Read Southern Kisi Sa̍a̍mi̍ɛ̍ɛ̄ Tāso̍o̍ 2 Bible Online

Sa̍a̍mi̍ɛ̍ɛ̄ Tāso̍o̍ 2 - Southern Kisi bible

Sa̍a̍mi̍ɛ̍ɛ̄ Tāso̍o̍ 2

¹O̍ ko̍ŋ kɔ̍ɔ̍lī, mi̍ Hāna̍ pi̍ɛ̍ī Mɛ̄lɛ̄ka̍, mbo̍ dīmī āā, “Ōo̍ Mɛ̄lɛ̄ka̍ Ya̍a̍wɛ̄ɛ̄, a̍ to̍sa̍ mi̍ nya̍a̍lo̍o̍ pīā o̍ kɔ̄l nūu̍ ni᷄ŋ. Mɛ̄lɛ̄ka̍ Ya̍a̍wɛ̄ɛ̄, a̍ lu̍e̍i̍ ya̍ dīāllūŋ kāla᷄ŋ. Ā tōsa̍ mī ma᷅m ya̍a̍mɔ̍ɔ̍wa̍a̍ nīa̍a̍ Mɛ̄lɛ̄ka̍. Kɔ̄l nūu̍ chō ō pīāā a̍ nya̍a̍lo̍o̍, fo̍ndōle̍ le̍ mālā ŋ̄ māla̍ ya̍ wo̍.

²“Wānā o̍ wānā cho̍ o̍ di̍a̍ndāā māā nūm Mɛ̄lɛ̄ka̍ Ya̍a̍wɛ̄ɛ̄ le̍. Mɛ̄lɛ̄ka̍ o̍ Mɛ̄lɛ̄ka̍ chēle̍ŋ cho̍ o̍ nūm kɔ̍ɔ̍lī le̍. Pōu̍ kpo̍o̍wa̍ bɛ̍ndu̍ chēle̍ŋ cho̍ ō na̍a̍ ŋ̄ vīāŋnūŋ le̍bɛ̍ŋgu̍ le̍ na̍a̍ māndāa̍ māā nūm te̍. Wānā o̍ wānā cho̍, māā nūm te̍ Mɛ̄lɛ̄ka̍.

³Wāŋnda̍ lā pɛ̄ŋgi̍ nya̍ pi̍la̍ hēēlōo̍ mī lā chūānūŋ a̍ bɛ̍ndū. Lā pɛ̄ŋgi̍ sɔ̍ɔ̍ŋ yōŋga᷄ŋ dīmīo̍o̍. Mɛ̄lɛ̄ka̍ Ya̍a̍wɛ̄ɛ̄ ndu̍ pīlɛ̍ kpe̍ nɔ̍ kɔ̄l kālo̍o̍ ni̍ mbō sīna̍ nyɛ̄ o̍ nyɛ̍ cho̍ yɔ̄nɔ᷄ŋndo̍. Ndu̍ nɔ̍lā ni̍ mbō kīlu̍l wāna̍ chi̍o̍o̍ yāmɛ̍i̍.

⁴So̍vɛ̄i̍ya̍a̍ kpāāyāā bɛ̄ndūa̍a̍, chīɔ̄ūlā ndāla̍ŋ lā yōmi̍. Wānāā nda̍ a̍a̍ nɔ̍ kpa̍a̍yā le̍ wa̍, ā sīmnu᷄ŋ wa̍nāā kpāāyāā bɛ̍ndū.

⁵Wānāā nda̍ a̍a̍ nɔ̍ pāāndū nyɛ̄ dīa̍a̍ ta̍u̍ ta̍u̍ wa̍, mɛ̄ɛ̍ mā tōsa̍l ni᷅ŋ ha̍ū wāŋnda̍ wa̍llo̍ ma̍lāŋ nda̍ dīā nyɛ᷅ dīa̍a̍. Wānāā yīa̍a̍ŋ mā wa̍ chōo̍ wa̍ yīmā nda᷄ŋ mā chūū. Chūā ndu̍ o̍o̍ vi̍lū le̍ wo̍, ō nɔ̄ ni᷅ŋ hāū chūāūwa̍ ā ŋɔ᷄mmɛ̍ū. Kɛ̍ chūā ndu̍ o̍o̍ nɔ̍ chūāūwa̍ ta̍u̍ wo̍ ō lo̍ ndu̍ pīlɛ̍, ō nɔ̍ lɛ̍ hāū chūā o̍ chūā le̍. Kɔ̄l ndɔ̄ɔ̍ chō ō tāmbɛ̍i̍.

⁶Mɛ̄lɛ̄ka̍ Ya̍a̍wɛ̄ɛ̄ o̍ nɔ̍lā mbō chūā yōōmū wāna̍ chi̍o̍o̍, ndu̍yɛ̍ ō nɔ̄lā vɛ̍lɛ̄ mbō mīŋgi̍ ndu̍ yōōmū. Ō nɔ̄lā mbō yɔ᷄ŋ wāŋndo̍ chi̍e̍e̍ pīɔ̍m, ndu̍yɛ̍ ō nɔ̄lā vɛ̄lɛ̄ mbō mīŋgi̍ wānā ko̍ŋ chi̍e̍ēŋ na̍nu᷄ŋ.

⁷Mɛ̄lɛ̄ka̍ Ya̍a̍wɛ̄ɛ̍ to̍sā ni̍ mī wāŋnda̍ wa̍ wānāā tāmbɛ̍i̍, ndu̍ ko̍ni̍ to̍sā vɛ̍lɛ̄ ni̍ mī wāŋnda̍ wa̍ wānāā sūlāā. Ndu̍ tu̍sī wa᷅ŋnda̍ tōōlō ni̍, ndu̍ ko̍ni̍ he̍e̍lū vɛ̍lɛ̄ wa᷅ŋnda̍ ni̍ mā sīmnu᷄ŋ wa̍nāā kpāāyā bɛ̍ndū.

⁸Ndu̍ so̍lī wa̍nāā tāmbɛ̍i̍ya̍ o̍ kūɛ̍i̍ ni᷄ŋ ni̍. Wānāa̍ nɔ̍ nyɛ᷅ o̍ nyɛ̄ le̍ wa̍ mbō sōli̍ nda̍ o̍ kūɛ̍i̍ ni᷄ŋ, mbō tōsa̍ mā sīmnu᷄ŋ na̍āŋa᷅ŋ ndā chūāūwāā lēmāsāa̍, ndu̍yɛ̍ mā sīmnu᷄ŋ wa̍nāā lēbɛ̄ɛ̄. Mɛ̄lɛ̄ka̍ Ya̍a̍wɛ̄ɛ̍ nɔ̍ chi̍e̍ēŋndo̍ ho̍ō kpo̍u̍ ni̍. Nyɛ̄ o̍ nyɛ̍ cho̍ o̍ chi̍e̍ēŋndo̍ ho̍ō chōo̍ ndu̍ bɛ̍ɛ̍ndi̍a̍a̍ ndu̍ ni̍.

⁹“Wānāa̍ du̍a̍ū tīīnda᷄ŋ ndāa̍ o̍ ndu̍ ni̍ŋ nda̍, māndāa̍ o̍ ma̍ndā nda̍ ni̍. Kɛ̍ wānāā dɛ̍nɛ̍ wɔ̍ɔ̍ŋnda̍ nda̍, ō chō hūnɔ̄ɔ̄ chīī a̍ nda̍ mbō yɔ᷄ŋ nda̍ o̍ fo̍ndāŋ nyūmmā bɛ̄ndūa̍ŋ mā chō wo̍. Mɛ̄ɛ̍ mɛ̄ɛ̍ wāna̍ chi̍o̍o̍ nɔ̍ kpa̍a̍yāa̍, kpāāya̍ ndɔ̄ ko̍ŋ ō nɔ̍lā mbō ma̍lā ndu̍ mbō yēm te̍.

¹⁰Mɛ̄lɛ̄ka̍ Ya̍a̍wɛ̄ɛ̄ o̍ cho̍ hūnɔ̄ɔ̄ ya̍a̍mɔ̍ɔ̍wa̍a̍ ndūa̍a̍ tɛ̍ɛ̍mbūū kpo̍u̍. Ō chō nda̍ hūnɔ̄ɔ̄ dēŋūl nāa̍ o̍ cho̍ ō fo̍ndā ndɔ̄ di̍a̍ndāa̍ chōo̍ cho̍o̍ wa̍, mɛ̄ɛ̍ ta᷅ŋnde̍ŋ lē dēŋī nu̍a̍ā yɛ̍. Mɛ̄lɛ̄ka̍ Ya̍a̍wɛ̄ɛ̄ o̍ cho̍ hūnɔ̄ɔ̄ kɔ̍ɔ̍sɔ̍ a̍ chi̍e̍ēŋndo̍ ho̍ō kpo̍u̍. Ō chō hūnɔ̄ɔ̄ māsa̍ ndɔ̄ bɛ̍ndōo̍ kpāāyāa̍ kē, mbō tōsa̍ mī māsa̍ ndɔ̍ ndu̍ pi̍la̍ o̍ hɛ̍li̍ wo̍ ō sīmnu᷄ŋ ma̍sa̍ kpāāyā bɛ̍ndū.”

¹¹O̍ ko̍ŋ kɔ̍ɔ̍lī, mi̍ Ɛ̄li̍ka̍nāā nda̍ yu̍ŋgu̍ ndɔ̄ɔ̍ ā mīīŋgū o̍ nda̍lo̍ Lu̍a̍mā chi̍e̍e̍. Ma̍ mɛ̄ī pōo̍mbɔ̄ɔ̍ Si̍lɔ̄ɔ̄ chi̍e̍e̍ le̍ mbō wa̍ wa̍li̍ Mɛ̄lɛ̄ka̍ Ya̍a̍wɛ̄ɛ̄ wo̍ tōsāa̍, wāna̍ so̍lī sa̍lāa̍ wo̍ I̍lā o̍ bā bɛ̄ŋgu̍.

¹²Kɛ̍ pūa̍a̍ I̍lā wa̍ wānāā dɛ̍nɛ̍ wɔ̍ɔ̍ŋnda̍ nda̍ wa̍ ni̍. Nda̍ a̍a̍ nɔ̍ i̍si̍o̍o̍ŋ le̍ Mɛ̄lɛ̄ka̍ Ya̍a̍wɛ̄ɛ̄ le̍,

¹³kɛ̄lɛ̄ŋgāā ni᷅ŋ te̍, mā chūa̍ sāwāla̍ wānāā sōlīāā lāsa̍lāa̍ nda̍ a̍a̍ nɔ̍ la̍ŋ. Nyɛ̄ nda̍ a̍a̍ to̍sā wo̍ wa̍ ho̍ō ni̍, tē wāŋndo̍ ndu̍ o̍o̍ ku̍ɛ̄ a̍ sa̍lā ndɔ̄ɔ̍ le̍ sōlīo̍o̍ pɛ̍ mā dīī chɔ̄lōo̍ mā wa̍ vīsīŋ mu᷅ŋ yāūwo̍, pūa̍a̍ I̍lā wa̍ o̍ wa᷅ sa̍lā wānā ko̍ŋ sōlīo̍o̍ wo̍ ō vēm bu̍ɛ̍ī ndɔ̄ɔ̍ a̍ chu̍ sa̍ŋgi̍ chīŋūŋ ŋgāa̍ wo̍.

¹⁴Tē ō kūɛ̄ pɛ̍, ō kɔ̍ chɔ᷅ŋ chu̍ kōŋ o̍ kɔ̄ɔ̄fɛ̍ɛ̄ bɛ̄ndū nda̍ wā vi̍sīŋ mu᷅ŋ yāūwo̍ wo̍ ni᷄ŋ. Tē ō chɔ̄ŋ pɛ̍, vīsīŋ chu̍ kōŋ ō chō sōlī wo̍ŋ ki̍nɛ̍i̍, ō yōo̍ pūa̍a̍ I̍lā wa̍ o̍ wa᷅ sa̍lāa̍ sōlīo̍o̍ a̍ te̍le̍ŋ ko̍ŋ ndo̍. I̍sɔ̄lūɛ̍i̍ya̍a̍ nda̍ a̍a̍ ku̍ā sa̍lāla̍ŋ sōlīo̍o̍ Si̍lɔ̄ɔ̄ wa̍ ki̍nɛ̍i̍, nu̍a̍ā pūa̍a̍ I̍lā wa̍ nda̍ a̍a̍ to̍sā a̍ sa̍lālā ndāla̍ŋ ni̍.

¹⁵Ndu̍yɛ̍ ō fūla̍ o̍ ko̍ŋ kɔ̍ɔ̍lī, tē wāŋndo̍ ndu̍ o̍o̍ di̍ī chɔ̄lōo̍ pɛ̍, lɔ̍ɔ̍ pa̍ mā sōli̍ chūɛ̄īya̍ŋ o̍ vīsīŋ mu̍ŋ le̍ lōmɔ̄ɔ̍ māā sa̍lā, pūa̍a̍ I̍lā wa̍ o̍ wa᷅ sa̍lāa̍ sōlīo̍o̍ o̍ Mɛ̄lɛ̄ka̍ lo̍ a̍ te̍le̍ŋ ko̍ŋ ndo̍, ō vēm bu̍ɛ̍ī ndɔ̄ɔ̍ ō hīŋ ō hu᷄ŋ di̍mūl wa᷅na̍ ko̍ŋ āā, “Ke̍ wa᷅na̍ so̍lī sa̍lāa̍ wo̍ vīsīe̍i̍ ī ti᷄ŋ ō kɔ̍ tu̍ɛ̍ī. Ndu̍ ye̍e̍ma̍ vīsīī yāūwāā nu̍m o̍ bā le̍, ī kīyɛ̍i̍ye̍ o̍ ye̍e̍ma̍ ni̍.”

¹⁶Tē wānā ko̍ŋ dīmu̍l ndu̍ pɛ̍ āā, “Mɛ̄ɛ̍ chu̍m ndɔ̍ mī ŋ̄ sōli̍ chūɛ̄īya̍ŋ mī ŋ̄ lōm tē ŋ̄ lōm pɛ̍, a̍ chu̍a̍ vīsīŋ ŋ̄ yēēma̍ wo̍ŋ ki̍nɛ̍i̍,” bu̍ɛ̍ī ko̍ŋ ō dīmī āā, “Sāko̍, ke̍ ya̍ su̍ŋ su̍ŋ, tē a̍ ke̍ ya̍ le̍, I̍ chu̍a̍ a̍ ka̍ka̍.”

¹⁷Yɔ̄ŋ wɔ̄ɔ̍ŋ I̍lā pūa̍a̍ ndūa̍a̍ ha̍ā ā wa̍ ho̍ō tōsāa̍ wo̍ mbo̍ tɛ̄ɛ̄mbūū Mɛ̄lɛ̄ka̍ Ya̍a̍wɛ̄ɛ̄ kɔ̄l ta̍u̍ ta̍u̍. Fo̍ndōle̍, le̍ mɛ̄ɛ̍ nda̍ wa̍ sa̍lālā wāŋnda̍ wa̍ hūnɔ̄ɔ̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍ la̍ŋ bɛ̍ɛ̄la̍ŋ tɛ̄ɛ̄mbūūwo̍ yɛ̍.

¹⁸Sa̍a̍mi̍ɛ̍ɛ̄ wa̍ o̍ pɔ̄mbɔ̄ mbo̍ kāndū wa̍li̍ Mɛ̄lɛ̄ka̍ Ya̍a̍wɛ̄ɛ̄ wo̍ tōsāa̍ Si̍lɔ̄ɔ̄. Nyɛ̄lā wānāā so̍lī sa̍lāla̍ŋ o̍ Mɛ̄lɛ̄ka̍ lo̍ wa̍ nda̍ a̍a̍ wo̍u̍nūŋ nda̍ŋ, ndu̍ bɛ̍ɛ̍ la̍ŋ ndu̍ o̍o̍ wo̍u̍nūŋ ni̍.

¹⁹Ndu̍yɛ̍ īwɔ̄sī o̍ īwɔ̄sī tē kāla̍ ndɔ̄ wa̍ā nda̍ a̍a̍ wa̍ kɔ̄la̍ŋ sa̍lā ī wɔ̄sīo̍o̍ sōlīo̍o̍ nda̍ pɔ̍nɔ̍ nda̍ wa̍ā pɛ̍, mɛ̄ɛ̍ mī kāla̍ ndɔ̄ ndu̍ o̍o̍ so̍ndu̍l ndu̍ dōmā vi̍lɛ̄īyo̍ mbō yōo̍ ndu̍.

²⁰Tē ō yōo̍ ndu̍ dōmāa̍ ho̍ō pɛ̍, I̍lā dɔ̍ū Ɛ̄li̍ka̍nāā sa̍lā nda̍ Hāna̍ la̍a̍ ndɔ̄, ō dīmūl Ɛ̄li̍ka̍nāā āā, “Mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ ke̍ nu̍m chūāūwāā chēle̍ŋ a̍ chūa̍a̍ ho̍ō le̍ sɔ̍ŋgɔ̍ po̍ ŋ̄ yɔ̄ŋgu̍ ho̍ō o̍ ndu̍ lo̍ wo̍ fɔ̍.” O̍ ko̍ŋ kɔ̍ɔ̍lī, tē ā chīi̍ sa̍lāa̍ sōlī pɛ̍ kpo̍u̍, ā mīīŋgu̍ Lu̍a̍mā o̍ nda̍lo̍ chi̍e̍e̍.

²¹Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ yi̍ya᷄ŋ vɛ̍lɛ̄ Hāna̍ chōo̍ mbo̍ tōsā mi̍ Hāna̍ vīālū vɛ̄lɛ̄ pūa̍a̍ a̍ yāa̍ a̍ wāŋ lāāndūa̍a̍ ā ŋīɔ̍ɔ̍ŋ. Sa̍a̍mi̍ɛ̍ɛ̄ lo̍ ō pɔ̄mbɔ̄ mbo̍ kāndū wa̍li̍ Mɛ̄lɛ̄ka̍ Ya̍a̍wɛ̄ɛ̄ wo̍ tōsāa̍. Ō lo̍ ni᷅ŋ wa̍li̍ Mɛ̄lɛ̄ka̍a̍ tōsāa̍ ha̍a̍a̍ mbo̍ sūl lāŋu̍nɔ̄.

²²O̍ ko̍ŋ kɔ̍ɔ̍lī, mi̍ I̍lā yu̍wā ni᷅ŋ ku̍ndɛ̍ɛ̄. Nyɛ̄ o̍ nyɛ̄ pūa̍a̍ ndūa̍a̍ ā wa̍ tōsāa̍ a̍ I̍sɔ̄lūɛ̍i̍ya̍, mbo̍ tūɛ̄ī a̍ ndu̍ o̍kɔ̄ɔ̄ kpo̍u̍. O̍ ko̍ŋ kɔ̍ɔ̍lī, mbo̍ tūɛ̄ī vɛ̄lɛ̄ a̍ mɛ̄ɛ̍ pūa̍a̍ ndūa̍a̍ ā wa̍ hīni̍la̍ŋ a̍ wāŋ lāāndūa̍a̍ to̍sā wa̍llo̍ o̍ tɛ̍ndɛ̄i̍ nda̍ sōōlūū Mɛ̄lɛ̄ka̍ wo̍ dīō wa̍ yɛ̍.

²³O̍ ko̍ŋ, mbo̍ vēēlū pūa̍a̍ ndūa̍a̍ mbo̍ dīmūl nda̍ āā, “Lā vɛ᷅ mi̍ lā wā sɔ̄ɔ̍ŋ wɔ̍ɔ̍ŋ wāā nu̍a̍ā tōsāa̍? Wānā o̍ wānā cho̍ ya̍ hūnɔ̄ɔ̍ dīmūllo̍ a̍ sɔ̄ɔ̍ŋ wɔ̍ɔ̍ŋ nya̍ chō tōsāa̍ wo̍ŋ o̍kɔ̄ɔ̄.

²⁴Ke̍ŋ i̍ bɛ̍nda̍ le̍ pūa̍a̍ nīa̍a̍. O̍ cho̍ tɔ̍ɔ̍ kɛ̍ndɛ̄ le̍ ya̍ I̍ cho̍ ko̍ŋ tu̍e̍i̍yɔ̄ɔ̍ wānāa̍ Mɛ̄lɛ̄ka̍ Ya̍a̍wɛ̄ɛ̄ wa̍ o̍ lāsōndō a̍ nya̍ o̍kɔ̄ɔ̄ le̍.

²⁵Tē ō wa̍ pɛ̍ mī wāŋndo̍ tōsa̍ yɔ̄ŋ wɔ̄ɔ̍ŋndo̍ a̍ chāa̍ŋ ndɔ̄ wa᷅na̍ chi̍o̍o̍, Mɛ̄lɛ̄ka̍ nɔ̍lā ni̍ mbō bɛ̄ɛ̄ndi̍a̍a̍ sūɛ̍i̍ ke̍ŋ nda̍ tɛ̄ɛ̄ŋ nda̍ chāa̍ŋ ndɔ̄ ko̍ŋ. Kɛ̍ tē wānā ko̍ŋ tōsa̍ ni᷅ŋ yɔ̄ŋ wɔ̄ɔ̍ŋndo̍ a̍ Mɛ̄lɛ̄ka̍ Ya̍a̍wɛ̄ɛ̄ pi̍la̍ pɛ̍, ō nɛ̄ɛ̍nɛ̍ nɔ̍lā yɛ̄ mbō bɛ̄ɛ̄ndi̍a̍a̍ sūɛ̍i̍ ke̍ŋ nda̍ tɛ̄ɛ̄ŋ nda̍ Mɛ̄lɛ̄ka̍?” Kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā pūa̍a̍ I̍lā wa̍ ā yēŋnu̍ŋ fi̍nyā nda̍ lānī le̍. Kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ ye̍e̍ma̍ mī ndu̍ o̍o̍ di̍u̍ nda̍ kpo̍u̍.

²⁶Mi̍ Sa̍a̍mi̍ɛ̍ɛ̄ hi̍a̍ū lāchī a̍ hīndɔ̄ɔ̍. Ndu̍yɛ̍ mi̍ ka̍ā ndɔ̄ɔ̍ hīnī Mɛ̄lɛ̄ka̍ Ya̍a̍wɛ̄ɛ̄ kɔ̄l ta̍u̍. Wāŋnda̍ kpo̍u̍ ma̍ hɛ̄na᷄ŋ a̍ nīīlū ndɔ̄ɔ̍.

²⁷Pāa̍le̍ pi᷅lɛ̍, mi̍ wāna̍ su̍a̍ā le̍ Mɛ̄lɛ̄ka̍ wo̍ ō pūm ō hūŋ nāa̍ I̍lā chu̍a̍ a̍ yōōŋgōo̍. Mbo̍ hu᷄ŋ di̍mūl ndu̍ āā, “I̍lā, nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍, ō dīmī āā, ‘Bōōndi̍i̍ fi̍nyāā nyāā ma̍māa̍ ā wa̍ sīndɛ̄ I̍chi̍pī o̍ chɛ̄le̍ŋ ni᷄ŋ Ma̍sāa̍ I̍chi̍pī o̍ bā ve̍, mi̍ lo᷅ o̍ ko̍ŋ mi̍ chɔ̍mnu᷄ŋ E̍lɔ̄ŋ fi̍nyā nūm ma̍mā.

²⁸O̍ yu̍ŋgu̍la̍ I̍sɔ̄lūɛ̍i̍ya̍ tɛ̄ɛ̄ŋ ki̍nɛ̍i̍ mi̍ hɛ̍lī yu̍ŋgu̍ ndɔ̄ɔ̍ le̍ mā wa̍ wānāā nīāā so̍līāā lāsa̍lāa̍. Nda̍ ya̍ I̍ hɛ̍li̍ ni̍ le̍ mā wa̍ sa̍lāla̍ŋ sōlīo̍o̍ o̍ ma̍āŋ nūu̍ chōo̍ mā lūām nyɛ᷅m chūŋ kɛ̄ndɔ̍ŋ o̍ ya̍ lo̍. Nyɛ̄lā wānāa̍ so̍lī sa̍lāa̍ o̍ ya̍ lo̍ wa̍ ā wōōnūŋ le̍ ya̍ dīōmndo̍ nyūnāa̍ la̍ŋ, nda̍ ya̍ I̍ hɛ̍li̍ ni̍ le̍ mā wa̍ la̍ŋ wōōnɔ᷄ŋndo̍. Ndu̍yɛ̍ sa̍lālā wāŋnda̍ I̍sɔ̄lūɛ̄ī a̍ hu᷅ŋ le̍ lōmɔ̄ɔ̍ o̍ ya̍ lo̍ la̍ŋ, nyɛ̄ o̍ nyɛ̍ lo̍ pɛ̍ mi̍ ke᷅ wānāa̍ fu̍la̍ o̍ pūlāle̍ fi̍nyā nūm ma̍māle̍ŋ chōo̍ wa̍ di̍o̍o̍ le̍ mā wa̍ mu̍ŋ dīo̍o̍.

²⁹Vɛ᷅ ma̍ lūɛ̄ī vɛ̄lɛ̄ hɔ̄lte̍ŋ o̍ sa̍lālā nīla̍ŋ a̍ kēlā nīla̍ŋ, lā ya̍ I̍ di̍mu̍l wānāā nīa̍a̍ māā ā chūu̍ ya̍ la̍ŋ? I̍lā mɛ̄ɛ̍ a̍ ke̍ pūa̍a̍ nu̍mnda̍ bɛ̄ɛ̄le̍ŋ mbo̍ hīāū ya̍ Mɛ̄lɛ̄ka̍? Vɛ᷅ ma̍ wā tōfāa̍ mi̍ pūa̍a̍ nu̍mnda̍ ā wā nyɛ̄m wānāā nīa̍a̍ I̍sɔ̄lūɛ̄ī a̍ chūū ya̍ māā lākē wo̍ŋ ŋ̄ kɛ̄ndɛ̄ kɛ̍ndɔ᷄ŋ dīo̍o̍ mā chēlūl a̍ mu᷅ŋ, a̍ to̍sā i̍sɔ̄ɔ̍ o̍ i̍sɔ̍ɔ̍ a̍ ndi̍ o̍kɔ̄ɔ̄ le̍?

³⁰Ya̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ pīɛ̄īyo̍, mi̍ ya̍ i̍i̍ chu̍ēl nya̍ sīndɛ̄ būŋgɛ̄i̍ māā wānāa̍ fu̍la̍ o̍ pūlāle̍ fi̍nyā nūm ma̍māle̍ŋ chōo̍ wa̍ ni̍, a̍ wānāa̍ fu̍lā ni̍ŋ o̍ yu̍ŋgu̍ nu̍mndo̍ chōo̍ wa̍ māā nda̍ wa᷅ ni̍ŋ wa̍nāā sōlīāā lāsa̍lāa̍ o̍ ya̍ lo̍ le̍ fɛ̍ɛ̍ŋ a̍ fɛ̍ɛ̍ŋ ni̍. Kɛ̍, ke̍ŋ i̍ kɔ̍ŋnu̍ŋ po̍lo̍ŋ. Kāni̍ fo̍ndōle̍, ya̍ Mɛ̄lɛ̄ka̍ wāna̍ kɛ̍ ya̍ bɛ̄ɛ̄le̍ŋ ndo̍, ndu̍ ya̍ I̍ kɛ̍ bɛ̍ɛ̄le̍ŋ ni̍. Kɛ̍, wānā o̍ wāna̍ pɛ̍ɛ̍sa̍ ya̍ pɛ̍, kīɔ̍ɔ̍ ya̍ I̍ kɛ̍ɛ̄ wa᷅nā ko̍ŋ ni̍.

³¹Te̍le̍ŋ cho̍ hūnɔ̄ɔ̄ fūūlūū pūa̍a̍ fu̍la̍ o̍ yu̍ŋgu̍ nu̍mndo̍ chōo̍ wa̍ ki̍nɛ̍i̍, a̍ pūa̍a̍ fu̍la̍ o̍ pūlāle̍ fi̍nyā nūm ma̍māle̍ŋ chōo̍ wa̍, I̍ cho̍ nda̍ hūnɔ̄ɔ̄ dīū kpo̍u̍ mī chi̍i̍ a̍ nda̍. I̍ cho̍ tōsā wānā pɔ̍nɔ̍ o̍ wānā pɔ̍nɔ̍ lo᷅ lɛ̍ o̍ yu̍ŋgu̍ nūmndo̍ chōo̍ mbō yūwa̍ le̍.

³²Te̍le̍ŋ cho̍ hūnɔ̄ɔ̄ fūūlūū mī dɔ̍ū I̍sɔ̄lūɛ̍i̍ya̍a̍ tu̍a̍a̍ sa̍lā, mī to̍sa̍ mī dɛ̍nɛ̍ kɛ̍ndɛ̄ bɛ̄ndōo̍ tōl nda̍ kɔ̄ɔ̄lī. Ā te̍le̍ŋ ko̍ŋ ā chō hūnɔ̄ɔ̄ kɔ̄l tāmbu̍ mā wa̍ dɛ̍nɛ̍ ndā kɛ̍ndɔ̄ɔ̍ nūa̍a̍ a̍ nɛ̄īyɔ᷄ŋ bɛ̍ndōo̍. I̍ cho̍ tōsā fɛ̍ɛ̍ŋ a̍ fɛ̍ɛ̍ŋ wānā pɔ̍nɔ̍ o̍ wānā pɔ̍nɔ̍ lo᷅ lɛ̍ o̍ yu̍ŋgu̍ nu̍mndo̍ chōo̍ mbō yūwa̍ le̍.

³³Kɛ̍ ndu̍yɛ̍ I̍ cho̍ pūlāle̍ nu̍mnde̍ŋ kīōlɔ̄ɔ̄ kpa̍li̍ le̍. I̍ cho̍ wānā pi᷅lɛ̍ mɛ̄ī o̍ pūlālē nūmnde̍ŋ chōo̍ o̍ wa᷅ ni̍ŋ wa᷅na̍ nī so̍līāā lāsa̍lāa̍ wo̍. Ndu̍ pīlɛ̍ kpe̍ lo᷅ ni̍ŋ o̍ yu̍ŋgu̍ nu̍mndo̍ chōo̍ ni̍ mbō hu᷄ŋ cha᷅ŋ wānāa̍ fu̍la̍ o̍ yu̍ŋgu̍ nu̍mndo̍ chōo̍ wa̍. Kɛ̍ wānā o̍ wāna̍ fu̍la̍ ni᷅ŋ o̍ pūlāle̍ nūmnde̍ŋ chōo̍, nda̍ kpo̍u̍ ā chō nda̍ hūnɔ̄ɔ̄ dīū a̍ mɔ̄ɔ̄ŋ fāŋndo̍ŋ.

³⁴Pūa̍a̍ nu̍m ā ŋīɔ̍ɔ̍ŋnda̍, nda̍ yɔ̍nūŋ ni̍ māā Hɔ̍fi̍nī nda̍ Fi̍ni̍ha̍a̍sī, nyɛ̄ cho̍ hūnɔ̄ɔ̄ yɔ̄nɔ᷄ŋ a̍ nda̍ wo̍ ndu̍ cho̍ wā tāāmāsi̍o̍o̍ le̍ nūm ni̍. Nda̍ ŋi̍ɔ̍ɔ̍ŋ kpo̍u̍ ā chō hūnɔ̄ɔ̄ pīɔ̍mndo̍ sɔ̄lā o̍ pāa̍le̍ pi᷅lɛ̍ le̍ŋ chōo̍ kpe̍.

³⁵I̍ cho̍ hūnɔ̄ɔ̄ wāŋndo̍ hɛ̄lī, wāna̍ wa̍ ni̍ŋ sa̍kpō o̍ kpe̍ku̍ nūu̍ sōlīo̍o̍ ni᷄ŋ ndo̍ mbō hu᷄ŋ si̍mnu᷄ŋ wa᷅na̍ nī so̍līāā lāsa̍lā. Wānā ko̍ŋ le̍ te̍le̍ŋ o̍ te̍le̍ŋ nyɛ᷄ hi̍nī ya̍ ni̍ŋ kɔ᷅llo̍ ndu̍ ko̍ni̍ o̍ wa̍ ni̍ŋ to̍sāa̍ ni̍. Ndu̍yɛ̍ I̍ cho̍ tōsā mī yu̍ŋgu̍ ndɔ̄ɔ̍ hu᷄ŋ ku̍ī, o̍ ko̍ŋ kɔ̍ɔ̍lī mā hīōū lāchī a̍ sa̍lāla̍ŋ sōlīo̍o̍ le̍ māsa̍ ni̍ ya̍ I̍ su̍u̍ chūɛ̄īya̍ŋ ndo̍ le̍ fɛ̍ɛ̍ŋ a̍ fɛ̍ɛ̍ŋ.

³⁶Ndu̍yɛ̍ wānā o̍ wāna̍ lo᷅ ni̍ŋ yo̍o̍mū o̍ yu̍ŋgu̍ nu̍mndo̍ chōo̍, nāa̍ ndu̍ chu̍a̍ nda̍ wā ni̍ŋ kɔ̍la̍ŋ pīɛ̄īle̍ŋ ni̍, le̍ mbō ke̍ nda̍ nyɛ̄ sɔ̄lāā pɔ̄mbɔ̄, a̍ nyɛ̄ dīāā nda̍ dīā wo̍. Ā chō ndu̍ hūnɔ̄ɔ̄ nyɔ̄ɔ̄lū āā, “Yāndi̍i̍ chɛ̍l na̍a̍ mī ŋ̄ wa̍ wānāā sōlīāā lāsa̍lā, le̍ hāli̍kpe̍ŋ mī ŋ̄ sɔ̄la̍ nyɛ᷅ dīāā na̍a̍ ŋ̄ dīā wo̍.” ’ ”