Read Southern Kisi Sa̍a̍mi̍ɛ̍ɛ̄ Tāso̍o̍ 19 Bible Online

Sa̍a̍mi̍ɛ̍ɛ̄ Tāso̍o̍ 19 - Southern Kisi bible

Sa̍a̍mi̍ɛ̍ɛ̄ Tāso̍o̍ 19

¹O̍ ko̍ŋ kɔ̍ɔ̍lī, mi̍ Sɔ̍ɔ̄ di̍mūl Chōna̍ta᷅ŋ po̍ ndɔ̄, a̍ bu̍ɛ̍i̍yāā ndūa̍a̍ kpo̍u̍ māā ā dīi̍ Dēēve̍. Kɛ̍ sūɛ̍i̍ Dēēve̍i̍ ndi̍ i̍i̍ lu̍ɛ̍ī Chōna̍ta᷅ŋ po̍ ndɔ̄ o̍ kɔ̄l ta̍u̍.

²O̍ ko̍ŋ, mi̍ Chōna̍ta᷅ŋ di̍mūl Dēēve̍ āā, “Dēēve̍, kɛ̄kɛ̍ chō nɛ̄īla̍ŋ nūūwāa̍ le̍ nu̍m dīyɔ̄ɔ̍. Le̍la̍ŋ ma̍nda̍ŋ si̍ɔ̍dīi̍ dīi̍. Tē pāa̍le̍ŋ lē sɛ̄ sīɔ̄dīi̍ pɛ̍, a̍ kɔ̍ vi̍o̍ŋnu᷄ŋ yo̍ndōo̍ ni᷄ŋ nāa̍ wānā o̍ wānā chi᷅ nu̍m te̍ wa̍.

³I̍ cho̍ lākɔ̄ mī kɔ̍ si᷅m kɛ̄kɛ̍ īkɛ̄i̍ yo̍ndōo̍ ni᷄ŋ ndo̍ŋ nāa̍ ŋ̄ chō wā ka̍ŋ ō vīāŋna᷄ŋ nda̍ mī so̍ō a̍ nūm o̍kɔ̄ɔ̄. Mɛ̄ɛ̍ o̍ cho̍ īsɔ̄ɔ̍ yɛ̍, I̍ cho̍ nu̍m dīmūl.”

⁴O̍ ko̍ŋ kɔ̍ɔ̍lī, mi̍ Chōna̍ta᷅ŋ kɔ̍ so̍ō sɔ̄ɔ̍ŋ kɛ̍ndɔ̍ŋ a̍ Dēēve̍ o̍kɔ̄ɔ̄ nāa̍ fi̍nyā ndɔ̄ chu̍a̍. Mbo̍ dīmūl fi̍nyā ndɔ̍ āā, “Kɛ̄kɛ̍, to̍sā nyɛ̄ o̍ nyɛ̄ wɔ̄ɔ̍ŋ a̍ Dēēve̍ le̍. Fo̍ndōle̍, ō yɔ᷄ŋ nu̍m nyɛ̄ o̍ nyɛ̄ le̍. Nyɛ̄ o̍ nyɛ̄ Dēēve̍ wa̍ tōsāa̍, mālāa̍ pīla̍ o̍ wa̍ nu̍m ni̍.

⁵Dēēve̍ ndu̍ o̍o̍ pi̍si̍ māpīsīāā yōōmū ndɔ̄ɔ̍ chi̍ le̍ chīēīyo̍ a̍ Kōōla̍yā. Kɛ̍ mbo̍ nɔ̄lā mbo̍ dīī Kōōla̍yā. Mi̍ Mɛ̄lɛ̄ka̍ Ya̍a̍wɛ̄ɛ̄ to̍sā mi̍ I̍sɔ̄lūɛ̍i̍ya̍ yām Fīli̍i̍tīāŋnda̍. Nūm pi̍la̍ bɛ̍ɛ̍ mɛ̄ɛ̍ ŋ̄ chē nyɛ̍ yɔ̍nu̍ŋ ko̍ŋ ndo̍, ma̍ nāŋ kɔ̄l ta̍u̍. Le̍ yɛ̄ɛ̍nɛ̍ vɛ̍lɛ̄ ŋ̄ dīī yɛ̍ Dēēve̍? Dēēve̍ to̍sa̍ i̍sɔ̍ɔ̍ o̍ īsɔ̄ɔ̍ wɔ̍ɔ̍ŋ mā dīī ndu̍ le̍ ndi̍ le̍.”

⁶O̍ ko̍ŋ, mi̍ Sɔ̍ɔ̄ ya᷅ŋ nīla̍ŋ o̍ nyɛ̄ Chōna̍ta᷅ŋ po̍ ndɔ̄ di̍mūl ndu̍ wo̍. Ndu̍yɛ̍, mbo̍ chūā būŋgɛ̍i̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l mbo̍ mēna᷄ŋ po̍ māā ō cho̍ lɛ̍ ndu̍ dīyɔ̄ɔ̄ le̍.

⁷O̍ ko̍ŋ, mi̍ Chōna̍ta᷅ŋ kɔ̍ ve̍e̍lū Dēēve̍, mbo̍ chɔ̄m ndu̍ nyɛ̄ o̍ nyɛ̄ nda̍ sūūki̍āŋ nda̍ fi̍nyā ndɔ̄. O̍ ko̍ŋ kɔ̍ɔ̍lī, mbo̍ kūā a̍ Dēēve̍ nāa̍ Sɔ̍ɔ̄ chu̍a̍. Mi̍ Dēēve̍ mi̍i̍ŋgū vɛ̄lɛ̄ Sɔ̍ɔ̄ wa̍llo̍ o̍ bā bɛ̍ŋgu̍ māā pāāndū.

⁸O̍ ko̍ŋ kɔ̍ɔ̍lī, mi̍ sɔ̍ŋgɔ̄ɔ̍ kīōlū vɛ̄lɛ̄ Fīli̍i̍tīāŋnda̍ tɛ̄ɛ̄ŋ nda̍ I̍sɔ̄lūɛ̍i̍ya̍. Mi̍ Dēēve̍ kɔ̍ chi᷅ŋa̍la᷅ŋ Fīli̍i̍tīāŋnda̍ ndu̍yɛ̍ mbo̍ dīī nda̍ dīūwo̍ pīla̍. Mbo̍ yām Fīli̍i̍tīāŋnda̍ ma̍ nyāānu᷄ŋ.

⁹Pāa̍le̍ pi᷅lɛ̍, mi̍ ī yɔ̄nu᷄ŋ mi̍ nyi̍nā wɔ̄ɔ̍ŋ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ mbo̍ tūāl Sɔ̍ɔ̄ kɔ̄ɔ̄lī wo̍ ō chūā Sɔ̍ɔ̄ o̍ lēpīlɛ̍ ni᷄ŋ. Sɔ̍ɔ̄ wa̍ īchāli̍ o̍ ndu̍ lo̍ chi̍ɛ̍ī ni̍ŋ a̍ ba̍l ndɔ̄ɔ̍ o̍ bā. Dēēve̍ wa̍ ndu̍ tōwāa̍ lōōwo̍.

¹⁰O̍ ko̍ŋ, mi̍ Sɔ̍ɔ̄ wu̍ū Dēēve̍ ba̍llo̍ kɔ̄ɔ̄lī le̍ ndu̍ dīyɔ̄ɔ̍. Kɛ̍ mi̍ Dēēve̍ tu̍ndu᷄ŋ mi̍ ba̍llo̍ hīāū mbo̍ kɔ̍ chɔ̍ŋnu᷄ŋ o̍ chīɛ̄īyo̍. Mi̍ Dēēve̍ hi̍a̍lu᷄ŋ mbo̍ nyāānu᷄ŋ.

¹¹O̍ ko̍ŋ kɔ̍ɔ̍lī, mi̍ Sɔ̍ɔ̄ vi̍ām pūa̍a̍ ndūa̍a̍ o̍ chīɛ̍i̍ Dēēvi̍o̍o̍ īchɔ̄l pīlɛ̍ ko̍ŋ, le̍ mā kɔ̍ mɛ̍ŋgɛ̄lā Dēēve̍ mā bīī ndu̍. Ndu̍ o̍o̍ ye̍e̍ma̍ mī ndu̍ o̍o̍ di̍ī ndu̍ dīi̍mā ndɔ̄ɔ̍. Kɛ̍ mi̍ Ma̍kāl, la̍nɔ̍ɔ̍ Dēēve̍ o̍ di̍mūl Dēēve̍ āā, “Dēēve̍, tē a̍ nye̍e̍nu̍ŋ chu̍ɛ̍llɛ̄ŋ te̍, ā chō nu̍m sīɔ̄dīi̍ dīyɔ̄ɔ̄.”

¹²O̍ ko̍ŋ kɔ̍ɔ̍lī, mi̍ Ma̍kāl tu̍sī Dēēve̍ o̍ wu̍ndɛ̄i̍yo̍. Mi̍ Dēēve̍ hi̍a̍lu᷄ŋ mbo̍ nyāānu᷄ŋ.

¹³O̍ ko̍ŋ kɔ̍ɔ̍lī, mi̍ Ma̍kāl to̍o̍sīāā nyɔ̄ɔ̍ mɛ̄ɛ̍ wāna̍ chi̍e̍e̍ wa᷅ i̍hi̍ni̍ o̍ kpēlē. Mbo̍ chūā pi̍lēi̍ wa̍ ō tōōsīāā a̍ yīīŋīī chūīŋnde̍ wo̍, mbo̍ yāmbū ndu̍ bōlle̍ŋ lēchōo̍. Mbo̍ kūūmbūū ndu̍ kōlāa̍ mu̍la̍a̍.

¹⁴Mɛ̄ɛ̍ pūa̍a̍ Sɔ̍ɔ̄ ve᷅m nda̍ ā lūɛ̄ī o̍ Dēēve̍ lo̍ chi̍ɛ̍ī ni̍ŋ le̍ Dēēve̍ bīyɔ̄ɔ̍, mi̍ Ma̍kāl di̍mūl nda̍ āā, “Dēēve̍ cho̍ a̍ nāa̍.”

¹⁵Mi̍ pūa̍a̍ Sɔ̍ɔ̄ ve᷅m nda̍ kɔ̍ do̍u̍nu᷄ŋ Sɔ̍ɔ̄ ko̍na̍. O̍ ko̍ŋ kɔ̍ɔ̍lī, mi̍ Sɔ̍ɔ̄ di̍mūl nda̍ māā nda̍ pi̍la̍ kɔ̍ mā kɔ̍ to̍fā tē Dēēve̍ cho̍ lo̍ŋ le̍kɛ̍ndɛ̍ī. Mbo̍ dīmūl nda̍ āā, “Tē ō wa̍ lo̍ŋ pɛ̍ lā chūā ndu̍ a̍ kpēle̍ ndɔ̄ɔ̍ le̍nde̍ mī lā chūu̍ ya̍ ndu̍ mī hu̍ŋ di̍ī ndu̍.”

¹⁶Mɛ̄ɛ̍ pūa̍a̍ Sɔ̍ɔ̄ ve᷅m nda̍ ā lūɛ̄ī o̍ Dēēve̍ lo̍ chi̍ɛ̍ī ni̍ŋ, ma̍ sāālu᷄ŋ nyɔ̄ɔ̍ īhīni̍ o̍ kpēlē māā wāna̍ chi̍e̍e̍, pi̍lēi̍ nda̍ tōōsi̍a̍a̍ a̍ yīīŋīī chūīŋnda̍ wo̍ ō wa̍ ndu̍ o̍ bōlle̍ŋ bɛ̄ŋgu̍. Ma̍ mīīŋgū ma̍ kɔ̍ do̍o̍nu᷄ŋ Sɔ̍ɔ̄ ko̍na̍

¹⁷Mi̍ Sɔ̍ɔ̄ nyu̍nā Ma̍kāl chu̍a̍ ndɔ̄ āā, “Vɛ᷅ ma̍ hūī ya̍ hūī wāā nu̍a̍ā ma̍ to̍sā mi̍ ya̍a̍mɔ̍ɔ̍nɔ̍ nūu̍ hīālu᷄ŋ ya̍?” Mi̍ Ma̍kāl di̍mūl ndu̍ āā, “Dīmūllo̍ o̍ di̍mu̍l la̍ ni̍ māā tē ya̍ I̍ to̍sa̍ mbō nyāānu̍ŋ te̍ ō dīī ya̍.”

¹⁸O̍ ko̍ŋ, mi̍ Dēēve̍ hi̍a̍lu᷄ŋ mbo̍ nyāānu᷄ŋ Lu̍a̍mā chi̍e̍e̍ nāa̍ Sa̍a̍mi̍ɛ̍ɛ̄ chu̍a̍. Mbo̍ kɔ̍ chɔ᷅m Sa̍a̍mi̍ɛ̍ɛ̄ nyɛ̄ o̍ nyɛ̄ Sɔ̍ɔ̄ to̍sa̍ a̍ ndu̍. O̍ ko̍ŋ kɔ̍ɔ̍lī, mi̍ Sa̍a̍mi̍ɛ̍ɛ̄ chu̍ā ndu̍ ma̍ kūā Nāyīwɔ̍tī chi̍e̍e̍ ma̍ kɔ̍ cha᷅l lo̍ŋ.

¹⁹Mi̍ wāŋnda̍ kɔ̍ di̍mūl Sɔ̍ɔ̄ āā, “Dēēve̍ cho̍ Nāyīwɔ̍tī chi̍e̍e̍ o̍ tāndā Lu̍a̍mā wo̍ ni᷄ŋ.”

²⁰O̍ ko̍ŋ, mi̍ Sɔ̍ɔ̄ vi̍ām pūa̍a̍ ndūa̍a̍ le̍ mā kɔ̍ bi̍ī Dēēve̍. Kɛ̍ mɛ̄ɛ̍ pūa̍a̍ Sɔ̍ɔ̄ o̍ ve᷅m nda̍ ā fūūlu̍u̍ chi̍e̍e̍, a̍ kōma̍l wānāa̍ su̍a̍ā le̍ Mɛ̄lɛ̄ka̍ wa̍ ku̍ndāa̍ ā chō sɔ̄ɔ̍ŋ wa̍ā lāchīo̍ŋ dīmīo̍o̍, Sa̍a̍mi̍ɛ̍ɛ̄ wa̍ nda̍ īsīsi̍ la̍chi̍. O̍ ko̍ŋ mi̍ nyi̍na̍ Mɛ̄lɛ̄ka̍a̍ tūāl pūa̍a̍ Sɔ̍ɔ̄ wa̍ kɔ̄ɔ̄lī, nda̍ bɛ̍ɛ̍ ma̍ kāndū sɔ̄ɔ̍ŋ wa̍ā lāchīo̍ŋ dīmīo̍o̍ nda̍ wānāa̍ su̍a̍ā le̍ Mɛ̄lɛ̄ka̍ wa̍ lātūlu̍.

²¹Mɛ̄ɛ̍ Sɔ̍ɔ̄ tu̍e̍ī a̍ ndi̍ o̍kɔ̄ɔ̄, mbo̍ yɔ̄ŋ vɛ̄lɛ̄ pūa̍a̍ che᷅le̍ŋ le̍ Dēēve̍ kɔ̄la̍ŋ bīyɔ̄ɔ̍. Kɛ̍ nda̍ bɛ̍ɛ̍ mɛ̄ɛ̍ nda̍ fūūlu̍u̍, mi̍ nyi̍na̍ Mɛ̄lɛ̄ka̍a̍ tūāl nda̍ kɔ̄ɔ̄lī, ma̍ wā sɔ̄ɔ̍ŋ wa̍ā lāchīo̍ŋ dīmīo̍o̍. O̍ ko̍ŋ kɔ̍ɔ̍lī, mi̍ Sɔ̍ɔ̄ vi̍ām vɛ̄lɛ̄ ku̍ndā chēle̍ŋ o̍ yāa̍ ndɔ̄ɔ̍. Kɛ̍ nda̍ bɛ̍ɛ̍ mi̍ nyi̍na̍ Mɛ̄lɛ̄ka̍a̍ tūāl nda̍ kɔ̄ɔ̄lī, ma̍ wā sɔ̄ɔ̍ŋ wa̍ā lāchīo̍ŋ dīmīo̍o̍. O̍ ko̍ŋ kɔ̍ɔ̍lī, mi̍ Sɔ̍ɔ̄ vi̍ām vɛ̄lɛ̄ ku̍ndā chēle̍ŋ o̍ yāa̍ ndɔ̄ɔ̍. Kɛ̍ mi̍ nyi̍na̍ Mɛ̄lɛ̄ka̍a̍ kɔ̍ tɔ̍l nda̍ kɔ̍ɔ̍lī nda̍ bɛ̍ɛ̍ ma̍ wā sɔ̄ɔ̍ŋ wa̍ā lāchīo̍ŋ dīmīo̍o̍.

²²O̍ ko̍ŋ, mi̍ Sɔ̍ɔ̄ pi̍la̍ ma̍lnu᷄ŋ mbo̍ bīī kɔ̄la̍ŋ Lu̍a̍mā chi̍e̍e̍. Mɛ̄ɛ̍ o̍ fu̍u̍lu̍u̍ o̍ so̍o̍ŋ māmɛ̄ŋ bɛ̄ndōo̍ o̍ fo̍ndāŋndo̍ dīōla̍ŋ āā Sɛ̍kū, mbo̍ nyūnā wāŋnda̍ āā, “Lā chɔ̍m ya̍ nāa̍ Sa̍a̍mi̍ɛ̍ɛ̄ nda̍ Dēēve̍ a̍ cho̍ wa̍.” Mi̍ wānā pi᷅lɛ̍ dīmūl ndu̍ āā, “Ā chō Nāyīwɔ̍tī chi̍e̍e̍ o̍ tāndā Lu̍a̍mā wo̍ ni᷄ŋ.”

²³Mi̍ Sɔ̍ɔ̄ bi̍ī kɔ̍la̍ŋ Nāyīwɔ̍tī chi̍e̍e̍, o̍ tāndā Lu̍a̍mā wo̍ ni᷄ŋ. O̍ ko̍ŋ, ndu̍ bɛ̍ɛ̍ mi̍ nyi̍na̍ Mɛ̄lɛ̄ka̍ tūāl ndu̍ kɔ̄ɔ̄lī o̍ lē pīlɛ̍ ni᷄ŋ kpe̍, mbo̍ kāndū sɔ̄ɔ̍ŋ wa̍ā lāchīo̍ŋ dīmīo̍o̍. O̍ lo̍ kɔ̄la̍ŋ a̍ sɔ̄ɔ̍ŋ wa̍ā lāchīo̍ŋ dīmīo̍o̍ ha̍a̍a̍ mbo̍ fūūlūū Nāyīwɔ̍tī chi̍e̍e̍.

²⁴O̍ ko̍ŋ kɔ̍ɔ̍lī, mbo̍ sōlī nyɛ̄la̍ wa̍ ndu̍ lēkɔ̄ɔ̍ la̍ŋ ndu̍ bɛ̍ɛ̍ mbo̍ dīmī sɔ̄ɔ̍ŋ wa̍ā lāchīo̍ŋ Sa̍a̍mi̍ɛ̍ɛ̄ o̍ hɔ̄l. Ndu̍yɛ̍ o̍ ko̍ŋ kɔ̍ɔ̍lī, mbo̍ kɔ̍ hi̍nī, lɛ̄ŋ mbo̍ nīīlū īhīni̍ lɛ᷅ŋ ndo̍ŋ mbo̍ lɔ̄l pi̍i̍, kɔ̍ɔ̍le̍ fo̍ndō le̍nde̍. Mɛ̄ɛ̍ mi̍ wāŋnda̍ chūā ni̍ko̍ su̍ɛ̍i̍ he̍ī māā tāle̍ ndā, āā, “Bāā Sɔ̍ɔ̄ bɛ̍ɛ̍ wāna̍ su̍a̍ā le̍ Mɛ̄lɛ̄ka̍ wo̍ o̍ cho̍ nde̍e̍.”