Read Southern Kisi Sa̍a̍mi̍ɛ̍ɛ̄ Tāso̍o̍ 31 Bible Online

Sa̍a̍mi̍ɛ̍ɛ̄ Tāso̍o̍ 31 - Southern Kisi bible

Sa̍a̍mi̍ɛ̍ɛ̄ Tāso̍o̍ 31

¹Mi̍ Fīli̍i̍tīāŋnda̍ ā kɔ̍ chi᷅ŋa̍la᷅ŋ I̍sɔ̄lūɛ̍i̍ya̍ o̍ Pēmbīī Ki̍būāāve̍ chōo̍. Ndu̍yɛ̍ ma̍ yām I̍sɔ̄lūɛ̍i̍ya̍ ma̍ dīū nda̍ dīū wo̍ pīla̍. O̍ ko̍ŋ, mi̍ I̍sɔ̄lūɛ̍i̍ya̍a̍ tu̍a̍a̍ lo̍ yōōmū wa̍ ā nyāānu᷄ŋ. Sɔ̍ɔ̄ nda̍ pūa̍a̍ ndūāā ya̍a̍wa̍ nda̍ yɔ̍nūŋ ni̍ māā chōna̍ta᷅ŋ a̍ Ābi̍na̍dāā a̍ Mālīki̍sūāā nda̍ bɛ̍ɛ̍ ma̍ nyāānu᷄ŋ. Kɛ̍ mi̍ Fīli̍i̍tīāŋnda̍ tīsā nda̍ kɔ̄ɔ̄lī, ma̍ kīndū nda̍ kīndɔ̄ɔ̍ pīla̍ a̍ sɔ̍ŋgɔ̍ɔ̍, o̍ ko̍ŋ ma̍ dīī Sɔ̍ɔ̄ pūa̍a̍ ndūa̍a̍ ya̍a̍ wa̍.

³O̍ ko̍ŋ kɔ̍ɔ̍lī, mi̍ sɔ̍ŋgɔ̄ɔ̍ hīāū lāchī a̍ tūūlo̍o̍ kpe̍e̍kpe̍i̍ ku̍mbū Sɔ̍ɔ̄ o̍ wa̍ wo̍, ndu̍yɛ̍ ma̍ vīā Sɔ̍ɔ̄ a̍ chīŋɔ̍le̍ŋ, ma̍ yɔ̄ŋūl ndu̍ yɔ̄ŋūllo̍ pīla̍.

⁴O̍ ko̍ŋ, mi̍ Sɔ̍ɔ̄ di̍mūl wāna̍ ndɔ̍ bi̍i̍lūl ndu̍ wōlɔ̄ɔ̄lā ndɔ̄la̍ chɔ̄ūla̍ŋ ndo̍ āā, “So̍li̍ mu̍ɛ̍i̍ mā si̍o̍u̍ ya̍ dīyɔ̄ɔ̄ fɔ̍ yɔ̄ŋi̍ wānāa̍ cho̍ ha̍ā wānāa̍ Mɛ̄lɛ̄ka̍ le̍ wa̍ ā kōma̍l la̍ mā tɛ̄ɛ̄mbu̍u̍ ya̍ lābɛ̄ɛ̄ lɔ̍ɔ̍pa̍ nda̍ dīī ya̍.” Kɛ̍, mi̍ sīōōŋnde̍ bīī wāna̍ ndɔ̍ bi̍i̍lūl ndu̍ wōlɔ̄ɔ̄lā ndɔ̄la̍ chɔ̄ūla̍ŋ ndo̍, mbo̍ kɛ̄ɛ̄. O̍ ko̍ŋ, mi̍ Sɔ̍ɔ̄ pi̍la̍ so̍lī mūɛ̄ī ndūɛ̍i̍ mbo̍ mūlī ndi̍ sōndōo̍ chōo̍ mbo̍ dēl lēchōo̍ mbo̍ dīi̍ŋ ndu̍ pi̍la̍.

⁵Mɛ̄ɛ̍ wāna̍ ndɔ̍ bi̍i̍lūl ndu̍ wōlɔ̄ɔ̄lā ndɔ̄la̍ chɔ̄ūla̍ŋ ndo̍ ō chē māā Sɔ̍ɔ̄ vi᷅, ndu̍ bɛ̍ɛ̍ mbo̍ tōsā mɛ̄ɛ̍ Sɔ̍ɔ̄ to̍sa̍ yɛ̍. Mbo̍ dēl o̍ mūɛ̄ī ndūɛ̍i̍ chōo̍ mbo̍ dīīnu᷄ŋ.

⁶O̍ ko̍ŋ, Sɔ̍ɔ̄ ni̍ wāna̍ ndɔ̍ bi̍i̍lūl ndu̍ wōlɔ̄ɔ̄lā ndɔ̄la̍ŋ chɔ̄ūla̍ŋ ndo̍ ni̍, pūa̍a̍ ndūāā ya̍a̍wa̍ ni̍, a̍ pūa̍a̍ ndūa̍a̍ chɔ̄ūwa̍, ma̍ sɔ̄lā pīɔ̍mndo̍ pāa̍le̍ pi᷅lɛ̍ le̍ŋ.

⁷O̍ ko̍ŋ, I̍sɔ̄lūɛ̍i̍ya̍a̍ wa̍ o̍ dɛ̍ŋgbɔ̍ɔ̍ Chɛ̍si̍lūɛ̄ɛ̄ kūmbūe̍i̍ pīlɛ̍i̍ wa̍ ni̍, a̍ wa̍ Chɔ̍ɔ̍dāŋ le̍e̍lōo̍ bā pāa̍le̍ŋ lē chāŋndo̍ wa̍ ni̍, mɛ̄ɛ̍ nda̍ tūēī māā ā yēm I̍sɔ̄lūɛ̍i̍ya̍ mi̍ I̍sɔ̄lūɛ̍i̍ya̍ nyāānu᷄ŋ, ndu̍yɛ̍, ma̍ tūɛ̄ī vɛ̄lɛ̄ māā Sɔ̍ɔ̄ nda̍ pūa̍a̍ ndūa̍a̍ ā sɔ̄la̍ pīɔ̍mndo̍ ma̍ māl chi̍e̍e̍ŋ nda̍ŋ ma̍ nyāānu᷄ŋ. O̍ ko̍ŋ, mi̍ Fīli̍i̍tīāŋnda̍ hu᷄ŋ chu̍ā chi̍e̍ēŋ ndāŋ mu̍ŋ ma̍ chāl lo̍ŋ.

⁸Mɛ̄ɛ̍ sɔ̍ŋgɔ̄ɔ̍ chūū mi̍ pāa̍le̍ŋ lē sīā dīi̍mā ndɔ̄ɔ̍, mi̍ Fīli̍i̍tīāŋnda̍ kūā le̍ mā kɔ̍ so̍o̍lūū nyɛ̄m ba̍ā kāla᷄ŋ wa̍ I̍sɔ̄lūɛ̍i̍ya̍a̍ nda̍ dīū wa̍ lēkɔ̄ɔ̍ wo̍ŋ lēkɔ̄ɔ̍. O̍ ko̍ŋ ma̍ sāālu᷄ŋ Sɔ̍ɔ̄ nda̍ pūa̍a̍ ndūāā ya̍a̍wa̍ īhīni̍ a̍ vi̍lɛ̍i̍ya̍ o̍ Pēmbīī Ki̍būāāve̍ chōo̍.

⁹Mɛ̄ɛ̍ nda̍ sāālu̍ŋ nda̍, ma̍ kīālū Sɔ̍ɔ̄ bōlle̍ŋ, o̍ ko̍ŋ kɔ̍ɔ̍lī ma̍ sōlī ndu̍ nyɛ̄lā chɔ̄ūla̍ wa̍ ndu̍ lēkɔ̄ɔ̍ la̍ŋ lēkɔ̄ɔ̍. Ma̍ lō o̍ ko̍ŋ ma̍ māl ki̍i̍la̍a̍ ndāa̍ le̍ mā bālu̍ a̍ yōōŋgū kɛ̄ndɛ̄ kōŋ o̍ lɛ̄ŋndē Fīli̍i̍tīāŋnde̍ŋ ni᷄ŋ kpo̍u̍, le̍ mā dīmu̍l wāŋnda̍ a̍ mɛ̄lɛ̄ka̍a̍ ndāa̍ a̍ nyɛ̍ yɔ̍nu̍ŋndo̍ o̍kɔ̄ɔ̄.

¹⁰O̍ ko̍ŋ kɔ̍ɔ̍lī, ma̍ chūā wōlɔ̄ɔ̄lā chɔ̄ūla̍ Sɔ̍ɔ̄ la̍ŋ ma̍ kɔ̍ kɛ̍sī la̍ŋ o̍ chīɛ̄ī nda̍ nda̍ sōōlūū mɛ̍lɛ̄ka̍ ndāa̍ wo̍, Mɛ̄lɛ̄ka̍ nda̍ nɔ̍ dīōla̍ŋ āā Āsīta̍tɛ̄ɛ̄ wo̍. Ndu̍yɛ̍ o̍ ko̍ŋ kɔ̍ɔ̍lī, dīāllu᷄ŋ Sɔ̍ɔ̄ wo̍ŋ ni̍, dīāllūŋ pūa̍a̍ ndūa̍a̍ ni̍, ma̍ kɔ̍ lɛ̍ɛ̍ndūū mu̍ŋ o̍ kpākīo̍o̍ Bɛ̄tī Si̍āŋ.

¹¹Mɛ̄ɛ̍ wāŋnda̍ Cha̍bɛ̍sī Ki̍li̍a̍a̍dī a̍ tu̍e̍ī nyɛ̄ Fīli̍i̍tīāŋnda̍ ā tōsa̍ a̍ dīāllu᷄ŋ Sɔ̍ɔ̄ wo̍ŋ ndo̍,

¹²mi̍ pūa̍a̍ hɔ̄lāā vēsɛ̍i̍ya̍a̍ wa̍ nda̍ tɛ̄ɛ̄ŋ nda̍, ā hɛ̄li̍āŋ ma̍ bīī kɔ̄la̍ŋ Bɛ̄tī Si̍āŋ le̍ mā kɔ̍ tu̍sī dīāllūŋ Sɔ̍ɔ̄ wo̍ŋ, a̍ dīāllūŋ pūa̍a̍ ndūa̍a̍ mā kūɛ̄ a̍ mu̍ŋ Cha̍bɛ̍sī Ki̍li̍a̍a̍dī. Ma̍ lɔ̄ɔ̄lū kɔ̄la̍ŋ īchɔ̄l kōŋ pi̍i̍. O̍ ko̍ŋ, ma̍ kɔ̍ tu̍sī dīāllūŋ ndāŋ vi̍lɛ̍i̍ mu̍ŋ ma̍ kūā a̍ mu̍ŋ Cha̍bɛ̍sī Ki̍li̍a̍a̍dī ma̍ kɔ̍ lo᷅m mu̍ŋ.

¹³O̍ ko̍ŋ kɔ̍ɔ̍lī, ma̍ chūā pāālā ndāla̍ŋ ma̍ chɔ̄ la̍ŋ o̍ yɔ̄m bɛ̄ndū pu̍m bɛ̄ŋgu̍ Cha̍bɛ̍sī Ki̍li̍a̍a̍dī lo̍ŋ. Ndu̍yɛ̍, ma̍ bīī su᷅mndo̍ pālɛ̍i̍ ī ŋɔ᷄mmɛ̍ū le̍ nda̍.