Read Southern Kisi Sa̍a̍mi̍ɛ̍ɛ̄ Tāso̍o̍ 25 Bible Online

Sa̍a̍mi̍ɛ̍ɛ̄ Tāso̍o̍ 25 - Southern Kisi bible

Sa̍a̍mi̍ɛ̍ɛ̄ Tāso̍o̍ 25

¹Mi̍ ī yɔ̄nu᷄ŋ, mi̍ Sa̍a̍mi̍ɛ̍ɛ̄ wāna̍ su̍a̍ā le̍ Mɛ̄lɛ̄ka̍ wo̍ ō wu᷅. Mɛ̄ɛ̍ o̍ vi᷅, mi̍ I̍sɔ̄lūɛ̍i̍ya̍ chūūŋgi̍āŋ kpo̍u̍ ma̍ kɔ̍ bɛ̄ɛ̄ndīāā dɛ̍nɛ̍la̍ ndɔ̄la̍ŋ. O̍ ko̍ŋ kɔ̍ɔ̍lī, ma̍ kɔ̍ chɔ̄ ndu̍ o̍ ndu̍lo̍ chi̍e̍e̍ Lu̍a̍mā. Mɛ̄ɛ̍ dɛ̍nɛ̍la̍ bīīsi̍la̍ Sa̍a̍mi̍ɛ̍ɛ̄ la̍ŋ lā chūu̍, mi̍ Dēēve̍ ku̍a̍ŋnu᷄ŋ o̍ po̍llo̍ ni᷄ŋ Pa̍lūāŋ.

²Po̍ pi᷅lɛ̍ wa̍ Ma̍wɔ̄ŋ chi̍e̍e̍ dīōla̍ŋ āā Na̍bāl, fūlāa̍ o̍ ku̍nda̍ Ke̍lɛ̍bī wo̍ chōo̍. Ndu̍yɛ̍ pōo̍ ho̍ō wānā su̍lāa̍ bɛ̄ndōo̍ pīla̍ o̍ wa̍ ni̍. Ndu̍ o̍o̍ nɔ̍ sāa̍ wāa̍la̍ŋ lā yāa̍ (3,000), o̍ ko̍ŋ kɔ̍ɔ̍lī, a̍ chūīŋnda̍ wāa̍ ō pīlɛ̍ (1,000). Ndu̍yɛ̍ ndu̍ o̍o̍ nɔ̍ vɛ̄lɛ̄ lɛ̄ŋnde̍ŋ Ka̍mɛ̄l i̍kɛ̍i̍. Pōo̍ ho̍ō ndu̍ o̍o̍ nɔ̍ la̍nɔ̍ɔ̍ dīōla̍ŋ āā Ābi̍kēē. Chūa̍a̍ ho̍ō nāŋɔ̄ɔ̍ pīla̍ ndu̍ o̍o̍ na̍nu᷄ŋ ni̍, ndu̍yɛ̍ tāāsi̍o̍o̍ pīla̍ ndu̍ o̍o̍ nɔ̍ ni̍. Kɛ̍ pōo̍ ho̍ō wāna̍ kɔ̄l vēsɛ̍i̍yo̍ pīla̍ o̍ wa̍ ni̍. Ndu̍yɛ̍ vɛ̍lɛ̄ kɔ̄l bɛ̄ndōo̍ pīla̍ ndu̍ o̍o̍ nɔ̍ ni̍. Pāa̍le̍ pi᷅lɛ̍,

⁴Dēēve̍ wa̍ o̍ po̍llo̍ ni᷄ŋ Pa̍lūāŋ mbo̍ tūɛ̄ī māā Na̍bāl cho̍ sāa̍ ndūa̍a̍ yīīŋnde̍ kīlīo̍o̍ Ka̍mɛ̄l chi̍e̍e̍.

⁵O̍ ko̍ŋ, mi̍ Dēēve̍ hɛ̍lī pūa̍a̍ ndūa̍a̍ chɔ̄ūwa̍ ŋ̄wāŋ tɔ̍ mbo̍ vīām nda̍ le̍ mā kɔ̍ yi᷅l Na̍bāl.

⁶Mɛ̄ɛ̍ nda̍ wa̍ kɔ̄la̍ŋ, mbo̍ chōŋgu᷄ŋ nda̍ āā, “Lā kɔ̍ di̍mūl Na̍bāl māā ya̍ Dēēve̍ yi᷄l ndu̍. Māā Mɛ̄lɛ̄ka̍ dɔ̍u̍ ndu̍ sa̍lā a̍ yu̍ŋgu̍ ndɔ̄ɔ̍ ndu̍yɛ̍ a̍ wānāā ndūa̍a̍ kpo̍u̍.

⁷Māā I̍ tu̍e̍ī māā ō chō sāa̍ ndūa̍a̍ yīīŋnde̍ kīlīo̍o̍, nyɛ̄ kōŋ ya̍ I̍ ve᷅m nya̍ nāa̍ ndu̍ chu̍a̍ ni̍ mbo̍ māla̍ ya̍. Māā bōōndi̍i̍ na̍a̍ ŋ̄ wa̍ na̍a̍ wānāā ndūāā ma̍ndāā lāsāa̍ lātūlu̍ ve̍, ŋ̄ wa̍ nda̍ bīyɔ̄ɔ̍ nyɛ̄ kɛ̄ndɛ̄ kɛ̍ndɛ̄. Ā fāŋa̍ŋ Ka̍mɛ̄l le̍nde̍, o̍ pāa̍le̍ŋ ni᷄ŋ bɛ̍ɛ̍ vīīnɔ̄ chi̍i̍mbu̍u̍ nyɛ᷅m nda̍ŋ ō pīlɛ̍ bɛ̍ɛ̍ le̍.

⁸Māā tē ō yēēma̍ mbō fu̍la̍ kɔ̄ɔ̄lī pɛ̍, o̍ nyūna̍ wɔ̍ pu̍a̍a̍ ndūa̍a̍, ā nɔ̄lā mā dīmu̍l ndu̍. Lā dīmu̍l ndu̍ māā ŋ̄ hīŋ o̍ bɔ̄ŋa᷅ŋ kɔ̄l kɛ̄ndɔ̄ɔ̍, nyɛ̄ kōŋ ya̍ I̍ ve᷅m nya̍ na̍a̍ ndu̍ chu̍a̍ ni̍ le̍ mbō hu̍ŋ ma̍lā na̍a̍. Le̍la̍ŋ māā yāndi̍i̍, nyɛ̄ o̍ nyɛ̄ ō nɔ̄ pɛ̍ le̍ nyā a̍ ya̍ ndi̍a̍a̍mɔ̍ɔ̍nɔ̍ ndɔ̄ɔ̍ Dēēve̍ ō chāā na̍a̍ kē.”

⁹O̍ ko̍ŋ, mi̍ pūa̍a̍ Dēēvi̍a̍a̍ mālnu᷄ŋ ma̍ kūā ma̍ kɔ̍ di̍mūl Na̍bāl nyɛ̄ o̍ nyɛ̄ Dēēve̍ cho̍ŋgu̍ŋ nda̍. Mɛ̄ɛ̍ nda̍ chīi̍ ndu̍ ko̍na̍ do̍u̍nɔ᷄ŋ kpo̍u̍, ma̍ chāl ndu̍ ni̍ko̍ chu᷅m le̍ mbō mūli̍ nda̍ dīōm.

¹⁰Mi̍ Na̍bāl lo᷅ o̍ ko̍ŋ, mbo̍ nyūnā nda̍ āā, “Dēēve̍ kūɛ̍ɛ̍nɛ̍ cho̍ yɛ̄ Dēēve̍ ko̍ŋ? O̍ pāa̍le̍ŋ ni᷄ŋ bɛ̍ɛ̍ I̍ si̍nā ndu̍ le̍. Mbɔ̄ chīa̍a̍ cho̍ wānāā ndāā ba̍nāa̍ hīɔ̄lɔ᷄ŋndo̍ mā nyāānūŋ nda̍ bɛ̍ɛ̍ ā kūi̍i̍ ni᷅ŋ lɛ̄ŋnde̍ŋ fɔ̍.

¹¹Ō cho̍ wɔ̍ sɔ̍ɔ̍ŋ kpo̍u̍ le̍ kɛ̍ bēe̍dīi̍ nī, mɛ̄ŋndē nī le̍ ko̍lāā ni̍ lā sɔ̍lā ya̍ o̍ bā le̍, kɛ̄lɛ̄ŋgāā ni᷅ŋ te̍, nyɛ̄ māhīlū ya̍ I̍ bɛ̍ɛ̍ndi̍a̍a̍ le̍ wānāā nīa̍a̍ cho̍ ya̍ sāa̍ yīīŋnde̍ kīlūllo̍ wa̍ wo̍, fo̍ndōle̍, i̍ si̍nā nya̍ le̍.”

¹²O̍ ko̍ŋ kɔ̍ɔ̍lī, mi̍ pūa̍a̍ Dēēvi̍a̍a̍ cha᷄ŋ ma̍ mīīŋgū. Dīōm o̍ dīōm Na̍bāl so̍ō, ma̍ kɔ̍ do̍u̍nu᷄ŋ Dēēve̍ ko̍na̍.

¹³Mɛ̄ɛ̍ Dēēve̍ tu̍e̍ī ko̍na̍ pūa̍a̍ ndūa̍a̍ ā dōōnu̍ŋ ndu̍ wo̍, mbo̍ dīmūl pūa̍a̍ ndūa̍a̍ āā, “Lā chu̍a̍ mɔ̍ɔ̄ŋ nyāa̍ŋ ŋ̄ kɔ̄ŋnu᷅ŋ.” Mi̍ pūa̍a̍ chūā mɔ̄ɔ̄ŋ nda̍ŋ chɔ̄ūwo̍ŋ ma̍ sāāyīa̍ŋ. Dēēve̍ pi̍la̍ bɛ̍ɛ̍ mbo̍ chūā mūɛ̄ī ndūɛ̍i̍ mbo̍ sāāyīa̍ŋ. Mi̍ Dēēve̍ chu̍ā pūa̍a̍ chɔ̄ūwa̍ kɛ̄mɔ̄ɔ̍ lē hīɔ̍ɔ̍lu̍ (400) ma̍ bīī kɔ̄la̍ŋ. Mbo̍ mɛ̄ī pūa̍a̍ kɛ̍mɛ̄ lē di̍i̍ŋ nda̍ ā pīli̍a̍a̍ (200) le̍ mī nda̍ kōma̍ wa᷅ wōlɔ̄ɔ̄la̍ŋ īkɛ̄i̍.

¹⁴Kɛ̍ mi̍ bu̍ɛ̍i̍ya̍a̍ Na̍bāl wa̍ ō pīlɔ̍ɔ̍ ō dīmūl Ābi̍kēē, la̍nɔ̍ɔ̍ Na̍bāl āā, “Wɛ̄ɛ̄ŋndo̍, ā tūēī nyɛ̍ yɔ̍nu̍ŋ ndo̍? Dēēve̍ yɔ̍ŋ pūa̍a̍ ndūa̍a̍, chɔ̄nɔ᷄ŋndo̍ o̍ po̍llo̍ ni᷄ŋ māā ā hu᷄ŋ mā hu᷄ŋ yi᷅l māsānɔ̍ nāa̍, kɛ̍ mi̍ māsānɔ̍ nāa̍ hu᷄ŋ yi̍o̍ū nda̍ yīōūla̍ŋ pīla̍.

¹⁵Ndu̍yɛ̍ pūa̍a̍ ka̍ŋ kɛ̄ɛ̄ma̍ sɔ̍lā nda̍ le̍. Ŋ̄ wa̍ sāa̍ māndāa̍ nda̍ īkɛ̄i̍ yo̍ndōo̍ ni̍ŋ le̍ te̍le̍ŋ vi̍lɛ̄ī, pāa̍le̍ pi᷅lɛ̍ bɛ̍ɛ̍ ā yɔ᷄ŋ na̍a̍ nyɛ̄ le̍. Ndu̍yɛ̍ o̍ pāa̍le̍ŋ ni᷄ŋ bɛ̍ɛ̍ vīīnɔ̄ chi̍i̍mbu̍u̍ nyɛ᷅ nāā le̍. Ma̍ bīī na̍a̍ nyɛ̄ kɛ̄ndɛ̄ kɛ̍ndɛ̄.

¹⁶Te̍le̍ŋ vi̍lɛ̄ī na̍a̍ ŋ̄ chi̍i̍ ko̍ŋ sa̍a̍ māndāa̍ nda̍ īkɛ̄i̍ yo̍ kpo̍u̍ wo̍, nda̍ wa̍ na̍a̍ māndāa̍ ni̍, īchɔ̄l ni̍, īpāla̍ ni̍.

¹⁷Le̍la̍ŋ, mɛ̄ɛ̍ mā mɛ̍ɛ̍nda̍ŋ o̍ sūɛ̍i̍ ke̍ŋ ni᷄ŋ mā bīī ndi̍ mɛ̄ɛ̍ ŋ̄ nɔ̄ le̍ bīyɔ̄ɔ̍ yɛ̍. Tē ō cho̍ ko̍ŋ te̍, dɛ̍nɛ̍ pa̍lāā bɛ̄ndōo̍ chō hūnɔ̄ɔ̄ māsānɔ̍ nāa̍ tōlɔ̄ɔ̄ chōo̍ a̍ yu̍ŋgu̍ ndɔ̄ɔ̍ kpo̍u̍. Māsānɔ̍ nāa̍ yɛ̄ wɔ̄ūle̍ŋ pīla̍ o̍ wɔ̍u̍ ni̍. Ō chɛ᷅l bɛ̍ɛ̍ mī wānā so̍ō nāa̍ ndu̍ chu̍a̍ le̍.”

¹⁸O̍ ko̍ŋ, mi̍ Ābi̍kēē cha̍ŋ chɔ̍ chɔ̍ mbo̍ chūā bēe̍dīi̍yo̍ kpūŋgba᷄ŋ kɛ̄mɔ̄ɔ̍ lē dīi̍ŋ (200) o̍ ko̍ŋ kɔ̍ɔ̍lī, a̍ mūɛ̄īya̍ŋ bɔ̄lɔ̄la̍ māmūɛ̄īla̍ŋ lā tīɔ̍ɔ̍ŋ, a̍ sāā tu̍ɛ̍i̍yāa̍ ā ŋūɛ̍ɛ̍nu̍ a̍ ba̍a̍līi̍yo̍ŋ bu̍sɔ̄ɔ̍ le̍ dīi̍ŋ, a̍ kīle̍pīi̍ma̍ ve̍sɛ̍i̍ya̍ŋ kpɔ̄ŋnjɔ̄la̍ŋ kɛ̄mɛ̄ (100), a̍ fi̍kīi̍ma̍ ŋ̍kpu̍ŋgba᷄ŋ kpūŋgba᷄ŋ kɛ̄mɔ̄ɔ̍ lē dīi̍ŋ (200), mbo̍ dōvī sōfɛ̍li̍a̍a̍ o̍ lākɔ̄ɔ̄.

¹⁹Mbo̍ dīmūl bu̍ɛ̍i̍yāā ndūa̍a̍ āā, “Lā hīo̍u̍ pɔ̍ɔ̍ ya̍ lāchī a̍ wōlɔ̄ɔ̄la̍ŋ nda̍ŋ, I̍ cho̍ kɔ̄ɔ̄lī.” Kɛ̍ ō dīmu̍l Na̍bāl, pɔ̍nɔ̍ ndɔ̍, a̍ ndi̍ o̍kɔ̄ɔ̄ le̍.

²⁰Mbo̍ hēl o̍ sōfɛ̍lɛ̍ ndɔ̄ɔ̍ chōo̍ mbo̍ bīī kɔ̄la̍ŋ. Mɛ̄ɛ̍ o̍ fu̍u̍lu̍u̍ o̍ Pēmbēi̍ bɛ̄ŋgu̍, ma̍ bɔ̄ŋa᷅ŋ nda̍ Dēēve̍ a̍ pūa̍a̍ ndūa̍a̍, ā wa̍ pēmbēi̍ tōlɔ̄ɔ̍ ndu̍ o̍ ībūŋ.

²¹Dēēve̍ wa̍ hūnɔ̄ɔ̍ a̍ dīmīo̍o̍ āā, “Mɛ̄ɛ̍ lāŋu̍nɔ̄ɔ̍ ho̍ō kɛ̄ndɛ̄i̍ ya̍ I̍ to̍sa̍l ndu̍ ve̍, ndi̍ o̍ mi̍ŋgu̍l la̍ he̍ī a̍ īwɔ̄ɔ̍ŋnde̍ ni̍? Tē ya̍ i̍i̍ si̍na̍ pɛ̍, I̍ ve̍ nyɛ᷅m ndɔ̍ŋ chīɔ̄ū le̍. Nyɛ̄m ndɔ̍ŋ wa̍ o̍ po̍llo̍ ni᷄ŋ mi̍ lo᷅ mu̍ŋ māndāa̍ ha̍a̍a̍ ō pīlɛ̍ bɛ̍ɛ̍ fe̍ŋa̍ŋ le̍cho̍ō le̍. Le̍la̍ŋ o̍ to̍sāl la̍ nu̍a̍ā ni̍?

²²Sīɔ̄dīi̍ īdīi̍ ndu̍ ndu̍ wānā pɔ̍nɔ̍ o̍ wānā pɔ̍nɔ̍ cho̍ o̍ Na̍bāl lo̍ chi̍ɛ̍ī ni̍ŋ, ō pīlɛ̍ bɛ̍ɛ̍ tē I̍ mɛ̍i̍ ndu̍ le̍ dīyɔ̄ɔ̍ pɛ̍, Mɛ̄lɛ̄ka̍ tūsi̍ ya̍ nyɛ̄ pālāa̍ chōo̍.” Dēēve̍ chīīyo̍ dīōm kōŋ dīmīo̍o̍ ki̍nɛ̍i̍ ma̍ bɔ̄ŋa᷅ŋ nda̍ Ābi̍kēē la̍nɔ̍ɔ̍ Na̍bāl.

²³Mɛ̄ɛ̍ Ābi̍kēē che᷅ Dēēve̍, mbo̍ tūāl o̍ sōfɛ̍lɛ̍ ndɔ̄ɔ̍ chōo̍ chɔ̍ chɔ̍ mbo̍ kɔ̍ de᷅l lɛ̄ŋ

²⁴Dēēve̍ o̍ lābɛ̄ŋgu̍ ni̍ŋ. Mbo̍ dīmūl Dēēve̍ āā, “Yāndi̍i̍ māsānɔ̄ɔ̍ nūu̍, I̍ su̍a̍ā wɔ̍ nāa̍ nūm chu̍a̍. Nyɛ̄ o̍ nyɛ̍ yɔ̍nu̍ŋ, ya̍ ŋ̄ dɔ̄u̍ tɔ̍ɔ̍ya̍ŋ ko̍ŋ chōo̍ ni̍.

²⁵To̍fā Na̍bāl te̍, wānā fo̍ndō fu̍u̍ ō cho̍ŋnu̍ŋ ni̍, kɔ̄l kālu̍ bɛ̍ɛ̍ ō nɔ̍ le̍. Mɛ̄ɛ̍ o̍ nɔ̍ dīōla̍ŋ āā dīɔ̄mndo̍ yɛ̍, le̍nde̍ ko̍ o̍ cho̍ŋnu̍ŋ ni̍, ō nɔ̍ kɔ̍l kālu̍ le̍. Bōōndi̍i̍ pūa̍a̍ nu̍mnda̍ kūɛ̄ ve̍, ŋ̄ chīīki̍āŋ na̍a̍ nda̍ā le̍.

²⁶Le̍la̍ŋ, Mɛ̄lɛ̄ka̍ Ya̍a̍wɛ̄ɛ̄ pi̍la̍ kpe̍e̍kpe̍i̍ to̍sa̍ tōsāa̍ ho̍ō a̍ sa̍bū ni̍, ō chɛ᷄l mī nūm pi̍la̍ kɔ̍ mi̍ŋgūl ya̍a̍mɔ̍ɔ̍wa̍a̍ nu̍mnda̍ māa̍ ndu̍yɛ̍, mā dīī wānā o̍ wānā le̍. Kɛ̍ ndu̍yɛ̍ wānā o̍ wāna̍ cho̍ nɛ̄īla̍ŋ nūūwāa̍ le̍ nu̍m īwɔ̄ɔ̍ŋnde̍ tōsāllo̍, le̍ Mɛ̄lɛ̄ka̍, nu̍a̍ā nyɛ̄ pālāa̍ ō tūāl nda̍ chōo̍ mɛ̄ɛ̍ o̍ cho̍ Na̍bāl tōlɔ̄ɔ̄ chōo̍ yɛ̍.

²⁷Le̍la̍ŋ yāndi̍i̍ māsānɔ̄ɔ̍, me̍lnu̍ŋ ya̍ le̍ nyɛ̍ yɔ̍nu̍ŋ ndo̍. Ā chē nyɛ̄ dīāā ya̍ I̍ chu̍u̍ nu̍m ndo̍ mā ke̍ pūa̍a̍ nu̍mnda̍. I̍ si̍nā kpe̍e̍kpe̍i̍ māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ tōsā a̍ sa̍bū mā hu̍ŋ si̍mnu᷄ŋ ma̍sāa̍ le̍ I̍sɔ̄lūɛ̄ī, ndu̍yɛ̍ mbō tōsa̍, mī māsāle̍ŋ lē hīōū lāchī a̍ wāa̍ o̍ pūlālē nūmnde̍ŋ chōo̍ le̍ fɛ̍ɛ̍ŋ a̍ fɛ̍ɛ̍ŋ, fo̍ndōle̍, le̍ mɛ̄ɛ̍ ŋ̄ chō sɔ̍ŋgɔ̄ɔ̍ a̍ ya̍a̍mɔ̍ɔ̍wa̍a̍ ndūa̍a̍ yɛ̍. Ndu̍yɛ̍ I̍ cho̍ pīɛ̄īle̍ŋ māā ha̍a̍a̍ a̍ mɛ̄ɛ̄lu̍la̍ yōōmū nūmndo̍, māā a̍ to̍sāl wānā o̍ wānā su̍ɛ̍i̍ wɔ̍ɔ̍ŋ te̍.

²⁸

²⁹Ya̍a̍mɔ̍ɔ̍wa̍a̍ nu̍mnda̍ sīmu̍l nu̍m bɛ̍ɛ̍ mā wa̍ nu̍m kīlta̍ŋ kɔ̄ɔ̄lī le̍ nu̍m dīyɔ̄ɔ̍, māndāa̍ Mɛ̄lɛ̄ka̍ nūmndo̍ Ya̍a̍wɛ̄ɛ̄ o̍ ma̍ndā yo̍o̍mū nūmndo̍ ni̍, mɛ̄ɛ̍ wāŋndo̍ ō māndā nu̍a̍ā nyɛ̄m ndɔ̍ŋ ba̍ā ŋ̄ kāla᷄ŋ yɛ̍, mbō chīīndi̍a̍a̍ nu̍m. Kɛ̍ ya̍a̍mɔ̍ɔ̍wa̍a̍ nu̍mnda̍ nda̍ mbō chu̍a̍ yōōmūlā ndāla̍ŋ mbō vīōū la̍ŋ, fo̍ko̍lo̍ mɛ̄ɛ̍ nda̍ vīāū nu̍a̍ā pōū fa̍āŋnda̍a̍ yɛ̍.

³⁰Nyɛ̄ o̍ nyɛ̄ kɛ̄ndɛ̄ Mɛ̄lɛ̄ka̍ Ya̍a̍wɛ̄ɛ̄ o̍ chu̍e̍l nu̍m būŋgɛ̄i̍ le̍ nu̍m tōsāllo̍, te̍le̍ŋ cho̍ hūnɔ̄ɔ̄ fūūlūū mbō tōsa̍l nu̍m mu̍ŋ kpo̍u̍. Ō chō hūnɔ̄ɔ̄ tōsā mā sīmnu᷄ŋ ma̍sāa̍ le̍ I̍sɔ̄lūɛ̄ī.

³¹A̍ te̍le̍ŋ ko̍ŋ, ā yɔ̍ŋ bɛ̍ɛ̍ mā hu̍ŋ di̍ī wāna̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍ wo̍, a̍ te̍mbū kɔ᷅l te̍. A̍ bi̍ī lɛ̍ mɔ̍nɛ̍i̍ o̍ kɔ̄l nūm ndo̍ ni᷄ŋ le̍ ya̍a̍mɔ̍ɔ̍wa̍a̍ nu̍mnda̍ māa̍ mīŋgūl te̍.”

³²Mi̍ Dēēve̍ lo᷅ o̍ ko̍ŋ mbo̍ dīmūl Ābi̍kēē āā, “Mbɔ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ pīɛ̄īyo̍ ō bāli̍ka̍. Mɛ̄lɛ̄ka̍ kpe̍e̍kpe̍i̍ ve᷅m nu̍m vīōmɔ̄ɔ̍ ho̍ō ni̍ mi̍ ŋ̄ bɔ̄ŋa᷅ŋ na̍a̍ nūm.

³³Nu̍a̍ā Mɛ̄lɛ̄ka̍ dūāū nu̍m sa̍lā le̍ kɔ̄l kālu̍ bɛ̍ndū ŋ̄ tōsa̍ ho̍ō wo̍. Kɔ̄l kālo̍o̍ pīla̍ ŋ̄ tōsa̍ tōsāa̍ ho̍ō ni̍. A̍ to̍sa̍, māa̍ ya̍ I̍ kɛ̍ɛ̍si̍a̍a̍ le̍ kɔ̄la̍ŋ mīŋgīo̍o̍ wo̍, ya̍ pi̍la̍ I̍ mi̍ŋgī lɛ̍ ni̍ŋ ndu̍ le̍. Mbɔ̄ Mɛ̄lɛ̄ka̍ bāli̍ka̍.

³⁴Mɛ̄lɛ̄ka̍ Ya̍a̍wɛ̄ɛ̄ pi̍la̍ kpe̍e̍kpe̍i̍ kɛ̍ɛ̍lu̍ ya̍ kɛ̄ɛ̄lōo̍ ho̍ō le̍ nya̍ kɔ̄la̍ŋ dīūwo̍ ni̍. Tē ō cho̍ ko̍ŋ te̍ I̍ me̍na̍ŋ o̍ Mɛ̄lɛ̄ka̍ Ya̍a̍wɛ̄ɛ̄ po̍, I̍sɔ̄lūɛ̍i̍ya̍ Mɛ̄lɛ̄ka̍ nda̍ cho̍ yōōmū le̍ fɛ̍ɛ̍ŋ a̍ fɛ̍ɛ̍ŋ ndo̍, Na̍bāl ndu̍ ndu̍ dīyɔ̄ɔ̍ ya̍ I̍ wa̍ ndu̍ lākɔ̄ sīɔ̄dīi̍ īdīi̍ ni̍, ndu̍yɛ̍ wānā pɔ̍nɔ̍ o̍ wānā cho̍ o̍ ndu̍ lo̍ chi̍ɛ̍ī ni̍ŋ nda̍ bɛ̍ɛ̍ mī ya̍ i̍i̍ di̍u̍ nda̍ kpo̍u̍.”

³⁵O̍ ko̍ŋ, mi̍ Dēēve̍ bi̍ī nyɛ̄ dīāā o̍ chu̍u̍ ndu̍ wo̍. Mbo̍ lō o̍ ko̍ŋ mbo̍ dīmūl ndu̍ āā, “Bu̍u̍la᷄ŋ te̍ I̍ tu̍e̍ī nyɛ̄ ŋ̄ dīmi̍ wo̍. I̍ cho̍ lɛ̍ pɔ̍nɔ̍ nu̍m nyɛ̄ yɔ̄ŋ te̍.”

³⁶O̍ ko̍ŋ kɔ̍ɔ̍lī, mi̍ Ābi̍kēē cha̍ŋ mbo̍ mīīŋgū. Ō kōma̍l Na̍bāl to̍sa̍ bɔ̄ŋa᷅ŋ kɔ̄l kɛ̄ndɛ̄ bɛ̄ndōo̍, wāna̍ a̍a̍ cha᷅ ko̍ bɛ̍ɛ̍ āā Māsā bɛ̍ndōo̍ ve̍e̍lu̍ du̍nyɛ̍i̍ ni̍. O̍ wānu̍ŋ o̍ mūɛ̄īya̍ŋ ni᷄ŋ yi᷅kpi̍ bɛ̍ndū. Ndu̍ o̍o̍ chi̍i̍ di̍o̍la̍ŋ sɛ̄nɛ̄ī mbo̍ hīnī kɔ̄l nyɛ̄ kɛ̄ndɛ̄ kɛ̍ndɛ̄. Mɛ̄ɛ̍ Ābi̍kēē ko̍ma̍l ndu̍ le̍nde̍, ō nɔ̄la̍ mbō dīmu̍l ndu̍ nyɛ̄ o̍ nyɛ̄ le̍, mbo̍ chūm ha̍a̍a̍ mi̍ pāa̍le̍ŋ lē sīā dīi̍mā ndɔ̄ɔ̍.

³⁷Mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍ mi̍ mūɛ̄īya̍ŋ mā kīōlu̍ ndu̍ o̍ hɔ̄l, mi̍ Ābi̍kēē chɔ᷅m ndu̍ nyɛ̄ o̍ nyɛ̍ yɔ̍nu̍ŋ. Mɛ̄ɛ̍ Na̍bāl tu̍e̍ī a̍ su̍ɛ̍i̍ he̍ī o̍kɔ̄ɔ̄, mbo̍ dēl mbo̍ wōū kpa̍nɛ̍i̍.

³⁸Ō lo̍ ni᷅ŋ o̍ nāā kōŋ ni᷄ŋ mbo̍ wū, ō chi̍i̍ pālɛ̍i̍ tɔ̍ a̍ nāā kōŋ, mi̍ Mɛ̄lɛ̄ka̍ Ya̍a̍wɛ̄ɛ̄ chu̍ā yōōmū ndɔ̄ɔ̍.

³⁹Mɛ̄ɛ̍ Dēēve̍ tu̍e̍ī māā Na̍bāl vi̍, mbo̍ dīmī āā, “Ba̍li̍ka̍a̍ chō nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍, fo̍ndōle̍ le̍ mɛ̄ɛ̍ ndu̍ pi̍la̍ mi̍ŋgu̍l Na̍bāl māa̍ le̍ yēī o̍ ye̍i̍ ya̍ wo̍ yɛ̍. Mɛ̄lɛ̄ka̍ tōsa̍ I̍ ku̍e̍ mī kɔ̍ mi̍ŋgūl Na̍bāl māa̍ le̍. Ndu̍ pi̍la̍ tu̍si̍ ndu̍ nyɛ̄ pālāa̍ chōo̍ le̍ yɔ̄ŋ wɔ̄ɔ̍ŋ o̍ to̍sa̍ wo̍.” O̍ ko̍ŋ, mi̍ Dēēve̍ vi̍ām bu̍ɛ̍i̍yāā ndūa̍a̍ māā ā kɔ̍ mā kɔ̍ di̍mūl Ābi̍kēē māā ō yēēma̍ mā cha᷄l nda̍ ndu̍ o̍ nɔ̄ɔ̍ ni̍ŋ.

⁴⁰Mi̍ bu̍ɛ̍i̍ya̍a̍ Dēēvi̍a̍a̍ mālnu᷄ŋ ma̍ kūā Ka̍mɛ̄l chi̍e̍e̍ nāa̍ Ābi̍kēē chu̍a̍. Ma̍ kɔ̍ di̍mūl Ābi̍kēē āā, “Dēēve̍ ve᷅m na̍a̍ nāa̍ nūm chu̍a̍. Ō dīmi̍ māā ō yēēma̍ mī nya̍ cha᷄l o̍ nɔ̄ɔ̍ ni᷄ŋ nya̍ ndu̍ le̍la̍ŋ āā na̍a̍ ŋ̄ hu᷄ŋ nu̍m kɔ̄ɔ̄lī mī na̍a̍ ŋ̄ kūɛ̄nūŋ na̍a̍ nya̍ā.”

⁴¹Mi̍ Ābi̍kēē ba᷅ŋ wūla̍ŋ lɛ̄ŋ mbo̍ dīmī āā, “Bu̍ɛ̍ī ndɔ̄ɔ̍ ya̍ I̍ cho̍ ni̍. I̍ bɛ̍ɛ̍ndi̍a̍ŋ mī ku̍ɛ̄, mi̍ kɔ̍ wa᷅ bu̍ɛ̍i̍ pu̍lū bu̍ɛ̍i̍yāā ndūa̍a̍ pēlo̍ŋ ndo̍.”

⁴²Mi̍ Ābi̍kēē hēl o̍ sōfɛ̍lɛ̍ ndɔ̄ɔ̍ chōo̍ chɔ̍ chɔ̍, ma̍ kūā nda̍ ki̍i̍la̍a̍ ŋu̍ɛ̍ɛ̍nu̍a̍a̍ Dēēve̍ ve᷅m ka̍ŋ nda̍ lātūlu̍. Mɛ̄ɛ̍ o̍ wa̍ kɔ̄la̍ŋ, mbo̍ chūā bu̍ɛ̍i̍yāā ndūāā la̍a̍ndūāā ŋūɛ̍ɛ̍nu̍a̍a̍ mbo̍ kūā a̍ nda̍ kɔ̍ɔ̍lī. O̍ ko̍ŋ, mbo̍ sīmnu᷄ŋ la̍nɔ̍ɔ̍ Dēēve̍.

⁴³Kɛ̍ Dēēve̍ ndu̍ o̍o̍ nɔ̍ vɛ̄lɛ̄ la̍nɔ̍ chɛ̍le̍ŋ dīōla̍ŋ āā Āhīno̍wām, chūā wāā Chɛ̍si̍lūɛ̄ɛ̄ chi̍e̍e̍. Mɛ̄ɛ̍ Ābi̍kēē wa̍ la̍nɔ̍ di̍i̍ŋ ndɔ̄ɔ̍ ni̍.

⁴⁴Dēēve̍ la̍a̍ndɔ̍ wa̍ vɛ̄lɛ̄ Ma̍kāl chūa̍ Sɔ̍ɔ̄ wo̍ ni̍, kɛ̍ mi̍ Sɔ̍ɔ̄ pu̍ū chūā ndɔ̄ɔ̍ mbo̍ kē po̍ pi᷅lɛ̍ dīōla̍ŋ āā Pa̍a̍tī, po̍ La̍i̍sī wo̍, wānā wa̍ā Ka̍līm chi̍e̍e̍.