ Mīkīma̍sī chi̍e̍e̍ ka̍ū ma̍ kɔ̍ mɛ̍ɛ̍lū nda̍ A̍i̍cha̍lɔ̄ŋ chi̍e̍e̍. Ndu̍yɛ̍ yīa̍a̍ŋ mā wa̍ ni᷅ŋ I̍sɔ̄lūɛ̍i̍ya̍ nɛ̄īyo̍ kpe̍e̍kpe̍i̍ a̍ te̍le̍ŋ ko̍ŋ, ā wa̍ ni᷅ŋ ā sāŋgāā yɔ᷅kɔ̍ɔ̄.

³²Mɛ̄ɛ̍ yīa̍a̍ŋ mā nɛ̄i̍ nda̍ te̍i̍ sāa̍ nda̍ pūŋga̍ nu̍a̍ā ya̍a̍mɔ̍ɔ̍wa̍a̍ ndāa̍ o̍ bā a̍ nāūwa̍ wa̍, ma̍ dīū nda̍ ma̍ chāl vīsīŋ mu᷅ŋ dīo̍o̍ ŋ̄kīyɛ̍i̍ le̍nde̍ a̍ kōo̍wa̍ŋ.

³³O̍ ko̍ŋ, mi̍ wāŋnda̍ mālnu᷄ŋ ma̍ kɔ̍ di̍mūl Sɔ̍ɔ̄ āā, “Wāŋnda̍ chō yɔ̄ŋ wɔ̄ɔ̍ŋndo̍ tōsāa̍ a̍ Mɛ̄lɛ̄ka̍ Ya̍a̍wɛ̄ɛ̄. Ā bīī ma̍ dīū chɔ̄lūāā nda̍ bīu̍ ya̍a̍mɔ̍ɔ̍wa̍a̍ ndāa̍ o̍ bā wa̍ ma̍ chāl vīsīŋ mu᷅ŋ dīo̍o̍ ŋ̄kīyɛ̍i̍yo̍ŋ, a̍ kōo̍wa̍ŋ le̍nde̍.” Mɛ̄ɛ̍ Sɔ̍ɔ̄ tu̍e̍ī sūɛ̍i̍ he̍ī, mbo̍ dīmī āā, “Wāŋnda̍ I̍sɔ̄lūɛ̄ī a̍ to̍sa̍ yɔ̄ŋ wɔ̄ɔ̍ŋ bɛ̄ndū bɛ̍ndū.” Mbo̍ dīmūl pūa̍a̍ ndūa̍a̍ āā, “Lā pīmbu̍l po̍ū bɛ̄ndōo̍ mī lā hīŋ a̍ ndu̍ na̍nu᷄ŋ.

³⁴O̍ ko̍ŋ kɔ̍ɔ̍lī, mī lā bālu̍ wāŋnda̍ chōo̍ o̍ dɔ̍ɔ̍ŋgɔ̍ nāa̍ kpo̍u̍, mī lā dīmu̍l nda̍, mī wānā o̍ wānā hi᷅ŋ a̍ sāa̍ ndɔ̄ɔ̍, ɔ̄ɔ̄ nāū ndɔ̄ɔ̍ na᷄ŋ mī lā hu᷄ŋ di̍ū nda̍ ya̍ o̍ hɔ̄l na᷄ŋ mī lā dē. Kɛ̍ lā to̍sā yɔ̄ŋ wɔ̄ɔ̍ŋ su̍u̍ wa̍ā le̍nde̍ a̍ Mɛ̄lɛ̄ka̍ Ya̍a̍wɛ̄ɛ̄ mī lā dē vīsīo̍ŋ a̍ kōo̍wa̍ŋ lēni᷄ŋ te̍.” O̍ ko̍ŋ, mi̍ wānā o̍ wānā hu᷅ŋ a̍ chɔ̄lū ndɔ̄ɔ̍ īchɔ̄l kōŋ lo̍ŋ ma̍ hu᷄ŋ di̍ū nda̍ Sɔ̍ɔ̄ o̍ hɔ̄l lo̍ŋ, ma̍ dīā nda̍ lo̍ŋ.

³⁵O̍ ko̍ŋ kɔ̍ɔ̍lī, mi̍ Sɔ̍ɔ̄ ta̍ŋgūl ma̍āŋndo̍ lo̍ŋ le̍ sa̍lāla̍ŋ sōlīo̍o̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍. Ndu̍yɛ̍ ma̍āŋ ndɔ̍ tāse̍ o̍ te̍ŋgu̍l Mɛ̄lɛ̄ka̍ Ya̍a̍wɛ̄ɛ̍ wo̍ wa̍ ko̍ŋ ni̍.

³⁶O̍ ko̍ŋ kɔ̍ɔ̍lī, mi̍ Sɔ̍ɔ̄ di̍mūl nda̍ āā, “ŋ̄ tīsa᷅ŋ Fīli̍i̍tīāŋnda̍ ha̍ā kɔ̄ɔ̄lī chūɛ̄llɛ̄ŋ mī ŋ̄ kɔ̍ pu̍ŋgā nyɛ̄m nda̍ŋ ndu̍yɛ̍ mī ŋ̄ dīu̍ nda̍, chɔ̍ŋ na̍nu᷄ŋ a̍ pāa̍le̍ŋ sīɔ̍ɔ̍ mī ŋ̄ bāsu̍ nda̍ tɛ̍ɛ̍.” Mi̍ pūa̍a̍ ndūa̍a̍ dīmūl ndu̍ āā, “Nyɛ̄ o̍ nyɛ̄ ŋ̄ dīmu̍l na̍a̍ pɛ̍ le̍ tōsāa̍, na̍a̍ ŋ̄ chō ā bɛ̄ɛ̄ndīa̍ŋ le̍ tōsāa̍.” Kɛ̍ mi̍ wānāā sōlīāā lāsa̍lāa̍ ā dīmūl ndu̍ āā, “ŋ̄ nyūna᷅ŋ ndɔ̄ fɛ̍ɛ̍ŋ Mɛ̄lɛ̄ka̍ dīōm a̍ ndi̍ o̍kɔ̄ɔ̄ fāllo̍.”

³⁷O̍ ko̍ŋ, mi̍ Sɔ̍ɔ̄ nyu̍nā Mɛ̄lɛ̄ka̍ dīōm āā, “Mɛ̄lɛ̄ka̍, bāā I̍ kɔ̍ mī kɔ̍ sɔ̍ŋgā a̍ Fīli̍i̍tīāŋnda̍? Ā kē ya̍ ni̍ŋ kpa̍a̍yāa̍ mī kɔ̍ yɔ̍m nda̍?” Kɛ̍ Mɛ̄lɛ̄ka̍ mūli̍ ndu̍ dīōm pāa̍le̍ le̍ŋ te̍.

³⁸Mi̍ Sɔ̍ɔ̄ lo᷅ o̍ ko̍ŋ mbo̍ dīmūl wāŋ bɛ̄ndūa̍a̍ I̍sɔ̄lūɛ̄ī āā, “Lā hu᷄ŋ mī ŋ̄ hu᷄ŋ wu̍u̍nūŋ kōllo̍, mī ŋ̄ sīna̍ yɔ̄ŋ wɔ̄ɔ̍ŋ na̍a̍ ŋ̄ tōsa̍ a̍ Mɛ̄lɛ̄ka̍ mbo̍ kɛ̄ɛ̄ na̍a̍ pāa̍le̍ hāūle᷅ŋ dīōm mūlī wo̍.

³⁹Ndu̍yɛ̍ wānā o̍ wānā na̍a̍ ŋ̄ sāālu̍ŋ pɛ̍ māā ndu̍ to̍sa̍ yɔ̄ŋ wɔ̄ɔ̍ŋ kōŋ ni̍, ā yɔ᷄ŋ bɛ̍ɛ̍ āā Chōna̍ta᷅ŋ po̍ nī pīɔ̍mndo̍ o̍ sɔ̍lā ni̍. Tē I̍ to̍sa̍ ke̍ŋ te̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍si̍ ya̍ nyɛ̄ pālāa̍ chōo̍.” Kɛ̍ wānā o̍ wānā su̍u̍ le̍.

⁴⁰Mi̍ Sɔ̍ɔ̄ di̍mūl I̍sɔ̄lūɛ̍i̍ya̍ kpo̍u̍ āā, “Nya̍ ki̍nɛ̍i̍ lā hīo̍u̍ ku̍mbūe̍i̍ pīlɛ̍, ya̍ ni̍, Chōna̍ta᷅ŋ po̍ nī ni̍ mī na̍a̍ ŋ̄ si᷄m kūmbūe̍i̍ pīlɛ̍i̍.” Mi̍ wāŋnda̍ dīmūl ndu̍ āā, “Nyɛ̄ o̍ nyɛ̄ ŋ̄ yīya̍ŋ pɛ̍ māā ō bɛ̄nda̍ to̍sa̍ fāllo̍.” O̍ ko̍ŋ, mi̍ Sɔ̍ɔ̄ nda̍ Chōna̍ta᷅ŋ po̍ ndɔ̄ nda̍ sīm nda̍ ŋi̍ɔ̍ɔ̍ŋ, I̍sɔ̄lūɛ̍i̍ya̍ kpo̍u̍ mi̍ nda̍ sīm ku̍ndā.

⁴¹Mi̍ Sɔ̍ɔ̄ pi̍ɛ̍ī Mɛ̄lɛ̄ka̍ mbo̍ dīmī āā, “Ōo̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍, I̍ ye̍e̍ma̍ mī si̍na̍ le̍ sa̍bū ŋ̄ kɛ̄ɛ̍ ya̍ pāa̍le̍ hāūle᷅ŋ dīōm mūlī wo̍. Tē ō wa̍ pɛ̍ māā yɔ̄ŋ wɔ̄ɔ̍ŋndo̍ na̍a̍ ŋ̄ tōsa̍ a̍ nūm ni̍, ŋ̄ yēēma̍ mī ŋ̄ sīna̍ wānā kpe̍e̍kpe̍i̍ to̍sa̍ yɔ̄ŋ wɔ̄ɔ̍ŋndo̍ ho̍ō wo̍. Ya̍ ni̍, chōna̍ta᷅ŋ po̍ nī ni̍ tē na̍a̍ tɛ̄ɛ̄ŋ yɔ̄ŋ wɔ̄ɔ̍ŋndo̍ ō chō ni̍, ɔ̄ɔ̄ tē I̍sɔ̄lūɛ̍i̍ya̍a̍ tu̍a̍ā ha̍ā o̍ cho̍ tɛ̄ɛ̄ŋ ni̍, tē ŋ̄ wūu̍ kōllo̍ ho̍ō pɛ̍, a̍ chɔ̍m na̍a̍ tāāmāsi̍o̍o̍.” Mɛ̄ɛ̍ nda̍ wūu̍ kōo̍ŋ, ma̍ sāālu᷄ŋ māā Sɔ̍ɔ̄ nda̍ Chōna̍ta᷅ŋ po̍ ndɔ̄ tɛ̍ɛ̄ŋ yɔ̄ŋ wɔ̄ɔ̍ŋndo̍ ō chō ni̍, māā I̍sɔ̄lūɛ̍i̍ya̍ si̍nā i̍sɔ̄ɔ̍ o̍ īsɔ̄ɔ̍ a̍ ndi̍ o̍kɔ̄ɔ̄ le̍.

⁴²O̍ ko̍ŋ kɔ̍ɔ̍lī, mi̍ Sɔ̍ɔ̄ di̍mūl wāŋ bānāā I̍sɔ̄lūɛ̍i̍ya̍ āā, “Lā wūūlu̍l na̍a̍ kōllo̍, ya̍ ni̍ Chōna̍ta᷅ŋ pɔ̍ nī ni̍ mī ŋ̄ sīna̍ wāna̍ to̍sa̍ yɔ̄ŋ wɔ̄ɔ̍ŋndo̍ ho̍ō wo̍.” Mɛ̄ɛ̍ nda̍ wūu̍ kōllo̍, ma̍ sāālu᷄ŋ māā Chōna̍ta᷅ŋ to̍sa̍ yɔ̄ŋ wɔ̄ɔ̍ŋndo̍ ni̍.

⁴³Mi̍ Sɔ̍ɔ̄ fi̍nyā ndɔ̄ nyu̍nā ndu̍ āā, “Chɔ̍m ya̍ nyɛ̄ ŋ̄ tōsa̍ wo̍.” Mi̍ Chōna̍ta᷅ŋ di̍mūl ndu̍ āā, “Mɛ̄ɛ̍ na̍a̍ ŋ̄ kōma̍l līa̍a̍ŋ yōndōo̍ ni᷄ŋ, yīa̍a̍ŋ mā wa̍ ya̍ nɛ̄īyo̍, mi̍ wo̍ū tīnda̍ wa̍ ya̍ o̍ bā wo̍ mi̍ so̍lī nyɛ̄ pɔ̄mbɔ̄ mi̍ di̍ā. Le̍la̍ŋ ā chē ya̍ I̍ bɛ̍ɛ̍ndi̍a̍ŋ mī sɔ̍la̍ pīɔ̍mndo̍.”

⁴⁴Mi̍ Sɔ̍ɔ̄ di̍mūl ndu̍ āā, “Chōna̍ta᷅ŋ, nūm fɔ̍ ma̍ tōsā he̍ī ā nɔ̄ mā sɔ̍la̍ pīɔ̍mndo̍, tē I̍ to̍sa̍ ko̍ŋ te̍ Mɛ̄lɛ̄ka̍ tūsi̍ ya̍ nyɛ̄ pālāa̍ chōo̍.”

⁴⁵Mi̍ wāŋnda̍ I̍sɔ̄lūɛ̄ī a̍ di̍mūl Sɔ̍ɔ̄ āā, “Ha̍lā ka̍ā kɛ̍ fāllo̍, kɛ̍ Chōna̍ta᷅ŋ o̍ sɔ̍lā pīɔ̍mndo̍ le̍ he̍ī le̍. Fo̍ndōle̍, ndu̍ chi̍i̍ndi̍a̍a̍ yōōmūlā I̍sɔ̄lūɛ̍i̍ya̍ pāa̍le̍ hāūle᷅ŋ Fīli̍i̍tīāŋnda̍ o̍ bā ni̍. Chōna̍ta᷅ŋ fɔ̍ mbo̍ nɔ̄lā mbo̍ sīmūl Fīli̍i̍tīāŋnda̍ ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ si᷅m ndu̍ kɔ̄ɔ̄lī mbo̍ kē ndu̍ kpāāyāā mbo̍ yām nda̍ mbo̍ chīīndīāā yōōmūlā nāāla̍ŋ, ŋ̄ mēna̍ŋ o̍ Mɛ̄lɛ̄ka̍ Ya̍a̍wɛ̄ɛ̄ po̍, ō cho̍ wɔ̍ pi̍ɔ̍mndo̍ sɔ̄lāa̍ le̍, kɛ̍ yīīŋnde̍ŋ lē pīlɛ̍ bɛ̍ɛ̍ le̍ ke̍ndīŋ ndu̍ o̍ lēbōl te̍.” O̍ ko̍ŋ, mi̍ wāŋnda̍ I̍sɔ̄lūɛ̄ī a̍ chi̍i̍ndīāā yōōmu̍ Chōna̍ta᷅ŋ ndo̍, ma̍ tōsā Sɔ̍ɔ̄ di̍i̍ lɛ̍ ndu̍ le̍.

⁴⁶O̍ ko̍ŋ, Sɔ̍ɔ̄ bɛ̍ɛ̍ ō hīu̍ lɛ̍ lāchī a̍ Fīli̍i̍tīāŋnda̍ tōūwɔ̄ɔ̍ le̍, mbo̍ fāŋa᷄ŋ nda̍ kɔ̄ɔ̄lī, mi̍ Fīli̍i̍tīāŋnda̍ mīīŋgū o̍ nda̍ lo̍.

⁴⁷Mɛ̄ɛ̍ Sɔ̍ɔ̄ si̍mnu᷄ŋ ma̍sāa̍, ya̍a̍mɔ̍ɔ̍wa̍a̍ ndāa̍ wa̍ nda̍ ā bālāā wa̍ ki̍nɛ̍i̍, wāŋnda̍ Mo̍wa̍bī ni̍, a̍ wāŋnda̍ A̍mɔ᷅ŋ a̍, wāŋnda̍ I̍dɔ̄m, a̍ Māsāā bɛ̍ndūa̍a̍ So̍bāā, a̍ wāŋnda̍ Fīli̍i̍tīāā mbo̍ sɔ̄ŋgā a̍ nda̍, ndu̍yɛ̍ nda̍ kpo̍u̍ mbo̍ yām nda̍. Bā o̍ bā Sɔ̍ɔ̄ ndu̍ o̍o̍ kɔ̍ a̍ sɔ̍ŋgɔ̄ɔ̍, yōmɔ̄ɔ̍ ndu̍ o̍o̍ ya᷅m ni̍.

⁴⁸Wānāā kpāāyāā bɛ̍ndūa̍a̍, nda̍ yɔ̍nūŋ māā Āma̍la̍kāi̍tīi̍ya̍ ni̍, nda̍ bɛ̍ɛ̍ mbo̍ nɔ̄lā mbo̍ sīmūl nda̍ o̍ kālā ka̍lā, ndu̍yɛ̍ mbo̍ yām nda̍. O̍ ko̍ŋ, I̍sɔ̄lūɛ̍i̍ya̍ ya̍a̍mɔ̍ɔ̍wa̍a̍ ndāa̍ wa̍ nda̍ dēlɔ̄ɔ̍ chōo̍ mā pūŋgā nyɛ᷅m nda̍ŋ nda̍, mi̍ Sɔ̍ɔ̄ pi̍ŋī yōōmūlā ndāla̍ŋ ya̍a̍mɔ̍ɔ̍wa̍a̍ ndāā ka̍ŋ o̍ bā.

⁴⁹Sɔ̍ɔ̄ ndu̍ o̍o̍ nɔ̍ chūāūwa̍ ā ŋūɛ̍ɛ̍nu̍, wāŋ pīāāndūa̍a̍ ā yāa̍ a̍ wāŋ lāāndūa̍a̍ ā ŋīɔ̍ɔ̍ŋ. Pūa̍a̍ ndūa̍a̍ ō pīlɔ̍ɔ̍ wa̍ Chōna̍ta᷅ŋ, ni̍ ō pīlɔ̍ɔ̍ dīōla̍ŋ āā I̍si̍vī, ō pīlɔ̍ɔ̍ āā Mālīki̍sūāā. Chūāā ndūāā wa᷅ŋ la̍a̍ndūa̍a̍ ō tāso̍o̍ dīōla̍ŋ āā Mɛ̍lu̍a̍bī, ō dīi̍ŋ ndɔ̄ɔ̍ āā Mi̍kāl.

⁵⁰La̍a̍ ndɔ̍ dīōla̍ŋ āā Āhīno̍wām, chūa̍ Āhi̍ma̍a̍sī wo̍. Wāna̍ wa̍ pūa̍a̍ ndūa̍a̍ chɔ̄ūwa̍ bōlle̍ŋ kpo̍u̍ wo̍ dīōlā ndɔ̄la̍ŋ āā A̍bi̍nā, po̍ Na᷅ wo̍. Ndu̍yɛ̍ Na᷅ ko̍ŋ nda̍ Ki̍sī fi̍nyāa̍ Sɔ̍ɔ̄, pɔ̄mbɔ̄ɔ̍ a̍ bɛ̄ndōo̍ wa̍ nda̍ wa̍ ni̍, fi̍nyā nda̍ wa̍ yɛ̄ A̍bīɛ̄ɛ̄ ni̍.

⁵¹

⁵²Chɔ̍ŋ a̍ te̍le̍ŋ Sɔ̍ɔ̄ o̍ si̍mnu᷄ŋ ma̍sāa̍ wo̍, ha̍a̍a̍ a̍ mɛ̄ɛ̄lu̍la̍ yōōmū ndɔ̄ɔ̍, sɔ̍ŋgɔ̄ɔ̍ wa̍ nda̍ tɛ̄ɛ̄ŋ ō kālā ka̍lā nda̍ Fīli̍i̍tīāŋnda̍. Nyɛ̄ ko̍ŋ tē ndu̍ o̍o̍ che᷅ pɛ̍ wa᷅na̍ sɔ̍ŋgā nu̍a̍ā sɔ̍ŋgā bɛ̄ndōo̍ wo̍, ɔ̄ɔ̄ wāna̍ si̍mūl nu̍a̍ā kɔ̄llo̍ le̍ sɔ̍ŋgɔ̄ɔ̍ wo̍, ō chūa̍ ndu̍ ō sīīŋgu̍u̍ ndu̍ so̍vɛ̄i̍nɔ̍ ndɔ̄.