Read Southern Rengma Naga BINZEN 1 Bible Online

BINZEN 1 - Southern Rengma Naga bible

BINZEN 1

¹Binzen ka Sunggigü le tsangdan lo kezü gü thyüshü,

²kazü gü le a-zoja thame ndi lo nrun lo züda gü le tha aphu jehen pe züntin tse; lo Sunggigü kapu güle zü so nnu hü.

³Tsüka Sunggigü le, “Ben lolo,” tsonshü, tsontsin ben chwiryü la.

⁴Sunggigü le keben gü tsü shwi a-kenyü la; tson-o a-le kezün gü nyu keben gü khikho kecha thyü shü.

⁵Lo Sunggigü le keben gü pe “Nhenyu,” lo kezün gü pe “Kheje” tse kolo. Khejegwen le gü la-o lonyü le ryülo- tsüle jon keri gü.

⁶Lo Sunggigü le, “Zü jonyu cheng no bin lo, lo tsüno zü kenjün kho kenyhun thyü pe kechacha thyü lolo,” tsonkeshü ka tsühon tselo.

⁷Tson-o Sunggigü le cheng thyülo-o zü tsüso kebin dan lo a-hensin kebin dan khikho kecha thyülo.

⁸Lo Sunggigü le cheng tsü pe “Tsang” tse kolo. Khejegwen le gü lao lonyü le ryülo-- tsüle jon kenyhun gü.

⁹Tson-o Sunggigü le, “Tsang hensin zü dan no tsun-o bin nme ka kequen lo lao kazü kesin no chwiryü lolo,” tsonshü ntsin tsühontse lo.

¹⁰Sunggigü le n yon kesin gü pe kazü tse kolo, lo zü tsun kequen kelo gü pe züda tse kolo. Lo Sunggigü le tsü shwi a-kenyü la.

¹¹Tson-o Sunggigü le, “Kazü günyu shye nsha shü kehü lo a sha nsha shü kehü tehen lihi-e no yhun shülo,” tsonzo keshü ka tsü hontselo.

¹²Tson-o kazü gü le tehen kechacha aphu nyhunshü, lo Sunggigü le tsü shwi a-kenyü la.

¹³Khejegwen le gü lao lonyü le chwiryü-- tsüle jonshen gü.

¹⁴Lo Sunggigü le, “Tsangge keben no chwiryü kezün gü nyu keben khikho kecha thyülo; lo anyugun no zansüdan, gwenkho kechacha dan, keben jon dan lo chen dan thyü lolo, tsonshü;

¹⁵anyugun no tsangge ben-o keben khipe kazü gü tsülo”— tsontsin tsühontse lo.

¹⁶Tson-o Sunggigü le keben keda kenyhun thyüshü, gonkvu kethyü gü no nhenyu, lo keben kerho gü no khejenyu keda thyü lo tseshü; a-le shenyü dan ko thyüshü

¹⁷Sunggigü le tsü dan no kazü ben nrün genyu pe tsangge shüshü,

¹⁸tsüno nhenyu lo kheje ketsen, lo kezün nyu keben khikho la nrün genyu. Lo Sunggigü le tsü shwi a-kenyü la.

¹⁹Khejegwen le gülao lonyü le chwiryü-- tsü le jon zi gü.

²⁰Lo Sunggigü le, “Keyhun ronzin kebin kechacha kethyü kechon no zü nyu kesü thyülo; lo kazü so tsangne ki tegü no kesü thyülo.”

²¹Tson-o Sunggigü le züda nyu zürin dan, lo zünyu yhunkehü nyukhu kechacha aphu, lo a-sekin kepfü tegü kechacha thyüshü. Lo Sunggigü le tsü shwipe a-kenyü la.

²²Tson-o a-le jochü pe anyugun aphu tsüo zünyu yhun kehü nyukhu aphu no chvü kenye pe züda gü kesü thyülo, lo a-le tegü dan no chonkenye lolo tse zochü.

²³Kejegwen le gü la-o lonyü le chwiryü-tsü le jon pvün gü.

²⁴Lo Sunggigü le, “Kazü gü no nyukhu kechacha kethyü aphu: senru lo tehen thyü, keda lo keshe aphu no chwiryü lotse shü”, tsontsin tsü le tsonlo.

²⁵Tson-o Sunggigü le tsü aphu thyü shü. Lo a-le tsü shwi a-kenyü la.

²⁶Tson-o Sunggigü le zo, “Ngun temi thyüshü tile nu; Au no ngun hontse lo ngun rhenrhü hontse ti. Au no tsehü, tegü lo nyukhu aphu, senru lo tehenthyü keshe keda so gon ti.”

²⁷Tsü hontse Sunggigü le a-hontse kethyü temi nyhun shü. A-le peche nme lo tenu nme nyhun shü;

²⁸lo Sunggigü le jochü pe au tsüo, “Hai nyenyu kechon no binlo, tson-o hai tsipwen no kazü kesü thyüo tsü senlo lo. Ale hai pe tsehü, tegü, lo kazü so kehü kerhün ronzin kebin aphu kentsen gü thyü shü laso.

²⁹Ale hai no tyü nrün genyu shye lo terasha kechacha aphu ndo shü laso.

³⁰Ai tehen thyü, tegü, lo npfü kehü nyukhu aphu genyu jonyü kenjvü pe no a-chvü thyü lotse nda shü laso.

³¹Sunggigü le a-le thyü keshü shwi shü a-kenyü sala. Khejegwen le gülao lonyü le chwiryü”, tsüle jon tsero gü.