Read Southern Kisi Sa̍a̍mi̍ɛ̍ɛ̄ Tāso̍o̍ 4 Bible Online

Sa̍a̍mi̍ɛ̍ɛ̄ Tāso̍o̍ 4 - Southern Kisi bible

Sa̍a̍mi̍ɛ̍ɛ̄ Tāso̍o̍ 4

¹Mi̍ tɔ̍ɔ̍ Sa̍a̍mi̍ɛ̍ɛ̄ wo̍ tīū I̍sɔ̄lūɛ̄ī kpo̍u̍. Ō wa̍ a̍ te̍le̍ŋ pi᷅lɛ̍, mi̍ I̍sɔ̄lūɛ̍i̍ya̍ cha᷄ŋ ma̍ kūā le̍ sɔ̍ŋgɔ̄ɔ̍ a̍ Fīli̍i̍tīāŋnda̍. Ma̍ kɔ̍ ki̍o̍lū dɔ̍ɔ̍ŋgɔ̍ ndāa̍ Ɛ̄bīnɛ̍ɛ̍sā chi̍e̍e̍, mi̍ Fīli̍i̍tīāŋnda̍ nda̍ kīālū dɔ̍ɔ̍ŋgɔ̍ɔ̍ o̍ nda̍a̍ A̍fɛ̍kī.

²O̍ ko̍ŋ kɔ̍ɔ̍lī, mi̍ Fīli̍i̍tīāŋnda̍ kɔ̍ de᷅l I̍sɔ̄lūɛ̍i̍ya̍ chōo̍ a̍ chɔ̄ūwo̍, mi̍ sɔ̍ŋgɔ̄ɔ̍ ho̍ō tīmbu̍la᷅ŋ nda̍ tɛ̄ɛ̄ŋ vēllāa̍ vēllē. Ndu̍yɛ̍ ma̍ yām I̍sɔ̄lūɛ̍i̍ya̍ ma̍ dīī nda̍ wāa̍la̍ŋ lā hīɔ̍ɔ̍lu̍ (4,000) o̍ sɔ̍ŋgɔ̄ɔ̍ ni᷄ŋ.

³Mɛ̄ɛ̍ pūa̍a̍ chɔ̄ūwāā tu̍a̍a̍ lo̍ yōōmū wa̍ ā mīīŋgu̍ o̍ dɔ̍ɔ̍ŋgɔ̍ I̍sɔ̄lūɛ̍i̍ya̍ ni᷄ŋ ma̍ kɔ̍ do̍u̍nu᷄ŋ wa᷅ŋ bɛ̄ndūāā I̍sɔ̄lūɛ̍i̍ya̍ ko̍na̍, mi̍ wāŋ bɛ̄ndūāā I̍sɔ̄lūɛ̍i̍ya̍ ā tāmbū kɔ̄l ta̍u̍ ta̍u̍, ma̍ dīmi̍ āā, “Vɛ᷅ mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā mi̍ Fīli̍i̍tīāŋnda̍ yām na̍a̍ pāa̍le̍ hāūle̍ŋ? Ŋ̄ kɔ̍ chu̍a̍nūŋ kɔ̍fu̍ si̍m le̍ kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍ wo̍ Si̍lɔ̄ɔ̄ mī ŋ̄ hu᷄ŋ kɔ̍ŋnūŋ a̍ ndu̍ o̍ chɔ̄ūwo̍ lāchī. Tē Mɛ̄lɛ̄ka̍ pīla̍ wa̍ na̍a̍ tɛ̄ɛ̄ŋ pɛ̍, ō nɔ̄lā mbō pīŋi̍ yōōmūlā nāāla̍ŋ ya̍a̍mɔ̍ɔ̍wa̍a̍ nāa̍ o̍ bā.”

⁴O̍ ko̍ŋ, ma̍ yɔ̄ŋ wāŋnda̍ Si̍lɔ̄ɔ̄ chi̍e̍e̍ le̍ mā kɔ̍ hu᷅ŋ a̍ kɔ̍fū kpe̍ma̍ Mɛ̄lɛ̄ka̍a̍, Mɛ̄lɛ̄ka̍ nɔ̍ kpāāyāa̍ kpo̍u̍ wo̍. Ndu̍yɛ̍ nyāā lākūmba᷅ŋāā ŋīɔ̍ɔ̍ŋāa̍ wa̍ ā tūūlāā o̍ kɔ̍fū kōŋ chōo̍ wa̍ o̍ nyāā kāŋ tɛ̄ɛ̄ŋ kpe̍ŋgbe̍i̍ lēmāsa̍ Mɛ̄lɛ̄ka̍a̍ ō wa̍ ni̍. Ma̍ kɔ̍ chu̍ā kɔ̍fu̍ Mɛ̄lɛ̄ka̍a̍ ho̍ō ma̍ hūŋ a̍ ndu̍ o̍ dɔ̍ɔ̍ŋgɔ̍ ndāa̍ ni᷄ŋ. I̍lā pūa̍a̍ ndūāā ŋīɔ̍ɔ̍ŋnda̍, Hɔ̍fi̍nī nda̍ Fi̍ni̍ha̍a̍sī nda̍ bɛ̍ɛ̍ ma̍ kūā nda̍ nda̍ā lātūlu̍.

⁵Mɛ̄ɛ̍ nda̍ fūūlu̍u̍ a̍ kɔ̍fōo̍ ho̍ō o̍ dɔ̍ɔ̍ŋgɔ̍ I̍sɔ̄lūɛ̍i̍ya̍ ni᷄ŋ, I̍sɔ̄lūɛ̍i̍ya̍ kpo̍u̍ ma̍ dūāūnu᷄ŋ nya̍a̍le̍, ma̍ dēŋī chōo̍ cho̍o̍ a̍ kɔ̄ltā kɛ̄ndɛ̄la̍ŋ, mi̍ lɛ̄ŋnde̍ŋ lē nyīīyā a̍ dēŋi̍ nda̍ wa̍ wo̍.

⁶Mɛ̄ɛ̍ Fīli̍i̍tīāŋnda̍ tūēī bɔ̄ɔ̄lūū bɛ̄ndū kōŋ, ma̍ nyūnā āā, “ko̍ni̍ bɔ̄ɔ̄lūū bɛ̄ndū yɛ̄ɛ̍nɛ̍ su̍a̍ā yɛ̍ ho̍ō o̍ dɔ̍ɔ̍ŋgɔ̍ Hi̍būlūi̍ya̍?” Mɛ̄ɛ̍ nda̍ tūēī māā kɔ̍fu̍ si̍m le̍ kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍ wo̍ I̍sɔ̄lūɛ̍i̍ya̍ hīŋ o̍ dɔ̍ɔ̍ŋgɔ̍ ndāa̍ ni̍,

⁷mi̍ sīōōŋīī bɛ̄ndūe̍i̍ bīī nda̍. Mi̍ wānāā ndāā ba̍nāa̍ dīmī āā, “Bɔ̄kɔ̄tɔ̄, Mɛ̄lɛ̄ka̍ Hi̍būlūi̍ya̍ hi᷅ŋ o̍ dɔ̍ɔ̍ŋgɔ̍ Hi̍būlūi̍ya̍. Nyɛ̄ pālāā bɛ̄ndōo̍ hīŋ na̍a̍ tōlɔ̄ɔ̄ chōo̍ fɔ̍. Kāni̍ bɛ̍ɛ̍ he̍ī yɔ̄nu̍ŋ ndɔ̍ le̍.

⁸Kpūndɛ̍ bɛ̄ndōo̍ hīŋ na̍a̍ tōlɔ̄ɔ̄ chōo̍. Ō nɛ̄ɛ̍nɛ̍ kpe̍e̍kpe̍i̍ o̍ cho̍ yɛ̄ yōōmūlā nāāla̍ŋ pīŋī mɛ̄lɛ̄ka̍a̍ kpāāyāā bɛ̍ndūa̍a̍ ha̍ā o̍ bā? Mɛ̄lɛ̄ka̍a̍ ha̍ā nda̍ tu̍si̍ sīndɛ̄ wāŋnda̍ I̍chi̍pi̍ kpūndɛ̍ bɛ̄ndōo̍ chōo̍ o̍ po̍llo̍ ni᷄ŋ ni̍ ma̍ dīū nda̍ kpo̍u̍.

⁹Le̍la̍ŋ wāŋnda̍ Fīli̍i̍tīāā lā sīmu̍l kɔ᷅lta̍ŋ yi̍ māā ŋ̄wāŋ pīāāndū. Tē ō cho̍ ko̍ŋ te̍, mɛ̄ɛ̍ ŋ̄ hīŋ sīmnɔ᷄ŋ chīa̍a̍ le̍ Hi̍būlūi̍ya̍, mɛ̄ɛ̍ nda̍ wa̍ chīa̍a̍ nāa̍ o̍ bā yɛ̍. Le̍la̍ŋ lā sīmu̍l kɔ᷅lta̍ŋ yi̍ mī lā sɔ̄ŋga̍ a̍ nda̍.”

¹⁰O̍ ko̍ŋ, mi̍ Fīli̍i̍tīāŋnda̍ sīmūl I̍sɔ̄lūɛ̍i̍ya̍ ma̍ sɔ̄ŋgā sɔ̍ŋgāa̍ pīla̍ a̍ nda̍. Ndu̍yɛ̍ ma̍ yām I̍sɔ̄lūɛ̍i̍ya̍, mi̍ I̍sɔ̄lūɛ̍i̍ya̍ nyāānu᷄ŋ, mi̍ wānā o̍ wānā mi̍i̍ŋgū o̍ ndu̍ lo̍. Ndu̍yɛ̍ o̍ ko̍ŋ kɔ̍ɔ̍lī, ma̍ dīū so̍vɛ̄i̍ya̍a̍ I̍sɔ̄lūɛ̍i̍ya̍ dīūwo̍ pīla̍, a̍ nda̍ dīu̍ wa̍, ā wa̍ wāa̍la̍ŋ be̍le̍-ya̍a̍ (30,000).

¹¹O̍ ko̍ŋ kɔ̍ɔ̍lī, mi̍ Fīli̍i̍tīāŋnda̍ bīī kɔ̍fu̍ si̍m le̍ kpe̍ma̍ Mɛ̄lɛ̄ka̍a̍ wo̍ ma̍ kūānu᷄ŋ a̍ ndu̍. Ndu̍yɛ̍ I̍lā pūa̍a̍ ndūāā ŋi̍ɔ̍ɔ̍ŋnda̍, Hɔ̍fi̍nī nda̍ Fi̍ni̍ha̍a̍sī nda̍ bɛ̍ɛ̍ ma̍ dīī nda̍.

¹²O̍ ko̍ŋ kɔ̍ɔ̍lī, mi̍ po̍ pi᷅lɛ̍ fūlāa̍ o̍ yu̍ŋgu̍ Bɛ̍ŋnja̍mīŋ chōo̍, o̍ ma̍lnu᷄ŋ pāa̍le̍ le̍ŋ o̍ chɔ̄ūwo̍ lāchi̍ mbo̍ kūā Si̍lɔ̄ɔ̄ chi̍e̍e̍ a̍ kīlta̍ŋ. Ndu̍yɛ̍ mɛ̄ɛ̍ o̍ wa̍ kɔ̄la̍ŋ mbo̍ sɛ̄ɛ̄sīa̍ŋ nyɛ᷅la̍ŋ lēkɔ̄ɔ̍. O̍ ko̍ŋ kɔ̍ɔ̍lī mbo̍ dūāūnu᷄ŋ chu̍ndo̍o̍ o̍ lēbōl le̍ kɔ̄l ndɔ̄ ta̍mbɛ̍i̍yo̍ chɔ̄mndo̍.

¹³I̍lā wa̍ īchāli̍ o̍ nɛ̄īyo̍ īkɛ̄i̍ o̍ dīō kpākī chi̍o̍o̍ sōndōo̍. Ō wa̍ īchāli̍ o̍ kpe̍ŋgbe̍i̍ ndɔ̄ɔ̍ chōo̍ mbō tōfā o̍ nɛ̄ī. Ō wa̍ būūla᷄ŋndo̍ kpe̍e̍kpe̍i̍ le̍ kɔ̍fu̍ Mɛ̄lɛ̄ka̍a̍. Mɛ̄ɛ̍ pōo̍ ho̍ō fūūlu̍u̍ chi̍e̍e̍ mbo̍ kɔ̍ do̍u̍nu᷄ŋ wa᷅ŋnda̍ ko̍na̍ a̍ chɔ̄ūwo̍ o̍kɔ̄ɔ̄, mi̍ ye̍e̍la̍ŋ lā tīū chi̍o̍o̍ kpo̍u̍.

¹⁴Mɛ̄ɛ̍ I̍lā tu̍e̍ī wāŋnda̍ bɔ̄ɔ̄lūū bɛ̄ndōo̍, mbo̍ nyūnā āā, “Wo̍o̍lūŋ wo̍o̍lūŋ bɛ̄ndū yɛ̄ɛ̍nɛ̍ su̍a̍ā yɛ̍ ho̍ō?” Mi̍ po̍ hi᷅ŋ a̍ yōōŋgōo̍ wo̍ ō nya̍a̍nu᷄ŋ na̍a̍ I̍lā chu̍a̍ le̍ mbō kɔ̍ do̍u̍nu᷄ŋ ndu̍ ko̍na̍.

¹⁵Ndu̍yɛ̍ a̍ te̍le̍ŋ ko̍ŋ, I̍lā wa̍ ni᷅ŋ ō yūvɛ̍i̍ ku̍ndɛ̍ɛ̄ bɛ̄ndū, ō wa̍ wɔ̄sīla̍ŋ be̍le̍ ŋɔ̍ma̍hīɔ̍ɔ̍lu̍ a̍ lā ŋɔ̄ma̍a̍ (98). Bōōndi̍i̍ ke̍ŋ ni᷅ŋ ndu̍ o̍o̍ chi᷅ lɛ̍ le̍.

¹⁶Mi̍ pōo̍ kɔ̍ di̍mūl ndu̍ āā, “O̍ chɔ̄ūwo̍ lāchī ya̍ I̍ cho̍ nu̍a̍ā fūlāa̍ ni̍ fāllo̍. Nyāānɔ᷄ŋndo̍ ya̍ I̍ nya̍a̍nu̍ŋ ni̍ mi̍ hu᷅ŋ.” Mi̍ I̍lā nyu̍na̍ ndu̍, āā, “Vɛ̄ɛ̄ chɔ̍ūwo̍ kūɛ̄ yɛ̄ po̍ nūu̍.”

¹⁷Mi̍ pōo̍ dīmūl ndu̍ āā, “Fīli̍i̍tīāŋnda̍ kɔ̍ yɔ̍m I̍sɔ̄lūɛ̍i̍ya̍ mi̍ I̍sɔ̄lūɛ̍i̍ya̍ nyāānu̍ŋ. Ndu̍yɛ̍ ma̍ dīū I̍sɔ̄lūɛ̍i̍ya̍ dīūwo̍ pīla̍. Pūa̍a̍ nu̍m ā ŋīɔ̍ɔ̍ŋnda̍ bɛ̍ɛ̍ ā dīī nda̍. O̍ ko̍ŋ kɔ̍ɔ̍lī, ma̍ bīī vɛ̄lɛ̄ kɔ̍fu̍ si̍m le̍ kpe̍ma̍ Mɛ̄lɛ̄ka̍a̍ wo̍ ma̍ kūānu᷄ŋ a̍ ndu̍.”

¹⁸Mɛ̄ɛ̍ I̍la̍i̍ tu̍e̍ī māā ā bīī kɔ̍fu̍ Mɛ̄lɛ̄ka̍a̍, mbo̍ mīīŋgū a̍ mākɔ̄ɔ̄ mbo̍ dēl. Ndu̍yɛ̍ chēlu̍llo̍ pīla̍ ndu̍ o̍o̍ che̍lu̍l ni̍, ō wa̍ ni᷅ŋ vɛ̄lɛ̄ ō yūvɛ̍i̍ ku̍ndɛ̍ɛ̄. Dēlɔ̄ɔ̄ o̍ de̍l ko̍ŋ ndo̍ mbo̍ yām kɛ̄se̍i̍ mbo̍ wū. I̍lā to̍sa̍ māsāle̍ŋ I̍sɔ̄lūɛ̄ī le̍ wɔ̄sīla̍ŋ be̍le̍-hi̍ɔ̍ɔ̍lu̍ mbo̍ wū.

¹⁹Ndu̍yɛ̍ a̍ te̍le̍ŋ ko̍ŋ, po̍ I̍lā wo̍, Fīni̍ha̍a̍sī, la̍a̍ ndɔ̄ ō wa̍ a̍ yo᷄llo̍. Te̍le̍ŋ ndɔ̄ vi̍a̍lāa̍ ndu̍ o̍o̍ fu̍u̍lu̍u̍ ni᷅ŋ. Mɛ̄ɛ̍ chūa̍a̍ ho̍ō tu̍e̍ī māā ā bīī kɔ̍fu̍ Mɛ̄lɛ̄ka̍a̍, ndu̍yɛ̍ mbo̍ tūɛ̄ī vɛ̄lɛ̄ māā pɔ̍nɔ̍ ndɔ̄ bɛ̍ndū ni̍ a̍ pɔ̍nɔ̍ ndɔ̄ māā ā vi̍, o̍ lē pīlɛ̍ ni᷄ŋ kpe̍ mi̍ pūle̍i̍ kāndū ndu̍ nɛ̄īyo̍ O̍ ko̍ŋ kɔ̍ɔ̍lī mbo̍ vīālū pōo̍. Kɛ̍ ndu̍ pi̍la̍ ve̍ o̍ fo̍ndā le̍.

²⁰Mɛ̄ɛ̍ o̍ wa̍ pīɔ̍mndo̍, mi̍ wāŋ lāāndūa̍a̍ wa̍ ndu̍ īkɛ̄i̍ ya̍ ā dīmūl ndu̍ a̍a̍ “Chūa̍a̍ kɛ̍si̍ kɔ᷅llo̍ fɔ̍, mi̍ chē mɛ̄ɛ̍ ŋ̄ vēlū wānā pɔ̍nɔ̍ɔ̍ yɛ̍.” Kɛ̍ ō ye᷄ŋ nda̍ lānī le̍. Ndu̍yɛ̍ ō mūli̍ nda̍ dīōm te̍.

²¹Mbo̍ ke̍ po̍ o̍ vēlū ko̍ŋ ndo̍ dīōla̍ŋ āā I̍ka̍bɔ̄ɔ̄,[1] mbo̍ dīmī āā, “I̍sɔ̄lūɛ̍i̍ya̍, bɛ̄ɛ̄le̍ Mɛ̄lɛ̄ka̍le̍ wa̍ nda̍ chōo̍ le̍ŋ lē chūū.” Sa̍bū o̍ di̍mi̍ le̍nde̍ wo̍ cho̍ ni̍, māā le̍ mɛ̄ɛ̍ nda̍ bīī kɔ̍fu̍ Mɛ̄lɛ̄ka̍a̍ ma̍ kūānu᷄ŋ a̍ ndu̍, ndu̍yɛ̍ a̍ le̍ mɛ̄ɛ̍ pɔ̍nɔ̍ ndɔ̄ bɛ̍ndū nda̍ pɔ̍nɔ̍ ndɔ̄ a̍ vi᷅ yɛ̍.

²²Mbo̍ di̍mī āā, “Kɔ̍fu̍ si̍m le̍ kpe̍ma̍ Mɛ̄lɛ̄ka̍a̍ wo̍ kɔ᷄ŋnda̍ŋ ndāŋ, bɛ̄ɛ̄le̍ Mɛ̄lɛ̄ka̍le̍ wa̍ I̍sɔ̄lūɛ̍i̍ya̍ chōo̍ le̍ŋ lē chūū.”