Read Southern Kisi Sa̍a̍mi̍ɛ̍ɛ̄ Tāso̍o̍ 7 Bible Online

Sa̍a̍mi̍ɛ̍ɛ̄ Tāso̍o̍ 7 - Southern Kisi bible

Sa̍a̍mi̍ɛ̍ɛ̄ Tāso̍o̍ 7

¹O̍ ko̍ŋ, mi̍ wāŋnda̍ Kīlīāātī Chi̍a̍a̍lūīm a̍ hu̍ŋ chu̍ā kɔ̍fu̍ Mɛ̄lɛ̄ka̍ Ya̍a̍wɛ̄ɛ̄ wo̍ ma̍ kūā a̍ ndu̍. Po̍ pi᷅lɛ̍ wa̍ o̍ chi̍o̍o̍ ho̍ō ni᷄ŋ dīōla̍ŋ āā Ābi̍na̍dāā. Pōo̍ ho̍ō chīɛ̄ī ndɔ̄ɔ̍ ō pēmbēi̍ chōo̍ o̍ wa̍ ni̍. Mɛ̄ɛ̍ nda̍ fūūlu̍u̍ a̍ kɔ̍fōo̍ ho̍ō, ma̍ kūā a̍ ndu̍ o̍ pōo̍ ho̍ō lo̍ chi̍ɛ̍ī ni̍ŋ ma̍ kɔ̍ kɛ̍sī ndu̍ lo̍ŋ. Ābi̍na̍dāā ko̍ŋ ndu̍ o̍o̍ nɔ̍ pōo̍ dīōla̍ŋ āā Ɛ̄li̍a̍a̍sā. O̍ ko̍ŋ, ma̍ hɛ̄lī po̍ ndɔ̄ ko̍ŋ ma̍ māl ndu̍ Mɛ̄lɛ̄ka̍ o̍ bā le̍ mbō wa̍ kɔ̍fu̍ Mɛ̄lɛ̄ka̍ Ya̍a̍wɛ̄ɛ̄ wo̍ māndāa̍.

²Mbo̍ kūā a̍ te̍le̍ŋ vi̍lɛ̄ī kɔ̍fu̍ Mɛ̄lɛ̄ka̍ Ya̍a̍wɛ̄ɛ̄ wo̍ ō chō Kīlīāātī Chi̍a̍a̍lūīm chi̍e̍e̍, fa̍ū fa̍ū ō chīi̍ wɔ̄sīla̍ŋ bi̍dīi̍ŋ lo̍ŋ. O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ mu̍li᷄ŋ nāa̍ Mɛ̄lɛ̄ka̍ Ya̍a̍wɛ̄ɛ̍ chu̍a̍ a̍ cha᷄ŋ ndo̍, ma̍ wā ndu̍ vɛ̄lɛ̄ sōōlūūwo̍.

³Mi̍ Sa̍a̍mi̍ɛ̍ɛ̄ lo᷅ o̍ ko̍ŋ mbo̍ dīmūl nda̍ kpo̍u̍ āā, “Tē ō wa̍ pɛ̍ māā a̍ kɔ̄ltā nyāla̍ŋ kpo̍u̍ nya̍ chō mūli᷄ŋndo̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍ ni̍, mɛ̄ɛ̍ nyɛ̄ o̍ nyɛ̄ nya̍ chō sōōlūūwo̍ māā mɛ̄lɛ̄ka̍a̍ nya̍, lātūlu̍ a̍ ō nya̍ vēēlū āā Āsīta̍tɛ̄ɛ̄ wo̍, mɛ̄ɛ̍ lā sōli̍ŋ mu̍ŋ nya̍ tɛ̄ɛ̄ŋ mī lā tɛ̄ɛ̄mbu̍u̍ mu̍ŋ kpo̍u̍. O̍ ko̍ŋ kɔ̍ɔ̍lī, mī lā yɔ̄ŋgu̍ kɔ̄ltā nyāla̍ŋ kpo̍u̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍, ndu̍yɛ̍ mī lā sōōlu̍u̍ ndu̍ ndu̍ pīlɛ̍ kpe̍. Ko̍ŋ to̍sā ni̍ mī Mɛ̄lɛ̄ka̍ chīīndi̍a̍a̍ yōōmūlā nyāla̍ŋ Fīli̍i̍tīāŋnda̍ o̍ bā.”

⁴O̍ ko̍ŋ, nyɛ̄m wāŋnda̍ I̍sɔ̄lūɛ̍i̍ya̍ nda̍ a̍a̍ so̍o̍lūū māā Mɛ̄lɛ̄ka̍a̍ nda̍ mā vēēlū mu̍ŋ āā Bāāl a̍ Āsīta̍tɛ̄ɛ̄ wo̍ŋ, ma̍ tɛ̄ɛ̄mbūū mu̍ŋ kpo̍u̍, ma̍ wā ni᷅ŋ Mɛ̄lɛ̄ka̍ Ya̍a̍wɛ̄ɛ̄ sōōlūūwo̍ ndu̍ pīlɛ̍ kpe̍.

⁵O̍ ko̍ŋ kɔ̍ɔ̍lī, mi̍ Sa̍a̍mi̍ɛ̍ɛ̄ di̍mūl nda̍ āā, “Nya̍ I̍sɔ̄lūɛ̍i̍ya̍ kpo̍u̍ lā chūūŋgi̍āŋ Mi̍si̍pā chi̍e̍e̍, mī kɔ̍ pi̍ɛ̍ī Mɛ̄lɛ̄ka̍ Ya̍a̍wɛ̄ɛ̄ le̍ nya̍.”

⁶O̍ ko̍ŋ, nda̍ kpo̍u̍ ma̍ chūūŋgi̍āŋ Mi̍si̍pā chi̍e̍e̍. O̍ ko̍ŋ kɔ̍ɔ̍lī, ma̍ kūāndū mɛ̄ŋnda̍ŋ o̍ so̍o̍ŋndo̍ ni᷄ŋ,[2] ma̍ tālā ma̍ŋ Mɛ̄lɛ̄ka̍ Ya̍a̍wɛ̄ɛ̍ o̍ hɔ̄l māā sa̍lā. Ma̍ lō o̍ ko̍ŋ ma̍ bīī su᷅mndo̍ le̍ pāa̍le̍ŋ kpɛ᷅ŋ, ndu̍yɛ̍ ma̍ chɔ̄ɔ̄mūū yɔ̄ŋndā ndāla̍ wɔ̍ɔ̍ŋnda̍ŋ Mɛ̄lɛ̄ka̍ lāchī, ma̍ dīmūl ndu̍, āā, “Ōo̍ Mɛ̄lɛ̄ka̍ Ya̍a̍wɛ̄ɛ̄, ŋ̄ tōsa̍ yɔ̄ŋ wɔ̄ɔ̍ŋndo̍ a̍ nu̍m. Le̍la̍ŋ ma̍l na̍a̍ le̍ yɔ̄ŋ nāa̍ wɔ̍ɔ̍ŋndo̍.” (Ndu̍yɛ̍ Mi̍si̍pā lo̍ŋ Sa̍a̍mi̍ɛ̍ɛ̄ ndu̍ o̍o̍ di̍mī I̍sɔ̄lūɛ̍i̍ya̍ sɔ̄ɔ̍ŋ tɛ̄ɛ̄ŋ ni̍.)

⁷Mɛ̄ɛ̍ Fīli̍i̍tīāŋnda̍ ā tūēī māā wāŋnda̍ I̍sɔ̄lūɛ̄ī a̍ chu̍u̍ŋgi̍āŋ Mi̍si̍pā, mi̍ māsāā ŋu̍ɛ̍ɛ̍nu̍a̍a̍, Fīli̍i̍tīāŋnda̍, a̍ pūa̍a̍ ndāa̍ ā kūā le̍ I̍sɔ̄lūɛ̍i̍ya̍ chīŋa̍la᷅ŋ ndo̍ a̍ sɔ̍ŋgɔ̄ɔ̍. Mɛ̄ɛ̍ I̍sɔ̄lūɛ̍i̍ya̍ tūēī māā Fīli̍i̍tīāŋnda̍ ā chō nda̍ hūnɔ̄ɔ̄ chīŋa̍la᷅ŋ a̍ sɔ̍ŋgɔ̄ɔ̍, mi̍ sīōōŋnde̍ bīī nda̍.

⁸O̍ ko̍ŋ, mi̍ wāŋnda̍ I̍sɔ̄lūɛ̄ī a̍ di̍mūl Sa̍a̍mi̍ɛ̍ɛ̄ āā, “Pɛ̍ŋgī Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ pīɛ̄īyo̍ le̍ mbō pīŋi̍ na̍a̍ Fīli̍i̍tīāŋnda̍ o̍ bā le̍.”

⁹O̍ ko̍ŋ, mi̍ Sa̍a̍mi̍ɛ̍ɛ̄ bi̍ī sāā fɔ̍ŋndu̍a̍a̍ wa̍ wɔ̄ wūɛ̄īyo̍ wa̍, mbo̍ sōlī nda̍ sa̍lā lūāmāa̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍. Mbo̍ pīɛ̄ī Mɛ̄lɛ̄ka̍ Ya̍a̍wɛ̄ɛ̄ le̍ I̍sɔ̄lūɛ̍i̍ya̍, ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ mu̍lī pīɛ̄īlē ndɔ̄le̍ŋ.

¹⁰Mɛ̄ɛ̍ Sa̍a̍mi̍ɛ̍ɛ̄ o̍ wa̍ sa̍lā kōŋ sōlīo̍o̍, mi̍ Fīli̍i̍tīāŋnda̍ ā sɔ̄ɔ̄ŋgūū I̍sɔ̄lūɛ̍i̍ya̍ kpɛ̍ɛ̍lūŋ le̍ nda̍ chīŋa̍la᷅ŋ ndo̍ a̍ sɔ̍ŋgɔ̄ɔ̍. Kɛ̍, o̍ pāa̍le̍ le̍ŋ chōo̍, mi̍ ta᷅ŋnde̍ŋ lē fūlā o̍ fo̍nda᷄ŋ Mɛ̄lɛ̄ka̍ Ya̍a̍wɛ̄ɛ̄ wo̍ chōo̍ cho̍o̍, mi̍ le̍ dēl Fīli̍i̍tīāŋnda̍ chōo̍. O̍ ko̍ŋ, mi̍ sɛ̄ɛ̄ŋgi̍āŋndo̍ ō dēl Fīli̍i̍tīāŋnda̍ tɛ̄ɛ̄ŋ, mi̍ sīōōŋnde̍ bīī nda̍ ma̍ nyāānu᷄ŋ I̍sɔ̄lūɛ̍i̍ya̍.

¹¹O̍ ko̍ŋ kɔ̍ɔ̍lī, mi̍ pūa̍a̍ I̍sɔ̄lūɛ̄ī a̍ ma᷅l Mi̍si̍pā ma̍ tūāl Fīli̍i̍tīāŋnda̍ kɔ̄ɔ̄lī a̍ kīlta̍ŋ ha̍a̍a̍ Bɛ̄tīka̍ā, ma̍ dīū nda̍ o̍ nɛ̄ī lo̍ŋ.

¹²O̍ ko̍ŋ kɔ̍ɔ̍lī, mi̍ Sa̍a̍mi̍ɛ̍ɛ̄ chu̍ā pōūwo̍, mbo̍ kɛ̄sī ndu̍ Mi̍si̍pā a̍ Si̍ɛ̄ŋ tɛ̄ɛ̄ŋ, mbo̍ vēēlū fo̍ndā ko̍ŋ āā, Ɛ̄bīnɛ̍ɛ̍sā. Ko̍ŋ cho̍ ni̍ māā Po̍u̍ ma̍la̍ na̍a̍ wo̍. Mbo̍ dīmī āā, “Mɛ̄lɛ̄ka̍ Ya̍a̍wɛ̄ɛ̄ ma̍la̍ na̍a̍ ni̍.”

¹³O̍ ko̍ŋ, mi̍ I̍sɔ̄lūɛ̍i̍ya̍ ā yām Fīli̍i̍tīāŋnda̍, ndu̍yɛ̍ ā mīīŋgu̍ lɛ̍ o̍ būŋgɛ̄ī I̍sɔ̄lūɛ̄īve̍ ni᷄ŋ te̍. Ndu̍yɛ̍ Mɛ̄lɛ̄ka̍ Ya̍a̍wɛ̄ɛ̄ to̍sa̍ a̍ sa̍bū ni̍ māā Fīli̍i̍tīāŋnda̍ mi̍i̍ŋgū lɛ̍ mā kɔ̍ de᷅l I̍sɔ̄lūɛ̍i̍ya̍ chōo̍ a̍ sɔ̍ŋgɔ̄ɔ̍ le̍, ha̍a̍a̍ a̍ pālɛ̍i̍ Sa̍a̍mi̍ɛ̍ɛ̄ o̍ cho̍ yōōmū ve̍.

¹⁴O̍ ko̍ŋ kɔ̍ɔ̍lī, chi̍o̍o̍ŋ bɛ̍ndu᷄ŋ wa̍ Ɛ̍ki̍lɔ̄ŋ a̍ Ka̍tī tɛ̄ɛ̄ŋ, mi̍ Fīli̍i̍tīāŋnda̍ ā bīu̍ mu̍ŋ I̍sɔ̄lūɛ̍i̍ya̍ o̍ bā wo̍ŋ, mi̍ I̍sɔ̄lūɛ̍i̍ya̍ ā mīŋgī būŋgɛ̄ī ndɛ̄i̍ ke̍ŋ bīyɔ̄ɔ̄ Fīli̍i̍tīāŋnda̍ o̍ bā. O̍ ko̍ŋ, mi̍ kɔ̄l nyūlōo̍ ō mīīŋgū vɛ̄lɛ̄ I̍sɔ̄lūɛ̍i̍ya̍ nda̍ Ke̍na̍na̍i̍tīi̍ya̍ tɛ̄ɛ̄ŋ.

¹⁵Sa̍a̍mi̍ɛ̍ɛ̄ o̍ wa̍ I̍sɔ̄lūɛ̍i̍ya̍ chōo̍ ma̍sā ha̍a̍a̍ a̍ yōōmū ndɔ̄ɔ̍.

¹⁶Ndu̍yɛ̍, īwɔ̄sī o̍ īwɔ̄sī mbō kūɛ̄ Bɛ̍tɛ̄ɛ̄l, a̍ Ki̍lkāl, a̍ Mi̍si̍pā chi̍e̍e̍, ndu̍yɛ̍ mbo̍ tōōsīāā wāŋnda̍ sɔ̄ɔ̍ŋ tɛ̄ɛ̄ŋ lo̍ŋ.

¹⁷Tē ō chīi̍ sɔ̄ɔ̍ŋ tōōsīāā wāŋnda̍ tɛ̄ɛ̄ŋ o̍ chi̍o̍o̍ŋ mu᷅ŋ pɛ̍, ō mīīŋgu̍ Lu̍a̍mā. Kāni̍ fo̍ndōle̍, lo̍ŋ o̍ wa̍ o̍ cha᷄lta̍ŋ ni̍. Ndu̍yɛ̍ lo̍ŋ ko̍ni̍ vɛ̍lɛ̄ ndu̍ o̍o̍ to̍o̍sīāā sɔ̍ɔ̍ŋ wāŋnda̍ I̍sɔ̄lūɛ̄ī tɛ̄ɛ̄ŋ ni̍. Ndu̍yɛ̍ mbo̍ tāŋgūl ma̍āŋndo̍ le̍ Mɛ̄lɛ̄ka̍ Ya̍a̍wɛ̄ɛ̄ lo̍ŋ.