Read Southern Kisi Sa̍a̍mi̍ɛ̍ɛ̄ Tāso̍o̍ 21 Bible Online

Sa̍a̍mi̍ɛ̍ɛ̄ Tāso̍o̍ 21 - Southern Kisi bible

Sa̍a̍mi̍ɛ̍ɛ̄ Tāso̍o̍ 21

¹O̍ ko̍ŋ kɔ̍ɔ̍lī, mi̍ Dēēve̍ ku̍ā Nɔ̍bī chi̍e̍e̍ nāa̍ Āhīmɛ̍lɛ̍kī chu̍a̍, wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍. Mɛ̄ɛ̍ Āhīmɛ̍lɛ̍kī che᷅ Dēēve̍, mbo̍ kūā nāa̍ Dēēve̍ chu̍a̍ a̍ nyīīyāa̍. Mbo̍ nyūnā Dēēve̍ āā, “Vɛ᷅ hūnɔ̄ɔ̍ ho̍ō nu̍m pīlɛ̍, wānā o̍ wānā cho̍ nu̍m kɔ̄ɔ̄lī le̍?”

²Mi̍ Dēēve̍ lo᷅ o̍ ko̍ŋ mbo̍ dīmūl ndu̍ āā, “Vīōmɔ̄ɔ̍ māsāa̍ vēm ya̍ ni̍. Ō dīmu̍l la̍ māā ya̍ I̍ to̍sā mī wānāā bɔ̄ɔ̍ si̍na̍ a̍ ndi̍ o̍kɔ̄ɔ̄ le̍. Pūa̍a̍ nīa̍a̍ nda̍ I̍ di̍mu̍l nda̍ le̍ mā kōma̍l la̍ nāa̍ na̍a̍ ŋ̄ mɛ̄i̍ na̍a̍ nda̍ā wa̍.

³Le̍la̍ŋ yɛ̄ɛ̍nɛ̍ ŋ̄ nɔ̄ yɛ̄ na̍nu᷄ŋ mā ma̍la̍ ya̍? Ke̍ ya̍ bēe̍dīi̍yo̍ kpūŋgba᷄ŋ ŋūɛ̍ɛ̍nu̍, ɔ̄ɔ̄ nyɛ̄ o̍ nyɛ̄ chēle̍ŋ ŋ̄ nɔ̄ pɛ̍ le̍ ya̍ mālā, a̍ ke̍ ya̍.”

⁴Mi̍ wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍, Āhīmɛ̍lɛ̍kī o̍ di̍mūl ndu̍ āā, “I̍ nɔ̍ be̍e̍dīi̍ yɔ̍ŋāā chēle̍ŋ na̍nu᷄ŋ te̍. Bēe̍dīi̍ cho̍ na̍nu᷄ŋ ndo̍ mɛ̄ɛ̍ bēe̍dīi̍ cho̍ ō yɔ̄ŋgāā o̍ Mɛ̄lɛ̄ka̍ lo̍ wo̍. Kɛ̍ tē pūa̍a̍ nūmnda̍ ā pīla̍ŋ ndɔ̍ wānā la̍nɔ̍ o̍ wānā la̍nɔ̍ wa̍a̍li̍o̍ō le̍, I̍ nɔ̍lā mī ke̍ nu̍m ko̍ŋ.”

⁵Mi̍ Dēēve̍ lo᷅ o̍ ko̍ŋ mbo̍ dīmūl ndu̍ āā, “Fāllo̍, wa̍a̍li̍o̍ō kpu̍lu̍ŋ wānā la̍nɔ̍ o̍ wānā la̍nɔ̍ hi̍ŋ ndɔ̍ na̍a̍ īkɛ̄i̍ le̍. Pūa̍a̍ nīa̍a̍, le̍ te̍le̍ŋ o̍ te̍le̍ŋ, ā chō ā dīāndāā Mɛ̄lɛ̄ka̍ o̍ hɔ̄l. Ā yɔ̍ŋ bɛ̍ɛ̍ āā mī ŋ̄ wa̍ kɔ̄la̍ŋ nāa̍ yɔ̍ŋāā, kɛ̄sīo̍o̍ nda̍ kɛ̄sī nda̍ pi̍la̍ ā dīāndāā ni̍. Kɛ̄lɛ̄ŋgāā ni᷅ŋ te̍, ī kpe̍e̍kpe̍i̍ na̍a̍ ŋ̄ chō he̍ī kɔ̄la̍ŋ le̍ ndi̍ ve̍?”

⁶O̍ ko̍ŋ, mi̍ wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍ ō kē ndu̍ bēe̍dīi̍ ko̍ŋ. Kāni̍ fu̍u̍le̍ bēe̍dīi̍ yɔ̍ŋāā chēle̍ŋ bɛ̍ɛ̍ ve̍ lo̍ŋ te̍, mɛ̄ɛ̍ bēe̍dīi̍ wa̍ ō yɔ̄ŋgāā o̍ Mɛ̄lɛ̄ka̍ lo̍ wo̍. Ndu̍yɛ̍ bēe̍dīi̍ nda̍ a̍a̍ kɛ̍sī ko̍ŋ o̍ fo̍nda᷄ŋ Mɛ̄lɛ̄ka̍ Ya̍a̍wɛ̄ɛ̄ wo̍ wo̍ lēpāa̍ o̍ lēpāa̍, mɛ̄ɛ̍ mī nda̍ a̍a̍ fa̍ŋa̍ ō pāāndu̍ wa᷅ lo̍ŋ ndo̍, mā mīŋgi̍ ō sɛ̄nɛ̄īyo̍ lo̍ŋ.

⁷Bōōndi̍i̍ Dēēve̍, nda̍ Āhīmɛ̍lɛ̍kī a̍ wa̍ sūūki̍āŋ ko̍ŋ nde̍, Sɔ̍ɔ̄, wāna̍ ndɔ̍ wa̍ wānāā ndūāā ma̍ndāā lāchɔ̄lūa̍a̍ bōlle̍ŋ ndo̍, dīōla̍ŋ āā Du̍ɛ̍kī, wānā wa̍ā o̍ lɛ̄ŋndē I̍dɔ̄mnde̍ŋ ni᷄ŋ, ō wa̍ lo̍ŋ. Ndu̍ o̍o̍ ku̍ɛ̄ le̍ mbō sɔ̄la̍ dīndīo̍o̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l. Mbo̍ chā nyɛ̄ o̍ nyɛ̍ yɔ̍nu̍ŋ.

⁸Mi̍ Dēēve̍ nyu̍nā Āhīmɛ̍lɛ̍kī āā, “Vɛ᷅, a̍ nɔ̍ ba̍l na̍nu᷄ŋ, ɔ̄ɔ̄ īmɔ̄ɔ̄, mā ke̍ ya̍ le̍? Vīōmɔ̄ɔ̄ Māsāa̍ vēm ya̍ wo̍, ō wa̍ cho̍ŋ cho̍ŋ. Ya̍ i̍i̍ nɔ̍ lɛ̍ fo̍ndāŋ mī ya̍ i̍i̍ chu̍a̍ mūɛ̄ī nīi̍ ɔ̄ɔ̄ nyɛ̄ o̍ nyɛ̄ chɔ̄ū che̍le̍ŋ te̍.”

⁹Mi̍ wa᷅na̍ so̍lī sa̍lāa̍ o̍ Mɛ̄lɛ̄ka̍ lo̍ wo̍ Āhīmɛ̍lɛ̍kī di̍mūl ndu̍ āā, “Mɛ̄ɛ̍ Kōōla̍yā, po̍ Fīli̍i̍tīāŋnɔ̄ ŋ̄ dīī o̍ pēmbo᷄ŋ tɛ̄ɛ̄ŋ Ɛ̍lāā wo̍, mi̍ mūɛ̄ī ndūɛ̄ī ke̍ŋ ī wā na̍nu᷄ŋ. Ī chō ī kɛ̄sīāā o̍ dōma̍ wānāā sōlīāā lāsa̍lāa̍ kɔ̄ɔ̄lī, ī sīmbūlāā o̍ kōlāa̍ ni᷄ŋ. Tē a̍ ye̍e̍ma̍ ke̍ŋ pɛ̍ I̍ ke̍ nu̍m. Ke̍ŋ ko̍ cho̍ ya̍ o̍ bā na̍nu᷄ŋ ni̍.” Mi̍ Dēēve̍ di̍mūl ndu̍ āā, “Mɛ̄ɛ̍ ke̍ ya̍ ke̍ŋ. Wānā sɔ̍lā lɛ̍ īmɔ̄ɔ̄ o̍ īmɔ̄ɔ̄ chēle̍ŋ mī ī hīōū ke̍ŋ na̍ŋɔ̄ɔ̄ le̍.”

¹⁰O̍ ko̍ŋ, mi̍ Dēēve̍ nya̍a̍nu᷄ŋ Sɔ̍ɔ̄ mbo̍ kūānu᷄ŋ Ka̍a̍tī chi̍e̍e̍ nāa̍ māsā bɛ̍ndōo̍ A̍ki̍sī chu̍a̍.

¹¹Mi̍ bu̍ɛ̍i̍yāa̍ māsā bɛ̍ndōo̍ A̍ki̍sī wa̍ ā dīmūl A̍ki̍sī āā, “Dēēvi̍o̍o̍ ho̍ō ndu̍ cho̍ māsāa̍ I̍sɔ̄lūɛ̄ī ni̍. Ndu̍ wāŋ lāāndūa̍a̍ ā sōlu̍l chōnde̍i̍ ni̍ ā wa̍ kɔ̄la̍ŋ a̍ yōla̍ŋ mā sōlī chōnde̍i̍ āā, ‘Sɔ̍ɔ̄ di̍ī ya̍a̍mɔ̍ɔ̍wa̍ o̍ wāa̍la̍ŋ ni᷄ŋ, kɛ̍ Dēēve̍ ndu̍ di̍ī nda̍ wāa̍la̍ŋ o̍ tɔ̍ tɔ̍la̍ŋ ni᷄ŋ.’ ”

¹²Mɛ̄ɛ̍ Dēēve̍ tu̍e̍ī līsā nda̍ wa̍ ndu̍ wo̍, mi̍ sīōōŋnde̍ bīī ndu̍ le̍ māsāa̍ A̍ki̍sī, māsāa̍ Ka̍a̍tī chi̍e̍e̍.

¹³O̍ ko̍ŋ, mi̍ Dēēve̍ to̍sā māā sēēmāa̍ o̍ se̍e̍mā ni̍. Mbo̍ tūndu᷄ŋ ke̍īyo̍ pōōnyīa̍a̍ o̍ dīōla̍ŋ o̍ kpāki̍ ba̍lu̍ chi̍o̍o̍ wo̍, mbō bālū a̍ lɔ̄lūa̍ŋ tūsīo̍o̍ māā wānā se̍e̍mɛ̍i̍.

¹⁴Mi̍ Māsāa̍ A̍ki̍sī lo᷅ o̍ ko̍ŋ, mbo̍ dīmūl bu̍ɛ̍i̍yāā ndūa̍a̍ āā, “Lā chē māā pōo̍ ho̍ō sēēma̍, le̍ yɛ̄ɛ̄ nya̍ chūu̍ yɛ̄ ya̍ ndu̍ na̍nu᷄ŋ?

¹⁵I̍ nɔ̍ ni᷅ŋ wānāā sēēmɛ̍i̍ya̍ chi̍e̍e̍ na̍nu᷄ŋ bɔ̍ɔ̍, lā chu̍ū lɛ̍ ya̍ wānā se̍e̍mɛ̍i̍ chɛ̍le̍ŋ na̍nu᷄ŋ le̍ ya̍ hūnɔ̄ɔ̄ sɔ̄ɔ̍ŋ se̍e̍mɛ̍i̍ wa̍ā nu̍a̍ā tōsāa̍ o̍ hɔ̄l te̍. Lā lu̍e̍i̍lūl la̍ ndu̍ o̍ ya̍ lo̍ chi̍ɛ̍ī ni̍ŋ te̍.”