Read Southern Kisi Sa̍a̍mi̍ɛ̍ɛ̄ Tāso̍o̍ 29 Bible Online

Sa̍a̍mi̍ɛ̍ɛ̄ Tāso̍o̍ 29 - Southern Kisi bible

Sa̍a̍mi̍ɛ̍ɛ̄ Tāso̍o̍ 29

¹Mi̍ Fīli̍i̍tīāŋnda̍ chūūŋgīāā pūa̍a̍ ndāa̍ chɔ̄ūwa̍ kpo̍u̍ A̍fɛ̍kī chi̍e̍e̍. I̍sɔ̄lūɛ̍i̍ya̍ nda̍ wa̍ o̍ dɔ̍ɔ̍ŋgɔ̍ nda̍ kēlū o̍ pēē pɔ̍mbɔ̄ pīlɛ̍ īkɛ̄i̍ o̍ kpōlōŋ kpo̍lo̍ŋndo̍ Chɛ̍si̍lūɛ̄ɛ̄ wo̍.

²O̍ ko̍ŋ kɔ̍ɔ̍lī, mi̍ Fīli̍i̍tīāŋnda̍ bɛ̄ɛ̄ndīa̍ŋ le̍ kɔ̄la̍ŋ I̍sɔ̄lūɛ̍i̍ya̍ chīŋa̍la᷅ŋndo̍ ma̍ wā kɔ̄la̍ŋ a̍ ku̍ndāla̍ŋ. Māsāa̍ ndāā ŋu̍ɛ̍ɛ̍nu̍a̍a̍ ā wa̍ kɔ̄la̍ŋ a̍ pūa̍a̍ ndāa̍ chɔ̄ūwa̍ o̍ kɛ̄mɛ̄la̍ŋ ni᷄ŋ a̍ o̍ wāa̍la̍ŋ ni᷄ŋ. Dēēve̍ nda̍ pūa̍a̍ ndūa̍a̍ ā wa̍ Māsāa̍ A̍ki̍sī kɔ̄ɔ̄lī, nda̍ mɛ̍ɛ̍lu̍ kɔ̄ɔ̄lī kpɔ̍ŋ ni̍.

³Mɛ̄ɛ̍ wānāa̍ wa̍ pūa̍a̍ chɔ̄ūwa̍ Fīli̍i̍tīa̍ŋ bōlle̍ŋ nda̍ ā chē Dēēve̍ nda̍ pūa̍a̍ ndūa̍a̍, ma̍ nyūnā Māsāa̍ A̍ki̍sī āā, “Yɛ̄ɛ̍nɛ̍ Hi̍būlūi̍ya̍ ha̍ā ā hīŋ yɛ̄ tōsā na̍nu᷄ŋ?” Mi̍ Māsāa̍ A̍ki̍sī di̍mūl nda̍ āā, “Dēēve̍ cho̍ ho̍ō ni̍, Māsāa̍ Sɔ̍ɔ̄ o̍ cho̍ I̍sɔ̄lūɛ̄ī wo̍ wānāā ndūa̍a̍ wa̍lla̍ ō pīlɛ̍. Kɛ̍ mbo̍ nyāānu᷄ŋ ma̍sānɔ̄ ndɔ̄ɔ̍ mbo̍ hūŋ ya̍ o̍ bɛ̄ŋgu̍ cho̍o̍. Pūa̍a̍ ndūa̍a̍ o̍ hi᷅ŋ yɛ̄ kɔ̄ɔ̄lī wa̍ a̍ cho̍ ha̍ā ni̍. Ā chō ni᷅ŋ ya̍ o̍ bɛ̄ŋgu̍ chōo̍ le̍ te̍le̍ŋ vi̍lɛ̄ī. Ndu̍yɛ̍, kāni̍ nda̍ hīŋ ya̍ o̍ bɛ̄ŋgu̍ cho̍o̍ pāa̍le̍ cho̍ lē pīlɛ̍, I̍ se̍e̍lu̍ŋ ndɔ̍ kɛ̍ŋɛ̍ o̍ kɛ̍ŋɛ̍ o̍ nda̍ ni᷄ŋ te̍.”

⁴Kɛ̍ mi̍ wānāa̍ wa̍ pūa̍a̍ chɔ̄ūwa̍ Fīli̍i̍tīa̍ŋ bōlle̍ŋ nda̍ ā dūāūnu᷄ŋ tu̍mbe̍ a̍ Māsāa̍ A̍ki̍sī. Ma̍ dīmūl ndu̍ āā, “Ō bɛ̍ndā mī lāŋu̍nɔ̄ kōŋ ō kūɛ̄ na̍a̍ kɔ̄ɔ̄lī o̍ chɔ̄ūwo̍ le̍. Yɔ̄ŋi̍ o̍ kɔ̍ fa̍a̍ŋ na̍a̍ kɔ̄ɔ̄lī, mbō kɔ̍ hi̍o̍u̍nu᷄ŋ ku̍mbū Māsānɔ̍ ndɔ̄ɔ̍ mī ndu̍ bɛ̍ɛ̍ mi̍ŋgu̍la᷅ŋ na̍a̍, la᷅ŋ o̍ to̍sā mī māsānɔ̍ ndɔ̄ɔ̍ pūɛ̍ɛ̍ŋ a̍ nyɛ̍ yɔ̍nu̍ŋ nda̍ tɛ̄ɛ̄ŋ ndo̍. Le̍la̍ŋ di̍mu̍l ndu̍ ō mīīŋgū o̍ chi̍e̍e̍ ŋ̄ ke̍ ndu̍ wo̍.

⁵Dēēvi̍o̍o̍ ho̍ō ŋ̄ tūēī ndu̍ tɔ̍ɔ̍, ndu̍ wāŋ lāāndūa̍a̍ ā wa̍ lɔ̍ɔ̍ ko̍ŋ kɔ̄la̍ŋ a̍ chōndo̍ŋ kɔ̄ɔ̄lī ni̍, mā yā, mā kūā a̍ dīmīo̍o̍ āā, ‘Sɔ̍ɔ̄ di̍ī ya̍a̍mɔ̍ɔ̍wa̍a̍ ndūa̍a̍ o̍ wāa̍la̍ŋ ni᷄ŋ, kɛ̍ Dēēve̍ ndu̍ di̍ī nda̍ wāa̍la̍ŋ o̍ tɔ̍ tɔ̍la̍ŋ ni᷄ŋ.’ ”

⁶O̍ ko̍ŋ, mi̍ Māsāa̍ A̍ki̍sī ve̍e̍lū Dēēve̍ mbo̍ dīmūl ndu̍ āā, “Dēēve̍, Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l ya̍ I̍ si̍m ni̍ mi̍ wa᷅ sūɛ̍i̍, Mɛ̄lɛ̄ka̍ cho̍ yōōmū le̍ fɛ̍ɛ̍ŋ a̍ fɛ̍ɛ̍ŋ ndo̍, ā chō bɔ̍ɔ̍ wa᷅na̍ tu̍sīa̍ŋ bɛ̍ndū. Nyɛ̄ kōŋ kpe̍e̍kpe̍i̍ to̍sa̍ ni̍, mi̍ ya̍ i̍i̍ ye̍e̍mā le̍ mī nūm o̍o̍ kɔ̍ ma̍lā na̍a̍ sɔ̍ŋgɔ̍ɔ̍ ho̍ō, fo̍ndōle̍, kāni̍ ŋ̄ hīŋ ya̍ o̍ bɛ̄ŋgu̍ cho̍o̍ I̍ se̍e̍lu̍ŋ ndɔ̍ kɛ̍ŋɛ̍ o̍ kɛ̍ŋɛ̍ o̍ nūm ni̍ŋ te̍. Kɛ̍ māsāa̍ ā pīli̍a̍a̍ ā kɛ̄ɛ̍ māā ō bɛ̄nda̍ mā kūɛ̄ na̍a̍ kɔ̄ɔ̄lī le̍.

⁷Le̍la̍ŋ, lā mīīŋgu̍ nya̍ pūa̍a̍ nu̍mnda̍. Lā ta̍mbū kɔ̄l mī lā tōsa̍ nyɛ̄ o̍ nyɛ̄ o̍ tɛ̍ɛ̍mbūū ma̍sāa̍ māFīli̍i̍tīāŋnda̍ ha̍ā kɔ̄l lo̍ le̍.”

⁸Mi̍ Dēēve̍ nyu̍nā Māsāa̍ A̍ki̍sī āā, “Kɛ̍ ō yɛ̄ɛ̄ ya̍ I̍ yɔ̍ŋ yɛ̄ fāllo̍? Bu̍ɛ̍ī nūmndo̍ ya̍ I̍ cho̍ ni̍. Nūm pi̍la̍ si̍nā māā kāni̍ ya̍ I̍ hi᷅ŋ nu̍m o̍ bɛ̄ŋgu̍ cho̍o̍ mi̍ ka̍ndū nu̍m wa̍llo̍ o̍ bā, māā pāa̍le̍ cho̍ lē pīlɛ̍ a̍ di̍mi̍ wɔ̍ nu̍a̍ā āā, ‘He̍ī le̍ Dēēve̍ to̍sa̍l la̍,’ le̍. Vɛ᷅ I̍ ku̍ē vɛ̍lɛ̄ mī kɔ̍ ma̍lā nu̍m sɔ̍ŋgɔ̍ɔ̍ a̍ ya̍a̍mɔ̍ɔ̍wa̍a̍ nu̍mnda̍ le̍?”

⁹Mi̍ Māsāa̍ A̍ki̍sī di̍mūl ndu̍ āā, “Dēēve̍, ya̍ pi̍la̍ bɛ̍ɛ̍ I̍ si̍nā māā pāa̍le̍ cho̍ lē pīlɛ̍ a̍ to̍sa̍ wɔ̍ i̍sɔ̍ɔ̍ o̍ īsɔ̄ɔ̍ wɔ̍ɔ̍ŋ te̍. Ā chō māchūāā ya̍ o̍ hɔ̄l sa̍kpō, mɛ̄ɛ̍ ki̍i̍la̍a̍ Mɛ̄lɛ̄ka̍a̍ chōo̍ cho̍o̍ a̍ cho̍ nu̍a̍ā Mɛ̄lɛ̄ka̍ o̍ hɔ̄l lɛ̍. Kɛ̍ ndu̍yɛ̍ wānāa̍ cho̍ pūa̍a̍ chɔ̄ūwa̍ bōlle̍ŋ nda̍ ā dīmi̍ māā ō bɛ̄nda̍ mā kūɛ̄ na̍a̍ kɔ̄ɔ̄lī le̍.

¹⁰Le̍la̍ŋ, tē pāa̍le̍ŋ lē sɛ̄ pɛ̍ nya̍ nya̍a̍nu̍ŋ ka̍ŋ Sɔ̍ɔ̄ mi̍ lā hūŋ ya̍ o̍ bɛ̄ŋgu̍ chōo̍ wa̍ ki̍nɛ̍i̍, lā pēna̍ chɔ̄nɔ᷄ŋ pu̍u̍ŋ lā mīīŋgu̍.”

¹¹Ndu̍yɛ̍, mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍, mi̍ Dēēve̍ nda̍ pūa̍a̍ ndūa̍a̍ ā pēnā chɔ̄nɔ᷄ŋ pu̍ŋ, ma̍ māl le̍ mīīŋgōo̍ o̍ lɛ̄ŋndē Fīli̍i̍tīāŋnde̍ŋ ni᷄ŋ. O̍ ko̍ŋ kɔ̍ɔ̍lī, mi̍ pūa̍a̍ Fīli̍i̍tīāŋnda̍ ā kūā Chɛ̍si̍lūɛ̄ɛ̄ le̍ kɔ̄la̍ŋ I̍sɔ̄lūɛ̍i̍ya̍ chīŋa̍la᷅ŋndo̍.