Read Southern Kisi Sa̍a̍mi̍ɛ̍ɛ̄ Tāso̍o̍ 23 Bible Online

Sa̍a̍mi̍ɛ̍ɛ̄ Tāso̍o̍ 23 - Southern Kisi bible

Sa̍a̍mi̍ɛ̍ɛ̄ Tāso̍o̍ 23

¹O̍ ko̍ŋ kɔ̍ɔ̍lī, mi̍ wāŋnda̍ mālnu᷄ŋ, ma̍ hu᷄ŋ dīmūl Dēēve̍ āā, “Fāllo̍, Fīli̍i̍tīāŋnda̍ hu᷄ŋ de᷄l chi̍o̍o̍ Kɛ̍i̍lāā chōo̍ a̍ sɔ̍ŋgɔ̄ɔ̍. Nyɛ̄ o̍ nyɛ̄ dīa̍a̍ wa̍ nāa̍ nda̍ lūāā wi̍tīi̍yo̍ŋ nda̍ ā kūɛ̄nu᷄ŋ a̍ ndu̍ kpo̍u̍.”

²O̍ ko̍ŋ, mi̍ Dēēve̍ nyu̍nā Mɛ̄lɛ̄ka̍ Ya̍a̍wɛ̄ɛ̄ dīōm āā, “Bāā I̍ kɔ̍ mī kɔ̍ sɔ̍ŋgā a̍ Fīli̍i̍tīāŋnda̍ ha̍ā?” Mi̍ Mɛ̄lɛ̄ka̍ Ya̍a̍wɛ̄ɛ̄ chɛ᷅l āā, “E̍ī, kɔ̍ mā kɔ̍ sɔ̍ŋgā a̍ nda̍ mā ba̍ŋa̍ Ke̍i̍lā.”

³Kɛ̍ mi̍ pūa̍a̍ Dēēve̍ wa̍ dīmūl Dēēve̍ āā, “Fāllo̍, ŋ̄ chō o̍ lɛ̄ŋndē Chu̍dāle̍ŋ ni᷄ŋ na̍nu᷄ŋ, ya̍a̍mɔ̍ɔ̍wa̍ chō na̍a̍ kɔ̄ɔ̄lī, tē ŋ̄ kūɛ̄ ni᷅ŋ sɔ̍ŋgɔ̍ɔ̍ ā Fīli̍i̍tīāŋnda̍ Kɛ̍i̍lāā chi̍e̍e̍ pɛ̍, le̍nde̍ bɛ̍ɛ̍ le̍ i̍ hi̍a̍ū le̍ wɔ̍ū a̍ na̍a̍ le̍?”

⁴O̍ ko̍ŋ kɔ̍ɔ̍lī, mi̍ Dēēve̍ nyu̍nā vɛ̄lɛ̄ Mɛ̄lɛ̄ka̍ Ya̍a̍wɛ̄ɛ̍ dīōm a̍ ndi̍ o̍kɔ̄ɔ̄. Mi̍ Mɛ̄lɛ̄ka̍ Ya̍a̍wɛ̄ɛ̄ di̍mī āā, “Kɔ̍ mā kɔ̍ ba̍ŋā Kɛ̍i̍lāā, I̍ cho̍ nu̍m kpāāyāa̍ kē mā yēm Fīli̍i̍tīāŋnda̍.”

⁵O̍ ko̍ŋ, mi̍ Dēēve̍ chu̍ā pūa̍a̍ chɔ̄ūwa̍ ndūa̍a̍ ma̍ kūā Kɛ̍i̍lāā chi̍e̍e̍ ma̍ kɔ̍ chīŋa̍la᷅ŋ Fīli̍i̍tīāŋnda̍ a̍ sɔ̍ŋgɔ̄ɔ̍. Ndu̍yɛ̍ ma̍ yām Fīli̍i̍tīāŋnda̍, ma̍ dīū nda̍ ta̍u̍ ta̍u̍. O̍ ko̍ŋ kɔ̍ɔ̍lī, ma̍ bīū chɔ̄lūāā ndāa̍ kpo̍u̍ ma̍ kūānu᷄ŋ a̍ nda̍. O̍ ko̍ŋ, mi̍ Dēēve̍ ba̍ŋā wāŋnda̍ Kɛ̍i̍lāā.

⁶Bōōndi̍i̍ Ābīa̍a̍tā, po̍ Āhīmɛ̍lɛ̍kī wo̍, ō wa̍ nyāānɔ᷄ŋndo̍ nāa̍ Dēēve̍ chu̍a̍ Kɛ̍i̍lāā chi̍e̍e̍ ve̍, mbo̍ chūā dōma̍ wānāā sōlīāā lāsa̍lāa̍ mbo̍ kūa̍ a̍ ndu̍ o̍ bā.

⁷O̍ ko̍ŋ kɔ̍ɔ̍lī, mi̍ wāŋndo̍ mālnu᷄ŋ mbo̍ kɔ̍ di̍mūl Sɔ̍ɔ̄ māā Dēēve̍ hi᷅ŋ Kɛ̍i̍lāā chi̍e̍e̍. Mi̍ Sɔ̍ɔ̄ di̍mī āā, “Ɛ̄ɛ̄ hɛ̍ɛ̄, Mɛ̄lɛ̄ka̍ ma᷄l ndu̍ ya̍ o̍ bā. Nāa̍ o̍ lu̍ɛ̍ī ni᷅ŋ ka̍ŋ nda̍ ō hāu̍, ō he̍lūŋ ndɛ̍ ya̍ le̍. Lūɛ̄īyɔ̄ɔ̄ kōŋ ni᷅ŋ o̍ chi̍e̍e̍ cho̍ ō bālāā a̍ sāāsāa̍ kpɔ̍kɔ̍su̍ mi̍ dīōla̍ŋ lā wā lā kīīndīāā a̍ su̍lu̍ku̍la̍ŋ nda̍ lo̍ŋ ya̍ I̍ cho̍ lākɔ̄ ndu̍ bīyɔ̄ɔ̄ mɔ̍ɔ̍su̍ ni̍.”

⁸Mi̍ Sɔ̍ɔ̄ ve̍e̍lū pūa̍a̍ ndūa̍a̍ chɔ̄ūwa̍ kpo̍u̍ na̍a̍ pi᷅lɛ̍, le̍ kɔ̄la̍ŋ Kɛ̍i̍lāā mā kɔ̍ de᷅l Dēēve̍ chōo̍ nda̍ pūa̍a̍ ndūa̍a̍ chɔ̄ūwa̍.

⁹Kɛ̍ mi̍ Dēēve̍ tu̍ɛ̍ī māā Sɔ̍ɔ̄ kɛ̍ɛ̍si̍a̍a̍ le̍ ndu̍ kɔ̄la̍ŋ dēlɔ̄ɔ̍ chōo̍. Mi̍ Dēēve̍ di̍mūl Ābīa̍a̍tā, wānā so̍lī sa̍lāa̍ o̍ Mɛ̄lɛ̄ka̍ lo̍ wo̍ a̍a̍, “Hu̍ŋ a̍ dōma̍ wānāā sōlīāā lāsa̍lāa̍ na̍nu᷄ŋ.”

¹⁰Mɛ̄ɛ̍ Ābīa̍a̍tā hi᷅ŋ a̍ ndu̍, mi̍ Dēēve̍ pīɛ̄ī Mɛ̄lɛ̄ka̍ mbo̍ dīmī āā, “Ōo̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍, I̍ tu̍e̍ī māā Sɔ̍ɔ̄ kɛ̍ɛ̍si̍a̍a̍ le̍ hūnɔ̄ɔ̍ chi̍o̍o̍ ho̍ō dēlɔ̄ɔ̍ chōo̍ mbō tɛ̄ɛ̄mbu̍u̍ ndu̍ le̍ sa̍bū nūu̍.

¹¹Tē Sɔ̍ɔ̄ hi᷅ŋ pɛ̍, bāā pi̍la̍ chīe̍e̍ya̍ na̍nu᷄ŋ a̍ ma᷅l la̍ ni̍ŋ Sɔ̍ɔ̄ o̍ ba̍? Bāā Sɔ̍ɔ̄ hu᷅ŋ ni̍ŋ chi̍e̍e̍ na̍nu᷄ŋ le̍ kɛ̍ndɛ̍ī, mɛ̄ɛ̍ ya̍ I̍ tu̍e̍ī yɛ̍? Yāndi̍i̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍, mu̍li̍ ya̍ dīōm, ya̍ bu̍ɛ̍ī nūmndo̍.” Mi̍ Mɛ̄lɛ̄ka̍ Ya̍a̍wɛ̄ɛ̄ di̍mī āā, “E̍ī, Sɔ̍ɔ̄ cho̍ hūnɔ̄ɔ̄ na̍nu᷄ŋ le̍kɛ̍ndɛ̍ī.”

¹²O̍ ko̍ŋ kɔ̍ɔ̍lī, mi̍ Dēēve̍ nyu̍nā vɛ̍lɛ̄ Mɛ̄lɛ̄ka̍ āā, “Bāā pi̍la̍ chi̍e̍e̍ya̍ chi̍e̍e̍ na̍nu᷄ŋ ā māl ni̍ŋ ya̍ Sɔ̍ɔ̄ o̍ bā na̍a̍ pūa̍a̍ nīa̍a̍ chɔ̄ūwa̍.” Mi̍ Mɛ̄lɛ̄ka̍ Ya̍a̍wɛ̄ɛ̄ di̍mī āā, “E̍ī, ā chō nya̍ mālɔ̄ɔ̄ ndu̍ o̍ bā.”

¹³O̍ ko̍ŋ, mi̍ Dēēve̍ chu̍ā pūa̍a̍ ndūāā kɛ̄mɛ̄ le̍ ŋɔ̍mpu᷅m nda̍ (600) ma̍ fāŋa᷄ŋ Kɛ̍i̍lāā, ma̍ wā ni᷅ŋ bālɔ̄ɔ̍ o̍ fo̍ndāŋndā yɛ̍ yɛ̍la̍ŋ. Mɛ̄ɛ̍ Sɔ̍ɔ̄ tu̍e̍ī māā Dēēve̍ fa̍ŋa̍ŋ Kɛ̍i̍lāā mbo̍ nyāānu᷄ŋ, ndu̍ bɛ̍ɛ̍ ō ku̍e̍ lɛ̍ lo̍ŋ te̍.

¹⁴O̍ ko̍ŋ kɔ̍ɔ̍lī, mi̍ Dēēve̍ kɔ̍ vi̍o̍ŋnu̍ŋ o̍ po̍llo̍ ni᷄ŋ Si̍fī i̍kɛ̍i̍, o̍ lɛ̄ŋnde̍ īpēmbūle̍ŋ ni᷄ŋ. Chɔ̍ŋ ni̍ŋ a̍ te̍le̍ŋ ko̍ŋ, Sɔ̍ɔ̄ wa̍ ni᷅ŋ Dēēve̍ nūūvīa̍a̍ lēpāa̍ o̍ lēpāa̍ le̍ ndu̍ dīyɔ̄ɔ̍. Kɛ̍ Mɛ̄lɛ̄ka̍ chɛ᷄l mbō ma᷄l Dēēve̍ ndu̍ o̍ bā le̍.

¹⁵Mɛ̄ɛ̍ Dēēve̍ chē māā Sɔ̍ɔ̄ cho̍ ndu̍ nūūvīa̍a̍ le̍ ndu̍ dīyɔ̄ɔ̍, mi̍ sīōōŋnde̍ bīī ndu̍. Pāa̍le̍ pi᷅lɛ̍ Dēēve̍ wa̍ Hɔ̍lu̍ɛ̍sīī o̍ po̍llo̍ ni᷄ŋ Si̍fī i̍kɛ̍i̍,

¹⁶mi̍ Chōna̍ta᷅ŋ po̍ Sɔ̄ɔ̍ wo̍ ō ma̍lnu᷄ŋ mbo̍ kōmāl ndu̍ lo̍ŋ. Mbo̍ kɔ̍ nyɔ̍ɔ̍lū ndu̍ kɔ̄llo̍ le̍ mbō hīōū lāchī a̍ tīīnda᷄ŋ ndɔ̄ɔ̍ dɔ̄wɔ̄ɔ̍ o̍ Mɛ̄lɛ̄ka̍ ni᷄ŋ.

¹⁷Mbo̍ dīmūl ndu̍ āā, “Yɔ̍ŋ īsīōōŋ te̍ Dēēve̍, kɛ̄kɛ̍ nɔ̍lā mbō yɔ᷄ŋ nu̍m nyɛ̄ o̍ nyɛ̄ le̍. Ndu̍ bɛ̍ɛ̍ ō sīnā ni᷅ŋ māā tē ō hu᷄ŋ fāŋa̍ŋ pɛ̍, māā nu̍m cho̍ mīīŋgū māsāa̍ I̍sɔ̄lūɛ̄ī ni̍, ndu̍yɛ̍ mī ya̍ I̍ wa̍ nu̍m īkɛ̄i̍.”

¹⁸O̍ ko̍ŋ kɔ̍ɔ̍lī, ma̍ chūēlna᷅ŋ vɛ̍lɛ̄ būŋga᷄ŋ lo̍ŋ, ma̍ mēna᷄ŋ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l. Mi̍ Chōna̍ta᷅ŋ mi̍i̍ŋgu᷄ŋ chi̍e̍e̍, mi̍ Dēēve̍ ndu̍ lɔ̍ Hɔ̍lu̍ɛ̍sīī lo̍ŋ.

¹⁹O̍ ko̍ŋ kɔ̍ɔ̍lī, mi̍ wāŋnda̍ Si̍fī chi̍e̍e̍ a̍ ma̍lnu᷄ŋ ma̍ kūā nāa̍ Sɔ̍ɔ̄ chu̍a̍ Ki̍bīāā chi̍e̍e̍. Ma̍ kɔ̍ di̍mūl Sɔ̍ɔ̄ āā, “Fāllo̍, Dēēve̍ cho̍ ō vīāŋna᷄ŋ o̍ tāndā nāa̍ ni᷄ŋ. O̍ chō Hɔ̍lu̍ɛ̍sīī, o̍ Pēmbīī Ha̍chi̍lāāve̍ chōo̍, kūmbū Chɛ̍su̍i̍mɔ̍tī wo̍ ndo̍ bā tōūwo̍.

²⁰Ŋ̄ sīnā māā a̍ ye̍e̍ma̍ kɛ̍sɛ̍ kɛ̍sɛ̍ mā dīī ndu̍. Le̍la̍ŋ hu̍ŋ lo̍ŋ. Tē ā hīŋ lo̍ŋ pɛ̍, na̍a̍ ŋ̍ cho̍ ndu̍ bīyɔ̄ɔ̄ kpa̍ ni̍, mī ŋ̄ ke̍ nu̍m ndu̍.”

²¹Mi̍ Sɔ̍ɔ̄ du̍a̍ū nda̍ sa̍lā āā, “Mbɔ̄ Mɛ̄lɛ̄ka̍ Ya̍a̍wɛ̄ɛ̄ dɔ̄u̍ nya̍ sa̍lā le̍ yīya᷄ŋ kɛ̍ndɛ̄ nya̍ nɔ̍ le̍ ya̍ wo̍.

²²Kɛ̍ lā kɔ̍ mī lā kɔ̍ chɔ̍ɔ̍lū nūūvīāā mī lā sīna̍ nāa̍ kpe̍e̍kpe̍i̍ o̍ vi̍a̍ŋnūŋ nda̍. Ndu̍yɛ̍ mī lā sīna̍ vɛ̄lɛ̄ wānā kpe̍e̍kpe̍i̍ sa̍a̍lu̍ŋ ndu̍ lo̍ŋ ndo̍, fo̍ndōle̍, ā dīmu̍l la̍ māā kɔ̄l kālo̍o̍ pīla̍ o̍ nɔ̍ ni̍.

²³Le̍la̍ŋ lā kɔ̍ chɔ̍ɔ̍lū nūūvīāā, mī lā sīna̍ fo̍ndāŋndā o̍ vi̍a̍ŋnūŋ nda̍ŋ. Lā sāālu̍ŋ ndɔ̍ɔ̍ pɛ̍ na̍a̍ o̍ ku̍ā vi̍ŋi᷄ŋndo̍ wa̍, lā mīīŋgu̍ na̍nu᷄ŋ lā hu᷄ŋ di̍mūl la̍. O̍ ko̍ŋ, mī ŋ̄ kūɛ̄ na̍a̍ nya̍ā. Tē ō wa̍ lo̍ŋ pɛ̍ le̍ kɛ̍ndɛ̍ī, bā o̍ bā o̍ sɔ̍ɔ̍ŋa̍ o̍ lɛ̄ŋndē Chu̍dāle̍ŋ ni᷄ŋ, I̍ cho̍ ndu̍ lō nūūwāa̍ ha̍a̍a̍ mī bi̍ī ndu̍.”

²⁴O̍ ko̍ŋ, mi̍ pūa̍a̍ hi᷅ŋ a̍ yōōŋgōo̍ nāā Sɔ̍ɔ̄ chu̍a̍ wa̍ cha̍ŋ ma̍ mīīŋgū Si̍fī, mi̍ nda̍ hīāū pɔ̍ɔ̍ Sɔ̍ɔ̄ lāchī. Mi̍ Dēēve̍ nda̍ pūa̍a̍ ndūa̍a̍ chɔ̄ūwa̍ ā fāŋa᷄ŋ nāa̍ nda̍ wa̍ wa̍, ma̍ kūā o̍ po̍llo̍ ni᷄ŋ Ma̍wɔ̄ŋ, o̍ lɛ̄ŋndē dɛ̍ŋgbɛ̍le̍ŋ kūmbū Chɛ̍su̍i̍mɔ̍tī wo̍ ndo̍, bā tōūwo̍.

²⁵Mi̍ Sɔ̍ɔ̄ chu̍ā pūa̍a̍ ndūa̍a̍ chɔ̄ūwa̍ ma̍ kūā Dēēve̍ nūūvīa̍a̍. Kɛ̍ mi̍ Dēēve̍ tu̍ɛ̍ī māā Sɔ̍ɔ̄ cho̍ ndu̍ nūūvīa̍a̍. O̍ ko̍ŋ, mbo̍ chūā pūa̍a̍ ndūa̍a̍ chɔ̄ūwa̍ ma̍ kūānu᷄ŋ o̍ pēmbīi̍ nɔ̍ pōūtā bɛ̄ŋnda̍ŋ nde̍ ma̍ kɔ̍ vi̍o̍ŋnu̍ŋ lo̍ŋ. Mɛ̄ɛ̍ Sɔ̍ɔ̄ tu̍e̍ī māā Dēēve̍ cho̍ ō vīāŋna᷄ŋ o̍ po̍llo̍ ni᷄ŋ Ma̍wɔ̄ŋ, mbo̍ chūā pūa̍a̍ ndūa̍a̍ ma̍ kūā ndu̍ nūūvīa̍a̍.

²⁶Ma̍ kūā nāa̍ o̍ wa̍ ō vīāŋna᷄ŋ o̍ pēmbēi̍ wa̍. Nda̍ wa̍ o̍ pēmbēi̍ kpēŋgēi̍ pīlɛ̍i̍, Dēēve̍ nda̍ pūa̍a̍ ndūa̍a̍ nda̍ chō kpēŋgēi̍ pīlɛ̍i̍. Pūa̍a̍ Sɔ̍ɔ̄ wa̍ ā wa̍ ā tīūwāā sɔ̍. Ā wa̍ ni᷅ŋ Dēēve̍ nda̍ pūa̍a̍ ndūa̍a̍ fi̍ɔ̍ɔ̍ndɔ̍ɔ̍ fi̍ɔ̍ɔ̍ndɔ̍ɔ̍ le̍ nda̍ bīyɔ̄ɔ̍. Dēēve̍ nda̍ pūa̍a̍ ndūa̍a̍ ā wa̍ ni᷅ŋ kēlēŋāa̍ kpe̍e̍kpe̍i̍ le̍ mī nda̍ a̍a̍ nya̍a̍nu̍ŋ.

²⁷O̍ ko̍ŋ, mi̍ Ki̍i̍la̍nɔ̍ɔ̍ kōmāl Sɔ̍ɔ̄, mbo̍ dīmūl ndu̍ āā, “Fāllo̍, lā kēle̍ŋa̍ mi̍i̍ŋgū chɔ̍ chɔ̍. Fīli̍i̍tīāŋnda̍ kōma̍ de᷅l lɛ̄ŋnde̍ŋ cho̍o̍.”

²⁸O̍ ko̍ŋ kɔ̍ɔ̍lī, mi̍ Sɔ̍ɔ̄ fa̍ŋa᷄ŋ Dēēve̍ kɔ̄ɔ̄lī, mbo̍ mīīŋgū le̍ sɔ̍ŋgɔ̄ɔ̍ a̍ Fīli̍i̍tīāŋnda̍. Nyɛ̄ ko̍ŋ to̍sa̍ ni̍, mi̍ wāŋnda̍ kē fo̍ndā kōŋ dīōla̍ŋ āā, “Pēmbīī wāŋnda̍ pīɔ̄ūvi̍āŋ nde̍.”

²⁹O̍ ko̍ŋ kɔ̍ɔ̍lī, mi̍ Dēēve̍ fa̍ŋa᷄ŋ lo̍ŋ mbo̍ kūānu᷄ŋ o̍ būŋgɛ̄ī Ɛ̄nīkɛ̍dīve̍ ni᷄ŋ mbo̍ kɔ̍ vi̍o̍ŋnu᷄ŋ lo̍ŋ.