Read Southern Kisi Sa̍a̍mi̍ɛ̍ɛ̄ Tāso̍o̍ 6 Bible Online

Sa̍a̍mi̍ɛ̍ɛ̄ Tāso̍o̍ 6 - Southern Kisi bible

Sa̍a̍mi̍ɛ̍ɛ̄ Tāso̍o̍ 6

¹Kɔ̍fu̍ Mɛ̄lɛ̄ka̍ Ya̍a̍wɛ̄ɛ̄ wo̍ ō chīī pāŋgo̍ŋ ŋ̄ ŋɔ᷄mmɛ̍ū o̍ lɛ̄ŋndē Fīli̍i̍tīāŋnde̍ŋ ni᷄ŋ.

²O̍ ko̍ŋ kɔ̍ɔ̍lī, mi̍ Fīli̍i̍tīāŋnda̍ vēēlū wānāa̍ ndāā vi̍a̍māā lāyāwāa̍ a̍ wānāā ndāā so̍līāā lāsa̍lāa̍ kpo̍u̍ nāa̍ pi᷅lɛ̍. Ma̍ nyūnā nda̍ āā, “Ō yɛ̄ɛ̍nɛ̍ na̍a̍ ŋ̄ tōsa̍ yɛ̍ a̍ kɔ̍fu̍ Mɛ̄lɛ̄ka̍ Ya̍a̍wɛ̄ɛ̄ wo̍ ho̍ō? Lā chɔ᷄m ndɔ̍ na̍a̍ mɛ̄ɛ̍ na̍a̍ ŋ̄ lōōkū ndu̍ mīŋgī yɛ̍.”

³Mi̍ wāŋnda̍ ha̍ā dīmūl nda̍ āā, “Tē lā wa̍ kɔ̍fu̍ Mɛ̄lɛ̄ka̍ I̍sɔ̄lūɛ̍i̍ya̍ mīŋgīo̍o̍ pɛ̍, lā mi̍ŋgī ndu̍ fo̍ndō le̍. Mɛ̄ɛ̍ mī lā ke᷄ Mɛ̄lɛ̄ka̍ I̍sɔ̄lūɛ̍i̍ya̍ nyɛ̄ le̍ mbō ma᷄l nya̍ le̍ yɔ̄ŋndā nyāla̍ wɔ̍ɔ̍ŋnda̍ŋ. Ko̍ŋ to̍sā ni̍ mī nāa̍ ho̍ō ō fūla̍ nya̍ tɛ̄ɛ̄ŋ, ndu̍yɛ̍ mī lā sīna̍ vɛ̄lɛ̄ le̍ sa̍bū kpe̍e̍kpe̍i̍ o̍ tu̍si̍ nya̍ nyɛ̄ pālāa̍ ho̍ō chōo̍ wo̍.”

⁴Mi̍ Fīli̍i̍tīāŋnda̍ lō o̍ ko̍ŋ ma̍ nyūnā nda̍ āā, “Kɛ̄ ō yɛ̄ɛ̍nɛ̍ kpe̍e̍kpe̍i̍ na̍a̍ ŋ̄ ke̍ yɛ̍ ndu̍?” Mi̍ wāŋnda̍ dīmūl nda̍ āā, “Lā tēēŋgi̍a̍a̍ ko̍o̍līi̍yo̍ŋ mī lā tūūla̍ nyɔ̄ɔ̍ŋ sālā ŋūɛ̍ɛ̍nu̍ māā lāhīndɔ̄ɔ̄, mī lā tūūla̍ vɛ̄lɛ̄ bɛ̄lla̍ ā ŋūɛ̍ɛ̍nu̍. Nyɛ̄m sālā ŋūɛ̍ɛ̍nu̍ŋ nya̍ chō mu̍ŋ tu̍u̍lā wo̍ŋ ni̍, a̍ bɛ̄lāā ŋūɛ̍ɛ̍nu̍a̍a̍ nya̍ chō ka̍ŋ tu̍u̍lā wa̍, nda̍ si̍m le̍ māsāa̍ māFīli̍i̍tīāŋāā ŋūɛ̍ɛ̍nu̍a̍a̍ ni̍. Fo̍ndōle̍, nāā pīlɛ̍ de̍l nya̍ ho̍ō chōo̍ wo̍, nda̍ bɛ̍ɛ̍ mbo̍ dēl nda̍ chōo̍.

⁵Le̍la̍ŋ lā tūūla̍ nyɔ̍ɔ̍ŋ sālā ŋūɛ̍ɛ̍no̍o̍ māā lāhīndɔ̄ɔ̄, a̍ mu᷅ŋ māā lābɛ̄lɛ̄, ŋ̍ cho̍ lɛ̄ŋndē nyā le̍ŋ tɛ̄ɛ̄mbūūwo̍ wo̍ŋ. O̍ ko̍ŋ, mī lā sāŋga̍la̍ Mɛ̄lɛ̄ka̍ I̍sɔ̄lūɛ̍i̍ya̍. Nāa̍ pu̍m ndɔ̍ɔ̍ mbō fāŋa̍ dɛ̍nɛ̍ pa̍lāā o̍ tu̍si̍ nya̍, a̍ mɛ̄lɛ̄ka̍a̍ nyāa̍, a̍ lɛ̄ŋndē nyāle̍ŋ ndo̍ chōo̍.

⁶Lā vɛ᷅ mi̍ lā wā kɔ̄ltā nyāla̍ŋ kīndīo̍o̍ mɛ̄ɛ̍ māsā bɛ̍ndōo̍ I̍chi̍pī nda̍ wāŋnda̍ I̍chi̍pī a̍ ki̍ndi̍ kɔ̄ltā ndāla̍ŋ te̍le̍ŋ Mɛ̄lɛ̄ka̍ ndu̍ o̍o̍ ku̍ɛ̄ le̍ wānāā ndūa̍a̍ sōlīo̍o̍ I̍chi̍pī wo̍? Mɛ̄ɛ̍ ka̍a̍ma̍ālā o̍ to̍sa̍ lo̍ŋ nda̍ŋ, la̍ŋ te̍ la̍ to̍sa̍ ma̍ māl wānāa̍ Mɛ̄lɛ̄ka̍a̍ ma̍ fūlā lo̍ŋ te̍?

⁷Le̍la̍ŋ, lā tōōsi̍a̍a̍ nyɛ̍ nyāāna᷄ŋ sūa̍a̍ ā nāŋ ndo̍ ō sɛ̄nɛ̄īyo̍, mī lā bīī nāūwāā nda̍ be̍e̍ wɔ̍ yɔ̄mīī nda̍ kɛ̄sī na̍ūwa̍ o̍ kɛ̄su̍ le̍ wāa̍ wo̍ le̍ wa̍ ā ŋīɔ̍ɔ̍ŋ, mī lā bāa̍ nda̍ yɔ̄mīī kēŋ o̍ lākɛ̄su̍, mī lā bāa̍ nda̍ o̍ nyɛ̄ nyāāna᷄ŋ sɛ̍nɛ̄ī nya̍ tōōsi̍a̍a̍ ko̍ŋ ndo̍. Kɛ̍ mī lā mīīŋgu̍ a̍ chūāūwāā ndāa̍ o̍ chīɛ̄ī nda̍ māndā chɔ̍lūa̍a̍ wo̍.

⁸O̍ ko̍ŋ kɔ̍ɔ̍lī, mī lā chūa̍ kɔ̍fū kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍, mī lā kɛ̄si̍ ndu̍ o̍ nyɛ̄ nyāāna᷄ŋ ko̍ŋ chōo̍. Ndu̍yɛ̍ mī lā chu̍a̍ nyɛ̄m nya̍ tōōsi̍a̍a̍ mu̍ŋ a̍ ko̍o̍līi̍yo̍ŋ, le̍ mī la̍ kɔ̍ yɔ̍ŋgū māā lākē, le̍ mālɔ̄ɔ̍ sɔ̄lāa̍ le̍ yɔ̄ŋndā wɔ̍ɔ̍ŋnda̍ŋ ndo̍ŋ, o̍ kɔ̍fū la̍ŋ ni᷄ŋ, mī la̍ kɛ̄si̍ kɔ̍fū lā lāŋ o̍ nyɛ̄ nyāāna̍ŋ ko̍ŋ ni᷄ŋ o̍ kɔ̍fū kpe̍ma̍a̍ īkɛ̄i̍. Mī lā ma᷄l nyɛ̄ nyāāna᷄ŋndo̍ mbō kūɛ̄ a̍ bāndɔ̄.

⁹Ndu̍yɛ̍ lā wa̍ ndu̍ tōfāa̍, tē ō wā ni̍ŋ pɛ̍ kɔ᷅la̍ŋ kūmbū lɛ̄ŋndē ndɔ̄le̍ŋ, Bɛ̄tī Si̍a̍mɛ̍sī chi̍e̍e̍. Tē ō wa̍ pɛ̍ mī lā chē ndu̍ kɔ̄la̍ŋ kūmbū kōŋ, mɛ̄ɛ̍ ko̍ŋ chɔ̍m ni̍ māā Mɛ̄lɛ̄ka̍ Ya̍a̍wɛ̄ɛ̄ tu̍si̍ nya̍ dɛ̍nɛ̍ pa̍lāā bɛ̄ndū kōŋ chōo̍ ni̍. Kɛ̍ tē o̍ ku̍e̍ ku̍mbū kōŋ te̍, mɛ̄ɛ̍ lā chō sīnā māā ō cho̍ ndu̍ le̍ tu̍si̍ nya̍ nyɛ̄ pālāā kōŋ chōo̍ le̍. Ō wā ni̍ŋ ko̍ mɛ̄ɛ̍ nyɛ̄ hūŋ nu̍a̍ā le̍ wānā yɔ̍nɔ᷄ŋndo̍ ndu̍yɛ̍ mbō ō yɔ̄nu̍ŋ ndu̍ yɛ̍, ndu̍ yɔ̍nūŋ ni̍ŋ a̍ nya̍ ni̍.”

¹⁰O̍ ko̍ŋ kɔ̍ɔ̍lī, mi̍ pūa̍a̍ Fīli̍i̍tīāŋnda̍ ā tōsā mɛ̄ɛ̍ wāŋnda̍ ā dīmu̍l nda̍ yɛ̍. Ma̍ bīī nāūwāā nda̍ be̍e̍ wɔ̍ yɔ̍mīī nda̍ bāā na̍ūwa̍ o̍ kɛ̄su̍ le̍ wa̍ ā ŋīɔ̍ɔ̍ŋ, ma̍ bāā nda̍ yɔ̄mīī kēŋ o̍ lākɛ̄su̍, ma̍ bāā nda̍ o̍ nyɛ̄ nyāāna᷄ŋ sɛ̍nɛ̄ī nda̍ tōōsi̍a̍a̍ ko̍ŋ ndo̍. O̍ ko̍ŋ, ma̍ kɔ̍ wo̍ū chūāūwāā ndāa̍ o̍ chīɛ̄ī nda̍ māndā chɔ̍lūa̍a̍ wo̍ ni᷄ŋ, ma̍ bāŋ nda̍ dīo̍ kɔ̄ɔ̄lī.

¹¹O̍ ko̍ŋ kɔ̍ɔ̍lī, ma̍ kɛ̄sī kɔ̍fū kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍, a̍ kɔ̍fū nda̍ wōu̍ bɛ̄lāā ŋūɛ̍ɛ̍nu̍a̍a̍, a̍ nyāa̍ cho̍ māā hīndɔ̄ɔ̄ nda̍ tōōsi̍a̍a̍ ka̍ŋ a̍ ko̍o̍līi̍yo̍ŋ nda̍, o̍ nyɛ̄ nyāāna᷄ŋndo̍ chōo̍.

¹²Ndu̍yɛ̍, mi̍ nāūwāā ŋīɔ̍ɔ̍ŋāā ka̍ŋ ā kūā le̍nde̍ sa̍kpō o̍ nɛ̄i̍ nda̍ wa̍ chōo̍ wo̍, a̍ nyɛ̄ nyāāna᷄ŋndo̍ kūmbu̍ Bɛ̄tī Si̍a̍mɛ̍sī chi̍e̍e̍ wo̍. Ā sēī o̍ bā kɛ̄ndɛ̄ chōo̍, kɛ̄lɛ̄ŋgāā o̍ bā mīāl chōo̍ le̍. Ndu̍yɛ̍ mi̍ mɛ̄lɛ̄ka̍ā Fīli̍i̍tīāŋnda̍ sōōlūū wa̍ ā sīm nda̍ lāchī ma̍ fūūlūū nda̍ o̍ pɛ̄ŋgu̍la̍ŋ Bɛ̄tī Si̍a̍mɛ̍sī chi̍e̍e̍.

¹³A̍ te̍le̍ŋ ko̍ŋ, wāŋnda̍ Bɛ̄tī Si̍a̍mɛ̍sī chi̍e̍e̍ a̍ wa̍ wi̍tīi̍ŋ nda᷄ŋ kōwɔ̄ɔ̍ o̍ lɛ̄ŋndē dɛ̍ŋgbɛ̍le̍ŋ ni᷄ŋ, ndu̍yɛ̍ mɛ̄ɛ̍ nda̍ hēēlu̍ hɔ̄lāā ndāa̍ ma̍ chā kɔ̍fū kpe̍ma̍ Mɛ̄lɛ̄ka̍a̍, ma̍ dūāūnu᷄ŋ nya̍a̍le̍ le̍ chɔ̄ nda̍ chē ndu̍ wo̍.

¹⁴O̍ ko̍ŋ, mi̍ nāūwa̍ kūā a̍ nyɛ̄ nyāāna᷄ŋ ko̍ŋ o̍ kpe̍le̍ Chɔ̄ɔ̍sūāā wo̍ ni᷄ŋ, Bɛ̄tī Si̍a̍mɛ̍sī chi̍e̍e̍, ma̍ kɔ̍ si᷅m a̍ ndu̍ o̍ pōū tɔ̍ɔ̍ma̍ bɛ̍ndu̍ wa̍ lo̍ŋ ndo̍ īkɛ̄i̍. O̍ ko̍ŋ, mi̍ wāŋnda̍ tɛ̄ɛ̄ndīāā yɔ̄mīī nda̍ tōōsi̍a̍a̍ nyɛ̄ nyāāna᷄ŋndo̍ ve̍, ma̍ dīī nāūwa̍ ma̍ sōlī nda̍ sa̍lā lūāmāa̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍.

¹⁵O̍ ko̍ŋ kɔ̍ɔ̍lī, mi̍ Li̍va̍īya̍ ā tūsī kɔ̍fū kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍, a̍ kɔ̍fu̍ wa̍ ndu̍ īkɛ̄i̍ mi̍ nyɛ̄m nda̍ tōōsi̍a̍a̍ a̍ ko̍o̍līi̍yo̍ŋ ndo̍ŋ ŋ̄ wā lēni᷄ŋ ndo̍. Ma̍ chūā nyɛ᷄m wa̍ mu̍ŋ o̍ kɔ̍fū ko̍ŋ ni᷄ŋ ndo̍ŋ ma̍ kɛ̄sī mu̍ŋ o̍ pōū tɔ̍ɔ̍ma̍ bɛ̍ndū kōŋ chōo̍. O̍ ko̍ŋ, mi̍ pūa̍a̍ Bɛ̄tī Si̍a̍mɛ̍sī chi̍e̍e̍ a̍ so̍lī sa̍lā lūāmāa̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍ o̍ pāa̍le̍ le̍ŋ chōo̍.

¹⁶Mɛ̄ɛ̍ mɛ̄lɛ̄ka̍ā ŋūɛ̍ɛ̍nu̍a̍a̍ Fīli̍i̍tīāŋnda̍ ā chē nyɛ̍ yɔ̍nu̍ŋ ho̍ō wo̍, ma̍ mīīŋgu᷄ŋ Ɛ̍ki̍lɔ̄ŋ pāa̍le̍ le̍ŋ.

¹⁷Nyāa̍ wa̍ ka̍ŋ a̍ to̍o̍sīāā a̍ ko̍o̍līi̍yo̍ŋ māā lāhīndɔ̄ɔ̄, mi̍ Fīli̍i̍tīāŋnda̍ ā yɔ̄ŋgū māā kīo̍o̍ le̍ mī Mɛ̄lɛ̄ka̍ Ya̍a̍wɛ̄ɛ̄ o̍ ma̍l nda̍ le̍ yɔ̄ŋndā ndāla̍ wɔ̍ɔ̍ŋnda̍ŋ nda̍, nda̍ wa̍ ka̍ŋ ni̍, ō pīlɛ̍ wa̍ le̍ A̍si̍dɔ̍dī chi̍e̍e̍, ō pīlɛ̍ wa̍ le̍ Ka̍a̍sā chi̍e̍e̍, ō pīlɛ̍ wa̍ le̍ A̍si̍kɛ̍lɔ̄ŋ, ō pīlɛ̍ wa̍ le̍ Ka̍tī chi̍e̍e̍, a̍ ō pīlɛ̍ le̍ Ɛ̍ki̍lɔ̄ŋ chi̍e̍e̍.

¹⁸Bɛ̄lāā ŋūɛ̍ɛ̍nu̍a̍a̍ nda̍ tōōsi̍a̍a̍ ka̍ŋ a̍ ko̍o̍līi̍yo̍ŋ nda̍ bɛ̍ɛ̍, ō kɛ᷅ kɛ̄ ndu̍ o̍o̍ si̍m le̍ chi̍e̍e̍ŋ wa̍ ŋ̄ tōōsīāā ŋ̄ kālā ka̍lā wo̍ŋ, a̍ sɔ̄ndɔ̄kɔ̍lta̍ Māsāā Bɛ̍ndūāā ŋūɛ̍ɛ̍nu̍a̍a̍ ā wa̍ īchāli̍ wo̍ŋ ō pīlɛ̍. Pōū tɔ̍ɔ̍ma̍ bɛ̄ndū nda̍ kɛ̄si̍ kɔ̍fū kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍ īkɛ̄i̍, o̍ wā o̍ kpe̍le̍ Chɔ̄ɔ̍sūāā wo̍ ni᷄ŋ Bɛ̄tī Si̍a̍mɛ̍sī wo̍, ō chō tāāmāsi̍o̍o̍ a̍ pāa̍le̍ hāūle̍ŋ nde̍ŋ.

¹⁹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍ī pūa̍a̍ Bɛ̄tī Si̍ɛ̍mɛ̍sī ā ti᷄ŋ, kāni̍ fo̍ndōle̍ le̍ mɛ̄ɛ̍ nda̍ nūa̍ o̍ kɔ̍fū kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ ndo̍. O̍ ko̍ŋ, mi̍ wāŋnda̍ bīī mɔ̍nɛ̍i̍ ta̍u̍ ta̍u̍ le̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍ī wāŋnda̍ nda̍ tɛ̄ɛ̄ŋ dīyɔ̄ɔ̍ pīla̍ yɛ̍.

²⁰O̍ ko̍ŋ, mi̍ pūa̍a̍ Bɛ̄tī Si̍a̍mɛ̍sī chi̍e̍e̍ a̍ di̍mī āā, “Ō nɛ̄ɛ̍nɛ̍ si᷅m yɛ̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l, Mɛ̍lɛ̄ka̍ dīāndāa̍ ho̍ō? Ndu̍yɛ̍ kūɛ̍ɛ̍nɛ̍ na̍a̍ ŋ̄ yɔ̄ŋgū yɛ̍ ndu̍ mī ŋ̄ fāŋa̍ ndu̍ na̍a̍ īkɛ̄i̍?”

²¹O̍ ko̍ŋ kɔ̍ɔ̍lī, ma̍ yɔ̄ŋ ki̍i̍la̍a̍ o̍ wāŋnda̍ kīlīāātī Chi̍a̍a̍lūīm ndo̍ lo̍, le̍ mā dīmu̍l nda̍ āā, “Fīli̍i̍tīāŋnda̍ a̍ mīŋgi̍ kɔ̍fū kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍. Lā hu̍ŋ mī lā kūɛ̄ a̍ ndu̍.”