Read Southern Kisi Sa̍a̍mi̍ɛ̍ɛ̄ Tāso̍o̍ 16 Bible Online

Sa̍a̍mi̍ɛ̍ɛ̄ Tāso̍o̍ 16 - Southern Kisi bible

Sa̍a̍mi̍ɛ̍ɛ̄ Tāso̍o̍ 16

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Sa̍a̍mi̍ɛ̍ɛ̄ āā, “Sa̍a̍mi̍ɛ̍ɛ̄, ɔ̍ɔ̄ le̍ sa̍bū ŋ̄ chō wɔ̄ hīōūwɔ̄ɔ̍ lāchī kɛ᷅ a̍ mɔ̍nɛ̍i̍ bīyɔ̄ɔ̍ le̍ Sɔ̍ɔ̄ wo̍? A̍ si̍nā nu̍a̍ā māā I̍ kɛ̍ɛ̍ Sɔ̍ɔ̄ o̍ lēmāsā I̍sɔ̄lūɛ̄ī le̍? Dɔ̍u̍ ni̍ko̍ chu̍ɛ̍i̍mā Ɔ̄li̍fīi̍ya̍ŋ o̍ lēē nūmndo̍ ni᷄ŋ mā kūɛ̄ Bɛ̍ti̍lɛ̍hɛ̄m, nāa̍ po̍ pi᷅lɛ̍ chūā dīōla̍ŋ āā Chɛ̄ɛ̍se̍. I̍ hɛ̍li̍ po̍ ndɔ̄ɔ̍ ō pīlɛ̍ o̍ pūa̍a̍ ndūa̍a̍ tɛ̄ɛ̄ŋ le̍ mbō wa̍ māsā bɛ̍ndōo̍ I̍sɔ̄lūɛ̄ī.”

²Kɛ̍ mi̍ Sa̍a̍mi̍ɛ̍ɛ̄ di̍mī āā, “Mī vɛ̄ɛ̄ ya̍ I̍ lo̍o̍kū yɛ̄ ndi̍ tōsā? Tē Sɔ̍ɔ̄ tu̍e̍ī a̍ ndi̍ o̍kɔ̄ɔ̄ pɛ̍ ō dīī ya̍.” Mi̍ Mɛ̄lɛ̄ka̍ Ya̍a̍wɛ̄ɛ̄ lo᷅ o̍ ko̍ŋ, mbo̍ dīmūl ndu̍ āā, “Tē a̍ wa̍ kɔ̄la̍ŋ pɛ̍, ā bīī nāū fɔ̍ŋndɔ̍ɔ̍ ā kūɛ̄ a̍ ndu̍ o̍ bā. Tē ā kūɛ̄ pɛ̍ a̍ di̍mi̍ āā, ‘Sa̍lāa̍ ya̍ I̍ hi᷅ŋ sōlī o̍ Mɛ̄lɛ̄ka̍ lo̍ ni̍.’

³O̍ ko̍ŋ kɔ̍ɔ̍lī, mā ve̍e̍lu̍ Chɛ̄ɛ̍se̍ o̍ sa̍lā kālāa̍ sōlīo̍o̍. I̍ cho̍ nu̍m chɔ̄m nyɛ̄ ŋ̄ nɔ̄ le̍ tōsāa̍ wo̍. Wāna̍ ya̍ I̍ cho̍ nu̍m chɔ̄m ndo̍, a̍ ta̍la̍ ndu̍ chūɛ̄īya̍ŋ o̍ lēbōl. Ndu̍ cho̍ wā māsā bɛ̍ndōo̍ le̍ I̍sɔ̄lūɛ̄ī ni̍.”

⁴O̍ ko̍ŋ, mi̍ Sa̍a̍mi̍ɛ̍ɛ̄ to̍sā nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ wo̍. Mbo̍ mālnu᷄ŋ mbo̍ kūā Bɛ̍ti̍lɛ̍hɛ̄m. Mɛ̄ɛ̍ o̍ fu̍u̍lu̍u̍, mi̍ wāŋ bɛ̄ndūāā chi̍e̍e̍ya̍ kōōndi̍āŋ kpo̍u̍ ma̍ kūā nāa̍ ndu̍ chu̍a̍ a̍ nyīīyāa̍, kpa᷅kpā. Ma̍ nyūnā ndu̍ āā, “Vɛ᷅ hūnɔ̄ɔ̍ ho̍ō fāllo̍? Hūnɔ̄ɔ̄ īsɔ̄ɔ̍ ni̍?”

⁵Mi̍ Sa̍a̍mi̍ɛ̍ɛ̄ di̍mī āā, “Ō cho̍ hu̍nɔ̄ɔ̄ īsɔ̄ɔ̍ le̍. Sa̍lāa̍ ko̍ ya̍ I̍ hi᷅ŋ sōlī o̍ Mɛ̄lɛ̄ka̍ Ya̍a̍wɛ̄ɛ̄ lo̍ ni̍. Le̍la̍ŋ lā dīndi̍ nya̍ pi̍la̍ Mɛ̄lɛ̄ka̍ o̍ hɔ̄l mī ŋ̄ kūɛ̄nūŋ na̍a̍ nya̍ā le̍ sa̍lāa̍ sōlī.” O̍ ko̍ŋ kɔ̍ɔ̍lī, mi̍ Sa̍a̍mi̍ɛ̍ɛ̄ di̍mūl Chɛ̄ɛ̍se̍ nda̍ pūa̍a̍ ndūa̍a̍ ma̍ dīndī nda̍ pi̍la̍ Mɛ̄lɛ̄ka̍ o̍ hɔ̄l, o̍ ko̍ŋ kɔ̍ɔ̍lī mbo̍ vēēlū nda̍ nāa̍ o̍ wa̍ ka̍ŋ sa̍lāa̍ sōlīo̍o̍ wa̍.

⁶Mɛ̄ɛ̍ nda̍ fūūlu̍u̍, mi̍ Sa̍a̍mi̍ɛ̍ɛ̄ cha᷅ Ɛ̄li̍a̍a̍bī po̍ Chɛ̄ɛ̍se̍ wo̍ ō pīlɔ̍ɔ̍. Mbo̍ dīmī o̍ kɔ̄l ni᷄ŋ āā, “I̍ la̍a̍la̍ŋ māā ho̍ō Mɛ̄lɛ̄ka̍ Ya̍a̍wɛ̄ɛ̄ hɛ̍li̍ ni̍.”

⁷Kɛ̍ Mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Sa̍a̍mi̍ɛ̍ɛ̄ āā, “To̍fā le̍ mɛ̄ɛ̍ o̍ na̍nu᷄ŋ ndu̍yɛ̍ mbo̍ bāndū yɛ̍ le̍. Ō cho̍ ndu̍ le̍ ya̍ I̍ hɛ̍li̍ le̍. Ya̍ Mɛ̄lɛ̄ka̍ Ya̍a̍wɛ̄ɛ̄, ō cho̍ mɛ̄ɛ̍ wāŋndā chīe̍e̍ya̍ nda̍ chā sɔ̍ɔ̍ŋ yɛ̍ le̍ ya̍ I̍ cha᷅ mu̍ŋ te̍. Wāŋndā chīe̍e̍ya̍ nda̍ o̍ kɔ̄ɔ̍ ko̍ nda̍ tōfā ni̍, kɛ̍ ya̍ Mɛ̍lɛ̄ka̍ o̍ kɔ̄llo̍ ni᷄ŋ di̍ ya̍ to̍fā ni̍.”

⁸O̍ ko̍ŋ kɔ̍ɔ̍lī, mi̍ Chɛ̄ɛ̍se̍ ve̍e̍lū Ābi̍na̍dāā, po̍ ndɔ̄ɔ̍ pīlɔ̄ɔ̍, mbo̍ sīmī ndu̍ Sa̍a̍mi̍ɛ̍ɛ̄ lāchī. Mi̍ Sa̍a̍mi̍ɛ̍ɛ̄ di̍mī āā, “Ɛ̄ ɛ̍, ndu̍ bɛ̍ɛ̍ ō cho̍ ndu̍ le̍ Mɛ̄lɛ̄ka̍ Ya̍a̍wɛ̄ɛ̄ o̍ hɛ̍li̍ le̍.”

⁹O̍ ko̍ŋ kɔ̍ɔ̍lī, mi̍ Chɛ̄ɛ̍se̍ ve̍e̍lū vɛ̄lɛ̄ Si̍a̍māā mbo̍ sīmī ndu̍ Sa̍a̍mi̍ɛ̍ɛ̄ lāchī. Mi̍ Sa̍a̍mi̍ɛ̍ɛ̄ di̍mūl ndu̍ āā, “Ho̍ō bɛ̍ɛ̍ ō cho̍ ndu̍ le̍ Mɛ̄lɛ̄ka̍ Ya̍a̍wɛ̄ɛ̄ hɛ̍li̍ le̍.”

¹⁰Mi̍ Chɛ̄ɛ̍se̍ lo᷅ pūa̍a̍ ndūa̍a̍ sīmīo̍o̍ le̍nde̍ Sa̍a̍mi̍ɛ̍ɛ̄ o̍ hɔ̄l ma̍ kūā ā ŋɔ᷄mmɛ̍ū. Kɛ̍ mi̍ Sa̍a̍mi̍ɛ̍ɛ̄ di̍mūl ndu̍ āā, “Ha̍ā ki̍nɛ̍i̍ ō cho̍ nda̍ le̍.”

¹¹Mi̍ Sa̍a̍mi̍ɛ̍ɛ̄ lo᷅ o̍ ko̍ŋ mbo̍ nyūnā ndu̍ āā, “A̍ nɔ̍ lɛ̍ po̍ o̍ po̍ che̍le̍ŋ te̍?” Mi̍ Chɛ̄ɛ̍se̍ di̍mī āā, “Pɔ̄mbɔ̄ ndā lu᷅mndo̍ chō, kɛ̍ ndu̍ cho̍ sāa̍ īkɛ̄i̍ yo̍ndōo̍ ni᷄ŋ.” Mi̍ Sa̍a̍mi̍ɛ̍ɛ̄ di̍mī āā, “Mɛ̄ɛ̍ lā vēēlu̍ ndu̍. Mɛ̄ɛ̍ mbō hīŋ ma̍lāŋ na̍a̍ ŋ̄ tōsā nyɛ᷅ o̍ nyɛ̄.”

¹²O̍ ko̍ŋ, mi̍ Chɛ̄ɛ̍se̍ vīām wānā ma̍ kɔ̍ ve̍e̍lū Dēēve̍. Dēēve̍ yɛ̍ nāŋɔ̄ɔ̍ pīla̍ ndu̍ o̍o̍ na̍nu᷄ŋ ni̍. Kɔ̄ɔ̍le̍ ndɔ̄le̍ŋ lē dīāndāā wa̍la̍ŋ. Hɔ̄lta̍ŋ ndu̍ ta̍fūlāā nu̍a̍ā. Mɛ̄ɛ̍ Dēēve̍ fu̍u̍lu̍u̍, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Sa̍a̍mi̍ɛ̍ɛ̄ āā, “Ndu̍ cho̍ ho̍ō ni̍. Chɔ̍ŋ mā ta̍la̍ ndu̍ chūɛ̄īya̍ŋ o̍ lēbōl.”

¹³Mi̍ Sa̍a̍mi̍ɛ̍ɛ̄ chu̍ā lēē ndɔ̍ chūɛ̄īmā ɔ̍li̍fīi̍ yo̍ wo̍ mbo̍ tālā Dēēve̍ chūɛ̄īya̍ŋ o̍ lēbōl bɛ̄ndāā ndūa̍a̍ o̍ hɔ̄l lo̍ŋ. Ndu̍yɛ̍ dīmīo̍o̍ nu̍a̍ā mbo̍ tālā ndu̍ chūɛ̄īya̍ŋ o̍ lēbōl, mi̍ nyi̍na̍ Mɛ̄lɛ̄ka̍ Ya̍a̍wɛ̄ɛ̄ wo̍ ō tūāl bɛ̍ɛ̍ Dēēve̍ kɔ̄ɔ̄lī a̍ kpāāyā bɛ̍ndōo̍. Chɔ̍ŋ ni᷅ŋ a̍ bōōndi̍i̍ ke̍ŋ, nyi̍na̍ Mɛ̄lɛ̄ka̍a̍ wa̍ Dēēve̍ kɔ̄ɔ̄lī. O̍ ko̍ŋ kɔ̍ɔ̍lī, mi̍ Sa̍a̍mi̍ɛ̍ɛ̄ mi̍i̍ŋgū o̍ ndu̍ lo̍ Lu̍a̍mā chi̍e̍e̍.

¹⁴Kɛ̍ Sɔ̍ɔ̄ ndu̍ ndu̍ mi̍ nyi̍na̍ Mɛ̄lɛ̄ka̍ Ya̍a̍wɛ̄ɛ̄ wo̍ fāŋa᷄ŋ ndu̍ kɔ̄ɔ̄lī. Mi̍ Mɛ̄lɛ̄ka̍ Ya̍a̍wɛ̄ɛ̄ to̍sā mi̍ nyi̍nā wɔ̄ɔ̍ŋndo̍ tūāl ndu̍ kɔ̄ɔ̄lī mbo̍ wā ndu̍ pāālīa̍ŋndo̍.

¹⁵Pāa̍le̍ pi᷅lɛ̍, mi̍ bu̍ɛ̍i̍yāa̍ Sɔ̍ɔ̄ wa̍ dīmūl Sɔ̍ɔ̄ āā, “Fāllo̍, nyi̍nā wɔ̄ɔ̍ŋ Mɛ̄lɛ̄ka̍ tōsa̍ ho̍ō mbo̍ tūāl nu̍m kɔ̄ɔ̄lī wo̍ ō chō nu̍m pāālīa̍ŋndo̍ bɔ̄ɔ̍.

¹⁶Le̍la̍ŋ di̍mu̍l na̍a̍ ŋ̍ cho̍ nu̍m wa̍llo̍ o̍ bā wa̍ ki̍nɛ̍i̍ ŋ̄ kūā mī ŋ̄ kɔ̍ nu̍u̍vīāl nu̍m wāna̍ cha̍ā to̍wāa̍ lɔ̄ɔ̍ nyɛ̄ kɛ̄ndɛ̍ī yo̍. O̍ ko̍ŋ, tē nyi̍nā wɔ̄ɔ̍ŋndo̍ hīnu̍l nu̍m ni᷅ŋ pɛ̍, ō lɔ̄ɔ̄ tōwāa̍, nyi̍nā wɔ̄ɔ̍ŋ kōŋ fāŋāŋ nu̍m kɔ̄ɔ̄lī a̍ mi̍i̍ŋgu̍ o̍ nūm pi̍la̍ ni̍ŋ.”

¹⁷Mi̍ Sɔ̍ɔ̄ di̍mī āā, “Lā nūūvi̍a̍a̍ wa᷅na̍ cha̍ā to̍wāa̍ lɔ̄ɔ̍ nyɛ̄ kɛ̄ndɛ̍ī yo̍ mī lā chu̍u̍ ya̍ ndu̍.”

¹⁸Mi̍ bu̍ɛ̍ī ndɔ̄ɔ̍ pīlɛ̍ dīmī āā, “Po̍ pi᷅lɛ̍ chō Bɛ̍ti̍lɛ̍hɛ̄m mā vēēlū ndu̍ āā Chɛ̄ɛ̍se̍, ō nɔ̄ pōo̍, nyɛ̄ chāa̍ pi̍la̍ o̍ cha̍ā lɔ̍ɔ̍ ni̍. Ō nɔ̍ vɛ̄lɛ̄ īsīōōŋ te̍. Po̍ chu̍ā pīāāndū kɛ̄ndɔ̄ɔ̍ pīla̍ o̍ cho̍ ni̍. Ndu̍yɛ̍ wāna̍ kɛ̄ndɛ̄ kɛ̍ndɛ̄ o̍ cho̍ ni̍. Ō chāā vɛ̍lɛ̄ sūɛ̍i̍. Ndu̍yɛ̍, Mɛ̄lɛ̄ka̍ Ya̍a̍wɛ̄ɛ̄ cho̍ ndu̍ kɔ̄ɔ̄lī.”

¹⁹O̍ ko̍ŋ, mi̍ Sɔ̍ɔ̄ vi̍ām Ki̍i̍la̍nɔ̍ɔ̍ nāa̍ Chɛ̄ɛ̍se̍ chu̍a̍. Mbo̍ dīmūl Chɛ̄ɛ̍se̍ āā, “Yɔ̍ŋ ndɔ̍ ya̍ Dēēve̍ po̍ nu̍m, o̍ cho̍ sāa̍ īkɛ̄i̍ yo̍.”

²⁰O̍ ko̍ŋ kɔ̍ɔ̍lī, mi̍ Chɛ̄ɛ̍se̍ chu̍ā bēe̍dīi̍yo̍ a̍ mūɛ̄īya̍ŋ bɔ̄lɔ̍ māmūɛ̄īyo̍ cha̍, mbo̍ dōvī Sōfɛ̍lɔ̍ɔ̍ o̍ kɔ̄ɔ̄, mbo̍ kē Dēēve̍ po̍ ndɔ̄, a̍ chūīŋ fɔ̍ŋndɔ̍ɔ̍ lātūlu̍, le̍ mbō yōo̍ Sɔ̍ɔ̄ o̍ bā.

²¹Mi̍ Dēēve̍ ma̍lnu᷄ŋ mbo̍ kūā nāa̍ Sɔ̍ɔ̄ chu̍a̍, mbo̍ kɔ̍ ka̍ndū wa̍llo̍ le̍ Sɔ̍ɔ̄. Ndu̍yɛ̍ mi̍ Sɔ̍ɔ̄ ka̍a̍lā ndu̍ ta̍u̍ ta̍u̍, mbo̍ sīīŋgūū ndu̍ wāna̍ ndɔ̍ bi̍i̍lūl ndu̍ wōlɔ̄ɔ̄lā ndɔ̄la̍ chɔ̄ūla̍ŋ ndo̍.

²²O̍ ko̍ŋ kɔ̍ɔ̍lī, mi̍ Sɔ̍ɔ̄ yɔ᷅ŋ yōōŋgōo̍ nāa̍ Chɛ̄ɛ̍se̍ chu̍a̍ āā, “I̍ ye̍e̍ma̍ mā ke̍ ya̍ Dēēve̍, mbō wa̍ ya̍ wa̍llo̍ o̍ ba̍, fo̍ndōle̍ I̍ ka̍a̍la̍ ndu̍ bɔ̄ɔ̍.”

²³O̍ ko̍ŋ, mi̍ Dēēve̍ wa᷅ ni᷅ŋ Sɔ̍ɔ̄ wa̍llo̍ o̍ bā. Chɔ̍ŋ ni᷅ŋ a̍ bōōndi̍i̍ ke̍ŋ, tē nyi̍na̍ wɔ̄ɔ̍ŋ Mɛ̄lɛ̄ka̍ tōsa̍ ko̍ŋ mbo̍ tūāl Sɔ̍ɔ̄ kɔ̄ɔ̄lī wo̍ ō hīnu̍l Sɔ̍ɔ̄ pɛ̍, Dēēve̍ lo̍o̍ ndu̍ tōwāa̍. O̍ ko̍ŋ, nyi̍nā wɔ̄ɔ̍ŋ ko̍ŋ fāŋa̍ŋ Sɔ̍ɔ̄ kɔ̄ɔ̄lī, Sɔ̍ɔ̄ mi̍i̍ŋgu̍ o̍ ndu̍ pi̍la̍ ni̍ŋ.