Read Southern Kisi Sa̍a̍mi̍ɛ̍ɛ̄ Tāso̍o̍ 18 Bible Online

Sa̍a̍mi̍ɛ̍ɛ̄ Tāso̍o̍ 18 - Southern Kisi bible

Sa̍a̍mi̍ɛ̍ɛ̄ Tāso̍o̍ 18

¹Mɛ̄ɛ̍ Dēēve̍ nda̍ Sɔ̍ɔ̄ a̍ chi̍i̍ sūūki̍āŋndo̍ mi̍ sūɛ̍i̍ Dēēve̍i̍ lūɛ̄ī Chōna̍ta᷅ŋ po̍ Sɔ̍ɔ̄ wo̍ o̍ kɔ̄l. Mi̍ Chōna̍ta᷅ŋ kāālā Dēēve̍ mɛ̄ɛ̍ o̍ ka̍a̍la̍ ndu̍ pi̍la̍ yɛ̍.

²Ndu̍yɛ̍ chɔ̍ŋ a̍ pāa̍le̍ le̍ŋ Sɔ̍ɔ̄ me̍l lɛ̍ Dēēve̍ mbō mīīŋgu̍ o̍ fi̍nyā ndɔ̄ lo̍ le̍. Mi̍ Dēēve̍ wa᷅ ni̍ko̍ mi̍āl ndɔ̄.

³O̍ ko̍ŋ kɔ̍ɔ̍lī, mi̍ Chōna̍ta᷅ŋ yi̍i̍ kpe̍ma̍a̍ a̍ Dēēve̍. Kāni̍ fo̍ndōle̍ ndu̍ o̍o̍ ka̍a̍la̍ bɔ̄ɔ̍ Dēēve̍. Mɛ̄ɛ̍ ndu̍ o̍o̍ ka̍a̍la̍ ndu̍ pi̍la̍ yɛ̍ ko̍ ndu̍ o̍o̍ ka̍a̍la̍ ndu̍ ni̍.

⁴Mi̍ Chōna̍ta᷅ŋ so̍li᷄ŋ do᷅māa̍ lēkɔ̄ɔ̍ mbo̍ kē Dēēve̍. O̍ ko̍ŋ kɔ̍ɔ̍lī, mbo̍ kē ndu̍ vɛ̄lɛ̄ wōlɔ̄ɔ̄lā ndɔ̄la̍ chɔ̄ūla̍ŋ, a̍ mūɛ̄ī ndūɛ̍i̍ fāŋnde̍, a̍ chīɔ̄ū ndɔ̄ɔ̍, o̍ ko̍ŋ kɔ̍ɔ̍lī, a̍ yāu̍le̍ ndu̍ o̍o̍ yi̍i̍nūŋ nde̍ŋ.

⁵Ndu̍yɛ̍ nyɛ̄ o̍ nyɛ̄ Sɔ̍ɔ̄ ndu̍ o̍o̍ ve᷅m Dēēve̍ le̍ tōsāa̍ pɛ̍, nɔ̄lāa̍ Dēēve̍ ndu̍ o̍o̍ nɔ̄lā ni̍, mbō tōsa̍ ndu̍ nyɛ̄ kɛ̄ndɛ̍ī. O̍ ko̍ŋ, mi̍ Sɔ̍ɔ̄ kɛ̍sī Dēēve̍ pūa̍a̍ ndūa̍a̍ chɔ̄ūwa̍ kpo̍u̍ bōlle̍ŋ. Ndu̍yɛ̍ wānā o̍ wānā ma̍ nāŋ kɔ̄l a̍ nyɛ̄ Sɔ̍ɔ̄ o̍ to̍sa̍ wo̍. Pūa̍a̍ ndūa̍a̍ bɛ̍ɛ̍ ma̍ nāŋ kɔ̄l ta̍u̍.

⁶Mɛ̄ɛ̍ Dēēve̍ di̍ī Kōōla̍yā mbo̍ wā mīīŋgōo̍ nda̍ so̍vɛ̄i̍ya̍ lātūlu̍, mi̍ wāŋ lāāndūa̍a̍ cha᷄ŋ o̍ chi̍o̍o̍ŋ I̍sɔ̄lūɛ̄ī kpo̍u̍ ma̍ wā kɔ̄la̍ŋ le̍ mā kōma̍l Māsāa̍ Sɔ̍ɔ̄ Chūlu̍sɛ̄lɛ̄m. Ā wa̍ kɔ̄la̍ŋ a̍ chōndu̍ŋ kɔ̄l kɛ̄ndɔ̍ŋ sōlīo̍o̍ mā kūā a̍ yōla̍ŋ o̍ ko̍ŋ kɔ̍ɔ̍lī, mā lūāā sa̍ŋgba̍la̍ŋ a̍ tōwāla̍ŋ.

⁷Ā wa̍ kɔ̄la̍ŋ a̍ chōnde̍i̍ āā, “Sɔ̍ɔ̄ di̍ī ya̍a̍mɔ̍ɔ̍wa̍ o̍ wāa̍la̍ŋ ni᷄ŋ. Kɛ̍ Dēēve̍ ndu̍ di̍ī nda̍ wāa̍la̍ŋ o̍ tɔ̍ tɔ̍la̍ŋ ni᷄ŋ.”

⁸O̍ ko̍ŋ, mi̍ Sɔ̍ɔ̄ ta̍mbū kɔ̄l a̍ nyɛ̄ nda̍ wa̍ ho̍ō dīmīo̍o̍ wo̍, mbo̍ dūāūnu᷄ŋ tu̍mbe̍. Mbo̍ dīmī o̍ kɔ̄l ni᷄ŋ āā, “Ā dīmi̍ āā Dēēve̍ di̍ī ya̍a̍mɔ̍ɔ̍wa̍ wāa̍la̍ŋ o̍ tɔ̍ tɔ̍la̍ŋ ni᷄ŋ, kɛ̍ ya̍ ya̍ āā o̍ wāa̍la̍ŋ ni᷄ŋ ko̍ni̍. Māsāle̍ŋ nde᷅ŋ nda̍ yēēma̍ ni᷅ŋ ni̍ mā ke̍ ndu̍.”

⁹Chɔ̍ŋ ni᷅ŋ a̍ pāa̍le̍ le̍ŋ, mi̍ Sɔ̍ɔ̄ sa̍ā Dēēve̍ pāŋālāa̍. Ndu̍ o̍o̍ di̍ndu̍ lɛ̍ kɔ̄l a̍ Dēēve̍ le̍.

¹⁰Dīi̍mā ndɔ̄ɔ̍ pīlɔ̍ɔ̍ mi̍ nyi̍nā wɔ̄ɔ̍ŋ Mɛ̄lɛ̄ka̍ tōsa̍ mbo̍ tūāl Sɔ̍ɔ̄ kɔ̄ɔ̄lī wo̍ ō chūā Sɔ̍ɔ̄ o̍ lē pīlɛ̍ ni᷄ŋ kpe̍. Mbo̍ wā sɔ̄ɔ̍ŋ o̍ ndu̍ lo̍ chi̍ɛ̍ī ni̍ŋ ya̍lākā yālākā māā wānā se̍e̍mɛ̍i̍. Dēēve̍ wa̍ ndu̍ tōwāa̍ lōōwo̍ māā pāāndū. Ba̍llo̍ wa̍ Sɔ̍ɔ̄ o̍ bā.

¹¹Mi̍ Sɔ̍ɔ̄ di̍mī o̍ kɔ̄l ni᷄ŋ āā, “Ho̍ō vīɔ̍ɔ̍ ya̍ I̍ cho̍ ndu̍ a̍ ba̍llo̍ ni̍ mī di̍ī ndu̍.” Mbo̍ wūū Dēēve̍ ba̍llo̍ kɔ̄ɔ̄lī, kɛ̍ mbo̍ bīāndū ndu̍. Ō wūu̍ Dēēve̍ ba̍llo̍ kɔ̄ɔ̄lī lē dīi̍ŋ kɛ̍ ba̍llo̍ pīla̍ŋ ndu̍ le̍. Te̍le̍ŋ o̍ te̍le̍ŋ o̍ wu̍u̍ pɛ̍, Dēēve̍ tu̍ndu᷄ŋ, ba̍llo̍ hu᷄ŋ hi̍o̍ū.

¹²O̍ ko̍ŋ, mi̍ sīōōŋnde̍ bīī Sɔ̍ɔ̄ a̍ Dēēve̍ fo̍ndōle̍, mbo̍ sāālu᷄ŋ māā Mɛ̄lɛ̄ka̍ Ya̍a̍wɛ̄ɛ̄ wa̍ Dēēve̍ kɔ̄ɔ̄lī. Kɛ̍ ndu̍ ndu̍, mi̍ Mɛ̄lɛ̄ka̍ fāŋa᷄ŋ ndu̍ kɔ̄ɔ̄lī.

¹³Le̍la̍ŋ, mi̍ Sɔ̍ɔ̄ fa̍ŋa᷄ŋ Dēēve̍ ndu̍ īkɛ̄i̍, mbo̍ kɛ̄sī ndu̍ ni᷅ŋ pūa̍a̍ chɔ̄ūwāā wāa̍ pi᷅li̍a̍a̍ (1,000) bōlle̍ŋ. Dēēve̍ ndu̍ o̍o̍ ku̍ā ni᷅ŋ a̍ nda̍ o̍ chɔ̄ūwo̍ ni̍.

¹⁴Ndu̍yɛ̍ nyɛ̄ o̍ nyɛ̄ Dēēve̍ ndu̍ o̍o̍ to̍sa̍, bɛ̄ndāa̍ ndu̍ o̍o̍ bɛ̍ndā ni̍, fo̍ndōle̍ Mɛ̄lɛ̄ka̍ Ya̍a̍wɛ̄ɛ̄ wa̍ ndu̍ kɔ̄ɔ̄lī o̍ nyɛ̄ o̍ nyɛ̄ ni᷄ŋ.

¹⁵Mɛ̄ɛ̍ Sɔ̍ɔ̄ chē māā nyɛ̄ o̍ nyɛ̄ Dēēve̍ o̍ wa̍ tōsāa̍ māā bāa̍ ndu̍ o̍o̍ ti̍ū ni̍, mi̍ sīōōŋnde̍ chɔ̄ɔ̄lū ndu̍ bīyɔ̄ɔ̄ a̍ Dēēve̍.

¹⁶Kɛ̍ wāŋnda̍ I̍sɔ̄lūɛ̄ī kpo̍u̍ a̍ wāŋnda̍ Chu̍dā, nda̍ nda̍ ma̍ kāālā Dēēve̍, fo̍ndōle̍ ndu̍ ndu̍ o̍o̍ ku̍ā a̍ nda̍ o̍ chɔ̄ūwo̍ ni̍, ndu̍yɛ̍ mī ndu̍ o̍o̍ mi̍i̍ŋgu̍ a̍ nda̍ yɛ̍lɛ̍kɛ̍lɛ̍ɛ̍, nyɛ̄ o̍ nyɛ̄ yɔ̄nu᷄ŋ o̍ pi᷅lɛ̍ o̍ le̍.

¹⁷O̍ ko̍ŋ kɔ̍ɔ̍lī, mi̍ Sɔ̍ɔ̄ di̍mūl Dēēve̍ āā, “Ā chē chūā ni̍ tāso̍o̍, Mɛ̍lu̍a̍bī. I̍ cho̍ nu̍m ndu̍ kē mī lā cha᷄l nya̍ ndu̍ o̍ nɔ̄ɔ̍ ni᷄ŋ. Nyɛ̄ ya̍ I̍ ye̍e̍ma̍ nu̍m tu̍ŋ mā to̍sa̍l la̍ wo̍ cho̍ ni̍, si̍mu̍l kɔ᷅llo̍ yi̍ mā sa̍a̍ŋgi̍a̍l la̍ mā chi̍e̍i̍ a̍ ya̍a̍mɔ̍ɔ̍wa̍a̍ Mɛ̄lɛ̄ka̍ Ya̍a̍wɛ̄ɛ̄ wa̍.” Le̍ sa̍bū o̍ to̍sa̍ he̍ī wo̍ wa̍ ni̍, māā ndu̍ pi̍la̍ ndu̍ o̍o̍ ye̍e̍ma̍ mī ndu̍ o̍o̍ di̍ī Dēēve̍ le̍. Ndu̍ o̍o̍ ye̍e̍ma̍ mī Fīli̍i̍tīāŋnda̍ nda̍ kɔ̍ di̍ī Dēēve̍ o̍ chɔ̄ūwo̍.

¹⁸Mi̍ Dēēve̍ di̍mūl ndu̍ āā, “Ya̍ cho̍ ho̍ō wo̍, ya̍ wa᷅ lēfōo̍ māsā bɛ̍ndōo̍ ni̍? Yu̍ŋgu̍ ya̍ I̍ fu̍la̍ chōo̍ wo̍, ō cho̍ bɛ̍ɛ̍ yu̍ŋgu̍ wānāā bɔ̄ɔ̍ a̍ si̍nā a̍ ndu̍ o̍kɔ̄ɔ̄ le̍.”

¹⁹Kɛ̍ mɛ̄ɛ̍ te̍le̍ŋndo̍ fūūlu̍u̍ le̍ mī Mɛ̍lu̍a̍bī, chūa̍ Sɔ̍ɔ̄ wo̍ ā cha᷄l o̍ nɔ̄ɔ̍ ni᷄ŋ nda̍ Dēēve̍, Sɔ̍ɔ̄ kē lɛ̍ Dēēve̍ chūā ndɔ̄ɔ̍ le̍. Mbo̍ kē ni᷅ŋ po̍ che᷅le̍ŋ dīōla̍ŋ āā A̍di̍lūɛ̄ī, wānā wa̍ā Mɛ̍ho̍lāā chi̍e̍e̍.

²⁰Kɛ̍ mi̍ Ma̍kāl, chūa̍ Sɔ̍ɔ̄ wo̍ ō pīlɔ̍ɔ̍ ō kāālā Dēēve̍. Ndu̍yɛ̍ mɛ̄ɛ̍ nda̍ dīmu̍l Sɔ̍ɔ̄ a̍ ndi̍ o̍kɔ̄ɔ̄ mbo̍ nāŋ kɔ̄l.

²¹Mbo̍ dīmī āā, “Ɛ̄ɛ̄ hɛ̍ɛ̄, Ma̍kāl ya̍ I̍ cho̍ ni᷅ŋ ndu̍ kē ni̍. A̍ Ma̍kāl ya̍ I̍ cho̍ ndu̍ yāŋɔ̄ɔ̄le̍ŋ yēŋ ni̍ mī Fīli̍i̍tīāŋnda̍ dīī ndu̍.” O̍ ko̍ŋ, mi̍ Sɔ̍ɔ̄ di̍mūl vɛ̄lɛ̄ Dēēve̍ dīi̍ŋ ndɔ̄ɔ̍ āā, “Ā hīŋ sīmnɔ᷄ŋ ni᷅ŋ lēfū nī.”

²²O̍ ko̍ŋ kɔ̍ɔ̍lī, mi̍ Sɔ̍ɔ̄ di̍mūl bu̍ɛ̍i̍yāā ndūa̍a̍ āā, “Lā kɔ̍ di̍mūl Dēēve̍ sɔ̍ɔ̍ sɔ̍ɔ̍ āā, ‘Dēēve̍, māsā bɛ̍ndōo̍ hɛ̄na̍ŋ a̍ sūɛ̍i̍ nu̍mnde̍ bɔ̄ɔ̍. Ndu̍yɛ̍ bu̍ɛ̍i̍yāā ndūa̍a̍ kpo̍u̍ ā kāāla̍ nu̍m. Le̍la̍ŋ ō bɛ̄ndā bɔ̍ɔ̍ mā chu̍a̍ chūā ndɔ̄ɔ̍ o̍ nɔ̄ɔ̍ ni᷄ŋ mā sīmnu᷄ŋ le̍fū ndɔ̄.’ ”

²³O̍ ko̍ŋ, mi̍ bu̍ɛ̍i̍ya̍a̍ Sɔ̍ɔ̄ wa̍ kɔ̍ di̍mūl Dēēve̍ nyɛ̄ Sɔ̍ɔ̄ di̍mi̍ wo̍. Mi̍ Dēēve̍ lo᷅ o̍ ko̍ŋ mbo̍ dīmī āā, “Nya̍ lā chē ndi̍ sūɛ̍i̍ bɛ̍ɛ̍ŋ le̍ sīmnɔ᷄ŋndo̍ lēfōo̍ māsā bɛ̍ndōo̍? Ya̍ wa̍nā ta̍mbɛ̍i̍yo̍ ho̍ō wānāā bɔ̄ɔ̍ a̍ si̍nā bɛ̍ɛ̍ a̍ ya̍ o̍kɔ̄ɔ̄ le̍, ya̍ wa᷅ wa̍nā wa̍ā le̍nde̍ ni̍?”

²⁴O̍ ko̍ŋ kɔ̍ɔ̍lī, mi̍ bu̍ɛ̍i̍yāa̍ Sɔ̍ɔ̄ wa̍ kɔ̍ di̍mūl Sɔ̍ɔ̄ nyɛ̄ Dēēve̍ di̍mi̍ wo̍.

²⁵Mi̍ Sɔ̍ɔ̄ di̍mūl nda̍ āā, “Lā kɔ̍ di̍mūl ndu̍ āā, ‘Māsāa̍ yēēma̍ fu̍lu̍ o̍ fu̍lu̍ nūm o̍ bā le̍. Nyɛ̄ o̍ ye̍e̍ma̍ su̍e̍e̍ wo̍ cho̍ ni̍, ō yēēma̍ mā kɔ̍ mi̍ŋgūl ndu̍ māa̍ mā sɔ̍ŋga̍ a̍ ya̍a̍mɔ̍ɔ̍wa̍a̍ ndūa̍a̍. Ō yēēma̍ mā kɔ̍ di̍i̍lūl ndu̍ Fīli̍i̍tīāŋnda̍ kɛ̄mɛ̄ (100) mā fa̍ŋa̍ nda̍ su̍ūndu̍la̍ŋ mā hīŋ a̍ la̍ŋ.’ ” Sɔ̍ɔ̄ ndu̍ o̍o̍ ye̍e̍ma̍ mī Fīli̍i̍tīāŋnda̍ nda̍ a̍a̍ di̍ī Dēēve̍.

²⁶O̍ ko̍ŋ, mi̍ bu̍ɛ̍i̍yāa̍ Sɔ̍ɔ̄ wa̍ kɔ̍ di̍mūl Dēēve̍ nyɛ̄ Sɔ̍ɔ̄ di̍mi̍ wo̍. Ndu̍yɛ̍ mɛ̄ɛ̍ Dēēve̍ tu̍e̍ī le̍nde̍ mbo̍ nāŋ kɔ̄l ta̍u̍ le̍ mbō sīmnu᷄ŋ lēfōo̍ māsā bɛ̍ndōo̍. Lɔ̍ɔ̍pa̍ mi̍ pāa̍le̍ nda̍ dīmi̍ le̍ nda̍ nɔ̄ɔ̍ bɔ̄ŋāa̍ tɛ̄ɛ̄ŋ nde̍ŋ lē fūūlu̍u̍,

²⁷mi̍ Dēēve̍ chu̍ā pūa̍a̍ ndūa̍a̍ chɔ̄ūwa̍ ma̍ kɔ̍ di̍ī Fīli̍i̍tīāŋnda̍ kɛ̄mɔ̄ɔ̍ le̍ dīi̍ŋ (200). O̍ ko̍ŋ kɔ̍ɔ̍lī, mi̍ Dēēve̍ fa̍ŋā nda̍ su̍ūndu̍la̍ŋ mbo̍ hūŋ a̍ la̍ŋ nāa̍ māsā bɛ̍ndōo̍ chūā le̍ mbō ke̍ ndu̍ chūā ndɔ̄ɔ̍ mā cha᷄l nda̍ ndu̍. Mbo̍ chɔ̄m nda̍ŋ Māsā bɛ̍ndōo̍ o̍ hɔ̄l, mi̍ Māsā bɛ̍ndōo̍ ō chā. O̍ ko̍ŋ, mi̍ Sɔ̍ɔ̄ ke̍ ndu̍ Ma̍kāl chu̍a̍ ndɔ̄ le̍ mā cha᷄l o̍ nɔ̄ɔ̍ ni᷄ŋ nda̍ ndu̍.

²⁸Mi̍ Sɔ̍ɔ̄ sa̍a̍lu᷄ŋ māā Mɛ̄lɛ̄ka̍ Ya̍a̍wɛ̄ɛ̄ cho̍ Dēēve̍ kɔ̄ɔ̄lī. Ndu̍yɛ̍ vɛ̍lɛ̄ mbo̍ sāālu᷄ŋ māā Ma̍kāl chu̍a̍ ndɔ̄ ka̍a̍la̍ Dēēve̍ ta̍u̍.

²⁹O̍ ko̍ŋ, mi̍ būūla᷄ŋ bɛ̍ndōo̍ chɔ̄ɔ̄lū ndu̍ lūɛ̄īyɔ̄ɔ̄ o̍ kɔ̄l a̍ Dēēve̍. Mbo̍ chūā ni̍ko̍ Dēēve̍ māā ya̍a̍mɔ̍ɔ̍ ndɔ̄ le̍ fɛ̍ɛ̍ŋ a̍ fɛ̍ɛ̍ŋ.

³⁰O̍ ko̍ŋ kɔ̍ɔ̍lī, mi̍ Fīli̍i̍tīāŋnda̍ hīāū lāchī a̍ I̍sɔ̄lūɛ̍i̍ya̍ chīŋa̍la᷅ŋndo̍ a̍ sɔ̍ŋgɔ̄ɔ̍. Kɛ̍ te̍le̍ŋ o̍ te̍le̍ŋ I̍sɔ̄lūɛ̍i̍ya̍ nda̍ a̍a̍ sɔ̄ŋga̍ nda̍ Fīli̍i̍tīāŋnda̍ pɛ̍, Dēēve̍ ndu̍ o̍o̍ hi̍a̍ū tɔ̍ɔ̍ fu̍lā o̍ ya̍a̍mɔ̍ɔ̍wa̍ dīūwo̍ ni᷄ŋ a̍ pūa̍a̍ Sɔ̍ɔ̄ wa̍ ā pīli̍a̍a̍. O̍ ko̍ŋ, mi̍ tɔ̍ɔ̍ ndɔ̄ɔ̍ tīū kpo̍u̍.