Read Southern Kisi Sa̍a̍mi̍ɛ̍ɛ̄ Tāso̍o̍ 15 Bible Online

Sa̍a̍mi̍ɛ̍ɛ̄ Tāso̍o̍ 15 - Southern Kisi bible

Sa̍a̍mi̍ɛ̍ɛ̄ Tāso̍o̍ 15

¹Pa̍āle̍ pi᷅lɛ̍ mi̍ Sa̍a̍mi̍ɛ̍ɛ̄ di̍mūl Sɔ̍ɔ̄ āā, “Mɛ̄lɛ̄ka̍ Ya̍a̍wɛ̄ɛ̄ ndu̍ ve᷅m ya̍ ni̍ mi̍ su̍u̍ nu̍m chūɛ̄īya̍ŋ o̍ lēbōl le̍ mā wa̍ māsāa̍ wānāā ndūa̍a̍ chōo̍ I̍sɔ̄lūɛ̄ī. Le̍la̍ŋ ya̍ŋ ni᷅la̍ŋ mā tūēī nyɛ̄ Mɛ̄lɛ̄ka̍ Ya̍a̍wɛ̄ɛ̄ ko̍ŋ o̍ dīmi̍ wo̍.

²Ō dīmi̍ āā, ‘I̍ bɛ̍ɛ̍ndi̍a̍ŋ mī tu̍si̍ wāŋnda̍ A̍ma̍lɛ̍kī nyɛ̄ pālāa̍ bɛ̄ndōo̍ chōo̍, fo̍ndōle̍ le̍ nyɛ̄ fi̍nyāā ndāā ma̍māa̍ ā to̍sa̍ a̍ I̍sɔ̄lūɛ̍i̍ya̍ nɛ̄ī tɛ̍ɛ̄ŋ, bōōndi̍i̍ I̍sɔ̄lūɛ̍i̍ya̍ ā ma᷄l sīndɛ̄ I̍chi̍pī ma̍ wā hūnɔ̄ɔ̍ ve̍.

³Le̍la̍ŋ kɔ̍ mā kɔ̍ chi᷅ŋa̍la᷅ŋ Āma̍la̍kāi̍tīi̍ya̍ mā di̍u̍ nda̍ kpo̍u̍, ndu̍yɛ̍ nyɛ̄ o̍ nyɛ̄ nda̍ nɔ̄ mā tɛ̍ɛ̍mbu̍u̍ ndu̍ kpo̍u̍. Wānā o̍ wāna̍ cho̍ lo̍ŋ, wānā pɔ̍nɔ̍ ni̍, wānā la̍nɔ̍ ni̍, chūāāmbɔ̄ ni̍, chɛ̄lɛ̄kpɛ̍ cho̍ wūɛ̄ī ni̍, di̍u̍ nda̍ kpo̍u̍. O̍ ko̍ŋ kɔ̍ɔ̍lī nāū ni̍, sāā ni̍, sōfɛ̍lɛ̍ ni̍, nyɔ̍mi̍ ni̍, nda̍ bɛ̍ɛ̍ di̍u̍ nda̍ kpo̍u̍.’ ”

⁴O̍ ko̍ŋ, mi̍ Sɔ̍ɔ̄ chu̍u̍ŋgīāā so̍vɛ̄i̍ya̍a̍ ndūa̍a̍ kpo̍u̍ Tɛ̍lēm chi̍e̍e̍. O̍ ko̍ŋ kɔ̍ɔ̍lī mbo̍ chɔ̄m nda̍ mɛ̄ɛ̍ nda̍ wa̍ bōllē pīlɛ̍ yɛ̍. Pūa̍a̍ chɔ̄ūwa̍ I̍sɔ̄lūɛ̄ī, nda̍ wa̍ kpo̍u̍ kpo̍u̍ wāa̍la̍ŋ kɛ̄mɔ̄ɔ̍ lē dīi̍ŋ (200,000). Pūa̍a̍ Chu̍dā nda̍ wa̍ wāa̍la̍ŋ tɔ̍ (10,000).

⁵O̍ ko̍ŋ kɔ̍ɔ̍lī, mi̍ Sɔ̍ɔ̄ chu̍ā pūa̍a̍ ndūa̍a̍ chɔ̄ūwa̍ ma̍ kūā A̍ma̍lɛ̍kī chi̍e̍e̍ ma̍ kɔ̍ vi̍o̍ŋnu᷄ŋ o̍ pēmbo᷄ŋ tɛ̄ɛ̄ŋ.

⁶Mi̍ Sɔ̍ɔ̄ yɔ᷅ŋ dīōmnde̍ŋ nāa̍ Ke̍na̍na̍i̍tīi̍ya̍ chūā mbo̍ dīmūl nda̍ āā, “I̍ ye̍e̍ma̍ mī yōōmūlā nyāla̍ŋ lā tāmbu̍ le̍, le̍la̍ŋ lā fūla̍ Āma̍la̍kāi̍tīi̍ya̍ tɛ̄ɛ̄ŋ, yɔ̄ŋi̍ ya̍ I̍ mɔ̍sɔ̍ŋa̍ nya̍ dīū nya̍ nda̍ lātūlu̍, fo̍ndōle̍ bōōndi̍i̍ I̍sɔ̄lūɛ̍i̍ya̍ ma᷄l I̍chi̍pī ma̍ wā hūnɔ̄ɔ̍ ve̍, le̍ kɛ̄ndɛ̄i̍ fi̍nyāā nyāā ma̍māa̍ a̍ tōsa̍l nda̍ ve̍.” O̍ ko̍ŋ, mī Ke̍na̍na̍i̍tīi̍ya̍ fūlā Āma̍la̍kāi̍tīi̍ya̍ tɛ̄ɛ̄ŋ kpo̍u̍.

⁷O̍ ko̍ŋ kɔ̍ɔ̍lī, mi̍ Sɔ̍ɔ̄ kɔ̍ chi᷅ŋa̍la᷅ŋ wa᷅ŋnda̍ A̍ma̍lɛ̍kī a̍ sɔ̍ŋgɔ̄ɔ̍. Mɛ̄ɛ̍ nda̍ chu̍a̍ nda̍ Ha̍vi̍lā ka̍ū a̍ sɔ̍ŋgɔ̄ɔ̍, ma̍ lō kɔ̄la̍ŋ a̍ nda̍ ha̍a̍a̍ ma̍ fūūlūū a̍ nda̍ pɔ̍ɔ̍li̍ Si̍ɔ̍ɔ̄ chi̍e̍e̍, le̍ kɔ̄la̍ŋ o̍ pɛ̄ŋgu̍la̍ŋ o̍ lɛ̄ŋndē I̍chi̍pīle̍ŋ bā pāa̍le̍ŋ lē chāŋndo̍. Ndu̍yɛ̍ ma̍ yām wāŋnda̍ A̍ma̍lɛ̍kī.

⁸Wānā o̍ wāna̍ wa̍ lo̍ŋ, ma̍ dīū nda̍ kpo̍u̍. Wāna̍ nda̍ mɛ̄i̍ yōōmū ndu̍ pīlɛ̍ kpe̍ wo̍ mɛ̄ɛ̍ le̍ A̍ka̍kī māsā bɛ̍ndōo̍ le̍ A̍ma̍lɛ̍kī chi̍e̍e̍, kɛ̍ wānā o̍ wāna̍ wa̍ ni᷅ŋ lo̍ŋ ma̍ bāsū nda̍ tɛ̍ɛ̍.

⁹Kɛ̍ māsāa̍ A̍ka̍kī ndu̍ ndu̍, Sɔ̍ɔ̄ nda̍ pūa̍a̍ ndūa̍a̍ ā dīi̍ ndu̍ le̍. Ndu̍yɛ̍ vɛ̍lɛ̄ sāā kɛ̄ndɛ̄ kɛ̍ndīa̍a̍ wa̍ lo̍ŋ nda̍ ki̍nɛ̍i̍, a̍ nāūvāā chēlu̍lɛ̍i̍ya̍a̍ kɛ̍ndɛ̄ kɛ̍ndīa̍a̍, ā dīu̍ ka̍ŋ te̍. O̍ ko̍ŋ kɔ̍ɔ̍lī, nyɛ̄ o̍ nyɛ̄ kɛ̄ndɛ̍ wa̍ vɛ̄lɛ̄ lo̍ŋ, mu̍ŋ bɛ̍ɛ̍ ā tɛ̄ɛ̄mbu̍u̍ mu̍ŋ te̍. Nyɛ̄m nda̍ tɛ̄ɛ̄mbu̍u̍ wo̍ŋ mɛ̄ɛ̍ le̍ nyɛ̄m nda̍ chē māā mu̍ŋ mu̍ŋ ŋ̍ bɛ̍nda̍ le̍, māā nyɛ̄m fo̍ndo̍ŋ ŋ̍ cho̍ ni̍ wo̍ŋ.

¹⁰O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Sa̍a̍mi̍ɛ̍ɛ̄ āā,

¹¹“I̍ ta̍mbū kɔ̄l le̍ mɛ̄ɛ̍ ya̍ I̍ si̍i̍ŋgu̍u̍ Sɔ̍ɔ̄ māsāa̍ yɛ̍, fo̍ndōle̍, Sɔ̍ɔ̄ chɛ̍l mbō hīōū lāchī a̍ nyɛ̄ ya̍ I̍ di̍mu̍l ndu̍ wo̍ tōsāa̍ le̍. O̍ sōli̍ ya̍ dīōm.” Mɛ̄ɛ̍ Sa̍a̍mi̍ɛ̍ɛ̄ tu̍e̍ī nyɛ̄ Mɛ̄lɛ̄ka̍ dīmu̍l ndu̍ wo̍, mbo̍ tāmbū kɔ̄l, Īchɔ̄l kōŋ pi̍i̍ ō lɔ᷄l te̍ ō chō Mɛ̄lɛ̄ka̍ Ya̍a̍wɛ̄ɛ̄ pīɛ̄īyo̍.

¹²Mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍ īdīi̍yo̍ pu̍ŋ, mi̍ Sa̍a̍mi̍ɛ̍ɛ̄ pe̍nā chɔ̄nɔ᷄ŋ mbo̍ mālnu᷄ŋ vɛ̍lɛ̄ le̍ mbō kūɛ̄ nāa̍ Sɔ̍ɔ̄ chu̍a̍. Kɛ̍ ō kōma̍l sɔ̍ɔ̍l le̍. Mi̍ wāŋnda̍ dīmūl ndu̍ māā, Sɔ̍ɔ̄ kūɛ̄ Ka̍mɛ̄l chi̍e̍e̍ mbo̍ kɔ̍ ta̍ŋgūl nyɔ̄ɔ̍ lo̍ŋ māā lēsūŋgbu̍ le̍ mī wāŋnda̍ wa̍ lōōnɔ᷄ŋndo̍ a̍ ndu̍ o̍kɔ̄ɔ̄. O̍ ko̍ŋ kɔ̍ɔ̍lī, mbo̍ mālnu᷄ŋ mbo̍ kūā Ki̍lkāl.

¹³O̍ ko̍ŋ, mi̍ Sa̍a̍mi̍ɛ̍ɛ̄ ma̍lnu᷄ŋ mbo̍ kōmāl Sɔ̍ɔ̄ Ki̍lkāl. Dīmīo̍o̍ nu̍a̍ā mi̍ Sɔ̍ɔ̄ cha᷅ ndu̍ hūnɔ̄ɔ̍ mbo̍ kūā ndu̍ lāchī, mbo̍ kɔ̍ yi᷅l ndu̍ āā, “Mɛ̄lɛ̄ka̍ Ya̍a̍wɛ̄ɛ̄ o̍ dɔ̍u̍ nu̍m sa̍lā Sa̍a̍mi̍ɛ̍ɛ̄. Nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l la̍ I̍ chi̍i̍ tōsā.”

¹⁴Mi̍ Sa̍a̍mi̍ɛ̍ɛ̄ nyu̍nā ndu̍ āā, “Kɛ̍ Sāa̍ yɛ̄ɛ̄ ya̍ I̍ cho̍ yɛ̄ ha̍ā tūēīyɔ̄ɔ̍ cha᷄ŋndo̍ ya̍ o̍ lānī, a̍ nāūwa̍?”

¹⁵Mi̍ Sɔ̍ɔ̄ di̍mī āā, “Chɔ̄lūāā pūa̍a̍ nīa̍a̍ chɔ̄ūwa̍ ā pōōndi̍a̍a̍ Āma̍la̍kāi̍tīi̍ya̍ o̍ bā ma̍ hūŋ a̍ nda̍ wa̍. Pūa̍a̍ nīa̍a̍ hīŋ a̍ sāā kɛ̍ndɛ̄ kɛ̍ndīa̍a̍ ā ti᷄ŋ a̍ nāūwa̍ le̍ sa̍lāla̍ŋ sōlīo̍o̍ o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūmndo̍ lo̍. Kɛ̍ chɔ̄lūāā tūa̍a̍ kpo̍u̍, ŋ̄ chīi̍ ka̍ŋ di̍ū.”

¹⁶Mi̍ Sa̍a̍mi̍ɛ̍ɛ̄ di̍mūl ndu̍ āā, “Chi̍ī bɛ̍ɛ̍ di̍mī le̍! Ya̍ŋ ndɔ̍ ni᷅la̍ŋ, mā tūēī nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l la̍ chɔ̍chɔ̄l lo̍.” Mi̍ Sɔ̍ɔ̄ di̍mī āā, “Mɛ̄ɛ̍ di̍mu̍l la̍ nyɛ̄ o̍ di̍mi̍ wo̍.”

¹⁷Mi̍ Sa̍a̍mi̍ɛ̍ɛ̄ di̍mūl ndu̍ āā, “Mi̍ chē bɛ̍ɛ̍ mi̍ nūm o̍o̍ chu̍a̍nu᷄ŋ o̍ pɔ̍mbɔ̄, kɛ̍ nūm Mɛ̄lɛ̄ka̍ o̍ hɛ̄li̍ ni̍ mbo̍ hāndū nu̍m yu̍ŋgu̍la̍ŋ I̍sɔ̄lūɛ̍i̍la̍ŋ kpo̍u̍ bɔ̍lle̍ŋ. Nūm Mɛ̄lɛ̄ka̍ Ya̍a̍wɛ̄ɛ̄ o̍ su̍u̍ chūɛ̄īya̍ŋ o̍ lēbōl ni̍ le̍ mā wa̍ māsāa̍ I̍sɔ̄lūɛ̄ī.

¹⁸Mɛ̄lɛ̄ka̍ Ya̍a̍wɛ̄ɛ̄ o̍ lo̍ o̍ ko̍ŋ mbo̍ dīmūl nu̍m āā, ‘Kɔ̍ mā kɔ̍ tɛ̍ɛ̍mbūū wānāā dɛ̍nɛ̍ wɔ̍ɔ̍ŋnda̍ ha̍ā, nda̍ yɔ̄nu᷄ŋ ni̍ māā Āma̍la̍kāi̍tīi̍ya̍. Kɔ̍ de᷅l nda̍ chōo̍, mā lo̍ sɔ̍ŋgɔ̄ɔ̍ a̍ nda̍ mā chi̍i̍ nda̍ kpo̍u̍.’

¹⁹Vɛ᷅ ma̍ sōlī Mɛ̄lɛ̄ka̍ Ya̍a̍wɛ̄ɛ̄ dīōm a̍ ku̍e̍ o̍ dīōm ndɔ̄ɔ̍ chōo̍ le̍? Le̍ yɛ̄ɛ̍nɛ̍ ŋ̄ pūŋga̍ yɛ̄ nyɛ̄m Mɛ̄lɛ̄ka̍ dīmu̍l nu̍m mu᷅ŋ māā tɛ̍ɛ̍mbu̍u̍ mu̍ŋ ndo̍ŋ ma̍ hūŋ a̍ mu̍ŋ? Le̍ nyɛ̄ ŋ̄ tōsa̍ ho̍ō wo̍, Mɛ̄lɛ̄ka̍ Ya̍a̍wɛ̄ɛ̄ o̍ ta̍mbū kɔ̄l a̍ nūm.”

²⁰Mi̍ Sɔ̍ɔ̄ lɔ̍ o̍ ko̍ŋ mbo̍ dīmūl Sa̍a̍mi̍ɛ̍ɛ̄ āā, “I̍ chi̍i̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l la̍ wo̍ tōsā. Ō vēm ya̍ mi̍ ku̍ā, ndu̍yɛ̍ mi̍ kɔ̍ to̍sā mɛ̄ɛ̍ o̍ di̍mi̍ yɛ̍. Ō fūla̍ o̍ māsāa̍ A̍ka̍kī, kɔ̍ɔ̍lī, mi̍ hu᷅ŋ a̍ ndu̍, Āma̍la̍kāi̍tīi̍ya̍a̍ tu̍a̍a̍ kpo̍u̍ I̍ chi̍i̍ nda̍ dīū.

²¹Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ di̍mu̍l la̍ māā nyɛ̄ o̍ nyɛ̍ cho̍ lo̍ŋ māā ya̍ I̍ tɛ̍ɛ̍mbu̍u̍ mu̍ŋ kpo̍u̍, kɛ̍ mi̍ pūa̍a̍ nīa̍a̍ chūā sāā kɛ̍ndɛ̄ kɛ̍ndīa̍a̍ a̍ nāūwa̍, mi̍ ŋ̄ hūŋ a̍ nda̍ le̍ sa̍lāla̍ŋ sōlīo̍o̍ o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūmndo̍ lo̍, Ki̍lkāl chi̍e̍e̍ na̍nu᷄ŋ.”

²²Mi̍ Sa̍a̍mi̍ɛ̍ɛ̄ lo᷅ o̍ ko̍ŋ mbo̍ dīmūl ndu̍ āā, “Sa̍lāa̍ sōlīo̍o̍ o̍ Mɛ̄lɛ̄ka̍ lo̍, o̍ ko̍ŋ kɔ̍ɔ̍lī, mā chu̍u̍ ndu̍ nyɔ̄ɔ̍ŋ, a̍ nyɛ̄ o̍ di̍mūl nu̍m ndo̍ tōsāa̍ ō yɛ̄ɛ̍nɛ̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍o̍ū yɛ̄ yēēmā? I̍ di̍mūl lɔ̍ nu̍m Sɔ̍ɔ̄, nyɛ̄ Mɛ̄lɛ̄ka̍ dīmūl nu̍m ndo̍ tōsāa̍ ō bɛ̄nda̍ mbo̍ hīāū sa̍lāa̍ sōlīo̍o̍. Ō na᷄ŋ mī wānā ya̍ŋ nīla̍ŋ o̍ nyɛ̄ Mɛ̄lɛ̄ka̍ dīmūl nu̍mndo̍ mbo̍ hīāū a̍ sa̍lāa̍ sōlīo̍o̍ o̍ ndu̍ lo̍ a̍ sāā kɛ̍ndɛ̄ kɛ̍ndīa̍a̍.

²³Kāni̍ fo̍ndōle̍, Mɛ̄lɛ̄ka̍ dīōmndo̍ sōlīo̍o̍ yɔ̄ŋ wɔ̄ɔ̍ŋ ko̍ŋ ō chō ko̍ mɛ̄ɛ̍ yɔ̄ŋ wɔ̄ɔ̍ŋ lēkūēīyo̍ ō chō nu̍a̍ā yɛ̍. Le̍nde̍ ko̍ i̍ cho̍ a̍ yōŋgāa̍ tōsāa̍ ni̍. Yōŋgāa̍ tōsāa̍ yɔ̄ŋ wɔ̄ɔ̍ŋ kōŋ ō chō ko̍ mɛ̄ɛ̍ yɔ̄ŋ wɔ̄ɔ̍ŋ sōōlāā nyɛ̄m chēle̍ŋndo̍ ō chō yɛ̍. Lē kɛ̄ɛ̄ ŋ̄ kɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ dīōm ndo̍, nūm bɛ̄ɛ̄ ō kɛ̄ɛ̍ nu̍m o̍ lēmāsā I̍sɔ̄lūɛ̄ī.”

²⁴Mi̍ Sɔ̍ɔ̄ di̍mūl Sa̍a̍mi̍ɛ̍ɛ̄ āā, “I̍ chɛ̍ I̍ to̍sa̍ yɔ̄ŋ wɔ̄ɔ̍ŋndo̍, fo̍ndōle̍, nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l la̍ le̍ tōsāa̍ wo̍, I̍ to̍sa̍ ndu̍ le̍. Sīlālā ŋ̄ sīla̍ ya̍ la̍ŋ, I̍ chu̍e̍ la̍ŋ te̍. Sīōōŋnde̍ wa̍ ya̍ le̍ pūa̍a̍ nīa̍a̍ ni̍ nyɛ̄ ko̍ŋ to̍sa̍ ni̍ mi̍ to̍sā nyɛ̄ nda̍ dīmu̍l la̍ wo̍.

²⁵Le̍la̍ŋ yāndi̍i̍ ma̍l la̍ le̍ yɔ̄ŋ nī wɔ̍ɔ̍ŋndo̍. Ŋ̄ mīīŋgu̍ Ki̍lkāl mī kɔ̍ so̍o̍lūū Mɛ̄lɛ̄ka̍ Ya̍a̍wɛ̄ɛ̄.”

²⁶Kɛ̍ mi̍ Sa̍a̍mi̍ɛ̍ɛ̄ di̍mūl ndu̍ āā, “ŋ̄ cho̍ mi̍i̍ŋgū na̍a̍ nūm te̍, fo̍ndōle̍ le̍ kɛ̄ɛ̍ ŋ̄ kɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ dīōm ndo̍. Ndu̍yɛ̍ nūm bɛ̍ɛ̍ chɔ̍ŋ a̍ hāū Mɛ̄lɛ̄ka̍ Ya̍a̍wɛ̄ɛ̄ o̍ kɛ̍ɛ̍ nu̍m o̍ lēmāsā I̍sɔ̄lūɛ̄ī.”

²⁷O̍ ko̍ŋ kɔ̍ɔ̍lī, mi̍ Sa̍a̍mi̍ɛ̍ɛ̄ mu̍li᷄ŋ le̍ kɔ᷄ŋnda̍ŋ. Mūli᷄ŋndo̍ kɔ̄la̍ŋ, mi̍ Sɔ̍ɔ̄ sa̍ā ndu̍ dōmāa̍ a̍ mākɔ̄ɔ̄, mi̍ dōmāa̍ sɛ̄ɛ̄sā.

²⁸Mi̍ Sa̍a̍mi̍ɛ̍ɛ̄ lo᷅ o̍ ko̍ŋ, mbo̍ dīmūl ndu̍ āā, “Mɛ̄lɛ̄ka̍ Ya̍a̍wɛ̄ɛ̄ o̍ pu̍u̍ nu̍m hāū ma̍sāle̍ŋ I̍sɔ̄lūɛ̄ī o̍ bā mbo̍ kē cha᷄ŋ nu̍m nya̍ chīɛ̄ɛ̄li̍āŋ ndo̍, o̍ bɛ̍nda̍ mbo̍ hīāū nu̍m ndo̍.

²⁹Ndu̍yɛ̍ I̍sɔ̄lūɛ̍i̍ya̍ Mɛ̄lɛ̄ka̍ nda̍ cho̍ o̍ nāŋɔ̄ɔ̄ bɛ̄ndōo̍ ni᷄ŋ ndo̍, ō cho̍ wa᷅na̍ di̍mi̍ īsɔ̄ɔ̍ mbō fa̍a̍ŋ le̍cho̍ō le̍, fo̍ndōle̍ ndu̍ cho̍ mɛ̄ɛ̍ wāna̍ chi̍o̍o̍ ō chō yɛ̍ le̍. Ndu̍ ndu̍ tē ō dīmi̍ sūɛ̍i̍ pɛ̍ lōo̍ o̍ lo᷅ le̍cho̍ō ni̍.”

³⁰O̍ ko̍ŋ kɔ̍ɔ̍lī, mi̍ Sɔ̍ɔ̄ di̍mī āā, “Tōnya̍ i̍ cho̍ ni̍, I̍ to̍sa̍ yɔ̄ŋ wɔ̄ɔ̍ŋndo̍ a̍ Mɛ̄lɛ̄ka̍. Kɛ̍ yāndi̍i̍ ke̍ ya̍ bɛ̄ɛ̄le̍ŋ wāŋ bɛ̄ndūa̍a̍ I̍sɔ̄lūɛ̄ī o̍ hɔ̄l a̍ I̍sɔ̄lūɛ̍i̍ya̍ tu̍a̍a̍. Ŋ̄ mīīŋgu̍ mī kɔ̍ so̍o̍lūū Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūmndo̍.”

³¹O̍ ko̍ŋ, mi̍ Sa̍a̍mi̍ɛ̍ɛ̄ chɛ᷅l ma̍ mīīŋgū nda̍ Sɔ̍ɔ̄, mi̍ Sɔ̍ɔ̄ kɔ̍ so̍o̍lūū Mɛ̄lɛ̄ka̍ Ya̍a̍wɛ̄ɛ̄.

³²O̍ ko̍ŋ kɔ̍ɔ̍lī, mi̍ Sa̍a̍mi̍ɛ̍ɛ̄ di̍mī āā, “Lā kɔ̍ hu᷅ŋ a̍ Māsāa̍ A̍ka̍kī, māsā Āma̍la̍kāi̍tīi̍ya̍ na̍nu᷄ŋ.” O̍ ko̍ŋ, ma̍ kɔ̍ hu᷅ŋ a̍ māsāa̍ A̍ka̍kī, yɔ̄lɔ̍ŋ wa̍ ndu̍ ŋ̄ yīyāā o̍ lābā. Kɛ̍ sīōōŋīī ve̍ ndu̍ le̍, mbo̍ dīmī o̍ kɔ̄l ni᷄ŋ āā, “I̍ si̍nā māā te̍le̍ŋ nda̍ āā nɔ̍ le̍ ya̍ dīyɔ̄ɔ̍ wo̍ hīōū ni᷅ŋ, ā di̍ī lɛ̍ ya̍ le̍.”

³³Kɛ̍ mi̍ Sa̍a̍mi̍ɛ̍ɛ̄ di̍mūl ndu̍ āā, “Mɛ̄ɛ̍ mūɛ̄ī nu̍m īfāŋnde̍ to̍sa̍ mi̍ wāŋ lāāndūāā bɔ̍ɔ̍ bɔ̍ɔ̍ a̍ lo᷅ kɔ̄ɔ̄lā fo̍ndō ā nɔ̍ lɛ̍ hāū ŋ̄chūāū le̍ yɛ̍, le̍nde̍ kālā nu̍m chō lō kɔ̄ɔ̄ fo̍ndō.” O̍ ko̍ŋ, mi̍ Sa̍a̍mi̍ɛ̍ɛ̄ di̍ī māsāa̍ A̍ka̍kī, o̍ ko̍ŋ kɔ̍ɔ̍lī, mbo̍ kīlī kīlī ndu̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l Ki̍lkāl chi̍e̍e̍ lo̍ŋ.

³⁴O̍ ko̍ŋ kɔ̍ɔ̍lī, mi̍ Sa̍a̍mi̍ɛ̍ɛ̄ mi̍i̍ŋgu᷄ŋ Lu̍a̍mā chi̍e̍e̍. Sɔ̍ɔ̄ bɛ̍ɛ̍ mbo̍ mīīŋgu᷄ŋ o̍ ndu̍ lo̍ Ki̍bīāā.

³⁵Ndu̍yɛ̍ Sa̍a̍mi̍ɛ̍ɛ̄ vi᷅ ni᷅ŋ le̍nde̍, ā chīīki̍āŋ ndɛ̍ nda̍ Sɔ̍ɔ̄ le̍. Kɛ̍ mi̍ Sa̍a̍mi̍ɛ̍ɛ̄ bi̍ī mɔ̍nɛ̍i̍ o̍ kɔ̄l ndɔ̄ɔ̍ ni᷄ŋ ta̍u̍ le̍ Sɔ̍ɔ̄. Mɛ̄lɛ̄ka̍ Ya̍a̍wɛ̄ɛ̄ bɛ̍ɛ̍ mbo̍ tāmbū kɔ̄l le̍ mɛ̄ɛ̍ o̍ si̍i̍ŋgu̍u̍ Sɔ̍ɔ̄ māsāa̍ yɛ̍.